Mataupu 3

“E Te Alofa Atu i Le Lua Te Tuaoi ia pei o Oe Lava ia te Oe”

E tatau lava ona tatou ola e le aunoa ma le faamoemoe i le faavavau, ma ia faatumulia i lagona o le agalelei, loto fesoasoani, alofa mama ma le faapalepale i tagata uma.¹

Mai le Soifuaga o Ioane Teila

Emasani ona aoao e Peresitene Ioane Teila le Au Paia i le taua e le gata i le talitonu, ae faapea foi i le faataunuuina o le apoapoaiga a le Faaola ina ia alolofa i o tatou tuaoi. “Ia outou fealofani,” o lana faamalosiau mai lea, “ma faia galuega o le amiotonu, ma vaavaai le soifua sologa lelei o tagata uma, ma saili e siitia le fiafia o tagata uma. O le mea lena o loo faia e le Atua.”² E malosi Lona talitonuga i le matafaioi a le Agaga mo le faafaileleina o lo tatou alofa mo isi. “Pe a e maua le Agaga o le Atua,” sa ia aoao mai ai, “e te lagonaina le tumu o lou loto i le agalelei, o le alofa mama, faapalepale, ma e te naunau foi i le aso atoa e te ofoina atu i tagata uma mea e te manao foi oe i ai. E te lagonaina i le aso atoa lou fia faia i tagata uma e faapei ona e manao latou te fai maia ia te oe.”³

Mai lona papatisoga i le 1836 e oo atu i lona maliu i le 1887, sa molimauina ai e Ioane Teila le anoanoai o sauaga ma le faamasinoga le tonu e faasaga i le Au Paia. Sa ia vaaia tagata faatupu faalavelave o latou tutuliesea tagata o le Ekalesia mai o latou fale; o ia o se molimau na vaaitino i le tagatavaleina o Iosefa ma Ailama Samita (ma sa tuga foi ona manua i lea osofaiga); ma sa i ai o ia ma le Au Paia i Iuta a o faaauau pea lo latou sauaina. Ae ui o lea, sa tumau pea lona apoapoai atu i tagata o le Ekalesia ina ia alolofa i tagata uma. I sana saunoaga i Iuta a o avea o ia ma Peresitene o le Korama a le Toasefululua, na ia saunoa ai e faapea:

“Sa tatalo Tavita ina ia vave ona auina atu e le Atua ona fili i seoli [tagai Salamo 55:15]. O Iesu, ina ua faasatauroina, sa mafatia i tiga o se oti mataga, sa ia fetalai, ‘Lo’u Tama e, ia e faamagalo atu ia te i latou; aua ua latou le iloa le mea ua latou faia.’ [Luka 23:34.] E sili atu lo’u fiafia i lena tatalo nai lo le tatalo [a Tavita]. … O le lagona lena e tatau ona tatou maua. E tatau ona tatou maua lena lagona o le tasi i le isi, ma fai faalelei le isi ma le agalelei ae aua le manatu faamaualuga. …o nisi taimi ou te faalogo ai o faapea se tagata, ‘Ou te ita ia pai.’ Aisea, ae ou te le iloa se tagata ou te inoino i ai i lenei lalolagi. O le poloaiga ua tuuina mai, ia tatou fealofani.”⁴

O Aoaoga a Ioane Teila

E tatau ona tatou faaalia le fealofani po o le alofa o le tasi i le isi e pei o ni uso ma ni tuafafine.

O le Atua lo tatou Tama, o i tatou o Lana fanau, ma e tatau ona avea i tatou o se uso; e tatau ona tatou lagona ma amio i uso, ma a o tatou taumafai e auauna atu i le Alii lo tatou Atua ma o tatou loto atoa, o mafaufau atoa, agaga atoa ma le malosi atoa, e tatau foi ia i tatou i le taimi lava lea, ona saili atu ia alolofa i o tatou tuaoi e faapei o i tatou lava, e tatau ona tatou manatu alofa i lona soifua solo lelei, o lona fiafia ma lona tamaoaiga, ma soo se mea lava ma mea uma e mafai ai ona siitia lona lelei i le olaga nei ma le faavavau.⁵

