Kapitulo 3: Leksyon 2—Ang Plano sang Kaluwasan sang Amay nga Langitnon
“Kapitulo 3: Leksyon 2: Ang Plano sang Kaluwasan sang Amay nga Langitnon,” Iwali ang Akon Ebanghelyo: Giya sa Pagpaambit sang Ebanghelyo ni Jesucristo (2023)
“Kapitulo 3: Leksyon 2,” Iwali ang Akon Ebanghelyo
Kapitulo 3: Leksyon 2
Ang Plano sang Kaluwasan sang Amay nga Langitnon
Litrato
Estatwa nga Cristus
Mahimo nga Makapanghunahuna ang mga Tawo
Ano ang katuyuan sang kabuhi?
Diin ako naghalin?
May Dios bala nga nagaulikid sa akon? Paano ko mabatyagan nga nagaulikid Sia sa akon?
Paano ako magpati sa Dios nga kadamo sang malain nga nagakatabo?
Ngaa kabudlay sang kabuhi kon kaisa? Paano ako makakita sang kusog sa sini nga panahon?
Paano ako mangin mas maayo nga tawo?
Ano ang matabo pagkatapos ako mapatay?
Ang ginpanumbalik nga ebanghelyo ni Jesucristo nagabulig sa aton nga masabat ang importante nga mga pamangkutanon sang kalag. Paagi sa ebanghelyo, matun-an naton ang parte sa aton diosnon nga pagkatawo kag ang aton wala katapusan nga potensyal bilang mga anak sang Dios. Ang ebanghelyo nagahatag sa aton sang paglaum kag nagabulig sa aton nga makakita sang paghidaet, kasadya, kag kahulugan sa kabuhi. Ang pagpangabuhi sang ebanghelyo nagabulig sa aton nga magtubo kag makakita sang kusog samtang ginaatubang naton ang mga hangkat sang kabuhi.
Gusto sang Dios ang pinakamaayo para sa Iya mga anak kag nagahandum nga hatagan kita sang pinakadalagko Niya nga mga bugay, nga amo ang imortalidad kag kabuhi nga wala katapusan (tan-awa sa Moises 1:39; Doktrina kag mga Kasugtanan 14:7). Tungod palangga Niya kita, nagbutang Sia sang plano para mabaton naton ini nga mga bugay. Sa balaan nga kasulatan, ginatawag ini nga plano sang kaluwasan, ang dako nga plano sang kalipayan, kag ang plano sang pagtubos (tan-awa sa Alma 42:5, 8, 11, 13, 15, 16, 31).
Sa plano sang Dios ang tagsa sa aton magabiyahe sa kabuhi antes sa duta, pagkabun-ag, mortal nga kabuhi, kamatayon, kag kabuhi pagkatapos sang kamatayon. Gintigana sang Dios ang kinahanglanon naton sa sining pagpanglakaton para pagkatapos naton nga mapatay, makabalik kita sa Iya presensya kag makabaton sang kabug-osan sang kalipay.
Si Jesucristo sentro sa plano sang Dios. Paagi sa Iya Pagbayad-Sala kag Pagkabanhaw, ginpatigayon ni Jesus nga mabaton sang tagsa sa aton ang imortalidad kag kabuhi nga wala katapusan.
Samtang nagapangabuhi kita sa duta, indi naton madumduman ang aton kabuhi antes sa duta. Indi man naton lubos nga maintiendihan ang kabuhi pagkatapos sang kamatayon. Pero, ginpahayag sang Dios ang madamo nga kamatuoran parte sining mga bahin sang aton wala katapusan nga pagpanglakaton. Ining mga kamatuoran nagahatag sa aton sang hustohan lang nga ihibalo para maintiendihan ang katuyuan sang kabuhi, maeksperiyensyahan ang kalipay, kag makaangkon sang paglaum sa maayo nga mga magaabot. Ini nga ihibalo sagrado nga manggad nga magagiya sa aton samtang ari kita sa duta.
Mga Panugyan sa Pagtudlo
Ini nga seksyon nagahatag sang sampol nga outline para buligan ka nga maghanda sa pagtudlo. May ari man ini sang halimbawa nga mga pamangkot kag mga imbitasyon nga pwede mo gamiton.
Samtang nagahanda ka sa pagtudlo, pamensara sing mainampuon ang tagsa ka sitwasyon kag espirituhanon nga panginahanglan sang tagsa ka tawo. Desisyoni kon ano ang makabulig gid nga itudlo. Maghanda nga ipaathag ang mga termino nga basi indi maintiendihan sang mga tawo. Magplano base sa oras nga ihatag sa imo, tandai nga dapat malip-ot lang ang mga leksyon.
Pilia ang balaan nga mga kasulatan nga imo gamiton sa pagtudlo. Ang seksyon sang leksyon nga “Pundasyon nga Doktrina” nagalakip sang madamo nga makabulig nga balaan nga mga kasulatan.
Pamensara kon ano nga mga pamangkot ang imo gamiton samtang nagatudlo. Planoha nga ang mga imbitasyon nga imo itanyag makapaisog sa tagsa ka tawo nga mag-akto.
Hatagi importansya ang ginpangako nga mga bugay sang Dios, kag ipaambit ang imo testimonya parte sa imo ginatudlo.
Litrato
mga misyonero nga nagatudlo sang pamilya
Ano ang Pwede Mo Itudlo sa mga Tawo sa Sulod sang 15–25 ka Minutos
Magpili sang isa ukon madamo pa sa masunod nga mga prinsipyo nga itudlo. Ang pundasyon nga doktrina sang tagsa ka prinsipyo ara sa katapusan sining outline.
Kabuhi-Antes-sa Duta: Ang Plano kag Katuyuan sang Dios para sa Aton
Tanan kita espiritu nga mga anak sang Dios. Ginhimo Niya kita sa Iya kaugalingon nga dagway.
