Mataupu 1
O Le Toefuataiga o le Talalelei—O Le Tatafa Mai o se Aso Fou
“Na tuuina mai lenei talalelei matagofie e ala i le faaali mai o le Tama ma le Alo i le taulealea o Iosefa.”
Mai le Soifuaga o Gordon B. Hinckley
I lona soifuaga atoa, sa faamalosia e Peresitene Gordon B. Hinckley le loloto o le faaaloalo mo tagata ma nofoaga sa aafia ai i le toefuataiga o le talalelei. Na ia lagona le faafetai faapitoa mo Iosefa Samita ma lana matafaioi i le Toefuataiga, ma sa ia saunoa i se “malosiaga olaola pea e molimau atu ai i le paia o le Alii ma le misiona a le Perofeta o Iosefa Samita.”1
I le 1935, a o malaga atu Gordon i lona aiga mai lana misiona i Egelani, sa asiasi atu ai o ia ma isi faifeautalai ua mae’a a latou misiona i le Togavao Paia ma le Mauga o Kumora. Sa latou asiasi atu foi i le Falepuipui i Carthage, lea sa tagatavaleina ai le Perofeta o Iosefa Samita ma Ailama Samita. Sa latou savalia auala pefu o Navu, sa liliuina ai e le Au Paia na faaaunuua se nofoaga faataufusi i se aai matagofie. E aunoa ma se masalosalo, o le toe tepa atu i tofotofoga ma manumalo o uluai Au Paia sa mamafa i le finagalo o Gordon a o i ai o ia i nei nofoaga ma a o ia faaauau atu i sisifo i le ala o paionia e agai atu i le Aai o Sate Leki.
Na toe foi atu Gordon B. Hinckley i nofoaga paia o le Toefuataiga i le tele o taimi i tausaga na muimuli mai. I le savali o le Kerisimasi a le Au Peresitene Sili ia Tesema 3, 2000, sa ia faasoa atu ai lenei aafiaga patino mai se asiasiga i le Togavao Paia:
“I ni nai tausaga ua mavae sa tofia ai au i le Konefesi a le Siteki o Rochester i Niu Ioka. I le Aso Toonai sa ou faapea atu i le usoga sa matou faatasi, ‘Tatou alapopo lava i le taeao, le taeao po o le Aso Sa, ma o atu i le Togavao Paia a o le’i faia le konefesi.’ Sa latou malilie uma lava. E pei ona i ai, i le taeao po o lena Sapati o le tautotogo, sa matou o atu ai ma le peresitene o le misiona, peresitene o le siteki, ma le sui risone, i Palmyra ma savavali i totonu o le togalaau. E leai ma se tasi na i ai iina. Sa toafilemu ma matagofie. Sa timu i le po. Sa i ai laulaau fou laiti i luga o laau.
“Sa matou fetautalaai o le tasi i le isi i ni leo filemu. Sa matou tootutuli i luga o le laufanua susu ma tatalo ai. Matou te le’i lagona se leo. Sa matou le’i vaai i se faaaliga. Ae i se ala e le mafaamatalaina sa tauina mai i o matou mafaufau, i matou taitoatasi, ioe, sa tupu lena mea iinei e faapei ona ta’u mai e Iosefa. O iinei na faaali mai ai le Atua lo tatou Tama e Faavavau ma Lona Alo Pele, le Alii toetu o Iesu Keriso, i le taulealea e 14 tausaga le matua ma talanoa ma ia. O lo la malamalama e lemafaatusalia sa oo mai i ona luga, ma sa faatonuina o ia i le mea e tatau ona ia faia.
