Mataupu 22

O Le Faaatoatoaina e Ala i Tofotofoga

Afai tatou te fetaia’i ma ni nai tofotofoga, o ni nai faigata, ma ni nai puapuaga, ma tatou ola e aunoa ma nisi o mea patino, o nei tulaga e mafuli atu i le faamamaina atoatoa o le metala, e faate’a ese ai le otaota, ma saunia ai mo le Matai na te faaaogaina.¹

Mai le Soifuaga o Ioane Teila

Na fetaiai Ioane Teila ma le tele o tofotofoga i lona soifuaga. Atonu o se tasi o tofotofoga aupito tele o lona aafiaga lea i le Falepuipui i Karefasi. I le taimi o le osofaiga lea na fasiotia ai le Perofeta o Iosefa ma lona uso o Ailama, sa faatele foi ona fanaina Elder Teila. Ona o le ogaoga o manu’a ma le le mafai ona malaga i Navu, o lea sa nofo ai pea i Karefasi mo ni nai aso. O le taimi lea na sau ai se fomai o le nuu ma aveese mai se pulufana mai lona vae. Sa matua matuia manu’a o Elder Teila, ma sa ta’ua e lona faletua ina ua faatoa taunuu, “sa ia malolo i se isi potu e tatalo ai mo lana tane ina ia maua lona malosi e onosaia ai, ma toe taliu atu ai i lo latou aiga.” Sa fesili le fomai ia Elder Teila pe manao e saisai o ia i le taimi o lona taotoga, ae tali atu Elder Teila e leai. Sa faia le taotoga e aunoa ma le tau taofiofia o ia po o ni vai faagase.²

Ina ua taunuu ni tagata o le Ekalesia i Karefasi e faafoi atu Elder Teila i Navu, sa matua vaivai tele o ia ona o le tele o le toto ua alu, ma sa toetoe lava ina a le mafai ona musumusu. Ona o le le mafai ona malaga i se taavaletoso, o lea sa fataina ai o ia i se fata agai i Navu. Peitai, “o le gaoioi o i latou sa amoina o ia, sa matua ogaoga ai le tiga. O lea sa aumaia ai se pusa e fai uili ma faapipii i tua o le taavaletoso. Sa fai ai se moega i totonu e taoto ai, ae nofo i ona tafatafa lona faletua o Tuafafine Teila ma tuu i ai le vai aisa i lona manua,” sa seesee malie atu lava le pusa uili i luga o le vao lafulafua agai i Navu.³

Sa faifai pea puapuaga ma faigata i Navu, a o amata ona tuua e Elder Teila ma le faitau fiaselau o le Au Paia ia le aai ia Fepuari 1846, ina ia sosola ese mai ai i sauaga. O loo faamatala i le talafaasolopito lo latou fetaiai ma puapuaga a o tolauapi i le isi itu o le vaitafe mai Navu “Sa latou taooto ai iina, i le malulu ma le louloua o le tau, ae e le o mamao ese—e toetoe lava a iloa atu— o latou fale mananaia, o lo latou aai matagofie ma le malumalu maoae! Ona o le faatelelise o lo latou malaga ese, sa tuua ai o latou fale, ma lo latou aai, aua sa leai se taimi latou te faatau atu ai a latou meatotino.”⁴

I le tele o tausaga mulimuli ane, i le 1885, ina ua mautu le Au Paia i le Vanu o Sate Leki, sa feagai ai Peresitene Teila ma faigata o le nofo toatasi ma le faaaunuua. A o lafi o ia e fesoasoani ai ina ia tuumamaina sauaga o le Ekalesia e taitai o le malo, sa le mafai ona ia vaai i ana pele, aua o la foi sa mata’ituina e leoleo. Na atili ona faigata lona nofo toatasi i le taimi o lona gasegase, ma le maliu o lona faletua o Sofia. Ona o atugaluga mo lona saogalemu, o lea sa le mafai ai ona auai atu i le falelauasiga o lona faletua. E ui ina nutimomoia le loto o Peresitene Teila, ae sa ia “onosaia ma le lotomaualalo ma lona lototele faaKerisiano ma o ona uiga ia i lona soifuaga atoa.”⁵ O ona uiga na faaalia i tofotofoga ma faigata, atonu sa sili ona faamatalaina i se vaega o se tusi na ia tusia a o lafi: “E manatu nisi tagata o sauaga ma tofotofoga o ni puapuaga; peitai, o nisi taimi, ma i se tulaga aoao, afai o loo tatou faia le finagalo o le Alii ma tausia Ana poloaiga, e mafai ona tatou ta’ua moni [sauaga ma tofotofoga] o ni faamanuiaga o loo sui mai foliga.”⁶

