Mataupu 11

Perisitua, “o le Mana o le Atua soifua”

O i latou e umia le Perisitua o e ola i mataupu faavae o le amiotonu, e mafai ona avea ma meafaigaluega i aao o le Alii mo le auaunaga i isi.

Mai le Soifuaga o Heber J. Grant

“Ole a le galo ia te au le mea na tupu, ” na faapea mai ai Peresitene Heber J. Grant, “na talosaga mai se uo ia te au, ina ua ia iloa ma sa faailoa mai e le fomai, ua mai tigaina lona afafine i se mai pipisi o le faai e afaina ai lana manava, ma o le a oti ae le oo i le taeao. Sa ia talosaga mai ia te au ou te tatalo mo lena afafine, ma ina ua ou alu ese mai lona ofisa, na ou tatalo ma le malosi uma o lou agaga i le Atua ina ia manuia lena teineitiiti. A o ou tatalo, na oo mai ia te au le musumusuga: ‘O loo i ai i le lalolagi le Mana o le Atua soifua. O loo i ai iinei le Perisitua. Faavave! Faavave! … Alu e taofi le mana o le fili faaumatia, ma o le a ola le teineitiiti.’

“O le fomai na vaaia lena teineitiiti, na faapea mai e le aulia e le teineitiiti le taeao; a e ina ua o’o mai le taeao, sa ia faamatalaina ua le malamalama o ia i le mea na tupu, ma ua ia talitonu o le a faasolo ina manuia le teineitiiti. Sa le mafai e ia ona taofi lona maofa i le suiga i le tulaga o le mai o le teineitiiti na i ai i le po. O le mana o le Atua soifua na taofia le fili faaumatia.”¹

Sa fiafia Peresitene Grant i musumusga na ia maua i lena po: Ua i ai le mana o le Atua soifua i le lalolagi. Ua i ai iinei le Perisitua.” I ana saunoaga i konafesi aoao, e tele ina ia aoaoina ai le Au Paia e mafai ona latou maua faamanuiaga i le mana ma le pule o le perisitua.

O Aoaoga a Heber J. Grant

Ua toefuata’i mai ki, o le pule, o sauniga, ma meaalofa o le perisitua.

A o faagasolo le faaliliuina [o le Tusi a Mamona], na iloa e Iosefa Samita o le mataupu faavae o le papatisoga sa aoaoina ma faataunuuina e tagata o Sa Nifae. O lona naunautai ina ia faaopoopo lona malamalamaaga i lenei mataupu faavae, na ia faia ai e pei ona ia faia foi muamua, sa la o atu ma Oliva Kaotui lana tusiupu, i le togalaau, ma tatalo faatauanau ai. Na ia tusia ma tuuina mai i ana lava upu le tala lenei:

“A o ma tatalo ma valaau atu i le Alii, sa oo ina oo ifo mai le lagi se avefeau i se ao malamalama tele, ma faaee ona lima i luga o i maua, ma a o faaee ona lima i luga o i maua, sa ia faauuina i maua ma faapea mai:

“ ‘I luga o oulua ou uso a auauna e, i le suafa o le Mesia; ou te faaee atu le Perisitua o Arona, o lo o i ai ki o galuega a agelu, ma le talalelei o le salamo, ma le papatisoga i le faatofuina mo le faamagaloina o agasala; e le toe aveesea lava mai le lalolagi seia toe faia e le fanauga a Levi se taulaga i le Alii i le amiotonu.’

“Sa tau mai e lea avefeau na oo mai ia i maua i lea aso ma faaee lea perisitua i o maua luga, o lona igoa o Ioane, o ia lava lea ua taua i le Feagaiga Fou, o Ioane le Papatiso, ma ua ia faia ia mea i lalo o le taitaiga a Peteru, ma Iakopo, ma Ioane, o e o lo o i ai ki, o le perisitua Mekisateko, ma o le perisitua, lea na ia fai mai o le a oo mai le aso o le a tuuina mai ai ia i maua.” [Tagai i le Iosefa Samita—Talafaasolopito 2:68–69, 72.]

