Mataupu 5

O Le Togiola e Le I’u a Iesu Keriso

O le tagata, po o le a lava le mea e faia e ia lava ma ausia, e na o le faaeaina ai o ia lava i le mamalu ma le mea e gafatia e le tagata, ma o lea la, e manaomia ai le togiola a se Atua, a’o le i …mafai ona faaeaina le tagata.¹

Mai le Soifuaga o Ioane Teila

I se fonotaga ma tagata o le Ekalesia, sa tulei saunoa ai Elder Ioane Teila e uiga i le olioli na ia maua ina ua manatunatu loloto i le Togiola a Iesu Keriso: “Ua ou fiafia lava e feiloai ma le Au Paia. Ou te fia tofitofiina faatasi ma i latou le areto e faamanatu ai le tino o lo tatou Alii ma le Faaola o Iesu Keriso, ma inu i le ipu e faamanatu ai lona toto na faamaligiina. Ma toe manatunatu ai i fesootaiga. O lo tatou sootaga ma le Atua e ala i lo tatou Alii o Iesu Keriso; o a tatou sootaga o le tasi ma le isi o ni itutino o le tino o Keriso, ma o tatou faamoemoega e faatatau i le lumanai; o le toe faaali mai o lo tatou Alii o Iesu Keriso, pe a tatou malamalama i ai, o le a saunia o ia lava e auauna mai ia te i tatou, ma o le a tatou aai foi i le areto ma feinu faatasi ma ia i le malo o lona Tama. Ou te fia manatunatu i nei mea uma ma le faitau afe o isi mea e fesootai ma le faaolataga, fiafia ma le faaeaina o le Au Paia a le Atua i lenei lalolagi, faapea foi le lalolagi o le a oo mai.”²

O Aoaoga a Ioane Teila

Sa osi feagaiga Iesu e faataunuu le fuafuaga a le Tama e ala i le togiolaina o agasala a le lalolagi.

I le Fono i le lagi, o le fuafuaga e tatau ona talia e faatatau i fanau a le Atua, o e na avea ma agaga i lena taimi, e le’i maua ni tino faitino, sa matua tuutuu loloto i ai le tofa. Aua, pe a silasila i le foafoaga o le lalolagi ma le tuuina i ai o tagata, o lona uiga e tatau ona i ai o latou tino faitino, ma o na foi tino latou te usitai ai i tulafono o le olaga, ma mafai ai foi ona latou faaeaina ai faatasi ma Atua, ma ua ta’uina mai foi ia te i tatou, o le taimi lena, “e pepese faatasi ai fetu o le taeao, ma alalaga fiafia atalii uma o le Atua.” [Iopu 38:7.] Ona tulai mai ai lea o le fesili, e faapefea, ma o le a foi le mataupu faavae e tatau ona aumaia ai le faaolataga, faaeaga ma le mamalu e faavavau o fanau a le Atua?

Ua faamaonia lava o lena Fono, sa tuuina atu ai ma talanoaina ni fuafuaga patino, ma ina ua maea se talanoaga atoa o na mataupu faavae, ma le tautinoga o le finagalo o le Tama e tusa ai ma Lana fuafuaga, o lea na tulai atu ai Lusifelo i luma o le Tama, ma lana lava fuafuaga ma faapea atu, “Faauta, o au lenei, auina atu au, ia avea au mou Atalii, ma o le a ou togiolaina le fanauga uma a tagata, ina ia le se ese se agaga e toatasi, ma e moni o le a faapea lava ona ou faia; o le mea lea, ia tuu mai ia te au lou mamalu.“ [Tagai Mose 4:1.] Peitai, ina ua faafofoga Iesu i lenei faaupuga na fai e Lusifelo, sa ia fetalai atu, “Lou Tama e, ia faia lou finagalo, ma ia ia te oe pea le mamalu e faavavau.” [Mose 4:2.]

