Aoao—Taimi Aofai: 45 Minute

Talanoaga o le Aso:

4 Sefe ma Teu Faafaigaluega mo le Lumanai

ata auiliili o le fale

Faafanua o le Faamanuiaina i le Tulaga Faatausimea i Mea Tautupe

FaitauA faalogo tagata i le upu teu faafaigaluegaina, atonu latou te mafaufau i se fogafale pisapisao ma vavao o tagata e faatauina atu ola ma noataga. E ui o na mea o se vaega o le teu faafaigaluega, ae o le teu faafaigaluegaina foi, o le gaoioiga o le tuuina o le taimi, taumafaiga, po o tupe i se mea ma faamoemoe e maua ai se ituaiga o tupe maua faasili. I lenei faauigaga, o le teu faafaigaluega o se elemene o le ola tutoatasi.

I le mataupu lenei, o le a e suesueina ai ni auala se tolu e teu faafaigaluega ai.

1. Sefe le tupe

2. Mafaufau ia i ai sou lava fale.

3. Saili aoaoga

1. Sefe le Tupe

Mafaufau LolotoFaaalu ni minute se lua e mafaufau ai i le fesili lenei, ma tusi i lalo ou manatu: O le a se mea ou te ono sefe ai [mo le mauaina]?

FaitauO se tasi o auala e sili ona faigofie e teu faafaigaluega ai o le sefe lea o tupe. Sa e galue e faaputu se tupe faaleoleo mo mea e tutupu faafuasei, e amata atu i se tau o tupe faaalu i se masina, ona faaputu ai lea ia maua le tau o tupe faaalu i le tolu i le ono masina. Vaai faalemafaufau i avanoa pe afai e faaauau pea ona e sefea e tusa lava pe uma ona e faaputuina se tupe faaleoleo tele mo mea e tutupu faafuasei.

Na aoao mai Elder L. Tom Perry, “Totogi oe lava i se aofaiga e muai fuafuaina ia alu sao i lau teugatupe. … O se mea e faateia ai au, o le toatele o tagata e galulue i o latou olaga atoa mo le faatauoloa, le ana le fale, le kamupani eletise, le tagata faatau taavale afi, ma le faletupe, ae tau le mafaufau lava i a latou taumafaiga ma leai se mea latou te totogia ai i latou lava” (“Becoming Self-Reliant,” Ensign, Nov. 1991, 66).

E pei ona faaalia muamua atu i le faataitaiga i le fagu, e taua ona “totogi muamua i tatou lava” e ala i le tuu o se tupe i le teugatupe. O le a fesoasoani lenei mea ia te oe e faia ai se puipuiga tautupe.

fagu o le faiga masani

fagu o le faiga o le ola tutoatasi

TalanoaFaaalu se minute e toe iloilo ai le faataitaiga o le fagu. O le a le mea e sili ona anoa ia te oe e uiga i lenei faataitaiga? O faapefea ona e faaalia le faatuatua e ala i le faiga o le ola tutoatasi?

2. Mafaufau Ia I Ai Sou Lava Fale

FaitauO le faatauina o se fale o le isi lea auala e teu faafaigaluega ai. Ae peitai, e le o tagata uma e anaina se fale, ma o le tele o taimi o le mautotogi o se filifiliga lelei atu lea.

Gaoioiga (10 minute)

Laasaga 1: Vaevae i ni vaega taitoalua i le taitoatolu ma faaalu ni nai minute e iloilo ai itu lelei ma itu le lelei o loo lisiina i lalo, o le anaina ma le mautotogi o se potu laitiiti po o se fale. Ia faaopoopo foi i ai nisi o ou lava manatu i le lisi o loo i lalo.

Laasaga 2: Ona toe o mai faatasi ai lea ma talanoa i fesili nei: O le a se mea ua e aoaoina? O a ni itu lelei ma ni itu le lelei faaopoopo na e tusia i lalo.

