Zotërimi Doktrinor: Gjetja e Përgjigjeve për Pyetjet e Mia: Mësimi 164

Shqyrtimi i Temave dhe Pyetjeve për Ungjillin me një Këndvështrim të Përjetshëm

Përpjekja për t’i Parë Gjërat Siç i Sheh Zoti

Ne mund të mos gjejmë gjithmonë përgjigje të menjëhershme për pyetjet tona ose zgjidhje për problemet tona dhe kjo është në rregull. Këto çaste janë mundësi për të mirëbesuar tek Ati Qiellor dhe Jezu Krishti. Ata shohin atë që ne nuk mund ta shohim. Ata dinë atë që ne nuk e dimë. Ndërsa përpiqemi t’i shohim gjërat siç i shohin Ata, ne fillojmë t’i shohim pyetjet dhe shqetësimet tona në një dritë të ndryshme. Ky mësim mund t’i ndihmojë nxënësit t’i shqyrtojnë konceptet dhe pyetjet me një këndvështrim të përjetshëm.

Përgatitja e nxënësve: Ftojini nxënësit të krijojnë një mësim me sende ose analogji që mund të ilustrojë vlerën e të parit të gjërave nga një këndvështrim i ndryshëm. Atyre mund t’u jepet mundësia t’i japin idetë e tyre në fillim të orës mësimore.

Veprimtari të Mundshme të të Mësuarit

Këndvështrimi

Merreni parasysh t’i ftoni nxënësit të mendojnë për një mësim me sende ose analogji që mund të ilustrojë vlerën e të parit të gjërave nga një këndvështrim i ndryshëm. Ftojini ata t’ia tregojnë idetë e tyre klasës. Ose mund të paraqitni figurat e përfshira të titulluara “Shtëpitë – Këndvështrim i Kufizuar” dhe t’i ftoni nxënësit t’i diskutojnë pyetjet vijuese me një partner:

• Nëse mund të zgjedhësh një nga këto shtëpi tek e cila të banoje, kë do të zgjidhje? Përse?

Paraqiteni pjesën e dytë të figurave të përfshira të titulluar “Shtëpitë – Këndvështrim i Detajuar” dhe ftojini nxënësit të diskutojnë pyetjen e radhës.

• Si ndikon kjo perspektivë e shtuar në zgjedhjen tënde?

• Cilat janë situatat që mund të na ndihmojnë ndërsa i hasim kur i shohim gjërat me këndvështrime të ndryshme?

Imagjino sikur këto shtëpi përfaqësojnë pyetjet tona për ungjillin ose situata të jetës.

• Përse mund të jetë e rrezikshme të arrijmë në përfundime në lidhje me pyetjet ose situatat pa u përpjekur t’i shohim ato nga një këndvështrim më i gjerë?

Gjatë gjithë kursit të seminarit, nxënësit mund të kenë përcaktuar pyetje ose shqetësime vetjake për ungjillin. Nëse po, ftojini ata të mendojnë për një nga pyetjet e tyre. Nëse jo, mund t’i ftoni ata të ndalen tani për të marrë parasysh pyetjet ose shqetësimet që mund të kenë ata ose të tjerë. Ftojini nxënësit të reflektojnë plot lutje gjatë gjithë mësimit mbi mënyrën se si një këndvështrim i përjetshëm mund t’i ndihmojë ata të gjejnë përgjigje, zgjidhje ose të paktën më shumë paqe.

Lexoji paragrafët 8–10 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor (2023), duke kërkuar atë që mëson rreth shqyrtimit të koncepteve dhe pyetjeve me një këndvështrim të përjetshëm.

Kur nxënësit ta kenë mbaruar leximin, ftojini ata ta tregojnë atë që mësuan. Ndërsa flasin, mund të bëni një ose dy pyetje për ndjekjen e ecurisë si:

• Çfarë di ti rreth Atit Qiellor dhe Jezu Krishtit që të shtyn të provosh t’i shohësh gjërat siç i shohin Ata?

• Çfarë këshille do të jepje për t’i ndihmuar njerëzit t’i shohin pyetjet ose situatat e tyre me një këndvështrim të përjetshëm?

• Cilat fragmente të zotërimit doktrinor ose fragmente të tjera të shkrimit të shenjtë të ndihmojnë t’i shohësh gjërat me një këndvështrim të përjetshëm?

