Mataupu 16

Faamagalo Atu i Isi

O le faamagaloina atu o isi e aumaia ai le filemu ma le olioli i o tatou olaga.

Mai le Soifuaga o Heber J. Grant

Na tusia e Lucy Grant Cannon, o le afafine o Peresitene Heber J. Grant e faapea: “Ia te au lava ia, o se tasi o uiga o [lou tama] e foliga ai o ia ia Keriso, o le mafai lea ona ia liliu atu le isi alafau, o le faia o mea lelei ia i latou o e tuuaifuaina o ia. O le tele o taimi sa fesoasoani ai o ia i se tagata mafatia, o se tagata na muai faitioina o ia, o se tagata na faia ni tuuaiga sese e uiga ia te ia, o se tagata sa lei ola e tusa ai ma tulaga na mulimuli ai ona tuaa. Sa onosai ma faapalepale o ia ia i latou na lafoaiina le Ekalesia ma liliuese mai le faatuatuaga o o latou tama. Sa leai sona foliga e ita i se tagata. E matua ‘ina’ina o ia ma inoino i le agasala, ae tumu o ia i le alofa i le tagata agasala.”¹

Na atiinae malie lava e Heber J. Grant ona uiga faaleagaga, i lona aoao mai i tusitusiga paia, o faiaoga musuia, ma mea na ia oo i ai seia oo lava ina mafai ona ia faapea mai, “E leai ni ou lagona le lelei i soo se tagata soifua.”² I se lauga sa ia tuuina mai i le konafesi aoao ia Oketopa i le 1920, sa ia faamatala ai e uiga i se aafiaga lea na fesoasoani ia te ia e atiinae ai le agaga o le loto faamagalo i lona olaga. O le vaega tele o lenei aoaoga o loo aumaia lea mai lea lauga.

Aoaoga a Heber J. Grant

O le talalelei a Iesu Keriso o se talalelei o le faamagalo atu.

Talosia ia fesoasoani mai le Atua ia i tatou uma taitoatasi ina ia manatua o le talalelei a Iesu Keriso, e le gata o se talalelei o le liuaina, ae o se talalelei foi o le faamagalo atu. Ua tusia, e ui lava ina pei o ofu mumu agasala a se tagata, ae afai o le a salamo o ia, o le a sinasina ia e pei o le kiona [tagai i le Isaia 1:18]. Ou te fiafia tele i lea faaaliga mataina ua faapea mai:

“A o au le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma.” [MFF 64:10.]³

E tele fautuaga ua ou tuuina atu i le Au Paia o Aso e Gata Ai i ou taimi, ma o se tasi o mea muamua lava, e le tatau ona faitioina e se tagata soo se tasi, a o i tatou lava. Ou te talitonu i le vaavaai masei i soo se taimi lava o le aso, taeao, aoauli, ma le afiafi, ae ia tau lava o o tatou masei e vaavaai.⁴

E leai se mea e sili atu ona tatou latalata atu ai i le Agaga o le Alii nai lo le … agalelei atu, ola mafaufau mo isi, agaalofa, faapalepale ma le faamagalo atu. E leai se mea e sili atu ona aumaia ai le olioli tele ia i tatou nai lo le saunia ma le naunautai e faamagalo atu i agasala a o tatou tuaoi e faia mai ia i tatou, ma e leai foi se mea e sili atu ona aumaia ai le tausalaina ia i tatou nai lo le faamaaa pea o o tatou loto ma tiga ma lagona pea le fia tauimasui ia i latou o e ua siomia ai i tatou.⁵

I le Mataupu Faavae ma Feagaiga vaega 64:8–13, tatou te maua ai le vaega lenei:

“Sa sailia ou soo e fai pona o le tasi i le tasi i aso anamua, ae le faamagalo atu le tasi i le tasi i o latou loto; ma ona o lenei mea leaga na puapuagatia ma aoaiina tiga ai i latou:

“O le mea lea, ou te fai atu ai ia te outou, e tatau ona outou faamagalo atu le tasi i le tasi aua o le e le faamagalo atu i lona uso i ana solitulafono, ua tausalaina i luma o le Alii; aua e i ai pea ia te ia le agasala sili ona mamafa.