Faatasi ai ma lenei faauuga, ma le toefuataiina mai o le perisitua Mekisateko na mulimuli ane ona faaeeina e pei ona folafolaina mai, o le atoaga o ki ma le pule o le Perisitua a le Atua Silisiliese, sa leiloa mo le tele o seneturi, ua toefuataiina mai ma o lo o i ai pea lea i le Ekalesia i le taimi nei i se faasologa e lei toe motusia.

Faatasi ai ma le toefuataiina mai o le perisitua ua matala le auala mo le talaiina atu o le Talalelei, o le faia o sauniga faatatau i le Talalelei, ma le faatulagaga o le Ekalesia.²

Ou te iloa e leai ni meaalofa po o ni mea foaifua, leai foi se alofa tunoa, leai se pule sa i ai i aposetolo a le Faaola i le taimi sa i ai o Ia, e le o i ai nei i le nuu o le Atua.³

Ou te molimau atu ia te outou i le aso nei ua ia i tatou le upu moni, ua toe fetalai mai le Atua, so o se meaalofa, so o se alofa tunoa, so o se mana ma so o se faaeega paia na oo mai e ala mai i le Perisitua paia a le Atua soifua i aso o le Faaola, o loo tatou aeae ai nei. Ou te alaga fiafia aua ua ou iloa, o nei mea e ao ona tatou olioli ai—o faamanuiaga, o le mana faamalolo o le Atua Silisiliese, o musumusuga a Lona Agaga e mafai ai e alii ma tamaitai ona maua faaaliga mai ia te Ia, o musumusuga a le Agaga o le Atua e mafai ai e tagata ona tautala i gagana eseese ma le faamatalaga o gagana, ma le alofa tunoa ma meaalofa taitasi—o loo aeae ai nei le Au Paia o Aso e Gata Ai i aso nei.⁴

O le mana faamalolo o le perisitua o lo o i ai i le Ekalesia.

Ou te iloa o le mana faamalolo o le Atua Silisiliese o lo o i ai i le Ekalesia. Ou te iloa ana leai le mana faamalolo o le Atua semanu ou te le maua le avanoa e tulai atu ai i outou luma i le aso nei. Ou te iloa o lo o i ai ni tagata soifua, o ni faataitaiga o le mana o le Atua o lo o i ai i lenei faatasiga. Pe ana i ai sa tatou faamaumauga o lo o tusia ai faamanuiaga matagofie a le Alii na o’o mai e ala mai i le Perisitua talu le faavaeina o le Ekalesia i luga o le fogaeleele, e mautinoa e tele atu ia faamaumauga nai lo le Feagaiga Fou.⁵

I se tasi o taimi a o pule lou uso [uso fai] o Iosefa Ailama Grant … i le nofoaga e tausi ai solofanua ma taavale solofanua mo le faaaogaina e maua ai tupe …, e i ai nisi o tagata faigaluega o le fale faiseevae o le Z. C. M. I. na fiafia i se tafaoga. … [o Iosefa, ] sa i ai le tiute o le vaaia o taavale e feoai ai, sa ia valaau atu ma lapatai atu o lo o i ai se afa o loo loma mai ma ua ia fautuaina i latou ia toe foi atu i o latou aiga, ma sa faapea atu o lo o i ai le popolega e ono mafuli le taavale solofanua i le afa i le pogisa. A e sa latou malilie o le a latou le tuua’ia le kamupani pe a tupu mai se faalavelave.

