Mataupu 8

Mulimuli ia i Latou o e ua Filifilia e le Atua e Pulefaamalumalu

Tatou te lagolagoina taitai o le Ekalesia e ala i le tatalo mo i latou, mulimuli ia latou fautuaga musuia, ma lagolagoina i latou ia latou galuega.

Mai le Soifuaga o Heber J. Grant

Ina ua amata ona galue Elder Heber J. Grant i lona valaauga i totonu o le Korama a Aposetolo e Tosefululua, na ia faia ma le faamaoni maua’i i le Peresitene o le Ekalesia. Ina ua faatoa mavae ona maua lona valaauga, na ia tusi ai i lona tausoga o Anetoni W. Ivins, “E mafai ona faapea atu ma le faamaoni, ou te le i vaaia i lo’u olaga se taimi ou te le’i naunau ai e sui sa’u fuafuaga faatino pe a faatonuina au e auauna a le Atua.”¹

A o avea ma uso o le Korama a le Toasefululua, na maua e Elder Grant le tele o aafiaga na faamalosia ai lana molimau o le Peresitene o le Ekalesia o le fofoga taumomoli lava ia o le Alii i le lalolagi. Mulimuli ane ina ua avea foi o ia ma Peresitene o le Ekalesia, na ia faamatala ai se tasi o ia aafiaga, na ia vaaia ai musumusuga a le Alii ia Peresitene Uilifoti Uitilafi. I le 1890 na fofogaina ai e Peresitene Uitilafi faapea ua finagalo le Alii ia faatuina e le Au Paia se pisinisi e gaosia le suka i Iuta. Na galue auauna Elder Grant i le komiti na faatuina e “tagatagai i le mataupu.” Ina ua mavae suesuega na faia ma le faaeteete lava, na aufaatasi le komiti e fautua atu e faataatia ese e le Ekalesia lea manatu.

A e ui i lea, e tusa ma le lipoti a Peresitene Grant, “E lei faamalieina ai Peresitene Uitilafi. Sa ia faatulagaina se isi komiti. Sa ou i ai i le komiti muamua ma na ia toe filifilia foi au i le komiti lona lua. Na ou talosaga ina ia aveese mai au, ona ua uma ona faailoa atu lau fautuaga, ua saini foi lou igoa i luga o se lipoti, a e na te le i talia la’u talosaga. Sa matou toe iloiloina le mataupu, auiliili ma le faaeteete, ma na lipoti atu foi e le komiti lona lua e le lelei lea manatu. Sa faapea mai loa Peresitene Uitilafi: ‘Aua le popole i le lipoti. Ua oo mai le musumusuga ia te au, ia faatu le fale e gaosi ai le suka.’”

Ina ia faia e tusa ma le faatonuga a le perofeta a le Alii, o lea sa faia ai e Peresitene Grant ma isi le fuafuaga e fausia le fale e gaosi ai le suka. A e peitai, o se tulaga mafatia tau tupe i le atunuu i le 1891 sa faigata ai ona saili se tupe ia lava mo le fausiaina o le fale e gaosi ai le suka. Sa toe fautuaina mai e se vaega o tagata faipisinisi iloga e le o se fuafuaga poto le faaauau e le Ekalesia o le fausiaina o le fale. Na manatua e Peresitene Grant le tali a lona taitai i le fautuaga:

“Ina ua tuuina mai le fautuaga, o le tali lenei a Uilifoti Uitilafi: ‘Na amata mai i le aso na ou maua ai se malamalamaaga i le paia o le talalelei a Iesu Keriso lea na faaalia e ala mai i le Perofeta o Iosefa Samita, na amata mai i le aso na ou alu atu ai i fafo o se ositaulaga faatauvaa e folafola atu le talalelei, e ui ina sa ou lagonaina ou te ono oti ai, afai o le ala o le tiute sa manaomia mai ai au e le talalelei ou te savali ai ou te feagai ai ma le oti, e lei mafai lava ona ou liliu atu i le itu taumatau po o le itu tauagavale; ma o le taimi nei, o le musumusuga a le Alii ia te au, ia fausia le fale. O taimi uma lava ou te mafaufau ai e faataatia ese, e oo mai ai le pogisa; ma o taimi uma lava ou te mafaufau ai e fausia, e oo mai ai le malamalama. O le a tatou fausia le fale e tusa lava pe gau ai le Ekalesia.’”

