O Le Soifua Auauna o Ioane Teila

Ina ua tuumalo Polika Iaga i le aso 29 Aokuso 1877, sa 68 tausaga o Ioane Teila i lena taimi. O tausaga e tolu na sosoo ai, sa taitaiina ai e Peresitene Teila le Ekalesia, o ia o le Peresitene o le Korama a Aposetolo e Toasefululua. I le konafesi aoao i le aso 10 o Oketopa 1880, na lagolagoina ai o ia o se perofeta, tagatavaai, ma se talifaaaliga, ma le Peresitene O Le Ekalesia a Iesu Keriso o le Au Paia o Aso e Gata Ai, o se tofiga na ia tauaveina seia oo ina tuumalo o ia i le aso 25 o Iulai 1887. I le taimi na avea ai o ia ma Peresitene ma le tele o tausaga na avea ai o ia ma se Aposetolo, sa saunia Ioane Teila i taimi uma e aoao atu ma puipuia le upumoni. I se tasi o vaitaimi aupito faigata i le talafaasolopito o le Ekalesia, sa avea o ia ma se punavai o le malosiaga tele ma le taitaiga o le Au Paia.

Faamatalatalaina o Peresitene Teila

Sa faamatalaina Peresitene Teila o se tagata aulelei, e ono futu lona maualuga, ma e pei o ni foliga o se agelu. E sinasina lona lauao e pei o le kiona, ae enaena malosi lona lanu. E tamalii ma malualii ona uiga, “e le o ia o se tagata, e popoina se papatua, pe mitavale pe a feofoofoai, tusa lava pe o le a le vavalalata ma se uo; o ia ituaiga taga ia te ia e matua le talafeagai lava e oo lava i se malo faapaleina e ao ona mitamita ai.”¹ Ae e leai sona uiga faasiasia; e mamalu, e faaaloalo, ma faauo i tagata uma. “Pe o ai lava le tagata e alu atu i le mea e i ai o ia, pe o se nofoaga patino po o nofoaga faitele, e lagonaina lava e lena tagata o loo la’ua faatasi ma se alii maoae, o se tagata mamalu ma le taualoa.”²

Sa faamatalaina e le Alii o Risati Pitone, o se tusitala Peletania ma se tagata na taamilo i le lalolagi, o le na feiloai ma Peresitene Teila, e faapea o se “tagata aulelei ma le toa ma ua faamatua tagata, e iloa atu lava le agalelei i ona mata lanuefuefu, o ona uiga e tausaafia, ma e iloa i lona muaulu lona malualii.”³ Sa tusia e se tasi tagata tusi talafaasolopito, “Ina ua faafeiloai atu a’u ia te ia i le 1884, a o le taimi lena ua fitusefulu fitu ai tausaga o le soifua o le Susuga a Teila, sa susu mai i luma…se tagata e sinasina lona lauao, e foliga agalelei, e umi ma tino lelei, o ona foliga e lapotopoto, o ona mata e lanuefuefu, e toto’a, e manino foi, e lautele lona muaulu, o ona laugutu e faamaopo, e faailoa mai ai e mausali lona naunautai, e fai si faalefiafia o lana silasila, e pei lava o le tulaga e tatau ona i ai se tagata na tauasa mai i le vao o fita ma faigata.”⁴

O Le Popofou o Lona Soifua

Sa soifua mai Ioane Teila i le tausaga e 1808 i le itumalo o Westmoreland i matu i sisifo o Egelani, ma sa faamanuiaina o ia i matua lotomaualalo, agalelei, ma le alolofa, ma sa la aoaoina o ia e faitau ma ia talitonu i le Tusi Paia, ia faatuatua i le Atua, ma ia faamoemoe ia Keriso. Sa aveina o ia e ona matua o James ma Agnes Teila, ma papatisoina i le Ekalesia Egelani ina o le’i leva ona fanau mai. O lona soifua mai i le Ekalesia Egelani na totoina ai i lona loto se agaga talisapaia tele o fatuga musika paia, o aoaoga aloaia faaletusi paia, ma tatalo patino atoa ai ma talosaga i nofoaga faitele. O le naunautai loloto faifai pea ma le alofa i le Atua, o uiga taua ia sa atinaeina e Ioane Teila a o tamaitiiti. “I [se] uluai vaitau o lo’u olaga, sa ou aoaoina ai e faalatalata i le Atua,” sa ia faamatalaina ai i le Au Paia o Aso e Gata Ai ina ua avea ma Peresitene o le Ekalesia. “E tele taimi ou te alu ai i le togavao ma lafi ai i tua o se pupuvao, ma ou ifo ai i luma o le Alii ma valaau atu ia te Ia e taiala ma faatonutonu mai au. Ma sa Ia faafofogaina lava a’u tatalo. … O le agaga lena ma le mea na ou ola ai a o ou tamaitiiti. … Sa sailiili atu e le aunoa lo’u agaga i le Atua i lena taimi; ma o loo faapena foi o’u lagona i le taimi nei.”⁵

A o avea o se tamaitiiti, sa ia vaaia “se faaaliga, o se agelu i le lagi, o loo iliina se pu i lona gutu, o loo faailoa atu ai se savali i atunuu o le lalolagi.” E ui ina e le’i malamalama o ia i le natura faaperofeta o lena vaaiga vagana ina ua oo i se taimi mulimuli ane o lona soifua, ae sa faaauau pea lava pea ona ia lagona lona latalata atu i le Atua i tausaga o lona talavou. “E tele taimi pe a na o ia ai,” na ia tusia ai, “ma o nisi foi taimi pe a matou faatasi ma nisi, ou te faalogoina ai lava musika malie, malu, ma le matagofie, e pei o loo lagiina e ni agelu po o ni tagata faalagilagi.”⁶

