Fas Toktok

Truaot long histri, God i bin yusum ol tabu tul blong muvum wok blong Hem. Eksampol, Yurim mo Tumim i bin help blong transletem tok blong God, mo Liahona hem i givim daereksen long Lihae wetem famli blong hem taem oli stap wokbaot i go long promes graon. Abaot ol tabu tul long dei blong yumi, Presiden Spencer W. Kimball hem i talemaot, “Mi biliv se Lod i wantem tumas blong putum, long han blong yumi, ol niu samting we, yumi olsem ol simpol man, yumi neva luk nating wan pis blong hem” (“When the World Will Be Converted,” Ensign, Oct. 1974, 10). Stat long taem blong toktok blong Presiden Kimball, i bin gat plante teknoloji tul we oli bin kamaot blong muvum stamba tingting blong Lod, mo naoia yu save yusum ol tul ia long wok blong yu. Elda L. Tom Perry i anaonsem: “Oli givim raet long ol misinari blong yusum intanet long misinari wok blong olgeta. … Ol misinari bae oli yusum ol kompiuta long ol mitinghaos mo long ol Jos bilding” (“Missionary Work in the Digital Age” [wolwaet lidasip trening miting, Jun 2013], lds.org/broadcasts).

Pikja

Lihae mo famli wetem Liahona

Teknoloji ia we yu stap kasem naoia hem i blong helpem yu long seves blong yu long Lod taem Hem i stap muvum wok blong Hem i go hariap. Taem teknoloji ia hem i blong mekem gud, Setan i traehad blong yusum teknoloji ia blong leftemap rabis fasin mo blong mekem wok blong Lod i kam had. Hem i impoten blong yu lanem olsem wanem blong yusum olgeta tul ia folem stamba tingting we oli mekem—blong muvum wok blong sevem man i go. Insaed long buklet ia i gat ol ol sef step we i save helpem yu blong yusum olgeta tul ia long stret wei blong winim stamba tingting blong misin blong yu mo blong muvum stamba tingting blong God i go we i blong “mekem man i nomo save ded mo i kasem laef we i no save finis” (Moses 1:39). Ol sef step ia bambae i openem tu, doa long insperesen blong yusum teknoloji we bae i mekem fet blong yu long Jisas Kraes i kam strong moa wetem fet blong olgeta we yu stap givim seves long olgeta. Oli stap olsem ol lok long doa blong tempol, blong stopem ol rabis samting blong kam insaed long maen blong yu. Paul i tijim, “Ating yufala i save finis we yufala i olsem haos blong God, mo we Spirit blong God i stap finis long yufala? ” (Fas Korin 3:16). Ol sef step ia bambae i protektem yu mo helpem yu blong stap longwe long ol rabis infomesen mo eksperiens we i nogud long Spirit, mo tu, ol samting we i no stret olsem ponografi. Bambae oli helpem yu blong no westem taem long ol aktiviti olsem ol gem, nius, spot, vidio, mo ol samting we i no stret blong yusum long sosol media. Blong yusum olgeta prinsipol ia, bambae i givim moa paoa blong yu blong helpem ol narawan mo bambae i blesem yu truaot long laef blong yu.

Lanem blong folem ol sef step ia olsem we yu save. Bambae oli helpem yu taem yu stap traehad blong kam moa olsem Kraes. “Hem nao i bin soem rod. Hem i stap wan eksampol we i stret gud evriwan, mo Hem i komandem yumi blong kam olsem Hem (lukluk 3 Nifae 27:27)” (Prijim Gospel blong Mi: Wan gaed long Misinari Seves [2018], 121). Ol joes we yu mekem folem olsem wanem yu yusum teknoloji, i sud helpem yu blong kam moa olsem Sevya. Dipen long gladhat—help o paoa ia we i kam tru long Atonmen blong Kraes—taem yu lukaot blong kam wan tul we i gat paoa long han blong Lod.

Yuwan, wetem kompanion blong yu, mo wetem ol narafala misinari, bambae yu lanem mo givim yu fulwan blong folem ol sef step ia. Bambae yu lanem tu, wan proses blong helpem yu taem yu filim se u no sef o nara man i save mekem nogud long yu. Gobak mo lukluk long ol toktok ia oltaem. Stadi, tingting hevi, mo yusum ol prinsipol ia kasem taem oli kam wan nomol pat long wei we yu tingting mo mekem folem.