E ui ina sa tumu le soifuaga o Ioane Teila i faigata ma mafatiaga, ae sa tumau o ia o se auauna lototele a le Alii ma se taitai o le Au Paia, o se faataitaiga e le aunoa o le faatuatua ma le onosai i le ogaoga o tofotofoga.

O Aoaoga a Ioane Teila

E tatau ona i ai tofotofoga mo le faaatoatoaina o i tatou.

E tatau ona tofotofoina tagata ma faamama ma faaatoatoa e ala i puapuaga. O le ala lea tatou te maua ai tagata i augatupulaga eseese sa fetaiai ma tofotofoga ma puapuaga eseese, ma sa latou aoaoina foi e tuu lo latou faatuatuaga i le Atua, ma e na o le Atua lava.⁷

E tele mea ua tatou aoaoina e ala i puapuaga. Tatou te ta’ua o puapuaga. Ou te faaigoaina o se a’oga e maua ai le poto masani. Ou te le’i popole tele lava i nei mea. Ou te le o popole nei foi i ai. O le a le aoga o nei mea? E tatau i se a ona tofotofoina tagata lelei? … Na o le pau lava la’u vaaiga i nei mea, o tofotofoga mo le faamoemoe e faamamaina atoatoa ai le Au Paia a le Atua ina ia mafai ai, e faapei ona ta’u mai e tusitusiga paia, ona avea ma se ario ua faafitu ona faamamaina i le afi.⁸

E i ai nisi taimi tatou te tomumumu ai i o tatou tofotofoga. E le tatau ona tatou faia lena mea. O mea nei e taua mo lo tatou faaatoatoaina. O nisi taimi tatou te manatu e le o sa’o faiga o loo fai mai ia i tatou, ma ou te manatu e sa’o o outou manatu i nisi o nei mea. Tatou te manatu e i ai taupulepulega leaga e fai e maileia ai i tatou; ma ou te manatu foi e sa’o lelei o tatou manatu. Ae e le tatau foi ona tatou ofo i nei mea. E le tatau ona tatou ofo i se lagona o le itagia ma le inosia [o i tatou ona o la tatou lotu]. Aisea? Aua o loo tatou ola i se vaitau ma se augatupulaga tulaga ese o le lalolagi; lea ua matua manino lona ta’u o aso e gata ai.⁹

Ou te iloa e faapei foi ona silafia e isi, e i ai o tatou tofotofoga, o puapuaga, o faanoanoaga, ma mafatiaga. Tatou te oo i faigata; tatou te faatautava ma le lalolagi, o le malosi o le pogisa, ma le fai mea pi’opi’o o tagata, ma mea leaga eseese; ae o le taimi foi lava lea e faaatoatoaina ai i tatou e ala i nei mea. E tatau ona i ai so tatou malamalamaaga ia i tatou lava, o lo tatou tulaga moni ma tutu atu i luma o le Atua, ma malamalama i o tatou malosiaga ma vaivaiga; o lo tatou le mafaufau ma lo tatou atamai, o lo tatou poto ma le faavalevalea, ina ia tatou iloa ai ona talisapaia mataupu faavae moni, ma malamalama ai ma faatauaina sa’o mea uma pe a tula’i mai i o tatou mafaufau.

E tatau ona tatou iloa o tatou lava vaivaiga, ma vaivaiga o o tatou uso a tagata; o o tatou lava malosiaga faapea foi malosiaga o isi; ma talitonu i lo tatou tulaga moni i luma o le Atua, agelu, ma tagata; ina ia tatou aga atu e avatu le faaaloalo e tatau ai i tagata uma, ae aua le faamaualuga i lo tatou lava poto po o le malosi, pe manatu faatauvaa foi i ai, aua foi nei manatu faamaualuga pe faatauvaa [i le poto ma le malosi o isi]; ae ia tuu atu lo tatou faatuatuaga i le Atua soifua, ma mulimuli ia te ia, ma ia iloa, o i tatou o lana fanau, ma o ia o lo tatou Tama, ma e tatou te faalagolago ia te ia, ma o faamanuiaga uma tatou te maua, e tafe mai lea i lona aao agalelei.¹⁰

