Mataupu 22

Filifiliga Saoloto ma le Tiutetauave

O le ituaiga o tagata e te manao e avea ai oe, e faalagolago ia te oe i lou lava tagata patino. Ua e i ai i lenei lalolagi e filifili le sa’o po o le sese, ia talia le sa’o po o le gauai atu i le faaosoosoga. I luga o lena filifiliga o le a faalagolago i ai le faatupuina o lou itu faaleagaga. E taua lena i le talalelei a Iesu Keriso.¹

Folasaga

Sa auauna atu Peresitene Tavita O. MaKei e silia ma le onosefulu tausaga i le avea ai ma uso o le Au Pulega Aoao, ma i le gasologa o lea vaitaimi sa molimauina ai e ia le tele o mea taua maoae i le talafaasolopito o le lalolagi. Sa ia vaai i le faanunununu i le lalolagi atoa, e aofia ai taua e lua a le lalolagi, o le salalau o feteenaiga faaleitumalo, ma le mapuna ae mai malo malolosi o le tau faamata’u mai o taua faaniukilia. Sa soifua foi o ia i le vaitaimi maoae faalesoifuaga ma suiga faalevafealoai, e pei o le Pau Tele o le Tamaoaiga ma le faatupulaia o le talia e le lalolagi o le faamalieina vave o tuinanau e ala i uiga feusua’i ma le faaaoga o fualaau faasaina. I le avea ai ma se molimau musuia o le talafaasolopito, sa ia saunoa atu i uso o le Ekalesia i taimi e tele e uiga i le filifiliga saoloto ma tiutetauave o tagata taitoatasi. I se lauga o se konafesi sa tuuina atu ina ua mavae le ulu atu o le Iunaite Setete i le Taua I a le Lalolagi, sa faapea ona saunoa ai Elder MaKei (o le vaitaimi lena sa avea ai o ia ma uso o le Korama a Aposetolo e Toasefululua) e uiga i mea matautia ua siomia ai le lalolagi:

“Ou te le talitonu na faatupuina e le Atua le mafatia, o le oge, o faama’i, ma le oti lea ua tafia ai nei atunuu o Europa ua masofa i le taua. Ou te talitonu o tulaga o i ai le lalolagi i aso nei o se iuga tuusa’o lea—o se iuga le maalofia, o le le usiusitai i tulafono a le Atua. … E mafai e tagata ona filifili le sa’o pe mafai foi ona latou filifilia le sese; e mafai ona latou savavali i le pogisa pe mafai foi ona latou savavali i le malamalama; ma e ou te fai atu ia te outou, e le o tuua e le Atua lana fanau e aunoa ma le malamalama. Sa ia tuuina mai ia i latou i augatupulaga eseese o le lalolagi le malamalama o le talalelei lea e mafai ona latou savavali ai ae le tautevateva, lea e mafai ona latou maua ai lena filemu ma le fiafia lea e finagalo ai o ia, i le avea ma se Tama alofa, lea e tatau ona olioli ai lana fanau, peitai e le aveesea lava e le Alii mai ia i latou lo latou saolotoga e filifili ai.”²

E ui lava sa silafia e Peresitene MaKei mala na e mafai ona tutupu pe a filifilia e tagata le leaga, ae sa tumau pea ona ia faafetai e le aunoa mo le meaalofa o le filifiliga saoloto. Sa malamalama o ia i faamanuiaga na e sau mai filifiliga amiotonu, ma sa ia faamanatu atu ia i latou sa ia aoaoina o le saolotoga e filifili ai o se vaega taua o le ata o le faaolataga. I ana tusitusiga e uiga i le mataupu o le filifiliga saoloto, sa le aunoa ona ia faasino i ai o se “meaalofa aupito sili a le Atua i le tagata.”

O Aoaoga a Tavita O. MaKei

O le meaalofa e faavavau o le filifiliga saoloto e faatagaina ai i tatou e alualu i luma ma maua le faaeaga.

