Mataupu 2

O Le Natura Itu-Lua o le Tagata

O le fesili la: O le fea o vaega nei e aumaia le ola faateleina—o le faamalieina o o tatou natura faaletino po o le atiina ae o o tatou lava tagata faaleagaga? Pe le o le faafitauli moni ea lena?¹

Folasaga

I se lauga i le konafesi aoao i le 1949, sa faamatalaina ai e Peresitene MaKei le tala lenei:

“E i ai se tala ua leva … lea na faamatalaina e uiga i se tusiata tautaua sa galue i le valiina o se ata vali tele mo le falesa i totonu o se taulaga o Sisili. O le autu o le soifuaga o Keriso. Mo le tele o tausaga sa galue malosi ai le tusiata, ma mulimuli ane sa maea le ata ae vagana ai ni tagata taua se toalua, o le Tamaitiiti o Keriso ma Iuta le Sekara. Sa ia saili i itulagi uma mo ni tagata e faatusa i ai nei tagata e toalua.

“ ‘I se tasi aso a o ia savalivali atu i se vaega tuai o le aai na ia tau atu ai i ni tamaiti o taaalo i le auala. I lena potopotoga sa i ai se alii e sefululua tausaga le matua, o ona foliga na tosina i ai le loto o le tusiata. O foliga lava o se agelu—atonu sa matuai palapala, ae o foliga ia na ia manaomia.

“ ‘Sa aveina e le tusiata le tamaitiiti i lona fale, ma o lea aso ma lea aso sa nofo ai ma le onosai le tamaitiiti seia iu ina maea ona tusia foliga o le Tamaitiiti o Keriso.

“ ‘Ae sa le maua e le tusiata se isi e tusi faataitai i ai le ata o Iuta. Mo le tele o tausaga, na tuliloaina ai o ia e le atuatuvale nei le maea ona vali lana ata, o lea na faaauau ai lana sailiga.

“ ‘I se tasi aoauli, i totonu o se falekalapu, na vaaia ai e le tusiata se tagata paee ma le faaause o tautevateva ane agai i le faitotoa ma faapau ifo i le fola, ma aioi mai mo se ipu uaina. Sa aapa atu le tusiata ma faatu i luga ma tilotilo sao i ni foliga na le magagana ai o ia. E foliga mai o loo i ai faailoga o agasala uma a tagata.

“ ‘Sau ta o, ” o le tala lea a le tusiata, “O le a ou avatu ia te oe uaina, o meaai, ma lavalava.”

“ ‘O lea ua maua nei i i le faatusa o Iuta. E tele aso faapea foi vaega o le tele o po, sa galue punouai ai le tusiata e faamaea lana galuega maoae.

“ ‘A o faaauau le galuega, na vaaia se suiga i le tagata lea sa avea ma faataitai. Na suia le tagata auga vaivai i foliga atuatuvale; o ona mata mumu na iloa lelei atu ai le fefe i lona ata lea sa vali. I se tasi aso, i le matauina o le foliga popole o lea tagata sa fai ma faataitai, sa taofi ai e le tusiata lana galuega, ae faapea atu, “Lou atalii e, ou te fia fesoasoani ia te oe. O le a se mea ua e popole ai?”

“ ‘Sa tagi le tagata faataitai ma pupuni ona mata i ona lima. Ina ua maea se taimi umi sa tepa ae ona mata faasiasia i le tusiata.

“ ‘E te le o manatuaina au? I tausaga e tele ua mavae o au lea sa fai ma faataitai o le Tamaitiiti o Keriso!” ’ ”

Ina ua maea ona faamatalaina le tala, ona saunoa mai lea o MaKei, “Ioe, atonu e moni pe le moni foi le tala, ae o le lesona o loo aoao mai ai, e moni ia. O le tamaloa faatautala sa ia faia se filifiliga sese i lona talavou, ma i le sailia o le faamalieina o tuinanau uma o le tino na magoto ifo ai i lalo ma lalo ifo seia oo lava i le tulaga e aupito sili ona maualalo o le olaga.²

Aoaoga a Tavita O. MaKei

E tofu i tatou taitoatasi ma ni natura eseese se lua: o le faaletino ma le faaleagaga.