Nagpuyo kita upod sa Dios antes kita matawo diri sa duta. Mga miyembro kita sang Iya pamilya. Kilala kag palangga Niya ang tagsa sa aton.
Nagpahamtang ang Dios sang plano para sa aton kalipayan kag progreso sa sining kabuhi kag sa katubtuban.
Sa kabuhi naton antes sa duta, ginpili naton nga sundon ang plano sang Dios. Buot silingon nga makadto kita sa duta para mahimo naton ang madason nga lebel sa aton wala katapusan nga pagprogreso.
Si Jesucristo sentro sa plano sang Dios. Ginpatigayon niya nga makabaton kita sang imortalidad kag kabuhi nga wala katapusan.
Ang Pagtuga
Sa idalom sang direksyon sang Dios, ginhimo ni Jesucristo ang duta.
Ang Pagkahulog ni Adan kag Eva
Si Adan kag si Eva amo ang una sa espiritu nga mga anak sang Dios nga nagkari sa duta. Gintuga sang Dios ang ila mga lawas kag ginbutang sila sa Hardin sang Eden.
Nakasala si Adan kag Eva, gintabog pagwa sa hardin, kag naseparar sa presensya sang Dios. Ining hitabo gintawag nga Pagkapukan.
Pagkatapos sang Pagkahulog sa Sala, si Adan kag Eva nangin mortal. Bilang mga mortal, nagtuon sila, nagprogreso, kag nakaangkon sang mga anak. Naeksperiyensyahan man nila ang kasubo, sala, kag kamatayon.
Ang Pagkahulog isa ka tikang paabante para sa katawhan. Ginhimo nga posible sang Pagkahulog nga matawo kita sa duta kag magprogreso sa plano sang Amay nga Langitnon.
Ang Aton Kabuhi sa Duta
Sa plano sang Dios, kinahanglan naton nga magkadto sa duta para magbaton sang pisikal nga lawas, magtuon, kag magtubo.
Sa duta, magatuon kita nga magpanglakaton nga may pagtuo. Pero, wala kita ginpabay-an sang Amay nga Langitnon. Naghatag Sia sang madamo nga regalo kag mga giya para buligan kita nga makabalik sa Iya presensya.
Ang Pagbayad-Sala ni Jesucristo
Ang kada isa sa aton makasala, kag ang kada isa sa aton mapatay. Tungod palangga kita sang Dios, ginpadala Niya ang Iya Anak nga si Jesucristo sa duta, para tubuson kita sa sala kag kamatayon.
Tungod sa nagabayad-sala nga sakripisyo ni Jesus, sarang kita mapatawad kag matinloan sa aton mga sala. Pwede magbag-o ang aton mga tagipusuon para sa kaayuhan kon maghinulsol kita. Ginapatigayon sini ang pagbalik naton sa presensya sang Dios kag pagbaton sang kabug-osan sang kalipay.
Tungod sa Pagkabanhaw ni Jesus, tanan kita mabanhaw pagkatapos naton nga mapatay. Buot silingon nga ang espiritu kag lawas sang kada tawo magaupod liwat, kag ang kada isa sa aton mabuhi sa katubtuban sa perpekto, nabanhaw nga lawas.
Si Jesucristo nagatanyag sa aton sang kaumpawan, paglaum, kag pag-ayo. Ang Iya nagabayad-sala nga sakripisyo amo ang pinakamataas nga pagpahayag sang Iya pagpalangga. Ang tanan nga indi patas sa kabuhi pwede matadlong paagi sa Pagbayad-Sala ni Jesucristo.
Ang Kalibutan sang Espiritu
Kon mapatay ang aton pisikal nga lawas, ang aton espiritu padayon nga magakabuhi sa kalibutan sang mga espiritu. Isa ini ka temporaryo nga kahimtangan sa pagtuon kag paghanda antes sa Pagkabanhaw.
Ginatudlo ang ebanghelyo ni Jesucristo sa kalibutan sang mga espiritu, kag makapadayon kita sa pagtubo kag pagprogreso.
Ang Pagkabanhaw, Kaluwasan, kag Pangkahitaasan
Pagkatapos sang aton tiyempo sa kalibutan sang mga espiritu, ang Pagkabanhaw amo ang madason nga halintang sa aton wala katapusan nga pagpanglakaton.
Ang Pagkabanhaw amo ang pag-upod liwat sang espiritu kag lawas. Ang tagsa sa aton mabanhaw kag makaangkon sang perpekto nga pisikal nga lawas. Tanan kita mabuhi sa katubtuban. Ginhimo ini nga posible sang Pagbayad-Sala kag Pagkabanhaw sang Manluluwas.
Paghukom kag Mga Ginharian sang Himaya
Pagkabanhaw naton, si Jesucristo amo ang aton mangin hukom. Nga may pila lang gid ka eksepsyon, ang tanan nga anak sang Dios makabaton sang lugar sa ginharian sang himaya.
Bisan pa nga tanan kita mabanhaw, indi tanan makabaton sang pareho nga himaya sa wala katapusan. Pagahukman kita ni Jesus suno sa aton pagtuo, binuhatan, kag paghinulsol sa mortalidad kag sa kalibutan sang mga espiritu. Makabalik kita para magpuyo sa presensya sang Dios kon matutom kita.
Mga Pwede Mo Ipamangkot sa mga Tawo
Ang masunod nga mga pamangkot mga halimbawa sang pwede mo ipamangkot sa mga tawo. Ining mga pamangkot makabulig sa imo nga makaangkon sang makahulugan nga paghinambalanay kag maintiendihan ang mga panginahanglan kag panan-aw sang tawo.
Ano sa pamatyag mo ang katuyuan sang kabuhi?
Ano ang nagadala sa imo sang kalipay?
