Mataupu 1

O Iesu Keriso: “O Le Ala, o le Upu Moni, ma le Ola”

Afai na te sailia le faamoemoega moni o le olaga, e tatau i le tagata ona ola ia maua se mea e maualuga atu nai lo ia lava. Na ia faalogoina le siufofoga o le Faaola o faapea mai, “O au nei le ala, ma le upu moni, ma le ola. …” (Ioane 14:6.)¹

Folasaga

I le aso 4 o Tesema 1920, sa amata ai e Elder Tavita O. MaKei ma lana soa sa la faimalaga, o Hugh J. Cannon, o se Peresitene o le siteki ma se faatonu o le mekasini a le Ekaleisa o le Improvement Era, se galuega sa tofia ai i laua e le Au Peresitene Sili, e asiasi ma faamalosi i tagata o le Ekalesia i le lalolagi atoa. E tasi le tausaga o la laua malaga, ma pe tusa ma le 60, 000 maila sa la femalagaai ai, ma e silia ma le afa o lena mamao sa malaga ai i luga o le vasa. I le afiafi o le aso 10 o Me 1921, a o la malaga atu i le atunuu lea ua ta’ua nei o Samoa i Sisifo, sa oo ai Elder MaKei i le aafiaga lenei:

“Ina ua gagaifo le la, sa matua matagofie le tauataata o le goto fimalie ifo o le la! … A o ou mafaufau loloto pea i lea vaaiga matagofie, sa ou taotooto i lo’u [moega] i le ta o le sefulu i lena po. … Ona ou faagalegale moe ai lea, ma sa ou vaaia ai i se faaaliga se mea e matua mamalu ma paia. Sa ou vaaia mai lena mamao se aai paepae matagofie. E ui lava ina mamao, ae sa foliga ua ou iloa atu ai laau e suamalie o latou fua, o laau tetele ma laau iti ma o latou lau felanulanuai, ma fugalaau ua matua fuga taufuifui i soo se mea. Sa foliga o loo atagia mai i le lagi manino i luga ia nei lanu matagofie. Ona ou vaaia ai lea o se faapotopotoga o tagata o agai atu i le aai. Sa tofu laei e tagata uma se ofu talaloa paepae ma se pulou. O le taimi lava lena na taulai atu ai la’u vaai i lo latou taitai, ma e ui lava ina sa na o le itu o ona foliga ma lona autafa sa mafai ona ou iloa atu, ae sa vave ona ou iloaina o ia o lo’u Faaola! O le lanu ma le susulu o ona fofoga sa mamalu. Sa vaaia le filemu ia te ia ma sa foliga mai e maoae tele—e paia!

“Sa ou malamalama, o le aai, o lona [aai ia]. O le Aai e Faavavau; ma o tagata sa mulimuli atu ia te ia e tatau ona nonofo ai iina i le filemu ma le fiafia e faavavau.

“Ae o ai i latou na?

“E pei sa faitau e le Faaola ou mafaufauga, aua sa ia tali mai i le tusi atu o lona lima i se afa li’o na oso a’e i o latou luga i lena taimi, ma sa tusia ai i le lanuauro ia upu nei:

“O i Latou Nei Ua Manumalo i le Lalolagi—

Ua Toe Fanaufouina Moni!”²

I lana uluai lauga i le konafesi aoao ina ua avea ma Peresitene o le Ekalesia, sa toe faamautu ai e Peresitene MaKei lana molimau i le Faaola ma faamanuiaga e maua e i latou e mulimuli ia te Ia:

“E leai se tasi e mafai ona pulefaamalumalu i lenei Ekalesia e aunoa ma le muai mafuta o lona agaga ma le ao o le Ekalesia, o lo tatou Alii ia ma le Faaola, o Iesu Keriso. O Ia o lo tatou faauluuluga. O lana Ekalesia lenei. A aunoa i tatou ma lana taitaiga faalelagi ma ana musumusuga faifai pea, e le mafai ona tatou manumalo. A i ai lana taitaiga, ma ana musumusuga, e le mafai lava ona tatou toilalo. …

“… Ou te iloa e moni o loo soifua o ia, ou te iloa foi lona naunautai e taiala ma taitai i latou uma o e auauna atu ia te ia.”³

O Aoaoga a Tavita O. MaKei

O Keriso o le Malamalama i Tagata.

