Jisas Kraes i stap tij insaed long tempol taem Hem i gat 12 yia.

Kraes long Tempol,i kam long Heinrich Hofmann

Stap Tijim Doktrin

I tru, Jisas i gro long waes mo save truaot long laef blong Hem, be Hem i no bin kasem wan edukesen olsem ol narafala kristin lida long taem blong Hem. Be yet, taem Hem i bin tij, ol pipol oli sapraes mo stap talem, “Man ya i save ol samting ya blong Baebol olsem wanem? ?I no gat wan tija i tijim hem?” ?From wanem ol tijing blong Hem oli gat bigfala paoa? “Ol tok ia we mi stap tijim ol man long hem, oli no blong mi nomo,” Sevya i talem, “oli kamaot long God we i sendem mi mi kam” (Jon 7:15–16). Doktrin, hem i trutok we i no save finis—oli faenem insaed long ol skripja mo toktok blong ol lata-dei profet—we oli soem rod long yumi blong kam olsem Papa blong yumi long Heven mo gobak long Hem. Nomata hamas eksperiens yu gat olsem wan tija, yu save tij wetem paoa, olsem we Sevya i bin mekem, taem Hem i stap tijim doktrin blong Papa. Bae yu mo olgeta we yu stap tijim bae yufala i sapraes long ol blesing we God i sendem taem ol tijing mo fasin blong lanem samting blong yu, oli folem toktok blong Hem.

Blong Tijim Doktrin

• Lanem doktrin blong Jisas Kraes blong yuwan.

• Tijim ol skripja mo ol toktok blong ol profet blong ol las dei.

• Helpem olgeta we oli stap lukaotem, luk save, mo andastanem ol trutok insaed long ol skripja.

• Lukluk nomo long ol trutok we bae i lidim i go long fasin blong jenisim laef mo bildim fet long Jisas Kraes.

• Helpem olgeta we oli stap lan blong faenem stret sapot blong olgetawan insaed long doktrin blong Jisas Kraes.

Sevya I Lanem Doktrin

Hem i klia blong luk save se, Sevya i bin lan aot long ol skripja taem Hem i yangfala, taem Hem i kam antap “long waes blong hem tu … mo oltaem God i glad tumas long hem” (Luk 2:52). Hem i pruvum save blong Hem we i bigwan abaot doktrin blong Papa, long papa mo mama blong Hem taem tufala i faenem Hem we i yangfala yet, mo i stap tijim mo ansarem ol kwestin blong ol tija blong Ol Man Jiu (luk long Josef Smit Translesen, Luk 2:46 [long Luk 2:46, futnot c]). Afta, taem Setan i temtem hem wetem strong temtesen long waelples, save blong doktrin we Jisas i gat, i bin helpem Hem blong stap longwe long ol temtesen ia (luk long Luk 4:3–12).

Yu tu, yu save lukaotem blong lanem tru doktrin moa dip bifo yu tijim. Taem yu rere blong tij mo lanem samting wetem ol narawan, luklukgud long wanem we Lod i bin talem abaot ol trutok we yu stap tijim. Stadi long ol skripja mo ol toktok blong ol profet we oli stap laef, blong yusum blong eksplenem mo givim kaonsel. Taem yu stap laef mo folem ol trutok we stadi long olgeta, bae i invaetem Spirit blong tijim yu, iven long ol wei we oli moa dip abaot trutok blong doktrin we i fulwan i go long hat blong olgeta we yu tijim.

Ol Kwestin blong Tingting Hevi long Olgeta: ?From wanem nao hem i impoten blong, yuwan, yu andastanem ol trutok blong gospel? ?Long wanem wei nao yu bin kasem save we i moa dip abaot ol trutok blong gospel? ?Wanem nao yu filim insperesen blong mekem blong kam antap long stadi blong yu long ol skripja mo ol toktok blong ol profet we oli stap laef?

