Mataupu 10

O Le Valaauga Faalelagi o le Perofeta o Iosefa Samita

E i ai sa’u molimau mausali faapea na faaali atu lava le Tama ma le Alo i le Perofeta o Iosefa Samita ma faaali mai e ala mai ia te ia le talalelei a Iesu Keriso, e moni lava, “o le mana lea o le Atua e faaolaina ai.” [Roma 1:16.]¹

Folasaga

Na saunoa ia Peresitene Tavita O. MaKei, “Talu mai lava lo’u laitiiti sa faigofie lava ia te au ona ou talitonu i le moni o faaaliga vaaia a le Perofeta o Iosefa Samita.”² Na ia saunoa mai faapea o lana molimau i le Perofeta o Iosefa na faamalosia ina ua ia faalogo i mea na oo i ai lona tama a o avea ma se faifeautalai i Sikotilani:

“Ina ua amata ona talai [lo’u tama] i lona lava atunuu ma tuuina atu lana molimau i le toefuataiga o le talalelei a Iesu Keriso, na matauina le liliuese o tagata mai ia te ia. Sa tiga o latou loto i soo se mea [e faatatau i le Ekalesia], ma o le igoa o Iosefa Samita na foliga mai na tupu ai se feteenai i o latou loto. O le tasi aso na ia faaiuina ai faapea o le auala sili ona lelei e oo atu ai i nei tagata o le talai atu lea tau lava o mataupu faavae faigofie, o le togisala a Iesu Keriso, o uluai mataupu faavae o le talalelei, ae aua ne’i tuuina atu se molimau o le toefuataiga. Masalo pe tusa ma se masina na matuai ootia ai lava o ia i se lagona faanoanoa ma le lotovaivai, ma sa le mafai ona maua e ia le agaga o lana galuega. Na te le iloa po o le a le mea na tupu, ae na matuai faalavelaveina lava lona mafaufau; sa ootia lona agaga; sa mafatia o ia ma tigaina; ma o lena lagona ootia sa faaauau pea seia oo lava ina ua matuai lofituina ai lava o ia, o lea na ia alu atu ai i le Alii ma faapea atu i ai. ‘A le mafai ona ou aveeseina lenei lagona, o le a ou alu i le fale. E le mafai ona ou faaauauina la’u galuega ae o loo mafatia au.’

“Na faaauau pea lenei lotovaivai mo sina taimi ina ua mavae lena mea, ma, i se tasi taeao po lava a o lei malamalama, ina ua mavae se po na tau le maua ai se moe, sa ia mafaufau ai loa o le a alu atu i se ana, e latalata i le sami, lea na ia iloa ai o le a matuai faaesea ai lava o ia mai le lalolagi atoa, ma o iina e tuu atu ai lona agaga i le Atua ma fesili atu i ai pe aisea ua ootia ai o ia i lenei lagona, po o le a le mea ua ia faia, ae o le a foi se mea e mafai ona ia faia ina ia lafoaieseina ai ae faaauau lana galuega. Sa amata ona ia savali i le pogisa e agai atu i le ana. Sa matuai pulunaunau lava o ia ina ia taunuu atu i ai, o lea na ia tamoe ai. A o amata ona ia alu ese atu, sa valaau atu se tasi o taitai ia te ia e fia iloa po o le a le mea ua tupu. Sa ia tuuina atu i ai se tali e tau ina ia faamalieina ai ma sa faatagaina o ia e alu. Sa i ai se mea na foliga mai sa uunaia o ia; e ao ona ia maua se faamama avega. Na ia ulufale atu i le ana po o le vaega o loo avanoa, ma faapea atu, ‘Le Tama e, o le a se mea e mafai ona ou faia ina ia aveese ai lenei lagona? E tatau ona ou aveesea a leai e le mafai ona faaauauina lenei galuega’; ma sa ia faalogoina se leo, e pei lona manino o le leo lea ou te tautala atu ai nei, na faapea mai, ‘Ia molimau atu o Iosefa Samita o se perofeta a le Atua.’ Na ia manatuaina i le taimi lena le mea sa ia fuafuaina i le ono vaiaso po o le sili atu foi ua mavae, ma sa matuai lofituina ai i le manatu, o le mea atoa lava na ia iloaina o loo i ai o ia iina mo se misiona faapitoa, ma na te lei tuuina atu i lena misiona faapitoa se faataua e tatau ai. Ona ia tagi lea i lona loto, ‘Le Alii e, ua lava lea, ’ ma ia alu ese atu loa mai le ana.”

