Pagpangandam alang sa Umaabot nga Edukasyon ug Pagpanarbaho: Leksiyon 191

Pagpangita og Mentor

Ang Ginoo Magbutang og Matarong nga mga Ehemplo diha sa Atong Dalan

Dihang pamalandongan nimo ang imong kinabuhi, giunsa ka pagtabang sa imong kasaligang mga mentor? Gikan kang Moises ug Josue ngadto kang Eli ug Samuel, gipakita sa mga istorya sa kasulatan ang kaimportante sa mga relasyon sa pagmentor. Kini nga mga istorya nagtudlo kanato sa atong haom nga mga mentor, ang Langitnong Amahan ug si Jesukristo. Kini nga leksiyon makatabang sa mga estudyante nga maghimo og plano alang sa pag-ila ug pagpakigkonektar niadtong posibleng mahimong mentor sa edukasyon ug karera.

Pagpangandam sa estudyante: Dapita ang mga estudyante nga maghunahuna sa ilang mga tumong sa edukasyon ug karera karon ug sa umaabot. Hangyoa ang mga estudyante sa paghimog listahan sa pipila ka kasaligang hamtong nga pwedeng magsilbi nilang mga modelo o mga mentor aron tabangan silang makab-ot kini nga mga tumong ug dal-a ang listahan ngadto sa klase.

Posibleng mga Kalihokan sa Pagkat-on

Kinsay gusto nimong sundon?

Ikonsiderar ang pagsugod sa klase pinaagi sa pagdapit sa mga estudyante nga ihanduraw nga sila kabahin sa usa ka grupo sa managhigala kinsa hapit na mogsugod og panaw sa usa ka lapad nga lasang. Giingnan ang grupo nga lisod ang panaw, pero nindot kaayo ang ilang adtoan ug takos sa ilang paningkamot. Gidapit ang grupo nga mopili og usa ka tawo nga mogiya nila.

• Unsa ang pipila ka kwalipikasyon nga gusto nimo sa imong tiggiya? Ngano man?

• Unsaon nimo pagtubag kon mosugyot ang usa ka sakop sa grupo nga wala mo magkinahanglan og tiggiya?

Dapita ang mga estudyante nga hunahunaon kon sa unsang paagi kini nga senaryo magamit diha sa ilang mga plano sa edukasyon ug karera. Pwede nimong hisgotan nga kini nga leksiyon motutok sa pag-ila ug pagkontak og mga mentor.

Timan-i: Naa tingali kay mga estudyante nga mobati nga wala ra sila magkinahanglan og mentor. Pwede kang mangita og kahigayonan nga tabangan silang masabtan ang kaimportante sa bili sa mga mentor ug mga dapit diin makadawat sila og tabang karon. Tabangi ang mga estudyante nga, sama sa usa ka tiggiya, ang mentor makahatag og mga kasinatian ug panglantaw nga motabang nato sa paghimog mga desisyon bahin sa edukasyon ug karera.

Tun-i kini nga mga pahayag nga pangitaon kon sa unsang paagi ang Ginoo makagiya kaninyo pinaagi sa tambag sa mga mentor.

Si Brother Milton Camargo, kanhi Unang Magtatambag sa Kinatibuk-ang Kapangulohan sa Sunday School, mingon:

Moabot ra sa punto sa imong panaw [diha sa] edukasyon … nga tingali mobati nga nabug-atan sa daghan kaayo mga butang nga buhaton. Palihog hinumdomi nga wala ka mag-inusara atol sa imong mga kalisdanan. Gihatagan ka sa Ginoo og daghang tawo kinsa makasuporta nimo—mga sakop sa pamilya; mga lider sa Simbahan; mga higala; ug ang imong mga magtutudlo, mga mentor, o mga tigtudlo. Ug siyempre, ang Ginoo sa Iyang Kaugalingon andam nga mohupay ug molig-on kanimo. (“Persevere with the Lord’s Help” [debosyonal sa BYU–Pathway Worldwide, Mar. 1, 2022], 2, byupathway.edu)

Si Elder Ronald A. Rasband sa Korum sa Napulog Duha ka Apostoles mitudlo:

Ang [mga mentor] nag-una sila kanato, ug nahibalo sila sa dalan. … Ang mas eksperyensyado, kasaligang indibidwal magsilbi nga epektibong giya ug tigtambag sa dili kaayo eksperyensyado nga tawo, sa pagtabang nga mahulma ang panabot nianang tawhana ug sa pagtudlo og mga baroganan nga maghimo kaniyang mas epektibo, mas lig-on, mas maalamon, ug mas bililhong sulugoon sa Dios” (“Thy Friends Do Stand by Thee” [debosyonal sa Brigham Young University, Mar. 7, 2010], 3, speeches.byu.edu).