Ina ua tusa ma le 16 tausaga lona matua, sa ia tuua le Ekalesia Egelani ae lotu Metotisi. O le tausaga na sosoo ai na tofia ai o ia e avea ma se failauga, po o se aoao fesoasoani, i lena ekalesia— o se tiutetauave e le masani ai mo se alii talavou. O lona soifuaga e mauai lona faatuatua ona o lona talitonuga maumaututu—o le talitonuga maumaututu e faavae i ona lava aafiaga. O le vaitau lea o lona soifua na ia maua ai se uunaiga malosi ua valaauina o ia e le Atua, e i ai se aso na te folafola atu ai le talalelei i le Iunaite Setete o Amerika.

O Lana Sailiga mo le Malo o le Atua

I le tausaga e 1830, na malaga atu ai matua o Ioane Teila ma isi tagata o le aiga e nonofo mau i Toronto, i Kanata, ae tuua ai o ia i Egelani e faatau atu le faatoaga a lo latou aiga, ma faamaea isi pisinisi faaleaiga. Ina ua maea, sa ia tuua loa Egelani ae malaga atu i se vaa i le Aai o Niu Ioka. I le taimi o le faigamalaga, sa feagai le vaa ma se afa matautia lea sa faatamaia ai le tele o vaa i lena vaega o le sami. Sa manatu le kapeteni ma alii ofisa o le vaa o le a goto, peitai, na tautino atu e le leo o le Agaga ia Ioane Teila, “E tatau ona e alu i Amerika e folafola atu ai le talalelei.” Sa tomanatu ai Peresitene Teila: “Sa ou matua mautinoa lo’u taunuuga, ma sa ou alu i le fogafale i luga o le vaa i le valuapo, ma i le lotolotoi o le matamataita o le afa, sa ou lagonaina lo’u toafimalie e pei o la ou te nofonofo i le potu malolo o lo matou fale. Sa ou talitonu e tatau ona ou taunuu i Amerika ma faataunuuina la’u galuega.”⁷ Sa taunuu saogalemu o ia i Niu Ioka, ma ina ua mavae ni nai masina, sa latou toe faatasi ma ona matua i Toronto, ma sa faaauau ai i le faatuatuaga Metotisi, ma amata loa lana talaiga. O le taimi lea, na la feiloai ai ma Leonora Cannon, o ia foi o se Metotisi faamaoni faatoa malaga mai foi i Kanata mai Egelani. Ina ua la fetufaaia ni talitonuga faalelotu maumaututu loloto ma se fiafia i aoaoga, o aganuu, faapea foi se alofa o le tasi i le isi, sa la’ua faaipoipo loa i le aso 28 o Ianuari 1833, i Toronto.

A o i ai i Kanata, sa ia auai faatasi ma se vaega o uo i se taumafaiga naunautai e suesue i le Tusi Paia ma faateleina ai lona malamalama i le upumoni. O le taimi lea o sailiiliga loloto, na auina atu ai Elder P. Pratt, o se tasi o le Korama a Aposetolo e Toasefululua, i se misiona i Toronto.

Ina ua taunuu Elder Pratt i Toronto, sa talosaga atu o ia i le toatele o faifeau ma taitai o le aai mo se nofoaga e fai ai lana talaiga. Peitai, na teena lana talosaga. E oo lava ia Ioane Teila, o le sa faalogo i le tele o tala feavea’i e uiga i le Ekalesia, sa ia teena foi i le taimi muamua ia Elder Pratt. Ina ua leai se faamoemoe o le a manuia, o lea na tonu ai ia Elder Pratt e tuua Toronto ma sa ia afe i le aiga o Teila e faatofa i ai. Ona o le lagona uunaia faapea o Elder Pratt o se tagata o le Atua, o lea sa ofoina atu ai e le tuaoi o Ioane Teila na te fafagaina ma tausi i lona fale ia Elder Pratt, ma faatagaina o ia e fai ai ana fonotaga. Sa taliaina e Elder Pratt le faaaloalo, ma e le’i pine ae faafeiloai atu o ia i uo a Ioane Teila, o e sa potopoto faatasi e saili mo le upumoni.

Sa amata e Ioane Teila se suesuega maeaea o aoaoga faavae o le Ekalesia. “E tolu vaiaso o fai ma a’u galuega masani,” na fai mai ai, “ma sa ou taumulimuli ia Uso Pratt mai lea nofoaga i lea nofoaga.” Sa ia tusitusia ma suesue i lauga a Pratt ma faatusatusa i mau o tusitusiga paia. Ina ua mavae sina taimi, sa molimauina mai e le Agaga Paia le moni o le savali a Elder Pratt, ma sa papatisoina ai loa Ioane ma Leonora Teila i le aso 9 Me 1836. Na ia tautino atu mulimuli ane, na te “le’i masalosalo lava mai lena taimi i le moni o se mataupu faavae faa-Mamona.”⁸

O Se Uso Fou Faamaoni o le Ekalesia ma se Taitai

E le i leva ona auai Ioane Teila i le Ekalesia, ae tofia o ia e galue auauna o se taitai pulefaamalumalu o le Ekalesia i Kanata, o se tofiga na ia umia i le silia laitiiti ma le tausaga. O ona tiute e manaomia ai le tele o ana malaga, ae sa ia le fiu i le folafolaina atu o le talalelei ma faafoeina le tele o mataupu faaleagaga ma faaletino o le Ekalesia iina. O le taimi foi lea, o se tasi o ona faanaunauga aupito sili, o le feiloai atu lea i le Perofeta o Iosefa Samita. I le masina o Mati 1837, sa malaga ai o ia i Katelani, i Ohio, ma sa api ai i le maota o le Perofeta. Sa ia faamatalaina se lagona “e pei ua sipaka i se uaea eletise” ina ua faatalofa ma le Perofeta.⁹ I le maota o le au Samita, sa tele nisi upumoni e faatatau i le galuega i aso e gata ai, sa aoaoina ai o ia e le Perofeta. Sa vave ona fausia e nei alii e toalua se noataga faauo ma le fetalitonua’i, o le a le motusia lava.