I Kam long Ol Skripja: Ol Proveb 7:1–3; 2 Nifae 4:15–16; Doktrin mo Ol Kavenan 11:21; 88:118

Sevya I Tij Aot long Ol Skripja

Afta we Sevya i ded, tu long ol disaepol blong Hem, tufala i stap wokbaot mo stap toktok wetem ol defdefren filing blong harem nogud mo bigfala sapraes long hat blong tufala. ?Olsem wanem nao bae tufala i save andastanem gud wanem we i jes hapen? Jisas blong Nasaret, man we oli trastem se Hem i Ridima blong olgeta, i bin ded blong tri dei nao. Mo afta, i gat ol ripot we i talem se tumb blong Hem i emti, mo ol enjel we oli stap talemaot se !Hem i laef bakegen! Long impoten taem ia blong fet blong tufala disaepol ia, wan strenja i joenem wokbaot blong tufala. Hem i leftemap tingting blong tufala, “i talemaot gud long tufala, olgeta tok blong Baebol we oli bin raetem blong tokbaot [Sevya].” Long en, tufala we i stap wokbaot i luksave se, tija blong tufala i bin Jisas Kraes Hemwan, mo i tru se Hem i girap long ded finis. ?Olsem wanem nao tufala i luksave Hem? Nao tufala i taltalem long tufala se: “?Man taem hem i stap toktok long yumitu long rod, i stap talemaot ol tok ia blong Baebol, tok blong hem i nambawan, i mekem yumi harem gud tumas?” (Luk 24:27, 32).

Elda D. Todd Christofferson i bin tijim: “Stamba tingting blong blong evri skripja i blong fulumap sol blong yumi wetem fet long God, Papa mo Pikinini blong Hem, Jisas Kraes” (“Blesing blong Ol Skripja,” Liahona, Mei 2010, 34). Truaot long seves blong hem, Jisas i bin yusum olgeta skripja blong tijim, stretem mo givim insperesen long ol narawan. Meksua se tijing blong yu i no kamaot long ol skripja mo ol toktok blong ol profet. Taem yu fetful blong stap dipen long toktok blong God insaed long ol tijing blong yu, yu save mekem long ol narawan, wanem we Sevya i bin mekem. Yu save helpem olgeta blong save Hem, from yumi evriwan i nidim blong mekem fet blong yumi long Sevya i kam strong moa oltaem. Lav blong yu long ol skripja bae i olsem wan pruf long olgeta we yu stap tijim, mo tijing blong yu bae i invaetem Spirit blong mekem faea blong hat blong olgeta i laet wetem wan testemoni abaot Papa mo Pikinini blong Hem.

Ol Kwestin blong Tingting Hevi long Olgeta: ?Long wanem wei nao yu bin filim wan tija i lidim strong tingting blong yu taem hem i bin yusum ol skripja blong helpem yu blong kam blong save moa abaot Sevya? ?Wanem nao yu save mekem blong dipen moa long ol skripja mo ol toktok blong ol profet taem yu stap tij? ?Long wanem wei nao yu save helpem olgeta we yu stap tijim blong save mo lavem toktok blong God?

I Kam long Ol Skripja: Luk 4:14–21; Alma 31:5; Hileman 3:29–30;3 Nifae 23

Sevya I Bin Helpem Ol Pipol blong Lukaotem, Luksave mo Andastanem Trutok

Wan loya i bin askem wantaem long Jisas se: “Masta, ?bambae mi mas mekem olsem wanem blong kasem laef ia we i no save finis?” Sevya i ansa mo lidim man we i askem kwestin i go long ol skripja: “?Baebol i talem olsem wanem?; ?Taem yu ridim ol tok blong Loa ya, yu harem olsem wanem?” Hemia i no ansarem nomo kwestin blong hem we i blong—“mas lavem Hae God ya we i God blong yu long olgeta hat blong yu … mo yu mas lavem ol man we oli stap raonabaot long yu”—be tu,i lidim hem i go long nara kwestin ia: “?Be hu ol man ya we oli stap raonabaot long mi?” Sevya i bin ansarem kwestin ia wetem wan parabol abaot trifala man we oli luk wan we i travel mo i gat nid. Wan nomo aot long olgeta trifala man ia we i wan Man Sameria, we Ol Man Jiu oli no laekem from kantri blong hem, i bin stop blong help. Afta, Jisas i invaetem loya blong ansarem kwestin blong hemwan: “Long tingting blong yu, ?hu long trifala ya i mekem i gud long man ya?” (luk long Luk 10:25–37).

