Mataupu 3

Savali i le Ala e Tau Atu i le Ola Faavavau

A o tatou taumafai ma le faamaoni e ola i le talalelei ma faaautu o tatou olaga i mea a le Atua, o le a faapea ona tatou tutumau ai ma le saogalemu i le ala lea e tau atu i le ola faavavau.

Mai le Soifuaga o Heber J. Grant

I ana lauga i konafesi aoao, e fautuaina soo ai lava e Peresitene Heber J. Grant le Au Paia ina ia tutumau i le ala sao ma le vaapiapi lea e tau atu i le ola faavavau. Na ia lapataia i latou i le matautia o lo latou le iloa o mea e tatau ona faamuamua ma le faatosinaina ese mai mea e silisili le taua. “E mafai ona tatou taofia i tatou mai le mauaina o faamanuiaga a le Alii e ala lea i lo tatou faalagolago tele i mea o lenei lalolagi, ” na ia saunoa ai. “E mafai ona tatou ositaulagaina ia ‘oa o le faavavau—e pei o le fesuiaia o le tala i ni sene apa.”¹

O le tau faapupulaina o le taua o le iloaina ma le sailia o mea e faavavau le taua, sa masani ona faamatalaina e Peresitene Grant se tuafafine faamaoni o le Au Paia o Aso e Gata Ai o le na manatu e “mataga” le ato a [Peresitene Grant] lea e feaveai. Sa moomoo lenei tuafafine maimau pe ana foai atu e se tasi i le peresitene se ato e “manaia ma foliga lelei.” O le mea na te lei iloaina o le tamai atopa’u a Peresitene Grant e matua tele atu se tupe e maua ai pe a faatau ma sa tuuina atu ia te ia e ni ana paaga faipisinisi e avea o se taui o le faaeaina. “Na te leiloaina lona taua, ” sa faamatala ai e Peresitene Grant. I le isi itu, o le ituaiga tamai atopa’u o loo manao ai lea tuafafine o se ituaiga lea e maualalo lona taua. Na faatusatusa e Peresitene Grant le “sese ona fuafuaina o mea” e lenei tuafafine lelei i le tulaga e le o iloa ai e le lalolagi le upumonio le talalelei toefuataiina. “Latou te le iloa le mea moni, ” na ia saunoa ai. “Latou te le iloaina le taua o le talalelei a Iesu Keriso.”²

Na aoao atu e Peresitene Grant: “O le a le talalelei? O le fuafuaga o le ola ma le faaolataga. E sili atu lona taua nai lo le ola lava ia. E leitioa a tatou saunia ma naunau e faia ni osigataulaga mo le talalelei, pe a tatou iloaina lona uiga pe afai tatou te ola ai.”³ O se mataupu faavae taiala lea i lona olaga. E ui i le tele o mea na te mafaia ma mea e fiafia i ai, ae na te lei faatagaina ni mea le taua e popole i ai e faalavelave i lona vaai atu i mea e silisili ona taua. Mo se faataitaiga, o lona tomai i pisinisi na taitai atu ai o ia i le tele o galuega maualuluga. Sa ia fiafia e auai i taaloga faatauva, aemaise lava i le tenisi ma le tapolo. Sa fiafia i tala faatino ma pese. E fiafia e faitau, talisapaia le natura, ma fiafia i fegalegaleaiga. Sa malosi i faiga faaupufai. Sa ia femalagaai i le lalolagi i tiute faale-Ekalesia ma pisinisi, ma e fiafia o ia ma lona aiga i nofoaga ma ni mea fou e oo i ai. O se taunuuga o lana tautua ma lana auaunaga faamaoni, sa ia maua ai le tele o tusi eseese. Ae o ana gaoioiga, tulaga lauiloa, ma le faamanuiaina e le o tosina ese mai ai o ia mai le ala e tau atu i le ola faavavau.

O lana fautuaga e uiga i le savali i le ala sao ma le vaapiapi sa tuusa’o. Sa faigofie lava ona ia aoaoina atu le Au Paia ina ia faia o latou tiute—ia tausia poloaiga. Na ia folafola atu: “Ou te fai atu i Au Paia uma o Aso e Gata Ai: tausi poloaiga a le Atua. O la’u sini lena—na o ni nai upu lava: tausi poloaiga a le Atua!”⁴

Aoaoga a Heber J. Grant

Afai tatou te alolofa i le Alii, o le faamoemoega sili lava o o tatou olaga o le auauna atu lea ia te Ia ma tausi Ana poloaiga.