A o i ai Ioane Teila i Katelani, sa fetaiai o ia ma le tele o faitioga e uiga i le Perofeta o Iosefa Samita. E tele taimi, sa faia ai fonotaga a tagata ua toe o ese mai le ekalesia, ma latou faitioina ai le Perofeta. Ina ua latalata i le faaiuga o se tasi fonotaga i le Malumalu o Katelani, sa talosagaina ai e Elder Teila se avanoa e saunoa ai, ma sa ia tu atu e puipuia e aunoa ma le fefe le Perofeta. “O Iosefa Samita, i lalo o le taitaiga a le Silisiliese, na atinaeina uluai mataupu faavae,” na ia saunoa ai, “ma e ao ona tatou vaavaai atu ia te ia mo nisi faatonuga. Afai e le aumaia e le agaga o loo ia faailoa mai ni faamanuiaga, ou te manatu foi e le aumaia foi ni faamanuiaga e le agaga o loo faaalia e i latou sa saunoa. O le fanauga a Isaraelu, i aso ua mavae, ina ua uma ona latou vaai i le faaalia mai o le mana o le Atua ia i latou, sa latou pauu atu i le fouvale ma le ifo i tupua, ma o le mea moni e matua matautia le tulaga tatou te i ai ona o le faia o le mea lava lea e tasi [na faia e le fanauga a Isaraelu].”¹⁰ A o toatele i latou ua pauu ese atu ma faia foi le mea lava lea e tasi, sa faamalolosia le Au Paia faatuatua e Elder Teila i lona faamaoni ma ona talitonuga maumaututu.

O Lona Valaauga ma Lana Auaunaga o se Aposetolo

I le tautoulu o le1837, sa maua ai e Ioane Teila se faatonuga mai ia Iosefa Samita ina ia siitia atu i Sisifo Mamao, i Misuri, e faatumu se avanoa i le Korama a Aposetolo e Toasefululua (sa faauuina aloaia o ia ia Tesema 1838). Sa ta’ua e Ioane Teila e faatatau i le faamoemoega e auauna atu ai o se Aposetolo: “Sa foliga e tele le galuega, sa faigata ona faataunuu tiute ma tofi. Sa ou lagonaina lo’u vaivai ma ua na o se mea noa; ae sa ou lagonaina lo’u naunautai, i le avea ai o le Alii ma o’u fesoasoani, e taumafai e faalautele.”¹¹ O le lotomaualalo i luma o le Atua ma se tautinoga e saili i Lana taitaiga, o le a avea lea ma uiga vaaia tulaga ese o le auaunaga a Elder Teila. Ina ua avea o ia ma Peresitene o le Ekalesia, sa ia ta’u atu i le Au Paia: “E leai ni o’u manatu e na o le Atua lava na te tuuina mai ia te au: tou te le aumaia foi. O nisi tagata e tausisisi lava i a latou tu ma le faataunuuina o o latou lava manatu uiga ese. Ou te le mafaufau i lena tulaga, ae e i ai lo’u faanaunauga, pe o le a lava le mea e tulai mai, ia aoao ia iloa le finagalo o le Atua, ona faia ai lea.”¹²

O Se Molimau i le Tagatavaleina

A o avea ai ma se Aposetolo, o Elder Teila o se uo mamae faatuatuaina a le Perofeta o Iosefa Samita. Sa ta’ua e Elder Franklin D. Richards e faatatau i le faigauo a Elder Teila ma le Perofeta e faapea, “Sa na o ni nai tagata sa mauaina le sootaga mafana, patino sa ia maua ma sili atu ona mausali ma le Perofeta o Iosefa Samita seia iu ina maliu, ma o le tala e uiga i lena alofa moni patino, sa faatini ma faaatoatoaina i pulufana na oo atu ia te ia faatasi ai ma le Perofeta i le falepuipui o Karefasi.”¹³

O se tasi o mea aupito sili ona faigata na tulai mai i le soifuaga o Elder Teila, o le tagatavaleina lea o le Perofeta o Iosefa Samita. Sa malaga atu Elder Teila i lona lava lotofuatia ifo i le Falepuipui o Karefasi, i le mea sa faafalepuipui ai ma le le tonu ia le Perofeta ma lona uso o Ailama i le aso 25 o Iuni 1844. E le i pine ae foliga mai e le o i ai se faamoemoe o tagata faatupu faalavelave o Karefasi e tatala i la’ua, ma sa i ai i la’ua i se tulaga matautia. I le aso 27 o Iuni, sa taumafai isi tagata o le Ekalesia na malaga mai i Karefasi mai Navu, i ni faiga eseese e fesoasoani ai ia faia le faamasinoga tonu. E oo atu i le aoauli, ua toe o Elder Teila ma lona uso a Aposetolo o Uiliata Risati na totoe ai i le falepuipui faatasi ai ma Iosefa ma Ailama. I se fuafuaga sa faia e faapotopoto faatasi uso i Navu ina ia laveai mai ai le Perofeta o Iosefa, sa faapea atu Elder Teila, “Uso Iosefa, afai e te faataga maia, ma pau mai i lou fofoga le upu, o le a ou aveeseina oe mai lenei falepuipui i totonu o le lima itula, pe afai e tatau ona tuu i lalo le falepuipui lenei, ina ia fai ai.”¹⁴ Sa teena e Iosefa lea faiga.