Na manatuaina e Peresitene MaKei, “A o ou laitiiti, sa ou nofo ai ma faalogo i lena molimau mai se tasi ou te faapelepele ma faamamalu i ai e pei ona outou iloaina e leai se isi tagata ou te faatauaina i le lalolagi, ma o lena faamautinoaga sa totoina i lo’u agaga talavou.”³

Aoaoga a Tavita O. MaKei

O le Uluai Faaaliga a Iosefa Samita sa faaalia mai ai le mamalu o upumoni e uiga i le Atua le Tama ma Iesu Keriso.

E maeu le lautele ma le taua o sailiiliga ma suesuega taua a le afa mulimuli o le senituri [sefuluiva] lea ua latou faalofituina i tatou. … Ae leai ma se tasi ua taliina le manaoga silisili ma le mea e sili ona faananau i ai le tagata. E leai ma se tasi ua faaalia mai i ai le mea ua autupulaga o sailia e le tagata. O lena tulaga manaomia—lea faanaunauga o loo i ai pea nei—o le iloaina lea o le Atua, ma le sootaga a le tagata ia te ia. … E na o le tasi le mea na tupu i le senituri sefuluiva o loo tuuina mai ai i le agaga o le tagata lenei tali. Afai e maua e le tagata i totonu o lena mea na tupu le upumoni ua leva ona sailia e le tagata, e moni lava o loo aofia ai le mea sili ona taua ua tupu i le senituri sefuluiva!

O lena mea na tupu o le faaali atu lea o ni Tagata faalelagi se toalua i le Perofeta taulealea o Iosefa Samita, na faaali atu i ai le uiga o le Atua le Tama Faavavau ma lona Alo o Iesu Keriso.⁴

I le afe valuselau tausaga talu ona maliu ai Iesu i luga o le satauro, na folafola atu ai e le Perofeta o Iosefa Samita e faapea na faaali atu le Alii toetu ia te ia. [Na ia faapea mai]: “… Sa ou vaaia ni Tagata se toalua, e le mafaamatalaina lo laua mamalu ma lo laua pupula, o tutu mai i ou luga ae i le ea. Sa fetalai mai le tasi o i laua ia te au, ma sa ia tau lou igoa ma fetalai mai a o tusi ane lona aao i le tasi—O Lou Atalii Pele lenei. Faalogo ia te Ia!” [Iosefa Samita—Talafaasolopito 2:17.]⁵

O lana folafolaga sa faigofie ma manino; ma sa ofo o ia ina ua masalomia e tagata lona moni. Sa manino ma faigofie ia te ia le upumoni na ia mauaina; ae o le lalolagi Kerisiano sa faamaoniaina le avea e pei o se uila emo, na taia ai ia talitonuga faalelotu vaivai lea na amata mai lava i le tumutumu e oo i le faavae.

E lua elemene taua o loo i totonu o lana uluai savali: muamua, o le Atua o se Tagata lava ia, o le e faailoa mai lona finagalo i tagata; ma lona lua, e le o i ai se talitonuga faalelotu i le faaKerisiano uma o loo i ai le ata moni o le faaolataga.⁶

O le faaali atu o le Tama ma le Alo ia Iosefa Samita o le faavae lea o lenei Ekalesia. O loo taoto ai i totonu iina le lilo o lona malosi ma le olaola. E moni lava lenei mea, ma e ou te molimau atu ai. O lena faaaliga e tasi ua taliina uma ai fesili faasaienisi e uiga i le Atua ma le moni o lona tagata. Pe tou te leiloaina ea lona uiga? O le uiga o le Atua, o loo taliina ai. O lona sootaga i lana fanau o loo matuai manino mai ai. O lona naunau mai i le aiga tagata e ala i le pule ua faasafua mai i tagata e matuai iloga lava. Ua mautinoa le lumanai o le galuega. O nei upumoni ma le tele o isi upumoni o loo faamaninoina mai i lena uluai faaaliga mamalu.⁷