“Na matou fausia lava, ” na faapea mai mulimuli ane Peresitene Grant, “ma e le i gau ai le Ekalesia.” O le mea moni, na fausia mulimuli ane e le Ekalesia isi foi fale gaosi mea, na faavaeina ai fuafuaga na maua ai tupe mama mo le Ekalesia i lona aotelega ma faapea foi mo tagata taitoatasi o le Au Paia o Aso e Gata Ai.²

I tausaga na mulimuli mai, na tuuina mai ai e Peresitene Heber J. Grant lenei lapataiga faigofie e taitaia ai soifua o le Au Paia o Aso e Gata Ai: “Ua ou le iloa se mea e sili atu lona aoga i le olaga nei e pei o le usitai i le fautuaga ma le apoapoaiga a le auauna a le Alii, i aso nei.”³

O Aoaoga a Heber J. Grant

E valaauina e le Alii Ana perofeta ma taitaia i latou e ala i musumusuga.

Ua ou naunau i lenei taimi ma taimi uma lava e tuuina atu le molimau i le atoatoa aiai ma i le lotomaulalo atoa i le paia o le misiona a le Perofeta o Iosefa Samita, ma le paia o le misiona a i latou taitoatasi o e na filifilia e suitulaga ia te ia.⁴

E le manaomia ona outou matata’u, ou uso e ma tuafafine, o le a le tulai lava se tagata i le ao o le Ekalesia a Iesu Keriso sei vagana ua finagalo i ai lo tatou Tama Faalelagi.⁵

E mafai ona ou faapea atu ua liligi mai le anoano o faamanuiaga a le Alii i luga o i latou taitoatasi o e tulai i le ao o lenei Ekalesia, aua na latou saili uma i le amiotonu mo musumusuga a le Agaga o le Atua e taitaia i latou i mea uma ua latou talia e faia.⁶

Na ou masani ia Polika Iaga a o ou laiitiiti, o se tamaitiiti e ono tausaga le matua … e mafai ona ou molimau i lona agalelei, i lona alofa patino ia te au, i lona alofa i le Atua ma musumusuga a le Alii na oo mai ia te ia a o ia tulai i le tulaga o lo o ou tulai [ai nei] ma tautala atu ai, i le avanoa na ou maua e auai ai i le faapotopotoga ma faalogo i ana upu musuia.

Na valaauina au i le Aufono a Aposetolo e Toasefululua i se faaaliga a le Alii ia Peresitene Ioane Teila, ma mai le taimi na ou oo atu ai i le Aufono a le Toasefululua, e lua tausaga talu ona avea Ioane Teila ma Peresitene o le Ekalesia, e oo mai i le aso na maliu ai, sa ma mafuta ma ia i vaiaso taitasi. … Ou te iloa o ia o se auauna a le Atua soifua; ou te iloa na oo mai ia te ia musumusuga a le Alii; ma ou te iloa i taimi uma lava e faapea mai ai o ia: “O le mea lenei ua manao i ai le Alii, ” e lagolagoina e ona uso i le aufono a aposetolo aua ua latou malamalama o le mea ua saunoa mai ai o ia, o le finagalo lava lea o le Alii, ma o taimi uma lava ua faaalia ai e sao o ia ma o musumusuga a le Alii ia te ia ua faaalia ai lona atamai e ala mai i le mana o le Alii, ua sili atu i lo le atamai o isi tagata.

E tele taimi ou te alu atu ai i fonotaga …, ou te iloa ua i ai se mataupu patino o le a talanoaina ma ua mautu lou mafaufau i tulaga o se mataupu aua e mafai e se tagata ona faatumauina lona mafaufau i se mataupu. … A o ou alu atu i fonotaga … ma naunau e faia se tonu e tusa ma se aiaiga, a ua ou naunau e palota ma le saoloto mo le tuufaafeagai o lena aiaiga, ona o musumusga a le Alii na o o mai ia Ioane Teila. I taimi uma lava, e faaalia le sa’o o Peresitene Teila, ma o lana faamasinoga silisili, e ala mai i musumusuga a le Alii, e na o mea mo le lelei silisili o tagata e tautino mai ai.