“O lena mea ofoofogia na tupu, o le Uluai Faaaliga, na vavaeina ai pupuni ae na ala mai ai le toefuataiga i le lalolagi o le Ekalesia a Keriso. Sa sau i fafo mai le togavao o le pogisa, i fafo o le leai o se faamoemoe o tausaga ua mavae agai i se taeao mamalu o se aso fou. Na mulimuli mai ai le Tusi a Mamona o se tasi o molimau o le Alii o Iesu Keriso. O Lona perisitua paia ma mamalu sa toefuataiina mai i lalo o aao o i latou o e sa umiaina anamua. O ki ma mana sa faaeeina i luga o le Perofeta ma ana soatau. Ua toe i ai i luga o le fogaeleele le Ekalesia anamua faatasi ai ma faamanuiaga, mana, aoaoga faavae, ki, ma mataupu faavae uma o tisipenisione na muamua atu. O le Ekalesia a [Keriso]. O loo tauaveina Lona suafa. O loo taitaia e Lana perisitua. E leai se isi igoa i lalo o le lagi e ao ona faasaoina ai tagata. Na avea Iosefa Samita … ma Ana molimau maoae.”2
O le Uluai Faaaliga na amataina ai “le mataupu mulimuli i le faasologa umi o taualumaga a le Atua ma alii ma tamaitai i luga o le fogaeleele.”
Aoaoga a Gordon B. Hinckley
1
Ina ua mavae le maliu o le Faaola, sa faapea ona seesee atu ai le Ekalesia na ia faavaeina i le liliuese.
O [Iesu Keriso] sa ma o le tagata tutotonu sili lea o le talafaasolopito o le tagata, o le faatumutumuga o taimi ma vaitau o tagata uma.
A o le’i maliu o Ia, sa Ia faauuina Ana Aposetolo. Sa latou faaauauina mo se vaitaimi. Sa faatulagaina Lana Ekalesia.3
Ina ua mavae le maliu o le Faaola, sa agaigai malie atu le Ekalesia sa Ia faavaeina i le liliuese. Na faataunuuina ai upu a Isaia o le na faapea mai, “Ua leaga le nuu i e o nonofo ai; aua ua latou solia tulafono; ua latou liliuese le sauniga; ua latou solia le feagaiga e faavavau” (Isaia 24:5).4
Sa alaga atu tusi a Paulo ina ia malolosi soo o Keriso, ina nei o latou pauu atu i le ala o e amioleaga. Peitai, na iu lava ina manumalo le agaga o le liliuese.5
Na alu aso ma sau aso. Na i ai se ao pogisa i le lalolagi atoa. Sa faamatalaina e Isaia e faapea: “Aua faauta mai, e ufitia le lalolagi i se ao pouliuli, e ufitia foi nuu i le pogisa” (Isaia 60:2).
Sa o se vaitau o le vete ma le puapuaga, na faailogaina i fetauiga umi ma … Sa o se vaitaimi o le leai o se faamoemoe, o aso o matai ma auauna.
Na mavae atu le afe tausaga muamua, ae gafoa mai le meleniuma lona lua. O ona seneturi amata sa o se faaauauga o tulaga sa i ai muamua atu. Sa o se vaitaimi na tumu i le mata’u ma puapuaga.6
2
O le Toefaafouga [Renaissance] ma le Toefotua’i [Reformation] na fesoasoani e saunia le ala mo le toefuataiga o le talalelei.
Ae peitai, i lena vaitau umi o le pogisa, sa faamumuina se moliga’o. Na aumaia e le vaitau o le Toefaafouga, se fuga sa taufuifui mai ai aoaoga, o faatufugaga, ma le faasaienisi. O iina na oo mai ai se mau a ni alii ma tamaitai lototetele ma le totoa, o i latou ia sa vaavaai a’e i le lagi ma le agaga faafetai i le Atua ma Lona Alo paia. Tatou te faaigoaina o le Toefotua’i.7
Na galulue tagata toefotua’i e sui le ekalesia [Kerisiano], ae maise lava o tamalii e pei o Luther, Melanchthon, Hus, Zwingli, ma Tyndale. O tamalii nei o le lototele maoae, o nisi o i latou na tigaina ma maliliu i ni faiga faalealofa ona o o latou talitonuga. Na fanau a’e le FaaPorotesano ma lana foi tagi mo le toefotua’i. Ina ua le tupu lena toefotua’i, na faatu loa e tagata toefotua’i a latou lava lotu. Na latou faia e aunoa ma le pule o le perisitua. O le latou manao e tasi o le su’e lea o se nofoaga e mafai ona latou tapuai ai i le Atua e pei ona latou manatu na tatau ona tapuaia ai o Ia.