O le tagata e itu-lua, ma o lona ola o se fuafuaga lea a le Atua. O le uluai upu moni faavae lena e tatau ona manatua. E i ai i le tagata se tino faaletino ma se tino faaleagaga. E matua manino lava tusitusiga paia i le faamatalaina mai o lenei mea moni:

“Ona faia lea e Atua le tagata mai le efuefu o le eleele, ma ua latou (o lona uiga o Atua) avane foi lona agaga (o lona uiga o le agaga lea o le tagata), ma ua tuu i totonu ia te ia, ma manava atu le manava ola i ona pogaiisu, ona avea ai lea o le tagata ma agaga ola.” [Aperaamo 5:7.]

O le mea lea, o le tino o le tagata o le tapeneko o loo nofo ai le agaga. E toatele, ma ua matuai toatele lava, ua agaigai ina manatu o le tino, o le tagata lava lena, ma ua mafua ai ona faasaga atu a latou taumafaiga uma e faamalie ia manaoga o le tino, o ona faatosinaga, ma ona tuinanauga. E toaitiiti lava i latou e iloa o le tagata moni o se agaga ola pea, lea [o se] “malamalama poo se malamalama o le upu moni, “ [tagai MFF 93:29] na ola e pei lava o se tagata muamua ae lei maua le tino, ma o lenei elemene agaga ma ona uiga maoti o le a faaauau pea pe a le toe mafai e le tino ona tali atu i ona siosiomaga faalelalolagi. Na fetalai mai le Faaola:

“Ua ou sau mai le Tama, ma ou sau i le lalolagi, o le a au toe tuua le lalolagi, ma alu atu i le Tama.” (Ioane 16:28.)

Faapei ona aumaia e le Agaga o Keriso sa i ai i le muai olaga le ola i se tino o aano ma ivi, e faapea foi agaga uma o tagata sa i ai i le muai olaga ona fananau mai i lenei lalolagi. Pe o le a e teuina ea i lou mafaufau lena uluai mea moni faavae o le olaga?

O le fesili la: O le fea o vaega nei e aumaia le ola faateleina— o le faamalieina o o tatou natura faaletino po o le atiina ae o o tatou lava tagata faaleagaga? Pe le o le faafitauli moni ea lena?³

O le gauai atu i tuinanauga ma manaoga o le tagata faaletino e faamalieina ae na o sina taimi ma e ono taunuu i le le fiafia, faanoanoa, ma e ono oo atu ai i le faalumaina; o mea faaleagaga e ausia, e aumaia ai le “olioli e le tau salamo ai fua.“

I lana tusi i Kalatia, sa patino lava ona faatulagaina e Paulo le “galuega a le tino, ” e pei ona ia taua ai, ma o “fua o le agaga.” Matau lelei le faavasegaga lenei: O galuega a le tino e faaalia mai e pei o mea nei:

“… o le mulilua, o le faitaaga, o le amio leaga, o le mataitu,

“O le ifo i tupua, o le fai togafiti faataulaitu, o le feitagai, o le femisaa’i, o le losilosi vale, o le lotoa, o le finauvale, o fevaevaeaiga, o maseiga,

“O le mataua, o le fasioti tagata, o le onaga, o le poula, ma mea faapena: ou te muai tau atu nei ia te outou pei ona ou fai atu anamua, o e fai mea faapena, e le fai le malo o le Atua mo latou tofi.

“A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni,

“O le agamalu, ma le le gaoia; e le faatulafonoina mea faapena.

“A o e o ia Keriso, ua faasatauroina e i latou le tino, ma ona manao, ma ona tuinanau.

