Pag-ugmad sa Pagbarog pinaagi sa Kinaugalingong Paningkamot: Leksiyon 179

Maalamong Pagdumala sa Pinansyal nga mga Kapanguhaan

Paggamit sa mga Baroganan sa Ginoo aron Mohimog mga Desisyon bahin sa Kwarta

Si Elder Ronald A. Rasband sa Kurom sa Napulog Duha ka Apostoles mitudlo, “Ang impluwensya sa Ginoo makita sa ginagmayng mga detalye sa atong kinabuhi” (“Pinaagi sa Balaan nga Plano,” Liahona, Nob. 2017, 56). Kini naglakiip sa atong mga desisyon bahin sa kwarta. Makatabang nato ang pagkat-on kon unsaon paglakip sa Ginoo diha sa atong mga desisyon bahin sa kwarta aron kita makabarog pinaagi sa kinaugalingong paningkamot. Kini nga leksiyon makatabang sa mga estudyante sa paggamit sa dinasig nga mga baroganan aron madumala ang mga desisyon bahin sa kwarta sa paagi sa Ginoo.

Pagpangandam sa estudyante: Sa dili pa itudlo kini nga leksiyon, ikonsiderar ang pagpakitay sa “Mapa sa Malamaposong Pagdumala sa Kwarta” diha sa pisara ug pagdapit sa mga estudyante sa pagkuha og hulagway niini diha sa ilang mga selpon. Pwede usab kang maghatag og giprinta nga mga kopya niini ngadto sa mga estudyante.

Posibleng mga Kalihokan sa Pagkat-on

Mga desisyon bahin sa kwarta

(Timan-i: Kini nga leksiyon pwedeng itudlo ingon nga sumpay sa Leksiyon 158: “Malaquias 3,” diin naglangkob sa mga kalihokan sa pagkat-on nga motabang sa mga estudyante nga masabtan ang balaod sa Ginoo sa ikapulo.)

Sa dili pa magsugod ang klase, pwede nimong idrowing o ipakita ang mosunod nga tsart diha sa pisara.

Mahinungdanong Desisyon Bahin sa Kwarta	Mga Kabalaka sa Paghimo Niini nga mga Desisyon

Dapita ang mga estudyante sa pagduol sa pisara ug kompletohon ang tsart samtang ilang ikonsiderar ang mga desisyon bahin sa kwarta nga ilang himoon sa sunod 5 hangtod 10 ka tuig. Samtang himoon kini sa mga estudyante, pwede kang molibot sa klase ug dasigon sila nga ipakigbahin ang ilang mga hunahuna diha sa pisara o uban nimo.

Apil tingali sa mga desisyon nga ilista sa mga estudyante ang pagbayad para sa edukasyon ug misyon, pagtagana sa pamilya, o pagpalit o pag-abang og puy-anan. Apil tingali sa mga kabalaka ang kawalay kwarta, dili makamaong mo-budget, pagbiya sa trabaho aron moserbisyo sa usa ka misyon, o nasayod kon kinsay masaligan dihang mohimog mga desisyon bahin sa kwarta.

Hunahunaa ang pipila sa importanteng desisyon bahin sa kwarta nga imong giatubang o atubangon sa umaabot samtang imong pamalandongan ang mosunod nga mga pangutana:

• Unsay imong mga pangutana bahin sa kon sa unsang paagi nimo madawat ang tabang sa Ginoo niini nga mga desisyon?

• Unsay imong nasulayan kaniadto nga nakatabang? Unsa ang dili kaayo makatabang?

Samtang mosanong kita sa Espiritu Santo, mahimong ipakita sa Langitnong Amahan kanato kon unsaon paghimo og maalamong mga desisyon bahin sa kwarta sa tibuok natong kinabuhi. Mahimong bukas niini nga mga impresyon samtang magtuon ka karon.

Paghimog mga desisyon bahin sa kwarta sumala sa pamaagi sa Ginoo

Gusto sa Langitnong Amahan ug ni Jesukristo nga giyahan kita sa tanang aspeto sa atong kinabuhi. Kini naglakiip sa atong mga desisyon bahin sa kwarta. Gihatagan kita nilag direksiyon diha sa mga kasulatan nga makatabang nato sa paghimog maalamong mga desisyon bahin sa kwarta.

