Mataupu 12

O Le Sapati o se Aso e Paia

Ua poloaiina i tatou ia manatua le aso Sapati ia faapaiaina.¹

Mai le Soifuaga o Ioane Teila

E pei ona ta’ua i le mataupu ua mavae, na amata i le taufaaiuiuga o Iuni 1847, ona taitai e Elders Ioane Teila ma Parley P. Pratt se vaega e silia ma le 1,500 o le Au Paia mai Uinita Kuota i le Vanu o Sate Leki. I le faamatalaina o le amataga o lenei malaga, sa tusia ai e Elder B. H. Roberts e faapea:

“Sa tuai le taimi e amata ai lea ituaiga o faigamalaga. Sa matua tuai tele ona latou totoina meaai i lena vaitau, tusa lava pe vave ona malolo i le itu i sasae o Atumauga Papa. Sa toetoe ina leai ni a latou meaai e ola ai mo se tausaga ma le afa, ma afai e faaletonu a latou faatoaga, o lona uiga ua tatau ona matelaina, aua e tusa ma le afe i le afe limaselau maila le mamao mai le nofoaga pito lata ane e ono maua ai ni meaai. …

“Sa latou ositaulagaina mea uma, e oo lava i a latou ava ma fanau, o e e tatau ona faasoa atu i ai o latou tiga ma faamoemoega. Sa latou le iloa lo latou taunuuga, sa latou tuu atu uma ma le le mautinoa mea uma i le taimi e tasi, ma sa leai se avanoa e toe solomuli ai. Afai lava latou te le maua se nofoaga talafeagai ma toto ai ni faatoaga i le vaitau muamua, o le a leai se mea latou te ola ai, o le a le mafai foi e i latou ona tausia i latou lava. Afai latou te le manumalo, o le a fano i latou i le vaomatua, lea ua amata ai la latou faigamalaga.”

E ui lava i nei tulaga matautia, ma le mananao e taunuu i le Vanu o Sate Leki a o le’i amata le taumalulu, sa taofia la latou malaga i Aso Sa taitasi ina ia faamamalu ai i le aso Sapati. Sa faaauau ona tusia e Elder Roberts, “Sa faamamaluina le Aso Sa o se aso e malolo ai, sa faia sauniga faalelotu i faleie taitasi, ma o le pau ma le taaligoligoa o le vaomatua o sisifo na le toe i ai ina ua lagiina e le Au Paia viiga o Siona.” I le aso 5 o Oketopa 1847, sa taunuu saogalemu ai le aumalaga a Teila ma Pratt i le Vanu o Sate Leki, ma amata ai loa sauniuniga e tatau ai mo le taumalulu.²

O le Sapati ia Peresitene Ioane Teila, o se aso e tapuai ai, malolo, ma toe fotufotua’i ai le mafaufau. Sa ia uunaia le Au Paia e “tausia le paia o le aso Sapati, ma ia tuu ese e avea ma aso e malolo ai, o se aso e faapotopoto faatasi ai e fai a outou faamanatuga ma faalogologo ai i upu o le ola, ma ia tausia poloaiga, ma faia se faataitaiga lelei mo a outou fanau.”³

O Aoaoga a Ioane Teila

O le Sapati o se aso e tapuai ai i le Atua ma o tatou loto atoa.

O le tulaga sili e tatau ona tatou i ai, e le o lelei tele: o i tatou uma lava e mafai ona lelei atili; lelei atili mea tatou te fai, ma fiafia atili foi i le olaga, ma atili maua foi le Agaga o le Alii i totonu o o tatou fale ma o tatou loto, ma faia foi nisi mea e siitia ai le soifua solo lelei o i latou tatou te vaaia ma faatosina mai. O le auauna atu i le Alii o se tasi o faamoemoega tele o lo tatou ola ai; ma ou te talisapaia e pei o se faamanuiaga tele le avanoa ua tatou fiafia ai, e tapuai i le Atua i le aso Sapati. Ma pe a tatou feiloai e tapuai i le Atua, ou te fia manao ia tatou tapuai ia te ia ma o tatou loto atoa. Ou te manatu e le o se mea tatau i na sauniga, o faalogo atu o talanoa tagata i mea o le lalolagi; o taimi nei, atonu e sili atu i lo nisi taimi, e tatau ai ona outou faalatalata atu o outou lagona ma manatu i le Atua. Afai tatou te vivii atu i le Atua, ia tatou faia i le agaga sa’o; afai tatou te tatalo, ia tatou ua’i atu atoa i le tatalo, ia faia ma o tatou loto atoa, o lo tatou lotogatasi, o le a mafai ai ona tuufaatasi o tatou agaga ia tasi, ia mafai ai ona oo atu a tatou tatalo ma tapuaiga i le Atua, o lona Agaga e i ai i mea uma, ma e i ai e le aunoa i potopotoga a le Au Paia lelei ma faamaoni.

