Mataupu 21

Usitaia o le Upu o le Poto

Ua tuuina mai e le Alii ia i tatou le Upu o le Poto mo lo tatou faaolataga faaletino ma le faaleagaga.

Mai le Soifuaga o Heber J. Grant

I le taimi o le auaunaga a Peresitene Heber J. Grant a o avea ma se Aposetolo ma avea ma se Peresitene o le Ekalesia, e masani lava ona musuia o ia ma isi Au Pulega Aoao e lauga atu i le Au Paia e uiga i le Upu o le Poto, o se faaaliga o loo maua i le Mataupu Faavae ma Feagaiga 89. I lenei faaaliga, ua faasaina mai ai e le Alii le faaaogaina o ava malosi, tapaa, ma mea inu vevela, lea ua faauigaina e Perofeta i aso e gata ai o le lauti ma le kofe (tagai MFF 89:5–9). Ua fetalai mai foi le Alii o laau afu aoga uma, saito, ma fualaau ua “faatonuina mo le faaaogaina e tagata, ” lea e “faaaogaina faatatau” (tagai MFF 89:10–17). I le faaopoopo atu i le aoaiina o le Au Paia ia usitai i lenei fautuaga faapitoa, ua saunoa mai ai Peresitene Grant ma isi Peresitene o le Ekalesia e le tatau ona faaaogaina mea faatama’i e ono fai ma mausa e pei o fualaau faasaina. Ua saunoa mai Peresitene Grant e faapea, “E le finagalo le Alii tou te faaaogaina soo se fualaau faasaina, ia e amatalia ai sou manao e saga faaaoga pea.”¹

O le tele o le faamoemoega o Peresitene Grant mo le talaiina atu o le Upu o le Poto na oo mai ona sa i ai sa na uo sa faaleagaina lona olaga e le tapaa ma le ava malosi. O lenei alii talavou na lafoaiina le ulaula tapaa ina ia mafai ona faataunuuina se misiona, peitai sa vave lava ona toe foi o ia i le ulaula ina ua maea lana auaunaga o se faifeautalai faamisiona. O le ulaula tapaa na oo atu ai i le inu ava malosi, ma o le inu ava malosi na oo atu ai i le aveesea o le ola mama ma le tapeina o lona igoa mai le Ekalesia. Sa maliu o ia a o talavou lava, ma sa malaga atu Heber J. Grant e asiasi i lona tuugamau. “Ao ou tutu i lona tuugamau, ” o le tomanatu lea a Peresitene Grant, “sa ou tilotilo atu i le lagi ma ou faia se tautoga i lou Atua, o le a avea au ma se fili o le ava malosi ma le tapaa ma o le a ou tu e tetee atu i ia mea, ma lou malosi uma e tuuina mai e le Atua ia te au seia oo i le aso ou te oti ai.”²

O nisi tagata o le Ekalesia i aso o Peresitene Grant na latou faitio i le tele o aoaoga na latou faalogoina e uiga i le Upu o le Poto. Sa saunoa Peresitene Grant: “E seasea i ai se konafesi e le manatu ane ai se tasi e tatau ona ia tauina mai ia i matou: ‘Faamolemole aua e te lauga mai e uiga i le Upu o le Poto. Ua faafia ona matou faalogo i ai, ua matou le lavava faalogo soo i ai.’” Na tali atu Peresitene Grant i nei faitioga i lona faapea atu: “E leai se tagata soifua o le ua avea o se tagata o le Au Paia o Aso e Gata Ai ma o loo tausia le Upu o le Poto e le lava ma musu e faalogologo i ai. Pe a tuua e se tagata le lotu ma faapea mai … ‘E leai lava se isi mea e mafai ona latou talanoa mai ai nai lo le Upu o le Poto; Ua ou fiu foi e faalogologo i ai’—ioe e fiu o ia, aua ua tumu o ia i mea ua tau atu e le Upu o le Poto ina ia lafoai.”³

Mai aafiaga faaletagata lava ia, ua silafia ai e Peresitene Grant o i latou o e usitai i le Upu o le Poto o le a le faasaoina i latou mai ma’i ma faamai uma. Sa ia faailoa mai “o le faamanuiaina o lona uiga e le faapea o le a faasaoina mai i tatou i taimi uma lava o faanoanoaga ma faigata o le olaga.”⁴ Peitai, e masani ona molimau mai o ia, pe a tausia e tagata o le Au Paia o Aso e Gata Ai le Upu o le Poto, o le a latou maua faamanuiaga o le soifua maloloina, manuia, ma le malosi faaleagaga lea e le mafai ona latou mauaina pe ana fai latou te le usitaia lenei tulafono.