A o faasolo ina oo mai le afiafi o le aso 27 o Iuni, sa i ai le lagona o le faanoanoa tele i nei alii e toafa. Ona o le faamanuiaina o Elder Teila i se siufofoga matagofie i le ato [tenor], o lea na talosagaina ai faalua ia Elder Teila e usu le “Se Tagata Mativa Faanoanoa” ina ia fesoasoani e faagaeetia ai o latou agaga. E le’i ata uma ona ia lagiina o le viiga i le taimi lona lua, ae vevesi mai loa i faasitepu o le falepuipui ia tagata faatupu faalavelave ua valiuli o latou mata. Sa vave ona faalagolago Ailama Samita ma Uiliata Risati i le faitotoa e taofi ai ina ia le matala. Ina ua sau le uafana muamua i le faitotoa, sa lavea Ailama ma maliu ai. Sa faaauau pea ona tafana e tagata faatupu faalavelave, ma vave ona uunai faamalosi atu a latou fana i si ava o le faitotoa. Sa faaaoga e Elder Teila se tootoo mamafa, ma sa tu o ia i tafatafa o le faitotoa ma taumafai e seu ese fana sa faalala atu i totonu o le potu. “O se vaaiga matua matautia,” sa tusia e Elder Teila. “Sa pei o le mafiafia o lo’u ogalima ia aloiafi e pasia a’u pe a faapapa fana a nei tagata, ma…sa foliga mai e leai se isi mea, na o le oti. Ou te manatua lo’u lagona e pei ua oo mai lo’u oti, ae peitai ou te le iloa pe o afea, pe o le a lava le ituaiga tulaga matautia, sa tele ina ou toafilemu, e le gaoia, e malosi, ma vave foi la’u gaioi ma to’a lelei.”¹⁵

I le totonugalemu o lenei vaaiga, a o taumafai foi le Perofeta o Iosefa e puipuia i latou mai tagata faatupu faalavelave, sa ia faapea atu ia Elder Teila, “Ua sa’o lena, Uso Teila, fai le mea sili e te mafaia e taseu ese ai.”¹⁶ O upu mulimuli ia na ia faafofoga ai i le Perofeta o saunoa ai i luga o le fogaeleele.¹⁷ Ina ua ia iloa e le o toe umi se taimi e mafai ai ona tatalia lo latou tulaga i tua o le faitotoa, o lea na oso ai loa Elder Teila i le faamalama. A o taumafai o ia e oso i fafo, sa tau se pulufana ia te ia mai totonu o le falepuipui, ma lavea ai lona ogavae tauagavale. Sa taatia ai o ia mo sina taimi i luga o le faamalama ma semanu e pa’u i fafo, ae sa toe tau se pulufana na sau mai fafo o le falepuipui, i le uati sa i lana taga i lona fatafata, ma toe lelea atu ai i totonu o le potu. A o pa’u atu o ia i totonu, sa toe faatolu ona lavea o ia i pulufana. Sa ulu se pulu i lalo ifo tonu o lona tulivae tauagavale, e le mafai ona toe aveesea. O le isi i lona alofilima tauagavale. O le pulu lona tolu sa tau tonu i le malu o lona suilapalapa tauagavale ma sa sali ese ai ni inisi se tele o le aano. E ui lava ina sa tuga ona manu’a, ma matua tiga tele foi, ae sa soifua pea Elder Teila mai lenei osofaiga, ma sa aveina mulimuli ane e nisi o le Au Paia i lona aiga i Navu.

E le i leva ona lavea Elder Teila, sa taumafai foi le Perofeta o Iosefa e oso ese mai le faamalama o le falepuipui, ae na fanaina ma lavea ai loa lava ma pa’u ifo ai i fafo i le eleele. Na tusia mulimuli ane e Elder Teila, ina ua ia iloa le tala i le masoe o le Perofeta, sa ia faalogoina “se lagona pogisa, tuulafoaiina, ma le mafatia.”¹⁸

O loo i ai i le Mataupu Faavae ma Feagaiga vaega e 135 se tala e uiga i le Tagatavaleina na tusia e Elder Teila. E le tele ni faamatalaga o le mea na tupu o ta’ua ai i le vaega lena, ae o loo avea ma se molimau mamana e uiga i le Perofeta o Iosefa: “O Iosefa Samita, le Perofeta, Tagata Vaai o le Alii, e sili atu ana mea ua faia, vagana o Iesu lava, mo le faaolataga o tagata i lenei lalolagi, i lo soo se isi lava tagata ola na ola ai… .Na ola maualuga o ia, ma na oti maualuga o ia i luma o fofoga o le Atua ma lona nuu; e pei foi o le tele o auauna faauuina a le Alii i aso ua mavae, ua faamaufaailogaina lana misiona ma lana galuega i lona lava toto.”¹⁹

