Pagpakigbahin sa mga Kamatuoran sa Ebanghelyo sa Yano ug Klaro nga Paagi

Ipatin-aw

Ipasabot nga ang pagtudlo sa kamatuoran sa yano ug klaro nga paagi usa ka gamhanan nga paagi sa pagtubag og mga pangutana ug pagtunong sa mga kabalaka. Ipakita ug basaha ang mosunod nga pamahayag ni Presidente M. Russell Ballard:

Ang labing kasagarang hangyo nga atong madungog mao ang usa ka sayon kaayo nga yano nga butang nga sama niini: “Suginli ko og gamay bahin sa inyong Simbahan.” Ang importanteng pulong dinhi mao ang “gamay.” Wala sila moingon nga, “Suginli ako sa tanan nga imong nahibaloan ug unya pagpadala og lain aron mosugilon kanako sa tanan.” …

… Adunay dakong panginahanglan alang sa tin-aw, yano nga mga pamahayag nga ikahatag niadto kinsa mga mapakisayron sa mga unang pagtulon-an sa Simbahan sama niini karon. (M. Russell Ballard, “Hugot nga Pagtuo, Pamilya, mga Kamatuoran, ug mga Bunga,” ,”Liahona, Nob. 2007, 25)

Modelo

Ikaw makahimo sa pagpakigbahin og usa o sobra pa sa mosunod nga mga ehemplo sa yano ug klaro nga mga pamahayag sa kamatuoran sa ebanghelyo o gamit og pipila sa imong mga ehemplo sa pagmodelo niini nga kahanas.

Unsa ang pagkapari? “Ang pagkapari mao ang awtoridad ug gahom sa Dios. Anaa kini kanunay ug magpadayon sa pagkaanaa nga walay kataposan (tan-awa sa Alma 13:7–8; Doktrina ug mga Pakigsaad 84:17–18). Pinaagi sa pagkapari, ang Langitnong Amahan nagtuman sa Iyang buhat ‘sa pagpahinabo sa pagka-imortal ug kinabuhi nga dayon sa tawo’ (Moises 1:39). Ang Dios naghatag sa awtoridad ug gahom ngadto sa Iyang anak nga mga lalaki ug mga babaye dinhi sa yuta sa pagtabang sa paghimo niini nga buhat” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 3.0, ChurchofJesusChrist.org).

Unsa ang pagpamatuod? “[Ang] pagpamatuod mao ang labing bililhon nga kabtangan, kasagaran adunay kalabotan sa mainit nga espirituhanong mga pagbati. Kini nga mga pagbati sa kasagaran gipaabot sa hilom nga paagi ug gihulagway nga ‘hinay, malumong tingog’ [1 Mga Hari 19:12]. Kini mao ang inyong pagtuo o kahibalo sa kamatuoran nga gihatag isip usa ka espirituhanon nga saksi pinaagi sa impluwensiya sa Espiritu Santo” (Gary E. Stevenson, “Pag-amuma ug Paghatag sa Inyong Pagpamatuod,” Liahona, Nob. 2022, 112).

Unsaon nako sa pagkahibalo kon ang Dios nakapasaylo na kanako? “Ang Dios nagsaad nga Siya mopasaylo niadtong kinsa maghinulsol. Kon gibati nimo ang kahupay gikan sa Espiritu, ikaw makahibalo nga ang maulaong gahom sa Manluluwas naglihok sa imong kinabuhi” (Alang sa Kalig-on sa Kabatan-onan: Usa ka Giya alang sa Paghimo og mga Pagpili [2022], 8).

Pagpraktis

Ikaw makamugna og usa ka pangutana gikan sa usa ka hilisgotan o pagtulon-an gikan sa pagbasa sa kasulatan niini nga semana. O ikaw makapili gikan sa mga pangutana nga gihatag diha sa ubos. Dapita ang mga estudyante sa pagpraktis uban sa usa ka pares ug pagpuli-puli sa pagtubag sa mga pangutana sa klaro ug yano nga paagi. Awhaga ang mga estudyante sa pagtubag sa matag pangutana sulod sa 30 ngadto sa 60 ka segundo.

• Ang mga Santos sa Ulahing mga Adlaw nagtuo ba ni Jesus?

• Nganong nagkinahanglan ako sa Basahon ni Mormon kon ako adunay Biblia?

• Ang mga sakop sa inyong simbahan nagpraktis ba og polygamy [daghang asawa]?

• Nganong nagkinahanglan ako og naorganisar nga relihiyon?

• Unsa ang Pag-ula ni Jesukristo?

Ikaw makahimo sa pagdapit og usa o duha ka estudyante sa pagpakigbahin unsay ilang nakat-onan pinaagi niini nga kasinatian.

Pagdapit ug Pag-follow Up

Sa umaabot nga mga semana, dapita ang mga estudyante sa pagpraktis og pagpakigbahin sa kamatuoran sa yano ug klaro nga paagi. Hinumdomi ang pag-follow up ug pagtugot og oras kon kamo magkita og usab alang sa mga estudyante sa pagsulti mahitungod sa bisan unsa nga mga kasinatian nga sila diha sa pagpakigbahin sa mga kamatuoran sa ebanghelyo sa yano ug klaro nga paagi. Mahimo ka usab nga modapit kanila sa pagpakigbahin og bisan unsa nga mga hagit nga ilang nasinati.