I le konafesi aoao ia Aperila i le 1933, sa saunoa mai ai Peresitene Grant ona talu ai sa ia tausia le Upu o le Poto, o lea ua faatagaina ai o ia e le Alii ia ola e faataunuuina lana misiona i luga o le fogaeleele. Sa ia faapea mai, “Ou te tuuina atu lau molimau ia te outou, ou te talitonu ma le mautinoa e pei ona ou talitonu i soo se mea i lenei lalolagi, e le mafai ona ou tulai atu iinei i le aso e talanoa atu ia te outou pe ana ou le usitai i le Upu o le Poto. Ina ua aveeseina mai lou pitogaau (tulou), sa i ai se faaletonu, ma se toto ua ‘ona, o la latou tala lea, i le taimi na amata ai le vaega mulimuli o lou taotoga. E toaiva ni fomai sa i ai i lea taimi ma e toavalu fomai na faapea mai o le a ou oti. Sa liliu atu le pule o fomai tipitipi … ia Peresitene Iosefa F. Samita, ma faapea atu: ‘Lau susuga Samita, e le tatau ona e mafaufau e mafai pe ono mafai foi e lenei alii ona soifua pea. O lea la, afai o le a soifua pea o ia o se vavega lea mea, ma e le o se aso lenei o ni vavega.’

“O le savali lena na tuuina mai e Iosefa F. Samita lava ia ia te au i le taimi o lona gasegase faaiu, na ia saunoa mai ai: ‘Ua maliu la ta uo fomai sa faapea mai o se vavega pe a e ola pea. Ou te lei vaai lava ua sili atu ona e foliga maloloina lelei mai i lou olaga atoa nai lo ou foliga i le aso, Heber.’

“Sa ou faapea atu i le tausimai o le na tauina mai ia te au e uiga i nei fomai e toaiva, ou te le manao e feiloai atu i se tasi o i latou, sei vagana ai le toatasi o le na faapea mai e talitonu e mafai ona ou ola. Sa ia faapea mai: ‘O le fomai lea o loo faafaigaluega e le falemai; sei ou valaau atu ia te ia e sau.’

“Sa ou fesili atu ia te ia pe aisea na le aufaatasi ai ma le isi vaega, sa ataata o ia, … ma faapea mai: ‘Lau Susuga Grant, sa na o sa’u taumatematega lava. Lau susuga, ua ou faalogoina le tata o fatu o le faitau afe o mai, talu ai ona o au o se fomai ua faafaigaluegaina i falemai, i le tele ma le tele o falemai, ou te lei faalogo lava i se tata o se fatu e pei o lou fatu. O lea la, e te silafia lau susuga, o suesuega uma sa ou faia i totonu o le itula ma le fasefulu lima minute sa faia ai lou taotoga, sa lei mafai ona misi e lou fatu sina tata se tasi, ma sa tonu ai i lou mafaufau, o lena fatu o le a mafai ai ona e soifua pea.’

“O le a le ituaiga fatu sa ia te au? Sa ia te au se fatu sa i ai se toto mama, sa le faaleagaina e le lauti, kofe po o se mea inu malosi. O le ala lena na faaleleia ai se ‘ona sa i totonu o lou tino.”⁵

Na toe talosaga tasi mai Peresitene Grant, “tau ina ia fesoasoani mai le Atua ia te outou ma au ma tagata uma o le Au Paia o Aso e Gata Ai ina ia usitai i le Upu o le Poto, ina ia tatou maua ai le malosi ma oa sili o le malamalama e oo lava i oa natia, ma o le a faatagaina i tatou e le Atua ia tatou ola i luga o lenei fogaeleele seia uma ona tatou faataunuuina le fuafuaga faamoemoeina o lana foafoaga.” ⁶

Aoaoga a Heber J. Grant

O le Upu o le Poto o le Tulafono o le ola ma le soifua maloloina i le Au Paia o Aso e Gata Ai.

