Jisas Kraes i stap toktok long woman long saed blong wel

Wetem Sevya olsem eksampol blong yumi, lav i kam strong paoa we i stap long tingting blong yumi tij.

Lavem Olgeta we Yu Stap Tijim Olgeta

Evri samting we Sevya i bin mekem long seves blong Hem long wol ia,lav nao i pusum tingting blong Hem. Taem yumi stap traehad blong kam ol tru man blong folem Kraes, yumi save fulap wetem semfala lav ia (luk long Jon 13:34–35; Moronae 7:47–48; 8:26). Taem we lav blong Sevya i stap long hat blong yumi, yumi lukaotem evri wei blong save helpem ol narafala man blong oli lanem abaot Kraes mo kam long Hem. Lav i kam strong paoa we i stap long tingting blong yumi tij.

Lavem Olgeta we Yu Stap Tijim Olgeta

• Luk olgeta we oli stap lan, olsem we God i stap luk olgeta.

• Lukaotem blong save olgeta—andastanem wanem oli stap fesem, ol nid mo ol samting we oli strong long hem.

• Prea from olgeta mo talem nem blong olgeta.

• Krietem wan ples we i sef, wan ples we i gat respek long evriwan mo wan ples we oli save se, wanem oli serem, i gat valiu.

• Faenem ol stret wei blong soem lav blong yu.

Sevya I Luk Tabu Rol long Olgeta Evriwan we Hem I Bin Tijim

Plante man long Jeriko, oli ting se oli save evri samting we oli nidim blong save abaot Sakias. Hem i wan man blong tekem mane blong takis—bos blong ol man we i tekem mane blong takis, mo—hem i rij we i rij. I klia se, long tingting blong olgeta, hem i no ones mo hem i stap karem mane long rabis fasin. Be Jisas i luk long hat blong Sakias mo i luk se hem i wan man we i gat ona “man ya tu i laen blong Ebraham” (luk long Luk 19:1–10). Sevya i luk ol pipol i no olsem wanem oli luk long aotsaed, be Hem i lukluk long huia olgeta stret—mo huia oli save kam. Long ol man blong pulum fis we oli no save gud samting, olsem Saemon, Andru, Jemes mo Jon, Hem i luk ol fiuja lida blong Jos blong Hem. Long Sol, we man i fraet long hem from hem i stap kilimded ol man, Hem i luk “[Sol we oli] jusumaot hem finis,” blong … i talemaot gospel blong Hem long ol king, mo long ol nesen (luk long Ol Wok 9:10–15). Mo long yu mo long wanwan we yu stap tijim, Sevya i luk wan pikinini boe o gel blong God we oli gat paoa we i gat limit.

Long medel blong ol pipol we yu stap tijim, bae i luk olsem se bae yu gat olgeta we oli fetful mo oli jenisim hat, mo olgeta we oli no gat intres o iven oli save go agens. Lukaot mo no mekem tingting blong yuwan folem wanem we yu luk. Tabu Spirit bae i save helpem yu blong luk insaed long wanwan sam long olgeta samting we Sevya i luk—mo bae i helpem yu blong stat blong lavem olgeta long wei ia we Hem i lavem olgeta.

Ol Kwestin blong Tingting Hevi long Olgeta: Tingbaot wanwan we yu stap tijim, mo tingting hevi long olsem wanem Papa long Heven mo Jisas i filim abaot wanwan long olgeta. ?Wanem nao Tufala i luk long hem? ?Olsem wanem nao ol tingting ia oli jenisim wei we yu stap tijim olgeta?