?From wanem nao yu ting se Sevya i bin tij long wei ia—taem Hem i stap ansa mo semtaem invaetem olgeta blong lukaotem, tingting hevi mo faenemaot? Pat blong ansa, i we, Lod i lukluk moa long hamas hadwok wan i mekem blong stap lukaotem trutok. “Yufala i askem, mo bae yufala i kasem,” Hem i bin invaetem bakegen mo bakegen (eksampol, luk long Matiu 7:7; Luk 11:9; Doktrin mo Ol Kavenan 4:7). Hem i blesem aksen blong fet mo fasin blong save wet longtaem, blong wan we i stap lukaot.

Olsem Sevya, yu save helpem olgeta we yu stap tijim blong luksave mo andastanem trutok. Eksampol, ol skripja oli fulap wetem ol trutok blong gospel, be samtaem i nidim plante hadwok blong faenem olgeta. Taem yu stap lan tugeta aot long ol skripja, stop mo askem olgeta we yu stap tijim blong talem wanem ol trutok blong gospel we oli bin luksave. Helpem olgeta blong luk olsem wanem ol trutok ia oli go wetem plan ia blong fasin blong sevem man we i blong Papa long Heven. Samtaem ol trutok we oli no save finis oli stap klia insaed long ol skripja, mo samtaem, oli soemaot olgeta insaed long ol stori mo laef blong ol pipol we yumi stap rid abaot olgeta. Hemia tu i help bigwan blong faenemaot tugeta histri bakgraon blong ol ves we yufala i stap ridim, mo tu, mining blong ol ves ia mo olsem wanem yumi save yusum long laef blong yumi tedei.

Ol Kwestin blong Tingting Hevi long Olgeta: ?Olsem wanem nao yu save luksave ol trutok we oli no save finis insaed long ol skripja mo ol toktok blong ol profet? ?Long wanem wei nao, ol trutok ia oli stap blesem laef blong yu? ?Wanem nao oli sam wei we yu save helpem olgeta we oli stap lan blong luksave mo andastanem ol trutok we oli gat bigfala mining long olgeta mo i tekem olgeta i go kolosap long God?

I Kam long Ol Skripja: Jon 5:39; 1 Nifae 15:14; Doktrin mo Ol Kavenan 42:12

ol studen oli stap stadi

Yumi save helpem olgeta we yumi tijim blong faenem mo luksave trutok blong olgetawan.

Sevya I Tijim Ol Trutok we Oli Lidim Man blong Jenisim Laef mo Bildim Fet

Wan Sabat, Sevya mo ol disaepol blong Hem oli hanggri, mo oli pas long wan garen blong kon, mo stat blong brekem kon mo kakae. Oltaem Ol Farisi oli wantem tumas blong stap tokbaot bigwan ol smosmol poen insaed long loa blong Moses, nao oli poenemaot se, fasin ia blong stap brekem kon long Sabat, i wan fasin blong wok we i no mas hapen long Sabat (luk long Mark 2:23–24). Blong yusum toktok blong profet Jekob insaed long Buk blong Momon, Ol Farisi oli bin stap “lukluk i go ova long mak,” (Jekob 4:14). Long narafala toktok, oli lukluk tumas long ol nomol mining blong ol komanmen, mekem se, oli lusum tabu stamba tingting blong ol komanmen ia—blong tekem yumi i go moa kolosap long God. I tru, Ol Farisi oli no iven luksave se Man we i bin givim ol komanmen blong respektem Sabat i stap stanap long fored blong olgeta.