O nei fetalaiga a le Alo pele, e tatau ai ona tatou faia ai se faaiuga, o le talanoaina o lenei mataupu, na faailoa atu ai e le Tama Lona finagalo ma faatuina ai Lana ata faataatia ma le fuafuaga e faatatau i nei mataupu. Ma na pau lava le mea sa finagalo ai Lona Alo pele e fai o le faataunuuina lea o le finagalo o Lona Tama, na foliga na i ai ae le’i faailoaina mai. Na finagalo foi o Ia, e tuuina atu le mamalu i Lona Tama, o le Atua le Tama, ma le na mamanuina ma amatalia le fuafuaga, e ona ia foi le aia tatau i le mamalu uma ma le viiga.

Peitai sa manao Lusifelo…e faatu’iese i le finagalo o lona Tama, ma sa ia taumafai ma le faafiapoto e faoa le saolotoga o le tagata e filifili ai, ma ua avea ai o ia ma pologa, ma oo ai i se tulaga ua le mafai ai e ia ona maua le faaeaga lea na fuafuaina e le Atua mo le tagata, pe a usitai i le tulafono na Ia fautuaina mai…Pe ana le i ai i le tagata lona saolotoga e filifili ai, semanu e le mafai ona tofotofoina e le tiapolo, po o se isi lava mana; aua pe ana fai e fai faamalosi le finagalo o le Atua, ma faataunuuina e aunoa ma se faatinoga a le tagata po o lana filifiliga, semanu e le mafai ona ia faia se mea sese, aua semanu na te le maua le mana e fai ai se mea e sese. O le tulaga lena na manao Satani e tu ai, e le gata mo agaga i le lagi, ae faapena foi i tagata i le lalolagi. Ma sa faapea mai Satani, “O le a ou togiolaina le fanauga uma a tagata, o le mea lea, ia tuu mai ia te au lou mamalu.”³

Sa teena le fuafuaga [a Satani]…aua ua le tusa ai ma le faamoemoe o le Atua, lona Tama. Ona tulai ai lea o le Alo pele e fai atu i le Tama, ma sa ia le fetalai atu o le a faia sana ia lava fuafuaga, aua na Ia silafia le finagalo o Lona Tama, ma o lea na fetalai atu ai, “Ia faia lou finagalo; o le a ou faataunuuina lau ata ma lau fuafuaga, ma, pe afai e pau le tagata, ou te ofoina atu a’u lava e fai ma togiola e tusa ai ma lou finagalo, le Atua e. Ou te le manao foi i le mamalu, ae ia ia te oe pea le viiga;” [tagai Mose 4:2] ma o lea na osia ai se feagaiga i le va o Ia ma Lona Tama, lea na Ia ioe ai e togiolaina agasala a le lalolagi, ma o lea na avea ai o Ia, e pei ona ta’ua, ma Tamai Mamoe na fasia mai le faavaeina o le lalolagi [tagai Mose 7:47].⁴

Tatou te manaomia le Togiola ina ia mafai ai ona faatoilalo aafiaga o le Pau.

I le i ai o le faitalia o le tagata ma ua mafai ai ona i ai le mana e tofotofoina ai, o le vaivaiga faaletagata, o faatosinaga o le lalolagi, ma mana o le pouliuli, sa iloa lava e tatau ona pau. Ma talu ai ona ua pau, o le a le mafai e ia ona toe faaola o ia lava, ma o lea, e tusa ai ma tulafono faavavau o le faamasinoga tonu, o lea e manaomia ai se togiola e le i’u, e togisala ai ma togiolaina le tagata, e laveai mai ai o ia mai aafiaga ma faatamaiga a le Pau, ma tuu ai o ia i se tulaga e mafai ai ona toe faalelei ma le Atua, e tusa ai ma tulafono faavavau o le faamasinoga tonu ma le alofa mutimutivale; ma toe foi atu ai i le afioaga o le Tama… .