Tatou te maua i le mataupu e 22 o le Mataio le vaega lenei:

“Ua faalogo le au faresaio ua le mautali ia te ia le au satukaio, ona latou faapotopoto mai ai lea i lea mea.

“Ona fesili faatofotofo mai ai lea ia te ia o so latou, o le aoao tulafono ua faapea mai,

“Le aoao e, o le fea poloaiga o i le tulafono ua sili?

“Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa.

“O le poloaiga muamua lena ma le sili.

“E faapena foi lona lua, E te alofa atu i le lua te tuaoi, ia pei o oe lava ia te oe.

“O na poloaiga e lua ua autu ai le tulafono uma ma le au perofeta.” [Mataio 22:34–40.]

O le umi lava ua ou ola ai, o le tele foi lena ona ou suesueina o le talalelei, o le tele lava o lo’u fesootai atu i tagata, o le malosi foi lena ona faagaeetia o au i le moni o fetalaiga a lo tatou Faaola i upu na faatoa ou faitauina atu nei ia te outou. Afai tatou te alolofa i le Alii lo tatou Atua i mea uma tatou te faia ma o tatou loto atoa, ma o tatou manatu atoa, ma o tatou agaga atoa, o le a le toe manaomia ona uunaiina tagata mai lea taimi i lea taimi i le moomia ona tausia o poloaiga a le Alii. O le a avea ma se fiafiaga ia i latou le auauna atu i le Atua ma tausi Ana poloaiga. Ua tauina mai ia i tatou e faapea o le mea o i ai le oa a le tagata, o loo i ai foi ma lona loto [tagai i le Mataio 6:21], ma afai tatou te alolofa i le Alii ma o tatou loto ma manatu ma agaga atoa, o le a avea le auauna atu ia te Ia ma faamoemoega sili o o tatou olaga, ma o le ‘oa o le a tatou galulue ia mauaina, o Lona alofa lea. Afai tatou te mulimuli i lena poloaiga lona lua, ia alofa atu i le lua te tuaoi ia pei o oe lava ia te oe, … o le a faaleleia o tatou faigata uma i se auala filemu. … E toetoe lava ina tatou [le toe tau] talosaga atu i tagata mo ni foai, tau uunaia i latou ina ia magafagafa, ia loto foai, ia tauivi mo le manuia ma le soifua laulelei o o latou uso a tagata.⁵

A o tatou tausia ia poloaiga, e faamanuiaina i tatou e le Alii ma lagolagoina i tatou i a tatou galuega.

Ua tauina mai ia i tatou e faapea e mate le faatuatua pe a leai ni galuega; e faapei o le tino ua oti pe a te’a le agaga, e faapea foi le faatuatua ua mate pe a leai ni galuega [tagai i le Iakopo 2:17, 26], ma ou te faanoanoa e faapea atu ua tele naua i latou o e ua fai mai o ni Au Paia o Aso e Gata Ai o loo feoti faaleagaga.

O le tele o taimi tatou te fesili ifo ai i lenei fesili, aisea ua alualu ai i luma lenei tagata i le fuafuaga o le ola ma le faaolataga, ae o lona tuaoi, e tutusa o la atamai ma malosi, e foliga mai foi e tutusa ia molimau ma le mana, ma atonu o loo i ai le mana silisili, ae le o alualu i luma? O le a ou ta’uina atu le mafuaaga. O le isi o loo tausia poloaiga a lo tatou Tama Faalelagi, ae o le isi e le o tausia. Na fetalai le Faaola e faapea o le na te tausia ana poloaiga o le tagata lena e alofa i ai, ma o le na te tausia poloaiga a le Atua e alofagia e le Tama, ma na fetalai le Faaola o le a ia alofa foi ia te ia ma o le a ia faaali atu o ia lava ia te ia [tagai i le Ioane 14:21].