A o tupu lenei vevesi tele i le lalolagi Kerisiano, na faapea foi ona galulue le au faiupufai. Ona tulai mai lea o le Taua mo le Tutoatasi o Amerika [mai ia Peretania], na iu ai i le fanau mai o se malo sa tautino mai lona Faavae e faapea, e le tatau i le malo ona oo atu lana pule i mataupu tau tapuaiga. Na tafa ata o se aso fou, o se aso matagofie. O lea na le toe i ai se ekalesia e aafia ai le malo. Na leai se tapuaiga na sili atu i se isi tapuaiga.
I le mavae ai o seneturi o le pouliuli ma le tiga ma tauiviga, na oo i le taimi na saunia mo le toefuataiga o le talalelei. Na saunoa perofeta anamua e uiga i lenei aso ua loa ona faatalitali i ai.
O talafaasolopito uma o aso ua mavae na tusiaao mai i lenei vaitau. Na alu aso ma sau aso o seneturi ma o latou mafatiaga uma ma o latou faamoemoega uma. Na silafia e le Faamasino Silisili Ese o malo, o le Atua Soifua, ua oo mai le taimi lea na saunoa i ai perofeta. Na muai vaai Tanielu i se maa lea na tofia mai le mauga ae e le’i tofia i lima, ma na faapea ona avea ma se mauga tele na tumu ai le lalolagi [tagai Tanielu 2:35, 44].8
3.
Na tatala mai le Toefuataiga i le faaali mai o le Tama ma le Alo ia Iosefa Samita.
Ona mavae lea o le tele o augatupulaga, sa ola ai i le lalolagi—o le toatele naua i taua, o le feitaga’i, pogisa ma le amioleaga—ona oo mai ai lea o le aso maoae fou o le Toefuataiga. Sa tatala mai lenei talalelei mamalu i le faaali mai o le Tama ma le Alo i le taulealea o Iosefa.9
E maeu le ofoofogia o lena faaaliga i le tausaga e 1820 a o tatalo Iosefa i le vao ae faaali uma atu i ona luma le Tama ma le Alo. Sa fetalai le tasi o i laua ia te ia, ma ta’u atu lona igoa, a o tusi ane lona aao i le tasi, ma fetalai atu, “O Lou Atalii Pele lenei. Faalogo ia te Ia!” Faalogo ia te Ia!” (Iosefa Samita—Talafaasolopito 1:17).
E leai se mea faapea na tupu muamua. E tata’i atu ai se tasi e manatunatu pe aisea na taua ai ona faaali uma mai le Tama ma le Alo. Ou te manatu ona sa Laua tatalaina le tisipenisione o le atoaga o taimi, le tisipenisione mulimuli ma o le toe tisipenisione o le talalelei, lea o le a faapotopotoina faatasi uma mai ai elemene o tisipenisione na muamua atu. O le mataupu faaiu lea o le talafaasolopito umi o feutagaiga a le Atua ma alii ma tamaitai i luga o le fogaeleele.10
O tautinoga uma tatou [o le Ekalesia] te faia e uiga i le pule paia, o upumoni uma tatou te tuuina atu e uiga i le taua o lenei galuega, e maua uma lava ona aa i le Uluai Faaaliga a le perofeta taulealea. A aunoa ma lea, e leai sa tatou tala tele e mafai ona fai atu. O le amataga sili lea i le tisipenisione o le atoatoaga o taimi, lea na folafola mai ai e le Atua o le a Ia toefuatai uma mai le mana, o meaalofa, ma faamanuiaga a tisipenisione uma na muamua atu.11
4
Na toefuataiina mai le pule ma ki o le Perisitua.