E le o malamalama pea lava le lalolagi i lona taua; ae ua avea ma se sao taua i le malamalama o le tagata i lona sootaga i le Silisiliese ma lona tulaga i le lalolagi; o se auala e faatuina ai ia sootaga lelei i le va o tagata taitoatasi ma vaega o tagata i atunuu; e avea o se faaaliga e faasino atu ai le auala i le fiafia ma le filemu o le tagata i le lalolagi e faapea foi i le faavavau o le a sau, o le faaali atu o le Tama ma le Alo ia Iosefa Samita faapea ma mea na sosoo mai ai e i ai le toefuataiga o le perisitua ma le faavaeina o le Ekalesia a Iesu Keriso i lona atoatoaga, o le a le pine ae iloaina e le gata o le mea silisili lea na tupu i le senituri sefuluiva, ae o se tasi o mea sili ona ofoofogia ua tupu i augatupulaga uma.⁸

Na toefuatai mai e le Alii ia upumoni o le talalelei e auala mai i le Perofeta o Iosefa Samita.

E le gata o Iosefa Samita o se tagata maoae, ae o se auauna musuia a le Alii lea ou te manao ou te tautala i ai. … O le mea moni lava, o le silisiliese o Iosefa Samita o loo aofia ai musumusuga paia. …

E leai se tasi e mafai ona matuai suesueina ma le malamalama le talalelei toefuataia a Iesu Keriso e aunoa ma le matuai faagaeetia i le ogatasi ma aoaoga na tuuina mai e le Alii Faaola lava Ia a o i ai o Ia i le lalolagi faatasi ma Ona soo. Mo se faataitaiga, mafaufau i le faaaliga a le Perofeta e uiga i le Foafoa—o le Atua o se Tagata Atamai, o le na aoao mai ai Iesu, “Lo matou Tama e o i le lagi.” [Tagai Mataio 6:9.] …

O le mataupu autu a Iosefa Samita e faapea o Iesu Keriso o le Alo Pele lea e Toatasi o le Tama, o le Faaola o le lalolagi, e tutusa lelei lava ma aoaoga a Iesu lava Ia ma Ana aposetolo.

O loo i ai foi i lana mataupu autu le tumau pea o uiga o le tagata pe a mavae le oti. …

E faapena foi le ogatasi o loo maua i aoaoga a isi mataupu faavae o le talalelei e pei o le faatuatua, salamo, papatisoga, faaee atu o lima mo le meaalofa o le Agaga Paia, faauuina i le perisitua, o ana aoaoga i le “poto, onosai, amio Atua, alofa faaleuso, alofa mama, ” ma isi [Tagai 2 Peteru 1:5–7; MFF 4:6.] …

… O tagata e lagolagoina le papatisoina o tamaiti a o laiti o loo aoao mai ai e faatatau i fanau laiti e faapea: “O fanau iti o e oo mai i le lalolagi e le gata e matuai aunoa lava ma se malamalama, amiotonu, ma le paia, ae i ai lava se natura masani o le faananau atu i le amioleaga ma e na o le amioleaga lava.”

… Ae i le tautala atu ma le le fefe ma le toa, ma o le tautala a se tasi ua mautinoa ua sao lava o ia, na saunoa mai ai le Perofeta o Iosefa: “E paia fanau laiti, e faapaiaina i le togisala a Iesu Keriso.” [Tagai MFF 74:7.]⁹

O musumusuga faalelagi o loo faaalia … i le faasilasilaga mamalu a [Iosefa Samita] o le natura e faavavau o feagaiga ma sauniga ma le avanoa o le faaolataga mo tagata uma. E le faatapulaaina e le Ekalesia ae aofia uma ai lava agaga o le a taliaina ona mataupu faavae. … O tagata ola uma e ao ona faasaoina e ala i le usiusitai i tulafono ma sauniga o le talalelei. E oo lava ia i latou o e oti e aunoa ma le tulafono e ao ona faamasinoina e aunoa ma le tulafono. O le mea lea na faaalia mai ai le sauniga o le faaolataga mo e ua maliliu.