Ina ua tautala Peteru e uiga i [tofotofoga], sa ia faapea mai: “Le au pele e, aua tou te ofo i le tofotofoga pei o le afi, ua oo ia te outou e fai ma tofotofoga ia te outou, peiseai o se mea fou ua oo ia te outou; ae faapei ona tofusia o outou faatasi i tiga o Keriso, ia outou olioli ai, ina ia fiafia outou ma le olioli tele.” [1 Peteru 4:12–13.] Pei na sili ai ona ia fai atu ia te i latou, pau lava le mea o le i ai o se Atua i le lagi, ma se tiapolo i seoli; ma e matua tatau lava ona i ai. E leai se mea ou te faaletonu ai i nei mea. E faapefea pe afai e tatau ona tatou mafatia i puapuaga! O le mea lena na tatou o mai ai iinei; na tatou o mai ina ia faamamaina i tatou; ma o lea mea e faamoemoe ia tatou maua ai se malamalama i le Atua, o o tatou vaivaiga ma mea e malolosi ai; o o tatou pi’opi-’o, … ia maua ai so tatou malamalama i le ola faavavau, ina ia mafai ai ona tatou faatoilaloina leaga uma ma faaeaina ai i nofoalii o le mana ma le mamalu.¹¹

E malamalama atoa le Faaola i o tatou tofotofoga.

Sa tatau ona i ai se tino [o Keriso] e faapei o i tatou, ma oo ia te ia vaivaiga uma o le tino, e ao foi ona tatala atu i ai le tiapolo ia te ia, ma e ao foi ona tofotofoina o ia e pei o tagata uma. Ma, na toe faapena foi i Ketesemane, sa tuua na o ia, ma sa matua matautia lana tauiviga sa fai, sa faamatalaina mai, o lona afu foi ua pei o ‘alu’alu toto [tagai Luka 22:44]. I le aso tele ina ua oo mai le taimi e taulagaina ai lona soifua, sa ia faapea atu, “Lo’u Atua e, lo’u Atua e, se a le mea ua e tuulafoai mai ai a’u?” [Mataio 27:46.] Sa oo o ia i nei mea uma, ma pe afai e silasila mai ua e oo i nei tofotofoga ma puapuaga uma, na te silafia ona lagona mo oe—ma faavauvau faatasi ma oe.¹²

O le mea lava e tatau ai a o i ai le Faaola i le fogaeleele, “ona faaosoosoina o ia i mea uma pei o i tatou,” ma “tiga alofa faatasi ma i tatou i o tatou vaivai,” [tagai Eperu 4:15] ia malamalama i vaivaiga ma malosiaga; o atoatoaga ma le le atoatoa o le pauu o tagata; ma faataunuuina le mea na ia afio mai i le lalolagi e fai, ma tauivi ai ma le faafiaamiotonu, o le fai mea pi’opi’o, o le vaivai, ma le valea o le tagata— o lona fetaiai ma faaosoosoga ma tofotofoga i soo se ituaiga, ma faatoilaloina, ua avea ai o ia ma “Se faitaulaga sili faamaoni” [tagai Eperu 2:17] e fautua mo i tatou i le malo e faavavau o lona Tama. Na te silafia ona fuafaatatau, ma tuu le tau sa’o i le tagata, aua sa i ai o ia i lea lava tulaga e pei o i tatou, ua ia silafia le ala e tauaveina ai o tatou vaivaiga ma faaletonu, ma e mafai ona malamalama atoatoa i le loloto, mamana, ma le malosi o puapuaga ma tofotofoga e fetaiai ma tagata i lenei lalolagi, ma o lea, ona o lona malamalama ma le poto masani ua i ai, e mafai ai ona ia onosa’ia e le gata o se tama [father], ae o se uso matua foi.¹³

O le a faamanuiaina i tatou pe afai tatou te onosaia o tatou tofotofoga ma le usiusitai.