I Kam long Ol Skripja: 1 Samuel 16:7; Ol Sam 8:4–5; Rom 8:16–17; Doktrin mo Ol Kavenan 18:10–14

Sevya I Save Yumi, mo I Andastanem Wanem Yumi Stap Gotru long Hem, Ol Nid, mo Ol Samting we Yumi Gud long Hem

Woman Sameria i no kam long wel blong harem gospel mesej. Hem i kam blong karem wota. Be Sevya i luksave se hem i no tosta nomo, be i nidim moa bitim wota blong fidim bodi blong hem. Hem i save se woman i fesem plante hadtaem, mo gat ol rilesensip we oli no stap longtaem. Mekem se Jisas i lukluk long nid blong hem long saed blong bodi we bae i pulum intres blong hem—wota blong laef we i no finis—mo i konektem wetem moa bigfala nid blong hem long saed blong spirit blong kasem “wota we i givim laef” mo “laef we i no gat en.” Long en blong storian blong tufala, woman ia i gat wan witnes blong hemwan se Jisas Hem i Kraes, we i kam long insperesen long olsem wanem Hem [Jisas] i save gud hem. “[Hem] i talem long mi, evri samting we mi bin mekem,” woman ia i talem. “?I no hemia nao Kraes?” (luk long Jon 4:6–29).

Blong stap olsem wan tija we i olsem Kraes i blong yu kam blong save moa abaot ol pipol we yu stap tijim mo traehad blong andastanem wanem i stap long hat blong olgeta. Yu save tekem intres long laef blong olgeta mo soem lav mo sore. Lukaotem ol wei blong andastanem bakgraon blong olgeta, ol intres, ol talen, mo ol nid blong olgeta we yu stap tijim. Yu save faenem wanem i bes wei we oli stap lan. Yu save askem ol kwestin, lisin gud mo lukluk gud. Antap long evriwan, prea blong kasem andastaning ia we Spirit nomo i save givim. Taem yu kam blong save gud wan man, yu save stap long wan moa gud ples blong helpem hem faenem mining mo paoa blong hemwan insaed long gospel blong Jisas Kraes. Taem yu andastanem gud tosta blong wan man, Spirit bae i tijim yu hao blong yu karemaot tosta ia wetem wota blong laef blong Sevya.

Ol Kwestin blong Tingting Hevi long Olgeta: ?Wanem nao yu save finis abaot ol pipol we yu stap tijim? ?Wanem nao i impoten long olgeta? ?Wanem nao oli gud long hem? ?Wanem nao oli stap gat hadtaem wetem? ?Wanem nao yu save mekem blong oli andastanem gud?

I Kam long Ol Skripja: Ol Sam 139:1–5; Matiu 6:25–32; Mak 10:17–21; Jon 10:14; 3 Nifae17:1–9

Sevya I Prea from Olgeta we Hem I Stap Tijim

Tingbaot olsem wanem Saemon Pita i filim taem hem i harem Sevya i talem long hem: “Saemon, Saemon, yu lesin gud. Setan i askem finis long God, blong i letem hem i kam traem bilif blong yufala blong seraot yufala, … Be mi mi prea finis from yu, blong bilif blong yu bambae i no save foldaon” (Luk 22:31–32). ?Olsem wanem nao bae i save tajem yu blong save se Jisas Kraes i prea long Papa from yu? Ol pipol blong Amerika blong bifo oli bin gat eksperiens ia, mo oli tokbaot long wei ia: “Mo i no gat wan tang i save talem, mo tu, i no gat eni man i save raetem, mo tu, hat blong ol man i no save tingting nomo long ol bigfala mo gudfala samting olsem we mifala i bin luk mo bin harem Jisas i talemaot; mo i no gat man i save talemaot glad we i bin fulumap sol blong mifala long taem we mifala i harem hem i prea from mifala long Papa.” (3 Nifae 17:17).

