Mataupu 21

Faamalolosia o Aiga

Tausia faalelei outou lava ma o outou aiga, o outou atalii ma afafine; ma ia tatou saili atu e fai le mea sa’o.¹

Mai le Soifuaga o Ioane Teila

Ole aso 1 o Fepuari 1885, na alu ai Ioane Teila ua lafi, ina ia aloese mai ai i sauaga a taitai o le malo. E ui ina sa faamoemoe o ia, o lona faaaunuua, o le a faaitiitia ai le pologa sa feagai ma le Ekalesia i na taimi, ae sa ia silafia foi o lona lafi o le a tuueseese ai o ia mai le toatele o lona aiga i aso o totoe o lona soifua i le fogaeleele. Ae ui i lea, o lenei taimi atoa, sa tumau ai pea lona popole mo le soifua solo lelei o lona aiga. “Ta’u atu ia i latou, ou te manatua pea i latou e le aunoa,” sa ia ta’u atu ai i le atalii o le tuagane o lona faletua, o Angus M. Cannon ae e le o toe mamao ona maliu lea. “Ou te alofa ia te i latou taitoatasi, ma ia aua lava nei galo ona faatoga atu i le Atua mo i latou.”²

O Peresitene Teila o se tane ma se tama alofa ma le faamaoni. Na tusia e lona atalii o Mose W. Teila e uiga ia te ia: “E malosi lona faanaunauga e tuu lana fanau i le tausiga a le aiga, ma sa saunia ai malae taalo mo i matou. E oo lava ina ua silia ma le fitusefulu ona tausaga, e sau lava matou te taaalo. Sa ia saunia se faaputuga oneone tele mo le fanau laiti, ma afai e i ai se taimi na sili atu o lo’u olaga nai lo lo’u eliina o le oneone, o lona uiga ua misi i la’u vaai. …

“Ou te le’i faalogo lava o tauaimisa ma se isi o lona aiga; ou te le’i faalogo lava o finau ma lo’u tina pe fetotoa’i foi a o i ai le fanau. Pe a talanoa mai o ia e uiga i o matou tiute i le lotu, e talanoa mai lava i le agaga o le faufautua ma e masani ona ia faapea mai, ‘O le a faafiafiaina a’u pe afai o oe o se Au Paia [faamaoni] o Aso e Gata Ai.’ Sa maualuga lona faamoemoega i lana fanau aua sa foliga mai o lo latou faanaunauga silisili o le faafiafiaina lea o ia.”³

Sa aoao e Peresitene Teila le Au Paia i le taua o le faia e matua o se faataitaiga lelei mo a latou fanau. Sa ta’ua i se taimi e lona atalii o Frank Y. Teila le faatosinaga tele o faataitaiga lelei a lona tama i lona olaga: “Pe a ou mafaufau i le aoaoina o au ma le faaeteete, o le faataitaiga matagofie sa faia mo au, i lo’u talavou, ou te lagona e leai se ‘alofaga mo a’u e fai ai se mea e le sa’o i lo’u olaga, aua ou te lagona sa ia te au se faataitaiga lelei atoatoa ou te mulimuli ai. Peitai, a o ou tamaitiiti, sa tofotofoina au e pei o isi tamaiti; ae sa matua mama atoatoa le olaga o lo’u tama, ma o le mea lea soo se taimi lava e oo mai ai se tofotofoga ia te au, e foliga mai e tula’i mai lo’u tama i o’u luma ma le mamalu, e pei o se maa faamanatu, ma sa le mafai ona ou faia se mea sese sa tofotofoina ai au e fai. Sa ou lagona o le a ou aumaia ai le le fiafia ia te ia, ma sa ou iloa e leai se mea i lona olaga e tatau ai ona ou faia se mea e le fia silasila i ai lo tatou Tama i le lagi. Sa ou lagona, pe a ou mafaufau i lona olaga, Oi, ou te fia manao foi a’u ia, ou te ola i lena ituaiga o olaga, ina ia avea ai au ma malamalama i le pouliuli i o’u atalii ma afafine.”⁴

O Aoaoga a Ioane Teila

O sootaga o faaipoipoga ma aiga e faavavau.