Sevya i yusum janis ia blong testifae abaot Hemwan olsem tabu wan mo blong tijim from wanem Sabat hem i impoten. Oli krietem Sabat blong yumi, olsem wan dei blong wosipim Lod blong Sabat, we i Jisas Kraes Hemwan (luk long Mark 2:27–28). Ol trutok olsem ia, oli save helpem yumi blong andastanem ol komanmen blong God se oli no blong yumi soem nomo blong man i luk tru ol aksen blong yumi. Oli blong helpem yumi blong jenisim hat blong yumi mo jenisim laef blong yumi moa fulwan.

Tingting gud long ol doktrin mo ol prinsipol we yu jusum blong lukluk nomo long olgeta. From se i gat plante trutok insaed long ol skripja we oli save toktok raon long olgeta; nao, hem i moa gud blong lukluk nomo long ol trutok blong gospel we oli lidim man blong jenisim laef mo bildimap fet long Jisas Kraes. Simpol mo stamba trutok we Sevya i bin tijim mo givim ol eksampol, oli gat bigfala paoa blong jenisim laef blong yumi—ol trutok abaot Atonmen blong Hem, plan ia blong fasin blong sevem man, komanmen blong lavem God mo neba blong yumi, mo sam moa. Invaetem Spirit blong i talem witnes abaot ol trutok ia, blong helpem olgeta trutok ia blong go insaed olgeta long hat blong olgeta we yu stap tijim.

Ol Kwestin blong Tingting Hevi long Olgeta: ?Wanem sam long ol trutok blong gospel we oli bin helpem yu blong jenisim laef blong yu fulwan i kam long Jisas Kraes mo gat moa strong fet long Hem? ?Long wanem wei nao wan tija i bin helpem yu blong lukluk nomo long ol trutok blong gospel we oli moa impoten? ?Wanem nao yu save tijim we bae i save helpem ol narawan blong jenisim laef blong olgeta moa fulwan i go long Jisas Kraes?

I Kam long Ol Skripja: 2 Nifae 25:26; 3 Nifae 11:34–41; Doktrin mo Ol Kavenan 19:31–32; 68:25–28; 133:57; Moses 6:57–62

Sevya I Bin Helpem Ol Pipol blong Faenem Stret Sapot blong Olgetawan long Doktrin blong Hem

“Man ya, hem i glad blong luk ol man nogud, mo blong go kakae wetem olgeta,” Ol Farisi oli komplen abaot Jisas—oli stap poenemaot se i no wan stret fasin blong wan tija long saed blong spirit (Luk 15:2). Jisas i luk se hemia i wan janis blong tijim olgeta sam long ol niu trutok long saed blong spirit. ?Olsem wanem nao Hem i save mekem? ?Long wanem wei nao Hem i helpem Ol Farisi blong luk se i hat blong olgeta—be i no blong Hem—we i no klin mo i nidim hiling? ?Long wanem wei nao Hem i yusum doktrin blong Hem blong soem long olgeta se ol tingting mo aksen blong olgeta i nidim blong oli jenisim?

Hem i mekem hemia taem Hem i tokbaot wan sipsip we i lus long grup blong ol sipsip mo wan mane we i bin lus. Hem i tokbaot pikinini boe we i stap agens be afta i askem fogivnes mo bigfala brata we i no wantem akseptem hem mo blong kakae tugeta wetem hem. Wanwan long ol parabol ia oli gat ol trutok we oli talemaot stret ol wei we Ol Farisi oli lukluk long ol narafala man, oli tijim olgeta se evri man oli gat bigfala praes (luk long Luk 15). Sevya i no talem long Ol Farisi—o eniwan long yumi—huia blong yumi komperem yumi long hem long ol parabol blong Hem. Samtaem yumi papa ia we i gat plante wari. Samtaem yumi olsem brata ia we i jalus. Plante taem yumi kam olsem sipsip we i lusum rod o pikinini boe ia we i no tingting stret. Be nomata wanem kaen situesen blong yumi, tru ol parabol blong Hem, Sevya i invaetem yumi blong faenem stret sapot long ol tijing blong Hem—blong faenemaot wanem we Hem i wantem yumi lanem mo wanem we yumi nidim blong jenisim long ol tingting mo aksen blong yumi.