Maet bae yu tingbaot wanem nao bae i hapen insaed long yu taem yu prea from wan man—oltaem, mo talem nem blong hem. ?Olsem wanem nao ol prea oli jenisim wei we yu filim abaot hem ia we yu stap from? ?Olsem wanem oli save jenisim ol aksen blong yu? I tru nomo se Papa long Heven i harem mo ansa long ol tru prea blong wan tija we i wantem helpem olgeta we oli stap lan. Plante taem, wan wei Hem i ansa long ol prea ia, hem i taem we Hem i tajem hat blong tija mo givim hem insperesen blong talem o mekem wan samting we bae i helpem olgeta we oli stap lan blong oli filim lav blong Papa long Heven.

Ol Kwestin blong Tingting Hevi long Olgeta: Taem yu stap tingbaot ol pipol we yu stap tijim, ?i gat eniwan we yu filim se i gat wan spesel nid blong yu prea from? ?Wanem nao yu filim blong yu prea from long bihaf blong hem? ?Wanem blesing nao bae i kam taem yu invaetem olgeta we oli stap lan blong prea from wanwan long olgeta?

I Kam long Ol Skripja: Jon 17; Alma 31:24–36; 3 Nifae 18:15–24; 19:19–23, 27–34

Sevya I Mekemsua se Evriwan Oli Filim se Oli Respektem Olgeta mo se Oli Gat Valiu

Nomol fasin long ol lida blong ol jos long taem blong Sevya, i we, ol man we oli mekem sin oli mas panisim olgeta. From hemia, taem wan long ol lida ia i luk Jisas i stap storian wetem ol man we oli mekem sin, olgeta evriwan oli lukluk nogud long Sevya. ?I olsem wanem ia we wan we i talem se hem i wan lida long saed blong spirit i stap toktok wetem ol man we oli mekem sin?

Be Jisas i gat wan defren lukluk. Hem i lukaotem blong hilim olgeta we oli sik long saed blong spirit (luk long Mak 2:15–17; Luk 4:17–18). Hem i gohed blong helpem olgeta we oli defren raon long Hem, o olgeta we oli gat ol hadtaem, mo Hem i storian wetem olgeta we oli mekem sin. Hem i presem fet blong wan soldia blong Rom (luk long Matiu 8:5–13). Hem i singaotem wan man blong kolektem takis i kam wan long ol gudfala disaepol blong Hem (luk long Mak 2:14). Woman ia we i komitim adaltri, Hem i mekem woman i save se hem i sef i stap mo i leftemap tingting blong woman ia blong hem i sakem sin mo gat wan moa gud laef (luk long Jon 8:1–11).

Be Jisas i mekem moa long hemia. Hem i karem semfala fasin ia blong akseptem man mo lavem man i go long olgeta we oli stap folem Hem. Eksampol blong Hem i stap long hat blong ol disaepol blong Hem, taem we hem i bin taem blong ol disaepol blong Hem blong go tijim gospel long evri pipol. Hemia i kamaot long ol toktok blong Pita: “God i stap mekem i semmak nomo long olgeta man” (Ol Wok 10:34).

I gat wan gudfala janis we kolosap evriwan w oli singaotem yu blong tijim, i gat hadtaem long sam wei blong filim se oli respektem hem, mo oli tekem se hem impoten. Tru long wei o fasin we yu lavem mo respektem olgeta, yu save talem long olgeta se oli welkam, be tu, oli nidimolgeta. Yu save kasem olgeta we oli no kam, olgeta we oli stap traehad, o olgeta we oli no gat intres, mo gat fasin blong save wet long taem sapos oli stap kam antap sloslo. Yu save helpem evriwan i filim se oli sef , mo harem gud blong save serem tingting blong olgeta. Yu save mekem moa long hemia. Yu save leftemap tingting blong olgeta evriwan we oli stap lan blong krietem wan sef ples we oli tijim doktrin wetem spirit blong gat respek, se oli pat blong grup, mo wetem lav.

Ol Kwestin blong Tingting Hevi long Olgeta. ?Wanem nao i mekem wan man, woman i filim se oli respektem hem, mo tekem se oli gat valiu? ?Wanem nao i givim insperesen long wan man, woman blong respektem mo tekem se narawan i gat valiu o i impoten? Taem yu stap prea abaot ol pipol we yu stap tijim, ?wanem nao yu filim blong mekem blong oli filim se oli welkam mo oli nidim olgeta?

