Aoao—Taimi Aofai: 45 Minute

Talanoaga o le Aso:

3 Aveese le Aitalafu

ata auiliili o le fale

Faafanua o le Faamanuiaina i le Tulaga Faatausimea i Mea Tautupe

1. Malamalama i le Aitalafu

FaitauO le aitalafu o le nono mai o tupe e le o ni a oe. E masani lava e sau ma se tau, e ta’u o le tului. O le tului o se pasene o le aofai na aitalafu ai. E iu ane ina e totogia le sili atu mo le mea na e nonoina, o nisi taimi e matuai tele lava. O aitalafu e o mai faatasi ma peimeni faamoemoeina, ma se faamoemoega atoa e toe totogi atu atoa le mea na e nonoina faatasi ma le tului.

TalanoaAisea e nono ai e tagata ia tupe?

FaitauUa le aunoa ona fautua mai perofeta ia i tatou ia aloese mai aitalafu. Na aoao mai Peresitene Heber J. Grant, “Afai e i ai lava se mea e tasi o le a aumaia le filemu ma le faamalieina i le loto o le tagata, ma i totonu o le aiga, o le ola lea i mea ua tatou maua. Ma afai e i ai lava se mea e tasi e oloia ma faalotovaivaia ma faaatuatuvaleina, o le i ai o ni aitalafu ma ni tiute ua le mafai e se tagata ona taulima” (Gospel Standards: Sermons and Writings of Heber J. Grant, comp. G. Homer Durham [1941], 111).

I mataupu e lua o loo sosoo mai, o le a e aoao ai e mulimuli i fautuaga a perofeta e aluese mai le aitalafu.

Mafaufau LolotoFaaalu ni minute se lua e mafaufau ai i faaiuga o mea tautupe sa e faia sa faapea ona le lelei. O a ni taunuuga na i ai? O a ni ou lagona ina ua uma? Na faapefea ona aafia ai oe, lau faaipoipoga po o le aiga, ma lou mafai ona auauna atu i isi?

Aloese mai le Aitalafu

FaitauUa fautua mai perofeta e itiiti lava ni pogai tauamiotonuina e fai ai aitalafu, ma afai e te faia se aitalafu, e tatau ona e toe totogia uma i se vave e mafai ai. Na aoao mai Peresitene Gordon B. Hinckley e faapea, “o se aitalafu talafeagai mo le faatauina o se fale e gafatia [ona totogi] ma atonu foi mo nai isi mea e manaomia ua taliaina lea. Peitai, mai le mea o loo ou saofai ai, ua ou vaaia ai i se auala sili ona manino ni faaletonu sili ona leaga o le toatele o e ua nonoina mai ma le le faautatua mo mea latou te matuai le manaomia” (“I Believe,” Ensign, Aug. 1992, 6).

E faalagolago i tulaga, e mafai ona talia aitalafu mo mea nei e faaalu ai tupe:

• O se fale tauagafau, ma gafatia ona totogi

• Tupe faaalu mo aoaoga talafeagai o le a faapea ona taitai atu ai i se galuega lelei atu

• Auala o feoaiga masani ma tauagafau (pe afai lena e manaomia)

E tatau lava ona e aloese mai le faia o aitalafu mo aitema e ese mai nai loo ia mea. Nai lo o lena, ia sefe mo mea e faaalu ai tupe.

Mafaufau LolotoFaaalu ni minute se lua e mafaufau ai i le fesili lenei, ona tusi lea o ou manatu: E faapei se lagona o le saoloto mai aitalafu?

Faamauiina o le Matou Filifili Pepa

Na ou alu i se aoga taugata mo tikeri maualuga atu. Sa ou maua se galuega lelei ina ua uma ae sa silia ma le selau afe tala lau aitalafu. Sa ou tilotilo i se taimi UMI lava ona faatoa uma lea ona ou totogia lena aitalafu. I se tasi Aso Toonai, sa ma faia ai ma lo’u toalua se filifili pepa ma o sooga taitasi na faatusa i $1,000. E 100 ni sooga na i ai! Sa ma tuua le filifili i le potu malolo ma sasae ese se sooga se tasi i taimi uma e uma ai ona ma totogia se isi $1,000. E ui lava o le a umi ni nai tausaga faatoa saoloto lea mai le aitalafu, ma te fiafia lava e vaai atu i le maui o le ma filifili, ma o se auala sili lea e aoao ai le ma fanau e uiga i aitalafu, ma ia faaaofia ai le aiga atoa i le ma taumafaiga.