Ma o le mea lea, na fetalai ai Iesu lava Ia, “Ua faapea ona tusia, e faapea foi ona tatau ina tiga o le Keriso, ma toetu nai e ua oti i le aso tolu: ina ia talaiina foi le salamo ma le faamagaloina o agasala i nuu uma i lona igoa, e amata mai i Ierusalema.” [Luka 24:46–47.]⁵

Ina ia mafai la ona faataunuu le fuafuaga na faataatia e le Silisiliese, o lea sa saunia ai ina ia tuu le tagata i lalo o se tulafono faigofie a’ia’i, ae peitai, o le tofotofoga o lena tulafono na aumai faatasi foi ma taunuuga sili ona matautia. O le tausia o lena tulafono o le a mautinoa ai le ola faavavau, ae o le faasalaga o le solia o lena tulafono o le oti lea… .Pe ana fai la e le lepetia le tulafono [e ala i le Pau], semanu e ola ai lava le tagata; ae pe ana faapea foi la e ola ai pea le tagata, faamata e mafai ona maua ni ana fanau, ma faataunuuina ai fuafuaga a le Atua ia saunia ni tino faitino mo agaga sa foafoaina i le lalolagi o agaga? E le gata foi i lea, faamata foi latou te manaomia se puluvaga, e togisalaina [po o le taulaga togiola] ona o le solia o lenei tulafono, lea e foliga mai i le tulaga sa i ai o le taunuuga lava ia lepetia; pe faamata foi e mafai ona faaauau le natura faavavau o le tagata, ma ausia lona faaeaga maualuga i le Aigaatua, e aunoa ma le togiola ma le taulaga a le Alo o le Atua e faamalieina ai le faamasinoga tonu?⁶

Pe ana leai le togiola a Iesu Keriso, semanu e tumau ai lava le fanauga a tagata i le tuugamau i le faavavau atoa e aunoa ma se faamoemoe. Peitai, ua saunia e le Atua, e ala i le togiola a le Alii o Iesu Keriso, le auala e mafai ai ona tatou toe foi atu i le fatafata ma le afioaga o le Tama, e auai faatasi ma ia ma Atua o lalolagi e faavavau—e le gata ina ia saunia lena tulaga, ae ua ia saunia foi le toetutu. O Ia lava na folafolaina mai le toetu ma le ola. Na ia fetalai, “O a’u nei o le toe tu ma le ola: o le faatuatua mai ia te au, e ui lava ina oti, a e ola lava ia.” (Ioane 11:25.) E le o toe mamao ona matalatala lea o tuugamau, ma o le a faalogo ai e i latou ua maliliu le siufofoga o le Alo o le Atua, ma o le a latou o mai, o e na faia mea lelei i le toe tutu o e amiotonu, a o e na faia mea leaga i le toe tutu o e amioletonu.⁷

Ina ia faataunuuina la le Togiola, o lea na tauaveina ai e Iesu Keriso i Ona lava luga a tatou agasala, ma maliu puapuagatia ai i le tino.

Ua ta’u mai ia te i tatou “a le o i ai foi se faamaligiina o le toto, ua leai foi se faamagaloina” o agasala [Eperu 9:22]. E faigata ona tatou malamalama i lea mea. E tatau ona aveesea e Iesu le aga- sala i le taulagaina lea o Ia lava, o le amiotonu mo le amioletonu… .Talu ai ona o Ia lava sa tauaveina agasala a le lalolagi uma, ma togiolaina e ala i le taulagaina o Ia lava, o lea … sa i ai i Ona luga le mamafatu o le tiutetauave ma le tiga ona o le agasala a tagata i augatupulaga uma, o le tiga e le mafaamatalaina o lenei taulaga togiola tele na Ia tauaveina ai agasala a le lalolagi, ma puapuagatia ai Ia lava i taunuuga o se tulafono faavavau a le Atua na lepetia e le tagata. O le mea lea, o Lona mafatiaga mata- ’utia, o Lona tiga e le mafaamatalaina, o Lona sauaina ogaoga, o mea uma ia na oo i ai i le usita’ia o…tulaga manaomia o se tulafono e le malepetia.

