Mataupu 1

Aoaoina Mai ma le Aoao Atu o le Talalelei

O le aoaoina o le talalelei e faatoa aoga pe a tuuina atu ma taliaina e ala i musumusuga a le Agaga Paia.

Mai le Soifuaga o Heber J. Grant

Na saunoa Peresitene Heber J. Grant: “E leai se mea ua ou iloa e aumaia ai le olioli sili i le loto o le tagata nai lo le galue i le fale po o fafo atu mo le faaolaina o agaga o tagata. E leai se mea ua ou iloa e aumaia ai le alofa tele i mea uma e lelei, nai lo le aoaoina atu o lenei Talalelei a Iesu Keriso.”¹

I le faaopoopo atu i le avea ai ma se faiaoga maelega o le talalelei, sa naunau foi ia Peresitene Grant na te aoao mai i molimau a isi. Na ia maitauina: “Ou te fiafia pea pe afai ou te maua le avanoa e feiloai ai ma le Au Paia o Aso e Gata Ai i soo se latou faatasiga. Ou te lei auai lava i se tasi o a tatou sauniga, i uarota po o siteki po o konafesi aoao, e le faamanuiaina ai au, e aoaoina ma faamalosia ai le faatuatua i le Talalelei; ou te le faalogo foi i se mea e le fafagaina ai au i le areto o le ola.”²

A o talavou ia Heber J. Grant, sa i ai sona aafiaga na fesoasoani na te iloa ai le taua o le aoao atu ma le aoaoina e le Agaga. Na ia toe faamatalaina mulimuli ane:

“O loo i ai i lo’u olaga le tele o mea na tutupu i lo’u talavou, o musumusuga matagofie ma le mana e ala mai i tagata na talaiina le talalelei i le agaga o le molimau ma le tatalo. Ou te manatuaina se tasi o mea faapena a o o’u talavou, masalo po o le sefulufitu po o le sefuluvalu o o’u tausaga. Sa ou faalogo ia Epikopo Millen Atwood, o le ua maliu, o lauga i le Uarota Sefulutolu. O le taimi lea sa ou aoaoina ai le kalama, ma sa i ai ni mea sese o le kalama i lana lauga.

“Sa ou tusia i lalo lana fuaiupu muamua, ma ou ataata ia te au lava, ma faapea ifo: ‘O le a ou sau iinei nanei, i le tolusefulu minute lea e lauga ai ia Brother Atwood, ua lava foi ia mea mo au i le taimi atoa o le taumalulu i la’u vasega o le kalama i le aoga po.’ E tatau ona matou aveina atu i le vasega mo lesona taitasi ia ni fuaiupu se lua, po o le fa fuaiupu i le vaiaso, o ni fuaiupu e sese le kalama, faatasi ai ma a matou faasa’oga.

“Sa ou mafaufau i le faia o au faasa’oga ma faalogo atu i le taimi lava e tasi i le lauga a Epikopo Atwood. Ae ou te lei mafaia ona toe tusi se isi mea ina ua uma lena fuaiupu muamua—e oo i se upu e tasi; ma ina ua uma le lauga a Millen Atwood, sa tafe ifo loimata i o’u alafau, o loimata o le faafetai ma le faamanu na toulu ifo mai o’u mata ona o le ofoofogia o le molimau lea sa tuuina mai e lena tagata e uiga i le paia o le misiona a Iosefa Samita, le perofeta a le Atua, ma le matagofie o musumusuga na oo i le perofeta i ana galuega uma.

“E ui lava ua silia nei ma le onosefululima tausaga talu ai ona ou faalogo i lena lauga, ae o loo matuai manino lelei e pei lava o le taimi nei, ma o lagona ma faalogona na ou maua ua matuai mausali ia te au e pei ona sa i ai i le aso sa ou faalogo atu i ai. Tou te silafia, na ou manatu e leai lava se mea e ese ai lo’u mafaufau i le faaaogaina o na fuaiupu na sese ai le kalama ma le tu atu i luma o le vasega ma faifai i le suafa o le Atua. O lena molimau na oo mai ai se lagona faagaeetia muamua i lo’u loto ma lo’u agaga i le paia o le misiona a le perofeta. Ua ou faalogo i le tele o molimau na faafiafiaina ma faagaeetia ai au, ae o le molimau muamua lea na ou tagi ai ona o musumusuga a le Agaga o le Atua i lena tagata.

