Kapitulo 3: Leksyon 4

Ang Mangin Bug-os-Kabuhi nga mga Disipulo ni Jesucristo

The Lost Lamb [Ang Nadula nga Kordero], ni Del Parson

Pagtudlo Sining Leksyon

Ang bunyag isa ka malipayon nga ordinansa sang paglaum. Kon bunyagan kita, ginapakita naton ang aton handum nga sundon ang Dios kag magsulod sa banas padulong sa kabuhi nga wala katapusan. Ginapakita man naton ang aton pangako nga mangin bug-os-kabuhi nga mga disipulo ni Jesucristo.

Ang ini nga leksyon ginplastar suno sa mga kasugtanan nga ginahimo naton sa bunyag. May ari ini sang masunod nga mayor nga mga seksyon, nga ang kada isa may mga subseksyon:

• Ang Aton Kasugtanan nga Mangin Handa sa Pagdala sa Aton Kaugalingon sang Ngalan ni Jesucristo

• Ang Aton Kasugtanan nga Tumanon ang mga Kasuguan sang Dios

• Ang Aton Kasugtanan nga Magserbisyo sa Dios kag sa Iban

• Ang Aton Kasugtanan nga Magpadayon tubtob sa Katapusan

Buligi ang mga tawo nga maintiendihan nga ang mga prinsipyo kag mga kasuguan nga imo ginatudlo bahin sang kasugtanan nga ila himuon sa bunyag. Ipakita sa ila kon paano ang tagsa ka bahin sining leksyon magabulig sa ila nga “magkari kay Cristo … kag mag-ambit sang iya kaluwasan” (Omni 1:26; tan-awa man sa 1 Nefi 15:14).

Gusto mo itudlo ini nga leksyon sa pila ka pagbisita. Talagsa lang gid dapat nga ang pagbisita para magtudlo maglapaw sa 30 minutos. Kasami mas maayo ang malip-ot, pirme nga pagbisita nga nagatalakay sing mas magagmay nga mga bahin sang leksyon.

Planoha kon ano ang imo itudlo, kon san-o mo ini itudlo, kag kon ano kalawig. Pamensara ang mga panginahanglan sang mga tawo nga imo ginatudloan, kag pangayoa ang giya sang Espiritu. May ligwa ka sa pagtudlo depende sa kon ano gid ang makabulig sa mga tawo nga maghanda para sa bunyag kag kompirmasyon.

Ang iban nga seksyon sining leksyon may upod nga partikular nga mga imbitasyon. Magpangayo sang inspirasyon kon paano kag kon san-o ihatag ang mga imbitasyon. Magmangin sensitibo sa lebel sang pag-intiendi sang kada tawo. Buligi sia nga ipangabuhi ang ebanghelyo sing amat-amat.

babayi nga nagaambit sang sakramento

Ang Aton Kasugtanan nga Mangin Handa sa Pagdala sa Aton Kaugalingon sang Ngalan ni Jesucristo

Sa aton bunyag, nagasugot kita nga sundon si Jesucristo “upod ang bug-os nga katuyuan sang tagipusuon.” Nagasaksi man kita nga “sugot [kita] sa pagdala sa [aton] kaugalingon sang ngalan ni Cristo” (2 Nefi 31:13; tan-awa man sa Doktrina kag mga Kasugtanan 20:37).

Ang pagdala sa aton kaugalingon sang ngalan ni Jesucristo nagakahulugan nga ginapanumdom naton Sia kag ginatinguhaan nga magpangabuhi bilang bug-os-kabuhi Niya nga mga disipulo. Ginapasiga naton ang Iya kasanag sa iban. Ginakabig naton ang aton kaugalingon nga Iya kag ginauna Sia sa aton mga kabuhi.

Ang masunod nga mga seksyon nagalaragway sang duha ka paagi nga ginadumdom naton kag ginasunod si Jesucristo.

Magpangamuyo Pirme

Ang pangamuyo pwede nga simple lang nga pagsugilanon sa Amay nga Langitnon nga naghalin sa tagipusuon. Sa pangamuyo, bukas kag tampad kita nga nagaistorya sa Iya. Ginapahayag naton ang aton pagpalangga sa Iya kag pagpasalamat para sa aton mga bugay. Nagapangayo man kita sang bulig, proteksyon, kag direksyon. Kon matapos na ang aton pangamuyo, dapat hatagan naton sang tiyempo para magpondo kag mamati.

Gintudlo ni Jesus, “Kinahanglan gid kamo nga magpangamuyo sing dalayon sa Amay sa akon ngalan” (3 Nefi 18:19, emphasis gindugang; tan-awa man sa Moises 5:8). Samtang nagapangamuyo kita sa ngalan ni Jesucristo, ginadumdom naton Sia kag ang Amay nga Langitnon.

Nagpahamtang si Jesus sang ehemplo para sundon naton sa pagpangamuyo. Madamo kita sang matun-an parte sa pangamuyo paagi sa pagtuon sang mga pangamuyo sang Manluluwas sa balaan nga mga kasulatan (tan-awa sa Mateo 6:9–13; Juan 17).

Ang aton mga pangamuyo pwede nga may masunod nga mga bahin:

• Magsugod paagi sa pagtawag sa Amay nga Langitnon.

• Ihambal ang mga nabatyagan sang aton tagipusuon, pareho sang pagpasalamat sa mga bugay nga aton nabaton.

• Magpamangkot, magpangayo sang giya, kag magpangayo sang mga bugay.

• Magtapos paagi sa pagsiling, “Sa ngalan ni Jesucristo, amen.”

Ginatudloan kita sa balaan nga kasulatan nga magpangamuyo sa aga kag sa gab-i. Pero, pwede ka mangamuyo bisan ano oras kag sa bisan ano nga sitwasyon. Para sa aton personal kag pangpamilya nga pangamuyo, mangin mas makahulugan kon magluhod kita kon mangamuyo. Dapat may pangamuyo gid kita pirme sa aton mga tagipusuon. (Tan-awa sa Alma 34:27; 37:36–37; 3 Nefi 17:13; 19:16.)

Ang aton mga pangamuyo dapat madinumdumon kag halin sa tagipusuon. Kon magpangamuyo kita, dapat likawan naton ang paghambal sang pareho nga mga butang sa pareho nga paagi.

Nagapangamuyo kita nga may pagtuo, may sinseridad, kag may tunay nga tuyo nga aksyonan ang mga sabat nga aton mabaton. Kon himuon naton ini, giyahan kita sang Dios kag buligan kita sa paghimo sing maayo nga mga desisyon. Mabatyagan naton nga mas malapit sa Iya. Hatagan Niya kita sang pag-intiendi kag kamatuoran. Bugayan Niya kita sang kasulhay, paghidaet, kag kusog.

Pagtuon sa Balaan nga mga Kasulatan

• 2 Nefi 32:8–9

• Enos 1:1–12

• Alma 6:6; 13:28; 34:17–28; 37:36–37

• 3 Nefi 18:20

• Moroni 10:3–5

• Doktrina kag mga Kasugtanan 6:22–23; 8:2–3; 9:7–9; 10:5; 19:28; 42:14

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Pangamuyo”

• Mga Topiko sang Ebanghelyo: “Pangamuyo”

Imbitasyon

Mangamuyo ka bala adlaw-adlaw sa Amay nga Langitnon?

Magtuon sang Balaan nga mga Kasulatan

Gintudlo ni Nefi, “Magpaayaw kamo sa mga pulong ni Cristo; kay ang [mga ini] magasugid sa inyo sang tanan nga mga butang nga inyo dapat himuon” (2 Nefi 32:3; tan-awa man sa 31:20).

Ang pagtuon sang balaan nga mga kasulatan importante nga paagi sa pagdumdom kag pagsunod kay Jesucristo. Sa balaan nga mga kasulatan matun-an naton ang Iya kabuhi, pag-alagad, kag mga pinanudlo. Matun-an man naton ang Iya mga promisa. Samtang ginabasa naton ang balaan nga mga kasulatan, maeksperiyensyahan naton ang Iya pagpalangga. Nagasangkad ang aton mga kalag, nagadako ang aton pagtuo sa Iya, kag masanagan ang aton mga kaisipan. Ang aton mga testimonya parte sa Iya diosnon nga misyon mas nagabakod.

Ginadumdom naton kag ginasunod si Jesus kon ginapangabuhi naton ang Iya mga pulong sa aton kabuhi. Dapat naton tun-an ang balaan nga mga kasulatan adlaw-adlaw, labi na gid ang Libro ni Mormon.

Ang balaan nga mga kasulatan sang Simbahan ni Jesucristo sang mga Santos sa Ulihing mga Adlaw amo ang Biblia, ang Libro ni Mormon, ang Doktrina kag mga Kasugtanan, kag ang Perlas nga Bilidhon. Ginatawag man ini nga “standard works.”

Pagtuon sa Balaan nga mga Kasulatan

• 1 Nefi 19:22–23

• 2 Nefi 9:50–51; 25:26; 29:1–13; 31:19–20; 32:3

• Alma 32:28–30

• Doktrina kag mga Kasugtanan 1:37–38; 18:34–36

• Juan 20:31

• 2 Timoteo 3:14–17

• 2 Pedro 1:20–21

Tun-i Pa Gid ang parte sa Sining Prinsipyo

• Giya sa Balaan nga mga Kasulatan, “Balaan nga mga Kasulatan”

• Mga Topiko sang Ebanghelyo: “Balaan nga mga Kasulatan”

Imbitasyon

Basahon mo bala ang balaan nga mga kasulatan adlaw-adlaw? (Pamensara nga hagaron ang mga tawo nga magbasa sang partikular nga mga bersikulo.)