O le talalelei o loo tatou aoao atu o le talalelei e faavavau; e tau i tua i faavavau ua mavae; o loo i ai i le taimi nei ma e tau atu foi i faavavau o le a oo mai, ma o mea uma lava e tau i ai, e faavavau. Mo se faataitaiga, o a tatou sootaga o faaipoipoga e faavavau. A outou o i faalapotopotoga faalelotu i aso nei, o le a outou iloa ai e faamuta e le oti a latou feagaiga faale- faaipoipoga i le olaga nei; latou te iloa e mafai ona faaauau a latou sootaga i le olaga a sau; latou te le talitonu i se mea faapena. E moni e i ai se mataupu faavae faanatura i tagata e mafua ai ona latou faamoemoe atonu e sa’o; ae peitai latou le iloa se mea e uiga i ai. O lo tatou talitonuga faalelotu e fusia faatasi ai alii ma tamaitai mo le faavavau atoa. O le talitonuga lea sa aoao mai e Iesu—o loo i ai le mana e fusifusia ai i le lagi ma le lalolagi, ma ua i ai foi le mana e tatalaina ai i le lalolagi faapea foi i le lagi [tagai Mataio 16:19]. Tatou te talitonu i mataupu faavae lava ia e tasi, ma ua tatou faamoemoe foi, o le toetu, o le a tatou toe mafuta faatasi ai ma o tatou taitoalua ma faamauina a tatou fanau ia i tatou i le mana o le perisitua paia, ina ia mafai ai ona soo faatasi i tatou ma lalolagi e le gata mai.⁵

Ina ua folasia ma aoao mai le talalelei ia Atamu ina ua mavae le pau, o le togiola a Iesu Keriso ua tuu ai o ia i se tulaga e le gata ina ia manumalo ai i le oti, ae ina ia mafai ai foi e ia ona maua le natura faavavau faalelalolagi ma faalelagi; e le gata i le pule faalelalolagi ae faapea foi i le faalelagi, ma o le tulafono foi o lena talalelei e mafai ai e ia (e le na o ia, ae o ana fanau uma) ona maua e le gata i lona uluai tofi, ae faapea foi se faaeaga e maualuga atu i le lalolagi ma le lagi, nai lo le mea e mafai ona fiafia ai pe ana le pau o ia; o mana ma faamanuiaga e aumaia i le togiola e sili atu ma maualuluga nai lo se isi lava mea e fiafia ai po o avanoa e mafai ona ia maua i lona uluai tofi. O le mea lea, ua avea ai o ia ma lana soa ma tama ma tina o le ola—ola i le tino, ola i le agaga, ma ola e faavavau, ma ua tuuina i lea tulaga ina ia avea ai ma Atua, ioe, o atalii ma afafine o le Atua, ma ia uluola ai ma e leai se tuaoi o le la’ua pule iina; o lalolagi e le gata.⁶

O le a se mea e sili ona alofagia ma malie nai lo na lagona atoatoa, mama, ma le faagauloto na tuu e le Atua i loto o le tane ma le fafine, o e ua fusia faatasi i le faaipoipoga, faatasi ai ma se alofa ma le faamaoni, e mama atoatoa e pei o le alofa o le Atua, aua e puna mai ia te ia, ma o lana meaalofa lea: ma ni tino mama ma amioatua, ma o sana fanau, e matagofie, maloloina, e atoatoa, e lotomama, ma e leai se pona: e fefaasoaai o la manatu, la te nonofo faatasi i le matata’u i le Atua, e fiafia i meaalofa o le natura e le’i faaleagaina, ma mama atoatoa e pei o le kiona ua faatoa toulu, po o le punavai manino. Ae e maeu le tele o lenei fiafia pe ana fai la te malamalama i lo la’ua taunuuga, ma mafai ona malamalama o la’ua mafaufau i fuafuaga a le Atua, ma tepa taula’i atu i se mafutaga faavavau i se tasi laasaga o le olaga, o se sootaga ma nei fanau, e amata atu iinei ona tumau e oo i le iuga, ma faamalolosia ai a latou sootaga, o fegalegaleaiga ma le felagolagomai.