Aluese mai le Aitalafu

FaitauE mafai ona e aluese mai le aitalafu! O le malosi e totogi faauma se aitalafu, o le a manaomia ai se ositaulaga tele, ae e mafai ona e faia. O loo i lalo ni mataupu faavae taua se lima mo le aluese mai le aitalafu. O le a tatou talanoaina mataupu faavae muamua e tolu i le mataupu lenei.

1. Malamalama i mea moni e uiga i lau aitalafu

2. Naunau e aluese mai le aitalafu

3. Faatoilalo mea faalelalolagi e matele i ai le tagata, lea e oo atu ai i le aitalafu

4. Taofi le faatupulaia o le aitalafu

5. Totogi faauma au aitalafu

TalanoaO a ni ou mafaufauga po o lagona ua i ai mai le faitauina o nei mataupu faavae e lima?

2. Malamalama i Mea Moni e Uiga i Lau Aitalafu

FaitauE fia sau aitalafu o i ai? O a pasene o tului? O a peimeni? O le a le umi e totogi faauma ai lau aitalafu, ma e fia le tului o le a e totogia? E taua le iloa o nei mea a o e galue ia aluese mai le aitalafu. Ina ia fai lenei mea, o le a e fatuina ai se faamaumauga o le aitalafu. O loo i lalo se faataitaiga o le siata o le faamaumauga o le aitalafu.

Faamatalaga	Paleni	Pasene o le Tului	Peimeni Faalemasina
Kata faifaatau faaaitalafu #1	4,000	17%	97
Kata faifaatau faaaitalafu #2	6,500	19%	168
Taavale	5,000	3.00%	145
Nonoga tupe a le tagata aoga	18,000	5.50%	300
Mokesi	170,000	4.50%	1,050

I le tou fonotaga faaleaiga i le vaiaso lenei, o le a e faia ai se siata tai faapena. Ia mautinoa e faatumu ia faamatalaga uma mo aitalafu taitasi.

3. Naunau e Aluese mai le Aitalafu

FaitauIna ia fai soo se mea faigata, e aofia ai le aluese mai le aitalafu, e tatau ona malosi atu lou naunau nai lo o mea faalavefau. Na aoao mai Elder Dallin H. Oaks, “A i ai sa tatou vaaiga mamao o mea e mafai ona avea ai i tatou, ona matua faateleina lea o lo tatou manao ma lo tatou malosi e galue ai.” (“Manao,” Ensign po o le Liahona, Me 2011, 44). Ina ia maua le faamanuiaina, ia taulai atu i lau sini ia aluese mai le aitalafu, ma vaai faalemafaufau i le mea o le a i ai le olaga pe a e saoloto mai le avega o le aitalafu. Na aoao mai Elder Neal A. Maxwell, “O le mea tatou te mananao pea i ai, i le aluga o le taimi, o le mea lea o le a iu ina avea ai i tatou” (“According to the Desire of [Our] Hearts,” Ensign, Nov. 1996, 21).

TalanoaAisea e te manao ai e saoloto mai aitalafu? O a mea o le a mafai ona e faia e le o mafai ona e faia i le taimi nei?

4. Faatoilalo le “Tagata o le Lalolagi”

FaitauI le Tusi a Mamona, na aoao mai ai le Tupu o Peniamina, “Ona o le tagata natura o se fili i le Atua, ma sa faapea lava mai le paʼū o Atamu, ma o le a faapea lava, e faavavau faavavau lava, vagana ai ua gauaʼi atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii, ma avea e pei o se tamaitiiti, e usiusitai, agamalu, lotomaualalo, onosai, ma tumu i le alofa“ (Mosaea 3:19). Ina ia faataatiaese le tagata o le lalolagi, e ao ona tatou manatua mataupu faavae na tatou aoaoina mai le mataupu e 4 e uiga i le faatumauina o se vaaiga faaumiumi. E pei o tamaiti i le suesuega i masimelo, e tatau ona tatou aoao e faatuai fiafiaga pupuu ina ia ausia ai sini faaumiumi.

O mea e matele i ai le “tagata o le lalolagi” e aofia ai le:

• Faaalu [o tupe] ae lei fuafuaina ma aafiaga faalelagona.