Si Jesucristo nga nagatudlo sa kadam-an

Ang Aton Kasugtanan nga Tumanon ang mga Kasuguan sang Dios

Tanda: Madamo sang pamaagi para itudlo ang mga kasuguan sa sining seksyon. Halimbawa, pwede mo sila tudloan sa pila lang ka pagbisita. Ukon pwede mo itudlo ang iban sini bilang parte sang una nga tatlo ka leksyon. Kon magtudlo sang mga kasuguan, siguroha nga iangot ini sila sa kasugtanan sang bunyag kag sa plano sang kaluwasan.

Kon mabunyagan kita, nagahisugot kita sa Dios nga aton “tumanon ang iya mga kasuguan” (Mosias 18:10; Alma 7:15).

Ginhatagan kita sang Dios sang mga kasuguan tungod palangga Niya kita. Gusto Niya ang pinakanami para sa aton, sa karon kag sa wala katubtuban. Bilang aton Amay nga Langitnon, nahibal-an Niya kon ano ang kinahanglan naton para sa aton espiritwal kag pisikal nga ikaayo. Nahibal-an man Niya kon ano ang magadala sa aton sang pinakadako nga kalipayan. Ang tagsa ka kasuguan isa ka diosnon nga regalo, nga ginhatag para giyahan kita sa aton mga desisyon, protektahan kita, kag buligan kita nga magtubo.

Isa ka rason nga ari kita sa kalibutan amo ang para magtuon kag magtubo paagi sa paggamit sang aton kabubut-on sing maalam (tan-awa sa Abraham 3:25). Ang pagpili nga sundon ang mga kasuguan sang Dios—kag maghinulsol kon magkulang kita—nagabulig sa aton nga maatubang ining masami makahalangkat nga lakat sang kabuhi.

Ang mga kasuguan sang Dios ginhalinan sang kusog kag mga bugay (tan-awa sa Doktrina kag mga Kasugtanan 82:8–9). Paagi sa pagtuman sang mga kasuguan, matun-an naton nga indi gale ini sablag nga nagapugong sang aton kahilwayan. Ang matuod nga kahilwayan nagahalin sa pagsunod sang mga kasuguan. Ang pagtuman ginhalinan sang kusog nga nagadala sa aton sang kasanag kag ihibalo paagi sa Balaan nga Espiritu. Nagadala ini sang mas dako nga kalipay kag nagabulig sa aton nga malab-ot ang diosnon naton nga potensyal bilang mga anak sang Dios.

Nagapromisa ang Dios nga bugayan kita kon tumanon naton ang Iya mga kasuguan. Ang iban nga mga bugay naangot sa partikular nga mga kasuguan. Ang pinakataas Niya nga bugay amo ang kalinong sa sining kabuhi kag wala katapusan nga kabuhi sa kalibutan nga magaabot. (Tan-awa sa Mosias 2:41; Alma 7:16; Doktrina kag mga Kasugtanan 14:7; 59:23; 93:28; 130:20–21.)

Ang mga bugay sang Dios pareho nga espiritwal kag temporal. Kon kaisa, kinahanglan naton nga mangin pasensyoso sa paghulat sa mga ini, nga nagasalig nga maabot ini suno sa Iya pagbuot kag tiyempo (tan-awa sa Mosias 7:33; Doktrina kag mga Kasugtanan 88:68). Para makilala ang iban nga mga bugay, kinahanglan naton nga mangin sensitibo sa espirituhanon kag magbantay. Matuod gid ini sa mga bugay nga nagaabot sa simple kag daw ordinaryo lang nga pamaagi.

Ang iban nga mga bugay matalupangdan lang kon nagligad na. Ang iban basi mag-abot sa pihak pa nga kabuhi. Wala sapayan sang tiyempo kag klase sang mga bugay sang Dios, makasalig kita nga maabot ini samtang ginatinguhaan naton nga ipangabuhi ang ebanghelyo ni Jesucristo (tan-awa sa Doktrina kag mga Kasugtanan 82:10).

Perpekto ang pagpalangga sang Dios sa tanan Niya nga kabataan. Pasensyoso Sia sa aton mga kahuyang, kag nagapatawad Sia kon maghinulsol kita.

Ang Duha ka Dako nga Sugo

Sang ginpamangkot si Jesus, “Ano bala ang dakong sugo sa kasuguan?” Ang sabat Niya, “Higugmaa ang Ginuo nga imo Dios sa bug-os mong tagipusuon, kag sa bug-os mong kalag, kag sa bug-os mong hunahuna.”

Dayon nagsiling si Jesus nga ang ikaduha nga dakong sugo daw pareho sa una: “Higugmaa ang imo isigkatawo subong sa imo kaugalingon” (Mateo 22:36–39). “Wala na sing iban nga sugo nga dako pa sa ila sini” (Marcos 12:31).

Bilang espiritu nga mga anak sang Dios, may dako kita nga kapasidad sa pagpalangga. Bahin ini sang espiritwal naton nga palanublion. Ang pagpangabuhi sang duha ka dako nga sugo—nga palanggaon una ang Dios kag palanggaon ang aton isigkawato—amo ang kinaiya nga sa diin makilal-an ang mga disipulo ni Jesucristo.

Gugma sang Dios

Madamo sang pamaagi nga mapakita naton ang aton pagpalangga sa Dios. Pwede naton tumanon ang Iya mga kasuguan (tan-awa sa Juan 14:15, 21). Pwede naton Sia unahon sa aton mga kabuhi, nga ipaidalom ang aton pagbuot sa Iya pagbuot. Pwede naton isentro ang aton mga handum, panghunahuna, kag mga tagipusuon sa Iya (tan-awa sa Alma 37:36). Pwede kita mangabuhi nga may kapasalamatan sa mga bugay nga Iya ginhatag sa aton—kag mangin maalwan sa pagpakigbahin sina nga mga bugay (tan-awa Mosias 2:21–24; 4:16–21). Paagi sa pangamuyo kag pagserbisyo sa iban, mapahayag naton kag mapadako ang aton paghigugma sa Iya.

Pareho sa iban nga mga kasuguan, ang sugo nga palanggaon ang Dios para man sa aton. Kon ano ang ginapalangga naton amo man ang ginapangita naton. Kon ano ang ginapangita naton amo man ang ginapensar kag ginahimo naton. Kag kon ano ang ginapensar kag ginahimo naton nagapakita kon sin-o kita—kag kon mangin sin-o kita.

Pagpalangga sa Iban

Ang pagpalangga sa iban sugpon sang aton pagpalanga sa Dios. Gintudloan kita sang Manluluwas sang madamo nga paagi para palanggaon ang iban (tan-awa halimbawa, sa Lucas 10:25–37 kag Mateo 25:31–46). Ginalab-ot naton sila kag ginapasulod sa aton mga tagipusuon kag kabuhi. Nagapalangga kita paagi sa pagserbisyo—paagi sa pagpakigbahin sang aton kaugalingon bisan sa ginagmay nga paagi. Ginapalangga naton ang iban paagi sa paggamit sang mga dulot nga ginhatag sang Dios para bugayan sila.

Ang pagpalangga sang iban may upod nga pagpasensya, kaayo, kag katampad. Upod diri ang pagpatawad sing maalwan. Nagakahulugan ini sang pagtrato sang tanan nga tawo nga may respeto.

Kon palangga naton ang isa ka tawo, kita kag ang ina nga tawo pareho nga ginabugayan. Nagadako ang aton mga tagipusuon, ang aton mga kabuhi mas may kahulugan, kag ang aton kalipay nagatubo.

Mga Bugay

Ang duha ka dako nga sugo—palanggaon ang Dios kag palanggaon ang aton isigkawato—amo ang pundasyon sang tanan nga kasuguan sang Dios (tan-awa sa Mateo 22:40). Kon una naton nga palanggaon ang Dios, kag palanggaon man ang iban, ang tanan sa aton kabuhi maplastar gid sa husto nga lugar. Maapektohan sining pagpalangga ang aton perspektibo, ang paggamit sang aton oras, ang interes nga aton ginasundan, kag ang pasunod sang aton mga prayoridad.

Pagtuon sa Balaan nga mga Kasulatan

• 2 Nefi 31:20

• Mosias 2–5

• Moroni 7:45–48; 10:32

• Mateo 22:36–40; 25:31–46

• Marcos 12:28–33

• Lucas 10:25–37

• Juan 13:34–35; 14:15, 21

• 1 Juan 4:7–8, 20–21; 5:3

• Josue 22:5

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Gugma sa Isigkatawo,” “Gugma”

• Mga Topiko sang Ebanghelyo: “Gugma sa Isigkatawo,” “Gugma”

Sundon ang Propeta

Nagatawag ang Dios sang mga propeta para mangin Iya mga representante sa duta. Paagi sa Iya mga propeta, ginapahayag Niya ang kamatuoran kag nagahatag sang giya kag mga paandam.

Gintawag sang Dios si Joseph Smith para mangin una nga propeta sa ulihing mga adlaw (tan-awa sa leksyon 1). Ang mga nagsunod kay Joseph Smith gintawag man sang Dios para pangunahan ang Iya Simbahan, pati ang propeta nga nagapanguna sini karon nga panahon. Dapat makabaton kita sang mabaskog nga pagpati sa diosnon nga pagtawag sang buhi nga propeta kag sundon ang iya mga ginatudlo.