O Keriso o le malamalama i tagata. O lena malamalama e iloa lelei ai e le tagata lona ala; afai e le taliaina, ona tautevateva ai lea o le agaga o le tagata i le pogisa. E leai se tagata, e leai se faapotopotoga, e leai foi se atunuu e mafai ona maua le manuia moni e aunoa ma le mulimuli atu ia te ia o le sa fetalai:

“O au nei o le malamalama o le lalolagi; o le mulimuli mai ia te au, e le savali o ia i le pouliuli, ae e ia te ia le malamalama o le ola.” (Ioane 8:12.)

O se mea e faanoanoa ai pe a tape e tagata ma atunuu lena malamalama—pe a suitulaga le tulafono o le vaomatua ma le malosi o le pelu ia Keriso ma lana talalelei. O le faalavelave autu lava i le lalolagi i le taimi nei, o lona le talitonu lea i le agalelei o le Atua ma le leai o se faatuatua i aoaoga ma mataupu faavae o le talalelei.⁴

E talitonu le Ekalesia a Iesu Keriso o le Au Paia o Aso e Gata Ai, o lona soifua ma aoaoga o loo faaalia ai e Iesu Keriso se tulaga faatonuina o le olaga faaletagata ma le va fealoaloai, afai e mulimulitaia i olaga taitasi ma faalapotopotoga a tagata soifua, e le gata ina faaitiitia ai faafitauli o nuu ma faalapotopotoga, ae o le a maua ai foi e tagata le fiafia ma le filemu.

Afai e faapea. … ua toilalo i latou ua ta’ua o atunuu Kerisiano i le ausiaina o se sini faapena, tatou te tali atu e mafai ona i ai lena toilalo e fai ai, pe afai latou te le faaaogaina ia mataupu faavae ma aoaoga o le Kerisiano maoi. …

… Ua mafatia le aiga o tagata ona o uiga faaalia soona fai ma le manatu faapito, inoino, loto mataua, matapeapea—o lagona malolosi pei ni manu e afua ai taua, o faatamaiga, o mala, ma le oti. Pe ana fai foi e na o mataupu faavae aupito faigofie o aoaoga a le Faaola e faaaoga ma usitaia, semanu e mafai lava ona suia le talafaasolopito.⁵

Pe a i ai i Kerisiano i le lalolagi atoa lenei faatuatua [ia Keriso] i o latou toto, pe a latou lagona se faamaoni i o latou loto i le Keriso toetu, ma mataupu faavae o loo aofia ai, o lona uiga ua faia e tagata le laasaga muamua aupito tele mo le filemu e faavavau lea tatou te talosia i aso taitasi: Ia teena o Ia ona tumu ai lea o le lalolagi i le inoino, ma lilofia ai i le toto o taua faifai pea.⁶

O le talalelei a Iesu Keriso o le tapu e faamama atoatoa ai le metala [pe a aasa ona liusuavai lea ma opeopea ai le otaota i luga ae to’a i lalo le uamea], o i e faataumaoia ai le inoino, loto mataua, ma le matapeapea, ae faatumauina le fetausiai, agalelei, ma le alofa o ni faanaunauga o le loto e ola ai le tagata ma galueaiina.

Ia tulimatai atu mata o alii ma tamaitai uma i le ua susulu ma ua avea o se Malamalama i le lalolagi atoa—aua o Keriso o le Ala, o le Upu Moni, ma le Ola, ua na o le pau lea o le Taiala saogalemu i lena malutaga o le filemu, lea o loo tatalo punouai i ai tagata o le lalolagi tele.⁷

Sa aoao mai e Keriso ma faataitai mai le ala i le olaga lelei atoatoa i o tatou uso a tagata.

“E mafai faapefea ona tatou iloa le ala?” o le fesili lea a Toma, a o i ai faatasi ma ona uso-a-aposetolo ma lo latou Alii i le laoai ina ua maea le talisuaga i le po e le galo, lea na faalataina ai le Alii; ma o le tali faaleatua a Keriso o le: O a’u nei le ala ma le upu moni, ma le ola. …” (Ioane 14:5–6.) Ma o ia lava o le ala! O Ia o le punavai o faamafanafanaga, o le musumusuga o o tatou olaga, o le tupuaga o lo tatou faaolataga. Afai tatou te fia iloa lo tatou sootaga i le Atua, ia tatou o ia Iesu Keriso. Afai tatou te fia iloa le moni o le tino ola pea o le agaga, ua uma ona faataitai mai i le toetu o le Faaola.