• Unsay mipatigbabaw nimo niini nga tambag?

  Human makatubag ang mga estudyante, isulat ang mosunod nga kamatuoran diha sa pisara: Magiyahan kita sa Ginoo pinaagi sa kasaligang mga mentor.

  Dapita ang mga estudyante sa pagpamalandong sa mosunod:

• Kanus-a kamo o ang inyong kaila nakadawat og tabang gikan sa usa ka mentor?

• Unsa ang pipila ka dapit sa imong pagplano sa edukasyon o karera ang makabenepisyo sa paggiya sa Ginoo pinaagi sa tambag sa mentor?

Pwede nimong ipakigbahin ang ehemplo sa usa ka tawo nga nagsilbing mentor nimo. Ikonsiderar ang pagpakigbahin sa inyong kasinatian sa pagpakigtinabangay uban sa maong tawo ug kon giunsa kamo nila pagtabang nga makita ang giya sa Manluluwas diha sa inyong kinabuhi.

Samtang magtuon kamo karon, dapita ang Espiritu Santo nga tabangan kamong mailhan ang kasaligang mga mentor sa inyong kinabuhi nga makatabang ninyo sa pagtinguha sa giya sa Ginoo samtang maghimo ka og mga desisyon bahin sa mga plano sa edukasyon ug karera.

Mga ehemplo sa kasulatan bahin sa pag-mentor

Makatabang tingali ang pagpakigbhin nga usa sa mga titulo nga gihatag ngadto sa Langitnong Amahan mao ang “Tawo sa Tambag,” (tan-awa ang Moises 7:35). Pwede nimong dapiton ang mga estudyante nga basahon ang Juan 5:19–20 ug Juan 8:26–28, nga pangitaon kon giunsa pag-mentor sa Langitnong Amahan ang Iyang Anak, si Jesukristo. Mahimo kang mangutana og sama sa:

• Unsay makatabang nato nga makasabot bahin sa panginahanglan sa Manluluwas og usa ka mentor?

Isulti tingali sa mga estudyante nga nakakat-on si Jesus gikan sa ehemplo sa Iyang Amahan ug gitinguha ang tambag ug paggiya sa Iyang Amahan.

Human makapakigbahin ang mga estudyante, pwede nimong ihatag ang mosunod nga mga ehemplo sa kasulatan sa Ginoo nga naggiya sa Iyang katawhan pinaagi sa dinasig nga mga mentor. Pwedeng makigtinabangay ang mga estudyante uban ang usa ka pares ug magpilig usa ka asoy nga tun-an ug tubagon ang mosunod nga mga pangutana.

Moises ug Josue: Deuteronomio 3:21–22 (Gigiyahan ni Moises si Josue), 28 (ang mga instruksiyon sa Ginoo ngadto kang Moises)

Ang propetang babaye nga si Deborah ug si Barac, ang pangulo sa iyang kasundalohan: Mga Maghuhukom 4:4–10, 14; Mga Maghuhukom 5:1–3 (pagsaulog sa kadaogan sa Israel)

Ang high priest nga si Eli ug ang batan-ong propeta nga si Samuel: 1 Samuel 3:1–10

• Giunsa paghatag sa Ginoo ang Iyang giya pinaagi niini nga mentor?

• Sa unsang paagi kini nga asoy makatabang sa usa ka tawo nga nagduhaduha sa pagpangayog tabang sa usa ka mentor?

Ang mosunod nga kalihokan makatabang sa mga estudyante nga makaila ug makahimo og plano sa pagbaton og koneksiyon ngadto sa potensyal nga mga mentor.

Ihatag ang handout nga “Pagpangita og Mentor” para sa kada estudyante. Bahina ang mga estudyante ingon nga mga grupo o managpares aron kompletohon ang handout. Ingon nga alternatibo, pwede nimong ibutang sa tibuok classroom ang kada seksiyon sa handout ug dapita ang mga estudyante nga liboton ang classroom ug kompletohon ang kada kalihokan.