E tele le fiafia o le tina pe a sapai lana tama, ma sioa i le matagofie o le pepe meamea; o le a matua faatumulia o ia i le oliloli pe a mafaufau i le i ai o lena tamaitiiti ia te ia e faavavau. Ma pe afai tatou te malamalama i lo tatou tulaga, o le faamoemoega lenei na tatou o mai ai i le lalolagi. Ma o le faamoemoega o le malo o le Atua, lea o loo mafuli i ai a’u tusitusiga, o le toe faatuina lea o nei mataupu faavae uma.⁷

E oo atu faatosinaga a matua i augatupulaga i le lumanai.

O le olaga o se tagata paia e le na o se faaatoatoaina o ia lava, e i ai foi lana vaega mo le togiolaina o le lalolagi atoa. E leai se tasi e mafai ona faasaoina na o ia, e ia lava, e aunoa ma le fesoasoani atu o isi po o lona fesoasoani atu foi i isi. O le aafiaga o a tatou faatosinaga a le mo le lelei, e mo le leaga, o se fesoasoani po o se faamanu’a i le galuega o le foafoaina o tagata, ma a o tatou manatu i o tatou tiutetauave, ma amatalia ni sootaga, osia feagaiga, fanaua fanau, ma faaopoopo le faitau aofai o aiga, e faapena foi ona faateleina le aafiaga o a tatou faatosinaga, e faapena foi ona faalautele ma faalolotoina.⁸

O le uluai poloaiga na tuu i le tagata o le “Ia fanafanau, ma ia uluola, ma ia tumu ai le lalolagi.” [Kenese 1:28.] Ma ona o le tagata o se tagata e faavavau, ma o ana taga uma lava e tau i le faavavau, o lea e tatau ai ona ia malamalama lelei i lona tofiga, ma faataunuuina le fuafuaga na foafoa ai o ia: aua talu ai o ia ma ana fanau ua fuafua e ola faavavau, ua le gata o lona tiute o ana lava mea e fai, ae i se isi tulaga, ua ia te ia foi le tiute mo na fanau; e aoaoina o latou mafaufau, faatonutonu a latou amio, faia faataitaiga sa’o mo i latou, ma aoao atu ia te i latou mataupu faavae sa’o, aemaise lava o le tausisia o le mama atoatoa o lona lava tino.

Aisea? Aua afai na te faatautala i lona tino ma faalaleaga ia te ia lava, ua le gata ina ia faamanu’a ia te ia lava ae e sosolo atu ai le faanoanoa e le mafuatiaina i ana fanau, … ma e le gata i le olaga nei, ae faapea foi i le faavavau. O le mea lea na tuu mai ai e le Alii tulafono e faafoe ai faaipoipoga, ma le ola mama, o le ituaiga ua matua tamau, ma e oo mai ai le faasalaga aupito matuia i luga o i latou o tupulaga eseese e faia ma le faatautala pe faaaogaina ma le le tatau lenei sauniga paia. … Ma pe aisea? aua ua i le tagata le pule saoloto e vaaia ai lona lava tino, ina ia mafai ona faaeaina ia lava ma ana fanau, i le olaga nei ma le faavavau. Afai na te faaaogaina ma le le tatau lena mana, e le gata ina faaaafiaina e ia ia lava, ae o tino ma agaga e le’i fananau mai; e faaleaga ai le lalolagi, ma talaia ai faitotoa o lologa o mea leaga, ola le mama, ma le vavaeeseina mai le Atua. … Peitai, pe afai e faataunuuina le poloaiga, ona taatia mai ai lea o mea i se tulaga matagofie.⁹