Leoleo o le Faatuatua

A o avea ai Elder Teila ma se uso o le Korama a le Toasefululua, sa ia tuuina atu atoa lona taimi ma taleni e folafola atu ai ma puipuia le talalelei. O le faaaogaina o lana meaalofa mo le tusitusi, o lea sa ia galue auauna ai e avea ma faatonu o le Times and Seasons, (O Taimi ma Vaitau), o le Wasp (Uasapi) ma le Nauvoo Neighbor (Tuaoi Navu) o ni nusipepa uma o Navu. Mulimuli ane, a o pulefaamalumalu ai i le Ekalesia i sasae o le Iunaite Setete, sa ia faatonutonuina ai ma lomia le nusipepa a Niu Ioka i vaiaso taitasi–e ta’ua o le The Mormon (O Le Mamona) ia sa tusia ai aoaoga faavae o le Ekalesia. O ana tusitusiga uumi sa aofia ai ni faamatalaga auiliili se lua o aoaoga faavae sa ta’ua o le The Government of God (O Le Malo o le Atua), ma le An Examination into and an Elucidation of the Great Principle of the Mediation and Atonement of Our Lord and Savior Jesus Christ (O Se Sailiiliga ma se Faamaninoga o le Mataupu Faavae Sili o le Fautua ma le Togiola a lo Tatou Alii ma le Faaola o Iesu Keriso (na lomia a o avea ma Peresitene o le Ekalesia). O le tomai tusitusi ma faatonutonu o Elder Teila, na ia maua ai faalagiga o le “Leoleo o le Faatuatua” ma le “Siamupini o le Upumoni” i tagata o le Ekalesia. Na saunoa Peresitene Polika Iaga e uiga ia Elder Teila: “Ou te fai atu o ia o se tasi o le au atamamai aupito malolosi ua i ai; o se tagata mamana, o se tagata uiga ese. … O ia o se tasi o faatonu aupito malolosi ua tusia.”²⁰

E le gata i le folafola atu o le talalelei e ala i upu tusitusia, ae e faafa ona faamisiona tala’i Elder Teila: e faalua i Peletania Tele, e tasi i Farani ma Siamani, tasi i Niu Ioka. A tuu faatasi, e silia ma le fitu tausaga o faamisiona tala’i o ia. E ui lava foi ina manaomia ai se osigataulaga tele i le umi o lenei taimi o toesea ai mai e pele ia te ia, ae e le’i faavaivaia ai lava le tautinoga maumaututu a Elder Teila i le galuega a le Alii. I sana tusi i lona aiga i le taimi o se tasi o ana misiona, sa ia tusia ai e faapea: “O loo ou i ai i le galuega a lo’u Matai; o a’u o se faifeau a Ieova e tatau ona ou folafola atu Lona finagalo i atunuu. Ou te alu e tatala le faitotoa o le ola, i se atunuu maoae, ia lomia mo le faitau miliona o mataupu faavae o le ola, le malamalama ma le upumoni, o le poto ma le faaolataga, e talaia filifili u’amea o loo noanoatia ai, e faasaoloto e faanoanoa, e toe faapotopoto mai e ua faasalalauina, faasa’o o latou manatu, faaleleia atili a latou amio, laveai i latou mai le ta’ufaatauvaaina, faaleagaina ma le le fiafia, ma taitai i latou i le malamalama, ola, upumoni ma le mamalu selesitila. Pe le o ogatasi ea lo’u loto ma o outou agaga? Ou te iloa o loo ogatasi.”²¹

Tane ma le Tama

E ui lava i le tele naua o lona taimi e manaomia mo lana auaunaga i le Ekalesia, ae o Ioane Teila o se tane ma se tama e alofa ma le naunautai. E pele ia te ia le taimi e mafai ona ia faaaluina faatasi ma lona aiga, ma e tele taimi na te faaaoga lelei ai avanoa e fiafia faatasi ai ma ia aoao atu ai foi i latou. O le mafuaaga lena, e alolofa tele ai lona aiga ia te ia. I ni tausaga mulimuli ane, sa tusia ai e lona atalii o Mose W. Teila e faapea, “Sa matua maualuga mafaufau o lana fanau ia te ia, ma o le mea lea sa foliga mai ai o le mea aupito silisili sa latou mananao i ai, o le faafiafiaina lea o ia.”²²

Sa faaalia e Ioane Teila i ana fegalegaleaiga ma lana fanau, le mafanafana, agalelei, ma mea malie. Sa toe faamatala e lona atalii o Ezra Oakley Teila le aafiaga lenei:

“A o ou tuputupu ae, sa avea ma tu masani le faia o sauniga o le aoauli o le Aso Sa i le Tapeneko. E tatau ona matou i ai uma iina, ma a oo la i se taimi mulimuli ane, e tatau ona matou faamatalaina po o ai sa lauga, o le a le mea sa faatatau i ai le lauga, o ai na tatalo, ae pe o a foi pese na usu. O le Aso Sa patino lea, sa tonu ai i nisi o i matou o le a se’i faamisi tasi le lotu, ae fai i se tasi o a matou uo e ta’u mai faamatalaga ia e tatau ona matou toe faamatalaina. Ona oo loa lea i le taimi o le matou fono [faaleaiga] ma o le mea moni na fesili mai Tama ia te au e uiga i le lauga, ma pe o ai foi na lauga. Sa saunia mea uma, aua fai mai la’u uo na te le manatuaina lelei, ma o lea sa ou toe faia ai lava upu na ia ta’u maia, ‘Oi, o se toeaina e tautala soo ae e leai a se uiga, ma ou te le manatua lona igoa, ae e matua leai lava se manaia.’ Sa ataata Tama ma faapea mai, ‘O le toeaina tautala soo lena, o lou tama’ ma sa toe faaauau le fonotaga.”²³