O loo tauina mai foi e le Alii ia i tatou e faapea o i latou o e faalogo i Ana fetalaiga ma fai, e faatusaina o ia i le tagata poto o le na fau lona fale i luga o le papa, ona to mai ai lea o uaga, ua oo mai foi tafega, ua agi mai foi o matagi, ua pesi mai i lea fale, ae lei pau lava ia aua ua faavaeina i luga o le papa. I le isi itu, o i latou o e na faalogo i Ana fetalaiga ae le faia, na faatusaina lea i le tagata valea, o le na fau lona fale i luga o le oneone, ona to mai ai lea o uaga, ua oo mai foi tafega, ua agi mai foi o matagi, ua pesi mai i lea fale, ona pau ai lea, ua nutipalaina. [Tagai i le Mataio 7:24–27.] E tele naua ia le Au Paia o Aso e Gata Ai o e o loo fausia o latou fale i luga o le oneone. Ua latou toilalo i le faataunuuina o poloaiga a lo tatou Tama Faalelagi lea e oo mai ia i tatou mai lea taimi i lea taimi e auala mai i ana auauna musuia.

O lenei, afai ua ia te i tatou le Talalelei (ma ua tatou iloa ua ia i tatou), ou te fai atu i tagata uma taitoatasi o le Au Paia o Aso e Gata Ai, o e o loo mananao ina ia alualu i luma ma malolosi i le Talalelei, e tatau ona tausia poloaiga a le Atua. A o tatou tausia ia poloaiga a le Atua ma ola i ni olaga faale-atua, o le a faatumuina i tatou i le agaalofa, faapalepale ma le alofa i o tatou uso a tagata, ma tatou te alualu i luma ma faateleina i mea uma na e avea ai i tatou o ni tagata mamalu faale-atua. Tatou te mauaina foi le alofa ma le faatuatuaina e i latou o loo siomia i tatou. Tatou te tuputupu ae i le agaga o le Atua e ala i nai mea iti tatou te faia i aso taitasi.⁶

Ou te matuai fiafia i le Talalelei a Iesu Keriso lea ua faaalia mai i nei aso, ma ou te naunau ma le faamaoni ina ia ou mafaia, i le fesootai atu i isi Au Paia o Aso e Gata Ai, ina ia faatulagaina lo’u olaga ina ia aua lava ne’i pouliuligia lo’u mafaufau, ia aua ne’i o’u alu ese mai le upumoni, pe solia foi soo se feagaiga na ma osia ma le Alii. Ou te matuai naunau ina ia iloa le mafaufau ma le finagalo o lo’u Tama Faalelagi ma ia maua le malamalama ma le malosi o lo’u tagata ina ia ola ai pea faapea i lo’u olaga. O loo ia te au foi lea lava manao mo le Au Paia uma o Aso e Gata Ai. Ou te talisapaia atoatoa le mea moni lenei e faapea o le tele o lo tatou maelega, faamaoni ma le lotomaualalo i le tausiga o poloaiga a le Atua, o le a Ia faamanuiaina ai i tatou ma lagolagoina i tatou i a tatou galuega; ma o le tiute o tagata uma le sailia ma le faamaoni o le Alii ma aoao i Ona ala.⁷

I le tausiga agalelei a le Alii i soo se tagata e ola i le talalelei a Iesu Keriso e le umi ae mauaina lena mea faapelepele lea ua lauiloa, o se molimau i le tulaga e faavavau o lona natura, o se molimau e tusa ma le paia o le galuega o loo tatou auai.

E i ai tagata o loo faia osigataulaga ia tatou te faia, ae mo i tatou, e le o se osigataulaga ae o se faamanuiaga faapitoa—o le faamanuiaga o le usiusitai, o le faamanuiaga o le ulufale atu i se galuega faapaaga ma lo tatou Tama o i le Lagi ma le mauaina o faamanuiaga silisili na folafolaina mai ia i latou o e alolofa ia te Ia ma tausi Ana poloaiga.⁸