Afai o au … o le ulu o le aiga, ou te fia manao e aoao tonu lo-’u aiga, ma aoao ia i latou mataupu faavae o le amioatua, paia, mama atoatoa, mamalu ma le amio sa’o, ina ia mafai ai ona avea i latou ma tagatanuu agavaa, ma ia mafai ai ona latou tutu atu i luma o le Atua, ma a oo i le taimi matou te tuua ai lenei lalolagi, ua matou agavaa e fetaiai ma le au filifilia a le Atua (o i latou sa ia filifilia mai atunuu o le lalolagi), ma Atua o lalolagi o le faavavau. O le mea lea, o taeao uma lava, i le avea ai o au ma ulu o lo’u aiga, e tatau ona ou faapaiaina a’u lava ma lo’u aiga i le Atua.¹⁰

E le tatau ona tatou faia ni upu faatiga po o upu malolosi ma amioga paaa i o tatou aiga.

E le tatau ona e faia se upu pe faia se amioga e te le manao e faataitai i ai lau fanau. E i ai tagata e fai mai e matatau i le Atua, ma o nisi o i latou o Toeaina o Isaraelu, ae ua amioa’i i le laulauvavale, … o se luma ma se ta’uvalea i le lagi i luga, ma o lenei foi laulauvavale e faia i nisi taimi i luma o o latou aiga; o se tulaga maasiasi tele. Ona fai lea e nisi tagata ni faamatalaga e ‘alofaga i ai faapea, o latou e lotoita: Afai o a’u, ou te totogia se tagata na te aveesea mai ia te au na uiga leaga e leai se aoga. O le a ou faaeteete ia sa’o uma a’u amioga ma mea e fai. …

E tatau ona tonu mea tatou te fai i a tatou ava. O le tagata leaga le e saua ma fai faatautala se fafine. … Pe tou te le’i osi feagaiga ea ma a outou ava mo le olaga nei ma le faavavau? Ioe, ua uma. Pe e te le manao ea, e fai atu pe a uma lenei olaga, Meli, Sieni, Ane, po o ai lava le igoa, Ou te le’i faatiga lava ia te oe i lo’u olaga. Ma afai o outou o ava, pe tou te le mananao ea e fai atu, Tomasi, po o Viliamu, Ou te le’i faatiga lava ia te oe i lo’u olaga atoa. Ona nonofo faatasi ai lea i le faavavau i le olaga a sau.¹¹

Outou tane, pe tou te alolofa ea i a outou ava ma tausi faalelei i latou, pe o outou manatu o outou o ni tama ‘autu e i ai le aia tatau tou te pulea malosi ai i latou? … E tatau ona outou tausi i latou ma le agalelei, alofa ma le onosai, ma aua le ‘ina’ina ma faaonoono, ma ia aua lava nei e fia faaalia sau pule. Ona liliu ane lea ia te outou ava, ia tausi faalelei a outou tane, ma taumafai e faafiafia i latou ma maua lagona mafanafana. Taumafai e fai o outou aiga o ni tama’i lagi, ma taumafai e teuloto le Agaga lelei o le Atua. Ona tatou aoao ai lea e i tatou o matua a tatou fanau ia matata’u i le Atua, ma aoao i latou i tulafono o le ola. Afai tou te faia na mea, o le a i ai le filemu i o tatou loto, filemu i totonu o o tatou aiga, ma le filemu i o tatou siosiomaga.¹²

Soia le toe faaaogaina o upu faatiga po o upu mamafa, ma aua nei faatagaina ni lagona le lelei i o outou loto, po o outou fale. Ia outou fealofani, ma ia taufai taumafai tagata o le aiga e faatupu atili le ola solo lelei o le isi, o lena elemene [o le alofa] o le a tulaga ese ai le li’o faaleaiga, ma o le a maua foi e a outou fanau lea lava lagona, ma o le a latou faata’ita’ia foi a outou faataitaiga lelei, ma tumau ai i mea sa latou aoaoina i le fale.¹³

E tatau ona tatou aoao atu ma ola ai i mataupu faavae o le amioatua i o tatou aiga.