Afai tatou te taumafai e taufaavalea i so tatou uso po o se tagata, e mafai la faapefea ona tatou faamoemoe e faamanuiaina i tatou e le Atua i lena mea, aua o ia foi o se atalii o lo tatou Tama Faalelagi e faapei foi o i tatou. Ma ona o ia o sona atalii, o lea e manatu tele ai foi i lona soifua solo lelei, ma afai tatou te taumafai e faaaoga le avanoa e faamanua ai le atalii o le Alii; tou te manatu ea o le a fiafia mai o ia ia te i tatou?… Tatou te mananao ia faamaoni ma agalelei le tasi i le isi. “Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa.” Ua ta’uina mai ia te i tatou o le poloaiga sili lea. E faapena foi lona lua, “Ia e alofa atu i le lua te tuaoi, ia pei o oe lava ia te oe.” [Mareko 12:30–31.] Pe o tatou faia ea lenei mea? Afai o tatou faia, ona mafai lea ona tatou o atu i luma o le Alii. …

… E tatau ona tatou ola ina ia mafai ona faateleina lo tatou fealofani i taimi uma, ae le o le faaitiitia, ma ia i ai le alofa mama i o tatou loto ina ia tatou tauamo faatasi ma isi o latou mafatiaga, ma ia lagona o tatou o fanau a le Atua o loo saili e tauaveina lana afioga ma lona finagalo ma ana poloaiga. Ona taulimaina ai lea o tagata uma i le sa’o.⁶

E tatau ona tutumu i tatou i le alofa mama, o le agalelei faauso, ma le alofa ma le agalelei o le tasi i le isi ma tagata uma. E tatau ona tatou maua lagona e faapei o lo tatou Tama Faalelagi.⁷

Taufai saili mo le soifua solo lelei o le isi, e pei ona ta’u mai i le mau: “Ia fefaapelepeleai i le fealofani o uso; ia tausolomua ona ava o le tasi i le tasi.” [Tagai Roma 12:10.] Tou te faapea e faigata lena mea; ae, e tatau ona outou faia. Ua poloaiina i tatou e tatau ona tatou alolofa atu i o tatou tuaoi e faapei foi o i tatou lava. Afai e mafai ona tatou faia lenei mea, ona faamuamua ai lea o o tatou tuaoi nai lo i tatou lava, ma afai e i ai sina aoga, ma tuu ai i o latou tafatafa, e le gata ua tatou faataunuuina le tulafono ma le au perofeta, ae o le talalelei foi. Ia tatou atinaeina le agaga o le alofa ma le agalelei, ma ia natia ma lafoa’i mea iti uma e le lelei.⁸

E fesoasoani le talalelei tatou te atinaeina le alofa ma le lotogatasi.

O le lotu ua tatou taliaina, i lona lava tulaga taua faaleagaga, ua mafai ai ona tatou fesootai o le tasi ma le isi, ma fesoasoani ai foi ia tatou fealofani, ma ma’imau e pe ana toe i ai lava sina isi faaopoopoga o lena faamoemoega ia i tatou, ma faasili teisi atu lo tatou fealofani ma sailiili teisi atu le tasi i mea e fiafia i ai le isi. Ma’imau pe ana mafai ona tatou faavauvau faatasi ma o tatou uso, ma faatumulia i le alolofa ma le agalelei o le tasi i le isi. Ma’imau pe ana mafai ona tatou lagonaina le tatau ona faaauau pea o lena alofa faauso, ma ia salalau ma faateleina, ma tafe mai le punavai o le ola—mai le Atua, mai le loto i le loto e faapei o le suauu ua liligi ifo mai le fagu i le fagu, ina ia laugatasia ai i tatou i le filemu, mafanafana, agalelei ma le alofa. O le mea lenei e mafai e le talalelei ona fai mo i tatou pe ana se’i mafai ona tatou faatagaina.⁹

I se faapotopotoga [a le Ekalesia] i se taimi e le’i mamao atu, e toa luasefululima atunuu sa i ai o latou sui. Pe i ai ea ni lagona ese o nei tagata eseese? E leai.

I se talanoaga ma se tamalii talu ai e uiga i toatuga o mataupu faalelotu i le va o tagata Peletania ma tagata Aialani, sa ou ta’u atu ia te ia lo’u faanoanoa ona o le tulai mai o sea ituaiga o lagona. Ia, sa fai mai ai o ia, o i latou o ni ituaiga eseese se lua ma e le mafai ona latou mafuta faatasi, aua o isi o Aialani e tupuga mai i Sikotilani, a o isi o tagata Peletania, ma e eseese o latou lagona ma mea ua naunau i ai. E eseese o latou manatu ma lagona; e eseese o latou aoaoga ma o latou natura. E moni lava lea itu. Ae faapefea i tatou? Ua tatou potopoto i lalo o le uunaiga a le Agaga Paia, ma e faapei ona ou fai atu muamua, e maua ai se tuufaatasiga o le agaga, o se lotogatasi ma se mafanafana e le maua i le lalolagi ma ua fetalai mai ai Iesu, “O le mea lea e iloa ai e tagata uma lava o o’u soo outou, pe afai ua outou fealofani.” (Ioane 13:35.) …

