Mataupu 2

O le Misiona a le Perofeta o Iosefa Samita

O le Ekalesia a Iesu Keriso o le Au Paia o Aso e Gata Ai o loo mautu le faavaeina i luga o faaaliga a le Atua na tuuina mai e ala mai le Perofeta o Iosefa Samita.

Mai le Soifuaga o Heber J. Grant

Ole molimau a Heber J. Grant i le Perofeta o Iosefa Samita na amataina mai a o laitiiti ina ua faamatala atu e lona tina ma lana uo o Eliza R. Snow ia te ia o laua lava malamalama i le Perofeta. O lana molimau i le Perofeta na tosina mai i molimau a Peresitene Polika Iaga, Ioane Teila, Uilifoti Uitilafi, Lorenisio Sinou, ma Iosefa F. Samita—o alii na masani lelei ma Iosefa Samita. Na saunoa mai Peresitene Grant, “O le molimau a lo’u tina ma le fiaselau o isi na latou iloa le Perofeta o Iosefa, e faapea foi i faaaliga a le Agaga o le Atua ia te au, na ou iloa ai o Iosefa Samita o se Perofeta a le Atua.”¹

I lana auaunaga atoa lava i le avea ai ma se Aposetolo ma se Peresitene o le Ekalesia, sa fiafia ai Heber J. Grant e molimau e uiga i le Perofeta o Iosefa Samita ma le Toefuataiga o le talalelei. Na ia folafola mai: “E leai se tagata ua sili atu le olioli moni e molimau atu i lona iloaina lea o loo soifua le Atua ma o Iesu o le Keriso, ma o Iosefa Samita o se Perofeta a le Atua, nai lo au. Ua ou fiafia ma olioli ai.”²

A o auauna atu ia Elder Grant i le Korama a Aposetolo e Toasefululua, sa i ai se sao o lana molimau i le Perofeta o Iosefa i le faaliliuina o lona uso matua o Feleti [e tama faatasi ae tina eseese], “o le sa le faaeteete, e le kea, ma amio mataga, ma o se tasi foi na faaalia lona le fiafia i le talalelei a Iesu Keriso.”³ Sa i totonu o le Tapeneko i Sate Leki ia Elder Grant i se tasi aso, o loo sauni e tuuina atu se tautalaga, ae ia vaaia loa ia Feleti o ulufale atu i le fale. Na ia toe faamatalaina:

“Ina … ua ou vaai ia Feleti i totonu o le Tapeneko mo le taimi muamua, ma iloa ai o loo ia sailia le Atua mo le malamalama ma le atamai e tusa ai ma le paia o lenei galuega, sa punou lo’u ulu ma tatalo e pei o loo talosagaina au e laugaina le aofia, o le a musuia au e le Alii e ala i le faaaliga a Lona Agaga, ina ia ou tautala atu i se tulaga o le a faailoa mai ai e lo’u uso ia te au sa ou tautala atu e sili atu nai lo lo’u malosi e masani ai, ma sa musuia au e le Alii. Na ou iloaina afai na te tautauina atu lena tulaga, ona tatau lea ona ou faailoa atu ia te ia, ua tuuina atu e le Alii ia te ia se molimau i le paia o lenei galuega.”

Ina ua oo i lona taimi e saunoa ai, sa savali atu ia Elder Grant i le pulelaa ma susue se api e taialaina ai o ia i le lauga na ia sauni e tuuina atu. Ona ia saunoa atu lea i le faapotopotoga, “E le mafai ona ou tauina atu na o le mafuaaga, ae lei i ai se taimi muamua i lo’u olaga ua ou matuai manaomia ai le musumusuga a le Alii e pei ona ou manao i ai i lenei aso.” Na ia “talosagaina le faatuatua ma tatalo a tagata” ma faaauau pea lana olega le leoa mo musumusuga. Ina ua uma ona saunoa atu mo le 30 minute, na ia toe taliu mai i lona nofoaga. Na ia toe manatuaina mulimuli:

“Ina ua ou nofo i lalo ina ua uma la’u lauga, na ou manatuaina la’u api o loo matala pea i luga o le pulelaa. O le susuga a Peresitene George Q. Cannon [Fesoasoani Muamua i le Au Peresitene Sili] sa nofo tonu lava i o’u tua …, ma sa ou faalogo atu o tautala ia te ia lava: “Faafetai le Atua mo le mana o lena molimau!’ Ina ua ou faalogo i lena faamatalaga, sa ou manatuaina na galo ia te au la’u lauga na saunia e fai, ma na maligi ifo loimata mai ou mata e pei o le timu to, ma sa ou punou ifo i lalo ma tuu lo’u ulu i ou lima, ina ia le mafai e tagata o loo i ou tafatafa ona iloa o lea ou te tagi e pei o se tamaitiiti. Sa ou iloa ina ua ou faalogo i na upu a George Q. Cannon na faafofogaina ma tali mai le Atua i la’u tatalo. Sa ou iloaina ai na ootia le loto o lo’u uso.