O le faavavau o le feagaiga o le faaipoipoga o se faaaliga mamalu, ua tuuina mai ai le faamautinoaga i loto ua noatia faatasi e ala i le alofa ma faamauina e ala i le pule a le Perisitua paia ina ia faavavau le la faatasiga.

O isi foi feagaiga o loo faaauauina pea le alualu i luma e faavavau i augatupulaga uma o le faavavau.

E le mafaia e Iosefa Samita ona ausia nei mea uma i lona lava atamai, poto, ma le malamalama. E le mafai ona faia e ia.¹⁰

Ua faaali mai e le Alii i nei aso le Ata o le Faaolataga, lea e leai se mea e sili atu pe itiiti ifo ai nai lo le ala i le olaga faaleagaga e ala lea i le fausiaina o ni tagata e agavaa e ulufale atu i lona malo. O le fuafuaga lea o le talalelei a Iesu Keriso e pei ona toefuataiina mai i le Perofeta o Iosefa Samita, ma e moni ma atoatoa.¹¹

O le Ekalesia toefuataiina a Iesu Keriso o se faamaoniga lea o musumusuga paia a le Perofeta o Iosefa.

E tusa o le 1820, o le naunau i mataupu faalelotu na taitaiina atu ai Iosefa Samita ina ia saili le lotu sao, ma le auala sao o tapuaiga, le auala sao e ola ai. O le manao ina ia iloa na uunaiina ai le taulealea ina ia saili atu i le Alii e ala i le tatalo faatauanau. O se tasi taunuuga o le tali i lana tatalo o le faavaeina lea o le Ekalesia i le fale o Peteru Uitimera … i le aso 6 o Aperila, 1830. O lena faalapotopotoga e mafai ona maua ai le atoatoaga o le ata atoa o le faaolataga o le tagata.

Ou te fia manatu i lena faalapotopotoga o se tasi o faamaoniga o ana musumusuga. … [Ua] faasaoina mai faafitauli o mea tau tupe, o feteenaiga faalauaitele, ma fevesiaiga i talitonuga faalelotu; ma o le taimi nei o loo tu e avea o se nofoaga e taliina ai manaoga silisili o tagata. …

… “O le Ekalesia a Iesu Keriso na faavaeina e tusa ai ma le faatulagaga a le Ekalesia e pei ona tusia i le Feagaiga Fou, ” o le saunoaga lea a Iosefa Samita [tagai History of the Church, 1:79]. O le faatinoga ma galuega a lenei faalapotopotoga ua faamaonia ai le sao o lona tulaga paia.¹²

I le tele o tausaga ua mavae na folafola mai ai e Iosefa Samita, o se taulealea e i le va o le sefulufa ma le sefululima tausaga le matua e faapea, i le tali mai i se tatalo, na ia mauaina ai se faaaliga mai le Atua. … O le taunuuga o lenei folafolaga o lona taofia vave lea o ia mai le aafia ai i talitonuga faalelotu sa i le lalolagi. I se taimi puupuu lava ae ia iloaina ai le tuua na o ia.

Tuua toatasi—ma le le masani i aoaoga ma poto o ona aso!

Tuua toatasi—ma le le aoaoina i tomai ma le faasaienisi!

Tuua na o ia—e aunoa ma se tagata atamai e aoaoina o ia, e leai se faifeau e taialaina o ia! O lona faigofie ma le agalelei na ia faavavevave atu ai ia i latou ma lana savali mamalu; i le faasiasia ma le faatauemu sa latou le amanaiaina ai o ia ma faapea mai o na mea uma e mai le tiapolo; ma e le o toe i ai ni mea faapena o ni faaaliga po o ni faalialia i nei aso; ma o mea faapena ua taofia e le Au Aposetolo; ma e le toe i ai lava ni mea faapena [tagai Iosefa Samita—Talafaasolopito 2:21].