Sa toefuatai mai i le lalolagi le pule ma ki o le Perisitua Mekisateko o se vaega o le Toefuataiga.
I le toefuataiina mai o le Perisitua Arona, na faaee ai e Ioane le Papatiso toetu ona lima i luga o ulu o Iosefa Samita ma Oliva Kaotui ma faapea atu, “I luga o oulua o’u uso a auauna e, i le suafa o le Mesia ou te tuuina atu ai le Perisitua o Arona, o loo i ai ki o asiasiga ma galuega a agelu, ma le Tala Lelei o le Salamo, ma le papatisoga i le faatofuina mo le faamagaloina o agasala” (MF&F 13:1).12
Sa sosoo ai ma le asiasiga mai a Peteru, Iakopo, ma Ioane, o Aposetolo a le Alii o Iesu Keriso, ia na faaeeina atu i luga o Iosefa ma Oliva Kaotui le Perisitua Mekisateko, lea sa mauaina e nei Aposetolo mai aao o le Alii lava Ia.13
O le toatolu o Aposetolo [a le Faaola] —o Peteru, Iakopo ma Ioane—na faaali ane ia Iosefa ma Oliva i se mea “i le vao” i luga o le Vaitafe o Susikuana (tagai MF&F 128:20). Sa tuu o latou aao i luga o o laua ulu ma faaee atu i o laua luga lenei pule paia. …
E mafai ona mulimuli lou perisitua i se laina sao e tau atu i lenei mea na tupu. E faapenei: Na faauuina au e Tavita O. MaKei; o le na faauuina e Iosefa F. Samita; o le na faauuina e Polika Iaga; o le na faauuina e Molimau e Toatolu; o e na faauuina e Iosefa Samita le Itiiti ma Oliva Kaotui; o e na faauuina e Peteru, Iakopo, ma Ioane; o e na faauuina e le Alii o Iesu Keriso.
E faapena foi ona oo mai ia i [latou taitoatasi ua umia le Perisitua Mekisateko]. O outou taitoatasi uso e, o e ua umia lenei perisitua na mauaina foi i se laina tuusao mai le faaeega na faia e Peteru, Iakopo ma Ioane.14
5
Na ala mai ia Iosefa Samita, na faaali mai ai e le Alii upumoni e faapea ona iloga ai i tatou mai isi ekalesia.
Faataga mai a’u ou te ta’ua na o ni nai aoaoga faavae o le anoano ma faiga e ese ai i tatou mai isi ekalesia uma, ma o nei mea uma na oo mai i faaaliga i le Perofeta talavou. Ua outou masani ai, ae e aoga le toe ta’u atu ma mafaufau i ai.
O Le Aiga Atua
O le mea muamua … o le faaalia mai o le Atua lava Ia ma Lona Alo Pele, le Alii toetu o Iesu Keriso. O lenei faaali mai o le Atua, i la’u lava faamasinoga, o le mea aupito sili lea ua tupu talu le fanau mai, soifua, maliu ma le Toetu o lo tatou Alii i le vaeluaga o taimi.
E leai ni a tatou faamaumauga o se isi lava mea e tusa ma lena mea.
E tele seneturi sa faapotopoto ai tagata ma finau i le natura o le Atua. Sa faapotopoto e Kosetatino ni tagata atamamai o vaega toalaiti eseese i Nicaea i le tausaga e 325. Ina ua mae’a masina e lua o felafolafoa’iga malolosi, sa latou fetuutuuna’ia ai se faaiuga, lea ua augatupulagā o avea ma faamatalaga faavae i le au Kerisiano e faatatau i le Aiga Atua.