Isulat nga mosunod diha sa ibabaw sa panid sa imong journal sa pagtuon: Makahimo kog mga desisyon bahin sa kwarta sa pamaagi sa Ginoo pinaagi sa …

Basaha ang tulo sa mosunod nga mga pakisayran sa kasulatan. Kompletoha ang kamatuoran diha sa imong journal sa pagtuon gamit ang imong nakat-onan gikan sa mga kasulatan.

• Genesis 41:46–49, 53–57 (Gitudlo ni Paraon si Jose sa pagdumala sa produksiyon sa lugas sa Ehipto sa panahon sa mga tuig sa kaabunda aron makapangandam sa gipanagna nga mga tuig sa kagutom.)

• Deuteronomio 15:7–8

• Salmo 24:1

• Malaquias 3:8–11

• Jacob 2:18–19

• Doktrina ug mga Pakigsaad 104:78

Human matun-i sa mga estudyante ang mga kasulatan, dapita sila sa pagpakigbahin ang ilang nakat-onan. Ang usa ka paagi sa pagbuhat niini mao ang pagpakita sa “Mapa sa Malamposong Pagdumala sa Kwarta” diha sa pisara. Pwedeng isulat sa mga estudyante ang ilang nakat-onan ug ang mga bersikulo kon asa nila kini nakat-onan tupad sa lugar diha sa mapa nga haom para nila.

Ingon nga alternatibo, pwede kang maghimog ikatulong kolum diha sa tsart sa pisara nga nag-ulohan og Ang Pamaagi sa Ginoo ug dapita ang mga estudyante nga isulat ang ilang nakaplagan.

Ikonsiderar ang paghatag og gibug-aton sa mga kamatuoran nga labing haom sa panginahanglan sa imong mga estudyante. Ang mosunod mao ang posibleng mga paagi sa pagkompleto sa pamahayag:

… pagtigom sa mga pinansyal nga kapanguhaan aron makapangandam sa lisod nga mga panahon (Genesis 41:46–49, 53–57).

… pagtabang niadtong nanginahanglan (Deuteronomio 15:7–8).

… paghinumdom nga ang tanan natong nabatonan naggikan sa Ginoo (Salmo 24:1).

… pagtuman sa balaod sa Ginoo sa ikapulo (Malaquias 3:8–11).

… pagtinguha sa gingharian sa Dios kaysa mga kabtangan (Jacob 2:18–19).

… pagbayad og utang (Doktrina ug mga Pakigsaad 104:78).

• Sa unsang paagi ang imong nakat-onan sa kasulatan motabang nimo sa paghimog mga desisyon bahin sa kwarta sa pamaagi sa Ginoo?

Paghimong prayoridad sa atong mga galastohan

Ang mosunod nga kalihokan gidesinyo aron tabangan ang mga estuyante sa pagpraktis gamit ang dinasig nga mga kamatuoran nga ilang nailhan aron makahimog mga desisyon bahin sa kwarta. Aron mahimo kini, pwede nimong grupohon og tinag-upat ang mga estudyante ug hatagan ang matag grupo sa handout nga nag-ulohang “Paghimog mga Desisyon bahin sa Kwarta sumala sa Pamaagi sa Ginoo.” Hatagi ang kada estudyante sa grupo og usa sa mga han-ay sa edad nga gipresentar sa handout.

Ipakita ang mosunod nga senaryo ug instruksiyon. Agig dugang sa pagprayoridad sa mga estudyante sa mga galastohan ni Elizabeth, pwede kang maghatag og kantidad sa mga estudyante sa kinitaan ni Elizabeth sa kada han-ay sa edad nga naa sa handout. Dayon pwedeng magpraktis og budget ang mga estudyante sa gihatag nga mga galastohan base sa gidak-on sa kwarta ni Elizabeth.