O nei mea uma lava o loo tutupu tatou te iloa ai le alofa o le Atua. E i ai se faamoemoega poto i nei mea uma, ma o le a Ia faamaninoina atoatoa ia i tatou. O le mea e tasi e manino, ua tofotofoina le Au Paia i se tulaga e le’i i ai muamua. E olioli i latou e faamaoni ma tutumau; e matata’u ma fefefe i latou e le faamaoni. O i latou o i ai suauu i a latou lamepa, ma teuteuina ma faamumu pea, ua i ai nei le sulu i o latou vae, e le tautevateva foi ma pauu; o i latou e leai se sulu po o se suauu e fememea’i ma faaletonu; latou te le iloa po o le a le mea e fai. Pe le o le faataunuuina ea lenei o le afioga a le Atua ma aoaoga a Ana auauna? Pe le i aoaoina ea i taimi uma le Au Paia o Aso e Gata Ai, afai latou te mananao e tumau lo latou faamaoni ma tumau e oo i le iuga, e tatau ona latou ola i o latou talitonuga faalelotu e ala lea i le tausia o poloaiga uma a le Atua? Pe le o lapataia ea e le aunoa i latou i le taunuuga matautia o loo faatalitali mai mo i latou pe afai latou te faia le agasala? Pe mafai ea e le au mulilulua, o e faitaaga, talapepelo, gaoi, onana, soli Sapati, o e fai upu leaga po o e agasala o soo se ituaiga ona onosaia tofotofoga, ia e tatau ona laasia e le Au Paia ma le faamoemoe e tulai? …

Pe afai e faamaoni ma faatuatua i latou uma ua faaigoaina i latou lava o le Au Paia o Aso e Gata Ai i lo latou Atua, o Ana feagaiga paia ma tulafono, ma ola e pei ona tatau ai i le Au Paia, o le a le afaina lava i tatou i sauaga. Peitai, e ese le tiga o le iloa e le o le tulaga lea o loo i ai i latou. … na Ia fetalai foi afai e tausia e Lona nuu Ana tulafono ma tausi i Ana poloaiga, ia le faia na o faaupuga, ia le na o le igoa, ae o le mea moni lava, o Ia o lo latou talita ma le leoleo ma le ‘olo malosi, ma o le a leai se tasi na te faatiga ia i latou, aua o Ia o lo latou ‘olo maualuga. O nei tofotofoga o lo tatou faatuatua ma lo tatou mausali, o loo tatou fetaiai nei, o le a faaaogaina mo lo tatou lelei ma le fiafia i le lumanai. O le a oo mai aso, o le a mafai ona tatou toe tepa i tua ma vaaia ai ma le manino le taitaiga a le Atua i mea uma ua tatou molimauina. Ina tatou faia ia, o mea uma tatou te mafaia ina ia tatou ola e tusa ma le silafaga a le Alii, ma pe sauaina ai i tatou, ae e le o sauaina ona o le faia o mea sese, ae o le amiotonu.¹⁴

Pe tou te le o iloa ea la le taua o nei tofotofoga ma puapuaga ma vaaiga o loo tatou fetaia’i? O le Alii na tuuina i tatou i ni tulaga e sili ona siitia ai le faateleina o le manuia sili o lona nuu. O lo’u lava manatu, o nei mea o loo siomia ai i tatou, e le o se faamanu’a ia i tatou ma le malo o le Atua, o ia mea o le a maua ai se tasi o siligi [po o lifi] e sili atu ona maualuga, ma o le a sa-’o ma tonu mea uma pe afai tatou te tausi i poloaiga a le Atua. O le a nei la le tulaga, e tatau ona tatou tutu ai—le tane, le fafine, ma le tamaitiiti? Ia fai o tatou tofiga i luma o le Atua, ia ava ia te ia, ona lelei lea o mea uma. E tusa ai la ma le mea o le a oo mai, e tatau ona tatou tuu atu i aao o le Atua, ma ia lagona pe o le a lava le mea e tupu, ia tonu, ma o le a pulea e le Atua mea uma mo lo tatou lelei ma le manuia o lana ekalesia ma le malo i le lalolagi. …