Matua, ia outou tautala sa’o; ia talitonu a outou fanau ia outou upu, ina ia tautala atu le tama po o le tina, ae e mafai ona latou faapea mai, “afai na fai mai tama po o tina i lea mea ma lea mea, ou te iloa e sa’o, aua o la na fai mai ai tama po o tina, aua la te le’i liliuese lava mai le faia o le mea sa’o, pe faia se talapepelo.” O le ituaiga lagona lena tatou te mananao e atinae ia i tatou lava ma o tatou aiga.

Ma e le gata i lea, tatou te mananao ia mama o tatou tagata, i o tatou fale ma mea uma lava. Tina, e tatau ona atinae i o outou loto le agaga o le filemu; e tatau ona faapei outou o agelu a le Atua, ia tumu i le amioatua. Ma e tatau i le tama ona fai faalelei le tina. Pe i ai ea ni vaivaiga o le tina? Ioe. E faapena foi le tama. … Fai o outou aiga ia tumu i le olioli. Ma ia faava’ai a outou fanau e te lua fealofani, ina ia latou tutupu a’e ma lena lava lagona e tasi, ma taitai mai ai i lena mataupu faavae, e ava i o latou tama ma tina. O ituaiga lagona nei e avea atili ai i tatou e faapei [o le Atua].¹⁴

E fai ni a outou tatalo faaleaiga? … Ma afai foi e fai, pe na ona faataunuu lava e pei o le oloina o se fasi u’amea e tau lava ina fai, pe tou te punonou ma le agamalu, ma se loto faamaoni e saili atu i faamanuiaga a le Atua i o outou luga ma lo outou aiga atoa? O le ala lena e tatau ona tatou faia ai, ma atinae ai se agaga o le faamaoni ma le faatuatua i le Atua, ma faapaia ai i tatou lava mo ia, ma talosia ai ana faamanuiaga mo i tatou.¹⁵

Ua poloaiina i tatou e le Alii e faatulaga lelei o tatou aiga. Outou na o Aposetolo, Peresitene o Siteki ma Epikopo, pe ua outou faia ea lenei mea i o outou lava aiga? Pe ua outou tagatagai ea ia faia e le Au Paia lea lava mea? Pe ua e faamamafa atu ea i tagata o i lalo o lau vaavaaiga, le matua taua a’ia’i o le mama atoatoa pe afai latou te mananao i faamanuiaga ma le puipuiga a Le Silisiliese? E le o sili a’e le mata’i e luko faitogafiti ma le fiaaai o se lafu o mamoe ma tamai mamoe, nai lo tagata o a outou uarota ma siteki o loo mata’i e i latou ua saunia e faaleaga pe faaumatia i latou. Pe ua e nofouta ea i lenei tulaga matautia, ma pe ua e faia ea mea uma e puipuia mai ai?

Matua, pe o outou faamaoni atoatoa ea outou lava i mataupu faavae uma o le amioatua, ma pe o outou siosiomiaina ea o outou atalii ma afafine i talita uma e puipuia ai i latou mai le faafiapopoto ma le taufaavalea o e amioleaga? Pe o outou aoaoina ea i latou o le ola mama o le tane ma le fafine e tatau ona manatu maualuga i ai nai lo le ola lava ia? Pe o outou tuu ai pea lava i lo latou valea ma le le malamalama, e milo faatasi ma soo se vaega o tagata latou te filifilia, i soo se taimi e faigofie ia i latou, ma latou oo atu ai i togafiti a e amioleaga ma le pi’opi’o? O fesili nei e tatau ona outou tali uma i ai, a le faamaasiasia ai outou ma faamalaiaina, po o lo outou olioli ma le fiafia e faavavau. Ia outou iloa le mea lenei, talu ai e aumaia e le Atua ia i tatou o faamanuiaga taua ua tatou maua, o lea e matua manaomia mai ai foi ia i tatou, se mea e talafeagai lelei. O lo tatou mauaina o ia faamanuiaga, ua faatietie mai ai foi ma sa tatou matafaioi. Afai o le a le faataunuuina nei mea o le a mulimuli mai ai lava le ta’usalaga.¹⁶

