Pag-ugmad sa Pagbarog pinaagi sa Kinaugalingong Paningkamot: Leksiyon 177

Pag-ugmad sa Pagbarog pinaagi sa Kinaugalingong Paningkamot diha sa Pamaagi sa Ginoo

“Ang Ginoo Ganahan og Paningkamot”

Ang pag-ugmad sa pagbarog sa kinaugalingong paningkamot motabang nato sa pagsunod sa mga pagtulun-an ni Jesukristo sa pagsangkap para sa atong kaugalingon ug sa pagpanalangin sa uban. Ang pagkat-on sa pag-ugmad sa pagbarog sa kinaugalingong paningkamot isip usa ka batan-on modala kanato sa mas dakong kapasidad isip usa ka hamtong. Kini nga leksiyon makatabang sa mga estudyante nga masabtan kon nganong importante ang pag-ugmad sa pagbarog pinaagi sa kinaugalingong paningkamot diha sa plano sa Langitnong Amahan alang kanato.

Pagpangandam sa estudyante: Ikonsiderar ang paghangyo sa mga estudyante nga mohimog usa ka butang sa ilang kaugalingon nga gihimo sa uban sauna para nila. Pananglitan, pwede silang mag-andam og pagkaon, manglaba, magbayad sa usa ka butang nga sagad ang ilang ginikanan ang mobayad, o ayohon ang usa ka butang diha sa ilang balay.

Posibleng mga Kalihokan sa Pagkat-on

Mouswag kita pinaagi sa paglihok

Sa dili pa sugdan ang klase, ikonsiderar ang paghatag og kopya sa usa ka estudyante sa pamahayag ni Bishop Waddell ug ang laing estudyante sa kopya sa pamahayag gikan sa Mga Hilisgotan ug mga Pangutana. Dapita sila nga basahon ang mga pamahayag ug mangandam sa pagpakigbahin sa ilang nakat-onan bahin sa Manluluwas ug kon unsaon nila sa pagpasabot ang pagbarog pinaagi sa kinaugalingong paningkamot sa kaugalingon nilang mga pulong.

Ikonsiderar ang pagsugod sa klase pinaagi sa pagpakita sa hulagway sa usa ka gamayng langgam ug ipakita ang mosunod nga pangutana. Pwede nimong organisahon ang mga estudyante sa gagmayng grupo aron hisgotan ang mga pangutana pinaagi sa pag-usausa og pakita niini ug paghatag og panahon sa mga estudyante nga hisgotan ang kada pangutana.

• Unsa kahay mahitabo aning langgama kon pasagdan lang siya sa iyang ginikanan diha sa salag hangtod sa hangtod, nga perming hatagan og pagkaon?

• Sa unsang mga paagi kini nato matandi sa atong pag-uswag ug kalamboan diha sa plano sa Langitnong Amahan para nato?

Tabangi ang mga estudyante nga masabtan nga dakong bahin sa atong pag-uswag nagdepende sa atong kaandam nga makakat-on ug pagdawat og responsibilidad para sa kaugalingon natong pag-uswag. Pwede kang mopamatuod bahin sa abilidad sa Manluluwas sa pagtabang kanato sa atong mga paningkamot nga mouswag.

Pagbarog pinaagi sa Kinaugalingong Paningkamot

Ikonsiderar ang pagsulat sa pagbarog pinaagi sa kinaugalingong paningkamot diha sa pisara ug ang pagkita sa mosunod nga duha ka pamahayag. Dapita ang mga estudyante nga basahon ang mga pamahayag ug mangandam sa pagpasabot sa ilang nakat-onan bahin sa Manluluwas ug kon unsay ipasabot sa pagbarog pinaagi sa kinaugalingong paningkamot. Kon gihatag nimo sa mga estudyante kini nga mga pamahayag sa wala pa ang klase, dapita sila nga ipakigbahin ang ilang mga hunahuna sa dili pa sugdan ang panaghisgot uban sa klase.