Ingon nga alternatibo, pwede nimong bahinon sa gagmayng grupo ang mga estudyante ug dapiton silang nga himoon ang kalihokan gamit ang nasulat ilawom sa Importanteng Desisyon Bahin sa Kwarta diha sa tsart sa pisara.

Si Elizabeth, usa ka babaye sa inyong branch, nagsugod sa ubos nga lebel nga trabaho sa usa ka restawran dihang nag-edad siya og 16. Paglabay sa katuigan, midako ang iyang ranggo ug nahimong tigdumala sa restawran. Samtang hapit na siyang magretiro, nakapalit ug nagpadagan na siya og kaugalingon nga restawran.

1. Butangi og numero ang “posibleng mga galastohan” sa han-ay nga imong irekomendar nga unahon kini ni Elizabeth.

2. Tupad sa duha ka managlahing galastohan, isulat ang pakisayran sa kasulatan nga imong gitun-an nga nahimo nimong giya kon giunsa nimo pag-una ang mga galastohan.

3. Pangandam sa pagpasabot kon sa unsang paagi ang mga kamatuoran nga imong nakat-onan diha sa mga kasulatan nakatabang nimo sa pagdesisyon kon giunsa nimo pag-una ang mga galastohan.

Kon makatabang, pwede nimong hatagan og pipila ka ehemplo ang mga estudyante. Pananglitan, pwede nimong ipasabot nga ang pag-una sa pagtigom maoy usa ka paagi sa pagpangandam alang sa lisod nga mga panahon, sama sa gitambag sa Ginoo (tan-awa ang Genesis 41:46–49, 53–57), o nga ang paghinumdom nga ang tanan natong nabatonan naggikan sa Ginoo (tan-awa ang Salmo 24:1) makatabang nato nga unahon ang pagbayad sa ikapulo.

Hatagig panahon ang mga estudyante nga ipakigbahin sa uban kon giunsa nila pag-una ang ilang mga galastohan base sa mga baroganan sa Ginoo.

Dapita ang mga estudyante nga ipakigbahin kon giunsa pagtabang sa Dios kanila o niadtong ilang kaila samtang naghimo silag mga desisyon bahin sa kwarta sumala sa Iyang pamaagi. Kon makatabang, pwede ninyong tan-awon ang “Ang mga Tamboanan sa Langit,” nga anaa sa ChurchofJesusChrist.org, gikan sa time code 0:39 hangtod 2:22. Si Elder David A. Bednar sa Korum sa Napulog Duha ka Apostoles mipakigbahin kon sa unsang paagi napanalanginan ang pamilya sa iyang asawa samtang ilang giuna ang pagbayad sa ikapulo.

Paglakip sa Ginoo sa akong mga desisyon bahin sa kwarta

Hatagig panahon ang mga estudyante nga ikonsiderar ang mga paagi nga ilang malakip ang Ginoo sa paghimog mga desisyon bahin sa kwarta. Usa ka paagi sa pagtabang kanila sa pagbuhat niini mao ang pagpakita sa mosunod nga pamahayag sa dili pa tubagon sa mga estudyante ang kauban nga mga pangutana.

Si Bishop L. Todd Budge sa Tigdumalang Bishopric mipakigbahin:

Unsa ang akong nakaplagan sa akong kaugalingong kinabuhi mao nga ako makaampo usab kabahin sa akong temporal nga mga kalihokan. Ako makaampo kabahin sa akong panalapi. Makaampo ko kon mopalit ba ko niining balaya o kana nga balay o himoon ba kini nga puhunan o kana nga puhunan. Kinahanglan natong apilon ang Ginoo dili lang sa espirituhanon nga bahin sa atong kinabuhi apan diha sa temporal nga mga butang usab sa atong kinabuhi. (“4 ka Baroganan nga Atong Makat-onan gikan sa Paagi nga Naglihok ang Tigdumalang Bishopric,” Liahona, Peb. 2024, 14)

Hunahunaa ang mga desisyon bahin sa kwarta nga kinahanglan nimong himoon karon o sa umaabot nga panahon. Dapita ang Espiritu Santo sa pagtabang nimo sa pagtubag sa mosunod nga mga pangutana diha sa imong journal sa pagtuon:

• Unsang mga baroganan ang makatabang nimo sa paghimo niini nga mga desisyon bahin sa kwarta sumala sa pamaagi sa Ginoo?