Ang mga ginatudlo sang buhi nga mga propeta kag mga apostoles nagahatag sang angkla sa wala katapusan nga kamatuoran sa kalibutan nga nagabaylo-baylo ang mga panindugan. Kon sundon naton ang mga propeta sang Dios, ang kagamo kag pag-ilinaway sa kalibutan indi makadaog sa aton. Makakita kita sang mas dako nga kalipay sa sining kabuhi kag makabaton sang giya sa sining bahin sang aton wala katapusan nga pagpanglakaton.

Pagtuon sa Balaan nga mga Kasulatan

• Mosias 15:11–12

• 3 Nefi 12:1–2

• Doktrina kag mga Kasugtanan 1:4, 37–38; 21:1–7; 136:37–38

• Mga Binuhatan 10:34–43

• Mga Taga-Efeso 2:19–20; 4:11–14

• Amos 3:7

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Propeta,” “Babayi nga Propeta,” “Propesiya, Magpropesiya”

• Mga Topiko sang Ebanghelyo: “Mga Propeta,” “Propesiya”

Imbitasyon

Sundon mo bala ang laygay sang buhi nga propeta?

Mga Pamangkot sa Interbyu para sa Bunyag Nga Nagakabagay

Nagapati ka bala nga si [Pangulo sang Simbahan karon] propeta sang Dios? Ano ang kahulugan sini sa imo?

Tumanon ang Pulo ka Sugo

Ginpahayag sang Dios ang Pulo ka Sugo sa dumaan nga propeta nga gintawag Moises para giyahan ang Iya katawhan. Ini nga mga kasuguan magamit man sa panahon naton karon. Nagatudlo ini sa aton nga magsimba kag magpakita sang pagtahod sa Dios. Nagatudlo man ini sa aton kon paano naton kabigon ang isa kag isa.

• “Dili ka maghupot sing iban nga mga dios sa atubangan ko” (Exodo 20:3). Ang iban nga mga “dios” pwede maglakip sang madamo nga butang pareho sang mga propiyedad, gahum, ukon kabantog.

• “Dili ka maghimo nga sa imo sing larawan nga tinigban” (Exodo 20:4).

• “Dili ka maggamit sang ngalan sang Ginuo nga imo Dios sa wala sing kapuslanan” (Exodo 20:7).

• “Dumduma ang adlaw nga inugpahuway, sa pagpakabalaan sini” (Exodo 20:8).

• “Tahora ang imo amay kag ang imo iloy” (Exodo 20:12).

• “Dili ka magpatay” (Exodo 20:13).

• “Dili ka magpanglahi” (Exodo 20:14).

• “Dili ka magpangawat” (Exodo 20:15).

• “Dili ka magsaksi sing dimatuod batok sa imo isigkatawo” (Exodo 20:16).

• “Dili ka magkaibog” (Exodo 20:17).

Punto sa Pagtudlo: Wala sang Iban nga Dios sa atubangan Ko

Ang mga tawo sa madamo nga mga kultura nagahatag katahuran sa mga bagay nga nagapahanumdom sa ila sa Dios ukon mga katigulangan. Kon kaisa inang mga butang, pareho sang mga estatwa, relihiyoso nga mga simbolo, ukon magagmay nga mga monumento, mahimo man nga amo ang sentro sang ila pagsimba. Buligi ang imo ginatudloan nga itutok ang ila pagtuo kag pagsimba sa ila Amay nga Langitnon kag kay Jesucristo.

Pagtuon sa Balaan nga mga Kasulatan

• Mosias 13:11–24

• Doktrina kag mga Kasugtanan 35:24; 59:5–6

• Exodo 20:1–17

• Deuteronomio 5:6–21

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Sugo, ang Pulo ka”

• Mga Topiko sang Ebanghelyo: “Pulo ka Sugo”

Imbitasyon`

Tumanon mo bala ang Pulo ka Sugo?

lalaki nga nagakarga sang babayi

Ipangabuhi ang Layi sang Kaputli

Ang layi sang kaputli importante nga bahin sang plano sang Dios para sa aton kaluwasan kag pangkahitaasan. Ang sekswal nga relasyon sang bana kag asawa gin-ordin sang Dios para sa pagtuga sang mga anak kag sa pagpahayag sang gugma sa sulod sang pag-asawahay. Ini nga relasyon kag ang gahum sa pagtuga sang tawhanon nga kabuhi gintuyo nga mangin matahum kag sagrado.

Ang layi sang kaputli sang Dios amo ang pagdumili sang sekswal nga relasyon sa gwa sang legal nga kasal sa tunga sang isa ka lalaki kag isa ka babayi. Ini nga layi nagakahulugan man sang kompleto nga pag-unong kag katampad sa bana/asawa pagkatapos sang kasal.

Para buligan kita nga matuman ang layi sang kaputli, naglaygay ang mga propeta sa aton nga mangin matinlo sa aton panghunahuna kag mga pulong. Dapat naton likawan ang pornograpiya sa bisan ano nga sahi. Sa pagtuman sang layi sang kaputli, dapat mangin maugdang kita sa aton pamatasan kag hitsura.

Ang mga kandidato sa bunyag dapat magsunod sa layi sang kaputli.

Paghinulsol kag Kapatawaran

Sa panulok sang Dios, ang pagsupak sang layi sang kaputli seryoso katama (tan-awa sa Exodo 20:14; Mga Taga-Efeso 5:3). Ginaabuso sini ang paggamit sang sagrado nga gahum nga ginhatag Niya para magtuga sang kabuhi. Pero padayon Niya kita nga ginapalangga bisan ginsupak naton ini nga layi. Ginahagad Niya kita nga maghinulsol kag mangin matinlo paagi sa nagabayad-sala nga sakripisyo ni Jesucristo. Ang kalisod sang sala mabuslan sang matam-is nga kalinong sang kapatawaran sang Dios (tan-awa sa Doktrina kag mga Kasugtanan 58:42–43).

Mga Bugay

Ginhatag sang Dios ang layi sang kaputli para bugayan kita kag ang espiritu nga mga anak nga Iya ginapadala sa duta. Ang pagsunod sining layi importante sa personal nga kalinong kag para may pagpalangga, pagsalig, kag paghiusa sa mga relasyon sang aton pamilya.

Kon ginapangabuhi naton ang layi sang kaputli, maprotektahan kita sa espirituhanon nga halit halin sa sekswal nga relasyon sa gwa sang kasal. Malikawan man naton ang emosyunal kag pisikal nga mga problema nga kasami upod sa amo sina nga mga relasyon. Magatubo ang aton kompiyansa sa atubang sang Dios (tan-awa sa Doktrina kag mga Kasugtanan 121:45). Mas mangin bukas kita sa impluwensya sang Balaan nga Espiritu. Mas mangin handa kita sa paghimo sang sagrado nga mga kasugtanan sa templo nga nagaisa sang aton mga pamilya sa wala katapusan.

Mga Magkarelasyon nga Nagapuyoay

Ang nagapuyo nga wala sang legal nga kasal sa tunga sang lalaki kag babayi indi pwede mabunyagan tubtob nga ipangabuhi nila ang layi sang kaputli. Buot silingon wala na sila nagapuyo—bilang mag-asawa ukon same-sex nga magkapareha—ukon, sa lalaki kag babayi, buot silingon magpakasal. Sakop man sini ang paggamit sang pagtuo padulong sa paghinulsol nga ginlaragway sa Doktrina kag mga Kasugtanan 20:37. Ang kasal sa tunga sang lalaki kag babayi importante nga bahin sang plano sang Dios.

Ang imbitasyon nga ipangabuhi ang layi sang kaputli mahimo nga mangin mabudlay kaayo sa iban nga tawo nga imo ginatudloan. Mangin mainampuon kag sensitibo sa sitwasyon sang kada tawo. Sunda ang pagpabatyag sang Espiritu kon magtudlo ka. Mag-andam kag indi paghambali ang tanan nga detalye. Kon kinahanglan, magpangayo sang laygay sa imo mission president para sa partikular nga mga sitwasyon.

Pagtuon sa Balaan nga mga Kasulatan

• 3 Nefi 12:27–30

• Doktrina kag mga Kasugtanan 42:22; 59:6; 63:16

• Mateo 5:27–28

• Mga Taga-Efeso 5:3–5

Tun-i Pa Gid ang parte sa Sining Prinsipyo

• Giya sa Balaan nga mga Kasulatan, “Kaputli

• Mga Topiko sang Ebanghelyo: “Kaputli”

Mga Imbitasyon

Tinguhaan mo bala nga mangin matinlo sa imo kaisipan kag pamatasan? Ipangabuhi mo bala ang layi sang kaputli?

Mga Pamangkot sa Interbyu para sa Bunyag Nga Nagakabagay

• Ano ang imo naintiendihan parte sa layi sang kaputli, nga nagadumili sang bisan ano nga sekswal nga relasyon sa gwa sang legal nga kasal sa tunga sang isa ka lalaki kag isa ka babayi? Sugot ka bala nga tumanon ining layi antes kag pagkatapos sang imo bunyag?

• Nakapartisipar ka bala sa aborsyon? [Tanda: Ang tawo nga nagasabat sing huo sa sining pamangkot kinahanglan mainterbyu sang mission president ukon sang na-assign nga manuglaygay antes mapahanugotan ang bunyag.]

Tumanon ang Layi sang Ika-pulo [Law of Tithing]

Isa sang dako nga pribelihiyo sang pagkamiyembro sa Simbahan amo ang oportunidad nga magbayad sang ikapulo. Kon maghatag kita sang ikapulo, ginabuligan naton nga magpadayon ang buluhaton sang Dios kag mabugayan ang Iya mga anak.