“Ao au le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma;

“E tatau foi ona outou faapea i o outou loto, ia faamasino le Atua i lo ta va, ma tauia ia te oe e tusa ma au galuega.

“A o le le salamo i ana agasala, ma le tautau atu ai, ia outou aumaia i luma o le Ekalesia, ma faia ia te ia e pei ona tuuina atu ia te outou i tusitusiga paia i poloaiga po o faaaliga.

“Ia outou faia foi nei mea ina ia faamamaluina le Atua, ae le ona ua outou le faamagalo atu ai, ma ona ua le i ai le alofa mutimutivale, ae ina ia tauamiotonuina outou i luma o le tulafono, tou te le tausuai ai i lo outou faitulafono.”

Ma i le vaega 121:45, 46, tatou te faitau ai:

“Ia tumu foi lou loto i le alofa atu i tagata uma, ma le aiga o le faatuatua, ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.

“E avea le Agaga Paia ma au aumea tumau, a o lou tootoo ma tootoo e le feliuliuai o le amiotonu ma le upumoni; o lou malo foi o le a faia ma malo e faavavau, e aunoa foi ma faiga faamalosi o le a tafe ia te oe e faavavau faavavau lava.”

Ou te matua mafaufau pea ma le faaaloalo i lenei faamatalaga mai … le Mataupu Faavae ma Feagaiga.

E oo mai le agaga o le olioli ma le filemu i le taimi tatou te faamagalo atu ai.

I ni nai tausaga ua mavae, na tape ai le igoa o se tasi o alii lauiloa mai le Ekalesia. Sa ia toe talosaga mai i ni nai tausaga mulimuli ane, ina ia toe papatisoina o ia. Na tuuina atu e Peresitene Ioane Teila lenei fesili mo lona papatisoga i le au aposetolo, ma sa faapea atu [i se tusi] afai o le a latou malilie faatasi i lona papatisoga, o le a mafai ona papatisoina o ia, ae afai e i ai se palota se tasi e ese mai ai, o le a le tatau ona faatagaina o ia i totonu o le Ekalesia. Ou te manatuaina le palota, e toalima mo le papatisoina ma le toafitu e le ioe i ai. Pe tusa o se tausaga mulimuli ane, na toe aumaia ai foi le fesili ma e toavalu mo le papatisoina ae toafa e au ese ai. Mulimuli ane, na toe aumaia ai ma e toasefulu mo le papatisoina ae toalua na tetee. Mulimuli ane, na ioe uma le Aufono a Aposetolo e papatisoina lenei alii, ae sei vagana ai la outou auauna faatauvaa, ma i lena taimi, o au le tagata lona lua e fou atu i le korama. I se taimi mulimuli ane, sa ou i ai i totonu o le ofisa o le peresitene ma sa ia saunoa mai ai:

“Heber, ua ou iloa ua malilie aposetolo e toasefulutasi mo le papatisoina o Uso Pai ma Lafai, ” ma [sa ia] ta’u le igoa o le tagata, “ma ua totoe ai lava na o oe. O le a sou lagona pe afai o le a e oo atu i le isi itu, ma e iloa ai sa augani mai lenei tagata ina ia papatisoina, ma e iloa ai, o oe ua taofia ai lona ulufale mai i totonu faatasi ma i latou o e ua salamo mai a latou agasala ma maua o latou taui?”

