Tokoniʻi e Kau Akó ke Haʻu kia Sīsū Kalaisi

Tokoniʻi e kau akó ke ʻilo e ʻofa, mālohi mo e ʻaloʻofa ʻa e ʻEikí ʻi heʻenau moʻuí.

Pōtoʻi Ngāué

ʻEke ha ngaahi fehuʻi ʻoku nofo taha ʻi hono fakafehokotaki ʻo e mālohi, ʻaloʻofa mo e takiekina ʻa e ʻEikí ki he moʻoni ʻoku akoʻí.

Fakamatalaʻi

ʻOku ʻi ai ʻa e mālohi ʻoku maʻu ʻi heʻetau fakafehokotaki ʻetau ngaahi feinga ke moʻui ʻaki e ngaahi tefitoʻi moʻoni ʻo e ongoongoleleí ki hotau Fakamoʻui ko Sīsū Kalaisí. Tuku ha taimi ʻi hoʻo teuteú ke fakalaulauloto ki he meʻa ʻoku tokoni atu ʻa e ngaahi tefitoʻi moʻoni ʻo e ongoongoleleí ʻi he konga folofolá ke ke ʻiloʻi mo mahino fekauʻaki mo Sīsū Kalaisi. Hili iá pea faʻu fakalelei ha ngaahi fehuʻi ʻoku fakaafeʻi ai e kau akó ke fakakaukau ki he meʻa te nau lava ʻo ako fekauʻaki mo ʻEne ʻofá, mālohí, mo e ʻaloʻofá mei he ngaahi moʻoni ʻoku akoʻí. Makehe mei hono tokoniʻi e kau akó ke mahino kiate kinautolu ʻa e tokāteliné, ʻe lava foki ke tokoni ʻa e faʻahinga fehuʻi ko ʻení ke nau vakai ki he founga ʻe tokoniʻi ai kinautolu ʻi hono moʻui ʻaki e tokāteline ko iá ke nau aʻusia ʻEne ʻofá, mālohí, mo e ʻaloʻofá, kae pehē foki ke hoko ʻo hangē ko Iá. ʻE lava foki ke tokoni e faʻahinga fehuʻi ko ʻení ke fakakaukau ʻa e kau akó ki he founga ʻe tokoniʻi ai kinautolu ʻe Sīsū Kalaisi ke nau moʻui ʻaki e tokāteline ko iá.

Fakatātaaʻi

ʻOua ʻe fehuʻi …

• Ko e hā ʻoku mahuʻinga ai ke moʻui ʻaki e fono ʻo e vahehongofulú?

• Ko e hā ʻoku totonu ke tau fakatomala fakaʻaho aí?

ʻAhiʻahi fehuʻi …

• Ko e hā ʻoku akoʻi atu ʻe he fono ʻo e vahehongofulú fekauʻaki mo hoʻo Tamai Hēvaní mo Sīsū Kalaisí?

• Ko e hā kuó ke ako kau ki he ʻaloʻofa ʻa e Fakamoʻuí ʻo fakafou ʻi he fakatomala fakaʻahó?

Lomiʻi heni ke vakai ki ha vitiō ʻo e sīpinga ko ʻení.

Fakaangaanga

Fakaangaanga ʻaki hono liliu e ngaahi fehuʻi ko ʻení ʻi ha ngaahi founga ʻe tokoni ke fakafehokotaki ai ʻe he kau akó e ʻofa, mālohi, mo e ʻaloʻofa ʻa e ʻEikí ki he ngaahi moʻoni ʻoku akoʻí.

ʻOua ʻe fehuʻi …

• Ko e hā ʻoku mahuʻinga ai ke ako fakaʻaho ʻa e folofolá?

• Ko e hā ʻa e mālohi ʻoku maʻu mei he ʻalu ki he temipalé?

ʻAhiʻahi fehuʻi …

Aleaʻi pe Fakalaulauloto

• Kuó ke ako fēfē ke ʻiloʻi ʻoku ʻuhingamālie ange ʻa e ngaahi tefitoʻi moʻoni fakatokāteliné ʻi hoʻo fakafehokotaki kinautolu ki he ʻofa, mālohi, mo e ʻaloʻofa ʻa e ʻEikí?

• ʻE tokoni fēfē ʻeni ke mahino lelei ange ki heʻetau kau akó mo nau falala ki he ngaahi akonaki pea mo e Fakalelei ʻa Sīsū Kalaisí?

Fakatahaʻi

Vakai ki hoʻo lēsoni palani hokó. Tuku ha miniti ʻe 10 ki hono toe vakaiʻi e ngaahi fehuʻí ke tokoni ke fakafehokotaki ʻe he kau akó e ʻofa, mālohi, mo e ʻaloʻofa ʻa e ʻEikí ki he ngaahi moʻoni ʻoku akoʻí.

Fie Ako Lahi Ange?

• Chad H Webb, “We Talk of Christ, We Rejoice in Christ” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 12 Sune 2018), broadcasts.ChurchofJesusChrist.org

• Chad H Webb, “Empathy” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 26 Sānuali 2021), broadcasts.ChurchofJesusChrist.org

Pōtoʻi Ngāué

Fai ha ngaahi fakaafe ʻe tokoni ki he kau akó ke nau ʻiloʻi ʻa e ʻofa, mālohi, mo e ʻaloʻofa ʻa e ʻEikí ʻi heʻenau moʻuí.

ko hono fakamoʻui ʻe Sīsū Kalaisi ha tangata

Fakaʻuhingaʻí

Te ke lava ʻo tokoni ki he kau akó ke nau haʻu kia Sīsū Kalaisi ʻaki hono fakaafeʻi kinautolu ke nau fakatokangaʻi ʻEne ʻofá, mālohí, mo e ʻaloʻofá ʻi heʻenau ngaahi aʻusiá. Hili hoʻo ʻiloʻi ha potufolofola ʻoku fakamatalaʻi ai ʻEne ʻofá, mālohí, pe ʻaloʻofá:

• Fakahaaʻi hoʻo loto-falala kuo aʻusia ʻe he kau akó ʻa e ʻofa, mālohi, pe ʻaloʻofa ʻa Kalaisí ʻi heʻenau moʻuí.