O le filifiliga saoloto o se puna faatauanau o le alualu i luma o le agaga. O se faamoemoega o le Alii ia avea le tagata faapei o ia. Ina ia ausia la e le tagata lenei mea, sa tatau ai muamua i le Foafoa ona tuu faasaoloto o ia.³

E i ai se mau taua o i le [tusi o Faaaliga] e uiga i “se taua i le lagi.” (Faaa. 12:7.) E le gata foi i le taua, ae foliga mai e feteenai, aua ua tatou manatu i le lagi o se nofoaga selesitila o le olioli, o se tulaga e le mafai ona tutupu ai taua ma finauga. E taua lea fuaitau aua ua faatatau i le saolotoga e filifili ai faapea ma mea o faia i le lalolagi o agaga. I le Penina Tau Tele ua tuuina mai ai ia i tatou le tala lenei: “O le mea lea, ona o le fouvale o Satani ia te au, ma lona saili e faaumatia le saolotoga o le tagata, ua tuuina atu e au le Alii le Atua, ia te ia, i le ma le tasi foi, ia ou avatu ia te ia lo’u lava mana; o lea na ou faia ai le mana o lo’u Atalii e Toatasi na Fanaua, ia tuli ese atu o ia i lalo;

“Ona avea ai lea o ia ma Satani, ioe, o le tiapolo lava lea, o le tama o pepelo uma, e faasese ma faatauaso mafaufau o tagata, ma taitai faatagataotaua i latou i le mea na te loto i ai, i latou uma ia o e e le faalogo i lo’u leo.” (Mose 4:3–4; ua faaopoopo le faatusilima.)

E lua mea e te matauina i lena fuaitau: muamua, sa naunau Satani e faaumatia le filifiliga saoloto o le tagata. O le filifiliga saoloto o se meaalofa a le Atua. O se vaega lea o lona faaleatua. O le mataupu lona lua sa manao o ia ia suitulaga i le Atua. Ou te sii maia, “Ia tuu mai ia te a’u lou mamalu.” [Tagai i le Mose 4:1.]

E le malamalama le lalolagi i le taua o lena meaalofa faaleatua i le tagata. E fanau mai ma le tagata e pei lava o le malamalama, ua ta’u mai ia i tatou, sa le foafoaina pe gaosia pe mafai foi ona faia [tagai i le MFF 93:29]⁴

O le saoloto o le filifiliga ma le tiutetauave e aumaia faatasi ai o ni vaega taua ia o aoaoga a Iesu. I lana auaunaga atoa lava sa ia faamamafa mai ai le aoga o le tagata, ma avea ma faataitaiga o le mea o faamatala mai i faaaliga i ona po nei o le galuega ma le mamalu o le Atua—“Ia faataunuu le faaofuina o le tagata i le tino ola pea ma le ola faavavau.” [Mose 1:39.] Na o le meaalofa faaleatua lava o le saolotoga o le agaga e mafai ai ona maua lena alualu i luma.

O le fai faamalosi, i le isi itu, e sau mai ia Lusifelo lava ia. E oo lava i le tulaga o le tagata i le [muai olaga], sa sailia e Satani le mana e fosi ai le aiga tagata ia fai lona loto e ala i le fai atu e le aoga le filifiliga saoloto o le tagata. Ana fai sa talia lenei fuafuaga, semanu e avea tagata faapei o ni papeti i lima o se pule malosi, ma semanu e le aoga le faamoemoega o le sau o le tagata i le lalolagi. O le mea lea, o le ituaiga faiga malo sa faatu mai e Satani, sa teena, ae faatuina le mataupu o le filifiliga saoloto.⁵

