Pag-ugmad sa Pagbarog pinaagi sa Kinaugalingong Paningkamot: Leksiyon 178

Pagpakitag Hugot nga Pagtuo diha ni Jesukristo sa Pag-ugmad sa Pagbarog pinaagi sa Kinaugalingong Paningkamot

Makatabang Nato ang Ginoo sa Atong Paningkamot nga Mobarog pinaagi sa Kinaugalingong Paningkamot

Samtang atong ipakita ang hugot nga pagtuo ni Jesukristo, gidapit nato Siya nga tabangan kita sa tanang bahin sa atong kinabuhi. Agig dugang sa pagpanalangin nato og espirituwal nga kalig-on ug pagkaayo gikan sa sala, matabangan kita sa Manluluwas sa pag-ugmad sa pagbarog pinaagi sa kinaugalingong paningkamot para sa atong temporal nga mga panginahanglan. Pwedeng apil ani ang pinansiyal, edukasyon, panarbaho, ug ang atong pisikal ug emosyonal nga kahimsog. Kini nga leksiyon makatabang sa mga estudyante nga makapakita sa hugot nga pagtuo nga panalanginan sila sa Langitnong Amahan ug ni Jesukristo sa ilang mga paningkamot nga makarog pinaagi sa kinaugalingong paningkamot.

Pagpangandam sa estudyante: Ikonsiderar ang pagdapit sa mga estudyante nga isulat ang mga babag nga nakapalisod nila sa pagbarog pinaagi sa kinaugalingong paningkamot sa usa o kapin pa sa mosunod nga bahin:

Posibleng mga Kalihokan sa Pagkat-on

Mga panginahanglan ni Paula

Timan-i: Makatabang tingali ang pagtudlo sa Leksiyon 177: “Pag-ugmad sa Pagbarog pinaagi sa Kinaugalingong Paningkamot sa Pamaagi sa Ginoo” sa dili pa itudlo kini nga leksiyon. Gipaila sa Leksiyon 177 ngadto sa mga estudyante ang mga baroganan sa pagbarog pinaagi sa kinaugalingong paningkamot ug kon nganong importante kini sa plano sa Langitnong Amahan.

Ikonsiderar ang pagsugod sa klase pinaagi sa pagtabang sa mga estudyante sa paghisgot kon sa unsang paagi ang paghatag sa atong mga panginahanglan nagkinahanglan sa atong mga paningkamot ug sa giya sa Dios. Ang mosunod nga senaryo ug kalihokan maoy usa ka paagi sa pagtabang niini nga panaghisgot. Makatabang tingali ang pagpasabot nga problemado ang duha ka sanong ni Paula diha sa senaryo.

Pwede nimong sugdan pinaagi sa pagbasa sa unang bahin sa mosunod nga situwasyon. Dayon ipakigbahin ang duha ka posibleng sanong. Hunong kadiyot human sa kada tubag ug dapita ang mga estudyante nga ipakigbahin ngadto sa ilang kapares ang ilang ikatambag ni Paula.

Naghinamhinam si Paula nga makagradwar sa hayskul sulod sa duha ka tuig. Pero, nabalaka siya kon unsa ka dakong kwarta ang iyang kinahanglang tigomon para sa umaabot.

Unsay imong ikatambag kon:

1. Makadesisyon si Paula nga mag-ampo kada adlaw aron hatagan siyag kwarta sa Dios nga iyang gikinahanglan human sa gradwasyon. Wala siyay plano manarbaho, nga nagsalig nga ang Diyos mohatag kaniya.

2. Gibati ni Paula nga kay dili man “espirituwal nga butang” ang kwarta, dili mainteres ang Dios bahin ini. Nakahukom siya nga mangita og trabaho matag adlaw nga haom sa iyang eskedyul sa pag-eskwela. Nagplano siya sa pagpakig-istorya sa mga tag-iya og negosyo, nagpasa og mga resume, ug nagkat-on og bag-ong mga kahanas aron mahimo siyang labing bililhon para sa lokal nga mga tindahan.