O puapuga o le Alo o le Atua, ua le na o se puapuagatia i se oti faaletagata; aua pe a manatu i le tulaga na Ia faia i se togiola mo agasala a le lalolagi, na Ia tauaveina le mamafa o le tiutetauave, ma le mamafa o agasala a tagata uma, lea e le mafai ona oo i ai lo tatou malamalama. E pei ona tusia, “o le Alii lo [outou] Faaola, na maliu tiga i le tino; o le mea lea na tigaina ai o ia i le tiga o tagata uma;” [tagai MFF 18:11] ma o loo faapea mai Isaia: “E moni, ua na tauave o tatou tiga ma na tauave o tatou faanoanoa,” e le gata i lea, “Ua faaoo ia te ia e Ieova le amioleaga o i tatou uma,” ma, “ua Ia sasaa atu lona ola ia oti, na faitauina foi o ia faatasi ma e pagotata; na ia aveina foi le agasala a tagata e toatele;” [tagai Isaia 53:4, 6, 12] a le o lea foi, e faapei ona tusia i le Tusi e Lua a Nifae: “Aua faauta, e onosai o ia i tiga o tagata uma, e moni, o tiga o tagata ola uma, o tane ma fafine, atoa ma le fanau a le aiga o Atamu;” [2 Nifae 9:21] a o le Mosaea o loo tautino mai ai: “E onosai o ia i tofotofoga, ma le tigaina o le tino, o le matelaina, ma le fia inu, ma le lailoa, e sili i mea e mafai ona onosai ai tagata, vagana ona ua oo le oti; aua faauta, e sau le toto ai mea uma e afu ai, e faapea ona tele lona puapuaga ona o le amioleaga ma mea inosia a lona nuu.” [Tagai Mosaea 3:7.] …

… O se Atua, ae na Ia afio ifo i lalo o mea uma, ma avea o Ia o se tagata, i le tulaga pau o le tagata; ma sa Ia tauivi ai ma tulaga uma na oo mai faatasi ma Ona puapuaga i le lalolagi. E moni lava, na faauuina e le Atua i le suauu o le olioli e sili i e tou te faatasi, sa Ia tauivi ma mana o tagata ma tiapolo ma sa ia faatoilaloina, o le lalolagi foi ma seoli na tuufaatasi; ma sa fesoasoani i ai le mana silisili ese o le Aigaatua, ma Ia manumalo ai i le oti, o seoli ma le tuugamau, toetu manumalo mai ai o ia o le Alo o le Atua, le Tama Faavavau, o le Mesia, le Alii o le filemu, o le Togiola, o le Faaola o le lalolagi; ua uma ma ua maea le galuega o le togiola, lea na tuuina atu e Lona Tama ia te Ia e fai, i le avea ai o ia ma Alo o le Atua ma le Atalii o le Tagata. I le avea ai ma Atalii o le Tagata, na Ia onosaia mea uma e mafai ona onosaia i le tino ma le aano; o le avea ai ma Alo o le Atua, na Ia manumalo ai i mea uma, ma ua afio ai e faavavau i le itu taumatau o le Atua.⁸

O lea ua avea ai le Faaola ma matai o le tulaga—ua totogi le agasala, ua faia le togiola, ua faataunuuina le feagaiga, ua faamalieina le amiotonu, ua faia foi le finagalo o le Atua, ma ua tuuina atu nei mana uma i aao o le Alo o le Atua—o le mana o le toetu, o le mana o le togiola, o le mana o le faaolataga, o le mana e faamalosia ai tulafono mo le faia ma le faataunuuina o lenei fuafuaga. O lea ua aumai ai i le malamalama le ola ma le tino ola pea, ua folasia mai le Talalelei, ma ua avea ai o Ia ma pule o le ola faavavau ma le faaeaga. O Ia o le Togiola, o le Toetu, o le Faaola o tagata ma le lalolagi….

O le ata, o le fuafuaga, o le maliliega, o le feagaiga sa faia, sa osia ma talia a o le’i faavaeina le lalolagi; sa suia i taulaga, ma sa faataunuuina ma faaiuina i luga o le satauro.

O le avea ai ma puluvaga i le va o le Atua ma le tagata, ua avea ai o Ia ma pule ma faatonu o le lagi ma le lalolagi mo e ola ma e ua oti, o ananafi, o le aso ma a taeao, e tusa ai ma le sootaga a le tagata ma lenei lalolagi po le lagi foi, i le olaga nei po o le faavavau, o le Alii o lo tatou olataga, o le Aposetolo ma le Faitaulaga Sili, o le Alii ia ma Le na aumai ai le ola.

