“Sef Step 3,” Ol Sef Step blong Stap Yusum Teknoloji (2015)
“Sef Step 3,” Ol Sef Step blong Stap Yusum Teknoloji
Sef Step 3
Kontrolem Yuwan
Long 2 Nifae 2:26, Lihae i tijim, From we Lod i pemaot yumi long Foldaon, [Ol pikinini blong man] oli kam fri blong oltaem, save gud aot long ivel; mo oli fri blong mekem joes blong olgetawan, be i no blong man i mekem joes blong olgeta.” Yusum fasin blong jus blong yu blong kontrolem yuwan mo mekem ol stret mo gud joes folem olsem wanem yu yusum teknoloji. Long saed blong koneksen bitwin fasin blong jus mo fasin blong kontrolem yuwan, Elda D. Todd Christofferson i bin talem, “Fasin blong kontrolem yuwan long saed blong tingting i wan eksasaes blong oltaem long fasin blong jusum raet from se i raet, nomata sapos i had” ( (“Moral Discipline,” Ensign o Liahona, Nov. 2009, 105). From fasin blong kontrolem yuwan i gat strong koneksen wetem fasin blong jus, lukaot gud blong mekem wan efot blong jusum blong stap kontrolem yuwan taem yu yusum ol lektronik tul long misinari wok blong yu.
Developem fasin blong kontrolem yuwan blong yusum lektronik tul blong yu taem nomo we i raet blong mekem. Taem yu stap toktok fes tu fes wetem ol pipol, no jekem mesej o ansa long ol kol. Kontrolem olsem wanem yu yusum ol tul ia. No letem oli kontrolem yu. Yu maet save sam pipol we oli no save lego ol lektrik tul blong olgeta. Oli luk olsem se oli no save sosol envaeromen raon long olgeta taem oli sendem mo jekem ol teks mesej, plei ol vidio gem, o mekem ol nara aktiviti long lektronik tul blong olgeta.
Olsem wan misinari, yu no letem lektronik tul blong yu i pulumaot tingting blong yu. Presiden M. Russell Ballard i tijim: “ Ol lektronik tul we yu save holem, olsem ol smatfon, oli ol blesing, be oli save pulumaot tingting blong yumi blong harem, ‘kwaet, mo smol voes.’ Oli nid blong stap olsem ol wokman blong yumi be i no ol masta blong yumi” (“Be Still, and Know That I Am God” [Church Educational System devotional, May 4, 2014], lds.org/broadcasts).