1 Samuel 17

David ken Goliat

Panangsango iti karit iti higante

Dagiti Filisteo a mangdardarup kadagiti Israelita. Tunggal bigat kinarit ti higante a Filisteo nga agnagan iti Goliat ti ania man nga Israelita a makiranget kenkuana. Dakdakkel ken nataytayag ni Goliat ngem iti asino man, ken narungsot daytoy. Nagkawes daytoy iti napuskol a kabal ken nakasakbit iti maysa nga espada, gayang, ken dakkel a kalasag. Awan ti agtured a makiranget kenkuana.

1 Samuel 17:1–11

Maysa nga agtutubo a pastor ni David nga addaan iti pammati iti Apo. Soldado dagiti in-inauna a kakabsatna a lallaki iti buyot ti Israel. Maysa nga aldaw, inyalaan ni David iti sumagmamano a taraon dagiti kakabsatna a lallaki. Idi nakadanon iti kampo ti buyot, nangngegna ti karit ni Goliat.

1 Samuel 17:20–23

Sinaludsod ni David kadagiti soldado no apay nga awan ti nangsalaknib iti Israel. Nagpungtot dagiti kakabsatna a lallaki ket imbagada kenkuana a mapan agaywan kadagiti karnero. Ngem ammo ni David a salaknibanto ti Apo ti Israel.

1 Samuel 17:24–30

Ammo ni Ari Saul ti pammati ni David, isu nga indawatna a makita ni David. Imbaga ni David ken ni Saul a saan a mabuteng a makiranget ken ni Goliat. Inlawlawag ni David nga iti naminsan idi inay-aywananna dagiti karnerona, napatayna ti maysa a leon ken maysa nga oso. Sinalakniban ti Apo isuna idi, ket ammo ni David a ti Apo ti mangsalaknib kenkuana ita.

1 Samuel 17:31–37

Inted ni Saul ti kabalna ken ni David. Ngem saan nga umanay kenkuana, isu nga inuksob ni David daytoy. Inkeddengna ti makiranget nga awan ti ania man a kabal.

1 Samuel 17:38–39

Nangurnong ni David iti lima a nalinis a batbato ket inkabilna dagitoy iti maysa a supot. Innalana ti palsiitna ken ti sarukod ti pastor ket napanna sinango ni Goliat.

1 Samuel 17:40

Idi nakita ni Goliat ni David, nagpukkaw ket inumsina daytoy. Kinunana a saan a maabak isuna ti maysa a pastor nga ubing a lalaki. Impukkaw met ni David nga agtalek a ti Apo ti mangsaluad kenkuana! Kinuna ni David nga abakenna ni Goliat tapno maipakita iti kinaindaklan ti Apo.

1 Samuel 17:42–47

Nagtaray nga immasideg ni David ken ni Goliat. Alisto nga impallatibongna ti bato babaen iti palsiitna. Nagdisso ti bato iti muging ni Goliat, ket nadalupo iti daga ti higante a lalaki. Tinulongan ti Apo ni David a mangabak ken ni Goliat nga awanan iti espada wenno kabal.

1 Samuel 17:48–50

Idi nakita dagiti Filisteo a natayen ni Goliat, nagtarayda a sibubuteng. Nangabak dagiti Israelita iti dangadang. Nagtalek ni David iti Apo, ket sinalakniban ti Apo iti Israel.

1 Samuel 17:51–53