Zotërimi Doktrinor: Gjetja e Përgjigjeve për Pyetjet e Mia: Mësimi 165

T’u Drejtohemi Burimeve të Caktuara në Mënyrë Hyjnore që të na Ndihmojnë të Gjejmë Përgjigje

Burimet e Zotit të Caktuara në Mënyrë Hyjnore

Për shkak se jetojmë në një kohë kur shumë veta “e quajnë të mirë të keqen dhe të keqe të mirën” (Isaia 5:20), mund të jetë e vështirë ta dalloni të vërtetën. Megjithatë, Ati Qiellor dhe Jezu Krishti e kanë siguruar ndihmën e nevojshme. Ky mësim mund t’i ndihmojë nxënësit të kërkojnë të vërtetën nga burimet që Ati Qiellor dhe Jezu Krishti kanë siguruar me dashuri.

Përgatitja e nxënësve: Ftojini nxënësit të konsiderojnë se te cilat burime duhet të drejtohen kur kanë një pyetje në lidhje me sa vijon: detyrat e shtëpisë, një interes ose pasion, ngjarje historike, ungjillin dhe Kishën e Shpëtimtarit. Ftojini ata të përsiatin se përse drejtohen te burimet që përcaktuan.

Veprimtari të Mundshme të të Mësuarit

Çfarë është e vërtetë?

Merreni parasysh ta filloni orën mësimore duke paraqitur një send ose figurë që është e rreme. Për shembull, mund të paraqitni figurën brenda mësimit të çiklistit dhe të ariut. Kërkojuni nxënësve të thonë a e besojnë se figura është e vërtetë. Më pas paraqiteni figurën e saktë që tregon vetëm çiklistin.

• Kur ke parë ose lexuar diçka që të bëri ta vësh në dyshim a ishte e vërtetë?

• Çfarë mund të na e bëjë të vështirë ta dallojmë të vërtetën në kohën tonë?

Nëpërmjet profetit Isaia, Zoti na paralajmëroi për një problem me të cilin do të përballeshim në kohën tonë që do të na e bënte të vështirë ta dallonim të vërtetën. Lexo tek Isaia 5:20, duke kërkuar atë që dha mësim Zoti.

• Kur ke parë që diçka e keqe të quhet “e mirë” ose diçka e mirë të quhet “e keqe”?

Për ta zgjeruar diskutimin, merreni parasysh të shfaqni materialin filmik “In Search of Truth” [“Në Kërkim të së Vërtetës”] (3:03), në dispozicion në ChurchofJesusChrist.org, nga kodi kohor 0:00 deri në 1:27. Ose mund t’i ftoni nxënësit ta lexojnë thënien më poshtë, që përmban mësime të ngjashme. Ftojini nxënësit të kërkojnë çdo arsye tjetër përse mund të jetë e vështirë ta dallojmë të vërtetën.

Për t’i ndihmuar nxënësit ta kuptojnë nevojën për kujdes kur të bëjnë dallimin mes së vërtetës dhe të gabuarës, Presidenti Dallin H. Ouks, i Presidencës së Parë, shpjegoi:

“Ne jetojmë në një kohë kur informacioni përhapet dhe komunikohet gjerësisht. Por jo i gjithë ky informacion është i vërtetë. Ne kemi nevojë të jemi të vëmendshëm kur e kërkojmë të vërtetën dhe kur zgjedhim burime për atë kërkim. Nuk duhet ta konsiderojmë famën ose pozitën laike si burime të kualifikuara të së vërtetës. Ne duhet të jemi të vëmendshëm kur mbështetemi tek informacioni ose këshilla e ofruar nga yjet e fushave të argëtimit, sportistët me famë apo burime anonime në internet. Ekspertiza në një fushë nuk duhet të merret si ekspertizë mbi të vërtetën për tema të tjera.” (“E Vërteta dhe Plani”, Liahona, nëntor 2018, f. 25)

Pyete veten për sa vijon:

• Sa siguri ndien në aftësinë tënde për të dalluar të vërtetën?