Ano ang imo mga kabudlayan nga kinahanglan mo ang bulig sang Dios?
Ano ang mga natun-an mo sa mga hangkat nga imo naatubang?
Ano ang nahibal-an mo parte kay Jesucristo? Paano nakaapekto sa imo kabuhi ang Iya kabuhi kag misyon?
Mga Imbitasyon nga Pwede Mo Ihatag
Ipangamuyo mo bala sa Dios nga buligan ka nga mahibal-an kon matuod ang amon gintudlo? (Tan-awa sa “Mga Punto sa Pagtudlo: Pangamuyo” sa katapusan nga seksyon sang leksyon 1.)
Masimba ka bala upod sa amon sini nga Domingo para matun-an pa gid ang parte sa amon gintudlo?
Basahon mo bala ang Libro ni Mormon kag magpangamuyo para mahibal-an kon pulong ini sang Dios? (Pwede ka magpanugyan sang partikular nga mga kapitulo ukon bersikulo.)
Pwede bala kita magtalana sang tion para sa amon madason nga pagbisita?
Litrato
larawan sang plano sang kaluwasan
Pundasyon nga Doktrina
Ini nga seksyon may doktrina kag balaan nga mga kasulatan nga imo tun-an para pabakuron ang imo ihibalo kag testimonya sa ebanghelyo kag buligan ka sa pagtudlo.
Litrato
mga galaxy
Kabuhi-Antes-sa Duta: Ang Plano kag Katuyuan sang Dios para sa Aton
Mga Anak Kita sang Dios, kag Nagpuyo Kita upod sa Iya antes Kita Matawo
Ang Dios amo ang Amay sang aton mga espiritu. Literal Niya kita nga mga anak, nga ginhimo sa Iya dagway. Ang kada isa sa aton may diosnon nga kinaiya bilang anak sang Dios. Ini nga ihibalo makabulig sa aton sa tunga sang mga kabudlayan kag makainspirar sa aton nga mangin pinakamaayo naton nga mga kaugalingon .
Nagpuyo kita upod sa Dios bilang Iya mga anak nga espiritu antes kita matawo diri sa duta. Mga miyembro kita sang Iya pamilya.
Litrato
Pangulong M. Russell Ballard
“May importante kita nga pagkatawo nga ara sa aton tanan sa karon kag sa katubtuban, nga indi gid naton pagkalimtan, kag dapat naton pasalamatan. Nga ikaw sa karon kag halin sadto, isa ka anak nga lalaki ukon anak nga babayi sang Dios nga may espirituhanon nga ginhalinan sa wala katapusan.
“… Ang pag-intiendi sining kamatuoran—ang matuod nga pag-intiendi kag pagpangabuhi sini—makabag-o sang kabuhi. Ginahatagan ka sini sang indi kinaandan nga pagkatawo nga indi makuha sa imo. Pero masobra pa dira, dapat magahatag ini sa imo sang dako nga balatyagon sang kapuslanan kag paghangop sang imo wala katapusan nga bili. Sa katapusan, nagahatag ini sa imo sang diosnon, talahuron, kag mapuslanon nga katuyuan sa kabuhi” (M. Russell Ballard, “Children of Heavenly Father” [Brigham Young University devotional, Mar. 3, 2020], 2, speeches.byu.edu).
Ginpili Naton nga Magkari sa Duta
Ang aton Langitnon nga Amay nagapalangga sa aton kag nagahandum nga mangin pareho kita sa Iya. Ginpahitaas Sia nga persona nga may ginhimaya nga pisikal nga lawas.
Sa aton kabuhi antes sa duta, nahibal-an naton nga may plano ang Dios para sa aton nga mangin pareho sa Iya. Isa ka bahin sang Iya plano amo nga bayaan naton ang aton langitnon nga puluy-an kag magkari sa duta para magbaton sang pisikal nga mga lawas. Kinahanglan man naton nga makaangkon sang eksperiyensya kag magpatubo sang pagtuo samtang malayo kita sa presensya sang Dios. Indi naton madumduman nga nagpuyo kita upod sa Dios. Pero, hatagan Niya kita sang aton mga kinahanglan para makabalik kita sa pagpuyo upod sa Iya.
Ang kabubut-on, ukon ang kahilwayan kag ikasarang sa pagpili, isa ka kinahanglanon nga parte sa plano sang Dios para sa aton. Sa aton kabuhi antes sa duta, ginpili sang tagsa sa aton nga sundon ang plano sang Dios kag magkari sa duta para mahimo naton ang madason nga lebel sa aton wala katapusan nga pagprogreso. Naintiendihan naton nga samtang ari kita diri, madamo kita sang bag-o nga mga oportunidad sa pagtubo kag pag-eksperiyensya sang kalipay. Naintiendihan man naton nga magaatubang kita sang oposisyon. Makaeksperiyensya kita sang tentasyon, mga pagtilaw, kasubo, kag kamatayon.
Sa pagpili nga magkari sa duta, nagsalig kita sa pagpalangga kag bulig sang Dios. Nagsalig kita sa Iya plano para sa aton kaluwasan.
Ginpili sang Amay nga Langitnon si Jesucristo para Tubuson Kita
Si Jesucristo sentro sa plano sang Dios. Antes kita magkadto sa duta, nahibal-an naton nga indi kita makabalik sa presensya sang Dios nga kita lang. Ginpili sang Amay nga Langitnon si Jesucristo, ang Iya panganay nga Anak, para himuon nga posible para sa aton nga makabalik sa Iya presensya kag makabaton sang kabuhi nga wala katapusan.
Hugot sa buot nga ginbaton ni Jesus. Nagsugot Sia nga magkari sa duta kag tubuson kita paagi sa Iya nagabayad-sala nga sakripisyo. Patigayunon sang Iya Pagbayad-Sala kag Pagkabanhaw nga matuman ang mga katuyuan sang Dios.