“I tausaga uma lava na tuanai ai talu mai lena mea, ou te lei toe te’i pe le fiafia i kalama sese po o le sese o le faaleoga o upu e i latou e laugaina le talalelei. Na ou iloaina e pei lava le faamasinoina o se tagata i laei e ofu ai, o le faamasinoina o le agaga o se tagata e ala i le faaaogaina o lana gagana. Mai lena lava aso e oo mai i le taimi nei e na o le tasi le mea e sili atu nai lo lena mea ua faagaeetiaina ai au, o le Agaga lea, o le musumusuga a le Atua soifua lea e i ai i se tagata pe a folafolaina le talalelei, ae le o le gagana. … Na ou matuai aoaoina ai, o le Agaga lea e tuuina mai le ola ma le malamalama, ae le o le tusi.” [Tagai 2 Korinito 3:6.]³

Aoaoga a Heber J. Grant

Pe a tatou aoaoina atu le talalelei, e tatau ona tatou taulai atu i mataupu faavae ma poloaiga faigofie.

E le o le manaia o meaai tatou te vaai i ai ma mafaufau e aoga ia i tatou, seiloga lava tatou te aai ai ma faamaluina. E le o ni taumafataga tetele foi lea e sili ona faaopoopo mai i lo tatou malosi ma le toamalie, ma fesoasoani ia i tatou ina ia lelei le faatinoina o le taua o le olaga, ae i le isi itu, o le tele lava o taimi e na o meaai faigofie e tuuina atu ai ni mea aoga lelei ma le umi ia i latou o e taumamafa i ai. O lea, e le na o taumafataga e saunia e e atamamai e faaopoopo mai ai lo tatou malosi ina ia faia ma le mamalu ma faatamalii la tatou matafaioi i le taua o loo fai i le olaga, ae o nisi taimi o aoaoga mai tagata e sili ona faatauvaa e maua ai se tali i o tatou loto ma agaga, ma faaopoopo mai ai lo tatou malosi ina ia tulei i luma ma faia lo tatou tiute i tauiviga i aso taitasi mo le faaleleia.⁴

E tatau i faalapotopotoga o le Ekalesia ona avea ma o latou faamoemoega le fausia o ni molimau mausali i mafaufau ma loto o le Au Paia, aemaise lava i le autalavou, —o molimau i le moni o le Talalelei Toefuataiina, o le tofi Mesia o lo tatou Alii o Iesu Keriso, o le paia o le misiona a le Perofeta o Iosefa Samita, o le paia o le tupuaga o lenei Ekalesia na faavaeina e le Atua ma Lona Alo e ala mai i le Perofeta, ma o le mea moni lava o le Ekalesia lenei a Iesu Keriso ma o le uiga atoa lava lena, —e oo atu lava i le iuga ma ina ia mafai ai e le Au Paia ona olioli ai i nei molimau, ina ia mafai ona latou ola i le tausiga o poloaiga a le Alii, ina mafai ai ona faatupulaia ai pea lo latou malamalama i le Upumoni, ia mafai ai e i latou ona ola i lena faaolataga, faaeaga, ma le fiafia faavavau i le Malo Selesitila lea e oo mai ia i latou, ma le vaega mulimuli ina ia mafai ona latou taitaia isi tagata o le lalolagi i se malamalama ma le molimau o le Upumoni e le gata i upu ae o a latou faataitaiga, ina ia aumaia ai foi ia te i latou nei lava faamanuiaga e tasi.⁵

Ou te talitonu o le faiaoga e i ai se alofa i le Atua ma se malamalama ia te Ia, o se alofa ia Iesu Keriso ma se molimau i Lona paia, o se molimau i le paia o le misiona a le Perofeta o Iosefa Samita; o le na te totoina nei mea i loto ma agaga o le fanau o loo ia aoaoina, o lea foi ituaiga o faiaoga o loo punouai i se tasi o galuega e sili ona mamalu ma le taua ma le ofoofogia lea e mafai e soo se tagata ona punouai i ai.⁶

Aoao atu ma ola i uluai mataupu faavae o le talalelei, ae faatalitali mea lilo a le lagi se’i e oo atu i le lagi.⁷

E pei o le usuina soo o a tatou pese …, e le mafai ona tatou tau soo atu ia poloaiga a le Alii i nei tagata, ma uunaia le Au Paia ina ia ola e tusa ai.⁸