E mafai ona ou tauina atu ni tulaga na aliai mai ina ua auina atu aposetolo e faataunuu ni galuega faapitoa i lalo o musumusga a le Alii ia Ioane Teila, na latou manatu e le mafai ona latou faataunuuina ia galuega faapitoa. Na latou foi mai ma mafai ona molimau atu na mafai ona latou faataunuuina galuega na tuuina atu i o latou luga e Peresitene Teila, le Perofeta a le Alii i le faatasi ma le fesoasoani mai o le Alii. …

E mafai ona ou molimau atu o Uilifoti Uitilafi o se auauna moni a le Atua soifua o se Perofeta moni a le Atua. O Uilifoti Uitilafi, o se tagata lotomaualalo ma na ia papatisoina le selau ma selau o tagata i ni nai masina i Herefoti, Egelani. … Ou te talitonu e lei i ai a se isi tagata na ola i luga o le fogaeleele e sili atu (nai lo Uilifoti Uitilafi) i le faaliliuina mai o tagata (po o le faaliliuina mai o tagata e toatele i le Talalelei a Iesu Keriso. O ia o se tagata sili ona lelei ma maoae le lotomaualalo; o se tagata e lei galue i ni mataupu sili faapisinisi; o se tagata na matua galue faifaatoaga, o se tasi na galue i le totoina o fatu o fua o faatoaga; o se tagata lotomaualalo, o se tasi ua ou faalogo i le toatele o tagata ua faapea mai e le o ia te ia se tomai e pulefaamalumalu ai i le Ekalesia a Iesu Keriso. Ae ou te manao e molimau atu ia te outou, i lalo o musumusuga a le Alii, ma ona o le lotomaualalo o lea tagata, o lona olaga faaleatua ma le alofa o le Atua ia te ia, na faamanuiaina ai o ia i le tele o taimi i le atamai e sili atu nai lo atamai uma o i latou e i ai le tomai sili i mataupu tau tupe i totonu o le Ekalesia. …

Ou te iloa o Lorenisio Sinou o se Perofeta a le Atua. … O Lorenisio Sinou na o’o mai i le au peresitene o le Ekalesia ina ua valusefululima tausaga o lona soifua, ma o mea na ia faataunuuina i le isi tolu tausaga o lona soifua e matua matagofie lava i le manatunatu i ai. Na ia siitia ese mai le Ekalesia … mai le tulaga gau i mea tau tupe na semanu e oo i ai. … I totonu o le tolu tausaga, o lenei tagata, sa manatu le lalolagi ua toeaina ma e leai sona tomai (e taitai ese mai ai le Ekalesia mai faigata o tulaga tautupe), o lenei foi tagata e lei galue i mataupu tautupe, o se na matua tuuina atu lona soifua mo le tele o tausaga e galue ai i totonu o le Malumalu, ua ia pulea tulaga tautupe a le Ekalesia a Keriso, i lalo o musumusuga a le Atua soifua, ma i totonu o na tausaga e tolu na suia uma ai mea uma, i tulaga tautupe, mai le leaga i le lelei. …

… Ou te molimau atu ia te outou, mai lava i aso o lo’u laitiiti, ou te lei malamalama atoatoa ma iloa aoaoga o le talalelei, ae sa lagonaina e lou tino ma oo lava ina maligi ifo loimata i ou alafau, i lalo o musumusuga a le Atua soifua, a o ou faalogologo atu ia Iosefa F. Samita o ia aoao atu le talalelei. … E na te faatumuina ma siitia au faaleagaga a o ou faalogologo atu ia te ia i le folafolaina atu o le talalelei a Iesu Keriso. Ou te molimau atu o ia o se tasi o perofeta sili a le Atua na soifua mai; na faatasi le Atua ma ia mai le aso na malaga atu ai o se taulealea e sefululima tausaga le matua, e folafola atu le talalelei a Iesu Keriso i motu o Hawaii, seia oo mai i le aso ina ua mavae le tuuina atu o le onosefululima tausaga o lona soifua i le galuega a le Atua, na faaiuina ai lona soifua i le lalolagi.⁷

