Aoao—Taimi Aofai: 45 Minute

Talanoaga o le Aso:

• Faatuatua ia Iesu Keriso

• Lotogatasi ma le Toalua

• Tuuto i le Ola Tutoatasi

1. Galue ma Fai le Tiutetauave

FaitauIna ua faatonuina Atamu ma Eva e tuua le Faatoaga o Etena, sa fetalai atu le Atua, “E te ai foi au mea e ai ma le afu o ou mata, seia e toe foi atu i le eleele” (Kenese 3:19). E ui ina finagalo le Alii e tuuina ma ia i tatou mea uma tatou te manaomia faaletino, e faamoemoe o Ia ia tatou galulue malosi ma fai le tiutetauave mo o tatou lava manaoga. Ia maitau o le tasi o puipui lagolago i le Faafanua o le Faamanuiaina i Tulaga Faatausimea i Mea Tautupe (tagai itulau 8) o le “galue.” O le ola tutoatasi i le faaletino e manaomia ai le faaauau pea ona galue malosi ma le maelega?

Ua aoao mai Peresitene Dieter F. Uchtdorf, “E le o faamoemoe mai le Alii ia tatou galulue malosi atu nai lo le mea tatou te mafaia. Na te le (ma e le tatau foi ia i tatou) ona faatusatusa a tatou taumafaiga i taumafaiga a isi. Na pau le mea ua fetalai mai ai lo tatou Tama Faalelagi, ia tatou faia le mea sili tatou te mafaia. … O le galue o se fofo lea o le atuatuvale, o se vaimalu mo le faanoanoa, ma se faitotoa i avanoa. … A paulia la tatou taavaletoso i le palapala, atonu o le a sili atu ona fesoasoani le Atua i le tagata e oso i fafo e tulei nai lo o le tagata e nao le siiae o lona leo i le tatalo—e tusa lava po o le a le lelei o le lauga” (“Two Principles for Any Economy,” Ensign po o le Liahona, Nov. 2009, 56–57).

TalanoaMafaufau i ni faataitaiga o ni tagata galulue malosi i lou olaga. O a ni uiga faaalia e tutusa ai nei tagata?

E Tatau Ona Faaitiitia Lo Tatou Faalagolago Atu Faaletino i Isi

FaitauNa toe aoao mai Peresitene Spencer W. Kimball, “O le tiutetauave o le tagata lava ia mo le soifua manuia i fegalegaleaiga, faalelagona, faaleagaga, faaletino, po o le tamaoaiga ua pau muamua atu lava lea i ona luga, lona lua o lona aiga, ma lona tolu o le Ekalesia pe afai o ia o se tagata faamaoni. E leai se tagata moni o le Au Paia o Aso e Gata Ai, o loo mautu le malosi faaletino ma le mafaufau, o le a na tuueseina atu lana avega po o le soifua manuia o lona aiga i se isi tagata. O le a lava le umi na te gafatia ai, e tusa ai ma musumusuga a le Alii faatasi ai ma ana lava galuega, o le a ia tuuina atu mo ia lava ma lona aiga ia mea faaleagaga ma le faaletino e moomia mo le olaga” (Aoaoga a Peresitene Spencer W. Kimball [2006], 116).

ola tutoatasi i mea tautupe

Na aoao mai Elder Dale G. Renlund, i le siina mai o le saunoaga a Elder Wilford W. Andersen: “O le faateleina lava o le lē vavalalata o le sootaga o lē e foai atu ma lē e mauaina, o le faateleina foi lena o le atiaeina e le tagata e mauaina se mea o le lagona, ua agavaa e maua fua se mea” (“Ina Ia Mafai Ona Ou Aumai o Tagata Uma ia te A’u,” Ensign po o le Liahona, Me 2016, 39). O le agavaa o le lagona lea e alagatatau ona e maua se mea e aunoa ma le faia o le faatinoga tatau ma atoatoa e manaomia ia maua ai. O le faafeagai lea o le tiutetauave. A e lagona e te agavaa i faamanuiaga faaletino, e aluese mai le Agaga mai lou olaga. A o e faalatalata atili atu ia Keriso, o le a faatumuina lou loto i lagona o le tiutetauave mo lo oe lava manuia, ma o le a mouese ai lagona o le agavaa [e maua fua se mea].

Talanoa

• E mafai faapefea e le faalagolago i isi ona taotaomia ai lo tatou lava tuputupu ae patino?

• Aisea e taua ai le aloese mai le faalagolago i polokalama a le malo po o tagata lautele?

• O a isi lamatiaga ia e o mai faatasi ma le faalagolago atu i isi, e aofia ai aiga, mo o tatou manaoga patino?