“Sa ou tuuina atu uma la’u tolusefulu minute e toetoe lava o se molimau i lo’u malamalama o loo soifua le Atua, o Iesu o le Keriso, faapea ma galuega taua ma le ofoofogia a le Perofeta o Iosefa Samita, ma molimau atu i le malamalama ua tuuina mai e le Atua ia te au, o Iosefa Samita e moni lava o se perofeta a le Atua moni o loo soifua.

“O le taeao na sosoo ai, sa sau ai lo’u uso i lo’u ofisa ma faapea mai, ‘Heber, sa ou i ai i le sauniga ananafi ma sa ou faalogologo i lau lauga.’

“Sa ou fai atu, ‘Ou te matea o le taimi muamua lea ua e faalogo ai i lou uso o lauga?’

“ ‘Oi, e leai, ’ o lana tala lea, ‘ua ou faalogo soo ia te oe i le tele o taimi. E tele lava ina ou tuai atu ma ou alu atu i le fogafale i luga. E masani ona ou vave alu i fafo ae lei uma le sauniga. Ae e te lei lauga muamua e pei ona e faia ananafi. Na e tautala e sili atu nai lo lou malosi e masani ai. Na musuia oe e le Alii.’ O upu tonu lava nei na ou taumemumemu ai i le aso ua tuanai, i la’u tatalo i le Alii!

“Sa ou fai atu ia te ia, ‘O e tatalo pea mo se molimau i le talalelei?’

“Sa ia tali mai, ‘Ioe, ma ua ou tau le mautonu.’

“Sa ou fesili atu, ‘O le a le mea sa ou lauga atu ai ananafi?’

“Na ia tali mai, ‘O loo e iloa mea na e lauga atu ai.’

“Sa ou fai atu, ‘Ia, ta’u mai la e oe.’

“ ‘Sa e lauga e uiga i le misiona paia a le Perofeta o Iosefa Samita.’

“Sa ou tali atu, ‘Ma sa musuia au e sili atu nai lo lo’u malosi e masani ai; e te lei faalogo muamua lava ia te au o o’u lauga atu i soo se taimi e pei ona ou lauga atu ananafi. Pe e te faamoemoe e sau le Alii ma se laau e ta ai oe ia e pau? O le a se isi molimau e te manao i ai o le talalelei a Iesu Keriso nai lo se tagata ua tautala atu e sili atu nai lo lona malosi e masani ai ma musumusuga a le Atua, ina ua ia molimau atu i le paia o le misiona a le Perofeta o Iosefa Samita?’

“O le Sapati na sosoo ai na ia talosaga mai ai ia te au mo le papatisoga.”⁴

Aoaoga a Heber J. Grant

Ua toefuatai mai e le Atua le atoatoaga o le talalelei e ala mai i le Perofeta o Iosefa Samita.

O le savali lea a le Ekalesia a Iesu Keriso o le Au Paia o Aso e Gata Ai, o loo soifua le Atua, o Iesu Keriso o Lona Alo, ma sa Laua faaali mai i le taulealea o Iosefa Samita, ma folafola atu ia te ia e tatau ona avea o ia ma tufuga aao o le Atua i le toefuataiina mai o le talalelei moni i le lalolagi.⁵

Ina ua mavae le faasatauroga o [Iesu] faapea ma le maliliu o aposetolo o e na ia filifilia, sa latou oti faamaturo i lima o i latou o e na tetee i upumoni na Ia aoaoina atu, na foliga mai ai ua toilalo lana misiona ma le galuega; ae ina ua tuanai atu aso, ma ua amata ona malamalama lelei ia aoaoga faaKerisiano, sa toe liliu atu ai tagata mafaufau ia te ia o lo latou punavai o le malamalama ma le malosi, ma sa toe tapueina ai le faatuatua i lana misiona ma le galuega, ma iu ai ina avea le faa-Kerisianoina ma aafiaga sili i tagata ma le atinaeina o le lalolagi.