Ua oo mai ia te au le matafaioi, tainane o se mea faigaluega vaivai ma le faatauvaa i aao o le Alii, a o sosoo ai ma ia alii lelei o e na pulefaamalumalu i lenei Ekalesia—o le Perofeta o Iosefa Samita, o se tagata ua ou talitonu e tutusa ma le sili (po o le sili atu foi) i tagata uma o e na soifua mai i le lalolagi; le paionia sili, o Polika Iaga; le siamupini malosi o le puipuiga o le saolotoga, o Ioane Teila; le faaliliu tagata i le talalelei a Iesu Keriso, le tulaga ese o Uilifoti Uitilafi; o Lorenisio Sinou, o se tagata maoae e valusefulu-lima tausaga o lona soifua, o le na siitia le Ekalesia, … i se tulaga lelei mautu tau tupe; i totonu o le tolu tausaga, ma le na alofagia e tagata uma o e na silafia o ia, o se tasi o tagata e tulaga ese o tagata o le lalolagi uma, o Iosefa F. Samita, o le faifeau sili o le amiotonu ua ou iloa.⁸

E le muta lava lo’u maofa i le avea o au ma sui o le Alii i lenei lalolagi. O lo’u mafuta mai lava i lou laitiiti ma tagata lelei ma le maoae, o e na muamua ia te au ua tauau e faafaigata ai ona ou mafaufau ou te tutusa ma i latou.

O upu mulimuli na gagana ai Peresitene Iosefa F. Samita i le taimi na ma faatalofa ai i le po na maliu ai e faapea—“Ua faamanuiaina oe e le Alii, lou atalii e, ua faamanuiaina oe e le Alii; o lo o ia te oe se matafaioi sili. Ia manatua pea lava pea, o le galuega lenei a le Alii a e le o se galuega a se tagata. E silisili lava le Alii nai lo se isi tagata. Ua ia silafia le Na te manao e taitaia Lana Ekalesia, ma e le sese lava. Ia faamanuia oe ele Alii.”⁹

E maua e Perofeta musumusuga mo le manuia o le Ekalesia.

Ou te faafetai i le Alii mo fesootaiga vavalalata, mai lava i lo’u laitiiti ma Peresitene Polika Iaga, Ioane Teila, Uilifoti Uitilafi, Lorenisio Sinou, ma Peresitene Iosefa F. Samita. Ou te faafetai i le Alii ona ou te lei iloa lava se isi mea ae na o mea lelei i a’u fegalegaleaiga mo le limasefulu tausaga ma nei tagata. … E leai lava se isi upu na ou faalogo ai i luma o tagata po o se tulaga faalilolilo, na pau mai fofoga o auauna a le Atua, o e na filififlia e tulai i le ao o lenei galuega, na o upu lava mo le siitiaina ma le faaleleia o tagata o le Atua.¹⁰

I le avea ai o au ma se tasi o Aposetolo a le Alii o Iesu Keriso, ua ou matua faafetai lava ona ua ou iloaina e aunoa ma sina masalosalo itiiti, o Ioane Teila, Uilifoti Uitilafi, Lorenisio Sinou, ma Iosefa F. Samita na matua faamaoni atoatoa ma le le fesuisuiai o latou loto a o galulue ai mo le faaalualuina i luma o le Au Paia o Aso e Gata Ai, mo le faasalalauina atu o le talalelei i nuu faapea foi ma atunuu i fafo. Sa ou iloaina foi o le naunautaiga silisili o o latou soifuaga o le faaalualuina lea i luma ma le faatupulaia o le talalelei o le ola, ma mo le faaolataga o le Au Paia o Aso e Gata Ai. Ou te faafetai ua ou iloa e aunoa ma se masalosalo o … nei taitai na latou matua gauai atu i le soifua lelei ma le faaalualuina i luma o tagata o le Atua, latou te lei faatuatuai i le galulue malosi mo le manuia o tagata, ma o o latou mafaufauga i aso taitasi, o tatalo, ma naunautaiga na faia lava mo le alualu i luma o tagata. Ou te iloa o i latou o e lagolagoina i lo latou faatuatua nei alii faatasi ai ma a latou tatalo, ma a latou galuega lelei, na faamanuiaina i latou e le Atua, e le gata i le faatupuina o le faatuatua ma le alofa o le Atua ma se molimau o le paia o le galuega o le Talalelei ua tatou galulue ai, ae ua faamanuiaina foi i latou i le i ai o mea taumafa manaomia, i o latou fale, ua faamanuiaina o latou eleele, ma ua faamanuiaina i latou i le atamai i totonu o o latou aiga, e aoaoina ai i latou mo le faataunuuina o aoaoga ma apoapoaiga a le Atua.¹¹