• Kujt mund t’i mirëbesosh për të të dhënë përgjigje të sakta për pyetjet në lidhje me ungjillin dhe Kishën?

Ati Qiellor dhe Jezu Krishti na duan dhe dëshirojnë të na ndihmojnë ta dallojmë se çfarë është e vërtetë dhe çfarë nuk është. Gjatë gjithë mësimit të sotëm, kushtoju vëmendje pëshpëritjeve të Shpirtit për të të ndihmuar të dallosh atë që Ata kanë siguruar për ne.

Burimet e caktuara në mënyrë hyjnore

Lexoji paragrafët 11 dhe 12 të pjesës “Marrja e Njohurisë Shpirtërore” në materialin Dokumenti Bazë i Zotërimit Doktrinor (2023) dhe shenjoji mësimet që mendon se janë të rëndësishme t’i dish kur kërkon përgjigje për pyetjet e tua.

Mund t’i ftoni nxënësit t’ia tregojnë një partneri atë që gjetën dhe arsyen përse e konsiderojnë të rëndësishme.

Ftojini nxënësit ta përmbledhin atë që mësuan me klasën. Ata mund të tregojnë të vërteta si:

• Zoti na ka dhënë burime të caktuara në mënyrë hyjnore për të na ndihmuar të gjejmë përgjigje dhe drejtim.

• Zoti do të na ndihmojë ta dallojmë të vërtetën nga e gabuara ndërsa drejtohemi te burimet e Tij të caktuara në mënyrë hyjnore, duke përfshirë kërkimin e udhërrëfimit nga Fryma e Shenjtë.

• Përse mendon se është e rëndësishme të mbështetemi te burimet e Zotit të caktuara në mënyrë hyjnore ndërsa kërkojmë përgjigje për pyetjet tona?

Bëj dallimin ndërmjet të vërtetës dhe të gabuarës

Për t’u dhënë nxënësve një shembull të mënyrës se si Zoti na ndihmon ta dallojmë të vërtetën nga e gabuara, ju mund të studioni rrëfimin e shkrimit të shenjtë për Satanin që përballet me Moisiun te Moisiu 1. Merreni parasysh të paraqitni figurën brenda mësimit të Satanit që përballet me Moisiun. Pyetini nxënësit se çfarë dinë ose çfarë mbajnë mend rreth këtij rrëfimi.

Pasi Moisiu foli me Perëndinë ballë për ballë, Satani erdhi dhe u përpoq ta mashtronte Moisiun që të adhuronte atë (shih te Moisiu 1:12).

Merreni parasysh t’i organizoni nxënësit në dyshe. Nxënësit mund t’i studiojnë vargjet më poshtë individualisht dhe më pas t’ia tregojnë njëri-tjetrit përgjigjet e tyre për pyetjet vijuese:

Lexo te Moisiu 1:13–16, duke kërkuar mënyrën se si Moisiu ishte në gjendje ta bënte dallimin ndërmjet Satanit dhe Perëndisë.

• Çfarë gjete?

• Si mund ta lidhim përvojën e Moisiut me jetën tonë ndërsa zgjedhim burime për të gjetur të vërtetën dhe përgjigje për pyetjet tona?

  Nxënësit mund të përgjigjen me përgjigje të tilla si: ne mund ta përcaktojmë të vërtetën duke reflektuar mbi përvojat tona me Perëndinë; ne mund të mbështetemi te Perëndia si burimi ynë përfundimtar i së vërtetës; ose Perëndia mund të na ndihmojë të dallojmë ndërmjet dritës dhe errësirës.

  Mund të shfaqni pjesën e mbetur të materialit filmik “In Search of Truth” [“Në Kërkim të së Vërtetës”], nga kodi kohor 1:27 deri në 3:03. Nxënësit mund të kërkojnë dhe të tregojnë cilat burime përdorën njerëzit në materialin filmik për ta gjetur të vërtetën.