A o tuanai atu taimi sa tulai mai ni feeseeseaiga i le ekalesia anamua. O tulafono na faavaeina e le Togiola e pulea ai le ekalesia, na solia, na suia sauniga, na solia foi le feagaiga fou faavavau [tagai i le Isaia 24:5]. Na amata ona aoao atu e tagata ia aoaoga i a latou lava poloaiga [tagai i le Mataio 15:9]; sa faatuina se ituaiga tapuaiga sa ta’ua o le faa-Kerisiano, ae sa aunoa ma le mana o le Atua lea sa iloga ai le ekalesia anamua. Na ufitia le lalolagi i le pogisa faaleagaga ma ua faapogisaina ai mafaufau o tagata [tagai i le Isaia 60:2].

Ona oo mai ai lea o se vaitaimi taua i le talafaasolopito o le lalolagi. Ua taunuu mai le taimi, na muai faauuina e le Alii, ma muai ta’uina mai e ana perofeta, na tatalaina ai se isi tisipenisione o le talalelei, ina ua toefuataiina mai le talalelei o le malo, ma talaiina atu i le lalolagi atoa, e avea ma molimau i tagata uma a o lei oo mai le iuga.

Ua toe olioli le lagi, ua toe faafesootai mai e avefeau mai le lagi le finagalo o le Tama i lana fanau o e o iinei i le lalolagi, ma na fiafia le tagata ina ua toe tatalaina le Tisipenisione o le Atoaga o Taimi.

O Iosefa Samita le sui na filifilia e le Alii e amataina le galuega ofoofogia i aso e gata ai. Na faaali atu le Tama ma le Alo ia te ia i se faaaliga faalelagi, o ona luga na tuuina atu i ai ki o le perisitua e faavavau, faatasi ai ma le pule e tuuina atu ai i isi, faapea ma le folafolaga e le tatau lava ona toe aveesea le perisitua mai le lalolagi, seiloga ua faataunuuina uma faamoemoega o le Tama.⁶

Sa ou feiloai atu i tagata i le tele o nofoaga o e na suesueina lo tatou faatuatua. O nisi o i latou na talanoa mai: “E mafai ona ou taliaina soo se mea tou te aoaoina mai pe ana leai lava le tagata lenei o Iosefa Samita. Tau lava ina faataatia ese o ia!”

E le mafai ona oo mai se aso tatou te faia ai lena mea. Semanu e tatau foi la ona tatou aveeseina Iesu Keriso, le Alo o le Atua soifua. Pe na vaai Iosefa Samita i le Atua ma sa talanoa ma Ia, ma sa faailoa atu e le Atua lava Ia Iesu Keriso i le taulealea o Iosefa Samita, ma sa tau atu e Iesu Keriso ia Iosefa Samita o le a avea o ia ma tufuga aao o le Atua i le toe faavaeina i luga o le fogaeleele o le talalelei moni a Iesu Keriso—po o le talitonuga faaMamona, e pei ona ta’ua ai, o se tala o le vavau. Ma o le talitonuga faaMamona e le o se tala o le vavau! O le mana o le Atua i le faaolataga. O le Ekalesia a Iesu Keriso, na faavaeina i lalo o Lana taitaiga, ma o ni le talitonu uma o le lalolagi, e le mafai ona suia ai mea moni faavae e faatatau i le Ekalesia a Iesu Keriso o le Au Paia o Aso e Gata Ai.

Soo se tagata o le Au Paia o Aso e Gata Ai, e talitonu na faaali atu le Atua i le taulealea o Iosefa Samita, ma e talitonu uma foi le Au Paia o Aso e Gata Ai na faailoa atu foi Iesu Keriso e le Atua lava Ia i le taulealea o Iosefa Samita: “O Lo’u Atalii pele lenei: faalogo ia te Ia.” [Iosefa Samita—Talafaasolopito 1:17.]⁷

O le faavae atoa o lenei Ekalesia o loo mautu le faavaeina i luga o faaaliga a le Atua na tuuina mai e ala mai le Perofeta o Iosefa Samita.⁸

O le Uluai Faaaliga a Iosefa Samita na faailogaina ai le amataga o se “galuega taua ma le ofoofogia.”