Ua ou iloa ua tusia i le Mataupu Faavae ma Feagaiga se fuaitau puupuu ua faitauina faapenei:

“Ua noatia au le Alii, pe a outou faia mea ou te fai atu ai; ae pe a outou le faia mea ou te fai atu ai, e leai sa outou folafolaga.” [MFF 82:10.]

Ou te moomoo ia mafai e tagata uma o le Au Paia o Aso e Gata Ai ona manatua nei upu laiti. O lou manao maimau pe ana tusia nei upu i o tatou mafaufau ma luga o o tatou fatu, ma o le a tatou iloa ai pe o le a noatia le Atua e faataunuu Ana folafolaga ia i tatou, aua o le a tatou tausia Ana poloaiga. O loo i ai se tulafono ua faavaeina e le matatalaina i le lagi—ua tauina mai ia i tatou e le Perofeta o Iosefa Samita—a o lei faavaeina lenei lalolagi, lea e autu ai faamanuiaga uma lava, ma pe a tatou maua foi soo se faamanuiaga, e maua ai i le usiusitai i le tulafono lea e autu ai [tagai MFF 130:20–21]. Afai tou te mananao ma ou manao i faamanuiaga o le olaga, o le soifua maloloina, o le tino ma le mafaufau malosi; afai tatou te mananao e laaloa le agelu o le faafanoga ia i tatou, e pei ona ia faia i aso o le fanauga a Isaraelu, e tatau ona tatou usitai i le Upu o le Poto; ona noatia lea o le Atua, ma oo mai ai faamanuiaga ia i tatou.⁷

Ina ua maea ona faailoa mai ia i tatou le mea e lelei mo i tatou [tagai MFF 89:10–17], sa faia e le Alii se folafolaga e sili ona ofoofogia, o se folafolaga sili ona faagaeetia ma musuia ua mafai ona faia i le tagata soifua. Sa ia fetalai mai:

“O le Au Paia uma lava foi, o e manatua e tausia ma faia nei mea uma, ma savavali i le usiusitai i poloaiga, o le a maua le malosi i o latou pute ma le gao i o latou ivi;

“O le a maua foi le poto ma oa sili o le malamalama, e oo lava i oa natia;

“Latou te taufetuli foi ae le vaivai, ma savavali ae le matapogia.

“O au foi, le Alii, ou te avatua ia i latou le folafolaga, o le a laaloa ia i latou le agelu o le faafanoga, e pei o le fanauga a Isaraelu, ae le fasia i latou.” [MFF 89:18–21.] …

Ua tau mai e le Alii ia i tatou e ala mai i le Perofeta o Iosefa Samita:

“Afai foi e maua e se tasi le malamalama ma le faautauta sili atu i lo se isi i lenei olaga ona o lona filiga ma usiusitai o le a faapea ona sili atu ona avanoa i le olaga a sau.” [MFF 130:19.]

E leai se tagata na te solia le Upu o le Poto e mafai ona ia maua le aofaiga tutusa o le malamalama ma le poto i lenei lalolagi e pei o le tagata na te usitai i lena tulafono. Ou te le popole po o ai o ia, ma po o fea foi e sau ai, o le a le manino lelei lona mafaufau, ma e le mafai ona alualu o ia i luma i le mamao ma le televave ma faatumauina pea lona mana e sili atu pe a le usitai o ia i le Upu o le Poto.⁸

O le isi mafuaaga o le faapogai o lou popolega tele ina ia mafai e tagata o le Au Paia o Aso e Gata Ai ona usitai i le Upu o le Poto, ua fetalai mai le Alii, ua tuuina mai lenei tulafono ia i tatou mo lo tatou faaolataga faaletino [tagai MFF 89:2]. Ou te manao ina ia tatou tau fai iloa lenei mea, afai e le faaaogaina lava e se tasi o i tatou sina mea itiiti lava o le lauti po o se kofe po o le tapaa po o le ava malosi, o le a avea i tatou ma ni e sili ona tamaoaiga i le lalolagi. Aisea? Aua o le a faateleina le malosi i o tatou tino, faateleina le malosi i o tatou mafaufau; o le a tatou tuputupu ae faaleagaga; o le a faapea foi ona i ai lo tatou sootaga lelei i fegalegaleaiga ma le Atua, lo tatou Tama Faalelagi; o le a tele atu foi mea e mafai ona tatou ausia. …