“Afai ua tatou ola i le Agaga, ia tatou savavali foi i le Agaga.” (Kal. 5:19–25.)⁴

E i ai se mea maualuga atu nai lo le ola e pei o se meaola; e faaigoaina, o le malo faaleagaga lea e maua ai le alofa, le uiga silisili ona paia o le agaga o le tagata. O lo o i ai foi le agaalofa, agalelei ma isi uiga lelei uma.⁵

O lo o i ai se mea i totonu [o le tagata] o loo uunaia ai o ia e tu maualuga nai lo ia lava, e pulea lona siosiomaga, e pulea le tino ma mea uma faaletino ma ola ai i se lalolagi maualuga atu ma sili atu ona matagofie.⁶

E i ai se taunuuga sili atu o le tagata nai lo le na o se ola o se meaola. O se pa’i mai lena a le agaga! O alii uma o e ua faalogoina lena lagona ua i ai sana ia lava molimau, ma o tamaitai uma foi ua i ai se molimau a ia lava, o le tagata o se tagata ola e itulua. E i ai sona tino, e pei lava o isi meaola uma. Ae peitai e i ai ia te ia se mea e sau mai lona Tama i le lagi, ma ua ia te ia le aia tatau e maua ai, e gauai gofie i musumusuga, e gauai gofie i faatosinaga mai Matua Faalelagi, e ala i le Agaga Paia, o le sooupu i le va o le Atua le Tama ma lona Alo o Iesu Keriso.⁷

O le olaga o se suega e iloa ai po o fea o nei natura e lua tatou te mulimuli ai ma atiina ae.

O le ola ai o le tagata ua na o se suega e saili ai pe o le a taulai atu ana taumafaiga, lona mafaufau, lona agaga, i mea e fesoasoani i le ola lelei ma le faamalieina o ona natura faaletino, pe o le a ia faia ma mea e tulitulimata’i i lona olaga le maua mai o uiga tausaafia faaleagaga.

“O lagona faatamalii uma, o faatinoga le faatuaoia uma o le alofa; o mafatiaga lototoa uma mo le mea moni; o le sisii atu o ou lima i se mea e maualuga atu nai lo oe lava; o le lotonuu uma i se mea e lelei; o le faamaoni uma ma le le manatu faapito i se mataupu faavae; o fesoasoaniga uma i tagata; o faatinoga uma o le amio pulea; o loto toa uma o le agaga, e le faiaina e ala i le faafoliga po o tulafono, ae e ala, i le faia, ma ola i le lelei mo le lelei atili —o le faaleagaga lena.”⁸

E masani lava e i ai i totonu o le tagata se uiga paia e taumafai e uunai o ia i luma ma luga. Tatou te talitonu o lena mana e i totonu ia te ia, o le agaga lea e sau mai le Atua. Na ola le tagata ae lei sau i lenei lalolagi, ma ua i ai nei o ia iinei e taumafai e faaatoatoa le agaga o loo i totonu. E i ai se taimi i lona olaga, e tofu iloa ai e tagata ua i ai se manao ia oo atu i le Faavavau. E aapa atu lona agaga mo le Atua. O lenei lagona e aoao, ma e ao foi i tagata uma ona auai ma le faamaoni a’ia’i, i lea lava galuega tele e tasi— o le sailiga lea ma le atiinaega o le filemu faaleagaga ma le saolotoga.⁹

Ua tuuina mai le filifiliga, pe tatou te ola i le lalolagi e pei o ni meaola, pe tatou te faaaogaina mea ua ofoina mai e le lalolagi e fai ma auala o le ola ai i le lalolagi faaleagaga lea o le a taitaiina atu ai i tatou i le afioaga o le Atua.

O le uiga moni lava o lenei mea:

Pe tatou te filifilia le manatu faapito pe o le a tatou faafitia i tatou lava mo le lelei o isi;

Pe o le a tatou talisapaia le faamalieina o manaoga o le tino [ma] tuinanau, pe o le a tatou atiina ae le amio pulea ma le loto pulea.

Pe tatou te filifilia le ola le mama po o le ola mama;

Pe o le a tatou faamalosia le ita pe atinaeina le alofa;

Pe [tatou] te faatinoina le agaleaga po o le alofa;

Pe [tatou] te masalosalo pe loto tetele—tumu i le faamoemoe;

Pe tatou te faalata—le faamaoni ia i latou o e alolofa ia i tatou, i lo tatou atunuu, le Ekalesia po o le Atua—pe o le a tatou faamaoni.