• Sa unsang paagi ang paggamit niini nga mga baroganan bahin sa kwarta mag-andam nimo sa pagserbisyo sa Dios ug sa uban?

Ikonsiderar ang pagpakigbahin og mubong ehemplo gikan sa imong kinabuhi kon giunsa nimo paggamit ang nakat-onan sa mga estudyante karon aron mohimog desisyon bahin sa kwarta. Pwede usab nimong ipakigbahin kon unsay gitudlo kanimo sa maong kasinatian bahin sa Langitnong Amahan ug kang Jesukristo.

Dugang nga mga Kapanguhaan

Unsaon nato paggasto ang atong kwarta?

Si Presidente Brigham Young (1801–1877) mitudlo:

Alang sa unsa ang mga katigayunan? Alang sa mga panalangin, sa pagbuhat og maayo. Dayon atong ipaambit kanang gihatag sa Ginoo kanato sa labing maayong mahimo nga paggamit sa pagtukod sa iyang Gingharian, alang sa pagsangyaw sa kamatuoran sa yuta, aron kita makakita ug makapahimulos sa mga panalangin sa Zion sa Dios dinhi niini nga yuta. (Discourses of Brigham Young, sel. John A. Widtsoe (1954), 307)

Unsaon nako pagdumala ang akong kwarta?

Si Bishop W. Christopher Waddell sa Tigdumalang Bishopric mipasabot:

Ang mahinungdanong mga baruganan sa pagdumala sa inyong panalapi naglakip sa pagbayad og mga ikapulo ug mga halad, pagtangtang ug paglikay sa utang, pag-andam ug pagsunod og usa ka badyet, ug pagtigum alang sa umaabut. (“Dihay Tinapay,” Liahona, Nob. 2020, 44)

Sa unsang paagi ang pagbayad sa ikapulo magpanalangin sa akong kinabuhi?

Si Presidente Russell M. Nelson mipakigbahin:

Sa dihang usa pa ko ka batan-ong intern, ang akong sweldo mga $15 kada bulan. Usa ka gabii, ang akong asawa nga si Dantzel nangutana kon ako nagbayad ba og ikapulo nianang gamay nga suhol. Ako wala magbayad. Dali kong naghinulsol ug nagsugod sa pagbayad og dugang $1.50 sa binulan nga ikapulo.

Ang Simbahan nahimong lahi ba tungod kay among gidugangan ang among ikapulo? Sa tinuod wala. Apan, ang pagkahimong hingpit nga tigbayad sa ikapulo nakapausab nako. Mao kadto nga ako nakakat-on nga ang pagbayad og ikapulo mahitungod ang tanan sa hugot nga pagtuo, dili sa kwarta. Isip usa ka hingpit nga tigbayad sa ikapulo, ang mga tamboanan sa langit nagsugod sa pag-abli ngari kanako. Akong gipahinungod ang daghang misunod nga propesyonal nga mga oportunidad sa among matinud-anong pagbayad sa mga ikapulo.

Ang pagbayad sa ikapulo nagkinahanglan og hugot nga pagtuo, ug kini usab naglig-on sa hugot nga pagtuo diha sa Dios ug sa Iyang Pinalanggang Anak. (“Paghunahuna og Celestial,” Liahona, Nob. 2023, 119)

Dugang nga mga Kalihokan sa Pagkat-on

Paggamit sa atong kwarta sa paghimog maayo

Makatabang tingali sa mga estudyante ang paglantaw sa ilang kwarta uban ang mahangtorong panglantaw ug masabtan kon sa unsang paagi kana makagiya kini kanila sa pag-ila kon unsaon paggamit sa ilang kwarta sa maayong paagi. Usa ka paagi sa paghimo niini mao ang pagpakita sa quote ni Brigham Young diha sa Dugang nga mga Kapanguhaan. Dapita ang mga estudyante nga ipakigbahin ang ilang mga hunahuna bahin sa pamahayag ni Presidente Young.