O faapefea mai la, uso? O i tatou ea o ni Siketinevia; po o i tatou o ni Peletania; pe o i tatou o ni Sikotilani, Suisi, po o ni Take, e pei o le tulaga sa ta’ua? E leai; o le Agaga o le Atua, lea na tatou maua i le usiusitai i mea e faatonuina mai i le talalelei, ina ua toe fanauina i tatou, i le vai ma le Agaga, ua tasi ai o tatou loto, tasi le faatuatuaga, tasi le papatisoga; e leai ni o tatou vaega faaitu’au faaleatunuu, po o ni vaega o na ituaiga.¹⁰

E le tutusa uma i tatou. E eseese o tatou foliga, e eseese mea ua fai ma a matou amio, e ui ina fausia mai i elemene e tasi ma ua i ai foi le ituaiga faatulagaga e tasi. Ae e matua eseese lava i tatou ma e matua faigata lava ona outou maua ni tagata se toalua e tutusa. Ou te le manao e manatu tagata uma faapei ona ou mafaufau i ai, o loo ou naunau e faamatuu atu i tagata uma se saolotoga tele e faatatau i nei mea; ae ou te fia manao e vaai o fai e tagata uma le mea sa’o ma pipii atu i le Atua. Ae o le tele o isi mea iti, ou te le manatu tele i ai.¹¹

Tatou te faaalia lo tatou alolofa e ala i le tausia faamaoni o isi.

Afai e manaomia e tagata lelei mea masani mo le olaga, o loo ta’ua mai i tusitusiga paia, “O se ua i ai le oa a le lalolagi nei, pe a iloa atu e ia lona uso ua mativa, ae punitia lona loto alofa ia te ia, pe faapefea ona tumau o le alofa i le Atua i lea tagata?” [tagai 1 Ioane 3:17.] Ma e tusa ai la ma na mataupu, e tatau ona tatou tagai ma foai atu mea o loo manaomia e tagata uma. …Aua tatou te tuu atu ia i latou e nonofo ai i le matitiva; ae ia tatou faia i latou o ni uso ma ni tuafafine, ia faapei o ni alii ma ni tamaitai lelei, ma le faamamaluina; ia tatou mautinoa ua latou maua mea o loo latou manaomia.

Ua ou vaai i tagata e tootutuli i o latou tulivae ma tatalo ma le faatauanau i le Atua ina ia fafaga i e matitiva ma faaoofu i e ua le lavalava. O le a ou le ole lava i le Alii e faia se mea ou te le faia. Afai o ia i tatou ni tagata o manaomia le fesoasoani, ia tatou galulue loa e faatino ma fesoasoani ia i latou. …Ma afai o feagai tagata ma soo se ituaiga mafatiaga, ia vaavaai faalelei i latou ma tuu atu ia te i latou mea e manaomia mo lo latou soifua solo lelei ma le fiafia. Ma o le a faamanuiaina i tatou e le Atua pe a tatou faia.

E sili atu ia te au pe a faapea e te aveina, se taga falaoamata, o ni pisupo,… suka, o ni pata ma sisi, ma lavalava, ma karasini, ma mea e manaomia tele mo le olaga, ma taumafai e faafiafia tagata, nai lo tatalo uma lava e mafai ona e ofoina atu i le Alii mo lea tulaga; ma e sili atu foi ia te ia le silasila mai o faapena ona fai. O le auala tonu lena e fai ai. Pe a tatou mauaina foi faamanuiaga mo i tatou lava, taumafai e faasafua atu, ona faamanuia mai lea o le Atua ma taitai i tatou i ala o le filemu.¹²

Na sau se alii ia Iesu i se tasi aso ma fesili atu ia te ia, po o le fea poloaiga e sili. Sa tali atu le Faaola ia te ia: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i le lua te tuaoi, ia pei o oe lava ia te oe.” [Mataio 22:37–39.] Mata e mafai ona tatou faia lena mea? O nisi taimi e faigata, a ea? E masani ona tatou lagona faapea e sili atu ai ona tuu le lua tala i a tatou lava taga nai lo le tuu o se tala se tasi i le taga a lo tatou tuaoi, a ea? Pe sili atu foi le i ai o a tatou povi e lua pe tolu nai lo le avatu o se povi se tasi i lo tatou tuaoi e leai sana povi. …