O le mea sili ona mamalu ua tupu i le talafaasolopito o le lalolagi talu mai ona soifua le Faaola lava Ia i le lalolagi, o le fuafuaina lea e le Atua lava Ia e asiasi mai i le lalolagi faatasi ma Lona Alo pele e toatasi, o lo tatou Togiola ma le Faaola, ma faaali atu i le taulealea o Iosefa.⁹

O le mamalu o le Alii na siomia ai Iosefa Samita, ma o le Atua lava Ia, i lona mamalu ma le silisiliese, faatasi ai ma lona Alo Pele e Toatasi, o Ieova, sa faaali atu ia te ia i le faaaliga, ma o lona lava siufofoga na tofia ai Iosefa Samita e avea ma meafaigaluega e auala mai ai le tatalaina o le tisipenisione silisili o le talalelei i tupulaga uma.

E leai se faaaliga faalauaitele faalialiavale, po o ni sauniga mamalu faitele po o ni faatinoga vāvā; sa na o se tulaga faatauvaa, paia, ma le silisili ona mamalu ma faagaeetia e le mafaamatalaina.

O le siufofoga o le Alii, lea na autausaga talu ona le toe i ai, sa toe faalogoina. Na toe tuuina mai ai foi lena savali paia, lea e tuuina mai soo: “O lo’u Atalii Pele lenei. Faalogo ia te ia!” O uiga o le Tama ma lona Alo Pele e Toatasi sa toe faaalia mai ina ia mafai e tagata ona iloa i laua.¹⁰

O le mea na tupu na faailogaina ai le amataga o “se galuega taua ma le ofoofogia, ” lea na muai tauina mai e Isaia le Perofeta [tagai i le Isaia 29:13–14], na faamautuina mai e Tanielu [tagai i le Tanielu 2:29–44], ma toe valoia mai foi e Ioane le Tali Faaaliga [tagai i le Faaaliga 14:6–7]. O le asiasiga mai a le Tama ma le Alo, ma filifilia Iosefa e avea ma taitai o le Tisipenisione o le Atoaga o Taimi, ma faailogaina ai le amataga o lenei galuega, ma na lagolagoina lea e ala i asiasiga a agelu ma isi avefeau paia, ma faaeeina atu i luga o Iosefa o mana o le Perisitua, le pule e galue ai i le suafa o le Atua—ina ia faalauiloa atu le talalelei a Iesu Keriso i tagata e ala i le pule paia, ma na auala mai le taitaiga mai le lagi ina ia faatulagaina ma faavaeina le Ekalesia moni a Keriso i aso e gata ai.¹¹

I le lotomaualalo, ma le malamalama atoatoa i tiutetauave o loo aofia ai, matou te molimau atu ai i tagata o le lalolagi e faapea, o le faaali mai o le Tama ma le Alo i le Perofeta o Iosefa Samita, i le amataga o le tautotogo o le 1820, na amataina ai le tisipenisione sili o le talalelei o taimi uma, o se tisipenisione o le malamalama, na sulugia mai le afioaga o le Atua, ma susulu mai ai i mafaufau o tagata, ma faateleina ai le malamalama ma le atamai, o le mamalu lava lea o le Atua.¹²

O ki o le perisitua na toefuatai mai e ala mai i le Perofeta o Iosefa Samita.

“Matou te talitonu e ao ina valaauina le tagata e le Atua, i le valoaga, ma le faaee atu o lima, o e o i ai le pule, e talai atu ai le talalelei ma faia sauniga o i ai.” [Mataupu Faavae o le Faatuatua 1:5.]

Ma tatou te faasilasila atu i le lalolagi uma … o loo ia i tatou lena pule. Tatou te faasilasila atu o le tagata lava lea na papatisoina le Faaola o le lalolagi, ua iloa o Ioane le Papatiso, na oo mai i lenei lalolagi, ma faaee atu ona aao i luga o ulu o Iosefa Samita ma Oliva Kaotui, ma tuuina atu ia te i laua le Perisitua Arona, po o le Perisitua maualalo, lea o loo i ai le pule e papatiso ai. Ina ua uma ona tuuina atu ia te i laua lenei faauuga, ona ia fai atu lea ia te i laua ina ia papatiso e le tasi le isi o i laua, ma na ia folafola atu foi ia i laua e faapea, e tatau ona asiasi atu Peteru, Iakopo, ma Ioane, o aposetolo a le Alii o Iesu Keriso ia i laua, o e sa tutu i le taitaiga o le Ekalesia ina ua mavae le faasatauroga, ma tuuina atu ia i laua le tofi faaaposetolo, le Mekisateko, po o le Perisitua maualuga.