Libro sang Pangkabilogan nga Pagsulundan, 1.1: “Ang Plano sang Kaluwasan sang Dios”
Mga Topiko sang Ebanghelyo: “Kabuhi-antes-sa-duta,” “Plano sang Kaluwasan”
Litrato
pagtunod sang adlaw sa dagat
Ang Pagtuga
Ang plano sang Amay nga Langitnon nagtugot sang pagtuga sang duta, kon sa diin magabaton ang Iya espiritu nga mga anak sang pisikal nga mga lawas kag mag-agom sang eksperiyensya. Ang aton kabuhi sa duta kinahanglanon para magprogreso kita kag mangin pareho sa Dios.
Sa direksyon sang Amay nga Langitnon, gintuga ni Jesucristo ang duta kag ang tanan nga nagakabuhi. Dayon ginhimo sang Amay nga Langitnon ang lalaki kag babayi sa Iya kaugalingon nga imahe. Ang Pagtuga isa ka pagpahayag sang pagpalangga sang Dios kag sang Iya handum nga makaangkon kita sang oportunidad nga magtubo.
Leaving the Garden of Eden [Ang Paghalin sa Hardin sang Eden], ni Joseph Brickey
Ang Pagkahulog ni Adan kag Eva
Antes sang Pagkahulog
Si Adan kag si Eva amo ang una nga mga anak sang Amay nga Langitnon nga nagkadto sa kalibutan. Gintuga sang Dios ang ila pisikal nga mga lawas sunod sa Iya mismo nga imahe kag ginbutang sila sa Hardin sang Eden. Sang ara pa sa hardin, inosente sila, kag ginahatag sang Dios ang ila mga kinahanglanon.
Samtang ara pa si Adan kag Eva sa hardin, ginsugo sila sang Dios nga indi magkaon sang bunga sang kahoy sang ihibalo sang maayo kag malain. Kon sundon nila ini nga kasuguan, magatiner sila gihapon sa hardin. Pero, indi sila makaprogreso paagi sa pagtuon sa oposisyon kag mga hangkat sang mortalidad. Indi nila makilala ang kalipay bangud indi nila matilawan ang kasubo kag kasakit.
Gintentar ni Satanas si Adan kag Eva nga kaunon ang ginadumilian nga prutas, kag ginpili nila nga himuon ini. Bangud sining pagpili, gintabog sila pa-gwa sa hardin kag naseparar sa presensya sang Dios. Ining hitabo gintawag nga Pagkahulog.
Pagkatapos sang Pagkahulog
Pagkatapos sang Pagkahulog, si Adan kag Eva nangin mortal. Tungod wala na sa estado sang pagkainosente, naintiendihan nila kag naeksperiyensyahan ang pareho maayo kag malain. Pwede nila gamiton ang ila pagbuot para magpili sa duha. Tungod nangatubang si Adan kag Eva sang oposisyon kag mga hangkat, nakatuon sila kag nagprogreso. Tungod naeksperiyensyahan nila ang kasubo, maeksperiyensyahan man nila ang kalipay. (Tan-awa sa 2 Nefi 2:22–25.)
Sa pihak sang ila mga kabudlayan, nabatyagan ni Adan kag Eva nga ang mangin mortal isa ka dako nga bugay. Isa ka bugay amo nga makaangkon na sila sang mga anak. Nagpahamtang ini sang paagi nga makakadto sa duta ang iban nga espiritu nga mga anak sang Dios kag makabaton sang pisikal nga lawas.
Parte sa mga bugay sang Pagkahulog, si Adan kag si Eva pareho nga nalipay. Siling ni Eva, “Kon indi tungod sa aton paglapas wala gid kuntani kita sang [mga anak], kag wala gid kuntani makahibalo sang maayo kag malain, kag sang kalipay sang pagtubos sa aton, kag sang kabuhi nga wala’y katapusan nga ginahatag sang Dios sa tanan nga matinumanon” (Moises 5:11; tan-awa man sa bersikulo 10).
Mga Topiko sang Ebanghelyo: “Ang Pagkahulog ni Adan kag Eva,” “Pagbuot kag Pagka-May Salabton”
Ang Aton Kabuhi sa Duta
Madamo ang nagapamangkot, “Ngaa ari ako sa duta?” Ang aton kabuhi sa duta importante nga bahin sang plano sang Dios para sa aton wala katapusan nga pagprogreso. Ang pinakamataas naton nga tuyo amo ang magbalik sa presensya sang Dios kag magbaton sang kabug-osan sang kalipay. Nalista sa idalom ang pila ka paagi nga ginahanda kita sang kabuhi naton sa duta para diri.
Litrato
bata nga nagayuhum
Magbaton sang Pisikal nga Lawas
Isa ka katuyuan sang pagkadto sa duta amo ang magbaton sang pisikal nga lawas nga maistaran sang aton espiritu. Ang aton mga lawas sagrado, milagroso nga gintuga sang Dios. Paagi sa pisikal nga mga lawas, makahimo kita, makatuon, kag makaeksperiyensya sang madamo nga butang nga indi mahimo sang aton mga espiritu. Makaprogreso kita sa paagi nga indi naton mahimo bilang mga espiritu.
Tungod ang aton mga lawas mortal, makaeksperiyensya kita sang kasakit, balatian, kag iban pa nga mga pagtilaw. Ini nga mga eksperiyensya makabulig sa aton nga magtuon sang pagpasensya, kaluoy, kag iban pa nga diosnon nga mga kinaiya. Pwede man ini mangin parte sang aton paglakat padulong sa kalipay. Ang pagpili sang husto bisan mabudlay ini himuon masami amo ang paagi kon paano ang pagtuo, paglaum, kag pagpalangga sa isigkatawo mangin parte sang aton karakter.
