Jisas i pulumaot Pita i kamaot long strong win blong wota

Hem we I Stat Kasem En blong Stamba blong Bilif, i kam long J. Alan Barrett

Invaetem Fasin blong Wok Wetem Strong Tingting blong Stap Lanem Samting

I tru i wan naesfala samting tumas blong luk Sevya i stap wokbaot antap long wota. Be hemia i no inaf blong Pita. Hem i wantem blong mekem wanem we Sevya i bin mekem, stap long ples we Hem i bin stap long hem, mo kasem semmak eksperiens hemwan. “?Masta, i tru, yu ya? Sapos i olsem, yu talem long mi blong mi wokbaot antap long wota, mi kam long yu,” hem i talem. Sevya i ansa wetem wan simpol invitesen: “Kam.” From hemia, Pita i kamaot long sef ples blong bot mo i soem long yumi se, fasin blong stap olsem wan disaepol i no wan eksperiens blong stap nating (luk long Matiu 14:24–33). Hemia i nidim fet long Kraes mo fasin blong wokhad oltaem. Be hemia tu i karem i kam rij blesing blong stap wokbaot wetem Sevya.

“Kam.” “Kam mo luk.” “Kam, folem mi.” “Ale, yu go, yu mekem olsem we hem i mekem” (Matiu 14:29; Jon 1:39; Luk 18:22; 10:37). Long stat blong seves blong Hem, Sevya i invaetem olgeta we oli stap folem Hem blong olgetawan oli eksperiensem ol trutok, paoa mo lav we Hem i givim. Hem i mekem hemia from se hemia nao i tru mining blong stap lanem samting. I no blong stap lisin o rid nomo; be tu, blong stap jenis, sakem sin mo stap muv i go fored. Long toktok blong Sevya, blong lanem samting hem i “tru long stadi mo tu, tru long fet” (Doktrin mo Ol Kavenan 88:118; oli ademap italik). Mo fet i nidim tu blong tekem aksen mo i no blong gat samting i tekem aksen long yumi, (luk long 2 Nifae 2:26).

Taem yumi folem eksampol blong Sevya, yumi invaetem olgeta we yumi tijim blong askem, lukaotem, mo noknok—mo afta, faenem (luk long Matiu 7:7–8). Mo yumi akseptem invitesen ia yumiwan. Tugeta, tru long fet blong yumiwan long Jisas Kraes mo fasin blong wok strong, bae yumi kam blong save blong yumiwan, wanem i minim blong stap wokbaot wetem Hem.

Invaetem Fasin blong Wok Wetem Strong Tingting blong Stap Lanem Samting

• Helpem olgeta we oli stap lan blong tekem responsabiliti blong stap lanem samting.

• Leftemap tingting blong olgeta we oli stap lan blong kam blong save long Jisas Kraes, taem we oli stap stadi long gospel evri dei.

• Invaetem olgeta we oli rere blong lan.

• Leftemap tingting blong olgeta we oli stap lan blong serem ol trutok we oli stap lanem.

• Invaetem olgeta we oli stap lan blong laef folem wanem we oli stap lanem.

Sevya I Bin Helpem Ol Narawan blong Tekem Responsabiliti blong Stap Lanem Samting

Blong bildim ol sip blong oli save krosem sef ol bigfala solwota, i save kam wan wok we i had tumas blong eniwan blong mekem. “Han blong Lod i bin lidim brata blong Jared oltaem” (Ita 2:6), blong stap kasem ol instraksen abaot sep blong sip mo olsem wanem oli save kasem ea. ?Wanem nao yu luk long wei we Lod i bin ansa, taem brata blong Jared i bin askem blong oli save gat laet long ol sip? (luk long Ita 2:22–25). ?Long wanem wei nao brata blong Jared i bin kasem blesing tru long invitesen blong praktisim fet blong hem long wei ia? (luk long Ita 3:1–16).