O le toatele o tagata ua latou faapea mai o i latou o ni tagata o le Au Paia o Aso e Gata Ai, pe a oo i taimi o faigata, e aveesea ai se fale na malutia ai lana ava ma lana fanau, o i latou foi ia, pe ana fai e usitaia le Upu o le Poto, e mafai ona faasaoina mai. O le solia o le Upu o le Poto o lona uiga o le eseesega i le va o le toilalo ma le faamanuiaina. E ala mai i le usitaia o le Upu o le Poto, e mafai ai ona lava tupe mo le totogiina o tupe tului o se nonoga tupe, faatasi ai ma se fesoasoani faaopoopo i le tausia o lona aiga ma le faatoaga.⁹

Ou te le manao e faalavelave i aia tatau a soo se tagata. Ae peitai, pe a tuuina mai e le Alii se faaaliga ma tau mai ia te au o lona aoga, e mo le lelei o lou tulaga tau tupe ma le lelei o tulaga tau tupe a nei tagata, ona “o mea leaga atoa ma togafiti ua faia ma o le a tupu pea i loto o tagata faatuputupu leaga i aso e gata ai, ” [MFF 89:4] ou te manatu e tatau i tagata o le Au Paia o Aso e Gata Ai ona faalogo i le mea ua fetalai mai ai le Alii.¹⁰

E leai se alii po o se tamaitai o loo tausia le Upu o le Poto e mafai ona maua se mea sese e uiga i lea mea. Aisea, aua ua latou iloa le soifua maloloina ua latou fiafia ai, ua latou iloa le toafilemu, le olioli, le mafanafana, le faamalieina lea e oo atu i o latou loto pe a latou faia le mea ua finagalo le Alii latou te faia.¹¹

E matuai leai lava se mea taua e maua e soo se tagata soifua i lona solia o le Upu o le Poto, peitai o loo i ai le taua ma le aoga mo lona lava lelei, i lona tulaga i le mafaufau, i le atamai, malosi, faaletino faapea foi i le tulaga faaleagaga, i le usiusitai i ai.¹²

O le tulafono o le ola ma le soifua maloloina i le Au Paia o Aso e Gata Ai, o le usitai lea i le Upu o le Poto.¹³

O i latou o e le usitaia le Upu o le Poto e vaivai faaletino ma le faaleagaga.

Pe e te faatali ea e mafaufau i le Foafoa o le lagi ma le lalolagi, le Foafoa o mea uma ua tatou vaaia i lenei atulaulau maoae, o le Tama o o tatou agaga, o le Tama o lo tatou Alii o Iesu Keriso i le agaga ma le tino, ua talanoa mai ia i tatou, ma ua ia tuuina mai ia i tatou lapataiga ma fautuaga e taitaiina atu ai i tatou i lona afioaga, ma o le a tuuina mai ai ia i tatou le malosi i le tino ma le mafaufau?

Ua faitau selau, ma faitau afe i latou faatasi ma le Au Paia o Aso e Gata Ai ua tuuina mai i ai e le Alii le Atua Silisili Ese se molimau ma se malamalamaaga o loo soifua o ia, o se malamalamaaga o Iesu o le Keriso, o se malamalamaaga o Iosefa Samita o se Perofeta a le Atua moni soifua, ma o le na te mafai ona tuuina mai lena molimau ma molimau mai e uiga i lea mea i lou atunuu ma atunuu i fafo, o e ina ua tau atu e le Alii le Atua Silisili Ese, o le Foafoa o le lagi ma le lalolagi, ia i latou le mea e lelei mo i latou, i le faaletino ma le faaleagaga, ma tusia nei mea i se tusi, ua latou mumusu e faalogo atu i ai. Ou te faamalie atu i lou faapea atu, o le aso ua toatele atalii ma afafine o le Au Paia o Aso e Gata Ai—o nisi o atalii ma afafine o alii ma tamaitai e taitai i lenei Ekalesia, o e o loo faia ni faatasiga faafiafia ma ua latou manatu ua faaalia ai se agaga faasamasamanoa ma taliaina e inu uaina ma inu lauti ma kofe ma taaalo pele, ma faia mea ua uma ona aoaoina ai i tatou e le lelei mo i tatou. O le a ou faitauina atu ia te outou se tusi mai le Alii i le Au Paia o Aso e Gata Ai. [Ina ua uma ona tuuina atu lenei saunoaga, sa faitauina atu loa e Peresitene Grant le Mataupu Faavae ma Feagaiga 89.]¹⁴

