Pagpaminaw uban sa Gugma

Ipatin-aw

Mahimo nimong ipakigbahin nga ang pagpaminaw uban sa gugma mao ang abilidad sa pagpaminaw ngadto sa uban naggamit dili lamang sa inyong mga dunggan apan usab sa inyong mga mata ug kasingkasing. Ang paghimo og tinuyo nga pagpaningkamot sa pagpaminaw kon unsa ang gisulti sa ubang tawo ug sa pag-obserbar kon giunsa nila sa pagpakigsulti makatabang sa indibidwal sa pagbati og paghigugma ug pagdawat. Ang pagpaminaw uban sa gugma nagdapit sa Espiritu sa pagpanalangin kanato uban sa gasa sa pag-ila. Kita makasabot ug makabati sa mga panginahanglan sa uban.

Si Sister Reyna I. Aburto mitudlo:

Ang pagpaminaw uban sa gugma usa sa pinakadako nga gasa nga atong ikatanyag, ug makatabang kita sa pagdala o pag-alsa sa bug-at nga mga pagsulay nga makatuok sa atong mga hinigugma ug kahigalaan aron nga, pinaagi sa atong gugma, sila mobati na usab sa Espiritu Santo ug makakita sa kahayag nga nagagikan ni Jesukristo. (Reyna I. Aburto, “Sa Dag-om ug Kahayag, Ginoo, Ubani Ako!,” Liahona, Nob. 2019, 58)

Sa pagpauswag sa imong kahanas sa pagpaminaw, ikaw makahimo sa:

• Pagsalikway sa mga makalinga (sama sa elektronik nga mga himan).

• Pagtan-aw sa tawo kon sila nagsulti ug naghatag og pagtagad sa ilang mga pulong ug lihok sa lawas.

• Pagpaminaw ngadto sa unsay gisulti sa laing tawo kaysa magplano kon unsay imong isulti sunod.

• Pagpangutana og follow up nga mga pangutana sa pagkunhod sa sayop nga pagsabot.

• Pagpakita sa imong tinuod nga interes pinaagi sa pagsulti og usab sa unsay gisulti sa tawo aron sila mahibalo nga sila nasabtan.

• Pagsalikway sa paghukom ug pagsaway.

Modelo

Hunahunaa ang pagpakita sa lista sa mga kahanas sa pagpaminaw sa ibabaw ug sa pagdapit sa mga estudyante sa pagdangop ngadto niini samtang ikaw magpakita kon unsaon sa pagpaminaw uban sa gugma.

Han-aya ang duha ka lingkoranan diha sa atubangan ug pagdapit og usa ka boluntaryo sa paglingkod atbang kanimo. Makahimo ka sa pagpakita kon unsaon nga mahimong aktibo nga tigpaminaw samtang ang estudyante nga boluntaryo nagsulti kanimo og usa ka butang nga makahuloganon sa usa ka bag-ohay nga leksiyon o sa ilang personal nga pagtuon sa ebanghelyo.

Pagpraktis

Dapita ang mga estudyante sa paghan-ay sa ilang mga kaugalingon ngadto sa pares o diha sa gagmay nga mga grupo ug sa pagpraktis sa ilang aktibo nga mga kahanas sa pagpaminaw pinaagi sa pagpuli-puli og pagpakigbahin ug pagpaminaw. Sila makapraktis niini nga kahanas pinaagi sa paghisgot og bag-ohay nga leksiyon o sa ilang personal nga pagtuon sa kasulatan. O sila makapili hinoon sa paghisgot og usa sa mosunod nga mga tudling ug ang nag-uban niini nga pangutana.

Dugang nga mga tudling alang sa pagpraktis:

• Isaias 12:2. Kanus-a ikaw o ang usa ka tawo nga imong kaila nakabuntog sa kahadlok ug misalig sa Ginoo diha sa usa ka malisod nga sitwasyon?

• Juan 16:33. Unsa ang nagtabang kanimo sa dihang imong gibati ang kabalaka mahitungod sa kondisyon sa kalibotan?

• 1 Nephi 8:33. Unsaon nimo o atubangon ba nimo ang pagbiaybiay tungod sa imong mga tinuohan?

• Doktrina ug mga Pakigsaad 121:1. Unsa ang imong isulti sa pagtabang og usa ka higala o sakop sa pamilya kinsa mibati ingon og ang Dios wala maminaw?

Dapita ang mga estudyante sa paghisgot kon unsa ang maayong nahimo ug unsa ang mahagiton kon magpraktis niini nga kahanas. Kadto kinsa nakigbahin mahimong maghulagway kon unsa ang ilang gibati samtang ang uban naninguha sa pagpaminaw uban sa gugma.

Pagdapit ug Pag-follow Up

Dapita ang estudyante sa pagpraktis niini nga kahanas diha sa ilang inter-aksiyon sa tibuok semana. Sila makahimo usab sa pagmatikod kon unsa ang gibuhat sa uban sa pagpaminaw uban sa gugma. Sa usa ka umaabot nga klase, dapita ang mga estudyante sa pagpakigbahin kon giunsa nila sa pagpalambo sa ilang pagpaminaw uban sa gugma.