Afai tatou te mananao e iloa le olaga sili tatou te taulamua ai i o tatou uso a tagata, e mafai ona tatou maua se faataitaiga atoatoa i le soifuaga o Iesu. Pe o a lava o tatou faanaunauga faatamalii, o a tatou sini maualuluga, o o tatou faamoemoega i soo se itu o le olaga, e mafai ona tatou vaavaai atu ia Keriso ma maua ai le atoatoa. O le mea lea, i le sailiga o se tagavai mo le tulaga lelei faatamatane, e na o lo tatou o lava i le Tagata o Nasareta, ma o le a tatou iloa ai foi ua atoa ia te ia o amioatua uma e faaatoatoa ai le tagata.

O amioatua e tuufaatasia e maua ai lea ituaiga o tagata atoatoa o le, upu moni, faamasinoga tonu, atamai, agalelei, ma le amio pulea. O ona mafaufauga uma, upu, ma amioga, sa ogatasi ma le tulafono faalelagi, ma o lea foi, e moni ai. Sa tatalaina pea e le aunoa le alaleo o fesootaiga i le va o ia ma le Tama, ina ia mafai ai ona faaalia pea lava pea ia te ia, le upumoni lea e faalagolago i faaaliga.⁸

E taliaina sa’o lava e Le Ekalesia a Iesu Keriso o le Au Paia o Aso e Gata Ai, e moni ia upu a Iesu: “Ua ou sau ina ia latou maua le ola, ia maua atili ai lava.” (Ioane 10:10.) Peitai, tatou te talitonu, o le maua atili o lenei ola e le gata ina maua mai le faaeaga faaleagaga, ae faapea foi i le faaaogaina i le olaga i aso taitasi, o mataupu faavae sa aoao mai e Iesu.

E itiiti nei mataupu faavae ma faigofie, ma e mafai, pe afai e mananao ai, ona faaaoga e tagata uma lava. O mataupu muamua o nei mataupu, ma le faavae e fausia ai se sosaiete Kerisiano faamaoni o le: “Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa. …” (Mareko 12:30.) O se talitonuga i se Tagata Silisili Ese o loo soifua ma e alofa i lana fanau—o se talitonuga e maua mai ai le mana ma le malosi a’ia’i i le agaga. O se faamautinoaga e mafai ona tatou faalatalata atu i ai mo se taitaiga, ma o le a faaali mai o ia lava ia i latou e saili atu ia te ia.

O le isi o le taliaina lea o le upumoni, o le ola o se meaalofa a le Atua ma o le ala lea e paia ai. O le faaaogaina tatau o lenei meaalofa e uunaia ai le tagata ia avea ma matai, ae le o se pologa a le lalolagi. E ao ona pulea ana mea e ‘ai ma faaaoga mo le manuia o lona soifua maloloina ma faafualoa ai lona soifua. E ao foi ona pulea lelei ona lagona malolosi, ma ia taofiofia mo le fiafia ma faamanuiaga o isi ma le faaauauina pea o le gafa o le tagata soifua.

O le mataupu faavae lona tolu o le amiosa’o o le tagata lava ia. O le uiga o lea mea, o le faamaoni a’ia’i, i aso uma, e manino lelei, ma faaaloalo i aia tatau a isi tagata, e pei o le ave i ai o le faatuatuaga o isi tagata. O lenei tulaga aloaia e faatatau i atunuu faapea foi tagata taitoatasi. O se mea sese i se atunuu, ona o lona malosi, le faagaoi mai i isi ma pulea faamalosi, ma e faapena foi se tagata na te faoa mea a lona tuaoi ma fasiotia.