Yu save ting se i moa isi blong save talem nomo long olgeta we oli stap lan abaot evri samting we yu ting se oli mas save. Be, Elda David A. Bednar i givim kaonsel: “Yumi no mas wantem blong stap talem ‘?Wanem bae mi talem long olgeta?’ Be kwestin we yumi save askem long yumiwan se ‘?Wanem nao mi save invaetem olgeta blong mekem? ?Wanem ol kwestin we i kam tru long insperesen blong mi save askem, sapos bae oli wantem blong ansa, bae i stat blong invaetem Tabu Spirit insperesen kam long laef blong olgeta?’” (evening with a General Authority, 7 Febwari, 2020, broadcasts.ChurchofJesusChrist.org).

Tingting long wanem wei nao yu save invaetem olgeta we oli stap lan blong tekem responsabiliti blong lanem samting olgetawan. Eksampol, yu save invaetem olgeta blong askem ol kwestin blong olgetawan, lukaotem ol ansa, tingting hevi mo serem o raetemdaon ol tingting mo filing blong olgeta. Taem oli mekem, bae oli mekem fet blong olgeta olgeta i kam strong moa, faenemaot trutok long toktok blong God, mo gat ol eksperiens blong olgetawan abaot ol trutok ia. Taem yumi tekem responsabiliti blong lanem samting yumiwan, yumi save talem olsem we Josef Smit i talem: “Mi kam blong save blong miwan” (Josef Smit—Histri 1:20).

Ol Kwestin blong Tingting long Hevi long Olgeta: ?From wanem hem i impoten blong olgeta we oli stap lan blong mas aktiv bitim blong tingting nating blong lanem samting? ?Olsem wanem bae yu helpem olgeta blong oli responsibol blong lanem samting olgetawan? ?Olsem wanem nao ol tija oli bin helpem yu blong mekem hemia? ?Wanem sam eksampol insaed long ol skripja we yu save tingbaot we oli bin invaetem ol pipol blong lanem samting olgetawan? ?Olsem wanem nao ol eksampol ia oli helpem yu long olsem wanem blong tij?

I Kam long Ol Skripja: 1 Nifae 11; Doktrin mo Ol Kavenan 9:7–8; 58:26–28; 88:118–125; Josef Smit—Histri 1:11–20

Sevya I Leftemap Tingting blong Ol Narawan blong Kam blong Save Hem Tru Fasin blong Stap Stadi long Toktok blong Hem.

Taem we taem blong Sevya i kam blong Hem i oganaesem Jos blong Hem long ol las dei, Hem i talem long ol wokman blong Hem: “Bae yu mas trastem olgeta samting we oli raetem finis;” (Doktrin mo Ol Kavenan 18:3). I tru, Buk blong Momon we kolosap oli finisim blong transletem, i gat insaed ol instraksen we oli help bigwan blong wok, i tokbaot tu, olsem wanem blong mekem baptaes, olsem blong blesem mo pasem sakramen, mo ol narafala impoten infomesen. Be Sevya i wantem tu blong ol wokman blong Hem oli luk ol revelesen olsem wan janis blong lisingud long Hem mo blong kam blong save Hem moa dip. Long semmak revelesen, Hem i talem long olgeta: “From voes blong mi nao i talem ol toktok ia long yufala; … Taswe, yufala i save testifae se yufala i bin harem voes blong mi, mo yufala i save ol toktok blong mi.” (Doktrin mo Ol Kavenan 18:35–36).

Tingbaot ol pipol we yu tijim. ?Olsem wanem oli tekem stadi blong skripja i impoten? Long situesen ia, wanem lukluk blong yu long hemia? ?Hemia i moa bitim wan nomol wok blong mekem evri dei? Taem yu stadi long ol skripja, ?yu yu stap harem Sevya i stap toktok i kam stret long yu? Presiden Russell M. Nelson i bin tijim: “?Wea nao yumi save go blong harem Hem? Yumi save go long ol skripja. … Blong draon evri dei long toktok blong God, i impoten blong yumi laef long saed blong spirit, speseli long ol taem ia we wol i gotru long bigfala jenis. Taem yumi lafet long ol toktok blong Kraes evri dei, ol toktok blong Kraes bae oli talem long yumi, olsem wanem blong ansa long ol hadtaem we yumi neva ting se bae yumi save fesem” (“Lisingud long Hem,” Liahona, Mei 2020, 89). Taem yu stap tij, leftemap tingting blong olgeta we yu stap tijim blong stadi long ol skripja wetem wan stamba tingting blong faenem Sevya—i no blong stap faenem ol ves o tru samting nomo abaot Hem be, blong stap faenem Hem. Blong stap harem voes blong Lod evri dei insaed long ol skripja i wan fandesen blong stap hadwok blong wan laeftaem, mo blong fasin blong dipen long yuwan blong stap lanem gospel.