O le tele o taimi e fai mai ai tagata ia te au, “Ua ou fiu ma ua ou le lava faalogo soo atu i le mea lava e tasi. E tau le manaomia fua le toe fai ma saga fai.” E toatele tagata e sailiili masei i lauga latou te faalogo i ai aua o ni mea ua faifaisoo. … E foliga mai o loo silafia e le Alii le moomia o le tau soo mai ina ia faagaeetia ai mafaufau o tagata i soo se savali na te tuuina mai. O aoaoga a lo tatou Faaola, e faifaisoo, mai lea taimi i lea taimi, i gagana eseese le manatu lava e tasi, o le mea moni ina ia faamausali ai e faavavau i mafaufau ma loto o e faalogo ia te ia.⁹

Ina ia avea ma ni faiaoga malolosi o le talalelei, e tatau ona tatou aoao atu e ala i le mana o le Agaga Paia.

I le malaga muamua lava sa ou faia ina ua avea au ma se sui o le Aufono a le Toasefululua, faatasi ai ma Elder Polika Iaga le Itiiti ua maliu, [o se tasi foi o le Aufono a le Toasefululua, ] ou te manatuaina na tonu i lo’u mafaufau o le a ou le toe faia lava, i lena malaga—lea e tusa ma le fa masina—ona lauga atu i le mea lea ua lauiloa ia i tatou “O le Upu o le Poto.” … Sa ou fuafuaina ai loa e faapea, o le isi fonotaga ou te auai atu i ai o le a ou sailia ai se isi autu. Sa ou taumafai mo le 20 minute e talanoa i se isi mea, ae sa le mafai. Ona ou talanoa lea i le isi 20 minute, na matuai sologa lelei, e uiga i le Upu o le Poto; ma na ou aoaoina ai mulimuli afai e i ai soo se mea se tasi na manaomia e tagata, i lena tamai nuu sa ou asiasi atu i ai, o le aoaoina lea i le Upu o le Poto. … Ina ua mavae lena aafiaga sa tonu ai loa i lo- ’u mafaufau e faapea, soo se taimi lava e uunaia ai au e lauga atu i se mataupu patino, ma lagonaina le tatau ona faia, e ui lava sa ou laugaina lena mataupu mo ni vaiaso, e mautinoa lava lo’u toe laugaina foi. …

I la’u auaunaga i tagata sa ou fiafia ai lava i le mafai ona molimau atu faapea afai tatou te lotomaualalo ma maua le agaga tatalo ma naunau i le aoaoina o tagata, o le a musuia i tatou e le Alii.¹⁰

E i ai se fefe ma se matamuli lea e taumulimuli mai ia i tatou uma lava pe a tatou tutu atu i luma o tagata e folafola atu ia i latou le fuafuaga o le ola ma le faaolataga. Ou te manatu ua lelei lava le tulaga lena, aua ua tatou iloaina lo tatou ola faalagolago, o lo tatou lava vaivai, ma lo tatou lava le mafaia ona aoao atu i latou tatou te lauga atu i ai e aunoa ma le fesoasoani a le Agaga Paia. … Ou te faafetai ona o lenei agaga o le matamuli e i ai pea ia te au i au lauga faalauaitele i le Au Paia o Aso e Gata Ai, aua ou te le manao lava ou te i ai i se tulaga ou te le lagonaina ai se naunau, ina ia mafai e le malamalama ma musumusuga a le Atua ona faatasi mai ia te au i le laugaina o tagata. Ou te iloa e le mafai ona ou malamalama i le mea e sili ona lelei mo tagata, ae e auala mai i le leo o musumusuga.¹¹

O lo’u lava lea faanaunauga o le lauga atu i le Au Paia o Aso e Gata Ai, ina ia faamalamalamaina lo’u mafaufau i musumusuga a le Agaga Paia. Na ou iloaina, o le aoaoina o tagata, a le musuia le failauga e lo tatou Tama oi le Lagi, e le mafai ona fai atu se mea e taua pe aoga i le Au Paia.¹²

E leai se tagata e mafai ona aoaoina atu le Talalelei a Iesu Keriso i lalo o musumusuga a le Atua soifua ma le mana mai luga seiloga o loo ola ai.¹³

O lo tatou tiute lenei—o le tuu o i tatou lava i se tulaga tatou te tutu atu ai ina ia aoaoina tagata, e mafai ona tatou aoaoina i latou e ala i musumusuga a le agaga o le Atua pe a oo mai ia i tatou; ae afai tatou te le o tausia poloaiga a le Atua, e le mafai ona tatou aoao atu i le mana, ma le malosi, ma uunai isi tagata ia latou usiusitai i poloaiga a o lea tatou te le o usitaia.¹⁴

Ina ia faamanuiaina mai sauniga ma vasega a le Ekalesia, e tatau ia i tatou ona fiafia ma naunau e faatinoina mea na tatou aoaoina.