A o avea ai ma se Aposetolo, ma mulimuli ane foi avea ma Peresitene o le Ekalesia, sa le suia lava le naunau atu o Peresitene Teila i le Au Paia ina ia alolofa ma faamalolosi i o latou aiga. Sa ia uunaia tagata o le Ekalesia e faaavanoa se afiafi i vaiaso taitasi mo le aiga e suesue ai i le talalelei ma faia a latou faafiafiaga, ma sa ia folafola atu ia te i latou “se filemu ma le alofa, o se mama atoatoa ma le olioli, o le a matua lelei ai o [latou] olaga faaleaiga” pe afai latou te faaaogaina ma le faamaoni lena faiga.²⁴

Pulefaamalumalu i le Ekalesia

I tausaga na taitai ai e Peresitene Teila le Ekalesia, o se Peresitene o le Korama a le Toasefululua ma oo ai ina avea ma Peresitene o le Ekalesia, sa tumau pea lona galue auauna atu ma le malosi ma le naunautai i ana taumafaiga e aoao ma faamalamalama i le Au Paia.

Faatulagaga Tatau ma le Amiotonu i le Perisitua

O se tasi o ana galuega aupito sili ona taua a o avea ma Peresitene, sa aofia ai le faatulagaina tatau o korama o le perisitua ma le apoapoai atu ia te i latou ina ia faataunuuina o latou tiute. Sa ia aoao epikopo ina ia faia fonotaga faalevaiaso a le au perisitua i a latou uarota, ma sa fautuaina foi peresitene o siteki ina ia ta’i masina ma faia fonotaga faaleperisitua a le siteki. Sa tusia e Elder B. H. Roberts, “O ai na te le manatuaina pe o le a lona naunautai ma le faamaoni ma le mana i konafesi ma isi sauniga faitele, ua masani lava o ia i le apoapoai mai i Peresitene o Siteki ma epikopo o uarota, ina ia faatulagaina tatau le perisitua i lalo o la latou vaavaaiga?”²⁵

I se faaaliga na ala mai ia Peresitene Teila i le masina o Oketopa 1882, sa faatonuina ai e le Alii le Au Paia, aemaise lava o uso o le perisitua, ina ia faatulagaina tatau i latou lava ma savavali i le paia i Ona luma. O faamatalaga o parakalafa o loo i lalo o ni mea mai lena faaaliga:

“Ia tuu atu foi i Peresitene o Siteki e faamama ia i latou lava, ma le perisitua faapea tagata o Siteki o loo latou pulefaamalumalu ai, ma faatulagaina tatau le perisitua i o latou Siteki eseese e tusa ai ma la’u poloaiga, i tofiga eseese uma o i ai, i Fautua Maualuga, o korama a le Au Toeaina, ma Epikopo ma a latou aufono, faapea foi i korama a Ositaulaga, Aoao ma Tiakono, ina ia faatulagaina tatau uma korama taitasi e tusa ai ma le faatulagaga o la’u Ekalesia. …

“Ia tuu atu foi i a’u perisitua ia latou faalotomaualaloina i latou lava i o’u luma, ma ia latou le sailia o latou lava manao a o lo’u; aua afai e le iloa a’u e a’u perisitua, o e ua ou filifilia, ma tofia, ma faaee i ai le agaga ma meaalofa o o latou valaauga eseese, ma mana o i ai, o le a ou le iloa foi i latou, na fetalai mai ai le Alii; aua e faamamaluina a’u ma usitaia e la’u perisitua.

“Ona ou valaau atu ai lea i a’u perisitua, ma lo’u nuu uma, ina ia salamo i a latou agasala uma ma sese, o lo latou matapeapea ma le faamaualuga ma le loto maaa, ma a latou amioleaga uma ua agasala ai ia te au; ma ia latou saili ma le lotomaualalo uma ina ia faataunuuina la’u tulafono, o i latou o a’u perisitua, ma le au paia ma lo’u nuu; ma ou te valaau atu i ulu o aiga ina ia faatulagaina tatau o latou auaiga e tusa ai ma le poloaiga a le Atua, ma ia latou uai atu i o latou tiute ma matafaioi eseese e tusa ai, ma ia faamamaina atoatoa i latou lava i o’u luma, ma ia lafoai amioleaga mai o latou fale. Ma o le a ou faamanuia atu ma faatasi ma outou, na fetalai mai ai le Alii, ma o le a faapotopotoina foi outou i o outou nofoaga paia o le a outou potopoto ai e valaau mai ai ia te au, ma ia outou ole mai foi mo mea e sa’o, ma o le a ou faalogoina foi a outou tatalo, ma o le a i ai lo’u Agaga ma lo’u mana faatasi ma outou, ma o le a i ai i o outou luga a’u faamanuiaga, i o outou aiga, o mea tou te nonofo ai ma o outou fale, o a outou lafumanu ma fanua, o a outou faatoaga ma tovine, ma mea uma e faasino ia te outou; ma o le a avea outou ma o’u nuu, o a’u foi ma o outou Atua.”²⁶