O se mea lona fa e taua o le manatu i tagata lautele, lea e fagua ai i tagata taitoatasi le lagona, o lona tiute o le faaleleia atili o le lalolagi aua o loo nofo ai.⁹

O le soifua o le Faaola, sa sili ona taialaina e le … Mama Atoatoa o Ia lava ma le Auauna Atu. Sa Ia tausisia lona lava le pona mai agasala a le lalolagi, ma ofoina atu lona soifua e mafaufau ai mo isi, ma le faaolataga o le fanauga a tagata. Sa Ia saili atu e le aunoa mo e faanoanoa, ma faamafanafana i e mamai, faamalolo i e mafatia, ma tuuina atu lona soifua mo le lalolagi.¹⁰

O lo o i ai se tulaga manaomia o se suiga tele naua i fegalegaleaiga a tagata. E le i i ai se taimi muamua i le talafaasolopito o le lalolagi na sili ona manaomia ai se suiga mo le lelei atili. Ma talu ai ona ua teena aoaoga a Keriso, o lea ua atili tele ai puapuaga ma faigata, ma ua na o ni nai vaitau e le tumau e mapu ai ma filemu ma alualu ai i luma, ma pe aisea lava ua le naunau ai tagata e suia le manatu faapito i le mataupu faavae a Keriso o le manatu faaleuso lea, ia fai mea sa’o, o le taua ma le paia o le ola o le tagata, le amioatua o le loto faamagalo, le lafoaia o le agasala o le pepelo ma le matapeapea, ma le mana faaola o le alofa.¹¹

Ua i ai i tagata o le Ekalesia a Keriso le matafaioi o le avea o le Atalii o le Tagata e leai se agasala, ma o latou faaaoao. Ua na o Ia le Tagata e Atoatoa sa femaliuai i le fogaeleele; o le faataitaiga aupito maualuga o le mamalu; e faale-Atua i le natura; e atoatoa i lona alofa; o lo tatou Togiola; o lo tatou Faaola; o le Alo pele o lo tatou Tama e Faavavau; o le Malamalama, o le Ola, ma le Ala.¹²

Ou te taliaina Iesu Keriso o le faataitaiga a’ia’i o le tagata soifua e atoatoa.¹³

E aoga aoaoga a Keriso i le olaga i aso faisoo.

Ou te talitonu i upu uma sa fetalai ai Iesu, ma ia te au lava ia, e faatatau aoaoga i lo’u olaga ma lou foi olaga. Ia manatua o le mea moni o i tatou o fanau a lo tatou Tama i le lagi, pe a tatou saili i le malo o le Atua, muamua, o le a tatou malamalama i se faamoemoega fou i le olaga. … E na o le tuuina atu atoa o lo tatou ola i totonu po o tatou loto e mafai ai ona tatou tutu i luga a’e o le manatu faapito, ma faaosoosoga o le natura. …

E toetoe lava ina atoa le lua afe tausaga, o manatu tagata [o aoaoga a Keriso] e le talafeagai—ua matua maualuluga tele, o a latou faamatalaga na, peitai, afai tatou te talitonu ma le faamaoni i le paia o Keriso, ma o ia “o le ala, ma le upu moni ma le ola” (tagai Ioane 14:6), e le mafai ona tatou tamau ai lo tatou masalosalo i le aoga o ana aoaoga i le olaga i aso faisoo.

E moni, e i ai faafitauli tuga e tatau ona foia—o le leaga o nofoaga e nonofo feoma’i ai tagata, o feteenaiga faifai pea i le va o galuega ma totogi, o le onana, o fafine talitane, o le feitagai faavaomalo, ma le fiaselau o isi fesili fou. Peitai afai e faafofoga ma usitai atu, i le aoaoga a Iesu mo le faamaoni o le tagata lava ia, mamalu, amiosa’o, ma le alofa, o mea muamua ia e manaomia i le foiaina lelei o nei faigata uma faalevafealoai ma le tamaoaiga.

E matua mautinoa lava, a o lei amata laa atu le lalolagi i nei aoaoga, e tatau lava ona suia muamua loto o tagata. O le faamoemoega tonu lena sa afio mai ai Keriso i le lalolagi. O le mafuaaga aupito taua lava o le folafola atu o le talalelei, o le suia lea o loto ma olaga o tagata. … O i latou ua liua … e mafai ona latou molimauina le ala ua suia ai o latou olaga. … O lena suiga, ua latou aumaia ai le filemu ma le lelei i le lalolagi ae le o le tauaimisa [ma] puapuaga.¹⁴

Ia avea o se laasaga muamua, … ia matua faaaoga lava le poloaiga faatauvaa o le tuu o oe i le tulaga o loo i ai le isi tagata, o le auala aupito mautinoa lea e aveesea ai le matau’a lea e mafua ai le le malamalama.

E leai lava se tagata e fai se mafaufau, e mafai ona faapea mai ma le faamaoni, o le faaaogaina o lenei faiga faatauvaa pe afai e ola ai tagata taitoatasi ma malo, o le a le aumaia ai se lalolagi e sili atu ona lelei!