Magtuon nga Maalam nga Gamiton ang Pagbuot
Isa pa ka katuyuan sang mortalidad amo ang magtuon sa paggamit sang aton pagbuot sing maalam—sa pagpili sang husto. Ang pagtuon sa paggamit sang aton pagbuot sing maalam importante para mangin pareho sa Dios.
Ginatudlo sa aton sang Amay nga Langitnon kag ni Jesucristo kon ano ang husto kag ginahatagan kita sang mga kasuguan para giyahan kita padulong sa kalipayan. Ginatentar kita ni Satanas nga maghimo sang sala, kay gusto niya nga mangin miserable kita pareho sa iya. Nagaatubang kita sang oposisyon sa tunga sang maayo kag malain, nga kinahanglanon naton sa pagtuon sa paggamit sang aton pagbuot (tan-awa sa 2 Nefi 2:11).
Kon tumanon naton ang Dios, magatubo kita kag makabaton sang ginpromisa Niya nga mga bugay. Kon indi kita magtuman, ginapalayo naton ang aton kaugalingon sa Iya kag magabaton sang mga konsikwensya sang sala. Bisan nga kon kaisa kon tan-awon daw baliskad, ang sala sa ulihi nagadala gid sang kasubo. Kasami ang mga bugay sang pagtuman—kag ang epekto sang sala—indi dayon hilmunon ukon makita sa gwa. Pero sigurado gid ini, kay patas ang Dios.
Bisan himuon naton ang aton masarangan, tanan kita makasala kag “mawad-an sang himaya sang Dios” (Mga Taga-Roma 3:23). Nga nakahibalo na sini ngadaan, naghatag ang Amay nga Langitnon sang paagi nga makahinulsol kita para makabalik kita sa Iya.
Ang paghinulsol nagadala sang gahum sang aton Manunubos nga si Jesucristo, sa aton mga kabuhi (tan-awa sa Helaman 5:11). Kon maghinulsol kita, matinloan kita sa sala paagi sa nagabayad-sala nga sakripisyo ni Jesucristo kag sang dulot sang Balaan nga Espiritu (tan-awa sa 3 Nefi 27:16–20). Paagi sa paghinulsol, maeksperiyensyahan naton ang kalipay. Nabuksan ang dalan pabalik sa aton Amay nga Langitnon, kay maluluy-on Sia. (Tan-awa sa “Paghinulsol” sa leksyon 3.)
Magtuon sa Paglakat nga May Pagtuo
Isa pa ka katuyuan sang sini nga kabuhi amo ang mag-angkon sang eksperiyensya nga matabo lamang paagi sa pagkahamulag sa Amay nga Langitnon. Tungod indi naton Sia makita, kinahanglan naton tun-an nga maglakat nga may pagtuo (tan-awa sa 2 Mga Taga-Corinto 5:6–7).
Wala kita ginpabay-an sang Dios nga nagaisahanon sa sini nga pagpanglakaton. Ginapadala Niya ang Balaan nga Espiritu sa paggiya, pagpabakod, kag pagtinlo sa aton. Ginhatagan man Niya kita sang balaan nga kasulatan, mga propeta, pangamuyo, kag sang ebanghelyo ni Jesucristo.
Ang kada bahin sang aton mortal nga eksperiyensya—ang kalipay kag kasubo, ang kadalag-an kag kapirdehan—makabulig sa aton nga magtubo samtang nagahanda kita nga magbalik sa Dios.
Mga Topiko sang Ebanghelyo: “Mortalidad,” “Pagtilaw”
Ang Pagbayad-Sala ni Jesucristo
Tungod sa Pagkahulog ni Adan kag Eva, tanan kita napaidalom sa sala kag kamatayon. Indi naton malampuwasan ang epekto sang sala kag kamatayon nga kita lang. Sa plano sang kaluwasan sang aton Amay nga Langitnon, naghatag Sia sang paagi para malampuwasan naton ang mga epekto sang Pagkahulog para makabalik kita sa Iya. Antes ang kalibutan gintuga, ginpili Niya si Jesucristo nga mangin aton Manluluwas kag Manunubos.
Si Jesucristo lang gid ang makatubos sa aton sa sala kag kamatayon. Literal Sia nga Anak sang Dios. Nagkabuhi Sia nga wala sala, lubos nga matinumanon sa Iya Amay. Handa Sia kag hugot sa buot nga nagasunod sa pagbuot sang Amay nga Langitnon.
Ang Pagbayad-Sala sang Manluluwas nagasakop sang Iya pag-antos sa Getsemani, sang Iya pag-antos kag kamatayon sa krus, kag sang Iya Pagkabanhaw. Indi matungkad ang Iya pag-antos—nga sa kagrabe, naggwa ang dugo sa tagsa ka buho-buho sang Iya panit (tan-awa sa Doktrina kag mga Kasugtanan 19:18).
Ang Pagbayad-Sala ni Jesucristo amo ang pinakamahimayaon nga hitabo sa bilog nga kasaysayan sang tawo. Paagi sa Iya nagabayad-sala nga sakripisyo, ginpagiho ni Jesus ang plano sang Amay. Wala kita sang mahimo kon wala ang Pagbayad-Sala ni Jesucristo tungod indi naton maluwas ang aton kaugalingon sa sala kag kamatayon (tan-awa sa Alma 22:12–15).
Ang sakripisyo sang aton Manluluwas amo ang pinakamataas nga pagpahayag sang Iya pagpalangga sa Iya Amay kag sa aton. “Ang kasangkaron kag kalabaon kag kataason kag kadalumon” sang gugma ni Cristo indi matakos sang aton paghangop (Mga Taga-Efeso 3:18; tan-awa man sa bersikulo 19).