Faaatoatoaina o le Au Paia

Ina ia faateleina le malamalama ma tautinoga maumaututu a le Au Paia i le talalelei, o lea sa faatulagaina ai e Peresitene Teila konafesi faalesiteki i kuata taitasi i le Ekalesia atoa. Soo se taimi lava e mafai ai, e auai lava o ia i nei konafesi. Afai e le mafai ona ia susu atu i ai, ona ia auina atu lea i ai o se tasi o le Korama a le Toasefululua. Sa tusia e Elder B. H. Roberts o le Au Fitugafulu e faatatau i lea faiga e faapea: “E tele aoaoga na maua e le Au Paia mai Aposetolo, e sili atu nai lo se isi taimi talu mai le talafaasolopito o le Ekalesia. O le taunuuga, o se fagua tele lea i la le agaga o le Au Paia.”²⁷ O se tasi mea taua na vave tulai mai i lana au peresitene, o le faatuina aloaia lea o le faalapotopotoga o le Peraimeri i le 1878 aua le aoaoina lelei o fanau i le Ekalesia. Sa faaauau foi e Peresitene Teila le faamamafaina o le taua o le galuega faafaifeautalai, ma sa faateleina le aofaiga o toeaina na auina atu e folafola atu le talalelei.

I le tele o ana aoaoga, sa tumau pea le apoapoai atu o Peresitene Teila i le Au Paia ina ia tautuana o latou tiute i vaega uma o o latou olaga, o ni tagata o le aiga, tagata o le Ekalesia, po o tagatanuu foi. Sa ia aoao atu i le Au Paia afai latou te usiusitai ma tuu atu lo latou faatuatuaga i le Alii, o le a leai se mea latou te popole ai. Sa ia aoao mai “o le a i ai le Atua i le itu a Isaraelu, pe afai o le a i ai Isaraelu i le itu o le mea sa’o.”²⁸

Puipuiga o le Saolotoga

Tusa lava pe o le a le malolosi o talitonuga maumaututu o Peresitene Teila, ae sa ia faaaloalogia pea ma puipuia le saolotoga o tagata taitoatasi. I tausaga a o avea o ia ma Aposetolo i Navu, sa faaigoaina o ia o le “Siamupini o le Saolotoga,” ma ina ua avea ma Peresitene o le Ekalesia, sa faaauau pea ona talafeagai lena faalagiga ma ia. I se taimi ina ua matua sili atu ona toatele le Au Paia o Aso e Gata Ai i totonu o Iuta, sa saga laugaina pea lava pea e Peresitene Teila le saolotoga o lotu ma le saolotoga o le mafaufau matala mo tagata uma. Sa ia faaupuina faapea: O nisi taimi e ilitata ai o tatou lagona i tagata e le tutusa o tatou mafaufau. Ua ia te i latou le aia tatau e faitalia ai i latou ma o latou mafaufauga; e faapena foi i tatou. O le mea lea, afai e le talitonu se tagata e pei ona ou talitonu ai, e leai sa’u feau i ai. Ma afai foi ou te le talitonu e pei ona ia talitonu ai, e leai foi sana feau. Mata la e te puipuia se tagata e le tutusa o oulua talitonuga? Ioe, seia oo lava i le iuga. E tatau ona tutusa o ma’ua faamasinoga tonu; ona ou faamoemoe ai foi lea e puipuia au i a’u aia tatau.”²⁹

Ua manatu Peresitene Teila, e faatatau foi le taua o le saolotoga i totonu o le Ekalesia. I totonu o aufono, na te uunaia pea lava pea tagata ina ia faaali sa’o mai o latou lava manatu. E ui lava ina malamalama atoatoa o ia i le lotogatasi, ae sa ia lagona o le lotogatasi moni lava sa maua lea i le saolotoga.

Taimi o Faigata

Sa faamaonia i tulaga na oo i ai le Au Paia i le Iunaite Setete, o se luitau le naunau i le saolotoga. O le faatonuga a le Alii, lea sa faatino ai le tele o faaipoipoga a le tagata i le Ekalesia talu mai ona po o Iosefa Samita i Navu. I le vaitau o le 1860 ma le 1870, na pasia ai i le fono faitulafono o le malo o le Iunaite Setete le taofia o au taunonofo faapea foi le tulaga o le avea ai o le Itumalo o Iuta ma setete aloaia ma isi aia tatau mo ona tagatanuu. Ina ua talitonu o lea tulafono ua solia ai le saolotoga o mea tau lotu e pei ona ta’ua i le Faavae, o lea na faaaoga ai e le Ekalesia lea malamalama e ave ai le mataupu i le Faamasinoga Maualuga a le Iunaite Setete. I le 1879, ina ua faatoa lua tausaga talu ona taitaia e Peresitene Teila le Ekalesia, sa faamalosia ai e le Faamasinoga Maualuga le tulafono a le malo e tetee i au taunonofo i le 1862. I le 1882 ma le 1887, sa toe pasia ai ni tulafono faaopoopo e le Konekeresi a le Iunaite Setete, e faataga ai e le malo ona aveesea le tulaga aloaia o le Ekalesia ma faoa meatotino uma a le Ekalesia ua silia ma le $50,000 (e aofia ai malumalu e fa ua toeitiiti maea, o le Tapeneko, o falelotu, ma isi meatotino). Sa fuafua lava e le fono faitulafono e aveesea aia tatau faalemalo o tagata o le Ekalesia, e aofia ai ma le aia tatau e palota ai. O nei mea ua fai, ua tatala ai aia faaletulafono e sauaina ai le Au Paia o Aso e Gata Ai, o e sa fai au taunonofo. Sa faaauau pea ona faia tagi faaletulafono a le Ekalesia, ae sa le faamanuiaina.