E ui lava sa foafoaina e le Atua le atulaulau ma mea uma o i ai, o le “tagata o le maataua (penina) a le Atua.” O se tasi lea auala e fai atu ai sa foafoaina le lalolagi mo le tagata ae le o le tagata mo le lalolagi. Sa tuuina atu e le Atua i le tagata se vaega o lona faaleatua. Sa ia tuuina atu i le tagata le mana e filifili ai, ma e leai se isi meaola i le lalolagi o i ai lea mana. O lea sa ia tuu atu ai i luga o le tagata le matafaioi o le pulea o ia lava o se tagata e faavavau. E le mafai ona e manatu i se isi lava meaalofa e sili atu e mafai ona oo mai i se alii po o se tamaitai, nai lo le saolotoga e filifili ai. E pau ia te oe e toatasi le tiute, ma o le pulea ma le faaaogaina o lena saolotoga e filifili ai, e te tuputupu ae ai i le amio, e te tuputupu ae ai i le malamalama, e te faalatalata atu ai i le faaleatua, ma oo ina mafai ona e ausia lena faaeaga maualuga. O le matafaioi sili lena. E toaitiiti naua tagata e talisapaia. O auala ua uma ona faailoga manino mai—o le tasi e ola ai manu, o le isi o le ola atali. Ae peitai, o le foafoaga aupito sili a le Atua o le —tagata … e masani ona faamalieina e totolo i lalo i le tulaga o manu.⁶

E pito atu i le faaeeina mai o le ola lava ia, o le aia e taitai ai lena olaga, o le meaalofa aupito sili lea a le Atua i le tagata. … O le saolotoga e filifili ai e tatau ona sili ona faapelepele i ai nai lo se isi lava oa e mafai ona tuuina mai e le lalolagi. E i totonu o le agaga o le tagata. O se meaalofa faaleatua. … Pe fanau mai i se tulaga maulalo o le mativa po o le saisaitia i le taimi o le fanau mai i oa na maua mai se tuaa ua maliu, e i ai i tagata uma lava lenei meaalofa aupito sili o faaeega uma o le olaga—o le meaalofa o le filifiliga saoloto; o le aia na fanau mai ma le tagata ma e le maaveesea.⁷

Ua faaalia mai i mau o i Tusitusiga Paia o le [filifiliga saoloto] o le (1) e taua i le faaolataga o le tagata; ma le, (2) e mafai ona avea ma se fuafaatatau u’amea, e mafai ona faamasinoina ai mea e faia e tagata, o faalapotopotoga, o malo.

“O lenei, ia outou loto tetele, ma ia manatua ua tuusaoloto lava outou—ina ia filifili e outou le ala o le oti e faavavau, po o le ala o le ola faavavau.” (2 Nifae 10:23.)⁸

O le filifiliga saoloto e o mai faatasi ma le tiutetauave patino ia faataunuu le “faamoemoega moni o le olaga.”

O le tiutetauave e i luga o tagata taitoatasi e filifili ai le ala o le amiotonu, o le faamaoni ma le tiute i uso a tagata. Afai na te [filifilia] se isi mea, ma o le iuga e [fetaia’i] ai ma le toilalo, puapuagatia ma le oti, ma o ia lava e pau i ai lena tulaga. E pei ona saunoa mai Peresitene [Polika] Iaga i se tasi taimi:

“Afai e uia e Uso Polika se ala sese ma punitia ai o ia mai le malo o le lagi, e leai se tagata e tuua’i i ai a o Uso Polika lava ia. Na o a’u lava le tagata i le lagi, lalolagi, po o seoli, e mafai ona tuua’ia.

“E faapena foi la lenei tulaga i tagata uma o le Au Paia o Aso e Gata Ai. O le faaolataga o se gaoioiga e patino i le tagata lava ia. … Pe a auina mai ia te a’u le faaolataga, e mafai ona ou teena pe ou te taliaina foi. I lo’u taliaina, ou te gauai atu ai i le usiusitai atoatoa ma le gauai atu i le Tupuga sili i lo’u olaga atoa, ma i latou foi sa ia tofia e aoao ia te au; o lona teena, ou te mulimuli ai i le mea e ta’u mai e lo’u lava loto o se mea ua sili atu nai lo le finagalo o lo’u Foafoa.” [See Discourses of Brigham Young, sel. John A. Widtsoe (1954), 390.]⁹