Matua, tausi faalelei a outou fanau; aoao i latou ia matata’u i le Alii; e sili atu lo latou taua ia te outou nai lo mea e tele na tou te pupu i ai.

O outou foi le fanau, ia outou usiusitai i o outou matua; ia faaaloalo i o outou tama ma tina. Sa tausi ma vaavaai outou e outou tina, ae o faanaunauga o o outou tama o lo outou ola sologa lelei, ma e tulitulimata’i atu lava o latou loto ma lagona ia te outou. Aua tou te faatiga ia te i latou i lo outou o ese mai lea i mataupu faavae sa’o; ae ia outou savavali i ala o le ola. Matua, fanau, tane ma ava atoa ai ma tagata uma lava, ia outou matatau i le Atua, ma ia tuu atu lo outou faatuatuaga ia te ia ma ia ola i mataupu faavae o lo outou talitonuga paia faalelotu ua uma ona faaali mai e le Atua ia te i tatou.¹⁷

Fautuaga mo Suesuega ma Talanoaga

E faapefea ona faatosinaina lagona i le aiga ona o se malamalama i le natura e faavavau o le faaipoipoga ma sootaga faaleaiga? E fesoasoani faapefea lenei malamalama ia te oe e avea ai oe o se toalua po o se tagata o le aiga ua sili atu ona lelei nai lo le mea sa i ai?
O a ni mea patino e mafai ona fai e tane ma ava e fesoasoani ai e tausia a latou feagaiga o faaipoipoga?
O a ni auala e mafai e matua ona aoao i a latou fanau mataupu faavae e tatau ai mo lo latou faaolataga? E mafai faapefea e matua ona fesoasoani i a latou fanau atonu e fouvale pe ua faia foi ni mea sese matuia?
Faitau le Faataoto 3:5–6. E mafai faapefea e matua ma matua matutua ona saunia i latou lava e faalogo i le Agaga ina ia mafai ai ona latou apoapoai atu ma le sa’o i a latou fanau ma fanau a a latou fanau? O a ni auala sa fesoasoani ai le Agaga Paia ia te oe e faia faaiuga na faatosina mai ai a outou fanau po o a latou fanau mo le lelei?
O le a se mea na aoao mai i faataitaiga a ou matua?
Faitau pe usu le viiga “O Le Atua Lo’u Tama” (Viiga, nu. 184). E faapefea ona aafia lo tatou tausiga o a tatou fanau pe a tatou iloa o i tatou uma o fanau agaga a lo tatou Tama i le Lagi? Ae faapefea o tatou toalua?
Sa lapataia i tatou e Ioane Teila ia aloese mai le faia o upu faatiga po o taga soona fai i totonu o o tatou aiga. E mafai faapefea ona puipuia o tatou aiga mai nei mea?
Aisea e avea ai le faasaua po o faiga faatautala faalelagona pe faaletino i se toalua po o se tamaitiiti, ma agasala matuia i le silafaga a le Atua? E mafai faapefea ona foia tulaga faasaua ma le faatautala?
E mafai faapefea ona atinae se lagona o le alofa ma le filemu i o tatou aiga? O a faamanuiaga ua maua e lou aiga pe a i ai le Agaga o le Atua? E mafai faapefea e i latou e le o nonofo i se aiga toafilemu ona maua se filemu i o latou olaga?

O Mau e Faatatau I Ai: Salamo 127:3–5; Mataio 18:1–6; 3 Nifae 18:21; MFF 68:25–28; 93:40–43; 132:19–20