Sa ou faapea atu, “Peresitene Ioane Teila, afai o le a fesiligia au e le Alii i lena fesili, e mafai ona ou vaai atu ma le faamaoni i fofoga o le Alii, ma tau atu ia te ia, sa ou faia le mea sa ou manatu sa sili ona lelei mo lona malo. … E mafai ona ou tau atu i le Alii o [lena tagata] sa sili ona ia faalumaina le Ekalesia, ma ou te lei faamoemoe lava e toe aumaia lea ituagia tagata i totonu o le Ekalesia.”

Ona saunoa mai lea o Peresitene Teila, “O lea la lou atalii e, e le afaina lena tulaga, ia fai lava le mea e te manatu i ai, ma ia e palota i le mea e te talitonu i ai.”

Sa ou faapea atu, “Peresitene Teila, sa e saunoa mai i lau tusi, e te finagalo i le au aposetolo taitoatasi ina ia palota e tusa ma manatu o lona lava loto. Afai e te finagalo ina ia ou tuuina atu manatu o lou loto, o le a ou faia ma le fiafia; o le a ou palota ma le fiafia i lea alii ina ia toe foi mai, ae afai e tuu mai i lau lava faamasinoga, pe o le a le umi ou te ola ai, ou te le faatagaina lava. Na tuuaia lena alii i luma o le au aposetolo i ni tausaga ua mavae, ma sa ia tulai ma pepelo ma tautino mai lona le sala, ma sa tuuina mai e le Alii ia te au se molimau sa pepelo o ia, ma e le mafai ona ou tausalaina o ia ona o lena mea. Sa ou tootuli i ou tulivae i lena po ma tatalo atu i le Atua ina ia tuuina mai ia te au le malosi ina ia aua nei ou faailoaina atu ai lea alii, i lou iloaina o lona pepelo peitai e lei i ai sa tatou faamaoniga, sei vagana ai le molimau a le teineitiiti lea na ia tauanauina e faia ni feusuaiga faaleulugalii ma ia. Ma ou te tatalo i le Alii, ia i ai se aso e oo mai ai ni molimau faaopoopo, ma sa oo mai lava, ma o lena na matou titinaina ai lona igoa mai le Ekalesia. Ma afai e mafai e se tasi ona olegia le au aposetolo, ma afai e mafai ona faamaonia lana agasala ma ua faapea mai ua salamo mai lea agasala, ou te manatu ua lava le faalumaina o lenei Ekalesia e aunoa ma le toe faatagaina o ia e toe foi mai i totonu o le Ekalesia.”

Sa toe faapea mai foi le saunoaga a Peresitene Teila, alii, aua e te palota e papatisoina o ia, e tusa lava pe o le a le umi e te ola ai, ae afai o i ai na manatu ia te oe, ia e taofi mau pea i ai, ia fai lava le mea e te manatu i ai.”

Sa ou tuua le ofisa o le peresitene. Sa ou alu atu i le fale. … sa ou faitauina le Mataupu Faavae ma Feagaiga ma le maeaea pe tusa o le faatolu pe faafa, ma sa tuu ai lau faailoga tusi i le mea na gata ai lau faitau, sa ou toe aumaia lau tusi, ma ou te le i susueina i le itulau na i ai le faailoga tusi, ae sa ou susueina i le:

“Ao au le Alii, e faamagalo atu i e ou te loto ia faamagaloina, ao outou e ao ina outou faamgaloina atu i tagata uma; aua o le le faamagalo atu i lona uso i ana solitulafono ua tausalaina i luma o le Alii.” [Tagai MFF 64:9–10.]

Ma a o ou tapunia le tusi ma ou faapea ane: “Afai e talosaga mai le tiapolo mo le fia papatisoina, ma tautino mai o ia ua salamo, o le a ou papatisoina o ia.” Ina ua uma taumafataga o le aoauli, sa ou toe foi atu i le ofisa o Peresitene Teila ma faapea atu, “Peresitene Teila, ua i ai se suiga i lo’u loto. O le itula ua tea na ou faapea atu ai, i le taimi atoa ou te ola ai, ou te le faamoemoe lava e faatagaina lena Uso o Pai ma Lafai ina ia papatisoina, ae ua ou sau e tau atu ia te oe, i lou manatu, ua tatau ona papatisoina o ia.”

