1. Luksave mo Admitim

Pikja

King Benjamin i stap toktok long ol pipol

Blong mekem se yu save lan blong no faenem i had blong laef folem ol sef step ia, yu nid blong luksave ol taem we ol tingting o aksen blong yu i no go gud wetem ol gaedlaen ia. Yu nid blong luksave tu ol taem we yu stap filim wan samting we i save mekem yu no strong blong faet agens. Eksampol, taem yu no gat samting blong mekem, yu stap yuwan, kros, wari, fraet, tingting tumas, hanggri, o taet, i mekem i moa had blong yusum teknoloji wetem waes tingting. Taem yu luksave ol situesen mo filing ia, bae i mekem yu save fesem wanem yu stap filim long wan wei we i gud mo i save helpem yu. King Benjamin i bin tijim: “Sapos yufala i no lukaot gud long yufalawan, mo long ol tingting blong yufala, mo long ol toktok blong yufala, mo long ol wok blong yufala, mo yufala i no obei ol komanmen blong God, mo no gohed long fet blong wanem we yufala i bin harem long saed blong taem we Lod bae i kam, go kasem en blong laef blong yufala, yufala i mas ded. Mo nao, O man, tingbaot, mo no ded.” (Mosaea 4:30).

Pikja

tu elda misinari i stap yusum ol kompiuta

Evri misinari i eksperiensem ol wiknes mo ol filing we i mekem olgeta oli no strong blong faet agens. No stap haedem o tingting hevi long ol filing ia, be stap ones blong luksave olgeta blong mekem se yu save helpem yuwan blong ansa moa gud mo winim temtesen. Talemaot long yuwan wanem yu stap filim, mo luk sapos i gat wan stret taem o situesen we, from hemia, i mekem yu stap filim olsem we yu stap filim. Gat fasin blong no fraet blong serem ol samting wetem kompanion blong yu mo ol nara misinari we yu trastem blong mekem se oli save helpem yu blong luksave wanem yu stap filim mo olsem wanem i stap gat paoa long yu. Long ol prea blong yu, gat wan fasin blong no fraet blong serem ol samting wetem Papa long Heven abaot wanem yu stap filim, blong mekem se Hem i save helpem yu mo givim yu paoa blong winim temtesen tru long Atonmen blong Kraes.