Litrato
The Crucifixion [Ang Paglansang sa Krus], ni Harry Anderson
Gindaog ni Jesucristo ang Kamatayon para sa Tanan
Sang napatay si Jesucristo sa krus, ang Iya espiritu naseparar sa Iya lawas. Sa ikatatlo nga adlaw, ang Iya espiritu kag Iya lawas natingob liwat, agud indi na maseparar pa liwat. Nagpakita Sia sa madamo nga tawo, nga ginapakita sa ila nga may ara Sia sang imortal nga lawas sang unod kag tul-an. Ining pagtingob liwat sang lawas kag espiritu ginatawag nga Pagkabanhaw.
Bilang mga mortal, ang kada isa sa aton mapatay. Pero, tungod kay nalampuwasan ni Jesus ang kamatayon, ang tagsa ka tawo nga nabata sa duta mabanhaw. Ang Pagkabanhaw isa ka diosnon nga regalo para sa tanan, ginhatag paagi sa kaluoy kag nagatubos nga grasya sang Manluluwas. Ang espiritu kag lawas sang kada tawo magatingob liwat, kag ang kada isa sa aton mabuhi sa katubtuban sa perpekto, nabanhaw nga lawas. Kon indi tungod kay Jesucristo, ang kamatayon magautod sang tanan nga paglaum naton nga makaupod ang Amay nga Langitnon sa palaabuton (tan-awa sa 2 Nefi 9:8–12).
Ginhimo ni Jesus nga Posible para sa Aton nga Matinloan sang Aton mga Sala
Para maintiendihan ang paglaum nga mabaton naton paagi kay Cristo, kinahanglan naton maintiendihan ang layi sang hustisya. Amo ini ang wala nagabag-o nga layi nga nagadala sang mga konsikwensya sang aton mga hinimuan. Ang pagtuman sa Dios nagadala sang positibo nga mga konsikwensya, kag ang indi pagtuman nagadala sang negatibo nga mga konsikwensya. (Tan-awa sa Alma 42:14–18.) Kon makasala kita, nagahigko kita sa espirituhanon, kag wala sang mahigko nga butang nga makaistar sa presensya sang Dios (tan-awa sa 3 Nefi 27:19).
Litrato
Jesus Praying in Gethsemane [Si Jesus nga Nagapangamuyo sa Getsemani], ni Harry Anderson
Sang tion sang nagabayad-sala nga sakripisyo ni Jesucristo, nagtindog Sia sa aton lugar, nag-antos, kag nagbayad sang silot sa aton mga sala (tan-awa sa 3 Nefi 27:16–20). Ang plano sang Dios naghatag kay Jesucristo sang gahum para magtindog para sa aton—nga magpatunga sa aton kag sa hustisya (tan-awa sa Mosias 15:9). Tungod sa nagabayad-sala nga sakripisyo ni Jesus, pwede Niya gamiton ang Iya kinamatarong sa kaluoy para sa aton kon maggamit kita sang pagtuo pakadto sa paghinulsol (tan-awa sa Moroni 7:27; Doktrina kag mga Kasugtanan 45:3–5). “Kag sa amo nga paagi ang kaluoy mahimo nga makasabat sang mga ginapangayo sang hustisya, kag nagalikop sa [aton] sa butkon sang kasigurohan” (Alma 34:16).
Paagi lang gid sa dulot sang Pagbayad-Sala sang Manluluwas kag sang aton paghinulsol nga makabalik kita sa pagpuyo upod sa Dios. Kon maghinulsol kita, ginapatawad kita kag ginatinloan sa espirituhanon. Makakas na sa aton ang kabug-at sang kabasulanan para sa aton mga sala. Magaayo na ang aton pilason nga mga kalag. Mapuno kita sa kalipay (tan-awa sa Alma 36:24).
Bisan indi kita perpekto kag pwede nga madasma liwat, mas dako ang grasya, pagpalangga, kag kaluoy ni Jesucristo sangsa kapaslawan, deperensya, ukon sala sa aton. Handa pirme ang Dios kag maabtik sa paghakos sa aton kon magliso kita sa Iya kag maghinulsol (tan-awa sa Lucas 15:11–32). Wala sang bisan ano kag bisan sin-o nga “makapahamulag sa aton sa gugma sang Dios nga yara kay Cristo Jesus nga aton Ginuo”(Mga Taga-Roma 8:39).
Gindala ni Jesucristo sa Iya Kaugalingon ang Aton mga Kasakit, mga Kalisdanan, kag mga Kahuyangan
Sa Iya nagabayad-sala nga sakripisyo, gindala ni Jesucristo sa Iya Kaugalingon ang aton mga kasakit, mga kalisdanan, kag mga kahuyangan. Bangud sini, nahibal-an Niya “suno sa unod kon paano magtabang sa iya katawhan suno sa ila mga kahuyangan” (Alma 7:12; tan-awa man sa bersikulo 11). Nagapangagda Sia, “Magpalapit sa akon,” kag kon himuon naton ini, hatagan Niya kita sang kapahuwayan, paglaum, kusog, perspektibo, kag pag-ayo (Mateo 11:28; tan-awa man sa mga bersikulo 29–30).
Kon magsandig kita kay Jesucristo kag sa Iya Pagbayad-Sala, mabuligan Niya kita nga mabatas ang aton mga pagtilaw, mga balatian, kag kasakit. Mapun-an kita sang kalipay, kalinong, kag kaumpawan. Ang tanan nga indi patas sa kabuhi sarang matadlong paagi sa Pagbayad-Sala ni Jesucristo.
Mga Topiko sang Ebanghelyo: “Jesucristo,” “Pagbayad-Sala ni Jesucristo,” “Grasya”
Litrato
pamilya nga nagabisita sang lulubngan
Ang Kalibutan sang Espiritu
Madamo nga tawo ang nagapamangkot, “Ano ang matabo pagkatapos ako mapatay?” Ang plano sang kaluwasan nagahatag sang pila ka importante nga mga sabat sa sining pamangkot.