Human ipakigbahin sa mga estudyante ang ila tingaling itambag kang Paula, dapita sila nga ipakigbahin kon sa unsang paagi magamit sa situwasyon ni Paula ang mosunod nga pamahayag.

Si Bishop W. Christopher Waddell, Unang Magtatambag diha sa Tigdumalang Bishopric, mipasabot:

Nan, ang tanan, nagpunting ngadto ni Jesukristo isip ang pundasyon diin gikinahanglan gayod kita nga matukod bisan ang atong temporal nga pagpangandam.

Ang pagkahimong andam sa temporal nga paagi ug pagkahimong makabarog sa kinaugalingong paningkamot nagpasabut sa “pagtuo nga pinaagi sa grasya, o sa gahum ni Jesukristo nga makapahimo, ug pinaagi sa kaugalingon natong paningkamot, maangkon nato ang tanan nga espiritwal ug temporal nga panginahanglan sa kinabuhi nga gikinahanglan nato sa atong kaugalingon ug sa atong mga pamilya.” [Personal nga Panalapi alang sa Self-Reliance (2017), 4]. (“Dihay Tinapay,” Liahona, Okt. 2020, 44)

Samtang ipakigbahin sa mga estudyante ang ilang mga panglantaw gikan sa pamahayag ni Bishop Waddell, ipasabot nga pinaagi sa pagpakitag hugot nga pagtuo diha kang Jesukristo ug sa kaugalingon natong mga paningkamot, maugmad nato ang espiritwal ug temporal nga pagbarog pinaagi sa kinaugalingong paningkamot.

Ikonsiderar ang pagpakita sa mosunod nga pagsukod sa kaugalingon, apil ang mga instruksiyon ug mga kategoriya, nga motabang sa mga estudyante sa pagpamalandong sa ilang panginahanglan sa tabang sa Manluluwas aron mas makabarog pinaagi sa kinaugalingong paningkamot.

Isulat ang mosunod nga mga katergoriya base sa kon unsay kinasayonan hangtod sa kinalisoran para nimo aron maugmad ang pagbarog pinaagi sa kinaugalingong paningkamot. Tupad sa usa o duha sa kinalisorang mga kategoriya para nimo, isulat ang bisan unsang mga babag diin kinahanglan nimo ang tabang sa Manluluwas aron mabuntog.

• Kahibalo sa ebanghelyo

• Pinansiyal nga mga panginahanglan karon ug sa umaabot

• Edukasyon ug panarbaho

• Pisikal nga mga panginahanglan

• Emosyonal ug sosyal nga panginahanglan

Samtang nagpadayon kang magtuon karon, ayaw og kalimti ang mga dapit diin nagkinahanglan ka og dakong tabang. Dapita ang Espiritu Santo aron lig-onon ang imong pagtuo nga tabangan ka sa Langitnong Amahan ug ni Jesukristo sa imong mga paningkamot nga maugmad ang pagbarog pinaagi sa kinaugalingong paningkamot.

Pagpakitag hugot nga pagtuo diha sa Ginoo aron maugmad ang pagbarog pinaagi sa kinaugalingong paningkamot

Niini nga leksiyon, basahon sa mga estudyante ang asoy ni Jose sa Ehipto diha sa Genesis. Sa dili pa tun-an ang asoy, pwede nimong ipasalida ang bidyo nga “I Will Provide for My Saints” (3:08) gikan sa time code 0:00 hangtod 1:52 ug ipapangita sa mga estudyante ang mga ebidensiya sa gahom ug tinguha sa Ginoo nga tabangan kita samtang nagpakita kita og hugot nga pagtuo Kaniya aron maugmad ang pagbarog pinaagi sa kinaugalingong paningkamot. Ang paghimo niini makatabang sa mga estudyante nga hunahunaon ang tinguha sa Ginoo sa pagtabang ug gahom sa pagpanalangin ni Jose sa iyang lisod nga mga kahimtang.