I kam long Ol Skripja: Jon 4; 2 Nifae 26:27–28, 33; Alma 1:26; 3 Nifae18:22–25

papa i stap tijim ol pikinini

Ol tija oli save helpem olgeta we oli tijim blong oli filim se oli lavem olgeta.

Sevya I Soemaot Lav blong Hem long Olgeta we Hem I Tijim Olgeta.

Long en blong wan blong naesfala dei blong tij mo givhan long Ol Man blong Nifae, Jisas i luksave i taem blong Hem i go. Hem i gat ol narafala pipol blong Hem i go visitim. Hem i talem se: “yufala i gobak long haos blong yufala”, “mo mekem rere ol tingting blong yufala blong tumoro.” Be ol pipol oli sidaon “i luk we oli stap krae” oli “luk stret long hem olsem se bae oli askem hem blong stap wetem olgeta smol taem moa.” Taem Hem i luksave nid blong olgeta we oli no talemaot, Jisas “i fulap long lav mo sore,” nao Hem i stap longtaem smol (3 Nifae 17:3, 5–6). Hem i blesem olgeta we oli sik mo harem nogud. Hem i nildaon mo prea wetem olgeta, Hem i krae mo glad wetem olgeta.

Tingting hevi blong stadi long ol toktok blong Sevya mo ol aksen blong Hem long 3 Nifae 17. Tingting hevi long lav we Hem i bin soem long olgeta we Hem i bin tijim. Lukaotem ol saen blong lav blong Hem long ol narafala ples insaed long olgeta skripja. Tingbaot ol pipol we yu stap tijim. ?Hao nao yu soem lav blong yu long olgeta? Letem Spirit i lidim yu. Sapos yu faenem i had blong filim o soem lav long olgeta we yu stap tijim, stat blong testifae abaot lav blong God, Afta, “prea long Papa wetem evri paoa blong hat, blong [yu] save fulap wetem lav ia, we hem i bin givim long olgeta we oli ol tru man blong folem Pikinini blong hem, Jisas Kraes” (Moronae 7:48). Mo tingbaot ol tingting blong yu long lesen we bae i no pulumaot yu blong soemaot lav blong yu tru long ol toktok mo aksen blong yu. Wei we yu tritim ol pipol, i impoten i semmak nomo long wanem yu stap tijim olgeta.

Ol Kwestin blong Tingting Hevi long Olgeta: ?Olsem wanem nao Sevya i helpem yu blong save long lav we Hem i gat long yu? ?Olsem wanem nao wan mama, papa o wan narafala tija i helpem yu blong filim lav blong Hem? ?Ol pipol we yu stap tijim, oli save se yu lavem olgeta? ?Oli save se Sevya i lavem olgeta?

I Kam long Ol Skripja: Mak 6:31–42; Jon 13:3–16, 34–35; 15:12–13; 1 Korin13:1–7; 1 Jon 4:7–11

Sam long Ol Wei we Yu Save Tekem Aksen long Wanem Yu Stap Lanem.

• Sapos yu stap tijim wan klas, lanem ol nem blong olgeta we oli stap lan mo yusum olgeta taem yu stap tij.

• Talem tangkyu long olgeta we oli stap lan taem oli serem wan samting.

• Storian wetem olgeta we oli stap lan bifo mo afta yu tij.

• Helpem olgeta we oli sta lan blong oli gat wan ples blong lav mo respek.

• Lisin gud—taem yu stap tij mo long ol narafala taem.

• Givim seves long olgeta we yu stap tijim.

• I gud blong yu glad mo wantem jenisim tijing plan blong yu mo spendem moa taem long ol prinsipol we oli gat mining long olgeta we yu stap tijim.