O le a ou faamatala atu ia te outou o’u lagona i le taeao o le Sapati. Ou te iloa, o se aso lenei ua tuu ese, e tapuai ai i le Atua Silisiliese: o le aso lenei e tatau ai ona ou tapuai a’u lava i le Atua, ma e tatau ona ou vaaia lelei lo’u aiga, ma vaai pe o latou faia foi lea lava mea pe leai. Aua ua poloaiina i tatou e tausia le paia o le aso Sapati, ma ia malolo ai mai galuega uma, e faapei ona faia e le Atua ina ua Ia foafoaina le lalolagi o loo tatou o nonofo ai nei. Ua Ia tuuina mai ia i tatou aso e ono tatou te galulue ai ma faia o tatou tiute o le olaga, ma afai o le a avea ma a tatou [matafaioi] le tausia o le Sapati, ia tatou faia e tusa ai ma le finagalo o le Atua lo tatou Tama, ia faapaiaina i tatou lava mo ia, mo lena aso, ma tuu atu o tatou lagona ma manatu ia te ia. E le gata i lea, o Toeaina o Isaraelu i le lalolagi atoa o loo galulue i lenei aso i le taumafaiga e aoao atu mataupu faavae o le faaolataga, ou te fia talosia foi i latou, faapea foi o tatou faifeautalai o loo o atu i le Au Paia i lenei laueleele, faapea foi i latou o loo lauga, ma i latou o loo taitai i faapotopotoga a le Au Paia i lenei atunuu ma isi atunuu uma lava, ona o le aso lenei ua tuu ese mo tapuaiga i le Atua, o lea ia i ai ia Isaraelu i soo se mea le faatosinaga ma le taitaiga a le Agaga o le Atua soifua, aemaise lava o i latou o lauga, ina ia mafai ona i ai le mana paia o le Agaga Paia, ma ia latou faasafua atu i faapotopotoga eseese upu o le ola e faavavau.⁴

O le Sapati o se aso e aoao atu ai, ma aoao mai ai i le Agaga.

O se mea lelei i le Au Paia le potopoto faatasi e fesootai ai, e faalogologo ai i upu o le ola, e manatunatu ai i o latou tulaga ma sootaga ma le Atua, o Lana Ekalesia ma le Malo, ma suesue ai i o latou lava lagona, ma, i lalo o le taitaiga a le Alii ma Lona Agaga Paia, ia taumafai ai e saili po o le a la latou faia o loo i ai nei i lo latou Tama Faalelagi, ma pe o faia o latou tiute eseese na tofia i ai i latou, ma latou saili e faataunuu le afioga, le finagalo, ma le tulafono a le Atua. ⁵

Pe a tatou. … faapotopoto faatasi, e mafai ona tatou manatu ia maua le taitaiga ma faamanuiaga mai le Atua, o le ua ta’u mai e Tusitusiga Paia, “o mea lelei uma e foaifuaina mai, atoa ma meaalofa uma e atoatoa ona lelei, e foai mai ai;” ma ua ta’uina mai foi ia i tatou, o Ia, “e le o i ai se mea faaletumau, po o sina liliu itiiti.” [Tagai Iakopo 1:17.] O i latou e lauga ma i latou foi e faalogologo i a tatou potopotoga, e tatau ona i lalo o le taitaiga ma faatonuga a le Alii, o le Puna o le Malamalama. Mai tagata uma lava o i lalo o le lagi, o i tatou, le Au Paia o Aso e Gata Ai, ua iloa e le aunoa le taua o le faalagolago i le Atua; aua sa ou faia, ma tusa lava pe o le a lava le poto e ta’u mai, tusa lava pe o le a le manaia o se lauga ma manatu faaleaoaoga e aumai, ae o le a leai se mea aoga e maua e i latou e faalogo i ai, sei vagana o faia i le taitaiga ma musumusuga a le agaga o le Atua.⁶