Aron tabangan ang mga estudyante sa pagtuon sa asoy ni Jose, pwede nimong ihatag ang kauban nga handout. Pwede nimong isangon sa matag grupo ang lainlaing bahin ug paandamon sila sa pagtubag sa duha ka pangutana diha sa handout.

Dapita ang mga estudyante sa pagpakigbahin sa unsay ilang nakaplagan. Pwede pod nimong tukion ang mga mosunod nga mga pangutana ingon nga bahin niini nga panaghisgot.

• Sa imong hunahuna, unsa kahay kataposan niini nga istoryaha kon wala pay hugot nga pagtuo sa Dios si Jose? Kon si Jose dili andam nga maningkamot?

• Sa imong hunahuna, unsaon man paggamit niini nga asoy ngadto sa kinabuhi sa usa ka tin-edyer?

Pwede pod nimong dapiton ang mga estudyante nga ipakigbahin ngadto sa klase ang mga kasinatian dihang nakadawat ang ilang pamilya sa ilang gikinahanglan pinaagi sa tabang sa Dios ug sa mga paningkamot sa ilang pamilya. Pwede usab nimong ipakigbahin ang imong personal nga kasinatian.

Personal nga paggamit

Ikonsiderar ang pagpakita pag-usab sa mga kategoriya sa pagbarog pinaagi sa kinaugalingong paningkamot nga gipamalandongan sa mga estudyante sa unang seksiyon sa leksiyon ug pagdapit sa mga estudyante nga himoon ang mosunod.

Paggahin og pipila ka panahon nga mainampoong irekord ang mosunod samtang maghunahuna ka sa mga kategoriya sa pagbarog pinaagi sa kinaugalingong paningkamot diin imong giila nga nalisdan ka diha sa sinugdanan sa leksiyon:

1. Kon unsay imong nakat-onan nga nakapalig-on sa imong pagtuo nga ang Langitnong Amahan ug si Jesukristo motabang nimo diha sa mga babag aron makabarog pinaagi sa kinaugalingong paningkamot diha sa imong kinabuhi.

2. Kon unsaon nimo pagpakitag hugot nga pagtuo sa Langitnong Amahan ug ni Jesukristo pinaagi sa imong kaugalingong mga paningkamot nga maugmad ang pagbarog pinaagi sa kinaugalingong paningkamot.

Ikonsiderar ang pagdapit og mga boluntaryo sa pagpakigbahin sa bahin sa ilang gisulat diha sa ilang mga journal.

Dugang nga mga Kapanguhaan

Tabangan ba kita sa Ginoo nga makabarog pinaagi sa kinaugalingong paningkamot?

Ang Unang Kapangulohan mipahayag:

Ang Ginoo namahayag, “Kini ang akong katuyoan sa pagsangkap sa akong mga santos” (D&P 104:15). Kini nga pinadayag usa ka saad gikan sa Ginoo nga Siya mosangkap sa temporal nga mga panalangin ug moabli sa mga oportunidad sa pagka-self-reliant, nga mao ang abilidad nga kita makasangkap sa mga kinahanglanon sa atong kinabuhi ug sa mga sakop sa atong pamilya. …

Amo kamong dapiton nga magkugi sa pagtuon [sa mga baroganan sa hugot nga pagtuo, edukasyon, paningkamot, ug pagsalig diha sa Ginoo] ug motudlo niini sa mga sakop sa inyong pamilya. Sa pagbuhat ninyo sa ingon, ang inyong kinabuhi mapanalanginan. Inyong makat-onan unsaon sa paglihok diha sa inyong dalan paingon ngadto sa mas lig-on nga pagbarog pinaagi sa kinaugalingong paningkamot. Kamo mapanalanginan og mas dakong paglaom, kalinaw, ug pauswag.