Ang layi sang ikapulo nagsugod pa sang panahon sang Daan nga Katipan. Halimbawa, si propetang Abraham nagbayad sang ikapulo sang tanan niya nga propiyedad (tan-awa sa Alma 13:15; Genesis 14:18–20).

Ang tinaga nga ika-pulo literal nga nagakahulugan sang ika-napulo nga bahin. Kon maghatag kita sang ika-pulo, ginadonar naton ang ika-napulo nga bahin sang aton kita sa Simbahan (tan-awa sa Doktrina kag mga Kasugtanan 119:3–4; ang ganansya ginahangop man nga kita). Ang tanan nga ara sa aton regalo halin sa Dios. Kon magbayad kita sang ika-pulo, ginapakita naton ang aton pagpasalamat sa Iya paagi sa pagbalik sang bahin sang Iya ginhatag sa aton.

Ang pagbayad sang ika-pulo isa ka pagpahayag sang pagtuo. Isa man ini ka paagi sa pagpasidungog sa Dios. Gintudlo ni Jesus nga dapat naton “pangitaon … anay ang ginharian sang Dios” (Mateo 6:33), kag ang pagbayad sang ika-pulo isa ka paagi sa paghimo sina.

Widow’s Mite [Ang Lepta sang Balo], ni Sandra Rast

Paggamit sang Pondo sang Ika-pulo

Ang pondo sang ika-pulo sagrado. Ginahatag naton ang aton ika-pulo sa miyembro sang bishopric, ukon sa madamo nga mga lugar pwede kita magbayad online. Kon mabaton sang bishopric ang ika-pulo, ginapadala nila ini sa headquarters sang Simbahan.

Isa ka konseho nga nagalakip sang Unang Pangulohan, Korum sang Dose ka Apostoles, kag sang Presiding Bishopric nagadesisyon kon paano gamiton ang pondo sang ika-pulo sa buluhaton sang Dios (tan-awa sa Doktrina kag mga Kasugtanan 120:1). Ining paggamit nagasakop sang:

• Pagpatindog kag pagmentinar sang mga templo kag mga meetinghouse.

• Pag-translate kag pagpublikar sang balaan nga mga kasulatan.

• Pagsakdag sang mga kahiwatan kag mga pagdumalahan sa mga kongregasyon sang lokal nga mga Simbahan.

• Pagsuporta sang pang-misyonero nga buluhaton sa bilog nga kalibutan.

• Pagsuporta sang buluhaton sa family history.

• Pagpondo sang mga eskwelahan kag edukasyon.

Ang ika-pulo wala ginagamit para bayran ang lokal nga mga lider sang Simbahan. Boluntaryo sila nga nagaserbisyo nga wala sang bayad.

Mga Bugay

Kon magbayad kita sang ika-pulo, nagapromisa ang Dios sang mga bugay nga masobra pa sa aton ginahatag. Iya “pagabuksan … ang mga [bintana] sang langit, kag iula … ang pagpakamaayo, sa bagay nga wala na sing masudlan” (Malaquias 3:10; tan-awa sa mga bersikulo 7–12). Ini nga mga bugay pareho nga espiritwal kag temporal.

Pagtuon sa Balaan nga mga Kasulatan

• Doktrina kag mga Kasugtanan 119; 120

• Mateo 6:33

• Mga Hebreo 7:1–2

• Genesis 14:18–20

• Levitico 27:30–33

• Malaquias 3:7–12

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Ika-pulo, Ikapulo”

• Mga Topiko sang Ebanghelyo: “Ika-pulo”

Imbitasyon

Tumanon mo bala ang layi sang ika-pulo pagkatapos mo nga mabunyagan?

Mga Pamangkot sa Interbyu para sa Bunyag Nga Nagakabagay

Ano ang imo naintiendihan parte sa layi sang ika-pulo? Sugot ka bala nga tumanon ining layi?

Pagdonar sang Ika-pulo kag Iban pa nga mga Halad

Ipakita sa bag-o nga mga miyembro kon paano magdonar sang ika-pulo kag mga halad sa miyembro sang bishopric (gamit ang donation form) ukon online (tan-awa sa donations.ChurchofJesusChrist.org).

Ipaathag nga ang bishopric kag klerk nagahimo sing maid-id nga sumada sang mga ikapulo kag iban pa nga mga halad. Ang tanan nga pinansyal nga impormasyon istrikto nga ginatipigan nga sekreto.

Ang mga miyembro naga-attend sang tithing declaration upod sa bishop malapit sa katapusan sang kada tuig. Sa sining pribado nga miting, ila ginadeklarar ang ila katutom sa pagbayad sang ika-pulo kag mahimo nga makabaton sang report sang ila mga donasyon.

Tumanon ang Pulong sang Kaalam.

Ang Layi sang Ginuo sa Ikaayong-Lawas

Ang aton mga lawas sagrado nga mga regalo sang Dios. Kinahanglan sang tagsa sa aton ang pisikal nga lawas para mangin mas pareho sa Iya. Ang aton mga lawas importante kaayo nga ginkumparar ini sang balaan nga kasulatan sa mga templo (tan-awa sa 1 Mga Taga-Corinto 6:19–20).

Gusto sang Ginuo nga tratuhon naton ang aton mga lawas nga may respeto. Para buligan kita nga himuon ini, ginpahayag Niya ang layi sang ikaayong-lawas nga ginatawag Pulong sang Kaalam. Ini nga rebelasyon nagatudlo sa aton parte sa pagkaon sang masustansya nga pagkaon kag indi paggamit sang mga butang nga makahalit sa aton mga lawas—labi na gid ang makahulubog nga ilimnon, tabako, kag mainit nga ilimnon (buot silingon tsa kag kape).

Sa kahulugan sang Pulong sang Kaalam, ang moderno nga mga propeta nagpaandam batok sa paggamit sang mga butang nga makahalit, ilegal, ukon makaadik. Nagpaandam man ang mga propeta batok sa pag-abuso sang ginaresita nga mga bulong. (Ang imo mission president makasabat sang mga pamangkot kon bala ang iban nga mga bulong sa imo lugar indi dapat gamiton.)

Mga Bugay

Ginpahamtang sang Ginuo ang Pulong sang Kaalam para sa aton pisikal kag espiritwal nga ikaayo. Nagapromisa Sia sang dako nga mga bugay kon tumanon naton ini nga kasuguan. Dala sining mga bugay ang ikaayong-lawas, kaalam, tuman nga manggad sang ihibalo, kag proteksyon (tan-awa sa Doktrina kag mga Kasugtanan 89:18–21).

Ang pagtuman sang Pulong sang Kaalam makabulig sa aton nga mangin mas sensitibo sa pagpabatyag sang Balaan nga Espiritu. Bisan pa nga tanan kita nagaeksperiyensya sang mga hangkat sa ikaayong-lawas, ang pagtuman sining layi makabulig sa aton nga mangin mas maayo sa lawas, hunahuna, kag espiritu.

Ang mga kandidato sa bunyag dapat magsunod sa Pulong sang Kaalam.

Pagtuon sa Balaan nga mga Kasulatan

• Doktrina kag mga Kasugtanan 59:15–20; 88:124; 89

• 1 Mga Taga-Corinto 6:19–20

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Pulong sang Kaalam”

• Mga Topiko sang Ebanghelyo: “Ikaayong-Lawas,” “Pulong sang Kaalam”

• Bulig sa Kabuhi: “Addiction”

Imbitasyon

Tumanon mo bala ang Pulong sang Kaalam?

Mga Pamangkot sa Interbyu para sa Bunyag Nga Nagakabagay

Ano ang imo naintiendihan parte sa Pulong sang Kaalam? Sugot ka bala nga tumanon ang Pulong sang Kaalam antes kag pagkatapos sang imo bunyag?

Tipigan nga Balaan ang Adlaw nga Inugpahuway

Adlaw sang Pagpahuway kag Pagsimba

Ang Adlaw nga Inugpahuway isa ka balaan nga adlaw nga ginpahamtang sang Dios para sa aton kada semana para makapahuway kita sa adlaw-adlaw naton nga pagpangabudlay kag magsimba sa Iya. Isa sa Pulo ka Sugo nga ginhatag kay Moises amo ang “dumduma ang adlaw nga inugpahuway, sa pagpakabalaan sini” (Exodo 20:8; tan-awa man sa mga bersikulo 9–11).

Sa moderno nga rebelasyon, ginsulit sang Ginuo nga ang Adlaw nga Inugpahuway “isa ka adlaw nga ginhatag sa inyo sa pagpahuway sa inyo mga pagpangabudlay, kag sa paghatag sang inyo mga pagdayaw sa Labing Mataas” (Doktrina kag mga Kasugtanan 59:10). Nagsiling man Sia nga ang Adlaw nga Inugpahuway dapat adlaw sang pagkasadya, pangamuyo, kag pagpasalamat (tan-awa sa mga bersikulo 14–15).

Bilang bahin sang aton pagsimba sa Adlaw nga Inugpahuway, nagakadto kita sa sakramento nga miting kada semana. Sa sini nga miting, ginasimba naton ang Dios kag nagaambit sang sakramento para dumdumon si Jesucristo kag ang Iya Pagbayad-Sala. Kon mag-ambit kita sang sakramento, ginabag-o naton ang aton mga kasugtanan upod sa Dios kag ginapakita nga handa kita nga maghinulsol sang aton mga sala. Ang ordinansa sang sakramento amo ang sentro sang aton pagselebrar sang Adlaw nga Inugpahuway.