Ou te valaaulia outou e faitau i lena faauigaga ma faatusatusa i le faamatalaga a le taulealea o Iosefa. Sa na ona ia fai mai sa tu atu le Atua i ona luma ma talanoa atu ia te ia. a mafai ona vaai Iosefa ia te Ia ma faalogo atu ia te Ia. O Ona foliga e pei lava o se tagata, o se tagata o aano ma ivi. Sa i Ona autafa le Alii toetu, e ese foi lona tagata, lea sa Ia faailoa mai o Lona Alo Pele lea sa talanoa ai foi Iosefa.
Ou te talitonu i lena taimi puupuu o le faaaliga vaaia ofoofogia, e tele atu mea sa aoaoina ai e Iosefa e faatatau i le Atua nai lo isi sikola uma ma faifeau o aso anamua.
I lenei faaaliga vaaia paia, sa toe faamautinoa ai le moni o le Toetu o le Alii o Iesu Keriso.
O lenei malamalama e uiga i le Atua, sa natia mai le lalolagi mo le tele o seneturi, o le uluai mea lea ma le silisili sa faaalia e le Atua i Lana auauna filifilia.15
O le Tusi a Mamona i le avea ai ma se soa molimau ma le Tusi Paia
“O Le Tusi a Mamona … e tautala mai e pei o se leo mai le efuefu e molimau i le Alo o le Atua.”
O le a ou tautala atu i le isi mea na sosoo ai lea foi sa faaalia mai e le Atua.
E talia e le lalolagi Kerisiano le Tusi Paia o le afioga a le Atua. O le toatele lava latou te le iloa pe na faapefea ona oo mai.
Faatoa uma lava ona ou faitauina se tusi fou faatoa lomia e se tagata atamai lauiloa. E manino mai faamatalaga o loo ia tuuina mai, o tusi eseese o le Tusi Paia sa tuufaatasi i se faiga e foliga mai e lei faatulagaina lelei. O nisi mea, e le i maua ia tusitusiga sei vagana ina ua leva ona tuanai mea ia na faamatala. O lena tulaga atonu tatou te fesili ai, “Pe moni ea le Tusi Paia? Pe o se afioga moni ea a le Atua?”
Tatou te tali atu, e moni pe afai e sa’o lona faaliliuina. Sa i ai le aao o le Alii i lona faiga. Peitai, ua le o toe tu nei na o ia. O loo i ai se isi molimau o le taua o upumoni o loo maua ai.
O loo ta’u mai i tusitusiga paia “e mautu upu uma i le mau a le toalua po o le toatolu” (2 Korinito 13:1).
Ua oo mai le Tusi a Mamona i le mea foaifua ma le mana o le Atua. E tautala mai e pei o se leo mai le efuefu e molimau i le Alo o le Atua. E tautala mai e uiga i Lona soifua mai, o Lana misiona, o Lona Faasatauroga ma le Toetu, ma Lona afio atu i le au amiotonu i le laueleele o Nuumau i le konetineta o Amerika.
O se mea faitino e mafai ona taulimaina, e mafai ona faitau i ai, e mafai ona tofotofoina. O loo tauaveina i totonu o ona faavaa se folafolaga o lona amataga paia. Ua faitau miliona i latou ua tofotofoina le folafolaga [o loo aumai ai], ma ua iloa ai o se tusi moni ma le paia. …
E faapei ona avea le Tusi Paia ma molimau o le Lalolagi Tuai, e faapena foi le Tusi a Mamona o le molimau o le [Lalolagi Fou]. E o faatasi lava i le tautinoina atu o Iesu o le Alo o le Tama. …
O lenei tusi paia, lea na oo mai o se faaaliga o le Silisili Ese, e moni lava o se isi molimau i le paia o lo tatou Alii.16
Pule o le Perisitua ma le faatulagaga o le Ekalesia
O le perisitua o le pule e galue ai i le suafa o le Atua. … Sa ou faitauina talu ai nei se tusi [o loo] ta’ua ai le Liliuese o le Ekalesia anamua. Afai na leiloa le pule o lena Ekalesia, na faapefea la ona toefuatai mai?