Si Bishop W. Christopher Waddell sa Tigdumalang Bishopric mipasabot:

Wala paabuta sa Ginoo nga mobuhat kita og labaw pa kay sa atong mahimo, apan gipaabut Niya nga kita mobuhat sa unsay atong mahimo, kon ato kanang mahimo. Sama sa gipahinumdom ni Presidente Nelson kanato sa atong katapusan nga kinatibuk-ang komperensya, “Ang Ginoo ganahan og paningkamot.”

…Ang pagkahimong andam sa temporal nga paagi ug pagkahimong makabarug sa kinaugalingong paningkamot nagpasabut sa “pagtuo nga pinaagi sa grasya, o sa gahum ni Jesukristo nga makapahimo, ug pinaagi sa kaugalingon natong paningkamot, maangkon nato ang tanan nga espiritwal ug temporal nga panginahanglan sa kinabuhi nga gikinahanglan nato sa atong kaugalingon ug sa atong mga pamilya.” (“Dihay Tinapay,” Liahona, Nob. 2020, 43)

Ang Mga Hilisgotan ug mga Pangutana diha sa Librarya sa Ebanghelyo miingon:

Gidapit kitang tanan sa Manluluwas nga molihok, mobarog nga kinaugalingon, ug mahimong sama Kaniya. Siya motabang kanato. … Ang Iyang mga pamaagi naglakip sa pagkat-on ug pagkinabuhi uyon sa mga baroganan sa pagbarog pinaagi sa kinaugalingong paningkamot—“ang abilidad, pasalig, ug paningkamot nga masangkapan ang mga panginahanglan sa kinabuhi para sa kaugalingon ug sa pamilya” (Providing in the Lord’s Way: Summary of a Leader’s Guide to Welfare [2009]). (Topic and Questions, “Self-reliance,” Gospel Library)

• Unsay imong nakat-onan bahin sa Manluluwas gikan niini nga mga pamahayag?

• Unsaon nimo paghulagway ang pagbarog pinaagi sa kinaugalingong paningkamot gamit ang kaugalingon nimong mga pulong?

Samtang ipakigbahin sa mga estudyante ang ilang mga tubag sa nag-unang pangutana, ikonsiderar ang pagsulat unsa ang ilang gisulti diha sa pisara tupad sa pagbarog pinaagi sa kinaugalingong paningkamot. Tabangi silang masabtan nga ang pag-ugmad sa pagbarog sa kinaugalingong paningkamot motabang nato nga mas mahisama kang Jesukristo.

Ikonsiderar ang pagpakita sa mosunod nga mga instruksiyon ug mga pangutana ug sa pagdapit sa mga estudyante nga pamalandongan ang kaugalingon nilang mga tinguha ug paningkamot nga makabarog sa kinaugalingong paningkamot.

Pamalandongi ang mosunod nga mga pangutana:

• Unsaon nimo sa paghulagway kon unsay ipasabot para sa usa ka tin-edyer sa pagpauswag sa ilang katakos sa mosunod nga mga bahin?

Kahibalo sa ebanghelyo

Pinansiyal nga mga panginahanglan karon ug sa umaabot

Edukasyon ug panarbaho

Pisikal nga mga panginahanglan

Emosyonal ug sosyal nga panginahanglan

• Sa unsang paagi ang pag-ugmad sa imong katakos sa bisan hain niini mopanalangin sa imong kinabuhi sa yuta ug mahangtorong pag-uswag?

Mga ehemplo sa pagbarog pinaagi sa kinaugalingong paningkamot

Makatabang tingali sa mga estudyante nga makita kon sa unsang paagi gipanalanginan ang mga indibidwal diha mga kasulatan pinaagi sa ilang mga paningkamot sa pagbarog pinaagi sa kinaugalingong paningkamot aron matubag ang ilang espirituwal ug temporal nga mga panginghanglan.