O lea na tuua ai na o ia e amataina se folauga i luga o le vasa o talitonuga faalelotu, ma teenaina ai ia vaa uma e ono folau ai ma e aunoa ma se vaa ua fausiaina pe na vaai foi ua fausiaina mo ia lava e folau ai. E mautinoa ana fai o ia o se tagata tau faasese, semanu o le vaa e mafai ona ia fausia o se vaa e leaga.

I le isi itu, afai o le vaa na ia fausia o loo aofia ai se pule silisili ma le lelei atoatoa e sili atu nai lo mea na tuuina atu e polofesa ma tagata atamamai i le lalolagi i tausaga e fia selau na muamua atu, o le a faamalosia tagata e faapea ane ma le maofa, po o fea na maua mai ai e lenei tagata lenei poto!

E ui lava na foliga mai na tuua na o ia, ae na tuua na o ia e pei o Mose i luga o Sinai; e pei o Iesu i luga o le Mauga o Olive. E pei o le Matai, e faapena foi i le perofeta, o ona faatonuga e le i oo mai i ni auala faaletagata ae na tuusao mai le Atua, o le punavai o le atamai uma. Na ia saunoa faapea: “O au o se maa talatala. Na faatoa faalogoina lava le leo o le samala ma le tofi i ou luga ina ua aapa mai le Alii ia te au. Sa na o le poto ma le aoaoina mai le lagi na ou manaomia.” [History of the Church, 5:423.] …

O lana aia i faaaliga mai le Atua, pe afai na i ai, o le a le masalomia ai lana pule e faavaeina ai le Ekalesia a Iesu Keriso i luga o le fogaeleele, ma taitaia ai ma le pule ia mataupu faavae ma sauniga o i ai. O le amataga lena o lenei galuega tele o aso e gata ai lea na faataatiaina ai le maa tulimanu e le maluelueina o le Ekalesia a Keriso i lenei tisipenisione, [ua taua], o le pule e galue ai i le suafa o Iesu Keriso i mataupu e faatatau i lana Ekalesia.¹³

A o tatou manatunatu i mea maoae na ausia e [Iosefa Samita] i si vaitaimi puupuu o le sefulufa tausaga i le va o le faavaeina o le Ekalesia ma lona maturoina; a o tatou manatunatu i le ogatasi lelei o le talalelei toefuataia ma le ekalesia anamua lea sa faavaeina e Iesu ma Ana aposetolo; a o tatou maitauina le loloto o lona malamalama i mataupu faavae ma sauniga; ma a o tatou vaai atu i le le mafaatusalia o le fuafuaga ma le lelei atoatoa ole faavaeina o le Ekalesia e ala i musumusuga a Keriso o lona suafa lea o loo tauaveina ai—o le tali i le fesili, po o fea na maua mai ai e lenei tagata lenei poto? o loo tuuina mai i le fuaiupu faaootia loto:

Viia le na fetaia’i ma Ieova!
Le perofeta na “tofia e Iesu“—
Na te tatala le toe autupulaga;
Tupu ma nuu latou te viia.

[Tagai Viiga, nu. 15]¹⁴

Sa soifua ma maliu le Perofeta o Iosefa i le puipuiga o upumoni na faaali atu ia te ia.

O tagata lelei e maua le malosi e iloa lelei ai le uiga o mea. Latou te iloatinoina le upumoni. E tutoatasi o latou manatu. E mamalu mea latou te faia. Latou te faa-aafiaina tagata malolosi ina ia mulimuli atu ia i latou. E faatauemu atu tagata le taua ia i latou, e ulagia i latou, e faasaua ia i latou, ae peitai e mavae atu faitioga ma faagaloina, ae ola pea e faavavau tagata lelei.