O le i ai o le filifiliga saoloto e sau ai foi ma le tiutetauave. Afai e tatau ona tauia le tagata i lona amiotonu ae faasalaina i le amioleaga, ona manaomia lea e le faamasinoga tonu masani le tatau ona tuuina atu ia te ia o le mana o le galue tutoatasi. O se malamalama i le lelei ma le leaga e taua i le alualu i luma o le tagata i le lalolagi. Ana fai e faamalosia o ia e fai le mea sa’o i taimi uma, pe faasufia foi ma le vaivai e fai le agasala, semanu na te le maua se faamanuiaga mo le mea muamua po o se faasalaga foi mo le mea lona lua. …

… O le tiutetauave o le tagata e feauga lelei lava ma galulue faatasi ma lana filifiliga saoloto. O amioga e tusa ai ma le tulafono faaleatua ma tulafono faalelalolagi e aumaia ai le fiafia, a o mea e tuufaafeagai ma le upumoni faaleatua e aumaia ai le puapuaga. E i ai i le tagata le tiutetauave e le gata i mea uma na te faia, a o upu faatauvaa uma foi ma mafaufauga. Na fetalai mai le Faaola:

“… o upu faatauvaa uma e faia e tagata, latou te talatala atu ai le tala i le aso faamasino.” (Mataio 12:36.)¹⁰

O le lalolagi i lona matagofie uma ma le ofoofogia, e le o le iuga lea ma le faamoemoega o le foafoaga. “…o lo’u mamalu, ” sa fetalai mai ai le Alii lava ia, “(o le) ia faataunuu le faaofuina o le tagata i le tino ola pea ma le ola faavavau.” (Mose 1:39.) Ma o le tagata i le faaaogaina o le meaalofa faaleatua o le filifiliga saoloto e tatau ona lagona o loo ia te ia le tiute, e tatau ona lagona le matafaioi o le fesoasoani i le Foafoa i le faataunuuga o lenei faamoemoega paia.

O le iuga moni o le olaga e le o le na ona ola ai, e le o le fiafia, e le o le lauiloa, e le o oa. O le faamoemoega moni o le olaga o le faaatoatoaina o le tagata e ala atu i taumafaiga a le tagata lava ia, i lalo o le taitaiga a musumusuga a le Atua.¹¹

E itiiti ae taua ni mea e mafai e tagata uma ona fai. O se tasi o nei mea o le tatau lea i tagata taitasi ona galueaiina lona lava faaolataga. O se mataupu faapitoa a le Ekalesia o le tatau lea i tagata taitasi ona ia tauaveina lenei tiutetauave, ma o le faaolataga o le tagata o se taumafaiga o le faatupuina faifai lemu. … E tatau ona tatou sailia le malosi ma le alofa tunoa o le Atua mo musumusuga ia maua le manumalo mulimuli.

Ae peitai, ina ia galueaiina le faaolataga, e le tatau i se tasi ona na ona nofonofo faasamasamanoa, ma moemiti ma moomoo mo le Atua na te sunu’i faavavega maia faamanuiaga e tele i luga o tatou vae. O lona uiga ia faia i aso taitasi, itula taitasi, i le taimi lava lena, pe a tatau ai, le galuega po o le tiute ua manaomia i lena lava taimi, ma faaauau ai ma le fiafia i lena taumafaiga a o loo sau ma mou atu tausaga, ma tuua ai fua o na galuega ia te oe lava ia po o isi, e faaeeina atu e tusa ai ma le filifiliga a le Tama e tonu ma agalelei.

