Kein Kōjparok 4

Erom̧ Juon Wōt

Kraist ilo upaaj in kijeek eo ippān em̧m̧aan ro jilu

“Im eļan̄n̄e jabdewōt armej … ilubwiljimi ekajoor ilo Jetōb eo, kōtļo̧k bwe [ren] bōk ippān e eo [e]m̧ōjņo̧, bwe [eo em̧ōjņo̧] en maron̄ kōketake ilo aolep ettā, bwe en maron̄ kajoor barāinwōt.

Katak im Bujen ko 84:106

Irooj eaar ba, “bwe jej aikuj in erom juon wōt, im eļan̄n̄e jej jab juon wōt jej jab An (Katak & Bujen ko 38:27). Jipan̄ mijen eo am̧ ejaake juon manitin bōro kuk, pokake, jouj, kea, jatōr, im bōk eddo bwe kwomin aolep kajoor, peran, im rie doon. Aolep mijenede reaikuj bok kapilōk n̄an ļoor kein kōjparok kein im rej aikuj en̄jake ineem̧m̧an n̄an kajjitōk jipan̄ n̄e emenin aikuj. Ejaake mantin lōke enaaj jipan̄ eok im mijenede ro jet bōbraeik er jān aer kattoļo̧k er make, kalōk im kōkajoorļo̧k iminene ko aer rejim̧we, im kōjparok doon jān kapo.

Ilo am kajjieon̄ in kalōk m̧wiļ ko rejim̧we, bōk jipan̄ jen mijenede ro jet im pojak n̄an jipan̄ mijenede ro ipeļakum̧. Āinwōt juon pea in kōmpānien im juon district, komi en juon wōt n̄an kōjparok im kōkajoorļo̧k doon: “Im eļan̄n̄e jabdewōt armej … ilubwiljimi ekajoor ilo Jetōb eo, kōtļo̧k bwe [ren] bōk ippān e eo [e]m̧ōjņo̧, bwe [eo em̧ōjņo̧] en maron̄ kōketake ilo aolep ettā, bwe en maron̄ kajoor” (Katak im Bujen Ko 84:106). Bar keememej n̄an erom̧ juon wōt ippān Irooj im n̄an atartar wōt Ippān ilo aolep am̧ kijejeto n̄an ļoor kein kōjparok ko.

Kōnono ippān eo m̧ōttam̧ im membōr in district eo am̧ eļan̄n̄e kwojjab jeļā eļan̄n̄e ebōd ak jaab kilen am̧ kōjerbal tōkņaļiji ko. Eļan̄n̄e kwoj po ilo jabdewōt jekjek, kajjitōk ippān eo m̧ōttam̧ ak mijen ritōl eo n̄an jipan̄. Keememej, aolep oktak ko ekkeijeļo̧k ippān intōrnet ak pija nana rej waļo̧k ilo ad make iaad. Kōn menin, kwoj aikuj jab kōjerbal device eo nejūm̧ n̄e kwoj make iaam̧. Laajrak in tōl kein ekoba jab bōk device eo nejūm̧ n̄an m̧ōn keppojak eo im jab kōjerbal device eo nejum̧ n̄e eo m̧ōttam̧ ej pād ilo m̧ōn keppojak eo. Kōtļo̧k bwe eo m̧ōttam̧ im mijenede ro jet ren jipan̄ eok jeļā ia eo kwoj aikuj jipan̄ ie. Jipan̄ doon ej juon jemdoon eo em̧m̧an n̄an kōļapļo̧k mour in jetōb eo am̧, im ej juon eddo n̄an kwaļo̧k am̧ iakwe.

Kōnke jem̧jerā ko ikōtaan mijenede ro remaron̄ in jab em̧m̧an ak repen, keememej n̄an ļoor pedped in katak ko ilo am̧ pukot jipan̄ jān mijenede ro jet ak bōk jipan̄ jān mijenede ro jet:

• “Kōmpānien ko … kōkajoorļo̧k doon ilo iien ko reppen. Remaron̄ lewaj kōjparok jān kauwōtata an kanniōk, jaaj ko reriab, im kapo. Iakwe im kautiej ro m̧ōttam̧” (Missionary Handbook [2006], 30).

• Aolep iien wōtōke bōk jibadbad ko rem̧m̧an tata. N̄an waanjon̄ok, eļan̄n̄e eo m̧ōttam̧ ejjab ļoor juon iaan kein kōjparok ko, wōtōke ke e ejjab jeļā. Jab wōtōke ke ejeļā ilo an jab pokake ruuļ ko.

• Jab bwebwenato kōn bōd ko am̧ jemaan n̄an mijenede ro jet. Pukot ļo̧k ro jet n̄an jipan̄ ejjab meļeļein kwaļo̧k en̄jake ko am̧ jemaan ak kōmeļeļeik er ta unin an pidodo am̧ po. Kōnono n̄an mijen būreejtōn eo makeļo̧k eļan̄n̄e ewōr am kajjitōk kōn erreeo. Keememej: “Am ettā ej m̧okta ej n̄an Irooj, innām mijen būreejtōn eo am̧, innām eo m̧ōttam̧” (Missionary Handbook, 32).