2. Galulue Faatasi e Pulea Tupe

Mafaufau LolotoO faapefea ona aafia oe i le faaleagaga ma le faalelagona ona o au mea tautupe?

FaitauO se tasi o meafaigaluega sili ona taatele ma malosi a Satani mo le talepeina o aiga, o le faatamala lea i mea tautupe ma le mamafatu lea e o mai faatasi ai. Ona o aiga e totonugalemu i le fuafuaga a le Tama Faalelagi (tagai O Le Aiga: O Se Folafolaga i le Lalolagi), e taua lo tatou aloese mai le tautuuai, le talitonuina, ma le ita i totonu o o tatou aiga. E tusa pe ua e faaipoipo pe nofotoatasi, o le atamai i tulaga faatausimea i mea tautupe, e mafai ona vavalalata ai e pele i le tasi ma le isi ma i le Atua, ma e mafai ona avea ma se malupuipuiga mai le amioleaga; o se taumafaiga aufaatasi i le tulaga faatausimea i mea tautupe e iu ina aumaia ai le lotofaafetai, lotogatasi, ma le toafilemu.

TalanoaAisea e taua ai i taitoalua ona tasi i tulaga o mea tautupe?

FaitauO taitoalua e masani ona o mai mai aganuu, tamaoaiga, ma tapuaiga eseese. Atonu e eseese o latou tu ma agaifanua, auala e tausia ai tamaiti, ma faiga masani i le faaaluina o tupe. Atonu ua masani lava le tasi toalua i le fiafia e mataitu tupe faaalu ma mulimuli i se paketi, ae o le isi o le paketi o se mea faigata ma faalavelave. O lenei mea e ono afua ai ni feeseeseaiga. Ae peitai, o le taliaina o eseesega o le tasi ma le isi ma faalogo moni ma le alofa ma le lotomaualalo, o le a maua ai se siosiomaga o le lotogatasi. Afai e te nofotoatasi, e taua ona faamaoni ia te oe lava ma ia aofia ai le Alii i au faaiuga i tulaga faatausimea i mea tautupe.

E toatele ulugalii e talitonu, o le vaifofo i o latou faafitauli tautupe o le faateleina o a latou tupe maua. Ae peitai, o se faiga fevaevaeai i le puleaina o tupe, e sili atu lava ona faataumaoia ai se mafutaga nai lo o se tupe maua laitiiti po o le leai o ni punaoa tautupe.

TalanoaE mafai faapefea ona sili atu le faataumaoia o le fevaevaeai i mea tautupe nai lo o se tupe maua laitiiti po o le leai o ni punaoa?

FaitauNa aoao mai Elder Marvin J. Ashton, “O le puleaina o mea tautupe a le aiga, e tatau ona taufai fai e le va o le tane ma le ava i se agaga o le faamaoni ma le faatuatuaina. O le pulea toatasi o tupe e le isi tagata o le toalua o se pogai o le malosi ma le pule, e mafua ai le le tutusa i le faaipoipoga ma e le talafeagai. Ae o le faafeagai, afai e malie lava se soa faaipoipo e aveese mai o ia lava mai le puleaina o mea tautupe a le aiga, o lena mea o se teenaina o le tiutetauave tatau” (One for the Money: Guide to Family Finance [tamaitusi], 2006, 3).

TalanoaE faapefea e le lotogatasi ma lou toalua ona suia lou olaga?

O Le Atamai i le Tulaga Faatausimea i Mea Tautupe e Saunia ai i Tatou mo le Faaipoipoga

FaitauPe o e sauni e faaipoipo pe o e nofotoatasi, tatala le faaipoipoga, pe ua oti lau tane, o le atamai i tulaga faatausimea i mea tautupe e mafai ona fesoasoani ia te oe ia saunia ai mo mafutaga i le lumanai. O le toatele o ulugalii fou e oo i le mamafatu o le aitalafu ma masani leaga o le faaalu [o tupe] e aumaia i totonu o le mafutaga, e mafai ona mafua ai se amataga faigata i a latou faaipoipoga. O le taumafai e atinae mausa lelei i le faaalu [o tupe], faaputu teugatupe, ma faaitiitia pe aveese aitalafu, o le a valaaulia ai le Agaga i totonu o le lua mafutaga ma faia ai se faavae mo se faaipoipoga faamanuiaina.

TalanoaE mafai faapefea e le avea ma se tausimea atamai i mea tautupe i le taimi nei ona fesoasoani e te saunia ai e avea ma se toalua lelei atu i le lumanai?

