“Kein Kōjparok 1,” Kein Kōjparok ko ilo Kōjerbal Tōkņaļiji ko (2015)
“Kein Kōjparok 1,” Kein Kōjparok ko ilo Kōjerbal Tōkņaļiji ko
Kein Kōjparok 1
Pād Wōt ilo Im̧we ko an Jetōb
Nipai eaar kallim̧ur ilo 2 Nipai 32:5, “N̄e kom̧ naaj deļo̧n̄ ilo iaļ eo, im bōk Jetōb Kwōjarjar, enaaj kwaļo̧k n̄an kom̧ aolep men ko kom̧ij aikuj kōm̧m̧an.” Jim̧we ilo kōjerbal anemkwoj in kālet eo am̧ ium̧win tōl eo an Jetōb Kwojarjar enaaj erom̧ kōttōbar eo am̧ em̧m̧an tata n̄an kōm̧m̧an em̧m̧an ilo am̧ kōjerbal tōkņaļiji, im enaaj kōjparok eok ņae nana.
App ko kar likūti ilo device eo am̧ elōn̄ filter kar ejaake n̄an kōjparok eok jān men ko renana. Ijoke, men̄e filter ko rekajoor reban kōjparok eok 100 bōjjāān aolep iien. Filter eo em̧m̧antata ewōr ippam̧ ej ankilaam̧ make im ikideelel n̄an kōm̧m̧ani kālet ko rejim̧we. Elder David F. Evans eaar kwaļo̧k: “Filter eo ejjejet tata ilo aolep mour n̄an kōjerbal tōkņaļiji ej kajjojo bōro im ļōmņak an kajjojo armej ro rūm̧m̧an dettaer. … Ewōr ad tōmak bwe … taujin [mijenede ro renaaj] kōļapļo̧k iminene in kōjerbal digital ko ilo tiljek, eo me enaaj kōjeraam̧m̧an mour ko aer im baam̧le ko aer indeeo” (“Elder David F. Evans Discusses Expanded Missionary Efforts,” mormonnewsroom.org). Mijenede ro rej aikuj bōk eddo ilo jim̧we n̄an kajjieon̄ wōnm̧aanļo̧k wōt n̄an “kakwojarjar būruw[eer]” (Katak im Bujen ko 88:74).
Jemedwōj Ilan̄ eaar lewaj n̄an eok ruo menin letok ko rejeņoļo̧k im rekajoor me renaaj jipan̄ eok: anemkwoj in kālet eo am̧ im menin letok eo an Jetōb Kwojarjar. Irooj eaar ba Enaaj: “bwe armej otemjej en maron̄ m̧akūtkūt ilo katak im pedped ko rej ekkejelļo̧k n̄an ilju im jekļaj, ekkar n̄an anemkwōj in kāālet an kanniōk eo me Iaar leļo̧k n̄an e, bwe armej otemjej en maron̄ uwaak kōn jero̧wiwi ko an make ilo raan in ekajet” (Katak im Bujen ko 101:78). Būreejtōn Boyd K. Packer eaar katakin, “Ejjeļo̧k membōr an Kabun̄ in—im meļeļein bwe ej kom̧ kajjojo—enaaj kōm̧m̧an juon bōd eļap ilo an ejjeļo̧k kakkōļ ej itok m̧okta jān im̧we ko an Jetōb Kwojarjar” (“How to Survive in Enemy Territory,” New Era, Apr. 2012, 3).