Ol Kwestin blong Tingting long Hevi long Olgeta: Tingting long ol wei we yu stadi long ol skripja blong yuwan. ?Long wanem wei nao rilesensip blong yu mo God i kam strong, taem yu stap stadi long toktok blong Hem? ?Wanem nao yu save mekem blong kam antap long stadi blong yu? ?Long wanem wei nao bae yu givim insperesen long ol narawan blong stadi had long toktok blong God evri dei? ?Wanem ol blesing bae oli kasem taem oli mekem?

I Kam long Ol Skripja: Josua 1:8; 2 Timoti 3:15–17; 2 Nifae 32:3; Jekob 2:8; 4:6; Doktrin mo Ol Kavenan 33:16

Sevya I Invaetem Ol Narawan blong Rere blong Lan

Iven ol gudfala sid oli no save gro long ples we i graon we i strong, i gat plante ston, o nidel gras. I semmak long ol naesfala doktrin we i stap pusum fet, bae i no save jenisim wan hat we i no rere blong akseptem. Hemia nao i pat blong mesej blong parabol blong Sevya abaot man blong planem sid, ol sid, ol defdefren situesen blong graon. Hem i stap long “gudfala graon”—hat we i kam sofsof, mo oli karemaot ol ston mo ol nidel gras long saed blong spirit—blong toktok blong God i tekem frut we i givim laef (luk long Matiu 13:1–9, 18–23).

Fasin blong rere long saed blong spirit i impoten—blong yu mo ol pipol we yu stap tijim. So ?olsem wanem nao yumi save mekem rere hat blong yumi blong mekem se oli save stap olsem ol “gudfala graon” blong toktok blong God? Tingting long ol prinsipol ia blong fasin blong rere, we yu save yusum long laef blong yu, mo leftemap tingting blong olgeta we yu tijim long laef blong olgeta. Prea blong faenemaot wanem we Lod i wantem yu blong lanem. Laef long wan wei we i save invaetem Hem i stap long laef blong yu. Sakem sin evri dei. Fidim strong filing ia blong lanem samting taem oli askem ol kwestin wetem tru tingting. Stadi long toktok blong God wetem fet se Hem bae i lidim yu blong faenem ol ansa. Openem hat blong yu long eni samting we Hem bae i tijim long yu.

Taem olgeta we oli stap lan oli rere blong lanem samting long wei ia, bae oli gat ae blong luk mo sora blong lisin long saed blong spirit, blong harem wanem we Lod i wantem olgeta blong save (luk long Matiu 13:16).

Ol Kwestin blong Tingting long Hevi long Olgeta: ?Wanem nao yu mekem blong stap rere long yuwan blong lanem samting? ?Long wanem wei nao yu luk se fasin blong yu blong rere i helpem yu blong luk, harem, mo andastanem toktok blong God? ?Long wanem wei nao yu save helpem ol narawan blong rere blong lanem samting? ?Wanem nao hemia i save mekem i defren long olsem wanem oli andastanem ol trutok abaot gospel?

I Kam long Ol Skripja: Inos 1:1–8; Alma 16:16–17; 32:6, 27–43; 3 Nifae 17:3

pikinini i stap ridim skripja long klas

Olgeta we oli stap lan, oli gat ol gudfala janis blong serem wetem wanwan long olgeta abaot wanem we oli stap lanem.