E lei i ai lava ia te au se isi faanaunauga i lou loto pe a tulai atu i luma o le Au Paia o Aso e Gata Ai, e faapea ua ese mai nai lo lo- ’u fia fai atu o se upu mo lo latou lelei, mo lo latou manuia; ma ua fuafuaina faapitoa e uunaia ai i latou, ma atiina’e ai i o latou loto se naunautaiga ma se taumafaiga aiai ia sili lo latou faatuatua, sili ona maelega, sili ona malolosi i le faataunuuina o o latou tiute i o latou soifuaga i le lumanai nai lo le taimi ua tuanai.¹²

E faamanuiaina i tatou a o tatou faamamaluina ma mulimuli ia i latou o lo o pulefaamalumalu ia i tatou.

Ia tatalo mo taitai o le Ekalesia, ma ia lagolagoina i latou i a latou galuega uma ma mea uma latou te faia.¹³

Mai mea na ou oo i ai, ua ou iloa ai o totonu o aiga o le Au Paia o Aso e Gata Ai, mai lava i aso o Peresitene Polika Iaga, Ioane Teila, Uilifoti Uitilafi, Lorenisio Sinou ma Iosefa F. Samita, seia oo mai i le taimi nei, ua oo a’e mai lea aso i lea aso, tatalo faatauanau ma le loto atoatoa i le Atua mo musumusga a le Alii ina ia tuuina atu i alii o e tulai mai e avea ma au peresitene o lenei Ekalesia, o aposetolo ma isi au pulega aoao; ina ia mafai e i latou, uma taitoatasi ona musuia e le Atua ina ia faataunuuina mea o le a avea ma mea e manuia ai ma mo le lelei o Lana fanau ma le faasalalauina atu o le Talalelei a Iesu Keriso i le lalolagi atoa. Ou te iloa, ina ua tuanai le tele o tausaga … o mea ua tutupu ua ou iloa ai, o alii o e ua maua tofiga i o tatou aso e avea ai ma aposetolo a le Alii o Iesu Keriso, ua faaeeina atu i ai le agaga o le Atua soifua.¹⁴

O le faatuatua o le meaalofa a le Atua, ma pe a maua e tagata le faatuatua e ola ai i le talalelei, ma faalogo i fautuaga a i latou o e pulefaamalumalu i totonu o uarota ma siteki ma Pulega Aoao a le Ekalesia, ua ou iloa mai mea na tutupu na matua faamanuiaina i latou e le Alii, ma o le toatele o i latou ua latou see ese mai tulaga e sili ona faigata tau tupe ma isi faigata i se auala faavavega ma le ofoofogia.¹⁵

Ia tatou sauni ma naunau e mulimuli ia i latou ua tutu i tulaga e taitaia i tatou, ma ia lagolagoina i latou. … O le a faamanuiaina ai pea lava pea oe ma manuia ai i le mulimuli i fautuaga ma apoapoaiga a i latou o e ua filifilia e le Atua e pulefaamalumalu i le Ekalesia. O lou faamamaluina o le alii ua filifilia e le Atua, o le a faamamaluina ma faamanuiaina ai foi oe e le Atua; ma o lou faia o lou lava tiute patino, o le a e tuputupua’e ma faaopoopoina ai le malamalama ma musumusuga a le Agaga o le Atua. A o tatou tuputupua’e ma faaopoopoina faaletagata lava ia, o le a faapena foi ona tuputupua’e ma faaopoopoina le Ekalesia. … O le galuega lenei a le Atua. O Iosefa Samita o se perofeta a le Atua; e tatau ona tatou manatuaina lena mea. E tatau ia i tatou ona “muai saili le malo o le Atua ma Lana amiotonu, ” ona faaopoopoina atu lea o ia mea uma [tagai i le Mataio 6:33]. O le ola e faavavau o le mea lea o lo o tatou galulue atu i ai. Aua nei faatagaina le atamai, oa, po o aoaoga faalelalolagi, po o se isi mea, e faatauasoina i tatou mai le iloaina o le galuega lenei a le Atua, ma o ia o le fofoga taumomoli o le Atua i le lalolagi; pe a tulei mai o ia, ia tatou sauni ma naunau e faaaogaina o tatou taimi, o a tatou taleni ma mea uma ua tuuina mai ia i tatou, e galulue ai e faataunuuina le mea o lo o naunau i ai le Atua. Ou te tauina atu ia te oe, o le a faaalia mai e le Atua e sa’o lava Lana fofoga taumomoli.¹⁶