  Nëse është e dobishme, merreni parasysh ta paraqitni pyetjen vijuese dhe t’i ftoni nxënësit t’i shkruajnë përgjigjet e tyre në një fletë të vogël letre. Nxënësit mund t’i palosin letrat e tyre dhe t’i vendosin ato në një enë. Nxënësit mund të nxjerrin më pas disa përgjigje që i shkruan nxënësit e tjerë dhe t’i lexojnë.

• Për çfarë je mirënjohës që di, gjë të cilën nuk do ta dije pa burimet e caktuara në mënyrë hyjnore që Ati Qiellor i ka siguruar në kohën tonë? Përse?

Ushtrohu

Veprimtaria vijuese ka për qëllim t’i ndihmojë nxënësit të ushtrohen për t’u drejtuar te burimet e caktuara në mënyrë hyjnore që të gjejnë përgjigje për pyetjet e tyre.

Organizojini nxënësit në dyshe ose grupe të vogla dhe paraqitini pohimet vijuese. Nëse dëshironi, mund t’i përshtatni këto pohime për të plotësuar nevojat e nxënësve tuaj.

Zgjidh njërin nga pohimet e rreme vijuese, ose zgjidh një tëndin:

• I rremë: Perëndisë nuk i intereson vërtet se si jetojmë për sa kohë që nuk i lëndojmë të tjerët.

• I rremë: Kjo jetë është gjithçka kemi. Ne nuk ekzistonim para se të lindnim dhe nuk do të ekzistojmë pasi të vdesim.

• I rremë: Ne nuk kemi vërtet nevojë për Librin e Mormonit meqë tashmë kemi Biblën.

Duke përdorur burimet e caktuara në mënyrë hyjnore, gjej pohimet që korrigjojnë pohimin e rremë që zgjodhe. Shkruaje atë që gjen në ditarin tënd të studimit.

Sa vijon janë shembuj të burimeve të caktuara në mënyrë hyjnore që mund të marrësh parasysh t’i përdorësh:

• Fragmentet e zotërimit doktrinor, Udhëzuesi për Shkrimet e Shenjta

• Tema dhe Pyetje te ChurchofJesusChrist.org

• Fjalime të konferencave të përgjithshme

• Gospel Library [Biblioteka e Ungjillit]

• Prindërit e tu ose një udhëheqës/e i/e Kishës

  Nëse nxënësit kanë nevojë për ndihmë, merreni parasysh të jepni burimet vijuese si shembuj:

  • Perëndisë nuk i intereson vërtet se si jetojmë për sa kohë që nuk i lëndojmë të tjerët. (Eksodi 20:3–17; “Urdhërimet” tek Tema dhe Pyetje)

  • Kjo jetë është gjithçka që kemi. Ne nuk ekzistonim para se të lindnim dhe nuk do të ekzistojmë pasi të vdesim. (Abraham 3:22–23; Jeremia 1:4–5; Jobit 19:25–26; “Plani i Shpëtimit” tek Tema dhe Pyetje)

  • Ne nuk kemi vërtet nevojë për Librin e Mormonit meqë tashmë kemi Biblën. (Ezekiel 37:15–17; 2 Nefi 29:6–10; “Libri i Mormonit” tek Tema dhe Pyetje)

  Pas një kohe të mjaftueshme, ftojini nxënësit të shkruajnë në tabelë pohime të vërteta për secilin prej këtyre pohimeve të rreme.

  Ftojini nxënësit të tregojnë se te cilat burime u drejtuan dhe çfarë gjetën nga këto burime. Nxënësit mund të tregojnë edhe atë që bënë për të gjetur përgjigjet e tyre.

  Për ta përmbyllur orën mësimore, merreni parasysh të bëni pyetjen në vijim. Nëse dëshironi, mund të jepni edhe përvojën ose dëshminë tuaj për burimet e caktuara në mënyrë hyjnore të Atit Qiellor dhe Jezu Krishtit.