Ang kamatayon parte sang “maluluy-on nga plano” sang Dios para sa aton (2 Nefi 9:6). Imbes nga katapusan sang aton kabuhi, ang kamatayon amo ang madason nga lebel sa aton wala katapusan nga pagprogreso. Para mangin pareho sa Dios, kinahanglan naton makaeksperiyensya sang kamatayon kag sa ulihi magbaton sang ginperpekto, nabanhaw nga mga lawas.
Kon mapatay ang aton pisikal nga lawas, ang aton espiritu padayon nga magakabuhi sa kalibutan sang mga espiritu. Isa ini ka temporaryo nga kahimtangan sang pagtuon kag paghanda antes sa Pagkabanhaw kag sa Katapusan nga Paghukom. Ang aton ihibalo halin sa mortal nga kabuhi magapabilin upod sa aton.
Sa kalibutan sang mga espiritu, ang mga tawo nga nagbaton kag nagpangabuhi sang ebanghelyo ni Jesucristo “pagabatunon sa isa ka kahimtangan sang kalipayan, nga ginatawag nga paraiso” (Alma 40:12). Ang magagmay nga kabataan pagabatunon man sa paraiso kon mapatay sila.
Ang mga espiritu sa paraiso makabaton sang kalinong sa ila mga palaligban kag mga kasubo. Magapadayon ang ila espirituhanon nga pagtubo, nga nagahimo sang buluhaton sang Dios kag nagaalagad sa iban. Itudlo nila ang ebanghelyo sa mga wala pa makabaton sini sa ila mortal nga kabuhi (tan-awa sa Doktrina kag mga Kasugtanan 138:32–37, 57–59).
Sa kalibutan sang mga espiritu, ang mga tawo nga wala nakabaton sang ebanghelyo sa duta, ukon nagpili nga indi magtuman sang mga kasuguan, makaeksperiyensya sang mga limitasyon (tan-awa sa Doktrina kag mga Kasugtanan 138:6–37; Alma 40:6–14). Pero, tungod kay patas kag maluluy-on ang Dios, makabaton sila sang oportunidad nga matudloan sang ebanghelyo ni Jesucristo. Kon batunon nila ini kag maghinulsol, pagatubuson sila sa ila mga sala (tan-awa sa Doktrina kag mga Kasugtanan 138:58; tan-awa man sa 138:31–35; 128:22). Pagaabi-abihon sila sa kalinong sang paraiso. Sa ulihi makabaton sila sang lugar sa isa ka ginharian sang himaya base sa mga pagpili nga ila ginhimo sang ara pa sila sa kalibutan kag sa kalibutan sang mga espiritu.
Magapabilin kita sa kalibutan sang espiritu tubtob kita mabanhaw.
Ginhimo sang Dios nga posible nga magtubo kita kag makabaton sang kabuhi nga wala katapusan. Pagkatapos sang aton tiyempo sa kalibutan sang mga espiritu, ang Pagkabanhaw amo ang madason nga lebel sa sina nga pagtubo.
Ang Pagkabanhaw amo ang pag-upod liwat sang aton lawas kag espiritu. Kada isa sa aton mabanhaw. Ginhimo ini nga posible sang Pagbayad-Sala kag Pagkabanhaw sang Manluluwas. (Tan-awa sa Alma 11:42–44.)
Sa aton pagkabanhaw, ang kada isa sa aton makaangkon sang perpekto nga pisikal nga lawas, nga wala na sang kasakit kag balatian. Mangin imortal kita, mabuhi sa katubtuban.
Kaluwasan
Tungod tanan kita mabanhaw, tanan kita maluwas—ukon makaagom sang kaluwasan—sa pisikal nga kamatayon. Ini nga regalo ginhatag sa aton paagi sa grasya ni Jesucristo.
Maluwas man kita—ukon makaagom sang kaluwasan—sa mga konsikwensya nga ginapangayo sang layi sang hustisya para sa aton mga sala. Ini nga regalo nangin posible man paagi sa mga merito kag kaluoy ni Jesucristo kon maghinulsol kita. (Tan-awa sa Alma 42:13–15, 21–25.)
Pangkahitaasan
Ang pangkahitaasan, ukon kabuhi nga wala katapusan, amo ang pinakamataas nga estado sang kalipay kag himaya sa selestiyal nga ginharian. Ang pangkahitaasan regalo nga may kondisyon. Gintudlo ni Pangulong Russell M. Nelson, “Inang nagakwalipikar nga kondisyones nagalakip sang pagtuo sa Ginuo, paghinulsol, bunyag, pagbaton sang Balaan nga Espiritu, kag pagpadayon nga tampad sa mga ordinansa kag kasugtanan sa templo” (“Salvation and Exaltation,” Ensign ukon Liahona, Mayo 2008, 9).
Ang pangkahitaasan nagakahulugan sang pagkabuhi upod sa Dios sa katubtuban sa wala’y katapusan nga mga pamilya. Ini amo ang pagkilala sa Dios kag kay Jesucristo, ang mangin pareho sa Ila, kag ang maeksperiyensyahan ang sahi sang kabuhi nga Ila ginaagom.
Mga Topiko sang Ebanghelyo: “Pagkabanhaw,” “Kaluwasan”
Litrato
mga silak sang adlaw nga nagalusot sa mga panganod
Paghukom kag Mga Ginharian sang Himaya
Tanda: Sa primero nga pagtudlo parte sa mga ginharian sang himaya, magtudlo sa pinakasimple nga lebel base sa panginahanglan kag pag-intiendi sang tawo.