Bae yu save luksave se sam long olgeta we oli stap lan oli no andastanem from wanem sam long ol trutok oli impoten long olgeta. Taem yu tingting long ol nid blong olgeta we yu stap tijim, tingbaot olsem wanem ol trutok insaed long ol skripja i save gat bigfala mining mo yus long ol situesen blong olgeta. Wan wei we yu save helpem olgeta we oli stap lan blong luksave stret sapot blong ol trutok we oli stap lukaotem, i taem oli stap askem ol kwestin olsem: “?Long wanem wei nao hemia i save helpem yu wetem wan samting we yu stap fesem naoia?” “?From wanem hem i impoten blong yu yu save hemia? “?Wanem nao hemia i save mekem wan samting i defren insaed long laef blong yu? Lisin long olgeta we yu stap tijim. Letem olgeta oli askem ol kwestin. Leftemap tingting blong olgeta blong mekem ol koneksen bitwin ol tijing blong Sevya mo blong laef blong olgetawan. Oli save serem tu, olsem wanem yu bin faenem stret sapot we i kam long laef blong yuwan long wanem we yu stap tijim. Taem yu stap mekem hemia, i save invaetem Spirit blong tijim wanwan long olgeta we oli stap lan, olsem wanem doktrin i save mekem samting i defren long laef blong olgeta.

Ol Kwestin blong Tingting Hevi long Olgeta: ?Wanem stret nao i mekem se ol trutok blong gospel oli gat bigfala mining mo oli gat yus long yu? ?Wanem i helpem yu blong faenem stret sapot blong yuwan taem yu stadi long gospel? ?Wanem nao yu stap mekem blong lukluk nomo long ol trutok we oli stret blong helpem olgeta we yu tijim?

I Kam long Ol Skripja: 1 Nifae 19:23; 2 Nifae 32:3; Doktrin mo Ol Kavenan 43:7–9

Samfala Wei blong Yusum Wanem we Yu Stap Lanem

• Luklukbak long wanem we yu stap tijim mo mekemsua se yu stap tijim doktrin. Ol kwestin ia oli save help:

  • ?Wanem we mi stap mekem plan blong tijim, oli save faenem long ol skripja mo ol toktok blong ol profet blong las dei?

  • ?Plante profet oli bin tijim hemia? ?Wanem nao ol lida blong tedei oli stap tijim yumi abaot hemia?

  • ?Long wanem wei nao hemia bae i helpem ol narawan blong bildim fet long Jisas Kraes, sakem sin mo go fored folem rod blong kavenan?

  • ?Hemia i stret wetem kwaet voes blong Tabu Spirit, o mi no filim gud abaot hemia?

• Stadi evri dei long toktok blong God blong lanem tru doktrin blong yuwan.

• Askem olgeta we yu stap tijim blong ridim ol skripja mo ol toktok blong ol profet tedei taem yu tij.

• Tijim olgeta we oli stap lan olsem wanem blong yusum futnot, Gaed long Ol Skripja, mo ol narafala risos taem oli stadi long ol skripja.

• Invaetem olgeta we oli stap lan blong faenem ol trutok insaed long wan skripja sentens o wan stori.

• Serem testemoni blong yu long olsem wanem yu bin kam blong save se wan doktrin i tru.

• Yusum ol stori o ol pikja toktok blong helpem olgeta we oli stap lan blong kasem moa andastaning abaot ol trutok blong gospel.