Pe tatou te taufaaoleole, pe faamaoni, ma tausia a tatou upu;

Pe o [ia i tatou] se laulaufaiva taufaaleaga po o se laulaufaiva pulea.¹⁰

Pe faamata e tumau le faamalieina o se tagata i totonu o le faavasegaga ua tatou faaigoaina o le lalolagi o meaola, faamalieina i mea o le a avatu i ai e le lalolagi o meaola, e faamatuu atu e aunoa ma se taumafaiga e tineia ona tuinanauga ma faanaunauga ma see ese mamao ma mamao atu ai lava agai i le lalolagi o fiafiaga, pe faaaoga le loto pulea ma agai atu ai i olioliga faale-atamai, mamalu, ma le faaleagaga e faalagolago i le ituaiga filifiliga na te faia i aso taitasi, po o itula uma foi o lona olaga.¹¹

O se matuai luma lava i le natura o tagata pe afai o se tagata po o se faalapotopotoga o tagata, e ui ina ua faameaalofaina i se loto fuatia ifo e mafai ai ona tulai ae i le mamalu faaletagata i malo e le mafai ona malamalama i ai meaola e maualalo ifo, ae o la ua malie lava e usiusitai i lagona o meaola, e aunoa ma le faia o ni taumafaiga e lagonaina ai le olioli o le lelei aiai, mama, loto pulea, ma le faatuatua lea e tupu mai i le usitaia o tulafono sao! Paga le matautia o le tulaga ua i ai, aua ua fausia le tagata e “faamaualalo ane teisi o ia i agelu; ma ua faapaleina foi o ia i le mamalu ma le matagofie” (Salamo 8:5), a ua faamalieina o ia lava e fetolofa’i i le maualuga o i ai meaola.¹²

O le lalolagi i ona tulaga mamalu uma ma le ofoofogia, e le o le faaiuga ma le faamoemoega lea o le foafoaga. “… [O Lou] mamalu, ” o le fetalaiga a le Alii lava ia, ”( o le) faataunuuina lea o faaofuina o le tagata i le tino ola pea ma le ola e faavavau.” (Mose 1:39.) Ma o le tagata i lona faaaogaina o le meaalofa faalelagi o le filifiliga saoloto, e tatau ona lagonaina lona tiute, e tatau ona lagonaina lana matafaioi e fesoasoani i le Foafoa i le faataunuuina o lenei faamoemoega paia.

O le uiga moni o le olaga e le na o le ola, e le o fiafiaga, e le o le lauiloa, e le o le tamaoaiga foi. O le faamoemoega moni o le olaga o le faaatoatoaga o le tagata soifua e ala i taumafaiga taitasi, i lalo o taitaiga a musumusuga a le Atua

O le olaga moni o le tali atu lea i le mea silisili o i totonu o i tatou lava. O le ola tau lava o tuinanau, fiafiaga, faamaualuga, sailiga o tupe, ae le mo le lelei ma le agalelei, mama ma le alofa, fatuga, musika, fugalaau, fetu, Atua ma faamoemoega e faavavau, o le taofia lea o se tagata mai le olioli moni o le ola.¹³

O le faaleagaga e manaomia ai le pulea e le tagata o ia lava ma fesootaiga ma le Atua.

O le faaleagaga, o lo tatou faamoemoega moni, o le mafaufau lea i le manumalo ia te oe lava ma le fesootaiga ma le Atua.¹⁴

O le faaleagaga e uunaia ai le tagata e faatoilalo faigata ma saili ia saga maua atili le malosi. Pe a e lagonaina le faateleina o le malosi ma ua faalauteleina foi le agaga i le upumoni, o ni aafiaga aupito sili ia o le olaga. O le faamaoni i le tagata lava ia ma le faamaoni i uiga moomia maualuluga e atiina ae ai le faaleagaga. O le suega moni lava a soo se lotu, o le ituaiga tagata lea na te fausia. O le “faamaoni, amiotonu, nofo mama, agalelei, amio mama, ma le faia o mea lelei i tagata uma“ [tagai Mataupu Faavae o le Faatuatua 1:13] o uiga tausaafia ia e fesoasoani i le mauaina o le tulaga aupito maualuga e oo i ai le tagata. O le “paia o loo i totonu o le tagata, o le meaalofa silisili, ma le faapaleina lea e avea ai o ia ma tupu o mea uma na foafoaina.”¹⁵