Sevya I Leftemap Tingting blong Ol Narawan blong Serem Ol Trutok we Oli Stap Lanem

“Mi mi no man blong givim gudfala toktok,” Inok i talem wetem harem nogud, taem Sevya i bin singaotem hem blong prijim gospel. Be blong stap olsem wan man we i save toktok gud, i wan mas blong wan wokman blong God. Be, Lod i promesem Inok se sapos hem i gat inaf fet blong openem maot blong hem, ol toktok bae oli save kamaot. Hem i talem: “Bae mi givim long yu paoa blong toktok,” (Moses 6:31–32). Inok i praktisim fet blong hem, mo i tru, Lod i bin toktok tru long hem, wetem ol toktok we i gat bigfala paoa mo mekem ol pipol oli fraet tumas (luk long Moses 6:47). I tru, oli mekem wol i fraet tumas. Ol bigfala hil oli bin ronwe, ol reva oli ron folem defren rod mo evri nesen oli bin fraet tumas long ol pipol blong God, “i gat strong paoa blong lidim tingting blong ol pipol, from se toktok blong Inok i gat bigfala paoa, mo paoa blong lanwis we God i bin givim long hem i bin strong tumas.” (Moses 7:13).

Lod i wantem yumi evriwan—i no ol profet blong Hem nomo—blong gat paoa blong talem toktok blong Hem. Hem i wantem hemia blong yumi evriwan, mo tu, blong olgeta we yu stap tijim (luk long Doktrin mo Ol Kavenan 1:20–21). Ol toktok blong yumi bae oli no save muvum ol bigfala hil o jenisim daereksen blong reva, be oli save help blong jenisim hat. Hemia nao i mekem se i impoten blong givim janis long olgeta we oli stap lan, blong serem wetem wanwan long olgeta, wanem we oli stap lanem abaot Sevya mo gospel blong Hem. Taem yu mekem hemia, bae i helpem olgeta blong mekem ol trutok we oli bin lanem i kam pat blong olgeta mo talemaot ol tingting mo filing blong olgeta. Hemia bae i helpem olgeta tu blong trastem olgetawan se oli save serem ol trutok long eni ples o eni taem.

Ol Kwestin blong Tingting long Hevi long Olgeta: Tingting long wan taem we yu bin tokbaot wan trutok blong gospel wetem wan narafala man. ?Wanem nao yu bin lanem long eksperiens ia? ?Wetaem nao yu glad from wan i bin gat strong paoa long tingting blong serem ol tingting mo ol bilif blong olgeta? ?Long wanem wei nao olgeta we yu tijim bae oli kasem blesing from ol janis we oli tokbaot ol samting we oli stap lanem? ?Wanem janis nao yu save krietem blong olgeta?

I Kam long Ol Skripja: Alma 17:2–3; Moronae 6:4–6; Doktrin mo Ol Kavenan 84:85; 88:122; 100:5–8

Sevya I Invaetem Ol Narawan blong Laef Folem Wanem we Hem I Bin Tijim

“Taem man i laetem laet, hem i mas putum i stap antap long ples blong laet, blong mekem we ol man insaed long haos oli gat laet.” “Lavem enemi blong yu.” “Askem, mo bae God i givim long yu;.” “Yufala i go insaed long smol get.” (Matiu 5:16, 44; 7:7, 13.) Sam long ol klia mo invitesen memori long seves blong Sevya blong fultaem we Hem i bin stap long wol ia, oli tokbaot taem Hem i tijim ol disaepol blong Hem antap long wan bigfala hil mo oli stap lukluk i go long Si blong Galili. Stamba tingting blong Sevya i blong jenisim laef, we Hem i mekem i klia long las invitesen blong Hem: “Man we i harem ol tok ya blong mi, nao i stap mekemol samting we mi mi talem, hem i olsem wan waes man we i wokem fandesen blong haos blong hem antap long wan bigfala ston” (Matiu 7:24; oli ademap italik).