Palihog salig nga kamo anak sa atong Amahan sa Langit. Nahigugma Siya kaninyo ug dili gayod mobiya kaninyo. Nakaila Siya ninyo ug andam nga mopadangat diha ninyo sa espirituwal ug temporal nga mga panalangin sa pagbarog pinaagi sa kinaugalingong paningkamot. (“Mensahe gikan sa Unang Kapangulohan,” Personal nga Panalapi alang sa Self-Reliance [2017])

Si Bishop H. David Burton, kanhi Presiding Bishop, mitudlo:

Pagkahuman og buhat sa tanan aron kita mahimong mapaningkamoton sa kaugalingon, sa pagsangkap sa atong kaugalingong mga panginahanglanon ug sa atong pamilya, kita makaduol sa Ginoo uban sa pagsalig sa pagpangutana kon unsa pa kaha ang atong kulang. (“Ang Panalangin sa Pagtrabaho,” Liahona, Dis. 2009, 43)

Unsa na man lang kon kita misulay ug napakyas sa atong paningkamot nga makabarog pinaagi sa kinaugalingong paningkamot?

Si Presidente Jeffrey R. Holland sa Korum sa Napulog Duha ka Apostoles mipasabot sa mosunod bahin sa kinaiya ni Kristo:

Busa palihog hinumdomi ugma, ug ang tanang mga adlaw human niana, nga ang Ginoo mopanalangin niadtong kinsa gusto nga molambo, kinsa modawat sa mga panginahanglan sa mga sugo ug mosulay aron sa pagpugong kanila, kinsa bililhon sa Kristohanong mga hiyas ug maningkamot sa pag-angkon niini. Kon kamo nasayop niana nga paningkamot, mao usab ang tanan; ang Manluluwas anaa sa pagtabang kaninyo sa pagpadayon. Kon kamo nadagma, pangayoa ang Iyang kalig-on. … Sa dili madugay inyong maangkon ang kalamposan nga inyong gitinguha. (“Ugma ang Ginoo Mobuhat og Katingalahan diha Kaninyo,” Liahona, Mayo 2016, 126)

Unsay atong makat-onan gikan sa ehemplo ni Jose sa Ehipto sa pagbarog pinaagi sa kinaugalingong paningkamot?

Si Bishop W. Christopher Waddell sa Tigdumalang Bishopric miingon:

Kon magkonsiderar sa baruganan sa pagpangandam, mahimo natong balikan ang istorya bahin ni Jose sa Ehipto alang sa inspirasyon. Ang pagkasayud kon unsa ang mahitabo dili ra paigo aron makalatas sila sa katuigan sa “kagutom” nga walay igong sakripisyo panahon sa katuigan sa kaabunda. Imbis nga mohurot sa tanan nga abot sa mga ginsakupan sa Paraon, giestablisar ang mga limitasyon ug gisunod, nagsangkap og igo alang sa ilang hinanali, ingon man usab sa ilang umaabut, nga mga panginahanglan. Dili paigo nga masayud lang nga moabut ang mahagiton nga mga panahon. Kinahanglan silang molihok, ug tungod sa ilang paningkamot, “dihay tinapay.” (“Dihay Tinapay,” Liahona, Nob. 2020, 44)

Dugang nga mga Kalihokan sa Pagkat-on

Pagtuon sa kasulatan

Pwede nimong dapiton ang mga estudyante nga tan-awon ang listahan sa mga tudling sa doktrinal nga kahanas gikan sa tanang upat ka tuig, nga pangitaon ang mga kasulatan nga:

1. Makapadako sa pagtuo sa usa ka tawo nga ang Dios andam nga motabang kanato.

2. Motabang nato sa pagsabot nga nagdahom ang Dios nga himoon nato ang atong bahin sa pagpangitag mga tubag ug mga solusyon.