• Tuku ha taimi maʻá e kau akó ke nau fakamanatuʻi ha ngaahi taimi ne nau ongoʻi ai e ʻofa, mālohi, pe ʻaloʻofa ʻa e Fakamoʻuí ʻi heʻenau ngaahi aʻusiá (ʻe lava pē ʻa e ngaahi aʻusia ko ʻení ko ha meʻa ʻi he kuohilí pe lolotongá).

• Fehuʻi ange pe ʻoku ʻi ai ha taha ʻoku loto-fiemālie ke vahevahe ha aʻusia.

ʻI he malava ange ke fakatokangaʻi ʻe he kau akó ʻa e fatongia ʻo Kalaisí ʻi heʻenau ngaahi aʻusia fakatāutahá, te nau ongoʻi ofi ange ai kiate Ia pea ʻe fakamālohia honau vā fetuʻutaki mo Iá.

Fakatātaaʻi

Ko ha sīpinga ʻeni ʻo e founga ʻe lava ke hoko aí:

• ʻOku fakamatalaʻi ʻi he Tokāteline mo e Ngaahi Fuakava 61:1 ʻa Sīsū Kalaisi ko “Ia ʻokú ne maʻu ʻa e mālohi kotoa pē.” Ke tokoni ke ʻiloʻi ʻe he kau akó Hono mālohí ʻi heʻenau ngaahi aʻusiá, te ke lava ʻo pehē ange: “ʻOku ou tui kuo mou takitaha aʻusia ha ngaahi meʻa kuó ke ongoʻi ai e mālohi ʻo e Fakamoʻuí ʻi hoʻo moʻuí. Kātaki ʻo fakaʻaongaʻi ʻa e miniti ʻe tolu ka hokó ke tohi fekauʻaki mo ha taimi naʻá ke ongoʻi ai Hono mālohí.” Hili hono fakakakato ʻe he tokolahi taha ʻo e kau akó ʻa e ngāue tohí, te ke lava ʻo fehuʻi ange, “Kapau ʻoku ʻikai fuʻu fakataautaha, ʻe loto-fiemālie nai ha taha ke vahevahe ʻene aʻusiá mo e kalasí?”

Fakaangaanga

ʻAhiʻahiʻi ha meʻa ʻe taha pe lahi ange mei heni:

• ʻOku ʻi he Luke 5 ha ngaahi sīpinga lahi ʻo e mālohi ʻo e Fakamoʻuí ke faifakamoʻuí. Lau ʻa e Luke 5:12–17. Fakaangaanga hiki ha fakaafe ʻe taha pe ua ʻe tokoni ki he kau akó ke nau fakalaulauloto ʻi he taimi kuo nau aʻusia ai ʻa e mālohi ʻo Kalaisi ke fakamoʻuí.

• Vakai ki hoʻo naunau fakalēsoni hokó. Kumi ha feituʻu ʻi he ngaahi konga folofolá te ke lava ʻo fakaangaanga hiki ai ha fakaafe ʻe taha pe ua ke tokoni ki he kau akó ke nau fakakaukau ki he taimi kuo nau aʻusia fakataautaha ai e ʻofa, mālohi, pe ʻaloʻofa ʻa e ʻEikí.

Aleaʻi pe Fakalaulauloto

• Ko e hā ha ngaahi fakaafe ʻokú ke lolotonga fai ke tokoni ki he kau akó ke nau fakatokangaʻi e ʻofa, mālohi, mo e ʻaloʻofa ʻa Kalaisí ʻi heʻenau moʻui fakatāutahá?

• Te ke manatuʻi fēfē ke fakahoko ʻa e faʻahinga fakaafe pehení ʻi hoʻo aʻusia hoko mo e kau akó?

• Koeʻuhí ko e ngaahi aʻusia kuó ke maʻu ʻi he ʻofa, ʻaloʻofa, mo e mālohi ʻo Kalaisí, ʻoku ueʻi fēfē ai koe ke ke hokohoko atu pe ke fakatupulaki hoʻo feinga ke tokoniʻi hoʻo kau akó ke nau vakai foki kiate Ia ʻi heʻenau moʻuí?

Fakatahaʻi

Fili ha konga folofola ʻoku ʻamanaki hoko mai ʻoku fakahaaʻi ai ʻa e ʻaloʻofa, ʻofa, pe mālohi ʻa Kalaisí. Faʻu fakalelei ha fakaafe ʻi hoʻo palani lēsoní ke tokoni ki he kau akó ke nau vakai ki he Fakamoʻuí ʻi heʻenau ngaahi aʻusia fakatāutahá.

Fie Ako Lahi Ange?

• “Tokoniʻi e Kau Akó ke Haʻu kia Sīsū Kalaisi,” Ko e Faiako ʻi he Founga ʻa e Faiakó (2022), 8–9

• Dieter F. Uchtdorf, “Ko e Meʻaʻofa ʻo e ʻAloʻofá,” Ensign pe Liahona, Mē 2015, 107–10

• Russell M. Nelson, “Kuo Fuakava Taʻengatá,” Liahona, ʻOkatopa 2022, 4–11