Ren i foldaon mo wota we i ron i kam mo win i blo long laef blong evriwan. Blong stap lanem samting abaot gospel i no impoten sapos olgeta we oli stap lan oli save winim evri tes blong laef we bae oli fesem. Hemia i from wanem yumi no mas wari blong invaetem olgeta we oli stap lan blong tingting long olsem wanem oli save laef folem wanem we oli stap lanem. Blong soem respek long fridom blong ol joes blong olgeta, plante long ol invitesen blong yumi bae oli simpol nomo: “?Wanem nao yu filim se i gud blong yu mekem?” Wanwan taem ol invitesen blong yumi bae oli nid blong mekem i simpol: “?Bae yu jusum wan long ol fasin blong Sevya we yu laekem blong wok from?” Taem yu givim ol janis long olgeta we oli stap lan blong lisin, luksave mo serem kwaet voes blong tabu spirit, Hem bae i tijim olgeta wanem ol aksen we wanwan long olgeta i nidim blong mekem. Helpem olgeta we oli stap lan blong tingting long ol blesing we bae i kam taem oli tekem aksen folem wanem we oli lanem, mo leftemap tingting blong olgeta blong gohed strong iven taem i stap kam had. Blong stap laef folem trutok i wan kwik rod blong kasem strong fet testemoni mo fasin blong jenisim laef. Olsem we Sevya i talem, blong stap laef folem doktrin blong Papa i wan wei blong yumi evriwan i save gud se doktrin i tru (luk long Jon 7:17).

Ol Kwestin blong Tingting long Hevi long Olgeta: ?Wetaem nao yu bin kasem insperesen blong tekem aksen from wan invitesen we wan i bin givim long yu? ?Olsem wanem nao laef blong yu jenis olsem wan risal blong hemia? Luksave ol invitesen we oli bin stap insaed long ol skripja mo hemia we oli kam long ol lida blong Jos. ?Wanem nao yu bin lanem we i save helpem yu taem yu stap invaetem ol narawan blong tekem aksen? ?Wanem ol wei we yu save yusum blong folemap ol invitesen blong yu?

I Kam long Ol Skripja: Luk 10:36–37; Jon 7:17; Jemes 1:22; Mosaea 4:9–10; Doktrin mo Ol Kavenan 43:8–10; 82:10

Samfala Wei blong Yusum Wanem we Yu Stap Lanem

• Askem ol narawan blong rere blong kam serem wan samting we Tabu Spirit i bin tijim long olgeta, olsem wan niu tingting we oli kasem aot long wan skripja we i gat mining.

• Givim janis long olgeta we oli stap lan blong tijim wan smol pat blong wan lesen.

• Leftemap tingting blong olgeta we oli stap lan blong luklukbak long wan vidio, skripja o wan mesej bifo taem we bae yufala mit.

• Lego strong tingting ia blong wantem blong stap ansarem evri kwestin. Mekem ol narawan oli tekpat blong lukaotem ol ansa.

• Bifo yu serem ol niufala tingting blong yu abaot wan skripja, askem olgeta we oli stap lan blong serem ol niu tingting blog olgeta fastaem.

• “Askem ol kwestin we oli leftemap tingting blong olgeta we oli stap lan blong faenem ol ansa insaed long ol toktok blong God.

• Invaetem olgeta we oli stap lan blong askem ol kwestin blong olgeta abaot wanem we oli stap lanem.

• Givim smol taem blong evriwan we oli stap lan blong tingting hevi long wan kwestin bifo yu askem olgeta blong serem ansa blong olgeta.

• Tingting blong seperetem olgeta we oli stap lan i go long ol smosmol grup blong oli toktok raon, sapos i stret.

• Talemaot ol samting we bae yufala i wantem kasem blong helpem olgeta we oli stap lan blong kam antap.

• Givim ol invitesen we i givim insperesen long olgeta we oli stap lan blong kam antap be i no mas plante. Folemap mo invaetem olgeta we oli stap lan blong serem ol eksperiens blong olgeta.

• Helpem olgeta we oli stap lan blong lanem samting aot long ol skripja taem oli:

  • Stap makem ol ves we oli gat bigfala mining, sapos oli wantem.

  • Stap invaetem revelesen tru long fasin blong stap tingting hevi mo prea.

  • Stap raetemdaon ol filing mo tingting blong olgeta.

  • Stap raet oltaem long wan stadi jenol.

  • Putum ol gol blong tekem aksen long wanem we oli lanem.