E tutusa lelei le aoga ma le lelei o Ana aoaoga e faatatau i le taua ma le paia o le ola o le tagata, o le uiga atua o le loto faamagalo, ma le tatau ona i ai o le faamaoni i fegalegaleaiga, o Lona inosia o le agasala o le faagutugutulua po o le pepelo, ma le matapeapea, o Ana aoaoga e faatatau i le mana faaola o le alofa, ma le tino ola pea o le agaga.¹⁵

O le ola ai i aoaoga a Keriso e maua ai le tulaga maoae moni ma le fiafia.

E leai se tagata e mafai ona faia sana faaiuga faamaoni e faaaoga i lona olaga i aso taitasi ia aoaoga a Iesu le Nasareta, e aunoa ma lona lagona ua sui ona uiga. O le fuaitau, “toe fanau mai” e loloto atu sona uiga i lo le mea ua manatu i ai le toatele o tagata. O le lagona lenei ua suia, atonu e faigata ona faamatala, ae e moni lava.

E fiafia le tagata ua iloa moni le mana faagaeetia ma le liua e maua mai i le latalata atu i le Faaola, le sootaga lea i le Keriso soifua. Ou te matua faafetai lava ina ua ou iloa o Keriso o lo’u Togiola.¹⁶

O mataupu e pito i sili ona maualuluga o mataupu uma, o aoaoga ia a Iesu le Nasareta aemaise ai lava Lona soifua, ma o le tagata foi e pito i sili ona maoae, o le tagata lea e pito i sili ona faapei o Keriso.

O le mea foi e te mafaufau faamaoni i ai i lou loto e faatatau ia Keriso, o le a iloa ai foi iina le ituaiga tagata o le a e i ai, ma o le a faalagolago tele foi i ai au faatinoga. E leai se tagata e mafai ona ia suesue i lenei uiga paia, ma mafai ona taliaina ana aoaoga e aunoa ma lona iloaina o se aafiaga faagaeetia ma le lelei atoatoa i totonu ia te ia lava.¹⁷

O le filifilia o ia e fai ma o tatou faataitaiga, ua tatou faatupuina ai ia i tatou lava se faanaunauga ia faapei o ia, ma ia faaaumea faatasi ma ia. Tatou te taliaina foi le olaga i lona tulaga e tatau ai, ma le tulaga e ono oo i ai.¹⁸

Na te le i folafolaina mai ni taui i ni oa faaletino, peitai sa ia folafola mai le tulaga faaletagata atoatoa, ma le paia. … “Ia atoatoa ona lelei o la outou amio, e pei o lo outou Tama o i le lagi e atoatoa ona lelei o ia.” [Tagai Mataio 5:48.] Ma o lena foi tulaga faaletagata paia, e oo mai ai lona taunuuga o le fiafia, le fiafia moni.¹⁹

O le talalelei, le tala lelei e olioli tele ai, o le taiala moni lea mo le tagata; ma o le tane foi po o le fafine e sili ona fiafia ma sili ona faamalieina, o ia lea e ola aupito latalata i ana aoaoga, aua o ana aoaoga e faafeagai tonu ma le inoino, sauaga, pule saua, pule malosi, faamasinoga le tonu—o mea ia e afua ai mafatiaga, o faatafunaga, ma le oti i le lalolagi atoa. E pei lava ona aumaia e le la o le mafanafana o loo manaomia e le lalolagi i le maatiati o le malulu, e faapena foi ona aumaia e le talalelei a Iesu Keriso le faamoemoe ia i latou o e faanoanoa ma o loo moomoo mo se mea e sili atu ona lelei ma maualuga nai lo mea o maua i le lalolagi.

Oka se tulaga ina a manaia pe a mafai ona faapea atu ma le faamaoni lenei lalolagi tuai ia Keriso, le Togiola o tagata, “O loo saili tagata uma ia te oe.” (Mareko 1:37.) O lona uiga o le a le toe i ai le manatu faapito, loto mataua, inoino, talapepelo, gaoi, faaimamago, le usiusitai, femisaai, ma le fetauai i atunuu!²⁰

Tatou te faamanatuina lona soifua mai, [o Ia] le ona ia le misiona i le lalolagi lea (1) na viia ai le Atua; (2) na folafola mai ai i le lalolagi le filemu; (3) ma [ua] faamautinoa mai ai i tagata uma le agalelei o le Atua ia i latou!

