Tokoniʻi e Kau Akó ke Haʻu kia Sīsū Kalaisi

Tokoniʻi ʻa e kau akó ke fakamālohia honau vā fetuʻutaki mo e Tamai Hēvaní mo Sīsū Kalaisí.

Pōtoʻi Ngāué

Ngaahi fakamatala ʻe tokoni ke ʻilo mo ongoʻi ʻe he kau akó e ʻofa ʻa e Tamai Hēvaní mo Sīsū Kalaisí.

fānau ako ʻi he loki akó

Fakaʻuhingaʻí

ʻOku lahi ha ngaahi faingamālie ʻi he lēsoni kotoa pē ke tokoniʻi e kau akó ke fakamālohia honau vā fetuʻutaki mo e Tamai Hēvaní mo Sīsū Kalaisi. ʻOku hoko ha niʻihi ʻo e ngaahi faingamālie lelei tahá hili hono vahevahe ʻe he kau akó ʻenau ngaahi fakakaukaú pe ongó. ʻI he momeniti ko iá, ʻe lava ke fai ʻe he kau faiakó ha ngaahi fakamatala ʻoku nofotaha ʻi he ʻofa mo e ngaahi ʻulungaanga ʻo e Tamai Hēvaní mo Sīsū Kalaisí.

ʻE tokoni ʻa e faʻahinga fakamatala pehení ke ʻilo ʻe he kau akó ʻa e ongo ʻoku maʻu ʻe he Tamai Hēvaní mo Sīsū Kalaisi fekauʻaki mo kinautolú, ongo ʻoku nau maʻu fekauʻaki mo e Tamai Hēvaní mo Sīsū Kalaisí, pe fakatouʻosi. ʻI he fakamatalá, ʻe lava ke ke fakaʻilongaʻi, fakamoʻoniʻi, pe fakafehokotaki ai ʻa e meʻa naʻe toki vahevahe ʻe he tokotaha akó kau ki ha ʻulungaanga pe moʻoni fekauʻaki mo e ʻofa, natula, mo e ongo ʻa e ʻOtuá ki Heʻene fānaú. ʻOku fakatupu ʻe he ngaahi fakamatala pehení ha ngaahi faingamālie lahi ange ke fakamoʻoniʻi ʻe he Laumālie Māʻoniʻoní ki he kau akó honau mahuʻinga fakafoʻituitui ki heʻenau Tamai Hēvaní mo Hono ʻAló.

Ngaahi Fakatātaá

• ʻOku vahevahe ʻe Meki naʻá ne maʻu ha tali ki heʻene lotú. ʻE toe tānaki atu leva ʻa e faiakó ki he fakamatala ko ʻení, “Ko e aʻusia ko iá ko ha fakamoʻoni ia ʻoku ʻafioʻi ʻe he Tamai Hēvaní ko hai koe.”

• ʻOku vahevahe ʻe Seiti naʻá ne ongoʻi hono valokiʻi ia ʻe he Laumālié lolotonga ʻa e konifelenisí ʻi he ʻikai lahi ange ʻene lau folofolá. ʻOku tali ange leva ʻe he faiakó, “Fakamālō atu ʻi hoʻo fakamanatu mai kiate kimautolu kotoa ʻokú Ne fie kau mai ki heʻetau moʻuí.”

• ʻOku vahevahe ʻe Hei Sou ha fakakaukau naʻá ne maʻu lolotonga ʻene lau ʻene folofolá. ʻOku tali ange ʻe he faiakó, “Kuo akonekina kitautolu ʻe hoʻo ngaahi fakakaukaú kau ki he angaʻofa mo e angavaivai ʻa e ʻOtuá.”

• ʻOku fakahaaʻi ʻe Pilikihami ʻene taʻefiemālie ʻi he ʻikai ke ne maʻu ha taimi feʻunga ke lau ʻene folofolá. ʻOku tali ange leva ʻe he faiakó, “ʻOku tau lava ʻo tala ʻa e lahi hoʻo ʻofa kiate Iá ʻi hoʻo loto-holi ke muimui kiate Iá.”

• ʻOku vahevahe ʻe ʻAtalaine ʻene ngaahi ongó hili ʻene lau ʻa e Tokāteline mo e Ngaahi Fuakava 18:10. ʻOku pehē leva ʻe he faiakó, “ʻOku ou ʻiloʻi foki ʻoku mahuʻinga fau ho laumālié kiate Ia.”

Fakaangaanga

Faʻu ha fakamatala ʻe lava ʻo tokoni ki he tokotaha ako takitaha ke ne ongoʻi e ʻofa ʻa e Tamai Hēvaní mo Sīsū Kalaisí.

• ʻOku vahevahe ʻe Polokilini ko e taha ʻo e ngaahi laine ʻokú ne saiʻia taha ai mei he “ʻOku Moʻui Hoku Huhuʻí” ko e “[ʻOkú Ne moʻui ke holoholoʻi hoku] loʻimatá ni.”

• ʻOku vahevahe ʻe Tōmasi kimuʻa pea vete ʻene ongomātuʻá, naʻe lahi e fekeʻikeʻi ʻi honau ʻapí. ʻI he taimi ʻokú ne lotu aí, ko e taimi pē ia te ne ongoʻi ai ʻa e nongá mo e fiemālié.

• Hili e laukonga ʻa Pīsila fekauʻaki mo hono fakamavaeuaʻi ʻo e Tahi Kulokulá, naʻá ne pehē, “ʻOku ou tui ʻoku fakaofo moʻoni hono fakahoko ia ʻe he ʻOtuá maʻa Mōsese mo e Fānau ʻo ʻIsilelí.”

Aleaʻi pe Fakalaulauloto

• Ko e hā hono mahuʻinga ʻo hono fai ha ngaahi fakamatala ʻe tokoni ki he kau akó ke nau ongoʻi e ʻofa ʻa e Tamai Hēvaní mo Sīsū Kalaisí?

• Ko e hā ka finangalo ai ʻa e Tamai Hēvaní ke tau fakahoko ʻa e ngaahi fakamatala pehení ko ha konga ʻo e aʻusia fakaakó?

Fakatahaʻi

• Fakaʻaongaʻi ha miniti ʻe 5 hili e kalasi takitaha ʻokú ke akoʻi ʻi he uike ka hokó ʻo hiki ha ngaahi fakamatala naʻá ke mei lea ʻaki ʻo makatuʻunga ʻi he meʻa naʻe vahevahe ʻe he kau akó. ʻI he uike hono hokó, feinga ke fai ha ngaahi fakamatala tatau lolotonga e lēsoní.

Fie ako lahi ange?

• “Tokanga Taha kia Sīsū Kalaisi,” Ko e Faiako ʻi he Founga ʻa e Fakamoʻuí (2022), 5–9

• Chad H Webb, “Sinoemeʻa” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 12 Sune 2019), broadcasts.ChurchofJesusChrist.org.