O le pule o le perisitua e mai le nofoaga e tasi lea e mafai ona aumai ai, o le lagi lea. Sa faaeeina mai e aao o i latou sa umia a o soifua le Faaola i le lalolagi. …
E maeu le matagofie o le mamanu o le toefuataiga lea na oo atu ai i le faatulagaga o le Ekalesia i le tausaga e 1830. … O le igoa tonu o le Ekalesia sa oo mai i se faaaliga. O le Ekalesia a ai? Pe o Iosefa Samita ea? Pe o Oliva Kaotui? E leai, o le Ekalesia a Iesu Keriso sa toefuatai mai i le lalolagi i aso nei e gata ai.17
O Le Aiga
O le isi faaaliga maoae ma mataina na tuuina mai i le Perofeta o le fuafuaga mo le olaga faavavau o le aiga.
O le aiga o se foafoaga a le Silisili Ese. O le faailoga vaaia o sootaga e aupito sili ona paia. O le faailoga vaaia o aafiaga aupito taua. O le faalapotopotoga faavae o sosaiete.
O faaaliga a le Atua i Lana Perofeta na oo mai ai aoaoga faavae ma le pule o loo faamauina ai faatasi aiga, e le gata mo le olaga nei ae mo le faavavau atoa foi.18
O le le sala o tamaiti laiti
O le le sala o tamaiti laiti, o se tasi lea o faaaliga na tuuina atu e le Atua e ala i le Perofeta o Iosefa. O le faiga masani, o le papatisoga o pepe e aveese ai aafiaga o le mea ua faamatalaina faapea o le agasala a Atamu ma Eva. I lalo o le aoaoga faavae o le Toefuataiga, o le papatisoga e mo le aveeseina o agasala a le tagata lava ia. E avea ma se feagaiga i le va o le Atua ma le tagata. E faia i le vaitausaga ua mafai ai ona tali atu le tagata mo ia lava, pe a lava le matutua o tagata latou te iloa ai le sa’o mai le sese. E faia i le faatofuina, o se faatusa o le maliu ma le tanuga o Iesu Keriso ma Lona Toetu mai.19
Faaolataga mo e ua maliliu
O le a ou toe ta’ua se isi upumoni ua faaalia mai. Ua tatou iloa e le faailoga tagata le Atua, ae e leai se isi ekalesia ua ou iloa e i ai se fuafuaga e faia mo i latou ua maliliu, ina ia maua faamanuiaga uma e maua e i latou o ola. O le aoaoga faavae sili o le faaolataga o e ua maliliu, e tulaga ese i lenei Ekalesia. … E tuuina atu foi i e ua oti le avanoa lava e tasi e pei o e o ola. Ma, e maeu le mamalu ma le matagofie o lenei tulaga ua faia e le Silisili Ese e ala i Lana faaaliga i Lana Perofeta.20
O le natura, faamoemoega, ma gafatia o fanau a le Atua
Ua faaalia mai le natura e faavavau o le tagata. O i tatou o atalii ma afafine o le Atua. O le Atua o le Tama lea o o tatou agaga. Sa tatou ola ae tatou te lei o mai iinei. Sa i ai o tatou uiga faaletagata. Sa tatou fananau mai i lenei olaga i lalo o se fuafuaga paia. Ua tatou i ai iinei e tofotofoina ai lo tatou agavaa, ma faaaoga lo tatou saolotoga sa tuuina mai e le Atua mo i tatou. A tatou oti, o le a tatou ola pea lava. E tolu vaega o lo tatou ola e faavavau: muamua, o lo tatou muai olaga; lua, o lo tatou olaga faitino; ma le tolu, o lo tatou olaga pe a mavae le oti. O le oti, tatou te oti i lenei lalolagi ma laa atu ai i le isi itu o le veli, i se lalolagi ua tatou agavaa e ulufale atu i ai. O lenei foi mea, o se aoaoga faavae taua, e tulaga ese, ma ofoofogia a lenei Ekalesia, lea na oo mai e ala mai i se faaaliga.21
Faaaliga i ona po nei
Ou te ofoina atu lenei aotelega puupuu o le liligiina mai o le malamalama maoae ma le pule mai le Atua i luga o le ao o Lana Perofeta. … Toe tasi lava lea e tatau ona ou ta’ua. O le mataupu faavae lea o faaaliga i ona po nei. O le mataupu faavae o le faatuatua na tusia e le Perofeta o loo ta’u mai ai:
“Matou te talitonu i mea uma ua faaalia mai e le Atua, ma mea uma o loo Ia faaalia mai nei, ma matou te talitonu o le a Ia faaalia mai le tele o mea silisili ma le taua tau le Malo o le Atua” (Mataupu Faavae o le Faatuatua 1:9).