Ang Ginoo mogiya kanato pinaagi sa kasaligang mga mentor

Human ang igong panahon, dapita ang pipila ka estudyante nga ipakigbahin ang ilang gihisgotan uban sa grupo. Dayon pwede nimong dapiton ang mga estudyante nga andam ipakigbahin ang ilang plano ngadto sa klase.

Makatabang tingali ang pagpasabot nga makatabang ang mga ginikanan, mga magtutudlo, mga tigtambag sa eskwelahan, ug uban pa aron sa pagtabang sa mga estudyante nga mailhan ang nahiangay nga mentor. Ang pipila ka branch, ward, ug stake tingali adunay mga espesyalista sa edukasyon ug karera. Ikonsiderar ang pagpasalig sa mga estudyante nga magbutang ang Ginoo og kasaligang mga tawo diha sa atong dalan nga magsilbing atong mga mentor. Ang pipila ka tawo kadali lang nga mga mentor ug makatubag sa atong pihong mga panginahanglan. Ang ubang mentor makigtinabangay nato sa mas taas nga panahon.

Dapita ang mga estudyante nga tinguhaon ang tabang sa Langitnong Amahan sa pagpangita ug pagkonektar ngadto sa mga mentor nga makatabang nila. Pamatuod nga ihatag Niya ngadto kanila ang tabang nga ilang gikinahanglan.

Dugang nga mga Kapanguhaan

Unsang mga kalidad akong gipangita sa usa ka mentor?

Sa pagpamalandong sa tawo nga nagsilbing mentor ni Presidente Henry B. Eyring, siya miingon:

Akong pasimplehon kon unsay inyong pangitaon para sa maayong potensyal nga mentor …

Una, ug ang labing importante, kinahanglang nakasabot siya sa kalibotan nga gisulayan nakog latas. … Dili lang kay basta nahibalo kon unsay tinuod bahin sa kalibotan; naa siyay mapa, maayong mapa. Ug nahibalo na ko karon kon unsang klaseha sa mapa ang labing importante—kadtong mapa nga mopakita sa kaimportante sa kon unsay naa sa umaabot. Dili lang kay basta nahibalo siya sa teyorya sa pagdesisyon ug sa organisasyonal nga teyorya; nahibalo siya kon asa paingon ang kombinasyon niini ug kon unsay laving maayo para niadtong naggamit sa maong kombinasyon samtang nagapanaw ta. Naa siyay kapasidad sa pag-ingon nga, “Kini o kana nga kontribusyon maghatag og kinadak-ang kausaban.” (“To Choose and Keep a Mentor,” [BYU University Conference, Ago. 26, 1993], 3, speeches.byu.edu).

Si Elder Robert D. Hales (1932–2017) sa Korum sa Napulog Duha ka Apostoles miingon:

Sa akong katuigan isip young adult, nangayo ko og tambag sa akong ginikanan ug sa matinud-anon, kasaligan nga mga tigtambag. Ang usa gikan sa lider sa priesthood; ang lain gikan sa magtutudlo nga mituo kanako. … Mainampuong mopili og mga tigtudlo kinsa naghunahuna sa inyong espirituhanong kaayohan. (“Pagdawat ug Pagbuntog sa mga Hagit sa Kalibutan Karon,” Liahona, Nob. 2015, 46)

Sa unsang paagi nga makabenepisyo ko gikan sa pagpangitag mentor?

Si Sister Susan L. Gong mitudlo:

Si Presidente Nelson nagtudlo, “Ang edukasyon mao ang kalainan tali sa paghandom nga makatabang kamo sa ubang tawo ug sa paghimo aron makatabang kanila.”

Ang maayo ug mapuslanong mga butang nga inyong makat-onan karon mohulma ug mopanalangin sa inyong tibuok kinabuhi.