Sa Simbahan nagapartisipar man kita sa mga klase kon diin nagatuon pa gid kita parte sa ebanghelyo ni Jesucristo. Ang aton pagtuo nagatubo samtang nagatuon kita sang balaan nga mga kasulatan sing ululupod. Ang aton pagpalangga nagatubo samtang ginaserbisyohan kag ginapabakod naton ang kada isa.

Dugang pa sa pagpahuway sa aton mga pagpangabudlay sa Adlaw nga Inugpahuway, dapat naton likawan ang pagpamalaklon kag iban pa nga aktibidades nga nagahimo sini nga daw ordinaryo lang nga adlaw. Ginapahigad naton ang aktibidades sang kalibutan kag ginatutok ang aton panghunahuna kag mga aksyon sa espirituhanon nga mga butang.

Adlaw sa Paghimo sang Maayo

Ang paghimo sang maayo sa Adlaw nga Inugpahuway pareho kaimportante sa mga ginalikawan naton himuon para tipigan ini nga balaan. Nagatuon kita sang ebanghelyo, nagapabakod sang pagtuo, nagatukod sang mga kaangtanan, nagaserbisyo, kag nagapartisipar sa iban pa nga makainspirar nga aktibidades upod sa pamilya kag mga abyan.

mag-asawa nga nagabasa sang balaan nga mga kasulatan

Mga Bugay

Ang pagtipig sang Adlaw nga Inugpahuway nga balaan isa ka ekspresyon sang aton debosyon sa Amay nga Langitnon kag kay Jesucristo. Kon himuon naton ang aktibidades sa Adlaw nga Inugpahuway nga bagay sa tuyo sang Dios sina nga adlaw, makabatyag kita sang kalipay kag kalinong. Makakaon kita sa espirituhanon kag magapagsik sa pisikal. Makabatyag man kita nga mas malapit sa Dios kag mas mangin suod sa aton Manluluwas. Mas lubos naton nga mapabilin ang aton kaugalingon nga “wala’y mantsa sa kalibutan” (Doktrina kag mga Kasugtanan 59:9). Ang Adlaw nga Inugpahuway mangin “[makalilipay]” (Isaias 58:13; tan-awa man sa bersikulo 14).

Pagtuon sa Balaan nga mga Kasulatan

• 3 Nefi 18:1–12

• Doktrina kag mga Kasugtanan 59:9–19

• Moises 3:1–3

• Mateo 12:10–13

• Exodo 20:8–11; 31:12–13, 16–17

• Isaias 58:13–14

Tun-i Pa Gid ang parte sa Sining Prinsipyo

• Mga Topiko sang Ebanghelyo: “Adlaw nga Inugpahuway”

• Giya sa Balaan nga mga Kasulatan: “Adlaw nga Inugpahuway”

Mga Imbitasyon

• Tipigan mo bala nga balaan ang Adlaw nga Inugpahuway kag magsimba kada semana?

• Tinguhaan mo bala nga mag-ambit sang sakramento nga may pagtuo pagkatapos mo nga mabunyagan?

• Magaupod ka bala sa amon para makigkita kay bishop (ukon branch president) sa amon lokal nga kongregasyon?

Mga Pamangkot sa Interbyu para sa Bunyag Nga Nagakabagay

Ano ang naintiendihan mo parte sa pagtipig sang Adlaw nga Inugpahuway nga balaan, upod na ang pag-ambit sang sakramento kada semana kag pagserbisyo sa iban? Sugot ka bala nga tumanon ining mga layi antes kag pagkatapos sang imo bunyag?

Pagtrabaho sa Adlaw nga Inugpahuway

Ang mga miyembro sang Simbahan kon kaisa kinahanglan gid nga mag-obra kon Adlaw nga Inugpahuway kay ginapangayo sang ila mga amo ukon para mahatag ang ila mga kinahanglanon ukon mga kinahanglanon sang komunidad. Sa sini nga mga sitwasyon, ginamentinar sang mga miyembro ang espiritu sang Adlaw nga Inugpahuway kon mahimo. Pwede mag-istorya ang mga miyembro sa ila mga lider parte sa ila sitwasyon.

Tumanon kag Tahuron ang Layi

Ang mga Santos sa Ulihing mga Adlaw nagapati sa pagsunod sa layi kag sa pagmangin maayo nga mga pumuluyo (tan-awa sa Doktrina kag mga Kasugtanan 134; Mga Artikulo sang Pagtuo 1:12). Ang mga miyembro sang Simbahan ginapaisog nga maghatag sang serbisyo para mag-uswag ang ila mga komunidad kag mga nasyon. Ginapaisog man sila nga mangin impluwensya sang maayo nga moral nga mga panindugan sa sosyedad kag sa gobyerno.

Ginahagad ang mga miyembro sang Simbahan nga magpartisipar sa panggobyerno kag sa politikal nga proseso suno sa layi. Ang mga miyembro nga nagakapot sang mga posisyon sa gobyerno nagaakto sa sina nga mga tulumanon bilang nagaulikid nga mga pumuluyo, indi bilang mga representante sang Simbahan.

Pagtuon sa Balaan nga mga Kasulatan

• Doktrina kag mga Kasugtanan 58:21; 134

• Mga Artikulo sang Pagtuo 1:12

Tun-i Pa Gid ang parte sa Sining Prinsipyo

• “Political and Civic Activity” sa seksyon 38.8 sang Libro sang Pangkabilogan nga Pagsulundan

• Mga Topiko sang Ebanghelyo: “Citizenship [Pagka-pumuluyo]”

Imbitasyon

Tumanon mo bala ang mga layi sang pungsod nga imo ginapuy-an?

Mga Pamangkot sa Interbyu para sa Bunyag Nga Nagakabagay

Nakahimo ka bala sang isa ka seryoso nga krimen? Kon amo, ikaw bala karon ara sa pagdumala sang awtoridad sang husgado bilang on probation ukon parolado (ginpagwa sa prisohan antes matapos ang sentensya bangud sang maayo nga pamatasan)? [Tanda: Ang tawo nga nagasabat sing huo sa sining pamangkot kinahanglan mainterbyu sang mission president ukon sang na-assign nga manuglaygay antes mapahanugotan ang bunyag.]

Greatest in the Kingdom [Labing Dako sa Ginharian], ni J. Kirk Richards

Ang Aton Kasugtanan nga Magserbisyo sa Dios kag sa Iban

Pag-alagad

Kon kita bunyagan, nagapakigsugot kita nga mag-alagad sa Dios kag mag-alagad sa iban. Ang pag-alagad sa iban isa sa mayor nga pamaagi nga nagaalagad kita sa Dios (tan-awa sa Mosias 2:17). Si propetang Alma nagtudlo sa mga naghandum nga magpabunyag nga dapat “sugot [sila] nga magpas-an sang palas-anon sang isa kag isa, … magpangasubo upod sadtong mga nagapangasubo … , kag magpaumpaw sadtong mga nagakinahanglan sang kaumpawan” (Mosias 18:8–9).

Indi madugay pagkatapos sang bunyag, ang bag-o nga mga miyembro makabaton sang calling nga magserbisyo sa Simbahan. Ini nga mga calling boluntaryo kag wala bayad. Kon batunon naton ini kag magserbisyo sing matutom, nagatubo kita sa pagtuo, nagauswag ang mga talento, kag nagabugay sa iban.

Isa ka parte sang aton serbisyo sa Simbahan amo ang mangin “ministering brother” ukon “ministering sister.” Sa sini nga buluhaton, nagaserbisyo kita sa na-assign nga mga indibidwal kag mga pamilya.

Bilang mga disipulo ni Jesucristo, nagapangita kita sang mga oportunidad nga magserbisyo kada adlaw. Pareho sa Iya, nagalakat kita nga “nagahimo sang kaayuhan” (Mga Binuhatan 10:38). Nagaserbisyo kita sa aton isigkatawo kag sa iban sa aton komunidad. Pwede kita magpartisipar sa mga oportunidad sa pagserbisyo paagi sa JustServe kon may ari sini. Pwede naton suportahan ang mga pagpaninguha sang Simbahan sa tawhanon nga bulig kag magpartisipar sa disaster response.

Pagtuon sa Balaan nga mga Kasulatan

• Mosias 2:17; 4:15–16, 26; 18:8–10; 23:18

• Doktrina kag mga Kasugtanan 42:38

• Mateo 25:31–46

• Lucas 10:25–37

• Santiago 1:27; 2:17

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Pag-alagad

• Mga Topiko sang Ebanghelyo: “Pag-alagad]”

Imbitasyon

Batunon mo bala ang isa ka calling ukon asaynment kon ihatag sa imo (upod ang assignment bilang ministering brother ukon ministering sister)?

mga tawo nga nagahinambalanay

Pagpaambit sang Ebanghelyo

Bilang bahin sang aton kasugtanan sa bunyag, nagapromisa kita nga “magtindog bilang mga saksi sang Dios” (Mosias 18:9). Isa ka paagi nga nagatindog kita bilang mga saksi amo ang pagpaambit sang ebanghelyo ni Jesucristo. Ang pagbulig sa iban nga mabaton ang ebanghelyo isa sa pinakamalipayon nga klase sang pagserbisyo nga pwede naton ihatag (tan-awa sa Doktrina kag mga Kasugtanan 18:15–16). Isa ini ka mabaskog nga pagpahayag sang aton gugma.

Kon maeksperiyensyahan naton ang mga bugay sang pagpangabuhi sang ebanghelyo, natural nga gusto man naton ipakigbahin ina nga mga bugay. Ang mga miyembro sang pamilya, mga abyan, kag mga kakilala masami mangin interesado kon magpakita kita sang matinuohon nga ehemplo kag makita nila kon paano ginabugayan sang ebanghelyo ang aton mga kabuhi. Pwede naton ipaambit ang ebanghelyo sa normal kag natural nga mga paagi (tan-awa sa Libro sang Pangkabilogan nga Pagsulundan, kapitulo 23).