O le masani a Peresitene Teila, a fiafia o ia i se mea, e saofai ma soisoi ma e gaoioi uma ai lona tino atoa, sa soisoi o ia ma saunoa mai, “Lou atalii e, matuai vave lena suiga, ua matuai vave lava. Ou te fia fesili atu ia te oe. O a ni ou lagona i le taimi na e tuua ai lenei nofoaga i le tasi le itula ua tea? Pe na e lagonaina ea lou fia tamotoina o lea alii ia patatu i lalo?“

Sa ou faapea atu, “O le lagona tonu lava lena sa ia te au.”

Sa ia saunoa mai, “O a ni ou lagona ua i ai i le taimi nei?“

“Peresitene Teila, o le mea moni lava ou te fia tauina atu ia te oe, ou te faamoemoe lava o le a faamagalo e le Alii lea tagata agasala.”

Sa ia saunoa mai, “E te lagonaina le fiafia a ea, pe a faatusa atu i ai. Sa ia te oe le agaga o le ita, ma le loto tiga i lena alii, ona o lana agasala ma le tulaga faalumaina na ia aumaia i luga o le Ekalesia. Ma o lea ua e maua le agaga o le faamagalo atu ma ua e matuai lagonaina lava le fiafia, a ea?“

Sa ou tali atu, “Ioe; sa ou lagona le le alofa ma le inoino a o le taimi nei ua ou lagona le fiafia.”

Ma sa ia saunoa mai: “E te iloa le mafuaaga na ou tusia ai lena tusi?“

Sa ou faapea atu: “Lau susuga, e leai.”

“Sa ou tusia lea tusi, ina ia mafai e oe ma isi uso talavou o le au aposetolo ona aoaoina le lesona, o le faamagalo atu e muamua atu i le faamasinoga tonu, i le mea o loo i ai le salamo, ma ia i ai i lou loto le agaga o le faamagalo atu ma ia aveesea mai i o outou loto le agaga o le inoino ma le tiga, ona aumaia ai lea o le filemu ma le olioli; ma o le talalelei a Iesu Keriso e aumaia le olioli, filemu ma le fiafia i tagata uma e ola ma mulimuli i ana aoaoga.”

Sa faaauau pea ona ia faapea mai. Ou te le manatuaina aoaoga uma, ae sa ia faaauau pea i le ala lenei, i le tauina mai ia te au, e le mafai ona ia tuuina mai ia te au lea aafiaga, e le mafai ona ia tuuina mai ia te au se molimau o le talalelei; e tatau lava ona ou mauaina lea molimau mo au lava ia; e tatau ona ou maua le agaga tonu e oo mai i lou loto ma ia ou lagonaina—le agaga o le faamagalo atu, le agaga o le faapalepale ma le alofa—ona faatoa mafai lea ona oo mai se lelei ia te au lava ia; ma o le tuuina atu o lou loto ia te ia, ma le filifiliga ia papatisoina lenei alii, semanu e le mafai ona ou aoaoina le lesona o le agaga o le olioli ma le filemu e oo mai i le taimi o le faamagalo atu, ma afai e tutumu o tatou loto i le alofa ma le faapalepale mo i latou ua faia ni mea sese. Ma na amata mai i lena aso seia oo mai i le aso nei ou te manatuaina pea na aoaoga.