Ia faalelei tagata uma, ma ia faia le mea sa’o mo tagata uma, ma ia faatupuina le agaga o le agalelei i tagata uma. Ma afai e te vaaia se povi a se tagata i se ma’umaga o se isi tagata, ia lava lou naunau mo lona saogalemu ma e alu e tulituli ese; ma taumafai e siitia le soifua solo lelei o ou tuaoi ma fai ia latou maua le lagona mafanafana i le mea sili e te mafaia; ona faamanuiaina lea o i tatou e le Atua, ma o le a tatou fefaamanuiaa’i foi o le tasi i le isi.¹³

Tatou te faaalia lo tatou alolofa e ala i le faamagalo atu i isi ma le sailia foi o la latou faamagaloga.

Ia fetausia’i faalelei le tasi i le isi. Pe ua e agasala ea i se tasi? Ia e alu loa lava e toe faalelei. Pe na e taufaavalea ea i se tasi? Alu loa ma fai ia sa’o. Pe na e faia ea se upu faatiga i lou uso po o lou tuafafine? Ia alu la’ia e ta’u atu i ai ua e sese ma talosaga i ai e faamagalo oe, ma e folafola atu i ai o le a sili atu ona lelei le agai i luma. Atonu o le a faapea mai o ia, i se isi itu, “Ioe, sa ou faia foi lea tala ma lea tala i le isi aso, faamolemole pe e te malie e faamagalo mai au?” E sili atu le faatumauina faatasi ma le valaauga o se tagata paia o le Atua o sea ituaiga olaga nai lo le taofiofi mamau o lagona le lelei i le loto.¹⁴

Ia tatou fetausia’i i le agalelei ma faaaloalo i le ta’uleleia o le isi, ia manatu alofa le tasi mo le soifua solo lelei o le isi, ia taulimaina tagata uma e faapei ona tatou mananao e faia e le Atua ia i tatou. Ma o lea, afai tatou te o atu i le Alii, e mafai ona tatou faapea atu, “Le Tama e, ia e faamagalo ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou,” [tagai Mataio 6:12, 14] aua afai tatou te le faamagalo i lo tatou uso, e mafai faapefea la ona tatou faamoemoe e faamagalo i tatou e lo tatou Tama Faalelagi? Afai sa i ai ni o tatou faaletonu ma o tatou tuaoi, ia tatou taumafai nei loa e fai ia lelei ma sa’o. Ia e fai atu, “Uso e po o le tuafafine pai ma lafai, o loo faaletonu lava lo’u mafaufau e uiga i se mea sa ou tautala ai e uiga ia te oe pe na faia foi ia te oe, po o se tuutuuga foi na ou faumalo ai, ma o lea ua ou sau e faalelei ma fai ia sa’o, aua ua ou naunau e faasa’o, e le afaina po o a mea e fai e isi tagata.”¹⁵

Afai e faia e tagata se faaiuga sese, ona amio faavalevalea ai lea ma taumafai e faamanu’alia i tatou, pe tatau ea ona tatou saili e faamanu’alia foi i latou? E leai, e tatau ona tatou taumafai e faia mea lelei uma tatou te mafaia mo i latou. “Ae e le o se tulaga masani lena” atonu o le manatu na o nisi. Peitai, e tatau ona tatou suia le natura faaletagata i ni uiga taua faalelagi. Na fetalai Iesu, “Ua outou faalogo, na fai mai, Ia e alofa atu i le lua te tuaoi, a ia inoino i le ua ita mai ia te oe. A ou te fai atu ia te outou, ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuua’i fua mai ma faasaua mai ia te outou,” ma isi mea faapea. [Mataio 5:43–44.] Pe a uma ona outou faia o na mea uma o loo manaomia i le poloaiga, o a la nisi mea e ono manaomia mai ia te outou? E leai se isi mea. …