Ina ua latou toe foi atu i le fale i le pogisa, sa mafuli le taavale ma sa i ai ni tagata na ogaoga o latou manu’a. O se tasi o tamaitai na gaui ona ponaivi ma ona o ia manu’aga ma le fetaui ma le afa malulu, o lea sa maua ai o ia i le niumonia. Sa faapea mai le fomai sa vaaia o ia, e le mafai ona ola, ma e ono maliu o ia ao lei o’o i le taeao. Na lagona e [Iosefa] le pagatia ona o le mea ua tulai mai, ona o ia sa avea le taavale. Sa talosaga mai o ia ou te alu atu ma te o e faamanuia lena tamaitai, ma sa ia faapea mai na ia maua se molimau a le agaga e tatau ona ola o ia.

Ina ua ma o’o atu i le moega, sa ou fai atu ia Iosefa Ailama Grant, ua vaivai o ia ma o le a oti a e lei aveesea o ma lima mai lona ulu. Sa sesega o ia ma sa ia folafola mai sa ia maua se faaaliga a le Alii, ma ua ia iloa, e pei ona ia iloa le moni o le talalelei, afai ma te faamanuiaina o ia o le a ola lava. Na ma faamanuiaina o ia, ma i le faamauina o le faauuga na uunaiina au e folafola atu ia te ia o le a toe sosolo lelei ona ponaivi, o le a toe malosi mai o ia ma toe foi atu e faaaoga lana masini i le fale faiseevae o le Z. C. M. I.. Ou te lei iloaina sa galue o ia i se masini ae pe o le a foi lana galuega. I lena po na ou feiloai atu ai i le pule o lena fale faiseevae ma sa ia faapea mai: “O lea faatoa ou foi mai le fale o Marie DeGray, ma ua vaivai lava o ia. Ou te iloa ua maliu nei o ia.” Na ou fai atu: “Le Uso e, Rowe, alu i lou ofisa, nofo i lalo ma tusi faapea: ‘E lei maliu Marie DeGray. O le a le maliu Marie DeGray, a e o le a manuia o ia ma toe foi mai ma galue i lana masini i lo outou fale faiseevae.’ Na faaali mai ia te au e le agaga o le Atua soifua” Na ia faapea mai: “Ou te le tau tusia lena mea, aua o lau tala ua fai mai, ua ou iloa ai o le a ola o ia.”

Ona ia tau mai lea ia te au se mea na tupu i lona lava aiga. Na faapea mai o ia: “I Lonetona, a e ou te lei sau i lenei atunuu, na mai tigaina ai le isi ou afafine, ma na faapea mai le fomai na vaaia o ia e le aulia e ia le taeao.” Ou te manatua, na ia aami, i le tolu maila i le aai tele o Lonetona, ia Junius F. Wells ma lana soa ina ia o mai ma faamanuia lona afafine, ma na toe faafoisia lona malosi. “I le aso na sosoo ai, ” na faapea mai ai le uso ia Rowe, “na oo mai le fomai i lou fale ma tuu mai ia te au se pepa faamaonia sa tusilima, ua maea ona saini, o loo ta’u mai ai ua maliu lou afafine. Sa ou valaaulia o ia e susu mai i le potu malolo ma sa ou faafeiloai atu o ia i le tino‘maliu.’ O le mea la lea, ina ua e tau mai ia te au o le a toe malosi lenei tamaitai, na ou taliaina lau tala, aua ua ou iloa o loo i ai le mana faamalolo o le Atua i lenei Ekalesia, e pei lava ona ou iloa o lo o ou ola.”⁶

O le taialaina e mataupu faavae o le amiotonu, e mafai ai e i latou e umia le perisitua ona faaaogaina mana o le lagi.