Na saunoa mai le Perofeta a le Alii [o Peresitene Teila]:

“Lou atalii e, aua nei galo pe a e faamaoni i le faataunuuina o lou tiute, o le a tumu lou loto i le alofa ma le faamagalo atu, e oo i le tagata agasala ua salamo, ma pe afai o le a e se ese mai i le faataunuuina ma le faamaoni o lou tiute, ma e te talitonu o le mea e te manatu o le faamasinoga tonu ma alagatatau ma sao o le mea lea e tatau ona fai, o le tele o taimi e te le maua ai le fiafia. E mafai ona e iloa le eseesega o le Agaga o le Alii ma le agaga o le tiapolo, pe a e iloa ua e fiafia ma toafilemu, ma e alofa atu i ou uso, ma e te manatu popole mo lo latou lelei; e mafai ona e iloa e le o ia te oe le Agaga pe a faatumuina oe i le ita ma e lagonaina lou fia tamotoina o lena tagata ia patatu i lalo.”

O le faamagalo atu o se faailoga lea o le alofa moni.

Ou te manatuaina se tasi o mataupu sili ona matagofie i totonu o le Tusi Paia atoa (1 Kori. 13):

“Afai ou te tautala i gagana a tagata atoa ma agelu, ae leai sou alofa, ua avea au ma apa memea taalili, po o se sumepalo tagitagi.

“Afai foi o ia te au ona perofeta ane, ma le iloa o mea lilo uma, ma le poto uma lava; afai foi o ia te au le faatuatua uma e aveese ai mauga, ae leai sou alofa, ou te le aoga lava.

“Afai foi ou te tufatufaina au mea uma e fagaina ai e matitiva; afai foi ou te tuuina atu lou tino ina ia susunuina ae leai sou alofa, e leai lava sona aoga ia te au.

“E onosai le alofa, e agamalu, e le losilosi le alofa e le mitamita vale le alofa, e le faafefeteina,

“E le amio mataga, e le sailia e ia ana lava mea, e le faaitaitagofie, e le tuuina atu i nisi le leaga;

“E le fiafia i le amioleaga, ae fiafia i le faamaoni:

“E ufiufi i mea uma, e talitonu i mea uma, e faamoemoe i mea uma, e onosai i mea uma.

“E le uma le alofa; ae pe ni perofetaga, e faaleaogaina ia; pe ni gagana, e mavae ia; po o le poto, e faaleaogaina lea.

“Aua ua tatou iloa faaleatoa, ma tatou perofeta faaleatoa.

“Ae peitai pe a oo mai le atoatoa, ona faaleaogaina lea o le mea faaleatoa.

“O ona po na ou itiiti ai, na ou tautala ai faatamaitiiti, na ou manatunatu faatamaitiiti, na ou filifili faatamaitiiti; a ua oo ina ou tagata matua, ona ou tiai lea o mea a tamaiti.

“Aua o ona po nei tatou te vaavaai ai faanenefu i le faata; a o ia ona po tatou te fesagai ai; o nei ona po ou te iloa ai faaleatoa; a o ia ona po ou te iloa tino ai, pei ona iloatinoina o au.

“A o lenei, o tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.”

O le toatele o tagata latou te manatu o le alofa o le tuuina atu o se tala i se tagata; ae peitai, o le alofa moni lava o le tuuina atu o le alofa ma le manatu popole, ma o le ituaiga alofa lena ua faatatau i ai le saunoaga a le aposetolo i totonu o le mataupu e 13 o le Korinito Muamua.

Ou te manatuaina lava ina ua uma lena aoaoga na tuuina mai ia te au, ao avea au ma se tamaitiiti toeitiiti lava avea au o se alii talavou, e le Peresitene o le Ekalesia, na ou faitauina ai lenei mataupu pe tusa o le faatasi i le vaiaso mo sina vaitaimi, ona faitauina faatasi ai lea i le masina mo ni nai masina. Sa ou manatu, sa ou manaomia lea mea i lau pisinisi, mo se faataitaiga; o le tasi nei o mea sa alagatatau mo lou alualu i luma.

E tatau ona tatou taumafai i tatou lava, ia tatou alualu i luma, nai lo le tausalaina o isi.