E leai se tagata o soifua, ma e leai lava se tagata sa soifua, sa mafai ona aoaoina atu mea a le Atua, vagana sa aoaoina, faatonu ma taitai e le agaga o faaaliga mai le Silisiliese. Ma e leai foi ni tagata e agavaa e taliaina le poto moni, ma faia se faamasinoga sa’o e tusa ai ma mataupu faavae paia o le ola faavavau, sei vagana ua latou maua le aafiaga o le agaga lava lea e tasi, o le mea lea, o failauga ma le au faalogologo, e i ai uma i aao o le Silisiliese.⁷

Tatou te potopoto faatasi, o ni tagata atamamai, e mananao e malamalama i se mea e uiga i lo tatou muai olaga, o lo tatou olaga i le taimi nei, ma lo tatou taunuuga i le lumanai. Tatou te potopoto e sailiili se mea e faatatau i lo tatou Tama Faalelagi, o mea e faatatau i ana fegalegaleaiga faaleatua ma le fanauga a tagata, o mea e faatatau i ana aiaiga ma fuafuaga mo i tatou, ma mea foi e faatatau i le faamoemoega na foafoa ai i tatou; ma ia iloa se mea, pe afai e mafai, e faatatau i lena lalolagi tatou te le i oo atu i ai. O nisi nei o mea mai le anoanoai o loo tatou mananao ia iloa, ia malamalama i ai, ma saili, pe afai e mafai.⁸

Ou te le iloa lava se isi auala e mafai ai ona aoao, faatonu, ma faia ia tatou malamalama ai i lo tatou tulaga moni, ua na o le uunaiga lava a le Agaga o le Atua soifua. E mafai ona tautala se tagata i le Agaga o le Atua, ae e manaomia foi se vaega o lena Agaga e i latou e faalogologo, ina ia mafai ai ona latou malamalama sa’o i le taua o mea o loo tuu atu ia te i latou, ma o le mafuaaga foi lena sa feagai ai pea lava pea le Alii ma ana au paia i le taumafaiga e faamalamalama tagata i mea e sili ona fiafia i ai. Tatou te taufai manatu, pe ana mafai ona aoao i tatou i le Atua, o le a lelei tele. Ou te masalo o le a manatu le lalolagi o se faamanuiaga tele. Ona tulai mai ai lea o le fesili i o latou mafaufau, pe o nei aoaoga sa latou maua e mai le Atua pe leai. E faapefea ona latou iloa lena mea? Ou te le iloaina lava se isi ala, nai lo lea na ta’ua i tusitusiga paia, “Ae peitai o i ai lava le agaga i totonu o le tagata: o le manava foi a Le e ona le malosi uma lava e faapopotoina ai i latou.” (Iopu 32:8) E le gata i lea, o loo ta’u mai foi i le Feagaiga Fou, “E le iloa e se tasi mea a le Atua, ua na o le Agaga o le Atua.” [Tagai 1 Korinito 2:11.] O lea, o le poto uma, o le atamai uma, o mafuaaga uma, o filosofia uma ma finauga uma e ono oo mai i le mafaufau o le tagata soifua, o le a le oo mai i ai, sei vagana ua saunia le mafaufau o le tagata e talia lenei aoaoga—ua saunia e le Agaga o le Alii, le Agaga lava lea e tasi e molioo maia le poto.⁹

Tatou te aai ma feinu i le faamanatuga i le Sapati e manatua ai Iesu Keriso.

