Tokoniʻi e Kau Akó ke Haʻu kia Sīsū Kalaisi

Tokoniʻi e kau akó ke nau feinga ʻi he ʻiloʻilo pau ke hangē ko Sīsū Kalaisí.

Pōtoʻi Ngāué

Vakai ki he ngaahi ʻulungaanga faka-Kalaisi ʻi he kau akó pea vahevahe ʻa e meʻa kuó ke fakatokangaʻi ʻi ha ngaahi founga ʻokú ne ueʻi kinautolu ke hokohoko atu ʻenau hoko ʻo hangē ko Iá.

ko e fakafiemālieʻi ʻe Kalaisi ha houʻeiki fafine

Fakaʻuhingaʻí

ʻOku fakaafeʻi ʻa e Laumālie Māʻoniʻoní ke fakamoʻoni ki he Tamaí mo e ʻAló pea ueʻi kitautolu ke hokohoko atu ʻetau moʻui ʻo hangē ko Kinauá, ʻi hono fakatokangaʻi ʻo e ngaahi ngāue pe ʻulungaanga ʻo Sīsū Kalaisí ʻi he niʻihi kehé pea mo hono vahevahe mo kinautolu ʻa e ʻilo ko iá. Lolotonga ʻa e kalasí, vakai ki he kau akó pea fehuʻi loto hifo, “Ko e hā ha ngaahi tōʻonga pe ʻulungaanga ʻo Sīsū Kalaisi ʻoku ou vakai ki ai ʻi he tokotaha ako ko iá?” Vahevahe ʻa e meʻa ʻokú ke ʻiloʻí ʻi ha founga ʻe tokoni ke nau ʻiloʻi ʻokú ke ʻilo ʻoku nau feinga ke hoko ʻo hangē ko Sīsū Kalaisí.

Fakatātaaʻi

• Hili e sio ʻa e faiakó ʻoku fakaava ʻe Huliō ʻa e matapaá ki he kau akó, naʻá ne fehuʻi fakalongolongo pē kiate ia, “Ko e hā ha ngaahi tōʻonga pe ʻulungaanga ʻo Sīsū Kalaisi ʻoku ou sio ki ai ʻi he tokotaha ko ʻení?” ʻOkú ne vahevahe leva ʻa e meʻá ni: “Huliō, fakamālō atu ʻi hoʻo fakaava ʻa e matapaá maʻá e kau akó. ʻOkú ke fakamanatu mai ʻa e founga naʻe kumi ai ʻe he Fakamoʻuí ha ngaahi founga ke tokoniʻi mo faitāpuekina ʻa e niʻihi kehé.”

• ʻOku maʻu ʻe Kai ha ongoongo fekauʻaki mo ha mole ʻi hono fāmilí, pea ʻoku sio ʻa e faiakó ki hono fakafiemālieʻi ia ʻe Kalaní. ʻOku fehuʻi loto pē ʻe he faiakó, “Ko e hā ha ngaahi tōʻonga pe ʻulungaanga ʻo Sīsū Kalaisi ʻoku ou vakai ki ai ʻia Kalani?” ʻOku vahevahe leva ʻe he faiakó mo ia, “Kalani, ʻi heʻeku sio ki hoʻo talanoa mo tokoni kia Kai ʻi he ʻaho ní, naʻá ke fakamanatu mai kiate au ʻa e founga naʻe fakaʻaongaʻi ai ʻe Sīsū ha taimi ke feohi taha taha ai mo e niʻihi kehé. Fakamālō atu ʻi hoʻo fai ʻa e meʻa naʻá Ne mei faí.”

Fakaangaanga

1. Fili ha tokotaha ako ʻi hoʻo kalasí pea fehuʻi, “Ko e hā ha ngaahi tōʻonga pe ʻulungaanga ʻo Sīsū Kalaisi ʻoku ou vakai ki ai ʻi he tokotaha ko ʻení?” Teuteuʻi ʻa e meʻa te ke lea ʻaki ki he tokotaha akó pea vahevahe mo ia ʻa e tōʻongá pe ʻulungāngá.

2. Fili ha tokotaha ako ʻe taha pea fehuʻi, “Ko e hā ha ngaahi tōʻonga pe ʻulungaanga ʻo Sīsū Kalaisi ʻoku ou vakai ki ai ʻi he tokotaha ko ʻení?” Teuteu ʻa e meʻa te ke lea ʻaki ki he tokotaha akó, pea vahevahe leva ʻa e ʻulungāngá mo ia.

Aleaʻi pe Fakalaulauloto

• ʻE founga fēfē hano fakaafeʻi ʻo e kau akó ke hokohoko atu ʻenau feinga ke hangē ko Sīsū Kalaisí ʻi hoʻo vakai ki he ngaahi ʻulungaanga faka-Kalaisi ʻi he kau akó pea vahevahe mo kinautolu hoʻo ngaahi fakakaukaú?

Fakatahaʻi

• Kamata ʻaki hano fili ha toko taha pe ua ʻo e kau akó ʻi he ʻaho. Vakaiʻi pea vahevahe mo kinautolu ʻa e founga ʻokú ke fakatokangaʻi ai ʻenau anga faka-Kalaisi angé. Hokohoko atu ʻeni kae ʻoua kuo hoko ko ha meʻa angamaheni.

Fie Ako Lahi Ange?

• 2 Nīfai 25:26

• Chad H Webb, “We Talk of Christ, We Rejoice in Christ” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 12 Sune 2018), broadcasts.ChurchofJesusChrist.org