O se ekalesia ola, o se ekalesia ua salalau i le lalolagi atoa i nei taimi faigata, e manaomia lava faaaliga faifai pea mai le nofoalii o le lagi e taialaina ma agai ai i luma.
Faatasi ma le tatalo ma le sailiga naunautai o le finagalo o le Alii, tatou te molimau atu ai ua maua le taitaiga, ua oo mai le faaaliga, ma e faamanuiaina e le Alii Lana Ekalesia a o agai atu i lona taunuuga.
O luga o le faavae mautu o le valaauga paia o le Perofeta o Iosefa ma faaaliga mai le Atua, ia na aumai e ala mai ia te ia, tatou te agai ai i luma.22
O le tu ai i le lona 15 i le laina mai ia Iosefa Samita ma le taulimaina o le tiute faaperofeta lea na tuuina mai i ona luga, ou te folafola atu ma le faamaoni o le tala a le Perofeta o Iosefa e uiga [i mea na tutupu o le Toefuataiga] ua moni, na molimau mai le Tama … i le paia o Lona Alo, na faatonuina e le Alo le perofeta taulealea, ma na faapea ona sosoo mai ai ma le tele o mea na tutupu na tau mai i le faatulagaina o “le ekalesia moni ma ola e tasi i luga o le lalolagi atoa” [MF&F 1:30].23
Fautuaga mo Suesuega ma le Aoaoina Atu
Fesili
-
Aisea na manaomia ai e tagata o le lalolagi le Ekalesia ma le talalelei a Iesu Keriso ina ia toefuatai mai? (Tagai vaega 1.) O a nisi o auala na saunia ai e le Alii le ala mo le toefuataiga o le talalelei? (Tagai vaega e 2.)
-
Mafaufau loloto i aoaoga a Peresitene Hinckley i le Uluai Faaaliga (tagai vaega 3). Na faapefea ona faatosina oe e lau molimau i le Uluai Faaaliga?
-
Aisea na alagatatau ai ona toefuatai mai le perisitua e avefeau faalelagi? (Tagai vaega 4.) Aisea e taua ai i e ua umia le Perisitua Mekisateko ona mafai ona faailoga o latou pule o le perisitua ia Iesu Keriso?
-
I le vaega e 5, toe faamanatu le aotelega o nisi o upumoni na oo mai e ala i faaaliga i le Perofeta o Iosefa Samita. O faapefea ona faamanuiaina lou olaga e nei upumoni? O a ni auala tatou te fesoasoani ai i tamaiti ia malamalama ma talisapaia nei upumoni?
Mau Fesootai
Isaia 2:1–3; Galuega 3:19–21; Faaaliga 14:6–7; 2 Nifae 25:17–18; MF&F 128:19–21
Fesoasoani mo Suesuega
“E sili atu ona aoga au suesuega faaletalalelei pe a e aoao atu e ala i le Agaga Paia. Ia amata au suesuega o le talalelei e ala i le tatalo mo le Agaga Paia e fesoasoani ia e aoao” (Tala’i La’u Talalelei [2004], 18).