O nisi o tupulaga a Iosefa Samita sa faatauemu atu ia te ia; o isi sa faaamuia ia te ia; o e na mulimuli ia te ia sa faamamalu ia te ia. …

E leai se tasi e faaituau i lana faamasinoga e mafai ona suesueina le olaga o lenei taitai faalelotu e aunoa ma le matuai faagaeetia i le mea moni faapea na ia umia se faailoga maualuga o uiga o se tagata maoae silisili, o le faapogai e mafua mai lea i le manao ia iloa le finagalo o le Atua, ma se naunautaiga i ai, pe afai e iloaina, ia mulimuli loa i ai.¹⁵

I augatupulaga uma lava sa muamua lava ona mauaina le upumoni e nai taitai totoa, o e sa latou puipuia, ma sa masani lava ona ositaulagaina ai ma o latou ola. O le alualu i luma o tagata e mafua mai i le malamalama lelei ma le totoa o nei taitai. Atonu e i ai se taimi, latou te faia ai se filifiliga pe teenaina, suia, po o le puipuia o le upumoni—o se filifiliga i le va o le nofo filemu o le tagata lava ia ma le faia o le mea e fiafia i ai, po o le tulieseina, faasalaina, po o le oti foi. O se filifiliga faapea na oo ia Peteru ma Ioane a o la tutu ai i luma o Ana, le faitaulaga sili. Na la moomia se lototele moni e molimau atu ai ia Keriso i luma o tagata o e na faasalaina o ia i le oti. [Tagai Galuega 4.]

O le lototele foi na oo ia Paulo, a o noanoa o ia i filifili e tulai atu ai i luma o le Tupu o Akeripa ma ana au, ma molimau atu ai faapea na puapuagatia Keriso, ma e tatau ona avea o ia ma uluai tagata e toe faatuina mai le oti, ma e tatau ona faaali atu le malamalama i tagata, faapea ma nuu ese. [Tagai Galuega 26.]

O le lototele na molimau atu ai Iosefa Samita i se lalolagi le talitonu ma le tiga i le upumoni faapea na faaali atu le Atua ma lona Alo Pele ia te ia i se faaaliga.¹⁶

O tagata uma o e na faia ni suiga i le lalolagi o i latou o ni tagata o le a tutu faamaoni e lagolago i a latou mataupu—o tagata faapena e i ai Peteru, Iakopo, ma Paulo, ma o latou uso a aposetolo anamua, faapea foi ma isi. Ina ua tetee ia taitai faalelotu i Palamaira, Niu Ioka, i le taulealea o Iosefa Samita ona o le mea na ia vaai ma faalogo i ai i le Togavao Paia, na ia faapea mai ai, na ia mauaina se molimau i le Alii o Iesu i lona loto: “Sa ou vaai i se faaaliga; sa ou mautinoa lava lena mea, ma sa ou mautinoa foi ua silafia e le Atua le moni o lena mea, ma e le mafai lava ona ou faafitia, ua ou fefe e faia lena mea. …” [Iosefa Samita—Talafaasolopito 1:25.]

Sa faamaoni Iosefa Samita i lana molimau e oo i le iuga.¹⁷

O le taunuuga o le taitaiga faalelagi a [Iosefa Samita] o se faamautinoaga lea o le amiotonu o le mea na ia aoaoina ma sa le fefe e folafola atu. Pe a aoao atu e Iosefa Samita se mataupu faavae, na te aoaoina atu ma le pule. O lana mataupu e le fesiligia ai pe ogatasi ma manatu o tagata pe leai, pe ogatasi foi ma aoaoga a lotu mavae pe matuai tetee foi i ai. O le mea na tuuina atu ia te ia na ia tuuina atu i le lalolagi e tusa lava po o le malilie i ai pe leai, pe ogatasi po o le feteenai ma talitonuga o isi lotu, po o le manumalo o faatulagaga a tagata; ma o le taimi nei, pe a tatou vaai atu i le talafaasolopito o le silia ma le selau tausaga, tatou te maua ai se avanoa lelei e faamasinoina ai le mama o ana aoaoga, ma iloa ai le mea e maua mai ana aoaoga. …

E le gata sa ia mauaina le taitaiga ma faatonuga mai le Faaao mai le lagi, ae o le taimi lava na maua ai, na ia puipuia ai foi e aunoa ma se toe faatali.¹⁸