Afai e mafai e tagata uma e fananau mai i le lalolagi ona avea ma afi mumu i lona olaga mataupu faavae mamalu nei e tolu—oka se suamalie ma le tele atu o le fiafia o le a i ai le olaga! A i ai sea ituaiga o faamoemoega, o le a taufai saili tagata uma i mea e mama, tonu, mamalu, tausaafia, ma faamaoni—o mea uma ia e tau atu i le faaatoatoaina. … O le a ia aloese mai mea e le mama, o mea e faamamasagia ai, pe o mea e tauleagaina. Afai e naunau tagata uma e faaalia le agalelei i ona uso a tagata ma taumafai e faaali atu lena naunau i ni faaupuga agalelei se afe ma nai faatinoga itiiti, e atagia mai ai le le manatu faapito ma le ositaulaga o le tagata lava ia, oka se saofaga ina a tele o le a faia e tagata taitoatasi mo le filemu aoao i le lalolagi ma le fiafia o le tagata soifua!²¹

Oka se matagofie o le a i ai le lalolagi, mo se faataitaiga, pe a taumafai ma le faamaoni le tagata e faaaoga le fautuaga a Keriso: “Afai ua i lou uso se mea ua tiga ai o ia ia te oe, ia e alu e muai faalelei ia te ia.” [Tagai Mataio 5:23–24.] A le o lena, e toe faamanatu atu Lana apoapoaiga: “ia outou muai saili le malo o le Atua ma Lana amiotonu” [tagai Mataio 6:33], o lona uiga, e tau lava ina ia aua le naunau tele ma faasili le taua o mea o le lalolagi nai lo mea faaleagaga.²²

Ou te lagona, ma ua ou iloa, o Iesu Keriso, ua na o ia, ma e na o ia foi le ala, ma le usiusitai i Lana talalelei, e mafai ai ona tatou maua le fiafia ma le faaolataga i lenei lalolagi ma le ola e faavavau i le lalolagi a sau.²³

Fautuaga mo Suesuega ma Talanoaga

O a ni faafitauli ogaoga o loo feagai ma le tagata i aso nei? O a mataupu faavae patino sa aoao mai e Iesu Keriso e ono fesoasoani ai i le foiaina o nei faafitauli? E mafai faapefea ona fesoasoani ia mataupu faavae e foia ai [ia faafitauli]?
E taua i se a le faatuatua ia Iesu Keriso e faaleleia ai tulaga o le lalolagi i le taimi nei? O le a le uiga ia te oe o le faaupuga, o Iesu Keriso “o le ala, upumoni ma le ola”?
O a mea o loo taofia ai tagata i le taimi nei mai le faaaogaina o aoaoga a le Faaola i o latou olaga? I le avea ai ma Ekalesia po o tagata taitoatasi foi, o a ni auala e mafai ai ona tatou faalauiloa atu Ona tulaga faatonuina i le lalolagi?
Sa fetalai mai Iesu Keriso na sau o Ia i le lalolagi ina “ia tatou maua le ola, ma ia maua atili ai lava” (Ioane 10:10; tagai itulau 5–6). O a ni auala ua fesoasoani atu ai le Faaola ia te oe ina ia e maua atili ai le ola?
Sa tautino mai e Peresitene MaKei o Iesu Keriso o le “faataitaiga a’ia’i o le tagata soifua e atoatoa” (itulau 6). O a ni uiga o Iesu Keriso ua avea ai o Ia ma faataitaiga o le atoatoa? (Tagai i itulau 5–6.) O le a le tele e mafai ona tatou maua ai nei uiga i o tatou olaga? O a mea e mafai ona tatou faia ina ia atili faapei ai o tatou olaga o Keriso?
Sa aoao mai e Peresitene MaKei o i latou e faaaogaina aoaoga a le Faaola, o le a latou iloaina se suiga o i latou lava (tagai itulau 7–8). O faapefea ona e vaaia le moni o lenei mea i lou olaga ma olaga foi o isi? O le a le taua o le faaaogaina e Peresitene MaKei o upu “toe fanau mai”? (Tagai itulau 8–9.)

O Mau e Faatatau I Ai:Mataio 11:28–30; Ioane 13:15–17; 3 Nifae 27:21–22, 27; MFF 84:49–54