E leai ni pa vaeloto e le mafai ona soloia i lalo pe a poloai mai le Atua ma tatou usiusitai. … Na [saunoa] mai Nifae: “Aua ua ou iloa, e le aumai e le Atua ni poloaiga i le fanauga a tagata, sei iloga na te saunia le ala mo i latou ia mafai ai i latou ona fai le mea ua ia poloaiina ai i latou.” [1 Nifae 3:7.] Ia tatou iloaina lenei mea ma o le tausia o poloaiga a le Atua, o le a aumaia ai le malamalama ma musumusuga a Lona Agaga. O manaoga o o tatou loto o le a i ai o le fia iloaina lea o le mafaufau ma le finagalo o le Alii, ma o le a tatou tatalo mo le malosi ma le gafatia ona faataunuuina, i le mulimuli lea i faataitaiga a lo tatou Alii ma le Matai o Iesu Keriso.⁹

Pe a tatou faia lo tatou tiute ma tuputupu ae i le faatuatua ma le molimau, o le a le mafaia e le tiapolo ona taitaiseseina i tatou.

“O loo sauni le tiapolo e faatauaso o outou mata i mea o lenei lalolagi, ma o le a fiafia lava e faoa mai ia i tatou le ola faavavau, o le meaalofa sili o meaalofa uma. Ae leai se mana o le tiapolo, ma e leai lava se isi mana o le a tuuina atu ia te ia e faatoilaloina ai soo se Au Paia o Aso e Gata Ai o loo tausia poloaiga a le Atua. E leai se mana ua tuuina atu i le tiapolo e faaumatia ai agaga o tagata pe afai e faia lo tatou tiute. Afai tatou te le o faamaoni a’ia’i i le Atua, ona tatou faavaivaia lea o lo tatou malosi e tetee atu ai, ona tatou faaumatiaina lea o se vaega o puipuiga o loo puipuia ai i tatou, ma o le a mafai ai loa ona oo mai le tiapolo. Ae leai se tagata ua leiloa sana molimau o le Talalelei, e leai se tagata ua liliu i le taumatau po o le tauagavale, o le ua i ai le malamalama o le upumoni, o le sa auai atu i ona tiute, o le sa tausia le Upu o le Poto, o le sa totogiina lana sefuluai, o le sa tali atu i valaau ma tiute o lona tofi ma le valaauga i le Ekalesia.

E i ai nisi o loo fesili pea lava e fiailoa po o le a le finagalo o le Alii mo i latou, ma e foliga mai e tau le mautonu i le tulaga lena. Ua ou matuai talitonu lava o mea uma lava ua finagalo i ai le Alii ia te outou ma au po o soo se isi lava alii po o se tamaitai i totonu o le Ekalesia, e mo i tatou ia faataunuuina lo tatou tiute atoa ma tausia poloaiga a le Atua.¹⁰

Afai e te faailoa mai ia te au se tagata e auai i ana fonotaga a le korama, e faataunuuina ona tiute i le uarota o loo nofo ai, e totogi faamaoni lana sefuluai, ona ou faailoa atu lea ia te oe o se tagata e tumu i le agaga o le Atua ma ua alualu i luma ma tuputupu ae i le molimau o le Talalelei. I se isi itu, afai e te faailoa mai ia te au se tagata ua vaai i ni agelu, e tele ni faaaliga matagofie na vaai i ai, na vaai foi ua tulieseina ia temoni, ua o atu i tuluiga o le lalolagi ma talai atu le Talalelei, ae peitai o loo toilalo i le tausia o poloaiga a le Atua, o le a ou faailoa atu ia te oe se tagata o loo faitio i e na faauuina e le Alii, ma saili masei i mea ua faia e le Peresitene, o mea e alu i ai, o mea e aafia ai ma le auala o loo ia taitaia ai le Ekalesia. …

O le a e iloaina ai o i latou e le o faia lo latou tiute, e faitio pea lava i se tasi o loo faia lona tiute, ma faia ni alofaga mo i latou lava. Ou te lei iloaina lava se tagata e tausia poloaiga a le Atua e i ai se faitioga e tuuina mai e faatatau i le taitaiga o mataupu o le Ekalesia. O le le amanaiaina o le tiute, o le toilalo e tausia poloaiga a le Atua, e faapogisaina ai le mafaufau o se tagata ma e alu ese ai foi le Agaga o le Alii. Tatou te mauaina lena vaega o loo tusia i le Mataupu Faavae ma Feagaiga “aua e ui lava ina maua e se tagata faaaliga e tele, ma maua le mana e fai ai le galuega silisili e tele, ae afai na te mitamita i lona lava malosi, ma faaleaogaina faatonuga a le Atua, ae mulimuli atu i musumusuga o lona lava loto, e ao ina pau lava o ia.” [MFF 3:4.]¹¹