O faitioga, o tauemuga, o le osofaia e tagata leaga, o le pu’eina, faafalepuipuiina, o sauaga lea na tau atu lava i le faamaturoina, sa faapea ona faia ai e Iosefa Samita e pei o Peteru ma Paulo le mea silisili na te mafaia ina ia mulimuli ai i le malamalama lea na avea ai o ia ma se tasi “ua tofusia i le amio Atua.” [Tagai 2 Peteru 1:4.]¹⁹

O le toto sili lava o lenei atunuu o le toto lea na faamasaaina e aunoa ma se sala. Na iloa e le [Perofeta o Iosefa] e mama o ia. Na ia iloa ona aia tatau. E faapena foi i lona uso o Ailama, Ioane Teila ma Willard Richards o e sa faatasi ma ia. Ae talu ai ona o le pepelo, matautia ma le mataga, sa maturoina ai lava le Perofeta o Iosefa ma lona uso.

… I le totonugalemu o nei mea uma, o a ni uiga faaalia o le Perofeta? O se uiga toamalie e pei o Keriso. Na ia saunoa mai, ina ua malaga atu o ia i Karefasi i lena afiafi:

“Ou te alu atu e pei o le tamai mamoe a fasia, ae ou te filemu e pei o le taeao i le tau vevela. O ia te au le lotofuatiaifo e mama i luma o le Atua ma tagata uma. O le a ou oti mama ma o le a faapea ane ia te au, na fasiotia o ia ma le loto i ai.” [Tagai MFF 135:4.]²⁰

O soifuaga o le Perofeta, faapea lona uso o Ailama, ma le fia selau afe o isi o e na taliaina le moni o le [Uluai Faaaliga] o loo i ai le faamaoniga faapea o le ata o le faaolataga, e pei ona ta’ua e Iesu Keriso o loo faaali mai ai, e matuai mautinoa ai lava le taitaiina atu ai i se ituaiga tagata e faapei o Keriso. Ona o le moni tele o le faaaliga i le Perofeta ma lona uso o Ailama, o lea na la faamaufaailogaina ai e aunoa ma le masalosalo le la molimau i o la toto.²¹

Fautuaga mo Suesuega ma Talanoaga

Na faamatala e Peresitene MaKei se aafiaga na oo i lona tama i lana misiona e faatatau lea i le moomia ona molimau atu ia Iosefa Samita (Tagai itulau 101–103). Aisea e taua ai le tali na maua e lona tama mo i tatou i aso nei?
Aisea na talafeagai ai i le Alii ona valaauina se perofeta i aso e gata ai? (Tagai itulau 104–105.) Aisea e avea ai le i ai o se molimau ia Iosefa Samita ma se vaega taua o se molimau i le talalelei? O le a le auala ua avea ai le faaali atu o le Tama ma le Alo ia Iosefa Samita ma “faavae o lenei Ekalesia“?
O a nisi upumoni na faaalia mai e ala mai i le Uluai Faaaliga? (Tagai itulau 104–105.) O a ni auala ua aafia ai lau molimau i le Tama Faalelagi ma Iesu Keriso i lou malamalama i le Uluai Faaaliga?
O a nisi o mataupu autu na faaali mai e le Alii e ala mai i le Perofeta o Iosefa Samita? (Tagai itulau 105–107.) Na faapefea ona faamanuiaina oe a o e suesueina ma faaaogaina nei mataupu autu?
O a ni auala o loo avea ai le Ekalesia ma ona aoaoga ma se molimau faapea o Iosefa Samita o se perofeta a le Atua? (Tagai itulau 107–109.)
O a nisi o uiga faaKeriso na faaalia e le Perofeta o Iosefa Samita? (Tagai itulau 110–12.) O le a se mea e mafai ona e faia ina ia mulimuli ai i lana faataitaiga?
O a ni tiutetauave tatou te maua pe a i ai sa tatou molimau ia Iosefa Samita ma le toefuataiga o le talalelei?

Mau e Faatatau I Ai:Amosa 3:7; 2 Nifae 3:6–15; MFF 135; Iosefa Samita—Talafaasolopito 2:1–75