… Pe afai e i ai se faaletonu e tulai mai i lo ma va ma se tasi, o le a ou ofo atu ma te faalelei i le moa o le ala, ioe, o le a ou alu atu i le tolu kuata o le ala, po o le ala atoa lava. O le a ou manao e faamatuu atu i ai; o le a ou fai atu i ai, ou te le fia misa, ou te fia avea o se Tagata Paia. O loo ou taumafai e mama atoatoa, amioatua, fai uso, ma usitai i poloaiga a le Atua i le fogaeleele, ma nofoalii ma malo ma pulega uma i lalolagi e faavavau, ma o le a ou le faatagaina lava ni mea faatauvaa e faalavelave i o’u avanoa e ausia ai na sini. O loo ou taumafai atu mo le ola, o ola faavavau ma faaeaga e faavavau i le malo o le Atua.¹⁶

“Faamagalo a matou agasala, e pei ona matou faamagalo atu i e ua agaleaga mai ia te i matou.” Pe e te mafaufau pea lava pea i lena mea? Tatou te tootutuli i o tatou tulivae, ma e toatele foi i tatou e manatu o i tatou o ni tagata lelei, ae o Tui ma Seve, e le o faia le mea sa’o, ma ou te le fiafia foi ia te ia, sa ou faia foi ni ona tala, aua na ia faatiga ia te au, ma ou te fia manao e taui masui atu i ai, peitai le Alii e, pe e te le faamagalo ea i a’u agasala? O le a ou faamagaloina, e fetalai mai ai le Alii, i lalo o se tuutuuga, ia e faamagalo i lou uso, ma na o le pau lava lena o le tuutuuga. “Pe afai foi e te avatu lau taulaga i le fata faitaulaga, ona e manatua ai lea ua i lou uso se mea e tiga ai o ia ia te oe, ina tuu ia i lea mea o lau taulaga i luma o le fata faitaulaga, ae alu oe ia muai faalelei i lou uso, i le e sau ai ma avatu lau taulaga.” [Mataio 5:23–24.] Pe afai e tausisia lenei poloaiga, ona mafai lea ona tatou faapea atu, faamagalo a matou agasala e pei ona matou faamagalo atu i e ua agaleaga mai ia te i matou.

I le tulaga o tatou o i ai nei, afai e tali mai le Alii i a tatou tatalo, e toatele i tatou o le a le faamagaloina. Afai tatou te mananao i tagata uma e avea ma tagata paia lelei, ia avea i tatou lava ma tagata paia lelei. Ia tuu atu i le e fai atu i le isi, “E le tatau ona e gaoi,” ia le gaoi foi o ia. O oe na le e aoao atu i lou uso e aua le ta’uleagaina lona tuaoi, pe ua e aloese ea mai lou faia foi e oe? …

E tatau ona tatou galulue mo mea e fiafia i ai isi, ia taufai maua lagona alolofa o le tasi i le isi. E tatau ona avea i tatou o uso i le ekalesia ma le malo o le Atua, ua soo faatasi i le noataga e le mafai ona motusia o le Talalelei faavavau, e le mo na o le olaga nei, ae faapea foi ma le faavavau. O le mea lea, o a tatou faatinoga uma ma amioga e tatau ona faia mo lena faamoemoega, ia faavae i ma mataupu faavae o le amiotonu ma faauoga.¹⁷

E tatau ona tatou mulimuli i le faataitaiga atoatoa a le Faaola o le alofa.

O o tatou lagona mo tagata o le lalolagi, i se tulaga lautele, e tatau ona tutusa ma le faasinoga a Iesu. Sa saili o Ia e siitia lo latou soifua solo lelei, ma e tatau foi ona faapena la tatou mau e pei o Ia—“O Le manuia i le lalolagi ma le finagalo alofa i tagata.” [Tagai Luka 2:14.] E le afaina pe o ai i latou, pe o a foi o latou ituaiga tagata, e tatau ona tatou saili e siitia le fiafia ma le soifua solo lelei o fanau uma a Atamu.¹⁸

Afai tatou te faia ni nai sasi laiti, e le faia e le Faaola e faapei o se tagata faavalevalea, ma le fia taui masui, e toe faapau i lalo le isi tagata. E tumu o Ia i le agalelei, o le faapalepale, ma le ono sai, ma na te taulimaina ma le alofa ma le faaaloalo tagata uma. O lagona nei tatou te mananao e faatumulia ai ma pulea ai; o mataupu faavae nei, ma o le agaga foi lenei e tatau ona ola ai toeaina uma o Isaraelu; ma e tatau ona ia pulea ai lona olaga ma ana amioga.¹⁹

Afai na mafai e Iesu, a o i ai i le fogaeleele, ona onosaia tauemuga, o le taufaifai ma faamatalaga sa soona lafo ma le le migao e tagata ia te Ia; afai ua ia te i tatou mataupu faavae na Ia aoao mai, e mafai foi ona tatou iloa na lava lagona alofa ma le faatamalii o loo i ai i Lona finagalo. …

