Blong Ol Lida—Stap Givim Trening mo Sapotem Ol Tija

Olsem wan lida, yu gat responsabiliti ia blong “mit wetem ol tija we oli jes singaotem”, insaed long oganaesesen blong yu mo “helpem olgeta rere long ol koling blong olgeta” (Jeneral Hanbuk, 17.3, Gospel Laebri).ChurchofJesusChrist.org/study?lang=bis Ol miting ia oli givim janis blong introdiusum wan niu tija long tabu koling blong olgeta mo givim insperesen long olgeta wetem wan lukluk long wanem nao i minim blong tij folem wei blong Sevya. Olsem wan lida, yu save helpem ol niu tija blong givim seves taem oli mekem ol samting ia:

• Soem strong tingting se bae Sevya bae i helpem olgeta long ol koling blong olgeta (luk long Doktrin mo Ol Kavenan 88:78).

• Givim long ol niu tija wan kopi blong buk ia, mo leftemap tingting blong olgeta blong lukaotem ol wei blong tekem aksen long ol prinsipol long ol tijing blong olgeta.

• Serem wetem ol niu tija eni samting abaot oganaesesen blong yu we bae i save helpem olgeta.

• Sapos i nid, talem long ol niu tija wij rum blong oli tij mo wanem lesen blong oli stat wetem. Givim eni infomesen oli nid blong save abaot klas blong olgeta mo ol memba insaed long klas.

• Eksplenem long ol niu tija se yu save helpem olgeta long koling blong olgeta. Givim sapot insaed long klasrum mo yu save yusum ol tijing tul sapos oli nidim.

• Wanwan taem, askem sapos yu save wajem ol tija taem oli tijim ol klas, mo givim sam tingting long olgeta taem Spirit i toktok.

• Invaetem ol tija blong tekpat long ol tija kaonsel miting long evri kwota.

Truaot long seves blong ol tija, gohed blong mit wetem olgeta wanwan taem blong stap gohed blong givim sapot. Eksampol, yu save gat wan smol storian wetem tija bifo o afta klas blong tokbaot ol prinsipol blong Tij Folem Wei blong Sevya. Askem ol tija abaot wanem oli filim se oli stap mekem i gud mo ol wei we oli wantem blong kam moa gud. Leftemap tingting blong olgeta wetem fasin blong stap kaen wetem fasin blong talem tangkyu long seves we oli givim.

Yu mas rere from ol storian ia blong toktok raon long olgeta, taem yu stap wajem tija i tij. Lukaotem blong andastanem moa wanem ol tija oli gud long hem mo faenem ol wei blong yu save helpem olgeta. Blong mekem ol tija oli kam strong moa i impoten tu olsem long hemia blong luksave weaples yu save help long hem.