E le o galo ai ia te au le mau lea e tautino mai, “Aua o le alofa tunoa ua faaolaina ai outou i le faatuatua, e le mai ia te outou foi lea; a o le mea ua foaiina mai e le Atua.” [Tagai i le Efeso 2:8.] E matua moni lava lena mea, aua i le tauaveina e le tagata i ona lava luga o le tino faaletino sa [le ia te ia se mana] e faaolaina ai o ia lava. “Pe ana tuu e tau autago solo i se tulaga faaletino, semanu e avea o ia, ma avea ai ma “se faaletino, ma tuinanau ma faatiapolo.” [Alema 42:10.] Peitai o le Alii e ala mai i Lona alofa tunoa na faaali mai i le tagata, ma tuuina atu ia te ia le Talalelei po o le fuafuaga e faavavau lea e mafai ai e ia ona siitia ae i luga atu o mea faaletino ma manatu faapito o le olaga ma ausia le atoatoa faaleagaga.

Ae tatau ona siitia ae o ia e ala i ana lava taumafaiga ma e ao ia te ia ona savali i le faatuatua.¹²

O le filifili e usiusitai i mataupu o le talalelei e aumaia ai le fiafia, filemu, ma le faaolataga.

O le faia e tusa ai ma le afioga po o le tulafono a le Alii o le a le aunoa ai ona fesoasoani i le fiafia ma le faaolataga o le tagata. O i latou e le faia mea e poloaiina ai e le Alii, ua ta’u mai ia i tatou, o le a tuuina atu i lalo o le amiotonu ma le faamasinoga. I se isi la faaupuga, o loo faagaoioia e faavavau i le lalolagi o amioga, se tulafono o le tauia ma le faasalaina—o le tauia o le ola lea e tusa ai ma le tulafono; o le faasalaina i lona uiga moni lava, o le le usiusitai.¹³

O le filemu o Keriso e le oo mai i le saili o mea papa’u o le olaga, e le sau foi sei vagana e puna mai le loto o le tagata. Na fetalai atu Iesu i Ona soo: “Ou te tuuina atu ia te outou le manuia. O lo’u manuia ou te avatu ai ia te outou; ou te le avatu ia te outou faapei ona avatu e le lalolagi.” [Ioane 14:27.] Sa faapea ona tuuina atu e le Atalii o le Tagata i le avea ma se na te faataunuu lona lava finagalo ma le molimau, i ona soo faapea ma tagata le “uluai faamanuiaga o faamanuiaga uma lava o le tagata.” O se tofi sa faalagolago i luga o le usiusitai i mataupu o le Talalelei a Iesu Keriso. Ua faapea ona tuuina mai ai i tagata taitoatasi. E leai se tagata na te maua le filemu i lona loto po o lona Atua foi, e le faamaoni ia te ia lava, o le na te solia le tulafono o le sa’o po o le feagai ai foi ma ia lava, e ala i le faamatuu atu i manaoga, tuinanau, ma gauai atu i faaosoosoga e faasagatau mai i lona loto fuatia ifo, pe i lona feagai ai foi ma ona uso a tagata, ua le faamaoni i lo latou faalagolagoina o ia. O le filemu e le oo mai i le na te solia le tulafono; o le filemu e oo mai i le usiusitai i le tulafono, ma o le savali lena e finagalo Iesu tatou te talai atu i tagata.¹⁴

Na tuuina mai ia i tatou e Iesu Keriso, le Faaola o le lalolagi, ia ala e mafai ai e le tagata ona maua le fiafia e faavavau ma le filemu i le malo o lo tatou Tama, peitai e tatau i le tagata ona galueaiina lona lava faaolataga e ala i le usiusitai i mataupu e faavavau ma sauniga o le talalelei.¹⁵

I le avea ai ma uso a tagata, e tatau ona tatou talisapaia le saolotoga ma faatupuina lona faaaoga tatau.