Pe ua le faamamaluina ea le mea tonu? E leai; ua faamalieina, ua uma ona totogi le aitalafu. Pe ua alu ese ea mai le amiotonu? E leai; o se faiga amiotonu lea. Ua faafetaia’ia tulaga manaomia uma. Pe ua solia ea le faamasinoga? E leai; ua faataunuuina ana poloaiga. Pe ua manumalo ea le alofa tunoa? E leai; e talia ana lava. O le mea tonu, faamasinoga, alofa tunoa ma le upumoni, e ogatasi ia mea uma o ni uiga o le Atua. “O le alofa ma le faamaoni ua la fetaiai; o le amiotonu ma le filemu ua la feasogi.” [Tagai Salamo 85:10.] E manumalo le mea tonu ma le faamasinoga, e faapena foi le alofa tunoa ma le filemu; o uiga uma o le Atua e ogatasi i le faiga sili, maoae, anagata, faamaoni, e le faaituau, tumu i le alofa ma le viia.⁹

Ua na o Iesu Keriso lava e mafai ona faataunuuina le Togiola.

Atonu o le a fesiligia, Pe o le a le eseesega o le Alo o le Atua, i le avea ai ma Atalii o le Atua, le Togiola, ma i latou e talitonu ia te Ia ma ua aai ma feinu i faamanuiaga o le Talalelei?

E tasi le mea, e pei ona tatou faitau, na tuuina atu e le Tama ia te Ia le mana e maua ai e Ia lava le ola: “Aua faapei o le Tama e i totonu ia te ia lava le ola; e faapea foi ona foai mai e ia i le Atalii, ia i totonu ia te ia lava le ola;” [Ioane 5:26] ma le isi, na ia te Ia le mana, ina ua leai se ola i tagata uma, e toefuatai mai ai le ola ia te i latou; ma o le ala lea o le avea o Ia ma Toetu ma le Ola, e leai se tasi ua mauaina lea mana.

O le isi itu e eseese ai, ona o le i ai o lenei ola ia te Ia lava, o lea ua i ai ia te ia le mana, e pei ona Ia fetalai, o Le avatu lona soifua i la le tino ma toe maua ai, o le mana foi lea na tuu atu ia te Ia e le Tama. O se mana foi lea, e leai se tasi i lenei lalolagi ua maua.

E le gata i lea, o Ia o le pupula o lona mamalu ma ua matua tusa lava ma Ia. Na te faia foi mea ua Ia vaai atu i le Tama o fai, ae tatou te faia na o mea ua faatagaina i tatou e fai, ma mea ua tuuina mai le pule e Ia tatou te faia ai.

O Ia o Le ua Filifilia, ma o se tasi o le Au Peresitene i le lagi, ma o Ia ua i ai le atoaga o le tino o le Aigaatua, lea e le mafai ona faatatau ia i tatou nisi o nei mea e pei ona ta’ua

O le tasi mea, ua tuuina atu ia te Ia o mana uma lava i le lagi ma le lalolagi, ma e le mafai e se tagata o le lalolagi ona fai mai ai.

O loo tusia foi na muamua Lusifelo ia Atamu; e faapena foi Iesu. Ma sa poloaiina Atamu, faapea foi isi tagata talitonu uma, ia faia mea uma i le suafa o le Alo, ma ia faavavau ona valaau atu i le Atua i le suafa o le Alo; ma e leai se tagata o le lalolagi e faatatau i ai lea mamalu