Tatou te faasilasila atu i le lalolagi uma e faapea na latou oo mai ma ua tatou mauaina lena pule, ma o le le talitonu uma o le lalolagi e le mafai ona suia ai le moni o na asiasiga e lua, —o na faauuga e lua. Afai e moni nei mea, e le mafai e le le talitonu ona suia. Ma tatou te faasilasila atu e moni lava nei mea.¹³

E molimau atu fua o le Toefuataiga i le misiona a Iosefa Samita.

O faamaoniga silisili lava o le paia o le uluai faaaliga, e faapea foi i asiasiga a agelu ma isi avefeau ia Iosefa le Perofeta lea na sosoo mai i le uluai faaaliga, o taunuuga faatino ia na maua mai savali na tuuina mai ma le faaeeina mai o le pule. O le talalelei i lona manino ua toefuatai mai i le lalolagi. O le talafaamaumau ofoofogia o tagata anamua o lenei konetineta, le Tusi a Mamona, na aumaia mai lona nofoaga sa nanaina ai i le Mauga o Kumora, o loo aofia ai se atoatoaga o le talalelei e pei ona aoaoina e le Alii ma le Faaola, o Iesu Keriso, i luga o lenei konitineta o Amerika. Na faatuina le Ekalesia a Iesu Keriso o le Au Paia o Aso e Gata Ai i le aso 6 o Aperila, 1830, i le aai o Feieti, i le Itumalo o Seneka, i Niu Ioka, ma sa uluola …, e ui lava i sauaga ma faigata sa latou feagai.¹⁴

Pe a tatou tutu ma mafaufau i le ofoofogia o le galuega na faia e le Perofeta o Iosefa, o nisi taimi ou te maofa ai pe mafai faapefea e soo se tagata atamai ona vaavaai atu i le olaga o lena tagata, pe mafai faapefea foi ona iloa lona faafalepuipuiina, o le tulieseina, o sauaga, o le valitaina ma faapipii i ai fulufulu o manulele, o le faasalaga i le oti na tuuina atu ia te ia, ona faitau lea i mea ofoofogia o loo i ai i totonu o le Mataupu Faavae ma Feagaiga, e aunoa ma lona le iloa o musumusuga a le Alii i mea na ia faataunuuina.

E le mafai ona ou malamalama pe mafai faapefea e soo se tagata atamai ona manatu e mafai e soo se tagata e aunoa ma le fesoasoani a le Alii ona gaosia le Tusi a Mamona, lea ua silia nei ma le selau tausaga talu ona ia i tatou ma sa lei fesiligia i lena taimi atoa, e ui i tauemuga sa faia e faasaga i ai, a uma lea mafuaaga ona sosoo mai foi lea ma le isi. O le taimi nei, ua tulaga ese ai lava lena tusi, lea na faaliliuina e Iosefa Samita a o avea ai o ia ma meafaigaluega a le Alii. O le faifeautalai silisili lea i aso nei ua tatou maua mo le folafolaina atu o lenei talalelei; e leai se isi mea e mafai ona faatusa i ai.¹⁵

O lenei Ekalesia … o se galuega taua ma le ofoofogia. E leai se isi mea faapea o i ai i le lalolagi atoa, aua o Iesu Keriso, le Alo o le Atua na faavaeina, ma o le faatumutumuga foi lea; aua o Iesu Keriso lava ia na faaali atu i le Perofeta ma Oliva Kaotui, ma isi; ma talu ai o le Atua, ina ua tali mai i tatalo, na tuuina mai i tagata i le lalolagi atoa i mea ua oo atu i ai le Talalelei, se malamalama tupito ma le molimau e faatatau i le paia o le galuega o loo tatou galulue ai.¹⁶

O le mauga o i ai le fale o le Alii ua faatuina i tumutumu o atumauga, ma ua gasolo atu i ai tagata mai atunuu uma [tagai i le Isaia 2:2]. O faamanuiaga a le Alii i luga o a latou galuega na liua ai le toafa ma faafuga mai e pei o se rosa. O nofoaga lafulafua ua olioli ona o i latou. [Tagai i le Isaia 35:1.] Ua faatutuina aai, o punavai ua puna mai ma tuuina atu ai le ola i le laueleele matutu, o musika ma leo o fanau ua lagonaina i vaiaai lea ua autupulaga o i ai le faanoanoa ma le le leoa.