E matuai mausali lava o’u talitonuga ma gaoioiga, pe afai e fai mai se Au Paia o Aso e Gata Ai ia te au ua ia iloa o loo punouai o ia i le galuega a le Atua, ua ia iloa o le galuega lenei a le Alii, ua ia iloa o Iosefa Samita o se Perofeta musuia, ua ia iloa o alii o loo taiulu i le ekalesia i aso nei o ni auauna musuia a le Atua, ma o sea foi tagata e leai ma se ano i tiute faigofie ma le manino e aoaoina ai o ia i lea aso ma lea aso, o lea masina ma lea masina, ma lea tausaga ma lea tausaga—e le tele so’u faatuatua i lena ituaiga tagata.¹²

E leai se tulaga matautia o soo se alii po o se tamaitai ua leai sona faatuatua i lenei Ekalesia, pe afai e lotomaulalo ma agaga tatalo ma usiusitai pea i le tiute. Ua ou iloa se tagata na leai sona faatuatua. O le faia o lo tatou tiute e faatupulaia ai le faatuatua seia oo lava ina ua avea ma malamalama atoatoa.¹³

Ua ou vaai i alii ma tamaitai ua liliuese mai le Ekalesia ma e toetoe lava a leai se alofaga i lo’u vaaia o lena liliuese ua oo malie mai lava i o latou luga.

Afai e te i ai i le faataunuuina o lou tiute, e pei lava o loo e tu i luma o se laina sa’o o ni pou, ma o pou uma lava o loo laina gatasi. Ae a e laa tasi i autafa, ona foliga mai ai lea ua le o laina tutusa le atu pou. O le mamao lava e te alu ese ai mai le laina sa- ’o, o le faateteleina foi lena o foliga e pipi’o ia pou. O le ala sa’o ma le vaapiapi o le tiute lea o le a toe taitaiina atu ai oe i le afioaga o le Atua.¹⁴

E fesoasoani poloaiga ia i tatou e mau faatasi ai ma lo tatou Tama Faalelagi.

O le Alii, ua silafia le mea e sili ona lelei mo outou ma au ma tagata uma taitoatasi, ua tuuina mai ia i tatou tulafono, lea afai tatou te usiusitai, o le a avea ai i tatou e faapei o le Atua, o le a agavaa ma tauaogaina e toe foi atu ma nonofo i le afioaga o lo tatou Tama Faalelagi ma mauaina lena faamaoniga faaviivii: “Ua lelei ia, le auauna lelei e ma le faamaoni.” [Mataio 25:21.]

O le mea lena o loo galulue i ai.

O loo tatou i ai i se aoga, e aoaoina, faaagavaaina, ma saunia ai i tatou ina ia mafai ona agavaa ma tauaogaina e toe foi atu ma nonofo i le afioaga o lo tatou Tama Faalelagi, ma o le tagata e faapea mai ua ia iloa le talalelei e moni ae le ola ai, ua le tausia poloaiga a le Atua. O se tagata faapena o le a le oo lava i lena malosi, i lena mana, i lena faaeaina, ma lena malosiaga i le Ekalesia ma le Malo o le Atua lea semanu na te mauaina pe ana fai e usiusitai i tulafono a le Atua.¹⁵

O le auala sili lava e sailia, o le faataunuuina lea o tiute o loo manaomia i aso taitasi e pei ona tuuina mai. O le ala lenei e tauia ai le tagata a o ia agai i luma, ma savali i le ala lea e tau atu i le faaolataga.¹⁶