Kini mao ang panahon nga mangita og maalamon ug matarong nga mga tigtudlo—mga ginikanan o mga apohan, mga magtutudlo, mga higala, mga lider sa Simbahan, ug, labing importante, si Jesukristo—sa pagtabang nato nga makatukod og makahuloganon nga mga kinabuhi. Pagmugna og makahuloganon nga mga relasyon niadtong kinsa makatabang ninyo nga makat-on ug molambo. (“Mga Rason aron Molaom,” [Tibuok kalibotan nga debosyonal sa S&I alang sa mga young adult, Ene. 10, 2021], Librarya sa Ebanghelyo)

Dugang nga mga Kalihokan sa Pagkat-on

Tinguhaa ang tambag niadtong maalamon ug may kasinatian

Samtang pangitaon sa mga estudyante ang mga ehemplo sa pag-mentor diha sa mga kasulatan, makabenepisyo tingali sila sa pagpakita sa mga sangputanan sa dili pagsunod sa tambag niadtong mas dako og kasinatian. Aron mahimo kini, pwede nimong ipakigbahin ang istorya ni Hari Rehoboam, nga misunod sa iyang amahan, si Hari Solomon, ingon nga lider sa Israel.

Dapita ang mga estudyante nga basahon ang 1 Mga Hari 12:1–4, nga mangita sa problema nga gisulti ni Jeroboam, nga gikan sa balay ni Ephraim, para sa Israelita.

Dayon, pwedeng basahon sa mga estudyante ang 1 Mga Hari 12:6–11. Organisahon ang mga estudyante ngadto sa mga pares. Ang usa ka managpares ang mangita sa tambag nga gihatag sa “mga tigulang” nga nagserbisyo kay Hari Solomon ngadto kang Hari Rehoboam. Ang laing managpares mangita sa giingon sa batan-ong mga higala ni Rehoboam nga iyang buhaton. Pwede nimong pangutan-on ang mga estudyante og mga pangutana sa panaghisgot nga sama sa:

• Nganong makatental ang pagsunod sa tambag sa mga kaedad nga wala pay kasinatian?

Pwedeng basahon sa mga estudyante ang 1 Mga Hari 12:12–16, nga pangitaon ang mga sangputanan sa pagsunod ni Rehoboam sa tambag sa iyang mga higala (mirebelde ang 10 ka tribo kang Rehoboam ug nahimong Amihanang Gingharian sa Israel).

Tabangi ang mga estudyante nga masabtan ang kaimportante sa pag-ila sa giya sa Ginoo pinaagi sa kaalam sa maayong mga mentor. Ang ilang kasinatian makatabang nato sa paghimog mas maayong mga desisyon ug sa pagsunod sa Ginoo.

Pagpangita ug pagpakig-ilaila sa usa ka mentor

Pagkahuman sa kalihokan sa handout, pwede nimong parespareson ang mga estudyante. Papraktisa sila sa pagpakig-istorya uban sa ilang partner, nga maoy magsilbing potensyal nga mentor. Pwedeng praktison sa mga estudyante kon unsaon nila pagdapit kining tawhana nga mahimo nilang mentor, gamit ang tulo o kapin pa sa mga pangutana nga ilang gisulat. Ang estudyante nga magsilbing mentor pwedeng mohatag og feedback (kon unsay maayo nilang nahimo, unsay kinahanglang bag-ohon, bisan unsang mga sugyot). Dayon, pwedeng magbaylo og mga papel ang mga estudyante ug papraktison ang ilang pares.

Human makapraktis ang kada pares ug makadawat og feedback, pwede nimong hangyoon kon unsay nasinatian sa mga estudyante nga makapalisod sa pag-ila ug pagkonektar ngadto sa mentor o makapabakikaw sa pag-ila ug paghatag og mga sugyot kon unsaon nila pagbuntog kini nga mga hagit.

Kon makabenepisyo ang mga estudyante og dugang giya aron matabangan sila sa pagplano nga mailaila ang usa ka mentor, pwede nimong ihatag ang mosunod nga kapanguhaan: “Meet with Your Mentor.” Pwedeng kompletohon sa mga estudyante ang digital worksheet ug dayon ipakigbahin ang mga ideya ngadto sa ilang mga classmate.

Makabenepisyo tingali ang mga estudyante sa pagkakita kon sa unsang paagi nakabenepisyo ang mga estudyante sa BYU gikan sa mga relasyon sa mentor diha sa ilang edukasyon. Pwede nimong ipasalida ang bidyo nga “BYU First Year Mentoring | Experiences of Growth” (2:48).