Sa pagkabanhaw naton, si Jesucristo amo ang aton mangin matarong kag maluluy-on nga hukom. Nga may pila lang gid ka eksepsyon, ang tanan sa aton makabaton sang lugar sa isa ka ginharian sang himaya. Bisan pa nga tanan kita mabanhaw, indi tanan sa aton makabaton sang pareho nga himaya sa wala katapusan (tan-awa sa Doktrina kag mga Kasugtanan 88:22–24, 29–34; 130:20–21; 132:5).
Ang mga indibidwal nga wala sang oportunidad nga maintiendihan sang lubos kag tumanon ang mga layi sang Dios sang nagakabuhi pa sila sa duta, hatagan sina nga oportunidad sa kalibutan sang mga espiritu. Hukman ni Jesus ang tagsa ka tawo suno sa iya pagtuo, binuhatan, mga handum, kag paghinulsol sa mortalidad kag sa kalibutan sang mga espiritu (tan-awa sa Doktrina kag mga Kasugtanan 138:32–34, 57–59).
Ang balaan nga mga kasulatan nagatudlo parte sa selestiyal, terestriyal, kag telestiyal nga mga ginharian sang himaya. Ang kada isa sina pagpahayag sang pagpalangga, hustisya, kag kaluoy sang Dios.
Inang mga may pagtuo kay Cristo, nagahinulsol sang ila mga sala, nagabaton sang mga ordinansa sang ebanghelyo, nagatuman sang ila mga kasugtanan, nagabaton sang Balaan nga Espiritu, kag nagapadayon tubtob sa katapusan maluwas sa selestiyal nga ginharian. Ining ginharian magalakip man sang mga tawo nga wala sang oportunidad nga mabaton ang ebanghelyo sang ari sila sa duta pero “magabaton sini kuntani sa bug-os nila nga mga tagipusuon” kag ginbaton nila ini sa kalibutan sang mga espiritu (Doktrina kag mga Kasugtanan 137:8; tan-awa man sa bersikulo 7). Ang mga bata nga napatay antes sang edad sang pagka-may salabton (walo ka tuig ang pangidaron) maluwas man sa selestiyal nga ginharian (tan-awa sa Doktrina kag mga Kasugtanan 137:10).
Sa balaan nga mga kasulatan, ang selestiyal nga ginharian makumparar sa himaya ukon kasanag sang adlaw. (Tan-awa sa Doktrina kag mga Kasugtanan 76:50–70.)
Ang mga tawo nga nagpangabuhi sing dungganon nga “wala nagbaton sang testimonya parte kay Jesus sa unod apang sang ulihi ginbaton ini” makabaton sang lugar sa terestriyal nga ginharian (Doktrina kag mga Kasugtanan 76:74). Amo man sini ang mga wala nangin maisog sa ila testimonya kay Jesus. Ining ginharian ginakumparar sa himaya sang bulan. (Tan-awa sa Doktrina kag mga Kasugtanan 76:71–80.)
Ang mga nagpadayon sa ila mga sala kag wala naghinulsol sa sining kabuhi ukon nagbaton sang ebanghelyo ni Jesucristo sa kalibutan sang mga espiritu, magabaton sang ila padya sa telestiyal nga ginharian. Ini nga ginharian ginakumparar sa himaya sang mga bituon. (Tan-awa sa Doktrina kag mga Kasugtanan 76:81–86.)
Malip-ot kag Hustohan lang Kalaba nga Outline sang Leksyon
Ang masunod nga outline sampol sang pwede mo itudlo kon gamay lang ang imo oras. Sa paggamit sining outline, magpili sang isa ukon mas madamo pa nga mga prinsipyo nga itudlo. Ang pundasyon nga doktrina sang tagsa ka prinsipyo ginhatag sa ibabaw sa leksyon.
Samtang nagatudlo ka, magpamangkot kag magpamati. Maghatag sang mga imbitasyon nga makabulig sa mga tawo nga magtuon kon paano mas magpalapit sa Dios. Isa ka importante nga imbitasyon sa tawo amo nga makigkita liwat sa inyo. Ang kalabaon sang leksyon depende sa imo nga mga ipamangkot kag sa imo pagpamati.
Ano ang Pwede Mo Itudlo sa mga Tawo sa 3-10 ka Minutos
Tanan kita espiritu nga mga anak sang Dios. Mga miyembro kita sang Iya pamilya. Kilala kag palangga Niya ang tagsa sa aton.
Nagpahamtang ang Dios sang plano para sa aton kalipayan kag progreso sa sining kabuhi kag sa katubtuban.
Sa plano sang Dios, kinahanglan naton nga magkadto sa duta para magbaton sang pisikal nga lawas, magtuon, kag magtubo.
Si Jesucristo sentro sa plano sang Dios. Ginpatigayon Niya nga makabaton kita sang kabuhi nga wala katapusan.
Sa idalom sang direksyon sang Dios, ginhimo ni Jesus ang duta
Ang aton mga eksperiyensya sa duta nagatuyo nga ihanda kita sa pagbalik sa presensya sang Dios.
Ang kada isa sa aton makasala, kag ang kada isa sa aton mapatay. Tungod palangga kita sang Dios, ginpadala Niya ang Iya Anak nga si Jesucristo sa duta, para tubuson kita sa sala kag kamatayon.
Ang tanan nga indi patas sa kabuhi pwede matadlong paagi sa Pagbayad-Sala ni Jesucristo.
Kon mapatay ang aton pisikal nga lawas, ang aton espiritu padayon nga magakabuhi. Sa ulihi kita tanan mabanhaw. Buot silingon nga ang espiritu kag lawas sang kada tawo magaupod liwat, kag ang kada isa sa aton mabuhi sa katubtuban sa perpekto, nabanhaw nga lawas.
Pagkabanhaw naton, si Jesucristo amo ang aton mangin hukom. Nga may pila lang gid ka eksepsyon, ang tanan nga anak sang Dios makabaton sang lugar sa ginharian sang himaya. Makabalik kita para magpuyo sa presensya sang Dios kon matutom kita.