Mund t’i ftoni nxënësit të kërkojnë listën e fragmenteve të zotërimit doktrinor në materialin Dokumenti Bazë i Zotërimit Doktrinor për t’i ndihmuar ata t’i përgjigjen pyetjes së mëparshme.

Pas këtij diskutimi, jepini secilit nxënës një copë letër. Ftojini nxënësit të shkruajnë një përmbledhje me një fjali të asaj që kanë mësuar rreth shqyrtimit të koncepteve dhe pyetjeve me një këndvështrim të përjetshëm. Kur secili të ketë shkruar diçka, ftojini nxënësit t’i shkëmbejnë letrat në mënyrë rastësore me sa më shumë nxënës të ndryshëm që munden për 10 sekonda derisa ju të thoni “ndal”.

Thërritni emrin e disa nxënësve që të lexojnë fjalinë e shkruar në letrën që morën. Bashkërisht, nxënësit mund të kenë thënë diçka si: Shqyrtimi i pyetjeve tona me një këndvështrim të përjetshëm do të na ndihmojë t’i shohim ato më shumë siç i sheh Zoti.

Këshillojini nxënësit ta mbajnë letrën që morën. Këto do të përdoren më vonë në mësim.

Shembuj të një këndvështrimi të përjetshëm

Zgjidh një nga shembujt vijues nga shkrimet e shenjta. Kërko mënyrën se si një këndvështrim i përjetshëm ndikoi në pikëpamjen e tyre për këta individë.

Para se nxënësit ta fillojnë studimin e tyre, mund të jepni kontekst shtesë për secilin shembull. Atyre që lexojnë tregimin e Adamit dhe Evës, mund t’u shpjegoni se disa njerëz e shohin Rënien si diçka negative për shkak se ajo solli për herë të parë mëkatin, vdekjen dhe sprovat në botë. Për sa i përket Jobit, mund të tregoni se shumë pjesëtarë të familjes së tij ndërruan jetë, ai humbi zotërimet e tij dhe përjetoi sprova shëndetësore të rënda.

1. Adami dhe Eva shpjegojnë Rënien. Moisiu 5:10–11

2. Jobi jep dëshminë e tij gjatë sprovave. Jobit 19:25–26

• Çfarë prove pe që ky person e shihte situatën e tij ose të saj brenda kontekstit të planit të Shpëtimit të Atit Qiellor?

• Si ndikoi dëshmia e këtij personi për Krishtin në mënyrën se si ai e pa situatën?

Pasi nxënësit ta tregojnë atë që gjetën, merreni parasysh t’i pyesni:

3. Cilët janë disa shembuj nga jeta e Jezu Krishtit ku Ai u përball me një situatë me një këndvështrim të përjetshëm?

Nëse kanë nevojë për ndihmë me gjetjen e një shembulli, mund t’i ftoni nxënësit të lexojnë tek Isaia 53:3–5, 10 dhe të diskutojnë arsyen përse, nga një këndvështrim i përjetshëm, “i pëlqeu Zotit ta rrihte [me mundime]” (Isaia 53:10). (Megjithëse Ati Qiellor trishtohej kur e shihte Jezu Krishtin të vuante, këndvështrimi i Tij i përjetshëm e lejoi Atë të shihte se Shlyerja e Birit të Tij ishte një pjesë thelbësore e planit të shpëtimit për të gjithë fëmijët e Tij.)

Përsiat nëse ka situata me të cilat po përballesh ku ndjekja e shembujve të Atit Qiellor dhe të Jezu Krishtit mund të të ndihmojë t’i shohësh gjërat me një këndvështrim të përjetshëm.

Nxënësit gjithashtu mund të kenë dobi nga të parit e një shembulli të ditëve të sotme të dikujt që i sheh pyetjet dhe rrethanat e tij me një këndvështrim të përjetshëm. Merreni parasysh të shihni “Shqyrtimi i Pyetjeve me një Këndvështrim të Përjetshëm” (2:56), që është në dispozicion në ChurchofJesusChrist.org. Në këtë material filmik, një e re shqyrton pyetjen: “Nëse vërtet ka një Perëndi të dashur, përse do t’i lejonte Ai njerëzit që të vuajnë?” Pas materialit filmik, nxënësit mund të tregojnë pikëpamjet shtesë që kanë fituar rreth shikimit të gjërave me një këndvështrim të përjetshëm.