Ikonsiderar ang pagpakita sa mosunod nga mga instruksiyon, pakisayran, ug mga pangutana. Pwede nimong grupohon og tinagtulo ang mga estudyante ug dapita ang kada estudyante nga basahon ang managlahing pakisayran. Dayon pwedeng i-summarize sa mga estudyante ngadto sa ilang grupo ang ilang nabasa ug ipakigbahin ang ilang mga panabot gikan sa nag-uban nga mga pangutana.

Basaha ang usa sa mosunod nga mga asoy sa kasulatan ug pamalandongi ang kauban nga mga pangutana.

Moises 4:23–25; 5:1 (Si Adan ug si Eva nga mibiya sa Tanaman sa Eden)

• Sa unsang paagi ang pagpatrabaho sa Dios ni Adan ug Eva aron makakaon nagdala nila og mas dakong panalangin kay sa pagtugot sa Dios sa yuta nga mohatag lang nila og mga abot?

Genesis 6:14–16 (Si Noe nagkinahanglan og proteksiyon para sa iyang pamilya alang sa umaabot nga lunop)

• Sa unsang paagi ang pagdahom nga magtukod si Noe og arka mas nakapanalangin niya og sobra pa kon ang Dios milagroso nga mihatag niya?

Exodo 19:19–20 (Si Moises nagtinguha sa pagdawat og mga instruksiyon gikan sa Ginoo diha sa kamingawan)

• Sa unsang paagi naghatag og panalangin ni Moises ang paghulat sa Dios kaniya nga mosaka sa bukid aron makadawat og dugang pagpadayag?

Dihang mahuman na sa pagpakigbahin ang mga grupo, pwede nimong ipasalida ang bidyo nga “All I Needed” (1:44) aron tabangan ang mga estudyante nga makita ang modernong mga ehemplo sa mga indibiduwal nga nag-ugmad og pagbarog sa kinaugalingong paningkamot.

Ang ehemplo ni Jesukristo

Sayon rang malimtan nga miagi usab si Jesukristo og pagkabatan-on. Ang Bag-ong Tugon naglangkob sa pipila ka kapitulo bahin sa Iyang milagrosong pagkahimogso ug daghang kapitulo bahin sa Iyang kinabuhi isip usa ka hamtong. Kita, bisan pa niana, makakat-on og diyotay mahitungod kon giunsa Niya paggamit ang Iyang pagkabatan-on.

Basaha ang Lucas 2:52, nga pangitaon ang mga bahin sa diin ang Manluluwas midako ug miuswag isip usa ka batan-ong lalaki.

Ikonsiderar ang pagsangon sa gagmayng grupo sa mga estudyante og usa sa mga bahin (intelektuwal, pisikal, espirituwal, sosyal) gikan sa berikulo 52 nga tutokan sa mosunod nga panaghisgot.

Uban sa imong grupo paghunahuna og mga paagi diin ang pipila ka tin-edyer:

• Magsalig tingali sa uban nga labaw pa kay sa gikinahanglan nianang bahina.

• Pwedeng pauswagon ang ilang kaugalingong katakos nianang bahina.

Ang pipila ka ehemplo nga tingali mahunahunaan sa mga estudyante mao ang pagsalig sa uban nga maoy mohimo sa tanang buluhaton sa assignment sa eskuwelahan nga para unta sa grupo (intelektuwal), magsalig sa ilang ginikanan sa mga buluhaton sa balay (pisikal), nagdahom nga ang usa ka lider sa kabatan-onan ra ang motudlo sa tanang leksiyon sa Dominggo (espirituwal), o magdahom sa uban nga maoy moplano sa mga kalihokan sa mga tapok-tapok (sosyal).

Ipakigbahin ang imong nakat-onan

Hatagi og higayon ang mga estudyante nga maghunahuna ug ipakigbahin ang ilang nakat-onan o gibati bahin sa pagbarog pinaagi sa kinaugalingong paningkamot. Ang usa ka paagi sa pagbuhat niini mao ang pinaagi sa mosunod nga kalihokan. Pwede kini nga kompletohon sa mga estudyante isip indibidwal o adunay kauban.