• Eļan̄n̄e kwojeļā ak kam̧ool jet men kōn mijenede ro jet, aolep iien kōjparok lōke ko im jab ruruwe kōn mijenede eo n̄an ro jet. Kwaļo̧k iakwe im jipan̄ n̄an mijenede eo epen auia, im jab kajjitōk kajjitōk ko rejjab aorōk. “Aolep mijenede ro—eļaptata [mijen ritōl ro] im ro ilo [mijen] opiij—reaikuj dāpij lōke n̄an jab kōnono n̄an ro jet kōn naan ko rettiņo̧ aer make” (Mission President’s Handbook [2006], 20).

• Eļan̄n̄e ewaļo̧k ke mijenede ro rejjab ļoor kein kōjparok ko, jibadōkļo̧k er ilo juon wāween eo me ejjab kamijak im jab ekajet. Ilo juon wāween em̧m̧an im meļak, kajjitōk kajjitōk ko āinwōt, “Kwomaron̄ ke jipan̄ n̄a meļeļe etke kwaar kōm̧m̧ane?” Innām kōm̧m̧an juon kōttōbar. Kajjitōk, “Ta am ļōmņak jemaron̄ kōm̧m̧ane?” im “Elmen ad maron̄ jipan̄ doon?”

• Ļoor jekjek in ilo peij 15 in tōl in: (1) kwon ekkōl im jeļā, (2) kālet n̄an jerbal., im (3) ekkatak im em̧m̧anļo̧k.

• Eļan̄n̄e juon mijenede epen auia n̄an ļoor kein kōjparok kein, kobaik mijen būreejtōn eo ak mijen ritōl eo n̄e ekkar. Pukot kapilōk kōn kilen eo em̧m̧antata kwomaron̄ jipan̄ mijenede eo epen auia.

• Mijenede ro repen auai n̄an kōjerbal tōkņaļiji ko rejeļā kadede bwe men eo rej kōm̧m̧ane ebōd. N̄e rej pukot jipan̄, rej aikuj in ettā, rie, im iakwe, jab āliklik ak bōd. Ikun̄ wōt, im aolep iien pukot tōl eo an Jetōb.

• Jerbal ippān eo m̧ōttam̧ im district eo n̄an errā ilo wāween ko n̄an jipan̄ doon. Eļan̄n̄e kwoj lo ke m̧wiļ ko am renana, kōnono ippān eo m̧ōttam̧ ak juon mijen ritōl. Kōn jipan̄ eo aer kwomaron̄:

  • Kōm̧m̧ane juon kōttōbar kāāl.

  • Kōm̧m̧ani kein kōjparok ko jet.

  • Kajjitōk ippāer n̄an jipan̄ eok bōk eddo.

  • Etale jabdewōt jekjek me kwoj aikuj oktak n̄an jipan̄ eok mije wōt jibadbad eo am̧.

ruo sister mijenede rej kalimjōk phone eo

Jerbal ippān doon ilo juon wōt āinwōt juon pea in kōmpānien jabdewōt iien kwoj kōjerbal device eo nejum̧.

Keememej, ewōr an Irooj lōke ioom̧ im ippān kajjojo mijenede Ekar kūr. Eaar kepooj ro m̧ōttam̧ im ritōl ro n̄an kōjparok im jipan̄ eok. Ejeļā apan̄ ko kwoj iooni, im Eaar kepooji n̄an jipan̄ eok ilo am̧ jipan̄ E ilo jerbal in em̧m̧an. Juon wōt āinwōt mijenede ro eban wōt n̄an ļōn̄aj jerbal in; enaaj kōpooj eok n̄an eddo ko an baam̧le im Kabun̄ im ālkin wōt mijen eo am̧.

ruo sister mijenede rej kōjerbal desktop kamputōr ko

Ippān ļo̧k eo m̧ōttam̧ im mijenede ro jet, jar ilo am̧ wūjlepļo̧k am̧ n̄an:

• Lukkuun lale bwe kwon maron̄ lo screen eo ilo an eo m̧ōttam̧ ilo aolep iien.

• Men bwe eo m̧ōttam̧ en etale aolep pija, kakkobaba, im ennaan m̧okta jen am̧ jilkinļo̧k. (Menin in eban jerbal n̄an leta ko kwoj jilkinļo̧k n̄an būreejtōn ak email n̄an m̧weeo.)

• Bōk konaam̧ āinwōt juon pea in kōmpānien ilo aolep ekkatak ko am̧ ilo social media ko, ekoba email, jeje, Facebook, Skype, im Facetime.

• Kūrtok mijen ritōl ro n̄an etale emakijkij in am̧ kōjerbal tōkņaļiji eo ilo am̧ jerbal in mijenede.