• O le le iloa po o le faatamala i tulaga moni o a tatou mea tautupe.

• O le manao ma faatusatusa o i tatou lava i isi.

O le gauai atu i le tagata o le lalolagi o le a taitai atu ai i tatou i aitalafu ma le atuatuvale i mea tautupe. I le isi itu, a o tatou saili e mulimuli i “uunaiga a le Agaga Paia,” o le a tatou mafaia e ala i le mana o le Togiola ona tatou malolosi pe a fetaiai ma faigata.

TalanoaO le a le uiga o le tuuese le tagata o le lalolagi [natura]?

FaitauSei o tatou vaavaai totoa la i nisi o nei mea e lilifa i ai le tagata o le lalolagi i le tulaga o le ola tutoatasi.

Faalu [o tupe] Ae Lei Fuafuaina ma ona o Aafiaga Faalelagona

Mafaufau LolotoFaaalu se minute e mafaufau ai i fesili nei, ona tusi lea o ou manatu i lalo: O anafea le taimi mulimuli sa e faia ai se faatau taugata ma sa lei fuafuaina? O le a lea mea taua? O a ni auala na ono mafai ona e faaaoga lelei ai lena tupe mo se isi mea?

FaitauAtonu sa tatou faia uma lava se faatau sa lei fuafuaina pe sa faia ona o aafiaga faalealagona. O nisi o taimi tatou te faaalu ai tupe pe a tatou lagona le lotovaivai po o le ita. O nisi o taimi tatou te faaalu ai tupe ona tatou te manatu tatou te agavaa e tauia i tatou lava. O nisi o taimi e faaosoosoina i tatou e pau po o faalauiloa i le talitonu e faapea, tatou te manaomia se mea ae o le mea moni tatou te le manaomia. E tele pogai tatou te faaalu ai tupe i mea tatou te le manaomia moni ae afaina ai le totogiina o mea e sili ona taua. O le a fesoasoani le gaoioiga lenei tatou te malamalama ai i le pogai tatou te faia ai faatauga e lei fuafuaina.

Gaoioiga (10 minute)

Laasaga 1: Faaalu ni nai minute e iloilo ai lau masani o le faaalu o tupe ona o aafiaga faalelagona e ala i le tali i fesili o loo i lalo.

Laasaga 2: A uma ona e faatumuina le pepa o fesili, ia paga ma lou toalua (pe afai o auai) po o le soa galue ma talanoa i fesili nei:

• O a nisi o mamanu e te maitauina e faatatau i le faaalu [o tupe] ae lei fuafuaina pe ona o aafiaga faalealagona?

• O le a se mea e mafai ona e faia e puipuia ai oe mai ia te oe lava?

O A Ni O’u Lagona Pe a Ou Faaaluina [Tupe] Ae Lei Fuafuaina? (Faailoga mea uma e faatatau i ai.)

• Tuuatoatasi

• Le Fiafia

• Faagaeetia

• Agaalofa

• Fiafia

• Fiaai

• Ita

• Faanoanoa

• Mamafatu

• Lelava

• Le talisapaiaina

O A Ni Mea O’u Te Faaaluina ai [Tupe] Pe a Ou Faaalu Ae Lei Fuafuaina? (Faailoga mea uma e faatatau i ai.)

• Lavalava

• Aai i faleaiga

• Masini faaeletonika po o mea e faaaoga i masini faaeletonika

• Faafiafiaga

• Meaalofa

• Meafale po o teuga [o le fale]

• Meaai mama po o mea inu

• Malaga

O Ai Ma Te I Ai I le Taimi Ou te Faaaluina ai [Tupe] Ae Lei Fuafuaina?

• Tamaiti

• Tagata e faigaluega faatasi

• Uo

• E leai se isi; ua na o a’u

• Toalua

TalanoaE mafai faapefea ona tatou foia le faananau atu e fai faatau e lei fuafuaina? O le a se mea na e faia i le taimi ua fano e foia ai [faatauga] e lei fuafuaina?