Ona o le latalata o Lana sootaga ma le Tama, e foliga mai ai, o loo i ai o Ia i se tulaga e le o nofo ai se tasi. O loo ta’ua o Ia o Lona Alo pele, o le Alo Pele e Toatasi o le Tama—pe le o lona uiga ea o le atalii pele e toatasi i la le tino? Afai o Ia o le ulumatua ma sa usitai i tulafono a Lona Tama, pe Na te le’i mauaina ea la le tulaga e avea ai ma sui o le Atua, o le Faaola ma le Togiola o le lalolagi? Ma, pe le o Lana aia tatau tulaga ese ea ma le avanoa i le avea ai ma ulumatua, le suli moni o le Atua, le Tama e Faavavau, le tula’i e faataunuu ma faia fuafuaga a Lona Tama Faalelagi e tusa ai ma le togiola, faaolataga, ma le faaeaga o le tagata? Ma ona o Ia lava e leai se agasala (e leai se isi tagata ola e faapea), na Ia tauaveina ai le tulaga o le Faaola ma le Togiola, lea a tuu i le tulaga sa’o, o Lana lava aua o ia o le ulumatua. Pe ua le foliga mai ai ea la, i le i ai o se tino ua saunia faapitoa, ma i le avea ai o se atalii o le Atua, e le gata i le tino ae faapea foi i la le agaga, ua tu o Ia i se tulaga maualuga o le Alo o le Atua, po o le tulaga o le Atua, ma sa o se Atua o Ia, ma o lea ua talafeagai lelei ai ua na o ia le peresona e mafai ona faia se togiola e le i’u?…

… E ui atonu o ni atalii isi o le Atua e ala mai ia te Ia, ae e manaomia Lona tino, o Lona faataunuuina o le tulafono, le taulaga po o le ofooina atu o lena tino i le togiola, a o le’i mauaina e isi tagata, o ni atalii foi o le Atua na fanaua i le lalolagi o agaga, le tulaga o atalii o le Atua e faapei ona i ai o Ia; ma e na o Lana puluvaga foi ma le togiola e ala ai. O lea, o Ia, ma o Ia foi, ma ala atu foi ia te Ia, e mafai ai ona tatou maua e ala i le mataupu faavae o le taliaina, lena tulaga o loo tautala i ai Ioane: “Le au pele, o le fanau i tatou a le Atua i nei ona po, ae lei faaalia mai nei le uiga o i tatou amuli: a ua tatou iloa, pe a faaali mai o ia, ona foliga ai lea o i tatou ia te ia; aua tatou te iloatino ai lava o ia.” O lea, ua mafai ai ona o Lana togiola, ona tatou maua le faaeaga, semanu tatou te le maua e aunoa ma le togiola.¹⁰

Fautuaga mo Suesuega ma Talanoaga

Ina ua tatou iloa le fuafuaga a le Tama Faalelagi—ma o Iesu o lo tatou Faaola—“sa pepese faatasi fetu o le taeao, ma alalaga fiafia atalii uma o le Atua” (Iopu 38:7). Aisea na tatou matua fiafia ai?
Sa faatu atu e Satani e faoa le saolotoga o le tagata, ae sa teena e le Tama Faalelagi. Aisea e tatau ai ona i ai lo tatou saolotoga ina ia maua ai le faaeaga? (Tagai foi MFF 29:39–44.)
O le a se mea e mafai ona tatou aoaoina mai le tali a le Faaola i le finagalo o le Tama Faalelagi i le Fono Tele i le Lagi?
Ona o le Pau o Atamu ma Eva, o lea ua oo ai le oti faaletino i tagata uma, faapea foi le oti faaleagaga, po o le le toe mafai lea ona talanoa fesagai ma le Atua. O le a le mea na faia e le Faaola e faatoilaloina ai aafiaga o le Pau?
Na semanu o le a se tulaga matautia e oo i ai tagata uma pe ana leai le Togiola? (Tagai foi 2 Nifae 9:6–10.)
Aisea sa na o Iesu Keriso ai e mafai ona faataunuuina le Togiola?
O le a sou lagona ina ua e manatu loloto i le taulaga togiola a le Faaola? E mafai faapefea e le malamalama i le Togiola ona tatou maua le faamoemoe ma le mautinoa a o tatou ola ai i aso taitasi?

O Mau e Faatatau I Ai:Ioane 5:26; Eperu 1:1–3; 2 Nifae 2:6–8, 25–29; 3 Nifae 11:10–11; MFF 19:15–19; Aperaamo 3:24–28