O le tiapolo sili i lenei taimi o le leai lea o se ola mama. Ua na o le tasi lava le tulaga faatonuina o le olaga nei i totonu o le Ekalesia a Keriso. O le faitau afe o i tatou o e na ola ae i totonu o le Ekalesia a o tatou laiti, ua aoaoina o le agasala e pito atu i le fasioti tagata faamoemoeina o le aveesea lea o lo tatou ola mama; ma ou te fia fai atu i tama ma tina, faapea ma atalii ma afafine, i a tatou Peraimeri, i le Au Talavou Laiti, i a tatou seminare ma inisititiuti, i Aoga Sa, i totonu o Aualofa, ma korama uma o le Au Perisitua—Ou te manao ia malamalama o le faaaogaina o le ava malosi ma le tapaa o le tasi lea o auupega sili o loo i lima o le tiapolo e mafai ona ia taitaieseina ai tama ma teine mai le ola mama.

E toeitiiti lava o i latou o e ua aveesea lo latou ola mama e muamua ona latou tofo i na mea e faaosoina ai le tuinanau i totonu o i latou pe faaitiitia ai lo latou malosi e tetee atu ma faapogisa ai o latou mafaufau. … O alii ma tamaitai talavou o aso nei, o e ua manatu ua latou atamamai e ala i le aveina atu o sina uaina itiiti ma sina ava malosi ititi i totonu o o latou aiga, ma le faia o mea ua faailoa mai e le Alii ia i latou e le tatau ona fai, ua latou faataatitia ni faavae o le a taitaiina atu ai i latou lava i le faafanoga. E le mafai ona latou solia pea poloaiga a le Alii e aunoa ma le le oo atu i puapuaga. O a la ia puapuaga? O puapuaga o le inuina o sina ava malosi [e masani] ona oo atu ai ina faatetele le inu ava, ma o le tele o le inu ava e oo atu ai i le faatamaiaina o le tino ma le mafaufau ma le faatuatua.¹⁵

Pe a osofaia e faamai le tino o se tagata ua tumu i le tapaa ma tumu i le ava malosi, po o se tasi ua tausalaina i le maoae o le faaaogaina o le ava malosi, tapaa, lauti, kofe ma isi lava mea, ae le tausia lelei lona tino faaletino, i soo se tulaga lava o le olaga, o le a leai sana aia mo nei folafolaga [tagai i le MFF 89:18–21].¹⁶

O tagata uma o le Au Paia o Aso e Gata Ai e mafai ona latou tausia le Upu o le Poto, faatasi ma le fesoasoani mai o le Alii.

E leai se meaalofa, leai se mana, leai se malosi, leai se taleni ua faaee mai e le Alii ia te au, o le a le mafai ona Ia le fesiligia ai au e lipoti atu; ma ua ia faaeeina atu i alii uma, tamaitai ma tamaiti o le Au Paia o Aso e Gata Ai le mana ma le malosi e tausia ai le Upu o le Poto.¹⁷

“O le Upu o le Poto, mo le lelei o le fono o faitaulaga sili, ua faapotopotoina i Katelani, atoa ma le Ekalesia, faapea foi le Au Paia i Siona—

“Ia auina atu ai i alofaaga; a e le o poloaiga po o faamalosiaga—“

Ua fai mai nisi, “Oi, e mafai ona ou aloese mai le usitaia o lea tulaga. E le o tuuina mai i se poloaiga po o se faamalosiauga.” O le a lea mea? O le a ou tauina atu ia te outou lea mea—

“ae o le faaaliga ma le upu o le poto, o loo faaali atu ai le faatulagaga ma le finagalo o le Atua.” [MFF 89:1–2.]