Ou te manatuaina le tausaga talu ai, iinei i le konafesi, sa ou faitau ai i se pese maoae ma le matagofie, o le afa o le fuaiupu muamua e faitauina faapenei:

Ia taitasi le tagata ma aoao ia iloa ia lava, 
Ina ia maua lena malamalama, e ao ina galue, 
Faaleleia e ia lava ona vaivaiga
Na foi na te tausalaina ai lona tuaoi.

[Tagai “Let Each Man Learn to Know Himself, ” Hymn (1948), it. 91]

… Ou te sii maia foi ni fuaiupu pupuu se fa mai la tatou viiga [ua faaautuina “Pe a Muimui Lou Loto”], e faitauina faapenei se vaega o lea viiga:

Pe a muimui lou loto
I e agamasesei, 
Ia muai sue ifo, 
Pe atoa lo oe lelei.

[Tagai Viiga (1985), it. 159]

Sa leai sou manatu i le taimi na ou sii mai ai nei solo, o le a ou manao e toe sii mai i le aso; ae peitai, talu ai ona o le tausalaina ma le agaga, e toetoe lava o le ita, ma le inoino lea e foliga mai e faaali mai e nisi o tagata o le Au Paia o Aso e Gata Ai, i le taimi nei, e faatatau i mataupu tau i pisinisi ma faaupufai, ua ou naunau ai e faamamafa atu, faatasi ai ma le mana uma o loo i lou nei tagata, le fuaiupu faaiu o lena viiga puupuu … :

Ia e manatua pea, 
Upu uma e te fai, 
Afai sa soona lafo
E toe ulufale mai.

[Tagai Viiga (1985), it. 159]. …

Ou te manao e toe tauina atu le fuaiupu faaiu o [se] viiga sili ona matagofie, sa ou aoaoina i le tolusefulu lima po o le fasefulu tausaga ua mavae, i le taimi na muai usuina ai e Francis M. Lyman [o le Korama a Aposetolo e Toasefululua] ia te au. Sa ou tusia upu o lea pese i lena lava po, ma aoaoina i le aso na sosoo ai. Ou te manao i tagata uma o le Au Paia o Aso e Gata Ai ina ia faaaogaina aoaoga o lenei fuaiupu maoae i o latou olaga, ma afai tatou te faia faapea ou te talitonu o le a tatou tuputupu ae i le alofa ma le alofa mama; ma o le agaga o le filemu ma le fiafia, lea na folafola mai e Peresitene Teila ia te au, ao ou lagonaina le naunautai e taofia se alii i fafo o le Ekalesia, ma o le agaga o le olioli ma le filemu lea na oo mai ia te au, ina ua mavae le suia o le loto, o le a oo mai i le Au Paia o Aso e Gata Ai:

I lau lava faamasinoga, a e iloa ai
E sili atu mea o e faia i isi, 
O lona uiga ua agalelei le Atua ia te oe, 
Ma e tatau foi ona e agalelei atu i isi.
O se faataitaiga lelei ua pei o se sulu
O le malamalama, e moomia e tagata, 
Ia faalelei muamua oe i le aso
Ona faaleleia ai lea o au uo a taeao.

[Tagai Hymn (1948), it. 91]. …

Ou te augani atu i tagata uma o le Au Paia o Aso e Gata Ai ina ia atinaae le agaga o le alofa, onosai, ma le alofa faauso.⁶

Fautuaga mo Suesuega ma Talanoaga

O a ni auala ua avea ai le talalelei a Iesu Keriso ma Ekalesia o le faamagalo atu?
Aisea e manaomia ai lo tatou faamagalo atu o isi? O a nisi o taunuuga o le le manao e faamagalo atu?
Aisea e faigata ai ona faamagalo atu i nisi o taimi? O a ni mea e mafai ona tatou faia e foia ai nei faigata?
O a ni auala e mafai e uiga faamagalo atu o se tagata ona aafia ai i latou o e ua faamagaloina atu?
E faapefea ona avea le faamagalo atu ma faailoga o le alofa?