O le Le Iloa po o le Faatamala i o Tatou Tulaga i Mea Tautupe

FaitauI le Tusi a Mamona, o loo aoai ai e Nifae ia Lamana ma Lemuelu ona o le “teʼa atu ma le toe lagonaina” ma le le mafai ona lagona le galue o le Agaga i totonu ia i laua (tagai i le 1 Nifae 17:45). O a tatou filifiliga e masani ona maaa ai o tatou loto, ma faigata ai ona lagona uunaiga a le Agaga i taimi e tatau ai ona tatou faia ni suiga. O nisi o taimi o le “teʼa atu ma le toe lagonaina” e mafai ona mafua ai ona tatou filifili e le amanaia le tulaga moni o o tatou tulaga. Atonu tatou te manao e aloese mai le mataituina o a tatou tupe faaalu po o le vaai i a tatou tusi tupe. Afai tatou te faaaogaina kata faifaatau faaaitalafu po o isi aitalafu a tagata faatau, o lenei faatamala e vave lava ona taitai atu ai i tatou i le aitalafu.

O nisi o taimi o le a faaalu faavalevalea ai e le toatasi po o le paaga uma i se faaipoipoga, ma le manatu o le isi tagata o le paaga e nafa ma tulaga tautupe a le aiga. Ia manatua, o le ulugalii uma e nafa tutusa ma mea tautupe a lo laua aiga, ma o le le amanaia po o le tuu atu [i le isi] o le tatou tiutetauave, o le a na ona atili tulei atu ai o i tatou i faafitauli tautupe.

TalanoaAisea e matele ai isi ina le amanaia le moni o o latou tulaga? E mafai faapefea ona e foia le “teʼa atu ma le toe lagonaina” e faatatau i ou tulaga tautupe, pe a manaomia ai?

O Le Manao ma le Faatusatusa o i Tatou Lava i Isi

FaitauO se mea masani i tagata le faatusatusa o i latou lava i isi, ma ua osofaia i tatou i savali ma faasalalauga faalauiloa e uunaia ai i tatou e faatau mai mea tatou te le manaomia. O nisi o taimi tatou te manatu ua tatou agavaa mo le mauaina o ni mea e le mafai ona tatou gafatia, pe le manaomia moni. O le gauai atu i le manao e vave ai lava ona taitai atu i tatou i le faia o faatauga faavalevalea.

TalanoaE mafai faapefea ona tatou foia le faananau atu i le faatusatusa o i tatou lava i isi?

Talanoa i le Tou Fonotaga Faaleaiga i Mea e Ave i Ai le Faamuamua i Mea Tautupe

FaitauI le aluga o le tou fonotaga faaleaiga i le vaiaso lenei, o le a outou talanoa ai i auala e mafai ona outou foia ma puipuia ai outou lava mai le lilifa atu i le “tagata o le lalolagi”. Ia talanoa faatasi i au aitalafu o loo i ai nei, ma ia fatu se “faamaumauga o le aitalafu” (tagai i le pepa avanoa o le faamaumauga o le aitalafu o loo i le itulau e 123). E mafai ona e mafaufau e faaaoga le “Faataitaiga o le Talanoaga i le Fonotaga Faaleaiga” ua faataatia atu i lalo e taiala ai le tou fonotaga. A o outou faailoa faatasi a outou aitalafu, ma ao outou atinaeina auala e foia ai le lilifa atu i le “tagata o le lalolagi” o le a e maua le fesoasoani a le Alii e faateaese ai au aitalafu.

Faataitaiga o le Talanoaga i le Fonotaga Faaleaiga

Ia mautinoa e amata ma faaiu i se tatalo e valaaulia ai le Agaga.

Vaega 1: Iloilo

• O a nisi o auala e te faaalia ai le lilifa atu i le tagata o le lalolagi?

• O le a le taimi mulimuli na fai ai sau faatauga tele e lei fuafuaina? O le a se mea na e ono faia i lena tupe?

• A oo ina e saoloto mai aitalafu, o le a se mea o le a mafai ona e faia e le o mafai ona e faia i le taimi nei?

Vaega 2: Fuafuaga

• Fai se faamaumauga o aitalafu e faaaoga ai le siata o loo i le itulau e 123.

• Fesili ifo ia te oe lava:

  • O le a se mea e mafai ona ese lou faiga e faatea ese ai au aitalafu?

  • O a ni faiga masani e mafai ona e faatulagaina e foia ai ma puipuia ai le lilifa atu i le tagata o le lalolagi?

  • E mafai faapefea ona e faaaofiaina le Alii ia fesoasoani ia te oe e tuuese le tagata o le lalolagi?