E le o se mea faatauvaa le umia o le Perisitua a le Atua—le i ai o le aia tatau e faaaoga ai mana o le lagi mo le lelei.⁷

Faatatau i le pule o le Perisitua a le Atua ma le auala e faaaogaina ai: O le Perofeta a le Atua soifua na falepuipui i le falepuipui i Liperate ma na mananao le toatele o tagata ina ia faamasinoina o ia ma fasiotia; a e e le mafai e faitotoa o falepuipui uma i le lalolagi ona taofia faaaliga o mafaufauga ma le finagalo o le Atua e o’o mai ia i latou o e agavaa e mauaina faaaliga; ma a o i ai o ia i le falepuipui i Liperate na mauaina ai e le Perofeta o Iosefa Samita le tasi o faaaliga aupito sili mai le Atua o lo o maua i totonu o le Mataupu Faavae ma Feagaiga. Ou te faitau mai le Vaega 121:

“E eleelea le vai o lo o tafe seia afea? Po o le a ea le mana e taofi ai le lagi? E tusa lava pe ana faaloaloa atu e le tagata lona lima vaivai e taumafai e taofi ai le vaitafe o Misuri mai lona ala faatonuina pe toe faafoi ae lona tafe, pe ana ia taumafai e taofia Le Silisiliese mai le liligiina ifo o le malamalama mai le lagi i luga o le Au Paia o Aso e Gata Ai.

“Faauta, e toatele e ua valaauina a e toaitiiti e ua filifilia. E le filifilia foi i latou i se a?

“Aua ua faapea ona manumanu o latou loto i mea o lenei lalolagi, ma manao i viiga mai tagata, latou te le aoaoina lenei aoaoga e tasi—-

“O aia tatau a le Perisitua e faafesootaiina e le mavavaeeseina ma mana o le lagi, e le mafaia foi ona faatonuina pe faaaogaina ia mana o le lagi, tau lava o mataupu faavae o le amiotonu.

“E moni lava e mafai ona tuuina mai ia i tatou; a e pe a tau ufiufi a tatou agasala, pe faamalie lo tatou lotomaualuga; lo tatou fia sili le aoga pe faatonuina pe pulea pe faamalosia i agaga o le fanau a tagata, i so o se faiga lava o le amioletonu, faauta, e punitia lava le lagi; e tiga le Agaga o le Alii; pe a aveeseina foi, Amene i le perisitua po o le pule a lena tagata.

“Faauta a e lei iloa e ia ua tuu lava o ia ia te ia lava, e a’a i tui e faasaua i le Au Paia ma faasagatau i le Atua.

“Ua aoaoina i tatou i mea tiga e masani ai o le natura ma le uiga o le toatele o tagata, pe a latou maua sina pule itiiti e pei ona latou manatu ai, latou te amata loa ona faaaoga le pulega le tonu.

“O lea, e toatele e ua valaauina ai, a e toaitiiti e ua filifilia.” [MFF 121:33–40.]

Ou te fia faamamafa atu le vaega o lo o totoe o lenei faaaliga, na tuuina mai i le falepuipui. Faatasi ai ma le mana o le Setete o lo taumafai e aveese mai le saolotoga o Iosefa Samita, na le mafai ona latou taofia fesootaiga a lena perofeta ma le lagi, ma na ia maua upu musuia nei e le tatau ona faagaloina e soo se epikopo po o soo se peresitene o se siteki, po o soo se aposetolo, po o soo se peresitene o le Ekalesia pe a latou umia se tofiga i totonu o lenei Ekalesia:

“E le tatau ona faatumauina se mana po o se uunaiga a le pule o le perisitua, tau lava o le tauanau atu, i le faapalepale, le agalelei, ma le agamalu, ma le alofa moni;

“I le agalelei ma le malamalama mama, e matua faalauteleina ai le agaga e aunoa ma le pepelo, e aunoa ma le faaoleole—-

“I le aoai faamalosi atu i aso e tatau ai, pe a uunaiina e le Agaga Paia; a e faaali atu mulimuli le alofa faateleina i le ua e aoaoina ina nei fai oe e ia ma ona fili;

“Ina ia na iloa ai o lou faamaoni e sili atu ona malosi i lo noataga o le oti.

“Ia tumu foi lou loto i le alofa atu i tagata uma, ma le aiga o le faatuatua, ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.