O le saoloto e tautala, saoloto e faia mea i totonu o tapulaa na e le faalavelave i le saolotoga o isi o ni … meaalofa faaleagaga ia “e taua i le mamalu o le tagata soifua ma le fiafia faaletagata.”¹⁶

O le saolotoga e mafai ona fesoasoani pe faaumatia ai foi e tusa ai ma lona faaaogaina … “O le saolotoga o se siosiomaga o se olaga maualuga atu. … Saolotoga?—o le faaaloalo. … E ao ona faia tagata ia mafai ma ia agavaa mo le [saolotoga], a le o lena e le mafai ona ola faatasi ma isi tagata.”¹⁷

O le saolotoga moni i tagata e aofia ai le olioli i aia uma na e fesoasoani i le maua e se tasi o le filemu ma le fiafia, pe afai lava o le faaaogaina o lea avanoa e le faalavelave ai i lena avanoa e tasi o maua e isi. E le aofia ai le faia o le mea e manao ai se tasi, a o le faia o le mea e tatau i se tasi ona fai. O se aia a tagata taitoatasi le pulea o lona lava taimi ma mea e fai e tusa ai ma le amiotonu i ona uso a tagata ma ia tusa ai ma tulafono a le Atua. … O le saolotoga lea e filifili ai, o se meaalofa faaleatua, o se uiga lelei taua i se nuu toafilemu.¹⁸

I nei aso o le le mautonu ma le le mapu, o le matafaioi aupito sili a tagata e fiafia i le saolotoga ma se tiute sili, o le puipuia lea ma tala’i atu le saolotoga o le tagata, o lona vafealoa’i ma le Atua, ma le … manaomia o le usiusitai i mataupu o le talalelei a Iesu Keriso—ona pau lea o le mea e maua ai e le tagata le filemu ma le fiafia.¹⁹

Afai tatou te fia avea le lalolagi ma nofoaga e sili atu, ia tatou faatumauina se talisapaia faagaeetia o le…le saisaitia ma le saolotoga.²⁰

Fautuaga mo Suesuega ma Talanoaga

Aisea na tuu mai ai e le Atua ia i tatou le filifiliga saoloto? (Tagai i itulau 230–32.) Aisea sa manao ai Satani e aveesea mai ia i tatou la tatou filifiliga saoloto? (Tagai i itulau 230–31.)
O a ni auala o loo faaauau ai pea e Satani ona taumafai e faatosinaina la tatou filifiliga saoloto? E mafai faapefea ona tatou teena na taumafaiga?
O le a se taiala ua saunia e le Alii e fesoasoani ia i tatou e faaaoga ai la tatou filifiliga saoloto ma le amiotonu? O le a se fautuaga e mafai ona e tuuina atu i se tasi o tauivi ia iloa le va o le sa’o ma le sese?
O a ni auala e mafai e matua ona aoao ma koleni ai a latou fanau seia lava lo latou matutua e filifili ai mo i latou lava? E mafai faapefea ona tatou faamamaluina le filifiliga saoloto o tagata o le aiga, ma i le taimi lava lena e tasi ia fesoasoani ia i latou e faia filifiliga sa’o? E mafai faapefea ona tatou fesoasoani i tagata o le aiga ia malamalama i taunuuga o a latou filifiliga?
Na aoao mai Peresitene MaKei e faapea o le faamoemoega o le ola “o le faaatoatoaga o le tagata e ala i taumafaiga taitoatasi, i lalo o le taitaiga a musumusuga a le Atua” (itulau 234). E mafai faapefea e le filifiliga saoloto ona fesoasoani ia i tatou e faataunuu lenei faamoemoega faaleatua? (Tagai i itulau 232–35.) O a ni o tatou tiutetauave taitoatasi i le faaaogaina o la tatou filifiliga saoloto? (Tagai i itulau 232–35.)
O le a se faia o le filifiliga saoloto patino ma le Togiola a Iesu Keriso?
E mafai faapefea e lo tatou faaaogaina ma le amiotonu o le filifiliga saoloto ona tatou saoloto ai?
E mafai faapefea ona tatou fesoasoani e puipuia le saolotoga ma faatupuina le faaaogaina tatau o saolotoga o tagata taitasi? (Tagai i itulau 236–37.)

O Mau e Faatatau i Ai:Iosua 24:15; 2 Nifae 2:14–16, 26–28; Alema 5:40–42; Helamana 14:30–31; MFF 58:26–28; 130:20–21; Aperaamo 3:24–28