O le faamanuiaina i le finagalo o lo tatou Foafoa, o le mea moni e matua faafeagai lava ma le fuafaatatau a le tagata. Ua masani a’i le faapea mai o sea tagata ua faamanuiaina i le tele o ana tupe, ae aunoa ma le vaai atu i le auala o loo maua ai lona tamaoaiga po o le mea foi na te faaaogaina i ai. Atonu ua ia faatamaiaina ona lagona lelei uma i totonu o lona tagata, ma ua ia aveesea mai ai ia te ia le faamanuiaga o le mau faatasi ma lona Foafoa i le olaga a sau, ona o lona taumafai e le aunoa ia maua mea o lenei lalolagi e le tumau se taua. …

Ina tatou faia uma ia le finagalo o lo tatou Tama o i le lagi i le aso nei, ona saunia ai lea o i tatou mo le tiute a taeao, e faapea foi mo le faavavau o le a oo mai. Aua ne’i galo o le penina tautele— le ola faavavau lea—o loo tatou galulue i ai. E na o le tagata e galue ia maua le ola faavavau, o le a avea ma se tagata faamanuiaina.¹⁷

Afai tatou te iloiloina le fuafuaga o le ola ma le faaolataga, afai tatou te suesueina ia poloaiga ua tuuina mai ia i tatou o tagata o le Ekalesia a le Atua, o le a tatou iloa ai o na poloaiga uma taitasi ua tuuina mai mo le faamoemoega tonu ina ia mafai ona faamanuiaina ai i tatou, ina ia mafai ona aoaoina i tatou, ina ia mafai ona tauaogaina ma saunia i tatou e toe foi atu ma nonofo i le afioaga o lo tatou Tama Faalelagi. O nei tiute ma matafaioi ua fuafua ina ia tatou faale-atua ai i o tatou tulaga. Ua fuafuaina ina ia avea ai i tatou o ni Atua, ma ia saunia ai i tatou ia agavaa e avea ma atua, e pei ona folafolaina mai e mafai ona tatou oo i ai, o ni suli faatasi ma lo tatou Alii ma le Faaola o Iesu Keriso ma mau faatasi ma Ia i le afioaga o le Atua le Tama Faavavau i tausaga e le mafaitaulia o le faavavau.

O le faamoemoega o le tuuina mai o i tatou i lenei lalolagi ina ia mafai ona faaolaina i tatou, ina ia mafai ona saunia i tatou lava e toe foi atu ma nonofo faatasi ma lo tatou Tama Faalelagi; ma ua tuuina mai e lo tatou Tama ia ni poloaiga maoti ia usitaia, ina ua ia silafia o sese ma vaivaiga o tagata, ma afai o le a tatou iloiloina na tulaga manaomia ma tiutetauave ua tuuina mai e le Alii ia i tatou, o le a tatou iloa ai e mo lo tatou lava manuia ma le alualu i luma. O le a’oga o le olaga ua tuuina i ai i tatou, ma o lesona foi o loo tuuina mai ia i tatou e lo tatou Tama, o le a avea ai i tatou ma tagata o loo Ia finagalo i ai, ina ia mafai ona saunia i tatou e mau faatasi ma Ia.¹⁸

O le manatu autu lenei, le Au Paia e, o Aso e Gata Ai. Ia tatou iloa o le Atua e silisili nai lo le lalolagi uma. Ia tatou iloa afai tatou te faamaoni i le tausiga o poloaiga a le Atua o le a faataunuuina Ana folafolaga i soo se mataitusi. Aua na Ia fetalai mai e oo lava i se iota po o se mea itiiti e pau i le palapala e faataunuuina lava [tagai i le Mataio 5:18]. O le faafitauli, o le fili o agaga o tagata ua faatauasoina ai o latou mata. A tuu i se isi faaupuga, na te lafoina atu le pefu i o latou mata, ma faatauasoina ai i latou i mea o lenei lalolagi. E le teuina e tagata ‘oa i le lagi, lea e le o i ai se mogamoga ma le ele e faaleagaina ai, e le o i ai foi ni tagata faomea e o atu ma gaoi mai ai [tagai i le Mataio 6:19–20], ae latou te faamauina o latou loto i mea le aoga o lenei lalolagi, ma ua pule ai le tiapolo ia i latou.