O le tagata e … [i ai] lona manatu e fai ia lelei atili le lalolagi lea e nofo ai, ma naunau e fai sona sao i le fiafia o lona aiga ma ana uo, ma na te faia foi mea uma mo le viiga o le Atua, o le a oo lava ina ia faafitia ia lava ona o nei manatu, ma ia atiina ae ai lona faaleagaga. E moni, seiloga lava na te faia lenei mea ona mafai lea ona ia tulai i luga atu o le lalolagi o meaola.¹⁶

O le faaleagaga ma le ola mama e pei ona aoaoina e le Au Paia o Aso e Gata Ai o loo taula mau i muai mataupu faavae, o mataupu faavae ia e le mafai ona sola ese ai le lalolagi e tusa lava pe manao i ai, ma o le mataupu faavae muamua lava o se talitonuga—i le Au Paia o Aso e Gata Ai o se malamalama—o loo i ai se Atua patino. O loo aoaoina fanau a le Au Paia o Aso e Gata Ai ia iloa o ia, ma tatalo atu ia te ia e pei o se tagata e mafai ona faafofoga ma lagona ma faalogoina e pei lava o se tama faalelalolagi ona mafai ona faalogo, lagona ma lagonaina, ma ia latou uluitino i o latou tagata, mai o latou tina ma o latou tama, le molimau moni sa fetalai mai lenei Atua i lenei tisipenisione. E i ai se mea moni e uiga i lenei mea.¹⁷

Ou te molimau atu o loo tatala le laina o fesootaiga, ma ua saunia le Alii e taitai ma o loo ia taitaiina lona nuu. Pe le aoga ea lena e tetee atu ai i se tofotofoga, e sailia se avanoa e faamalie ai o outou manaoga po o mea ua outou faananau i ai e pei ona faia e nisi, ma pe afai latou te faia, ona tape lea o le igoa mai le ekalesia, ona o le faamalieina lava o se vaivaiga po o se lagona malosi? O loo tatalaina mai mo oe—e lua ala o loo tatala. O le tasi e taitaiina atu i le agaga, o le molimau a le agaga lea e ogatasi ma le agaga o le foafoaga, o le Agaga Paia lea. O le agaga o le Alii e aumaia le ola i agaga uma, i totonu o le Ekalesia po o fafo atu foi. O Ia o loo tatou ola ma fegaoioiai ai ma maua ai o tatou tino, ae o le molimau a le Agaga Paia o se avanoa faapitoa. E pei lava o le kiina o lau leitio ma e lagona atu ai se leo mai le isi itu o le lalolagi. O tagata e le o i totonu o le malosi o lena li’o o le leo, e le mafai ona lagonaina, e te faalogoina lena leo ma e ia te oe foi le aia tatau mo lena leo ma lana taitaiga ma o le a e maua pe afai e te faia lau vaega. Ae afai e te gauai atu i ou lava lagona, o ou lava manaoga, o ou lava fiafiaga, ma faamaualugaina oe lava i mafaufauga ma fuafuaga ma faiga alualua, ma manatu o le a le faasalaina ai oe i lena mea, ona amata ai lea ona oo mai le pogisa. Ua e faataunuuina ou tuinanau ma faananauga ma ou manao, ae ua e faafitia le agaga; ua e momotuina le fesootaiga i le va o lou agaga ma le Agaga Paia.¹⁸

Ou te le mafai ona mafaufau i se isi mataupu maualuga atu ma sili atu ona faamanuiaina nai lo le ola i le Agaga ina ia mafai ona tatou fesootai ma le Faavavau.¹⁹

Pe a avea le Atua ma totonugalemu o o tatou tagata, o le a tatou mataalia i se faamoemoega fou o le olaga—ausia o le faaleagaga. O le a le toe avea ma sini autu o le olaga le tamaoaiga faaletino. O le faaleagaina, fafaga, ma faamalie le tino e pei ona faia e soo se meaola, o le a le toe avea ma mutaaga autu o le olaga faitino. O le a le vaavaai atu foi i le Atua i le tulaga faapea po o le a se mea e mafai ona tatou maua mai ia te ia, ae o le a se mea e mafai ona tatou tuuina atu ia te ia.