Itu Lelei o le Mautotogi [Lisi]	Itu Le Lelei o le Mautotogi
Laitiiti atu le tau o le tausiga	E le “anaina”
Faigofie ona me’i ese	E ono sii le lisi

Itu Lelei o le Anaina [o se Fale]	Itu Le Lelei o le Anaina [o se Fale]
E ono faateleina le aoga (taua)	Tau o le tausiga
E amata ona e anaina le fale	E ono faigata ona faatau ese ma me’i ese

FaitauMo i latou o mafaufau e anaina se fale, manatua ia mataupu faavae nei e lua:

• Ia nao le taimi lava ma le nofoaga e talafeagai mo oe e faatau ai se fale.

• Ia faatau nao le fale e mafai ona e gafatia lelei.

Ia tatou talanoa nei i nisi o itu e mafai ona aafia ai nei mataupu faavae.

Gaoioiga (5 minute)

Tali le tagata lava ia i fesili o loo i lalo. Afai e le mafai ona e tali ioe i nei fesili, atonu la o lou tulaga i le taimi lenei, o se filifiliga lelei atu le mautotogi nai lo o le faatau.

Pe Sili Atu Ona Fetaui mo Au le Faatau Nai Lo o le Mautotogi?
□ Pe o ou saoloto mai aitalafu a le tagata faatau?
□ Pe ua i ai sau tupe faaleoleo mo le 3- i le 6-masina mo mea faafuasei.
□ Pe o ou ola i se paketi ma pe o ou iloa pe fia le peimeni e mafai ona ou gafatia lelei?
□ Pe ua lava se tupe ua ou sefeina mo le totogi amata o se fale e faatau faaaitalafu?
□ Pe o mautu sau galuega?
□ Pe o ou fuafua e anaina se fale mo le pe a i le 5 tausaga?
□ Pe ou te gafatia ia tau faaopoopo o le tausiga ma le inisuaina o lou fale ma le totogiina o lafoga mo fale ma fanua?

TalanoaAisea e taua ai le fesili ifo ia te oe lava o nei fesili ao lei faatauina se fale?

FaitauO le toatele o tagata e faatauina se fale e faaaoga ai le nonogatupe e taua o le mokesi. O lenei mokesi o le aitalafu, ma o le a e totogia ai le tului. E faamoemoe e te faia ni peimeni faalemasina ma toe totogi atu le nonogatupe.

Mo le mautu mo se taimi umi i mea tautupe, o lau peimeni faalemasina o le mokesi, e le tatau ai ona silia ma le 25 pasene o lau tupe maua faalemasina. Faaaoga le mea lenei e fai ma taiala mo le mea e mafai ona e gafatia ona totogi, nai lo o le mea e manao le ofisa faaunetupe e te nonoina.

Gaoioiga i le Katuleta [Calculator]

I le Iunaite Setete, o le afa o tupe maua a le aiga i le 2013 sa o se mea o le $52,000. O le a le tele o le tupe e tatau ona faaalu i masina taitasi e se aiga e maua le $52,000 i se tausaga mo le latou mokesi?

I le avea ai o se vaega, ta faamatalaga nei i a outou katuleta. Taofi pe a uma laasaga taitasi ia mautinoa ai e tutusa tali a tagata uma ao lei see atu i le isi laasaga.

Laasaga	Fuafuaga
25% o le 52,000 = tupe faaalu mo le mokesi i le tausaga	.25 x 52,000 = 13,000
13,000 vaevae i le 12 masina = tupe faaalu mo le mokesi i le masina	13,000 ÷ 12 = 1,083

O se aiga e i ai lenei tupe maua o se mea atamai le latou mautinoa ia le silia ma le $1,100 i le masina le peimeni o le latou fale.

Ia fuafua nei taitoatasi pe faatasi ma lou toalua (pe a mafai), le 25 pasene o lau tupe maua i le masina e mulimuli i laasaga o loo i luga. E le manaomia ona faasoa atu lenei numera i se isi tagata o le vaega pe afai e te le manao ai. Tusi lau tali iinei .