Gaoioiga (10 minute)

Laasaga 1: Tali faamaoni i fesili taitasi nei.

O A Ni O’u Lagona e uiga i Au Tupe Faaalu?	Lei faia lava	O nisi taimi	Tele o taimi	Taimi uma
Ma te filifili ma le Alii i a’u mea tautupe.	□	□	□	□
Ma te fefautuaai ma lo’u toalua i a ma’ua mea tautupe.	□	□	□	□
O mea tautupe o se pogai o le [oo i le] mamafatu patino.	□	□	□	□
Ou te nanaina (po o le maimau pe ana mafai ona ou nanaina) le faaaluina [o tupe] mai lo’u toalua.	□	□	□	□
Ma te feeseeseai ma lo’u toalua i mea tautupe.	□	□	□	□

Laasaga 2: Auauai ona faasoa i au tali o loo i luga ma lou toalua po o se soa. Afai e le o i ai lou toalua, fai atu ia te ia e faauma le suesuega lea e tasi pe a lua i ai faatasi, ona iloilo lea o lua tali. Ia manatua e faalogo ma le alofa ma le lotomaualalo i tali a lau soa.

Mafaufau LolotoE mafai faapefea faaogatasi faalelei oe lava ma lou toalua ma le Alii?

3. Fai E Le Aunoa Fonotaga Faaleaiga

FaitauO le vaiaso ua tea na tatou talanoaina ai le taua o le filifili faatasi ma le Alii. E fia fesoasoani mai o Ia ina ia e manuia. E faaopoopo atu i le filifili faatasi ma le Alii, ua aoao mai e perofeta le taua o le faia e le aunoa o fonotaga faaleaiga.

Maimoa“Family Councils,” o loo maua i le srs.lds.org/videos. (Leai se vitio? Faitau le itulau 31.)

aikona o le vitio

TalanoaE mafai faapefea ona faamanuiaina oe ma lou aiga i le faia o fonotaga faaleaiga?

Talanoa i le Tulaga Faatausimea i Mea Tautupe i le Tou Fonotaga Faaleaiga

FaitauO se fono faapitoa e le aunoa i le va o le tane ma le ava, o se nofoaga lelei tele lea e talanoa ai le tulaga faatausimea i mea tautupe. Afai e te nofotoatasi, filifili se matua po o isi tagata o le aiga, tagata e potu faatasi, faufautua, po o se uo ma fai e le aunoa se fonotaga faamaoni ma le tagata e uiga i au mea tautupe. Afai ua e faaipoipo, atonu o le a manaomia ona e faia ni talanoaga taua ma lou toalua i le aluga o lenei kosi. A uma lenei kosi, o le faia e le aunoa o fonotaga faaleaiga, o le a fesoasoani e faaauau ai pea ona faateleina le lotogatasi ma faateleina le ola tutoatasi.

O se tasi o ou tautinoga i lenei vaiaso o le, ia atofa se taimi e faia ai e le aunoa fonotaga faaleaiga. O se vaega o lau fonotaga faaleaiga, e tatau ona e talanoa ai i mea tautupe. Atonu e te manao e faaaoga le faataatiaga o le “Faataitaiga o le Talanoaga i le Fonotaga Faaleaiga” o loo i le itulau e sosoo ai, e taiala ai le vaega lenei o le tou fonotaga faaleaiga.

Faataitaiga o le Talanoaga i le Fonotaga Faaleaiga

Ia mautinoa e amata ma faaiu i se tatalo e valaaulia ai le Agaga.

Vaega 1: Iloilo

• O lava lou mataituina o au tupe faaalu? O a ni mea ua e aoaoina e uiga i lou faaaluina [o tupe]? E mafai faapefea ona e faaleleia le faagasologa o le mataituina o au tupe faaalu?

• Talanoa i taunuuga o le suesuega i le itulau 26.

Vaega 2: Fuafua

• E mafai faapefea ona faaleleia au fesootaiga e uiga i au mea tautupe?

• O le a se mea e mafai ona e faia, pe a manaomia, e aveese ai lou faalagolago faaletino i le fesoasoani a aiga, malo, ekalesia, po o tagata lautele?

Faatasitasi, i Po Uma

E toalima tamaiti ma le tele o tausaga ona faatoa ma iloa lea o lenei mea (masalo e silia ma le 20 tausaga), ae o le faia o tatalo faaleulugalii i po uma—nao ia lava ma au, ma le leo, tootutuli ma uulima—o se tasi lea o mea aupito mamana na ma faia ia manuia ma faamalosia ai le ma mafutaga. A malaga se tasi o i maua, ma te faia i le telefoni!