E na o le tuuina atu atoa o lo tatou ola i totonu po o tatou loto e mafai ai ona tatou tutu i luga a’e o le manatu faapito, ma faaosoosoga o le natura. … O le tulaga o le agaga i le tino, e faapena foi le Atua i le agaga. Pe a tuua e le agaga le tino, ona mate lea o le tino, ma pe afai tatou te tuueseina le Atua mai o tatou olaga, ona leai foi lea o se faaleagaga. …

… Ia tatou faia se faaiuga e amata atu nei ona avea i tatou ma alii ma tamaitai o uiga mama ma le paia, ia mataalia atili i o tatou vaivaiga, ia faaopoopo le agalelei ma le agaalofa i vaivaiga o isi. Ia tatou faia se faaiuga o le a tatou saga faatinoina le loto pulea i totonu o o tatou aiga; o le a pulea lo tatou ita, o o tatou lagona, ma o tatou laulaufaiva ina ia latou le sopo atu i tuaoi o le sa’o ma le mama; o le a tatou faateleina le sailiga e atiina ae le itu faaleagaga o o tatou olaga, ma iloa e tatau lava ona tatou faalagolago i le Atua mo le manuia i lenei olaga.²⁰

O le moni o le Atua le Tama, o le moni o Iesu Keriso, le Alii toetu, o se upu moni e ao ona i ai i agaga o tagata uma. O le Atua o le totonugalemu o le mafaufau o le tagata, e faapei foi ona moni o le la o le totonugalemu o lenei lalolagi, ma o le taimi lava tatou te lagonaina ai lona tulaga faa-Tama, o le taimi lava tatou te lagona ai lona latalata mai, o le taimi foi e lagona ai le paia o le tulaga faale-atua o le Faaola, e faapena lava ona sosoo mai ai ma upumoni o le talalelei a Iesu Keriso e faapei foi ona sosoo o le ao ma le po, o le po foi ma le ao.²¹

Fautuaga mo Suesuega ma Talanoaga

Aisea e tatau ai ona i ai se natura faaletino ma le faaleagaga? E mafai faapefea ona faaaogaina o tatou manaoga ma tuinanauga mo le lelei po o le leaga?
Sa aoao mai Peresitene MaKei o le olaga o se suega e iloa ai po o le fea natura o le a tatou mulimuli ai (Tagai i itulau 17–19). O a ni ala tatou te iloa ai le feteenai i le va o natura faaletino ma le faaleagaga? O a ni filifiliga e mafai ona tatou faia i aso taitasi e maua ai le fiafia i nei meaalofa faaleagaga e pei o le alofa, olioli, ma le filemu? (Tagai i itulau 16–22).
O le a le “tagata o le lalolagi ”? (Mosaea 3:19). Aisea e avea ai le tagata o le lalolagi ma le ita i le Atua? O le a le mea e tatau ona faia e “tuu ese” ai le tagata o le lalolagi? (Tagai i itulau 20–22.)
O a ni aafiaga e mafua ai ona taulai atu le toatele o tagata i le faamalieina na o natura faaletino o o latou olaga? Aisea e faigata ai i nisi o taimi ona taulai atu i mea faaleagaga?
O a nisi o sese faatauvaa e mafai ona taofia lo tatou alualu i luma faaleagaga? E mafai faapefea e le atiinaeina o le loto pulea ona fesoasoani ia i tatou e faateleina lo tatou faaleagaga? (Tagai i itulau 20–22.)
E faapefea ona aafia lou faaleagaga i la oulua fesootaiga ma le Atua? (Tagai i itulau 20–22.) O a ni mea e mafai ona e faia e taulai atu ai lou olaga i le Atua le Tama ma Iesu Keriso?

O Mau e Faatatau I Ai:Iopu 32:8; 2 Nifae 2:27–29; Mosaea 16:1–5; Aperaamo 3:24–25