Soo se tasi lava o outou o loo solia le Upu o le Poto, aua nei outou taumafai e faatoafilemuina o outou mafaufau ina ia outou le lagona le tausalaina pe a faaali mai e le Alii i luma lana faatulagaga ma lona finagalo.¹⁸

I se tasi Aso Sa, sa ou auai atu ai i se sauniga lotu anapogi i le taeao, ma se tasi i le afiafi. O se tasi o failauga i le sauniga i le afiafi o Tuafafine Anna Snow. …

Sa malaga mai o ia mai Siketinavia ma mai lona laitiiti sa gauai atu ai o ia i le faaaogaina o le kofe, sa ia manatu o le a faigata ona ia ola e aunoa ma le kofe. Ae mulimuli ane, ina ua atoa le valusefulu lua o tausaga o lona soifuaga, sa popole o ia ona ua le mafai ona ia faia lona tiute e faatatau i lea vaega ma filifili ai, o lona aso fanau e atoa i ai lona valusefulu tolu tausaga, o le a ia matuai tausia atoatoa ai loa le Upu o le Poto ma tuu loa le inu kofe. Toeitiiti lava a uma ai lona ola, peitai mulimuli ane sa faamanuiaina o ia i le lafoaia o lea masani. A o ia tulai ma le lotomaualalo i luma o tagata, ma tautau atu lona toilalo i le le tausia atoatoa o le Upu o le Poto, ma faailoa atu lona loto faafetai i le Alii mo le tuuina atu ia te ia o le malosi, e faaleleia ai lona toilalo, e ui lava ina ua matua o ia. Sa ia molimau mai i faamanuiaga ua ia maua ona o le faaleleia o lona soifua maloloina e ala i le usitaia o lenei tulafono a le Atua.

Sa matuai ou lagona le ootia i lana molimau matagofie. Ou te moomoo i o tatou tuafafine lelei taitasi uma lava, faapea foi i uso, o e, i lea tausaga ma lea tausaga, ua latou solia lenei poloaiga faigofie a le Alii, maimau pe ana outou i ai iina ma faalogologo i lana molimau.

Ou te iloa le toatele o tagata maoae ua faafofoga i lauga e faatatau i le Upu o le Poto mo le tele o tausaga, ua latou le faia lava se suiga mo i latou lava. Ou te matuai le iloa pe mafai faapefea ona tatou faia se suiga mo nisi tagata. Ou te iloa le toatele o ni tagata taitoatasi o e sa galulue faatasi ma le filiga faalilolilo, faapea foi ma le aoao atu ma le aoai atu faalauaitele. Ae o nei galuega sa leai se taua ia i latou. Ou te lagona i lou loto, o lou tiute le taumafai e saili itu ou te vaivai ai i lou olaga, ona ou tatalo atu lea i le Alii e fesoasoani mai ia te au ina ia ou foia ia vaivaiga. Ao ou faitauina le Upu o le Poto, sa ou aoao ai e faatatau i e vaivai ma e sili atu ona vaivai, o e ua i ai pe ua mafai ona taua o le Au Paia [tagai MFF 89:3]. Ma ou te talitonu o le a mafai ona avea o se fesoasoaniga matagofie i le faaalualuina i luma o le malo o le Atua pe afai o le a usitaia uma e le Au Paia o Aso e Gata Ai lenei poloaiga faigofie a le Alii. Ina ua ou faalogo atu i lenei tuafafine matua o molimau i tausaga mulimuli ane ua mafai ona ia foia, ou te moomoo maimau pe ana mafai e tagata uma o le Ekalesia ona faalogo i lea molimau ma ootia ai.¹⁹

E leai se alii po o se tamaitai o le Au Paia o Aso e Gata Ai, e le mafai ona tausia le Upu o le Poto pe afai latou te o ifo i o latou tulivae … ma tatalo atu i le Atua mo se fesoasoani.²⁰

Fautuaga mo Suesuega ma Talanoaga

O a ni auala e aafia ai lo tatou usiusitai po o lo tatou le usiusitai foi i le Upu o le Poto i la tatou sailiga o le malamalama? lo tatou mafai e maua ai faaaliga a le tagata lava ia? lo tatou agavaa e ulu atu i le malumalu? lo tatou malosi faaletino?
O a ni auala e mafai ai e le usiusitai i le Upu o le Poto ona faateleina o tatou manuia, i le faaletino ma le faaleagaga? Aisea e faigata ai e tagata taitoatasi ona maua le fiafia moni pe afai latou te le amanaiaina le upumoni o le Upu o le Poto?
E mafai faapefea ona avea le le usitaia o le Upu o le Poto ma mea e taitaiina atu ai i le aveesea o le ola mama?
Afai o loo feagai se tagata i le taimi nei ma ni faafitauli i le usitaia o le Upu o le Poto, o le a se mea e mafai ona ia faia e maua ai le malosi e tausia ai lenei poloaiga?