Afai e tatau ona tatou fetaia’i ma puapuaga, e le afaina. A o mou atu taimi ma aso, pe a tatou sioa atu i le poto o mea o loo faanenefu ia i tatou, o le a tatou iloa ai o le Atua, e ui ina faataunuuina e ia ona faamoemoega i luga o le fogaeleele i se ala tatou te le malamalama i ai, ma o ona faamoemoega e faatatau ia i tatou taitoatasi ma aiga foi, o loo pulea mea uma i lena poto mai le Atua, ma e tonu mea uma ma ua fuafuaina e siitia ai le ola solo lelei e faavavau o tagata uma i luma o le Atua.¹⁵

Matou te fai atu i le Au Paia uma o Aso e Gata Ai, o nei tofotofoga o loo tatou fetaia’i, o loo tofotofoina ai le Au Paia ma i latou ua na ona ta’u o le Au Paia [ae le o ola i poloaiga e tatau ona ola ai]. O i latou sa tinou, ia i ai suauu i a latou lamepa, ua i ai nei lo latou sulu latou e manaomia e taialaina ai i latou; a o i latou sa ola i sulu o isi, o le a fenumia’i ma latou le mautinoa le ala e agai i ai. O nei tulaga uma e ao ai i le Au Paia ona sauniuni. Ua uma ona aoaoina i latou ma le faamaoni ma lapataia, ia aua nei faalagolago i le tagata po o lo latou malosi faapea e mafai ai ona latou tatalia le aso faigata. Ua uma ona ta’u atu ia te i latou, “Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tama.” [1 Ioane 2:15.] Ua uma ona aoaoina i latou e leai se tagata e mafai ona auauna i ni matai se toalua; e le mafai ona tatou auauna i le Atua ma mamone [tagai Luka 16:13]. O i latou e ola i na aoaoga, ma tausia ma le filiga isi poloaiga a le Alii, o le a latou maua le malosi e manaomia ma le faatuatua e mafai ai e i latou ona onosaia tofotofoga uma.¹⁶

Ou te olioli i puapuaga, aua e aoga e faalotomaualaloina ai ma aoaoina i tatou, ina ia tatou malamalama ia i tatou lava, ia tatou iloa o tatou vaivaiga ma faaletonu; ma ou te olioli foi pe a ou manumalo ai, aua e tali mai le Atua i a’u tatalo; o le mea lea ou te manao ai ia ou olioli i le aso atoa.¹⁷

Fautuaga mo Suesuega ma Talanoaga

O a ni faamoemoega o tofotofoga? Aisea ua le taofia ai puapuaga mai e amiotonu?
E eseese faapefea lou olaga pe a faapea e leai ni ou tofotofoga po o ni mea faigata? O a ni mea ua e iloaina e uiga ia te oe lava ma le Atua mai mea sa e mafatia ai?
Toe manatu i tofotofoga na oulua fetaiai talu ai. E mafai faapefea i ou uiga faaalia i ou tofotofoga, ona suia le ala e te faatoilaloina ai? E mafai faapefea ona faaleleia atili le ala e te faafetaia’ia ai ou tofotofoga?
Aisea ua malamalama atoa ai le Faaola i o tatou puapuaga? (Tagai foi i le Alema 7:11–12; MFF 19:16–19; 122:8.) E mafai faapefea ona fesoasoani so tatou malamalama i puapuaga o le Faaola, tatou te faamaoni ai i o tatou tofotofoga?
O le a se mea e mafai ona tatou fai ina ia tatou talia atoatoa le faamafanafanaga ma le malosi o loo tuuina mai e Iesu? (Tagai foi i le Eperu 4:16; 1 Peteru 5:6–11.) Pe na faamalosia faapefea oe i le faamafanafanaga a le Faaola i taimi o tofotofoga?
Aisea e faigata ai i nisi taimi ona tumau lo tatou onosai ma le usitai pe a tatou feagai ma mafatiaga? E mafai faapefea ona tatou vaai atu i mafatiaga e pei o le vaaiga aoao e faavavau a le Alii?
O a ni mea ua faia e nisi e fesoasoani ai ia te oe i taimi o ou tofotofoga? E mafai faapefea ona e fesoasoani i isi i o latou tofotofoga? O le a se mea ua e aoaoina mai aoaoga a Peresitene Teila, e mafai ona e fetufaai atu i se tasi o loo feagai ma tofotofoga?

O Mau e Faatatau I Ai: Salamo 34:19; 2 Korinito 4:8–18; 1 Peteru 4:12–13; Alema 36:3; Eteru 12:6; MFF 121:7–8