Dayon, pwede nimong ipakitay ang daghang posibleng gamit sa kwarta. Dapita ang mga estudyante nga ikonsiderar ang paghunahuna kon para nila asa ang labing maayong paagi sa paggamit sa kwarta.

Ang pipila sa posibleng mga gamit naglakip sa:

• Pagtigom para sa umaabot nga mga panginahanglan sa edukasyon.

• Paggasto diha sa mga kalihokan sa kalingawan.

• Pagtigom para sa usa ka misyon.

• Pagpanglibre sa usa ka tawo nga mangaon diha sa restawran.

Tabangi ang mga estudyante nga masabtan nga kining tanang mga ehemplo maoy maayong mga paagi sa paggamit sa mga kapanguhaan sa Ginoo. Ikonsiderar ang paghisgot kon kanus-a maisip nga labing maayong paagi ang matag ehemplo. Pananglitan, ang tawo nga ilang gilibre sa restawran posibleng naglisod sa espirituwal o sa emosyonal. Basin panalangin para nila ang pagpanglibre. Usahay ang labing maayong paagi sa paggamit sa atong kwarta mao ang kaliwangan nga makapadasig sa atong mga hunahuna ug makahimog nindot nga mga handomanan uban niadtong atong gimahal.

Pagbarog pinaagi sa kinaugalingong paningkamot diha sa pinansyal

Pwede nimong gamiton ang mosunod ingon nga alternatibong kalihokan diha sa kataposang seksiyon niini nga leksiyon. Aron tabangan ang mga estudyante nga maghimog plano diin ilakip ang Ginoo diha sa ilang mga desisyon bahin sa kwarta, ikonsiderar ang paghatag nila og kopya sa artikulo sa Liahona nga nag-ulohan og “7 ka Pangutana aron Mahimong Mas Makabarog pinaagi sa Kinaugalingong Paningkamot sa Pinansiyal nga Paagi.” Pwede usab nila kini nga i-akses diha sa Librarya sa Ebanghelyo. Pwedeng basahon sa mga estudyante ang artikulo ug mopilig pipila ka pangutana nga gusto nilang gamiton nilang gamiton sa ilang paningkamot nga makabarog pinaagi sa kinaugalingong paningkamot diha sa pinansyal. Pwede usab gamiton sa mga estudyatne ang impormasyon sa artikulo ug sa gihatag nga dugang nga mga kapanguhaan aron isulat ang kaugalingon nilang mga pangutana nga ikonsiderar.

Mga leksiyon nga nakat-onan gikan sa pagbayad sa ikapulo

Si Elder Carl B. Pratt sa Seventy mipakigbahin og usa ka asoy bahin sa kon sa unsang paagi napanalanginan sa Ginoo ang iyang mga apohan tungod sa pag-una sa ikapulo. Dayon iyang gipakigbahin ang pipila ka konklusyon nga iyang nakat-onan gikan sa ilang kasinatian. Ikonsiderar kon unsa nga konklusyon ang imong ipakigbahin base sa kon asa mas makabenepisyo ang imong mga estudyante. Ang summary sa mga konklusyon ni Elder Pratt uban anaa sa ubos uban sa katumbas nga mga time code:

5:57 hangtod 6:49 – Unaha og bayad ang ikapulo.

7:50 hangtod 8:44 – Panalanginan kita og kaalam sa Ginoo nga motabang nato aron moarang-arang ang atong pagkinabuhi gamit ang 90 porsiyento sa atong kinitaan kay sa 100 porsiyento.

8:44 hangtod 9:17 – Ang kinadak-ang mga panalangin sa Ginoo gikan sa pagbayad sa ikapulo mao ang espirituwal ug adunay kalabotan sa pamilya, mga higala, ug sa ebanghelyo.

9:25 hangtod 10:12 – Ang pagbayad sa ikapulo motabang nato sa pag-ugmad og manunuton, mapaubsanon, mapasalamaton, mahinatagon, mapinasayloon, ug matinabangon nga kasingkasing.