• Çfarë mësove sot rreth burimeve të caktuara në mënyrë hyjnore që Ati Qiellor dhe Jezu Krishti na i kanë dhënë me dashuri?

Burime Shtesë

Ku mund ta gjej të vërtetën?

Presidenti Rasëll M. Nelson, dëshmoi:

“Perëndia është burimi i gjithë së vërtetës. Kisha e Jezu Krishtit e Shenjtorëve të Ditëve të Mëvonshme e përqafon të gjithë të vërtetën që Perëndia ua përçon fëmijëve të Tij, qoftë e mësuar në një laborator shkencor ose e marrë nëpërmjet zbulesës së drejtpërdrejtë prej Tij.” (“Çfarë Është e Vërtetë?” Liahona, nëntor 2022, f. 30)

Çfarë mund të më ndihmojë t’i dalloj burimet e vërteta?

Presidenti Diter F. Uhtdorf, asokohe i Presidencës së Parë, shpjegoi:

“Ju vërtet keni një shoqërues të fuqishëm dhe udhërrëfyes të denjë për t’i besuar në këtë kërkim të vazhdueshëm për të vërtetën. Kush është ai? Është Fryma e Shenjtë. Ati ynë Qiellor e dinte sa e vështirë do të ishte për ne që të shoshisnim përmes gjithë zhurmës konkurruese dhe të zbulonim të vërtetën gjatë vdekshmërisë. Ai e dinte se ne do të shihnim vetëm një pjesë të së vërtetës dhe Ai e dinte se Satani do të përpiqej të na mashtronte. Prandaj Ai na dha dhuratën qiellore të Frymës së Shenjtë për të na ndriçuar mendjen, për të na mësuar dhe për të na dëshmuar për të vërtetën.” (“Ç’është e Vërteta?” [takim shpirtëror mbarëbotëror për të rinjtë në moshë madhore, 13 janar 2013], Gospel Library [Biblioteka e Ungjillit])

Manuali i Përgjithshëm i Kishës së Jezu Krishtit të Shenjtorëve të Ditëve të Mëvonshme thotë sa vijon:

“Në botën e sotme është e lehtë të gjendet dhe të shpërndahet informacioni. Ky mund të jetë një bekim i madh për ata që kërkojnë të edukohen dhe informohen. Megjithatë, shumë burime informacioni nuk janë të besueshme dhe nuk të lartësojnë moralisht. Disa burime përpiqen të nxitin zemërim, grindje, frikë ose teori të pabaza komplotesh (shihni te 3 Nefi 11:30; Mosia 2:32). Prandaj është e rëndësishme që anëtarët e Kishës të jenë të urtë teksa kërkojnë të vërtetën.

Anëtarët e Kishës duhet të kërkojnë dhe të shpërndajnë vetëm burime informacioni të besuara, të besueshme dhe të bazuara në fakte. Ata duhet t’i shmangin burimet që janë spekulative ose të bazuara në thashetheme. Udhërrëfimi i Frymës së Shenjtë, së bashku me studimin e kujdesshëm, mund t’i ndihmojë anëtarët që të dallojnë të vërtetën dhe të gabuarën (shihni te Doktrina e Besëlidhje 11:12; 45:57). Në çështjet e rregullores së doktrinës dhe Kishës, burimet autoritare janë shkrimet e shenjta, mësimet e profetëve të gjallë dhe Manuali i Përgjithshëm.” (Manuali i Përgjithshëm: Shërbimi në Kishën e Jezu Krishtit të Shenjtorëve të Ditëve të Mëvonshme, 38.8.41, Gospel Library [Biblioteka e Ungjillit])

Ku mund ta gjej doktrinën e saktë të Jezu Krishtit?