Ua faatutuina malumalu ua faia ai galuega togiola mo le anoanoai o e soifua ma e ua maliliu. …

Pe a toe tepa i tua i le faatuina o le Ekalesia, lea na tupu i ni tulaga sili ona tau leiloa, e pei ona manatu i ai le lalolagi, ma sosoo mai ai ma lona talafaasolopito o sauaga, o le mativa, ma le atuatuvale, pe mafai ea ona faafitia ina ua faataunuuina se galuega taua ma le ofoofogia, ua faataunuuina foi folafolaga a le Alii, ma ua faaalia mai foi lona mana e faataunuuina ai le mea ua fuafua e ona aao?

Ia tuuina atu le mamalu ma le viiga i le Atua lo tatou Tama, e ala ia Iesu Keriso, lona Alo, e faavavau, aua o ia o le mataisau o mea uma.¹⁷

O lenei talalelei a Iesu Keriso lea ua ou taliaina ma ua outou taliaina foi, o le fuafuaga moni lava lea o le ola ma le faaolataga lea na toe faaali mai i le lalolagi. O le talalelei lava lea e tasi na folafolaina mai e lo tatou Alii ma le Matai o Iesu Keriso. …

Ua ou iloa o loo soifua le Atua. Ua ou iloa o Iesu o le Keriso. Ua ou iloa o Iosefa Samita o se perofeta a le Atua. Sa aapa atu lo’u lima. Ua ou tau mai fua o le talalelei. Ua ou ai i ai, ma e suamalie, ioe, e sili atu lona suamalie. Ua ou iloa na filifilia e le Atua Lana perofeta o Iosefa Samita ma tuuina atu ia te ia faatonuga ma le pule e faavaeina ai lenei galuega, ma o le mana ma le aafiaga o Iosefa Samita lea ua lagonaina nei e pei ona folafola mai e le agelu o [Moronae]. O le a tauleleia ma tauleagaina lona igoa i le lalolagi atoa [tagai i le Iosefa Samita—Talafaasolopito 2:33], ae na o e lava e inoino ia te ia o le a tauleagaina ai. O i latou e iloaina o ia, o i latou e iloaina ana aoaoga, latou te iloa sa mama atoatoa lona olaga ma o ana aoaoga e moni lava o tulafono ia a le Atua. …

Ou te toe fai atu: O le talalelei lava lenei na folafolaina mai e lo tatou Alii ma le Matai o Iesu Keriso, aua na Ia foaiina mai Lona soifua i le molimau, ma o soifua o lo tatou Perofeta ma le Peteriaka [Iosefa ma Ailama Samita] na tuuina atu e fai ma molimau i le paia o le galuega o loo tatou i ai. O le faaMamona, e pei ona ta’ua ai, o le talalelei tonu lava lea a le Alii o Iesu Keriso. Na tuuina mai e le Atua ia te au se molimau o nei mea.¹⁸

Fautuaga mo Suesuega ma Talanoaga

Aisea e avea ai se molimau i le Perofeta o Iosefa Samita ma se vaega taua o se molimau o le talalelei?
E faapefea ona tatou mauaina se molimau a le tagata lava ia i le paia o le misiona a Iosefa Samita? O le a se mea ua faamalosia ai lau molimau i le Perofeta o Iosefa Samita?
O le a se eseesega e faia i o tatou olaga i aso taitasi i le i ai lea o se molimau i le Perofeta o Iosefa Samita?
O a nisi upumoni ua e aoaoina e uiga i le Tama Faalelagi ma Iesu Keriso a o e manatunatu i le tala o le Uluai Faaaliga? (Tagai i le Iosefa Samita—Talafaasolopito 2:11–20.) E faapefea ona fesoasoani ia te ia ia iloa na “filifili le Atua lava Ia e asiasi mai i le lalolagi faatasi ma Lona Alo pele e toatasi”?
O a ni auala ua avea ai ia aso e gata ai ma se “tisipenisione o le malamalama”? O a ni faamaoniga o le malamalama ua e vaai i ai i le lalolagi i aso nei?
Aisea na moomia ai ona toefuatai mai le perisitua? O a faamanuiaga e mafai ona tatou ‘ae’ae ai i aso nei ona o le toefuataiina mai o le perisitua?
E faapefea ona ofo mai e le savali o le Toefuataiiga le faamoemoe ia i tatou a o tatou ola ai i se lalolagi fesouaiina?