E foliga mai o le afio mai o le Faaola i le lalolagi, o lona puapuaga, le maliu, toetu, ma le afio a’e i le lagi i le tulaga ua tu ai nei i le lalolagi faavavau i luma o lona Tama Faalelagi, e tele se sao i mea o tatou faananau i ai ma lo tatou fiafia; ma o le ala foi lea o le faifai pea o lenei faamanatuga tatou te aai ma feinu ai i Sapati taitasi. O lenei faamanatuga, o le faataunuuga lea o le talosaga na tuu atu e Iesu Keriso i ona soo. “Aua o aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seia afio mai o ia.” (1 Korinito 11:26.) O le faatuatua i lenei sauniga e mafai ai ona faailoa atu lo tatou faatuatua ia Iesu Keriso, ma o ia foi o le Alo Pele e Toatasi o le Tama, na afio mai o ia mai le lagi i le lalolagi, e faataunuu le faamoemoe na fuafuaina e le Atua—ia maua le faaolataga ma le faaeaga o le fanauga a tagata. E tele naua le sao o nei mea, i lo tatou soifua solo lelei ma le fiafia iinei ma le olaga a sau. Semanu e le maliu Iesu Keriso, pe ana le tatau ai. O lea e tatau ai ona faatuina lenei sauniga ina ia teuloto ai i mafaufau o lona nuu lena mea na tupu, e tautino atu ai lona taua. ¹⁰

Tatou te potopoto e aai ma feinu i le faamanatuga o le talisuaga a le Alii, ma e tatau ona tatou taumafai e aveese mai o tatou lagona ma faanaunauga i mea o le lalolagi. Aua o le aai ma feinu i le faamanatuga, e le gata ina tatou faamanatuina ai le maliu ma puapuaga o lo tatou Alii ma le Faaola o Iesu Keriso, ae o loo tatou naunau atu foi i le taimi o le a toe afio mai ai o ia, ma o le a tatou toe potopoto ai e taumamafa faatasi ma ia i le malo o le Atua [tagai Luka 14:15; Mataio 26:29]. O le mea lea, pe a tatou potopoto faatasi, tatou te faamoemoe ia tatou maua taitaiga ma faamanuiaga mai le Atua.¹¹

O le nuu o le Atua anamua, o e sa mumu pei o le afi musumusuga, sa sagisagi atu i le taeao fou, e ofoina atu ai e le Tamai Mamoe na fasia a o le’i faavaeina le lalolagi, o ia lava e fai ma taulaga, ae o tatou o loo toe faamanatuina lea lava mea e tasi. Tatou te tofitofi le areto ma aai ai, tatou te feinu foi i le vai i luma o isi tagata i aso Sapati taitasi, ma e tatou te faia e fai ma faamanatuga o le tino na momomo ma le toto na faamaligiina o lo tatou Alii ma le Faaola o Iesu Keriso; ma o le a tatou faia pea lava pea lenei mea seia oo ina toe afio mai o ia. Pe a oo i le taimi e afio mai ai, e faamoemoe o le a i ai le Au Paia o Aso e Gata Ai faatasi ma na tagata ua faamanuiaina, o le a aai ma feinu faatasi ma ia i lana lava la’o’ai i le malo o lo tatou Tama. Ou te faamoemoe i ai, e pei lava ona ou faamoemoe e ‘ai la’u meaai a nanei.¹²

E tatau ona tatou faaeteete ina ia aua nei o tatou aai ma feinu ma le faaletatau i nei faatusa [o le faamanatuga] i lo tatou faasalaga. Pe ua outou taua’imisa ea ma ou uso, pe i ai foi ni ou uiga le fiafia i se isi, pe soona tautala foi e uiga i se tasi, i se isi faaupuga o le faia o le mea e sese, ona potopoto faatasi ai lea ma le faa’amu’amu i luma o le Atua e aai i le faasalaga o o outou agaga? Tatou te mananao ia faaeteete i mea nei; ma o le mea lea e tatau ai ona tatou malamalama, a tatou aumaia a tatou meaalofa i le fata faitaulaga, ae tatou manatua ai iina tatou te le o lelei ma lo tatou uso, e tatau ona tatou mua’i o e faalelei ma ia ona o mai ai lea e avatu a tatou meaalofa [tagai Mataio 5:23–24]. Ia aua lava nei outou o mai ma soo se ituaiga o faafiaamiotonu, ae ia o mai ma lima mama ma loto e mama, ma le lagona e faapea atu, “Le Atua e, ia e su’eina a’u ma tofotofo mai au, ma ia e faamaonia au, ma afai o i ai se amioleaga ia te au, ia e aveesea, ma ia avea au ma ou sui moni i luga o le fogaeleele, ma ia tuu mai au sei ou maua le agaga o loo nofo i totonu ia Keriso, ma ola ai ma le fiafia i luga o le fogaeleele; ina ia oo i le taimi e toe afio mai ai o ia, a ua mafai e au ma o’u uso ona fetaiai ma ia, ma lima mama ma loto e mama.”¹³