Handurawa nga gihangyo ka sa usa ka lider nga ipakigbahin ang imong nakat-onan sa seminary karong semanaha ngadto sa kabatan-onan sa imong ward. Isulat unsa ang imong nakat-onan bahin sa pagbarog pinaagi sa kinaugalingong paningkamot gamit ang mosunod:

1. Usa ka kahulogan kon unsa ang pagbarog pinaagi sa kinaugalingong paningkamot

2. Kon nganong importante ang pagbarog pinaagi sa kinaugalingong paningkamot diha sa plano sa Langitnong Amahan para nato

3. Usa ka personal o gikan sa kasulatan nga ehemplo sa usa ka tawo nga nagpakita sa pagbarog pinaagi sa kinaugalingong paningkamot

4. Usa ka paagi aron ang mga tin-edyer nga mas makabarog pinaagi sa kinaugalingong paningkamot sa bisan unsang aspeto sa ilang kinabuhi

Dapita ang pipila ka estudyante nga moboluntaryo sa pagpakigbahin kon unsa ang ilang gisulat. Pwede nimong awhagon ang mga sakop sa klase nga irekord ang mga panabot diha sa ilang journal sa pagtuon samtang ila kining madungog sa ilang mga classmate.

Dugang nga mga Kapanguhaan

Unsa ang pagbarog pinaagisa kinaugalingong paningkamot?

Ang pagka-self-reliant … ang pagtuo nga pinaagi sa grasya, o sa gahum ni Jesukristo nga makapahimo, ug pinaagi sa kaugalingon natong paningkamot, maangkon nato ang tanan nga espiritwal ug temporal nga panginahanglan sa kinabuhi nga gikinahanglan nato sa atong kaugalingon ug sa atong pamilya. Ang self-reliance ebidensya sa atong pagsalig o hugot nga pagtuo sa Dios sa atong kinabuhi nga makahimo og mga milagro sa atong kinabuhi ug makahatag nato og kalig-on nga magmadaugon batok sa mga pagsulay ug mga kasakit. (Personal nga Panalapi alang sa Self-Reliance [2017], 4)

Si Elder Hugo E. Martinez sa Seventy mipasabot:

Ang pagbarog pinaagi sa kinaugalingong paningkamot usa ka doktrina sa ebanghelyo ni Jesukristo, ug dili usa ka programa. Usa kini ka tibuok kinabuhi nga proseso, ug dili usa lang ka hitabo.

Kita mamahimo nga makabarog pinaagi sa kinaugalingong paningkamot sa tibuok natong kinabuhi pinaagi sa pagpalambo sa atong pisikal ug emosyonal nga kahimsog, pagpadayon sa atong edukasyon ug panarbaho, ug pagkaandam sa temporal nga paagi [tan-awa ang Kinatibuk-ang Tamdanan nga Basahon, 22.1]. Kini nga tahas matapos ba gayod dinhi sa atong kinabuhi? Dili, tibuok kinabuhi nga proseso kini sa pagkat-on, paglambo, ug pagbuhat. Dili gayod kini matapos, usa kini ka padayon, inadlaw nga proseso. (“Pagtudlo sa Atong Kabataan ug Kabatan-onan sa Pagbarog pinaagi sa Kinaugalingong Paningkamot,” Liahona, Mayo 2022, 95)

Nganong importante ang pagbarog pinaagi sa kinaugalingon paningkamot diha sa plano sa Dios?

Si Presidente Dallin H. Oaks sa Unang Kapangulohan mitudlo:

Bisan og unsa pay hinungdan sa atong pagsalig sa uban para sa mga desisyon o kapanguhaan nga atong masangkap sa atong mga kaugalingon kini makapaluya kanato sa esprituhanong paagi ug [makapahinay] sa atong pag-uswag sa unsay gitinguha sa plano sa ebanghelyo kanato. (“Paghinulsol ug Kausaban,” Liahona, Nob. 2003, 40)

Si Elder Paul B. Pieper sa Seventy miingon:

Ang pagkat-on sa pagbuhat—pagbansay ug pagdisiplina sa atong mga hunahuna, lawas ug espiritu sa pagpaningkamot, pagmugna, pagkab-ut, ug pag-uswag—mao ang usa ka pundasyon sa reyalidad sa matag mortal nga kinabuhi. Kini ang usa sa pamaagi nga kita mahisama sa Dios ug matuman ang Iyang mga katuyoan dinhi sa yuta. Ang Langitnong Amahan, si Jesukristo, ug ang Espiritu Santo tanan nagtrabaho. Ang Ilang buhat ug llang himaya mao “ang pagpahinabo sa pagka-imortal ug kinabuhi nga dayon sa tawo.” Ang reyalidad mao nga walay himaya kon wala ang buhat. (“Gipadayag nga mga Reyalidad sa Pagkamortal,” [debosyonal sa Brigham Young University–Idaho, Peb. 19, 2013], 6, byui.edu)

Si Elder Joseph W. Sitati sa Seventy mipamatuod:

Ang pagbarog pinaagi sa kinaugalingong paningkamot magsugod sa usa ka panglantaw kon unsay kaya nimong mahimo, nga dili magduda sa kaugalingon, nga dili maghunahuna nga dili nimo kaya. Dihang mosulod kini sa imong hunahuna, kinahanglan kang mahinumdom sa imong balaanong potensyal, nga gibutang ka sa Langitnong Amahan niining kalibotana ug gihatagan og katakos nga dumalahon ang tanang butang ibabaw sa yuta. Misaad ang Langitnong Amahan ngadto sa tanang nagkinabuhi uyon sa sumbanan sa Iyang mga pakigsaad nga Siya mosangkap kanila. Ang plano sa ebanghelyo mao ang pagtabang nato aron mahimo kitang independente ug sama sa atong Langitnong Amahan. Nagpamatuod ko nga kon makaugmad ka og klarong panglantaw sa kon unsa ka mamahimo, ablihan sa Ginoo ang mga dalan para nimo aron mahimong realidad ang maong panglantaw. (Gi-transcribe gikan sa bidyo nga “Education for a Better Life” gikan sa time code 3:39 hangtod 4:33)

Dugang nga mga Kalihokan sa Pagkat-on

Pagtinguha og tabang gikan sa Dios

Human matun-i ang mga kasulatan diha sa seksiyong “Pagbarog pinaagi sa Kinaugalingong Paningkamot” sa leksiyon, ikonsiderar ang pagpakigbahin sa mosunod nga pamahayag gikan kang Presidente Dieter F. Uchtdorf, kanhi sa Unang Kapangulohan. Dapita ang mga estudyante sa pagpakigbahin kon unsaon kini paggamit diha sa bag-o lang nilang nakat-onan gikan sa mga asoy sa kasulatan. Dayon dapita ang mga estudyante sa pagpakigbahin og mga sitwasyon sa atong mga kinabuhi diin magamit ang pamahayag.

Kasagaran, ang tubag sa atong pag-ampo dili moabot samtang kita nagluhod lang apan samtang kita naglihok. (“Naghulat diha sa Dalan sa Damasco,” Liahona, Mayo 2011, 76)

Laing paagi sa pagsugod

Imbes gamiton ang pananglitan sa bata pa nga langgam aron makasugod og panaghisgot, ikonsiderar ang pagpakita og hulagway sa usa ka team sa mga bata ug gamita ang mga pag-aghat sa ubos.

Handurawa nga ikaw ang coach ani nga team. Samtang imong ipaila ang bag-o apan importanteng kahanas ngadto kanila, usa ka bata ang miingon: “Morag lisod man kaayo na! Di nako na kaya!” Unsay mga resulta kon ikaw:

• Ang mohimo sa kahanas imbes ang batasa matag higayon nga buhaton kini sa team panahon sa mga praktis?

• Masuko sa bata kay wala dayon niya masabti ug ma-master ang kahanas?

• Padayong ipakita sa bata kon unsaon kini paghimo ug dasigon sila nga padayong maningkamot hangtod nga makabalo na sila?