TalanoaO le a le uiga ia te oe o le faatauina o se fale e mafai ona e gafatia lelei?

FaitauIa manatua e i ai foi isi tupe faaalu o le anaina o se fale e ese mai i le mokesi. A i ai sou fale, o oe e nafa mo le tausiga. E taei, leaga, ma o nisi taimi e manaomia ai le faafou o mea. E masani lava ona fautuaina e faufautua o mea tautupe, e sefe ia le itiiti ifo ma le 1 pasene o le tau o lou fale i vaiaso taitasi mo le tausiga.

Siaki o Ponesi

O le taimi tonu lava na muai amata ai ona tatou aoao e uiga i le tulaga faatausimea i mea tautupe, na ou maua ai se galuega fou e totogi faalekuata ni ponesi. Faatasi ai ma lena tupe faaopoopo, sa ma filifili ai e faaaoga se vaega mo le teugatupe ae o le vaega e totoe mo se peimeni faaopoopo o le mokesi. Sa ma faia le matematika, ma o lenei peimeni faaopoopo i kuata taitasi, o le a ma sefeina ai le faitau afe o tala i le tului!

Alu ese mai le Aitalafu o le Mokesi

FaitauE pei ona faamalamalama muamua atu, o se mokesi o se nonogatupe—o le aitalafu—ma e te totogia ai le tului. O le toe taua o aoaoga a Peresitene J. Reuben Clark, na saunoa ai Peresitene Ezra Taft Benson, “Ia tulimatai atu ulu uma o aiga ia anaina sona lava fale, ia saoloto mai le mokesi” (“Prepare for the Days of Tribulation,” Ensign, Nov. 1980, 33). O le vave totogi faauma o se mokesi e ono manaomia ai ni ositaulaga, ae o le vave lava e te totogi faauma ai, o le tele foi lea o le tupe e te totogia i le tului e te sefeina. E lua auala e totogi faavave ai lau mokesi.

• Totogi faasili

• Faatulaga se nonogatupe e puupuu se taimi e totogi ai ma maualalo le pasene o le tului.

O le totogi faasili o le aofaiga autu e mafai ona sefe ai le tele o tausaga o peimeni ma le fia sefulu afe i le tului. Mo se faataitaiga, afai e i ai sau mokesi e 150,000, mo le 30-tausaga ma se pasene o le tului e 4.5, o le a e totogia le 123,610 o le tului i luga o le umi o le nonogatupe. Vaai i le siata o loo i lalo e iloa ai pe o le a le tele o le taimi ma le tupe e mafai ona e sefeina e ala i le totogiina o le 100 po o le 200 faaopoopo i le masina.

	100 faaopoopo i le masina	200 faaopoopo i le masina
Taimi e sefe ai	Toeitiiti lava 7 tausaga	Toeitiiti lava 11 tausaga
Tupe e sefe ai	29,715	47,462

O le isi filifili e totogi faauma vave ai se mokesi o le faia lea o se mokesi e puupuu se taimi e totogi ai. O mokesi e pupuu taimi e totogi ai, e masani ona sau ma se pasene maualalo ifo o le tului. E maualuga atu lau peimeni i le masina, ae o le a e sefeina ai tausaga o peimeni ma le faitau afe i le tului.

Sei o tatou faatusatusaina lea mokesi e tasi e pei o le taimi muamua, ae o le taimi la lenei, faatasi ai ma se nonogatupe e 15 tausaga. O le uluai faataitaiga o se mokesi e 150,000, i le 30 tausaga ma se pasene o le tului e 4.5. Sei o tatou faatusatusaina lena i le mokesi e 15 tausaga ma se pasene o le tului e 3.5.

	Mokesi e 30 tausaga	Mokesi e 15 tausaga
Pasene o le tului	4.5%	3.5%
Peimeni i le masina	760	1,072
Aofai atoa o tului na totogi	123,610	43,018
Taimi e uma ai ona totogi	30 tausaga	15 tausaga

I le tulaga lenei, o se mokesi e 15 tausaga o lona uiga o se peimeni i le masina e tusa ma le 312 e toe faaopoopo ai, ae o le a e sefeina ai le:

• 15 tausaga o peimeni o le mokesi.