Apil tingali sa pipila ka ehemplo sa mga tudling sa doktrinal nga kahanas nga tingali ipakigbahin sa mga estudyante ang:

Mga Proverbio 3:5–6

Mateo 11:28–30

Santiago 2:17–18

Mosiah 2:41

Ether 12:27

Doktrina ug mga Pakigsaad 88:118

Hatagig kahigayonan ang mga estudyante nga ipakigbahin unsa ang ilang nakaplagan. Samtang mopakigbahin sila, pwede tingali kang mag-follow up pinaagi sa paghangyo sa klase nga maghunahuna og tinuod nga mga sitwasyon diin makatabang sa usa ka tawo ang pagsabot sa tudling sa kasulatan aron makabarog pinaagi sa kinaugalingong paningkamot.

Pagpadako sa imong hugot nga pagtuo

Sa hinapos sa unang seksiyon sa leksiyon, human madapit ang mga estudyante sa pagpamalandong sa mga dapit diin nagkinahanglan silag tabang gikan sa Dios aron mas makabarog pinaagi sa kinaugalingong paningkamot, pwede nimong ipakigbahin ang mosunod nga pamahayag gikan kang Presidente Russell M. Nelson. Dapita ang mga estudyante sa pagpangitag komon nga solusyon sa bisan unsang problema nga ila tingaling giatubang.

Minahal kong kaigsoonan, ang akong panawagan kaninyo … sugdi karon ang pagpalambo sa inyong hugot nga pagtuo. Pinaagi sa inyong hugot nga pagtuo, si Jesukristo mopalambo sa inyong abilidad sa pagbalhin sa mga bukid diha sa inyong kinabuhi, bisan og ang inyong personal nga mga hagit pareha kadako sa Bukid sa Everest. …

… Ang inyong mga bukid managlahi, ug bisan pa ang tubag sa matag usa sa inyong mga hagit mao ang pagpalambo sa inyong hugot nga pagtuo. (“Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 102–103)

Pwede nimong bahinon ang mga estudyante ngadto sa lima ka grupo, nga ang matag grupo nagpunting sa usa sa mosunod nga mga bahin sa pagbarog pinaagi sa kinaugalingong paningkamot:

• Pag-ugmad sa espirituwal nga kalig-on ug pamatuod ni Kristo

• Pagkuha og edukasyon

• Mokita og kwarta

• Mahimong himsog sa pisikal

• Pagkamahimong lig-on sa emosyonal nga paagi

Hangyoa ang mga grupo nga maghunahuna ug ireport sa klase kon sa unsang paagi ang pagpadako sa hugot nga pagtuo diha kang Kristo makatabang niadtong naglisod sa maong bahin.

Mga ehemplo sa kasulatan nga makapalig-on sa atong hugot nga pagtuo kang Kristo

Usahay morag mas daling atubangon ang lisod nga sitwasyon dihang atong hinumdoman unsa ang gihimo sa Dios para sa uban. Kon para nimo makatabang sa mga estudyante ang pagtuon sa mga ehemplo gawas pa sa asoy ni Jose, ang pipila sa uban pang ehemplo pwedeng naglakip sa istorya ni David (1 Samuel 17:40–50) ug sa mga Jaredita (Ether 2:16–17, 22–23; 3:1–6).

Ang lain pang paagi sa pagtapos sa klase mao ang pagdapit sa mga estudyante nga kompletohon ang mosunod nga mga pag-aghat:

Ang pagkahibalo nga gitabangan sa Dios si (usa ka tawo gikan sa mga kasulatan) uban (kon unsay gihimo sa Dios para niya) naghatag nako og pagsalig nga tabangan pod ko sa Dios nga makakitag paagi aron makaya ang (babag aron makabarog pinaagi sa kinaugalingong paningkamot nga dili nako kaya kon ako lang).

(Pananglitan: Ang pagkahibalo nga gitabangan sa Dios si David uban sa pagpakig-away kang Goliat naghatag nako og pagsalig nga tabangan usab ko sa Dios nga makakitag paagi aron makaya ang akong mga kalisdanan nga masabtan ang gitudlo sa eskwelahan.)