Ginaimbitar naton ang iban nga magpartisipar upod sa aton sa mga aktibidades sa pagserbisyo, sa komunidad, sa paglingaw-lingaw, kag sa Simbahan. Pwede naton sila hagaron sa miting sang Simbahan ukon sa bunyag. Pwede naton sila hagaron nga magtan-aw sang online video nga nagapaathag sang ebanghelyo ni Jesucristo, magbasa sang Libro ni Mormon, ukon magkadto sa open house sang templo. May ginatos ka imbitasyon nga pwede naton itanyag. Masami, ang pag-imbitar nagakahulugan lang gid sang pag-upod sang aton pamilya, mga abyan, kag mga kasilingan sa kon ano ang ginahimo na naton nga daan.

Kon pangayuon naton, buligan kita sang Dios nga makita ang mga oportunidad sa pagpaambit sang ebanghelyo kag sugiran ang iban kon paano sini ginabugayan ang aton mga kabuhi.

Para sa dugang nga impormasyon parte sa pagpangabuhi sang mga prinsipyo sang pagpalangga, pagpaambit, kag pag-imbitar, tan-awa sa “Mag-isa sa mga Miyembro” sa kapitulo 9.

Pagtuon sa Balaan nga mga Kasulatan

• Doktrina kag mga Kasugtanan 88:81

• Mateo 28:19–20

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Pang-misyonaryo nga Buluhaton”

• Mga Topiko sang Ebanghelyo: “Pang-misyonaryo nga Buluhaton”

Mga Imbitasyon

• Mangamuyo ka bala para sa mga misyonero kag para sa mga kahigayunan sa pagpaambit sang ebanghelyo?

• Tinguhaan mo bala nga ipangabuhi ang mga prinsipyo sang pagpalangga, pagpaambit, kag pag-imbitar sang imo mga abyan, mga paryente, kag iban pa?

Pagpuasa kag mga Halad-Puasa

Ginpahamtang sang Dios ang layi sang pagpuasa bilang paagi nga magpatubo kita sang espirituhanon nga kusog kag para buligan ang mga nagakinahanglan.

Ang pagpuasa nagakahulugan sang pagpalipas nga wala sang pagkaon kag ilimnon sa natalana nga tion. Kasami ginapain sang Simbahan ang una nga Domingo sang tagsa ka bulan bilang adlaw sang pagpuasa. Ang pagpuasa masami nagakahulugan sang pagpalipas nga wala sang pagkaon kag ilimnon sa sulod sang 24-oras kon masarangan naton sa pisikal. Ang iban nga importante nga bahin sang Domingo sang pagpuasa amo ang pagpangamuyo kag pagpahayag sang testimonya. Ginapaisog man kita nga magpuasa sa iban nga tion kon kinahanglan naton.

Pagpatubo sang Espirituhanon nga Kabakod

Ang pagpuasa makabulig sa aton nga mangin mapainubuson, mas maglapit sa Dios, kag makabatyag nga ginbag-o sa espirituhanon. Antes sang Iya pag-alagad, nagpuasa si Jesucristo (tan-awa sa Mateo 4:1–2). Nasulat sa balaan nga mga kasulatan ang madamo nga panaysayon sang mga propeta kag iban pa nga nagpuasa para mahimo nga magdugang ang ila espiritwal nga kusog kag sa pagpangayo sang espesyal nga mga bugay para sa ila kaugalingon ukon sa iban.

Ang pagpuasa kag pagpangamuyo upod gid. Kon magpuasa kag magpangamuyo kita nga may pagtuo, mas mangin handa kita sa pagbaton sang personal nga rebelasyon. Mas mangin sensitibo man kita sa pagkilala sang kamatuoran kag pag-intiendi sang pagbuot sang Dios.

Pagbulig sang mga Nagakinahanglan

Kon nagapuasa kita, nagadonar kita sang kuwarta sa Simbahan para makabulig sa pag-atipan sang mga nagakinahanglan. Ang tawag sini halad-puasa (fast offering). Ginaagda kita nga maghatag sang halad nga katumbas sa bili sang pagkaon nga wala naton ginkaon. Ginapaisog man kita nga mangin maalwan kag maghatag sang mas dako sangsa bili sining pagkaon kon masarangan naton. Ang paghatag sang halad puasa isa ka paagi nga nagaalagad kita sa iban.

Ang mga halad-puassa ginagamit para maghatag sang pagkaon kag iban pa nga kinahanglanon sa mga nagakinahanglan, sa diri kag sa bug-os nga kalibutan. Para sa impormasyon kon paano mag-amot sang mga halad-puasa, tan-awa sa “Pagdonar sang Ikapulo kag Iban pa nga mga Halad” sa sining leksyon.

Pagtuon sa Balaan nga mga Kasulatan

Pagpuasa

• Alma 5:45–46; 6:6; 17:2–3

• Moroni 6:5

• Doktrina kag mga Kasugtanan 59:12–16; 88:76

• Isaias 58:6–11

Pag-atipan Sinang mga Nagakinahanglan

• Mosias 4:16–27

• Alma 4:12–13

• Mateo 25:31–46

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Puasa, Pagpuasa”

• Libro sang Pangkabilogan nga Pagsulundan: 22.2.2

• Mga Topiko sang Ebanghelyo: “Pagpuasa kag mga Halad-Puasa”

Mga Imbitasyon

• Mapuasa ka bala kag magpangamuyo sa madason nga Domingo sang puasa para sa partikular nga panginahanglan?

• Magadonar ka bala sang halad-puasa (pagkatapos mo mabunyagan)?

pamilya sa gwa sang templo

Ang Aton Kasugtanan nga Magpadayon tubtob sa Katapusan

Sa aton bunyag, nagapakigsugot kita sa Dios nga “magpadayon tubtob sa katapusan” sa pagpangabuhi sang ebanghelyo ni Jesucristo (2 Nefi 31:20; tan-awa sa Mosias 18:13). Ginatinguhaan naton nga mangin bug-os-kabuhi nga mga disipulo ni Jesucristo.

Ang propeta sa Libro ni Mormon nga si Nefi naglaragway sang bunyag bilang pwertahan kon diin nagasulod kita sa banas sang ebanghelyo (tan-awa sa 2 Nefi 31:17). Pagkatapos sang bunyag, nagapadayon kita sa “pagdutdot pasulong upod ang isa ka kalig-on kay Cristo” (2 Nefi 31:20).

Samtang “nagadutdot kita pasulong” sa dalan sang pagkadisipulo, nagahanda kita nga magkadto sa templo. Didto magahimo kita sang mga kasugtanan upod sa Dios sa pagbaton naton sang mga ordinansa sang templo. Sa templo, hatagan kita sang gahum kag pwede maselyohan bilang mga pamilya sa wala katapusan. Ang pagtuman sang mga kasugtanan nga himuon naton sa templo magabukas sang pwertahan sa tagsa ka espiritwal nga pribelihiyo kag bugay nga gintigana sang Dios sa aton.

Kon matutom kita nga magapadayon sa banas sang ebanghelyo, sa ulihi mabaton gid naton ang pinakadako sa mga regalo sang Dios—ang regalo sang wala katapusan nga kabuhi (tan-awa sa 2 Nefi 31:20; Doktrina kag mga Kasugtanan 14:7).

Ang masunod nga mga seksyon nagapaathag sang pila ka aspeto sang ginahatag sang Dios sa aton para buligan kita nga magpadayon tubtob sa katapusan sa aton mortal nga pagpanglakaton—kag pagpangita sang kalipay diri.

Ang Priesthood kag mga Organisasyon sang Simbahan

Ang priesthood amo ang awtoridad kag gahum sang Dios. Paagi sa priesthood, ginatuman sang Amay nga Langitnon ang Iya buluhaton nga “ipahanabo ang pagkawala’y kamatayon kag kabuhi nga wala’y katapusan sang tawo” (Moises 1:39). Nagahatag ang Dios sang awtoridad kag gahum sa Iya mga anak nga lalaki kag babayi sa duta para magbulig sa sining buluhaton.

Ginabugayan kita tanan sang priesthood. Ang mga ordinansa pareho sang bunyag kag sakramento mabaton naton paagi sa mga nagakapot sang mga palangakuan sang priesthood. Makabaton man kita sang mga bugay sang pag-ayo, kaumpawan, kag laygay.

Ang Priesthood kag Pagkalider kag mga Calling sa Simbahan

Ang Simbahan ginapangunahan ni Jesucristo paagi sa mga propeta kag apostoles. Ini nga mga lider gintawag sang Dios, gin-ordin, kag ginhatagan sang awtoridad sang priesthood para mag-akto sa ngalan sang Manluluwas.

Sang una, ginhatagan ni Cristo ang Iya Apostoles sining amo man nga awtoridad sang priesthood, nga nagtugot sa ila sa pagpanguna sa Iya Simbahan pagkatapos Niya nga magkayab sa langit. Sang ulihi ina nga awtoridad nadula sang ginsikway sang mga tawo ang ebanghelyo kag napatay ang mga Apostoles.

Ginpanumbalik sang langitnon nga mga mensahero ang priesthood sang 1829 paagi kay Propetang Joseph Smith, kag gintukod liwat sang Ginuo ang Iya Simbahan nga may mga apostoles kag mga propeta. (Tan-awa sa leksyon 1.)