Ou te fai atu ia te outou, le Au Paia o Aso e Gata Ai, o le penina tautele o le ola lea e faavavau. Ua tauina mai e le Atua ia i tatou o le meaalofa sili o meaalofa uma ua Ia tuuina mai i luga o le tagata, o le ola lea e faavavau [tagai i le MFF 14:7]. O loo tatou galulue mo lena meaalofa sili, ma o le a avea ma tatou pe afai tatou te tausia ia poloaiga. Ae o le a le aoga ia i tatou i le na o le faia o galuega ma folafola atu i tuluiga uma o le lalolagi o le talalelei lenei, ae o le a aoga ia i tatou pe afai tatou te faia le finagalo o le Atua.¹⁹

O le mea e taua mo outou ma au o le sailia lea pe o tatou savavali i le ala sao ma le vaapiapi lea e tau atu i le ola e faavavau, ma afai e leai, o fea o loo tatou faatagaina ai le tiapolo e faaseseina i tatou ma mafua ai ona tatou o ese mai le ala lea o le a toe taitaiina atu ai i tatou i le afioaga o le Atua? E tatau i tagata taitoatasi ona suesueina lona lava loto ina ia sailia ai po o fea o loo toilalo ai, ona tatau lea ona saili ma le maelega lo tatou Tama Faalelagi mo le fesoasoani a Lona Agaga Paia, ina ia mafai ona toe foi mai ai i le ala sao ma le vaapiapi.²⁰

E pei ona taua … tatou te le o faia mea uma tatou te mafaia. Ou te le talitonu e mafai ona ola soo se tagata e tusa ma ona faamoemoega maualuluga, peitai, afai tatou te finafinau, afai tatou te galulue, afai tatou te taumafai e fai le mea sili tatou te mafaia, e faaleleia i lea aso ma lea aso, o lona uiga o loo tatou faia o tatou tiute. Afai tatou te saili e faasa’o o tatou lava sese, afai tatou te ola i se ala e mafai ona tatou ole atu ai i le Atua mo le malamalama, mo le poto, mo le atamai, ma o le mea sili o na mea uma, o Lona Agaga lea, ina ia mafai ona tatou faatoilaloina o tatou vaivaiga, ona mafai ai lea ona ou fai atu, ua tatou i ai i le ala sa’o ma le vaapiapi e tau atu i le ola e faavavau; e le tatau ai la ona tatou fefefe.²¹

E tasi lava le ala o le saogalemu mo le Au Paia o Aso e Gata Ai, ma o le ala lena o le tiute. E le na o se molimau; e le o ni faaaliga ofoofogia; e le o le iloaina o le talalelei a Iesu Keriso e moni, o le ata lea o le faaolataga—e le o le iloaina tonu o le Faaola o le Togiola lea, ma o Iosefa Samita o lana perofeta o le a faasaoina ai outou ma au; ae o le tausia o poloaiga a le Atua, ma ola i se olaga o se Au Paia o Aso e Gata Ai.²²

Fautuaga mo Suesuega ma Talanoaga

O a ni auala ua avea ai le usiusitai “e le o se osigataulaga ae o se faamanuiaga”? E faapefea ona avea le faatumuina o o tatou loto i le alofa o le Atua ma auala e avea ai le tausiga o Ana poloaiga ma se mea fiafia?
O a ni mea na e oo i ai na faamautuina ai le upumoni, ua noatia le Atua e faataunuu Ana folafolaga pe a tatou faia mea ua ia poloaiina ai i tatou? (Tagai foi i le MFF 82:10.)
E mafai faapefea e le faamasinoina sese o le faamanuiaina ona taitaieseina i tatou mai le ala i le ola e faavavau?
O a vaega o le olaga atonu e faalavelaveina ai i tatou mai le taulai atu i mea a le Atua? E mafai faapefea ona tatou aloese mai nei mea faalavelave?
Aisea e oo mai ai le le amanaiaina o le tiute ia i tatou? O le a se mea e mafai ona tatou faia lea o le a fesoasoani ai ia i tatou ina ia tumau i le maelega ma le toe gauai i le faataunuuina o o tatou tiute?
O a tiute o aso taitasi o loo i luga o tagata uma o le Ekalesia? O a isi tiute e patino i ou lava tulaga?
Aisea ua avea ai le tiute ma “auala e tasi o le saogalemu i le Au Paia o Aso e Gata Ai”?