“E avea le Agaga Paia ma au aumea tumau, ”

E sili atu nai lo le oa o le lalolagi atoa le avea o le Agaga Paia ma a tatou soa tumau.

“A o lou tootoo ma tootoo le feliuliuai o le amiotonu ma le upu moni; o lou malo foi o le a faia ma malo faavavau e aunoa foi ma faiga faamalosi o le a tafe ia te oe e faavavau faavavau lava.” [MFF 121:41–46.]⁸

Sa ou talanoa atu i le Au Paia o Aso e Gata Ai, e leai se faaaliga i totonu o le Mataupu Faavae ma Feagaiga ua sili atu ona ou faitau soo mai ai nai lo le faaaliga o lo o i totonu o le Vaega 121 … e pei o le “E le tatau ona faatumauina se mana po o se uunaiga e le pule o le Perisitua, tau lava i le tauanau atu, i le faapalepale, le agalelei ma le agamalu, ma le alofa faamaoni.”

E leai se tulaga matautia o se Perisitua faapea—o le agalelei, ma le agamalu, ma le alofa faamaoni. A e a faaaogaina loa le pulepule tutu, po o le pule saua, po o le pulea faamalosi i agaga o le fanau a tagata, i soo se faiga lava o le amioletonu, faauta, e punitia lava le lagi; e tiga le Agaga o le Alii; pe a aveeseina foi, “Amene i le perisitua po o le pule a lena tagata.” O fetalaiga ia a le Atua.⁹

Pe se mea matautia ea le faaaogaina o le perisitua a le Atua soifua i le auala ua faatulagaina mai e le Alii: “I le agalelei ma le agamalu”? Ua na o le pau lena o le auala, ma pe a fai e le faaaogaina i lena auala, Amene i le perisitua po o le pule a i latou o e umia lenei perisitua i totonu o le Ekalesia a Keriso.¹⁰

O tagata o e o lo o i ai le Perisitua e le tatau ona faaaogaina lea mo le faateleina o lo latou lava mana. … Pe afai latou faia lena mea, o le a latou le maua le agaga o le Alii ma o le a latou moomoo atu i mea o lenei lalolagi ae le o mea tau le Atua.¹¹

E le mafai ona tatou mafaia se mea, e pei ona faamauina i lena faaaliga, sei iloga lava tatou te faaaogaina i le alofa ma le agalelei ma le agamalu—alofa faamaoni. Faatasi ai ma le fesoasoani a le Alii o le auala tonu lena e tatau ona ou galue ai, i le mafai aupito sili ou te mafai ai le Perisitua a le Atua ua oo mai ia te au.¹²

Fautuaga mo Suesuega ma Talanoaga

O a ni auala ua faamanuiaina ai oe ma lou aiga e ala i le faaaogaina o le perisitua?
E mafai faapefea ona tatou faailoa atu le faaaloalo mo le perisitua? E mafai faapefea ona tatou fesoasoani i tagata o le aiga ia faaaloalo i le perisitua?
O a ni aafiaga ua o’o ia te oe ua faamalosia ai lau molimau e uiga i le mana faamalolo o le perisitua? I taimi o mai ma isi puapuaga, o le a le mea e mafai ona tatou faia e mafai ai ona tatou iloa le eseesega o o tatou lava naunautaiga mai le finagalo o le Alii?
O le a le mea ua e aoaoina mai i le faaaliga o lo o i tototnu o le Mataupu Faavae ma Feagaiga 121:33–46? Aisea e tatau ai i e umia le perisitua ona mulimuli i mataupu faavae o lo o i totonu o lenei faaaliga ina ia galulue ai i le suafa o le Alii? E faapefea ona faaaogaina nei matapu faavae i a tatou fesootaiga uma ma isi?
E mafai faapefea ona faaavanoaina faamanuiaga o le perisitua mo i latou o e le o umia le Perisitua Mekisateko i totonu o latou aiga?