E tusa lava po o le a le mamana o le molimau po o a musumusuga o loo i ai, ae a le o saunia le mafaufau o le tagata faalogologo e talia ai, e leai foi sona aoga. E pei lava foi o le totoina o ni fatu lelei i se eleele leaga.¹⁵

O le fiaai e manaia ai se meaai. O le galala i le fiaai i le Talalelei a Iesu Keriso tatou te fiafia ai i a [tatou] konafesi.¹⁶

E i ai nisi tagata e auai atu i sauniga i lea tausaga ma lea tausaga ma faalogologo i auauna a le Alii a o latou aoaoina i latou i le faigofie ma le manino o tiute ua tuuina atu e auauna a le Alii ia i latou, ma e latou te o ese mai na sauniga ae latou te le faatinoina lava mea na latou faalogo i ai; ae peitai latou te viia lava i latou ona o lo latou o atu pea i sauniga. O lenei, au uo e, afai e te alu atu pea i au taumafataga i le afiafi, ma e nofo i lalo ma vaavaai lelei i taumafa, e aunoa ma sou tago atu i ai, e le umi ae e oti i lou fiaai. E i ai nisi o le Au Paia o Aso e Gata Ai e o atu i sauniga, ma feoti ai i le fia-aai faaleagaga aua latou te le o taliaina ma faamaluina ia meaai faaleagaga o loo tufatufaina ai iina. E le tatau ona avea i tatou o ni tagata e na ona faalogo i le upu, ae ia avea foi ma e anaana i le upu [tagai Iakopo 1:22].¹⁷

Afai tatou te i ai i se sauniga ia tatou tofo i le agaga o lena sauniga. Afai tatou te le auai atu i ai ae faamatala mai e se tasi le matagofie o le agaga sa i ai ma mea na ausia e ala lea i le auai iina ma tofo i ai, e le mafai ona tatou talisapaiaina na mea. E pei lava o le tagata sa fiaai ae faamatala atu i ai e se tasi se taumafataga manaia lava, e na te le talisapaiaina lena taumafataga. E ao ona tatou taumamafa mo i tatou lava, e ao ona tatou ola mo i tatou lava, e ao ona tatou i ai e faataunuu lo tatou tiute ina ia tofo ai i le Agaga o le Alii, pe afai e faaali mai le Agaga o le Alii.

… Na malaga mai ia Francis M. Lyman [o le Korama a Aposetolo e Toasefululua] mai Tooele i le po a o lei faia le matou fonotaga ma faaalu ai le po e tasi [i le Aai o Sate Leki] ma le aso atoa ina ia auai ai i sauniga a le Au Peresitene Sili ma Aposetolo lea e faia mo le lua i le tolu itula, ae na te lei misia se fonotaga e tasi.

Sa ou fai atu ia te ia i se tasi aso: “O se mea ofoofogia ia te au lou vave atu ma lou auai pea i a tatou fonotaga.”

Na ia saunoa mai: “Ou te le manao ou te misia soo se musumusuga mai le Alii; ou te le manao i le Agaga o le Alii e oo mai ia te au e auala mai i se isi tagata. Ou te fia tofo i ai, ma lagona, ma iloa, ma vaaitino i ai mo au lava ia.”¹⁸

E auala mai le tatalo o le faatuatua, e faamanuiaina ma faamalosia ai ia faiaoga ma i latou o loo aoaoina.

O lo’u manao, e pei ona ou naunau pea i ai pe a lauga atu i le Au Paia, ina ia ou maua le lagolago mai o lo outou faatuatua ma talosaga, ia mafai ona i ai le Agaga lelei ia i tatou, ma ia faamanuiaina ma faamalolosia uma i tatou i lo tatou faatuatua paia silisili e ala i le mafuta faatasi. … O nisi o tagata, ou te iloa, e manatu e toetoe lava o se faatulagaga e masani ai a le au failauga le talosagaina o le faatuatua ma tatalo a le Au Paia, ae ou te fia faapea atu ou te manatu ua tele naua le le amanaiaina e tagata i a latou tatalo, le talosiaina o le Alii ina ia faamanuia ma musuia i latou e lauga. O tulaga faapea tatou te tausalaina ai, e toetoe lava o taimi uma, i le le taulai atu o o tatou manatu ma o tatou lagona i le failauga ma naunau ma le faamaoni ma le loto tatalo ina ia faamanuia o ia e le Alii. Ou te tautino atu le tausalaina o au i le faagaloina i nisi o taimi, le tatalo atu i le Alii, a o lauga o’u uso, ina ia faamanuiaina i latou e Lona Agaga Paia.