Ou te faamoemoe ma tatalo o le a ola ai le au paia i le Talalelei a Iesu Keriso. Ou te faamoemoe o le a latou faalogo i aoaoga a peresitene o siteki ma epikopo o uarota. Ou te manao ou te fai atu e matou te manaomia peresitene o siteki taitasi ma epikopo o uarota taitasi e aoao tagata i le upu moni. Matou te mananao ia i latou e tau atu i tagata o lo o manaomia lo latou usitaia o le Upu o le Poto, o ni tagata e totogi atoa ma le faamaoni le sefuluai, ia manatua feagaiga latou te osia i totonu o malumalusa o le Atua, … ma matou te manaomia i latou ia latou faia lo latou tiute i le avea ai ma au paia, ma ia talai atu le Talalelei e ala i le ola ai.¹⁷

E toatele tagata, afai e aoaoina i latou e auauna a le Atua i lea tausaga ma lea tausaga, e leai lava se aafiaga patino mo i latou. A e o tagata lava ia e tasi, a fai latou te maua se fautuaga mai se tagata e poto i le atamai, faalelalolagi, e latou te mulimuli ai loa. Ou te manatuaina … le tuuina atu o se lauga e uiga i le Upu o le Poto. Mulimuli ane sa ou iloaina se tasi o tuafafine lelei lava na faalogo i lau lauga, sa ma’i o ia ma sa auina atu se feau faauaealesi mo se fomai e malaga mai le Aai o Sate Leki, i se nofoaafi e malaga faapitoa mai, ma na faitau fiaselau tala sana tupe na faaalu e ta’u mai ai e lenei fomai ua tele tele lona inu lauti, ma pe afai na te le tuua lea mea, e mautinoa lava e oti o ia. Na ia taliaina le fautuaga a le fomai ma manuia ai. Ae ana faalogo o ia i la- ’u fautuaga e leai se tupe e alu ai, semanu na te faasaoina mai le fiaselau o ia tupe, ma ia ola ai e tusa ma aoaoga a le Alii, e pei ona faaalia mai i le Upu o le Poto.¹⁸

Tatou te pepese ma saga pepese soo i le, “Ia Viia Oe le Atua, mo le Perofeta lelei, ua taitaiina e ia.” [Viiga, nu. 10.]

E toatele tagata latou te … tuuina i ai se faaupuga faaopoopo i lena pese ma faapea mai ai: “Pe a fai na te taitaiina i tatou i mea tatou te mananao ma moomoo i ai.”

O perofeta a le Atua, mai lava ia Iosefa Samita e o o mai i le aso nei, na latou taitaiina i tatou ma ua latou taitaiina sao i tatou, pe a tatou faalogo i lena taitaiga. O mea sese na fai, na mafua ona tutupu ona o lo tatou le faalogo i le perofeta, o lana aia tatau o le taitaiina lea o le nuu o le Atua. …

Ou te iloa o le ala saogalemu mo le Au Paia o Aso e Gata Ai ia le na ona pepese ai i le, “Ia viia Oe le Atua, mo le Perofeta Lelei, ua taitaiina e ia o i matou i ona po nei, ” a ia saunia ma naunau ma sagisagi atu ina ia taialaina [i latou].¹⁹

Fautuaga mo Suesuega ma Talanoaga

O le a le uiga o le lagolago ma mulimuli ia i latou o e ua valaauina e pulefaamalumalu ia i tatou?
O le a le mea e mafai e matua ona fai e aoao atu ai a latou fanau ina ia lagolagoina taitai o le Ekalesia?
O a faamanuiaga ua e maua faatasi ai ma tagata o lou aiga a o outou mulimuli atu i fautuaga a taitai o le Ekalesia? Ua faatupulaia faapefea lou faatuatua ma lau molimau ona o ia mea na tutupu?
O a fautuaga na tatou maua talu ai nei mai le perofeta soifua? O a ni mea patino e mafai ona e faia ina ia soifua ai e tusa ma aoaoga a le perofeta?