Ina ia maua faamanuiaga mai le Atua, e tatau ona faia isi mea ae le na ona auai i sauniga ma aai ma feinu i le faamanatuga.

E toatele naua i tatou e mulimuli i tu ma aga a le lalolagi. Mata e mafai e le lalolagi ona avatu ia te oe le malamalama ua e maua, ma le talalelei ma faamoemoega o le lagi ua e mauaina, ma le perisitua ua tuu atu ia te oe? Pe e te faatauina ea nei mea i se ipu meaai, ma faalolololo ai i mea eleelea, faapi’op’o, o amioleaga, ma aga faatiapolo ua tumu ai le lalolagi? O le a le mea na tatou o mai ai iinei? Ina ia tapuai i le Atua ma tausi ana poloaiga. Ae o faapefea mai la le toatele o i tatou? Ua galo ia i tatou, i le tele o taimi, le faamoemoega mamalu o lo tatou valaauga maualuga, a ua tatou faamatuu atu i amio faavalevalea, o masei, o vaivaiga, ma amioga leaga, ma pulea ai i tatou i le mana’olasi, ‘onaga, soli Sapati, ma aga eseese faatiapolo. O nisi taimi ou te vaai ai i Toeaina o Isaraelu o sauni uta fafie, ma uta vaomago i le aso Sapati. Ae, o se tulaga maasiasi mumu i le silafaga a le Atua, o agelu paia, ma isi tagata atamamai uma…O le a sou manatu i se Toeaina pepelo, se Faitaulaga Sili palauvale, se Fitugafulu soli Sapati, ma se Tagata Paia loto matau’a? O agaga o ia ituaiga tagata e tatau ona musuia i le malamalama o faaaliga, ma e tatau ona avea i latou ma molimau ola, ma faataitaiga i luma o tagata uma o le ala e tatau ona tatou ola ai! E te manatu e mafai ona e ola i ou talitonuga faalelotu, ma maua le Agaga o le Atua ma le ola e faavavau, ma mulimuli ai i nei mea [leaga]? Ou te fai atu ia te oe, e leai.¹⁴

Ua fai ma masani a tagata ua filifilia nai le lalolagi, latou te lauga i le Aso Sa e uiga i mea faaleagaga, i sauniga pe a laei o latou peleue o le Aso Sa, ona latou teuina ai lea o le latou lotu ma o latou laei o le Aso Sa i totonu o a latou pusa i le Aso Gafua, ina ia le toe i ai lava se isi mea e fai i ai, seia vagana foi ua aulia le isi Aso Sa… .Oi aue, le valea e, o le tagata i lona le amana’iaina o le Atua i mea uma, i lona faataatia ese o le Atua ma lana lotu, ae faalagolago i a latou lava faamasinoga ma lo latou lava atamai.¹⁵