Ua ou iloa mai mea na ou oo i ai e faapea, e leai se Toeaina e tulai atu e lauga i le Au Paia, e aunoa ma le matuai manaomia lava o le faatuatua ma tatalo a tagata pe afai e i ai sona naunautaiga faamaoni ia aoga mo i latou, . … I le tali atu i tatalo a le Au Paia ua potopoto, ou te iloa ai o le a faamanuiaina e le Atua au ma isi o e o le a tutulai atu i o outou luma mai lea taimi i lea taimi e folafola atu ia te outou ia tiute ma matafaioi o loo outou nofo aitalafu ai i lo outou Foafoa.¹⁹

Pe a tatou o atu i se sauniga a le Ekalesia, e tatau ona tatou o atu ma se tatalo i o tatou loto o le a musuia e le Alii i latou o le a saunoa, e ala i Lona agaga, ma a maea ona latou saunoa mai ia i tatou e ala i musumusuga a Lona Agaga, e tatau ona tatou o ese ma se naunautaiga, ma se manaoga, ma se tatalo, o le a tatou aoaoina moni lava le lesona na tatou faalogo i ai, ma o le a tatou faatinoina i o tatou olaga.²⁰

E lei oo mai lava i lo’u olaga se olioli, po o se fiafia, po o se filemu e mafai ona faatusatusa i le olioli, o le fiafia ma le filemu lea ou te mauaina pe a o mai tagata o e na faalogo ia te au o folafola atu le talalelei a Iesu Keriso ma faapea mai, ua latou maua se molimau i le paia o lenei galuega; ma o upu na sau mai o’u laugutu na oo mai ai i o latou loto se malamalama o le fuafuaga o le ola ma le faaolataga ua toefuataiina mai i le lalolagi. Ou te talitonu e leai se mea i le lalolagi atoa e mafai ona faatusa i le olioli e lagonaina e se tagata pe a ia iloaina na avea o ia ma se meafaigaluega i aao o le Atua soifua e aapa atu ai i se loto faamaoni, ma musumusu atu i ai se alofa i le Atua ma se manao e auauna atu ia te Ia.²¹

Fautuaga mo Suesuega ma Talanoaga

Aisea e moomia ai ona aoao atu “pea lava pea” ia mataupu faavae o le talalelei? Na faapefea ona faamanuiaina oe mai le aoaoina soo o mataupu faavae o le talalelei?
O a avanoa tatou te maua e aoao atu ai le talalelei? A o tatou saunia e aoao atu, aisea e taua ai le faailoa atu o o tatou vaivaiga i luma o le Alii?
O le a le uiga o le aoao atu e ala i musumusuga a le Agaga Paia? (tagai foi i le 2 Nifae 33:1; MFF 50:13–22; 100:5–8.) O le a le mea e mafai ona tatou faia e maua ai le taitaiga a le Agaga i a tatou aoaoga? (Tagai foi i le Alema 17:2–3; MFF 11:18–21; 42:14.)
O a tiutetauave ua ia te i tatou pe a tatou faalogo atu i isi o aoao atu le talalelei? E faapefea ona aafia lo tatou malamalama i vasega o le Ekalesia i lo tatou naunau e taliaina? O a ni auala atonu e aafia ai le faiaoga ma isi i lo tatou fiafia e talia?
O a mea e mafai e faiaoga ona fai ina ia uunaia ai le auai o tagata o le vasega i lesona?
O a ni auala na fesoasoani ai sauniga a le Ekalesia ia te oe ia e alualu i luma faaleagaga? Aisea ua avea ai ma o tatou tiute le tatalo mo i latou o e aoao atu i sauniga a le Ekalesia?
A o tatou vaavaai atu i luma i se suesuega o aoaoga a Peresitene Grant, o le a se mea e mafai ona tatou faia e faaaoga ai mea ua tatou aoaoina i lenei mataupu?