Plaku Nil L. Andersen, i Kuorumit të Dymbëdhjetë Apostujve, dha mësim:

“Disa e vënë në dyshim besimin e tyre, kur gjejnë një thënie të një udhëheqësi të Kishës dekada më parë, që duket në mospajtim me doktrinën tonë. Ekziston një parim i rëndësishëm që qeveris doktrinën e Kishës. Doktrina mësohet nga të 15 pjesëtarët e Presidencës së Parë e të Kuorumit të Të Dymbëdhjetëve. Ajo nuk fshihet në një paragraf të turbullt të një bisede. Parimet e vërteta mësohen shpesh e nga shumëkush. Doktrina jonë nuk është e vështirë për t’u gjendur.” (“Prova e Besimit Tuaj”, Liahona, nëntor 2012, f. 41)

Veprimtari Plotësuese të të Mësuarit

Rëndësia e përpjekjes

Merreni parasysh të jepni thënien në vijim nga Presidenti Rasëll M. Nelson:

“Nxënësit dembelë dhe dishepujt e shkujdesur gjithmonë do të hasin vështirësi për të grumbulluar qoftë edhe një pjesëz besimi.

Për të bërë mirë cilëndo gjë, duhet përpjekje. Bërja një dishepull i vërtetë i Jezu Krishtit nuk është një përjashtim i kësaj. Rritja e besimit dhe e mirëbesimit tuaj tek Ai, kërkon përpjekje.” (“Krishti u Ringjall; Besimi tek Ai do të Zhvendosë Malet”, Liahona, maj 2021, f. 103)

Ftojini nxënësit të tregojnë se në ç’mënyrë mendojnë se lidhet kjo thënie me drejtimin te burimet e caktuara në mënyrë hyjnore për ndihmë, me gjetjen e përgjigjeve për pyetjet tona.

Për një shembull të kërkimit me zell kundrejt të mësuarit dembel, shpjegoni se profeti Lehi i Librit të Mormonit i tregoi familjes së tij një ëndërr që pa. Familja e tij nuk e kuptoi ëndrrën. Ftojini nxënësit të lexojnë tek 1 Nefi 10:17–19; 11:1 dhe 1 Nefi 15:1–3, 6–9, duke krahasuar përgjigjen e Nefit për Lamanin dhe Lemuelin. Mund të bëni më pas pyetje si vijueset:

• Çfarë mësuat nga shembujt e Nefit dhe të vëllezërve të tij?

• Në ç’mënyrë mendoni se është bekim që Perëndia pret nga ne të bëjmë përpjekje në vend që thjesht të na japë përgjigjet?

Këshillimi me burime të besueshme

Për t’i ndihmuar nxënësit të dinë se si ta vlerësojnë cilësinë e burimeve të tyre të informacionit, merreni parasysh të jepni këshillat në dispozicion në artikullin “Këshillohuni me Burime të Besueshme”. Ju mund t’i ndani këshillat midis nxënësve dhe t’i ftoni ata ta përmbledhin atë që lexojnë dhe arsyen përse mendojnë se ajo këshillë është e rëndësishme.

Dallimi i së vërtetës prej të gabuarës

Nëse mendoni se nxënësit tuaj mund të kenë dobi nga diskutimi i mëtejshëm rreth dallimit të burimeve të besueshme, merreni parasysh t’i shkruani referencat vijuese në tabelë. Ju mund t’i organizoni nxënësit në dyshe, me çdo nxënës që studion një ose dy fragmente. Nxënësit mund t’ia shpjegojnë më pas tjetrit atë që mësuan rreth dallimit të burimeve të besueshme dhe jo të besueshme.

• Jakob [Bibël] 1:5–6

• Moroni 7:15–17

• Moroni 10:5–6

• Doktrina e Besëlidhje 1:37–38

Gjetja e të vërtetës në burime hyjnore

Merreni parasysh të shfaqni një pjesë ose të gjithë materialin filmik “Divinely Appointed Sources” [“Burime të Caktuara në Mënyrë Hyjnore”] (9:16) në mënyrë që nxënësit të mund të dëgjojnë përvojat që patën disa të rinj duke u drejtuar te burimet e caktuara në mënyrë hyjnore për të vërtetën. Ju mund ta shfaqni këtë material filmik para ose pas veprimtarisë ushtruese.