E i ai se mea e mamao atu lona aafiaga nai le mea o tatou mafaufau i ai i nisi taimi; pe a tatou molimau atu o i tatou o soo o le Alii, pe a tatou molimau atu ua tatou maua le Talalelei ma ua puipuia ai i tatou, e matua selo lena molimau seiloga ua ta o tatou ofu ma faasinasina i le toto o le Tamai Mamoe. E le lava le na ona tatou fesootai ma le Siona o le Atua, aua o le Siona o le Atua e tatau ona i ai tagata e loto mama, ma mama olaga e le pona i luma o le Atua, o le tatou sini autu lena. Tatou te le’i taunuu i ai, ae e tatau ona tatou oo i ai, ae tatou te le i saunia e fai mo tatou tofi le mamalu ma le faaeaga; o le mea lea, o se faafoliga ua amioatua, e le aoga ia ia te tatou, aua o le ua iloa le finagalo o le matai ae le faia, o le a faatele ona sasaina [tagai Luka 12:47]. “E le sao atu i le malo o le lagi i latou uma o e fai mai ia te au, Le Alii e, le Alii e: na o le na te faia le finagalo o lo’u Tama o i le lagi.” [Mataio 7:21.] O aoaoga faavae nei o le Talalelei ua ou malamalama i ai. Ma e le lava le na ona tatou taliaina o le Talalelei ma faapotopoto iinei i nuu o Siona, ma mafuta ma le nuu o le Atua, ma auai i sauniga ma aai ma feinu i le Faamanatuga o le talisuaga a le Alii, ma taumafai e agai i luma e aunoa ma le tuua’ia o i tatou i ni mau mea; aua e ui i nei mea uma, a le tonu o outou loto, afai e le mama atoatoa o tatou loto i luma o le Atua, afai e le mama atoatoa o tatou loto ma o tatou mafaufauga, matatau i le Atua ma tausi Ana poloaiga, e le mafai lava ona tatou ‘ae’ae i nei faamanuiaga sa ou tautala atu ai, ma ia sa molimau mai ai Perofeta, sei vagana ua tatou salamo.¹⁶

O la tatou matafaioi le avea ma Tagata Paia. Ma ina ia agavaa la mo lena, o lo tatou tiute le ola i mataupu faavae o le amioatua, upumoni, amio sa’o, paia, mama atoatoa, ma le mamalu, ina ia mafai ai i taimi uma ona tatou mautinoa le alofa o le Atua Silisiliese; ia i ai Ana faamanuiaga i o tatou loto; ia i ai le filemu o le Atua i o outou fale;…ma ia i ai Lana puipuiga faalelagi ia i tatou, o se nuu.¹⁷

Fautuaga mo Suesuega ma Talanoaga

O a ni faamanuiaga e mafai ona tatou oo i ai pe a tausia ma le faamaoni le Sapati? (Tagai foi MFF 59:9–13.) Na faamanuiaina faapefea oe lava i le tausia o le paia o le aso Sapati?
O le a se mea e mafai ona e fai e atoatoa ai ona e tapuai i le Atua i le Sapati? E mafai faapefea ona e sauniuni oe lava ia e atili maua le Agaga Paia a o le’i amataina sauniga o le Aso Sa?
O le a se mea e mafai e matua ma matua matutua ona fai e faatosina ai a latou fanau ma fanau a fanau ia tausia le paia o le Sapati? E mafai faapefea ona tatou faaese mai le Sapati mai isi aso mo o tatou aiga? E mafai faapefea ona avea le tausia o le Sapati e faamalolosi ai aiga ma puipuia i tatou mai le lalolagi?
E tatau i se a ona aoao i le Agaga i a tatou tapuaiga i Sapati? O le a se mea e mafai ona e fai i lau matafaioi o se faiaoga, po o se tamaitiiti aoga e valaaulia ai le faatosinaga a le Agaga Paia i le Sapati?
O a feagaiga tatou te osia pe a tatou aai ma feinu i le faamanatuga? (Tagai foi Moronae 4–5 po o le MFF 20:76–79.) O le a le faia a nei feagaiga ma a tatou feagaiga o le papatisoga? (Tagai foi Mosaea 18:7–10.)
Aisea e taua ai lo tatou aai ma feinu e le aunoa i le faamanatuga? O le a se mea e mafai ona e faia e te latalata atili ai i le Alii pe a e ai ma inu i le faamanatuga?
O le a le eseesega i le na ona auai i sauniga ma le tausia moni o le paia o le Sapati? E mafai faapefea ona tumau ia te oe le agaga o le Sapati i le gasologa o le vaiaso?

O Mau e Faatatau I Ai: Esoto 20:8–11; Isaia 58:13–14; Mataio 12:10–13; 3 Nifae 18:1–12; MFF 27:1–14; 59:9–20