Sa lokal nga lebel, ang mga bishop kag stake president may awtoridad sang priesthood nga pangunahan ang mga kongregasyon sang Simbahan.

Kon ginatawag ang mga lalaki kag babayi kag gina-set apart para magserbisyo sa Simbahan, ginahatagan sila sang awtoridad halin sa Dios para mag-akto sa sina nga calling. Ini nga awtoridad ginahatag sa mga misyonero, mga lider, mga titser, kag iban pa hasta nga ma-release sila sa ila mga calling. Ginatugyan ini sa direksyon sang mga nagakapot sang mga yabi sang priesthood.

Ang awtoridad sang priesthood magamit gid lang sa pagkamatarong (tan-awa sa Doktrina kag mga Kasugtanan 121:34–46). Ining awtoridad sagrado nga pagsalig para irepresentar ang Manluluwas kag mag-akto sa Iya ngalan. Ang intensyon sini pirme amo ang bugayan kag alagaran ang iban.

mga solterito sa sunday school

Aaronic Priesthood kag Melchizedek Priesthood

Sa Simbahan, ang priesthood nagalakip sang Aaronic Priesthood kag Melchizedek Priesthood. Sa direksyon sadtong mga nagakapot sang mga yabi sang priesthood, ang Aaronic kag Melchizedek Priesthood ginahatag sa nagakaangay nga lalaki nga mga miyembro sang Simbahan. Pagkatapos nga mahatag ang nagakabagay nga priesthood, ang tawo ginaordin sa palangakuan sina nga priesthood, pareho sang deacon ukon elder. Kinahanglan sia nga maordin sang tawo nga may nagakaigo nga awtoridad.

Kon ang lalaki ukon pamatan-on nagabaton sang priesthood, nagapakigsugot sia sa Dios nga tumanon ang sagrado nga mga katungdanan, magserbisyo sa iban, kag magbulig sa pagtukod sang Simbahan.

Ang mga pamatan-on pwede magbaton sang Aaronic Priesthood kag maordin nga mga deacon sugod Enero sang tuig nga mag-12 anyos sila. Pwede sila maordin nga mga teacher sa tuig nga mag-14 anyos sila kag mga priest sa tuig nga mag-16 anyos sila. Ang hinaylo nga mga lalaki nga ara sa husto nga edad pwede magbaton sang Aaronic Priesthood pagkatapos gid sang bunyag kag kompirmasyon. Ang mga nagakapot sang Aaronic Priesthood ang nagahikot sang mga ordinansa pareho sang sakramento kag bunyag.

Pagkatapos nga mag-alagad bilang priest sa Aaronic Priesthood, ang nagakaangay nga lalaki nga indi magnubo sa 18 antos pwede magbaton sang Melchizedek Priesthood kag maordin bilang elder. Ang mga lalaki nga nagabaton sang Melchizedek Priesthood pwede maghikot sang mga ordinansa sang priesthood pareho sang paghatag sang bendisyon sang pag-ayo kag pagpaumpaw sa mga miyembro sang pamilya kag iban pa.

Tan-awa sa Libro sang Pangkabilogan nga Pagsulundan, 38.2.9.1, para sa impormasyon parte sa bag-o nga mga miyembro nga nagabaton sang priesthood.

Mga Korum kag mga Organisasyon sang Simbahan

Mga Korum sang Priesthood. Ang korum isa ka organisado nga grupo sang mga nagakapot sang priesthood. Ang kada ward may elders quorum para sa hamtong nga mga lalaki. Ang korum sang mga deacon, teacher, kag priest para sa mga solterito.

Relief Society. Ang Relief Society para sa mga babayi nga nagaedad 18 pataas. Ang mga miyembro sang Relief Society nagapabakod sang mga pamilya, mga indibidwal, kag sang komunidad.

Young Women. Ang mga dalagita nagaentra sa organisasyon sang Young Women pagsugod sang Enero sa tuig nga mag-12 anyos sila.

babayi nga nagatudlo sang klase

Primary. Ang mga kabataan nga nagaedad 3 tubtob 11 kabahin sang organisasyon sang Primary.

Sunday School. Ang tanan nga hamtong kag mga lamharon nagasulod sa Sunday School, kon diin nagatipon sila para magtuon sang balaan nga mga kasulatan sing ululupod.

Para sa dugang nga impormasyon parte sa priesthood, tan-awa sa Libro sang Pangkabilogan nga Pagsulundan, kapitulo 3.

Para sa dugang nga impormasyon parte sa mga korum sang priesthood kag mga organisasyon sang Simbahan, tan-awa sa Libro sang Pangkabilogan nga Pagsulundan, mga kapitulo 8–13.

Pagtuon sa Balaan nga mga Kasulatan

• Mosias 18:17

• Alma 13:1–19

• Doktrina kag mga Kasugtanan 20:38–65; 84:19–20; 107; 121:34–46

• Mga Artikulo sang Pagtuo 1:5

• Lucas 9:1–6

• Juan 15:16

• Santiago 5:14–15

Tun-i Pa Gid ang parte sa Sining Prinsipyo

• Libro sang Pangkabilogan nga Pagsulundan, kapitulo 3: “Mga Prinsipyo sang Priesthood”

• Mga Topiko sang Ebanghelyo: “Pagkapari ni Aaron,” “Pagkapari ni Melquisedec,” “Pagkapari”

Mga Imbitasyon

• Magahanda ka bala sa pagbaton sang Aaronic Priesthood? (Para sa mga lalaki nga nagaedad 11 pataas)

• Magahanda ka bala sa pagbaton sang Melchizedek Priesthood? (Para sa hamtong nga mga lalaki)

• Aktibo ka bala nga magapartisipar sa nagakabagay nga organisasyon sang Simbahan?

Pag-asawahay kag mga Pamilya

Pag-asawahay

Ang pag-asawahay sa tunga sang lalaki kag babayi gin-ordin sang Dios. Sentro ini sa Iya plano para sa wala katapusan nga pag-uswag sang Iya mga anak.

Ang pag-isa sang bana kag asawa sa kasal amo dapat ang ginahalungan gid nila nga dutan-on nga relasyon. May sagrado sila nga responsibilidad nga mangin tampad sa kada isa kag mangin matutom sa ila mga kasugtanan sa pag-asawahay.

Ang bana kag asawa patas sa panulukan sang Dios. Ang isa indi dapat magdominar sa isa. Ang ila mga desisyon dapat ginahimo nga may pag-isa kag pagpalanggaanay, nga may partisipasyon nila nga duha.

Kon ang bana kag asawa nagapalanggaanay kag nagabuligay, ang ila pag-asawahay mangin ginhalinan sang ila pinakadako nga kalipay. Mabuligan nila ang kada isa kag ang ila kabataan nga magprogreso padulong sa kabuhi nga wala katapusan.

Ang Pamilya

Pareho sang pag-asawahay, ang pamilya gin-ordin sang Dios kag sentro sa Iya plano para sa aton wala katapusan nga kalipayan. Laban-laban nga mangin malipayon ang aton pamilya kon ginapangabuhi naton ang mga pinanudlo ni Jesucristo. Ginatudlo sang mga ginikanan sa ila kabataan ang ebanghelyo ni Jesucristo kag nagapahamtang sang ehemplo paagi sa pagpangabuhi sini. Ang mga pamilya nagahatag sang mga oportunidad para palanggaon naton kag serbisyohan ang tagsa tagsa.

Dapat himuon sang mga ginikanan ang ila pamilya nga pinakamataas nga prayoridad. Sagrado nga pribelihiyo kag responsibilidad sang mga ginikanan nga atipanon ang mga kabataan nga ila ginbata ukon gin-adoptar.

Tanan nga pamilya may mga kabudlayan. Kon ginapangayo naton ang suporta sang Dios kag ginatuman ang Iya mga kasuguan, ang mga kabudlayan sa pamilya makabulig sa aton nga magtuon kag magtubo. Kon kaisa ining mga kabudlayan nagabulig sa aton nga makatuon sa paghinulsol kag pagpatawad.

tatay nga nagatudlo sang pamilya

Ginapaisog sang mga lider sang Simbahan ang mga miyembro nga maghiwat sang home evening kada semana. Ginagamit sang mga ginikanan ining tion sa pagtudlo sang ila kabataan sang ebanghelyo, pagpabakod sang mga relasyon sa pamilya, kag magsadya-sadya. Nag-isyu ang mga lider sang Simbahan sang proklamasyon nga nagatudlo sang importante nga mga kamatuoran parte sa pamilya (tan-awa sa “Ang Panimalay: Isa ka Proklamasyon sa Kalibutan,” ChurchofJesusChrist.org).

Ang iban pa nga paagi sa pagpabakod sang pamilya amo ang pangamuyo sa pamilya, pagtuon sang balaan nga kasulatan, kag ululupod nga pagsimba. Pwede man kita mag-research sa family history, magtipon sang mga istorya sang pamilya, kag magserbisyo sa iban.

Kadamo sang mga tawo nga limitado lang ang mga oportunidad sa pag-asawahay ukon sa mapinalanggaon nga mga relasyon sa pamilya. Kadamo sang nakaeksperiyensya sang diborsyo kag iban pa nga mabudlay nga mga sirkumstansya sa pamilya. Pero, ang ebanghelyo nagabugay sa aton sing personal wala sapayan sang aton sirkumstansya sa pamilya. Kag kon may pagtuo kita, mahatag ang Dios sang paagi para mabaton naton ang mga bugay sang mapinalanggaon nga pamilya, sa sini nga kabuhi ukon sa pihak nga kabuhi.