I le totonugalemu o le faateleina o tauiviga i le mataupu e uiga i au taunonofo, sa faailoa atu ai ia Peresitene Teila ua fuafuaina nei e taitai o le malo ia vave ona pue faapagotaina mai o ia. Ina ua uma taumafaiga uma faaletulafono, sa tatau loa ona ia filifili pe usitai i le Atua po o le tagata. I lana aoaoga mulimuli faalauaitele, sa ia ta’u atu ai i le Au Paia, “E le mafai, i le avea ai o a’u ma se tagata faamamaluina ona ou le usitai i lo’u Atua … ma solia nei matafaioi paia ma le faavavau i o’u vae, ua tuuina mai e le Atua ia te au e tausia, aua e oo atu ona aafiaga i le faavavau.”³⁰ Mai le aso na ia fofogaina ai lenei lauga e oo i le aso o lona maliu, pe toetoe atoa le lua tausaga mulimuli ane, sa lafi ai o ia i nofoaga eseese i totonu lava o Iuta. Sa filifili Peresitene Teila e alu ma lafi, o se auala lea e usitai ai i le Alii ma le faamoemoe ina ia faaitiitia ai sauaga e faasaga i le Ekalesia, nai lo lona liliuese mai le faatonuga a le Alii e faatatau i au taunonofo po o le tele o faaipoipoga a le tagata. Sa tusia e Elder B. H. Roberts, “Ina ua le toe vaaia Peresitene Teila e tagata lautele mai le aso 1 o Fepuari, 1885, e le faapea ona o le manatu mo lona lava saogalemu, po o le faafaigofieina mo ia po o lona sologa lelei foi, ae mo le lelei o tagata lautele ma le naunau i le filemu.”³¹

E ui ina sa le toe vaaia e tagata, ae sa faaauau pea e Peresitene Teila ona taitai le Ekalesia e ala i tusi ma faatonuga sa fofogaina atu i paaga faatuatuaina. Peitai, na i’u ina avea ma ona aafiaga le lelei lona faaesea mai, o le motusia o mafutaga ma le aiga ma uo, faapea foi mafatiaga o ona tiutetauave. I le amataga o le 1887, na amata ai ona faaletonu lona soifua maloloina. E tele ni masina o ia tauivi ma lona gasegase, ma sa ia ta’u atu ai i tagata e le o toe mamao ona toe malosi lea, peitai i le masina o Iulai, na manino ai ua matuia le tulaga ua oo i ai. I le afiafi o le aso 25 o Iulai 1887, na maliu filemu ai Peresitene Teila i le aiga o Thomas Roueché i Kaysville, i Iuta.

O Saafiafiga mo Peresitene Teila

Sa tuuina mai e nisi sa galulue ma aoaoina e Ioane Teila nisi o faamatalaga talafeagai lelei ma lana misiona. I se saunoaga i le falelauasiga o Peresitene Teila, na ta’ua ai e Elder Franklin D. Richards o le Korama a le Toasefululua e faapea: “O Peresitene Teila o se tagata e toa ma e le fefe i le upumoni. Sa le iloa e ia fefe. … Aoma faamisiona faatasi i Europa, sa galue o ia i Farani. … Sa galue o ia i lena nuu ma le maelega; ma sa i ai se taimi sa faatasia uma ai faifeau [po o le au failotu] e tetee atu ai i aoaoga faavae faaMamona e pei ona latou ta’ua ai. Faatasi ma lena lototoa, sa malie ai Peresitene Teila e fetaiai ma i latou uma na. … Sa ia faataututu ma i latou ma ia faailoa atu i ai le upumoni.”³²

Sa saunoa foi Elder Daniel H. Wells, o le sa galue auauna o se fesoasoani ia Polika Iaga, e uiga ia Peresitene Teila e faapea: “Sa ia soifua e aunoa ma le fefe, o se soifuaga faatamalii ma sa faapei o le Atua—ia saili atu e i latou o loo soifua pea e faataitai i lana faataitaiga faatamalii. … Sa avea o ia ma siamupini o aia tatau faaletagata, o le siamupini o le saolotoga, upumoni ma le le saisaitia. Sa soifua o ia i se soifuaga faatamalii ma le aoga, e tumu i le mamalu ma le tauaogaina ia te ia lava ma le aiga, o se faamalieloto i tagata ma se viiga ma le mamalu o le Atua. Ou te fiafia e molimau atu i le faatuatua ma le faamaoni o Peresitene Teila, i lona amiotonu i le Atua ma le alofa i le nuu o le Atua.”³³

O le toe tootoo i le falelauasiga o Peresitene Teila, o Angus M. Cannon, o le peresitene o le Siteki o Sate Leki, ma sa ia saafi i le tagata sa faaaluina le anoanoai o tausaga e galue ai i le faatuina o le malo o le Atua: “Ua faamaloloina nei o ia mai ona tiga. Ua moe nei o ia i le Atua; ma e mafai ona vaai faalemafaufau i faitotoa o le lagi o matalatala mai ae ulufale atu o ia. … Na tauaveina e Uso Teila le molimau na tuu i ai e Iosefa, na tuuina atu e Iesu ia Iosefa, lea na poloaiina ai e le Atua ia Iosefa e faalogo i ai mai le fofoga o lona Alo pele—ma sa ia tuuina atu na tala lelei i nuu ese, ma tuia ai o tatou loto i upu na ia fofogaina mai. Ou te fai atu, e maeu le olioli ma le fiafia o le feiloaiga a Peresitene Teila ma e na latou galulue ua fai i lagi folauga, ma ua siomia e aposetolo a Iesu Keriso, e matua maoae lava.”³⁴