“1. “Ekkōl im Jeļā,” Kein Kōjparok ko ilo Kōjerbal Tōkņaļiji ko (2015)
“1. “Ekkōl im Jeļā,” Kein Kōjparok ko ilo Kōjerbal Tōkņaļiji ko
1. Ekkōl im Jeļā
Bwe kwon ekkatak im mour kake kein kōjparok kein, kwoj aikuj in ekkōl n̄e ļōmņak ak m̧akūtkūt ko am̧ rejjab ekkeijel ippān unin tōl kein. Komaron̄ bar ekkōl n̄e kwoj en̄jake n̄e jet remaron̄ kōm̧m̧an bwe en pidodo am̧ po. N̄an waanjon̄ak, jalimo, ajjimakeke, ikūmkūm, mijak, inepata, kwole, ak mōk remaron̄ kōm̧m̧an bwe en ļapļo̧k an pen n̄an kōjerbal tōkņaļiji ilo jim̧we. Ekkōl kōn jekjek im en̄jake kein renaaj kōm̧m̧an bwe kwon kōm̧m̧ane ta eo kwoj en̄jake ilo wāween eo em̧m̧an im ej kōkm̧anm̧anļo̧k. Kiin̄ Benjamin eaar kwaļo̧k, “Bwe eļan̄n̄e kom̧ij jab lale kom̧ make, im ļōmņak ko ami, im naan ko ami, im kōm̧m̧an ko ami, im pokake kien ko an Anij, im wōnm̧aanļo̧k ilo tōmak kōn ta kom̧ ar ron̄ kōn itok eo an Irooj, em̧ool n̄an jem̧ļo̧kin mour ko ami, kom̧ aikuj mej. Im kiiō, O armej, keememej, im jab mej.” (Mosaia 4:30).
Aolep mijenede elōn̄ aer m̧ōjņo̧ ko im en̄jake ko me epidodo kapoik er. Ijeļo̧kin ņooje ak kowaan en̄jake kein, m̧ool ilo am̧ jeļā kaki bwe en jipan̄ eok make n̄an kālet uwaak eo em̧m̧antata n̄an anjo̧ ioon kapo. Kwaļo̧k n̄an eok make ta eo kwoj en̄jake, im kālet eļan̄n̄e ewōr juon m̧akūtkūt ak jekjek ealikkar me komaron̄ jerbale n̄an e. Kōnono ippān eo m̧ōttam̧ im mijenede ro jet kwoj lōke er bwe ren maron̄ jipan̄ eok ekkōl kōn ta eo kwoj en̄jake im elmen an jelet eok. Ilo jar ko am̧, kōnono n̄an Jemedwōj Ilan̄ kōn ta en̄jake eo am̧ bwe En maron̄ jipan̄ eok im lewaj n̄an eok kajoor n̄an anjo̧ ioon kapo kōn Pinmuur eo an Kraist.
M̧ool in am̧ en̄jake men ko repidodo aer kapoik eok bwe en maron̄ jipan̄ eok kālet wāween eo em̧m̧antata n̄an anjo̧ ioon kapo.