Pagtuon sa Balaan nga mga Kasulatan

Pag-asawahay

• Doktrina kag mga Kasugtanan 42:22; 49:15

• Mga Taga-Efeso 5:25

• Genesis 2:18, 24

Pamilya

• Mosias 4:14–15

• Alma 56:47; 57:21

• 3 Nefi 18:21

• Doktrina kag mga Kasugtanan 68:25–28

• Mga Taga-Efeso 6:4

• Mga Hulubaton 22:6

• “Ang Panimalay: Isa ka Proklamasyon sa Kalibutan”

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Pamilya,” “Pag-asawahay, Magpakasal”

• Libro sang Pangkabilogan nga Pagsulundan, kapitulo 2: “Pagsuporta sang mga Indibidwal kag mga Pamilya sa Buluhaton sang Kaluwasan kag Pangkahitaasan”

• Mga Topiko sang Ebanghelyo: “Pag-asawahay,” “Pamilya,” “Pagkaginikanan”

Mga Imbitasyon

Ibagay ang masunod nga mga imbitasyon sa sitwasyon sang tawo.

• Magahiwat bala kamo sang home evening kada semana, adlaw-adlaw nga pagpangamuyo sa pamilya, kag adlaw-adlaw nga pagtuon sang balaan nga mga kasulatan sa pamilya?

• Masimba bala kamo sa Adlaw nga Inugpahuway bilang pamilya?

Buluhaton sa Templo kag Family History para sa Patay na nga Katigulangan

Palangga sang Amay nga Langitnon ang tanan Niya nga anak kag nagahandum sang ila kaluwasan kag pagkahitaas. Pero binilyon ka tawo ang napatay nga wala makabati sang ebanghelyo ni Jesucristo ukon makabaton sang nagaluwas nga mga ordinansa sang ebanghelyo. Ini ang mga ordinansa sang bunyag, kompirmasyon, ordinasyon sa priesthood sa mga lalaki, endowment sa templo, kag wala katapusan nga pag-asawahay.

Paagi sa Iya grasya kag kaluoy, naghatag ang Ginuo sang isa pa ka paagi para mabaton sining mga tawo ang ebanghelyo kag ang mga ordinansa sini. Sa kalibutan sang mga espiritu, ginawali ang ebanghelyo sa mga napatay nga wala makabaton sini (tan-awa sa Doktrina kag mga Kasugtanan 138). Sa mga templo, ginahikot naton ang mga ordinansa para sa patay na naton nga mga katigulangan kag iban pa. Ining patay na nga mga tawo nga ara sa kalibutan sang espiritu pwede nga magbaton ukon magsikway sang ebanghelyo kag sang mga ordinansa nga ginhikot para sa ila.

pamilya nga nagatuon sang balaan nga mga kasulatan

Antes naton himuon ining mga ordinansa, kinahanglan naton hibaluon ang aton mga himata nga wala pa nakabaton sini. Ang pagkilala sang mga miyembro sang aton pamilya para mabaton nila ang mga ordinansa amo ang sentro nga katuyuan sang aton buluhaton sa family history. Kon makakita kita sang impormasyon parte sa ila, ginadugang naton ini sa database sang Simbahan sa FamilySearch.org. Dayon mahikot naton (ukon sang iban) ang proxy nga mga ordinansa para sa ila sa templo.

Kon ginakilala naton ang aton mga katigulangan kag ginahikot ang mga ordinansa para sa ila, ang aton mga pamilya pwede nga mangin isa sa wala katapusan.

Buluhaton sa Family History kag Pagkadto sa Templo

Ipakilala ang bag-o nga mga miyembro kag ang inyo mga ginatudloan sa ward temple and family history leader (ukon sa isa pa ka miyembro nga pamilyar sa buluhaton sa templo kag family history). Ini nga lider makabulig sa mga tawo nga mapangita ang napatay nila nga mga paryente nga nagakinahanglan sang mga ordinansa sa templo. Gamita ang semanal nga coordination meeting para magplano kon paano buligan ang bag-o nga mga miyembro nga magsugod sa paghimo sang family history.

Ang bag-o nga mga miyembro kag ang iban pa nga miyembro mahimo nga magbaton sang temple recommend halin sa ila bishop para maghimo sang proxy nga mga bunyag kag kompirmasyon para sa napatay nila nga mga katigulangan kag sa iban. Pwede na makabaton sining recommend ang kaangay-angay nga miyembro pagsugod sang Enero sa tuig nga mag-12 anyos na sia. Ang mga lalaki kinahanglan man nga may Aaronic Priesthood para makwalipikar. Paisoga ang bag-o nga mga miyembro nga magkuha sang recommend sing mas temprano kon mahimo.

Kon may malapit nga templo, mag-upod sa bag-o nga mga miyembro kon mahimo. Magpartisipar sa mga ordinansa sang templo upod sa ila.

Pagtuon sa Balaan nga mga Kasulatan

• Doktrina kag mga Kasugtanan 128; 138

• 1 Mga Taga-Corinto 15:29

• 1 Pedro 3:18–21; 4:6

Tun-i Pa Gid ang parte sa Sining Prinsipyo

• Libro sang Pangkabilogan nga Pagsulundan, kapitulo 28: “Mga Ordinansa sa Templo para sa mga Patay”

• Mga Topiko sang Ebanghelyo: “Mga Bunyag para sa Patay,” “Family History”

Mga Imbitasyon

• Magahanda ka bala sa pagbaton sang mga ordinansa sa templo para sa napatay na nga mga himata?

• Magapartisipar ka bala sa buluhaton sa family history kag magpadala sang mga ngalan sang patay na nga mga katigulangan para magbaton sang mga ordinansa sa templo?

Mga Templo, ang Endowment, Wala Katapusan nga Pag-asawahay, kag Wala Katapusan nga mga Pamilya

Mga Templo

Ang templo amo ang balay sang Ginuo. Balaan ini nga lugar kon diin makahimo kita sang mga kasugtanan upod sa Dios sa pagbaton naton sang sagrado Niya nga mga ordinansa. Kon tumanon naton ining mga kasugtanan, mangin maathag ang gahum sang pagkadiosnon sa aton mga kabuhi (tan-awa sa Doktrina kag mga Kasugtanan 84:19–22; 109:22–23).

Ang Endowment

Isa sa mga ordinansa nga mabaton naton sa templo amo ang ginatawag nga endowment. Ang tinaga nga endowment nagakahulugan sang “regalo.” Ining regalo sang ihibalo kag gahum nagahalin sa Dios. Sa aton endowment, nagahimo kita sang mga kasugtanan upod sa Dios nga nagabugkos sa aton sa Iya kag sa Iya Anak nga si Jesucristo (tan-awa sa kapitulo 1).

Ang mga hamtong pwede nga makabaton sang ila kaugalingon nga endowment sa templo paglampas isa ka tuig sang pagkamiyembro sa Simbahan. Para sa dugang nga impormasyon parte sa endowment, tan-awa sa Libro sang Pangkabilogan nga Pagsulundan, 27.2.

Wala Katapusan nga Pag-asawahay kag Wala Katapusan nga mga Pamilya

Ang plano sang kalipayan sang Dios nagatugot sa mga relasyon sa pamilya nga magpadayon pagkatapos sang kamatayon. Sa templo pwede kita makasal para sa diri nga kinabuhi kag sa wala katubtuban. Ginapatigayon sini nga mag-ululupod ang mga pamilya tubtob sa katubtuban.

Pagkatapos nga mabaton sang kasado na nga mga mag-asawa ang ila endowment sa templo, pwede sila maselyohan ukon kaslon para sa wala katubtuban. Ang ila kabataan pwede maselyohan sa ila.

Ang bana kag asawa nga naselyohan sa templo kinahanglan nga magtuman sang mga kasugtanan nga ila ginhimo para mabaton ang mga bugay sang wala katapusan nga pag-asawahay.

mag-asawa nga nagalakat sa dalan

Mangin Sensitibo Kon Magtudlo parte sa Wala Katapusan nga mga Pamilya

Ang iban nga tawo mahimo nga may mga sitwasyon sa pamilya nga daw indi makapagana sa ila nga mangin magkaupod tubtob sa katubtuban. Ang iban basi wala bana/asawa ukon kabataan sa sining kabuhi.

Padumduma ang imo mga ginatudloan nga ang plano sang Dios plano sang kalipayan. Buligi sila nga makita nga ang pagpangabuhi sang ebanghelyo makahanda sa ila karon para sa wala katapusan nga pamilya sa palaabuton, bisan pa kon matabo ini sa pihak nga kinabuhi.

Bisan ano pa ang sitwasyon sang tawo sa iya pamilya ukon pag-asawahay, ang mga hamtong dapat nga maghanda sa pagbaton sang ila kaugalingon nga endowment sa templo. Ang pagbaton sang ila endowment mangin dako nga kusog para sa ila. Buligi man sila nga makita nga may oportunidad sila nga makaupod ang napatay na nga mga himata paagi sa buluhaton sa templo.

Pagtuon sa Balaan nga mga Kasulatan

• Doktrina kag mga Kasugtanan 43:16; 95:8–9; 97:10–16; 109; 131:1–4

Tun-i Pa Gid ang parte sa Sining Prinsipyo

• Libro sang Pangkabilogan nga Pagsulundan, kapitulo 27: “Mga Ordinansa sang Templo para sa Buhi”

• Mga Topiko sang Ebanghelyo: “Mga Templo,” “Endowment,” “Pag-asawahay”

• temples.ChurchofJesusChrist.org

Imbitasyon

Magahanda ka bala sa pagsulod sa templo kag pagbaton sang mga ordinansa sa templo?