Na afio mai Iesu iinei e tusa ai ma le fuafuaga o le muai olaga ma le faamoemoega o le Atua e tusa ai ma le aiga o le tagata soifua, o le Alo Pele e Toatasi o le Tama e tumu i le alofa ma le upumoni. Na afio mai o Ia e osia se taulaga ia te Ia lava, o le amiotonu e fai ma sui o le amioletonu; ina ia taulimaina ai tulaga manaomia o le tulafono ua solia, lea e le gafatia e le fanauga a tagata, ina ia laveaiina mai i latou mai faatafunaga o le pau, ina ia faasaoina mai i latou mai le mana o le oti lea e tatau ona oo i ai tagata uma ona o le solia o le tulafono, ma o Ia lava, le Alo o le Atua, o le taulaga togiola mo agasala a le lalolagi. Ma ina ua teena, o Ia, ma lafoaiina, ma tulia i fafo, tuufeanu i ai tagata ma ta’uleagaina; ma sa Ia toe fetalai foi ina ua faasatauroina,… “Lo’u Tama e, ia e faamagalo atu ia te i latou; aua ua latou le iloa le mea ua latou faia.” [Luka 23:34.]

Sa Ia aoao mai, o loo tusia i le tulafono o aso anamua, “e suia le mata i le mata, e suia foi le nifo i le nifo:” peitai, na Ia fetalai, “Ou te fai atu ia te outou … Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuua’i fua mai ma faasaua mai ia te outou; ina ia faia outou ma atalii o lo outou Tama o i le lagi, o le na te faaoso i lona la i e ua amioleaga atoa ma e ua amiolelei, ua faatoto ifo foi le ua i e ua amiotonu atoa ma e ua amioletonu.” [Tagai Mataio 5:38– 39, 44–45.] O mataupu faavae nei e taua i se Atua; o lagona nei afai e ola ai le fanauga a tagata, o le a siitia i latou mai lena tulaga maualalo ma le le taualoa o loo latou galulue ai, ae tuuina i latou i se tulaga maualuga ma le tamalii, o le a latou fesootai ai ma lo latou Tama Faalelagi ma saunia i latou mo se mafutaga ma Atua i lalolagi faavavau.²⁰

Fautuaga mo Suesuega ma Talanoaga

Aisea e taua ai i a tatou mafutaga ma isi ona tatou manatu o tagata uma o fanau a lo tatou Tama Faalelagi? O a mea e mafai ona tatou faia e fesoasoani ai ia tatou “lagona e faapei o lo tatou Tama Faalelagi” mo isi? O a ni auala ua e vaaia i tagata o “sailia ai e le tasi le soifua solo lelei o le isi”?
E tatau faapefea ona tatou ola ina ia “mafai ai ona faateleina lo tatou fealofani i taimi uma ae le o le faaitiitia”? O le a se mea e mafai ona tatou faia e ausia ai lenei faamoemoe faatasi ma o tatou aiga?
O a ni auala ua fesoasoani ai le talalelei ia te oe e faatupuina lou alofa i isi?
O a avanoa ua ia te oe e te fesoasoani ai i e o “manaomia mea masani mo le olaga”? E mafai faapefea ona tatou iloa le ala sili e tali atu ai i nei tulaga?
E faapefea ona tatou foia eseesega ma isi tagata? E mafai faapefea ona tatou faateleina lo tatou alolofa mo i latou e le tutusa o tatou manatu?
E taua i se a ona faamagalo atu i isi? E aafia faapefea lo tatou agavaa ia lagonaina le Agaga pe a tatou faamagalo atu i isi? E aafia faapefea i tatou pe a tatou mumusu e faamagalo atu i isi?
E mafai faapefea ona tatou aloese mai le faatiga i isi po o le faatiga ia i tatou lava? E mafai faapefea ona tatou faatoilaloina lo tatou manatu faasausili e le fia fai atu i se tasi mo se faamagaloga?
O a faataitaiga na saunia e le Faaola e faatatau i le alofa ma le loto faamagalo? Ua fesoasoani faapefea Lana faataitaiga ia te oe ia e alofa ai ma faamagalo i isi?

O Mau e Faatatau I Ai:Mataio 22:35–40; Ioane 13:34–35; Mosaea 23:15; Moronae 7:45–48; MFF 12:8; 64:8–10