• E silia ma le 80,000 i le tului.

TalanoaO le a se mea o le a e naunau e tuu ina ia totogi faasili ai lau mokesi po o le maua o se mokesi e puupuu se taimi e totogi ai ina ia e vave saoloto ai mai le aitalafu?

3. Saili Aoaoga

FaitauO aoaoga o se isi lena ituaiga o inivesi [teu faafaigaluega]. O le mea masani lava, o aooaga faaopoopo o le a i ai sona tau. Afai o le a e inivesi i aoaoga, ia mautinoa o le a taitai atu ai i se galuega lelei atu, ina ia lelei se tupe e toe maua mai i lau inivesi. Na fautua mai Peresitene Gordon B. Hinckley e faapea, “o le a tele lava ina totogi oe e le lalolagi i le mea e manatu o lou aoga lea, ma o le a faateleina lou aoga pe a e maua se aoaoga ma maualuga ou tomai i lau matata filifilia” (“A Prophet’s Counsel and Prayer for Youth,” Ensign, Jan. 2001, 4).

O nisi taimi atonu e talafeagai ai le oo i le aitalafu ina ia maua ai ni aoaoga, ae o loo i ai foi le tele o isi auala e totogi ai mo aoga. Suesue i isi avanoa uma ae e te lei liliu atu i le aitalafu. Afai e te oo i le aitalafu mo aoaoga, ia taumafai e totogi faauma i se vave e mafai ai.

O le vaega o le ola tutoatasi o le Aoga mo se Galuega Lelei Atu, atonu o se filifiliga lelei lea mo oe pe a mafaufau e inivesi i aoaoga.

TalanoaE faapefea ona avea le aoga o se inivesi ia te oe lava?

Talanoa i le Sefeina o Tupe, Tulitulimatagauina o le Anaina o se Fale, ma le Inivesi ia te Oe Lava e ala i Aoaoga i le Tou Fonotaga Faaleaiga

FaitauO se tasi o au tautinoga i le vaiaso lenei o le, ia talanoa i le sefe, anaina o se fale, ma le inivesi i au aoaoga i le taimi o le fonotaga faaleaiga. Talanoa i mea e te manao e sefe i ai, pe e tatau ona e mautotogi pe faatauina se fale (po o le a se auala e mafai ona e amata totogi faavave uma ai lau mokesi), ma o a foi ni sini faaleaoaoga, pe afai e i ai, e tatau ona e galue i ai. Atonu e te manao e faaaoga le faataatiaga o le “Faataitaiga o le Talanoaga i le Fonotaga Faaleaiga” o loo i lalo.

Faataitaiga o le Talanoaga i le Fonotaga Faaleaiga

Ia mautinoa e amata ma faaiu i se tatalo e valaaulia ai le Agaga.

Vaega 1: Iloilo

• O le a se mea e te manao e sefe i ai i se aso? Iloilo lau tali i le fesili mafaufau loloto o loo i le itulau 167.

• O nisi o itu lelei ma itu le lelei o le anaina o se fale e faatusatusa i le mautotogi? Iloilo le gaoioiga i le itulau 169.

Vaega 2: Fuafua

• E mafai faapefea ona e sefe mo mea e te manao i ai i le lumanai?

• Afai e te le o anaina se fale i le taimi lenei, pe e tatau ona e mafaufau e faatau se fale? Pe e tatau ona faaauau pea ona mautotogi mo le taimi nei?

• Afai ua e anaina se fale i le taimi nei, e faapefea ona e galue e vave totogi faauma lau mokesi? Mata o le faatau ese o lou fale ae mautotogi mo le taimi nei, e fetaui lelei lea mo lou tulaga o loo i ai nei.

• O le a le ituaiga aoaoga po o aoaoga faaopoopo, pe afai e i ai, e tatau ona e inivesi ai mo se galuega lelei atu?