Ushtrohu

Për veprimtarinë e radhës, nxënësit mund të përdorin të njëjtat letra që morën më parë pasi të kalojnë përqark një përmbledhje me një fjali të një këndvështrimi të përjetshëm.

Shkruaj një pyetje ose situatë me të cilën mund të përballet një adoleshent, që do të ishte e dobishme të shihej me një këndvështrim të përjetshëm.

Pasi çdo nxënës të ketë shkruar diçka, ftojini ata sërish të vazhdojnë të shkëmbejnë letra për 10 sekonda derisa ju të thoni “ndal”. Nxënësit mund të vendosen më pas në dyshe për pjesën e mbetur të veprimtarisë.

Me një partner, diskuto një ose të dyja çiftet vijuese të pyetjeve në lidhje me atë që është shkruar në letrat që more. Vër re që pyetja e parë në secilin çift vjen nga paragrafi 8 i pjesës “Marrja e Njohurisë Shpirtërore” të materialit Dokumenti Bazë i Zotërimit Doktrinor.

1. Çfarë di unë tashmë për Atin Qiellor, planin e Tij dhe mënyrën se si Ai i trajton fëmijët e Tij?

   Si mund ta ndryshojë kjo mënyrën se si shihet pyetja ose situata?

2. Cilat mësime të ungjillit e qartësojnë ose lidhen me këtë koncept apo çështje?

   Cili është një shkrim i shenjtë ose thënie nga një udhëheqës i Kishës që e mbështet këtë mësim?

Pasi t’i diskutosh përgjigjet e tua, shkruaj një përgjigje të shpejtë në fletët e tua.

Kur nxënësit të kenë mbaruar, kërkoni që disa vullnetarë t’ia lexojnë pyetjen ose situatën në letrën e tyre klasës, më pas të tregojnë përgjigjet që kanë shkruar. Mund t’i kërkoni pjesës tjetër të klasës pikëpamje shtesë që mund ta ndihmojnë një adoleshent ta shohë pyetjen ose situatën me një këndvështrim të përjetshëm.

Jepni dëshminë tuaj se Ati Qiellor mund të na ndihmojë t’i shohim gjërat nga këndvështrimi i Tij ndërsa drejtohemi tek Ai. Mund të tregoni gjithashtu se në kohët kur mendojmë se nuk mund ta shohim ende atë që sheh Ai, ne mund të mirëbesojmë gjithsesi tek Ai (shihni te Fjalët e Urta 3:5–6). Inkurajojini nxënësit të përpiqen vazhdimisht t’i shqyrtojnë pyetjet dhe situatat e tyre me një këndvështrim të përjetshëm.

Burime Shtesë

Si mund të ndikojë besimi im tek Ati Qiellor dhe Jezu Krishti në këndvështrimin tim?

Plaku Dejvid A. Bednar, i Kuorumit të Dymbëdhjetë Apostujve, dha mësim:

“Besnikëria nuk është marrëzi apo fanatizëm. Përkundrazi, do të thotë t’i mirëbesojmë dhe ta vendosim besimin tonë te Jezu Krishti si Shpëtimtari ynë, tek emri i Tij dhe te premtimet e Tij. Teksa ‘shko[jmë] përpara me një vendosmëri në Krisht, duke pasur një ndriçim të përkryer të shpresës dhe një dashuri për Perëndinë dhe për të gjithë njerëzit’ [2 Nefi 31:20], ne bekohemi me një këndvështrim dhe largpamësi të përjetshme që shtrihen shumë përtej aftësisë sonë të kufizuar në vdekshmëri.” (“Ne do t’i Provojmë me Këtë”, Liahona, nëntor 2020, f. 11)

Presidenti Diter F. Uhtdorf, ndërkohë që shërbente si anëtar i Presidencës së Parë, tregoi:

“Besimi është mirëbesim – mirëbesim se Perëndia e sheh atë që ne nuk mund ta shohim, dhe se Ai e di atë që ne nuk e dimë [shih tek Isaia 55:8–9]. Nganjëherë, mirëbesimi në largpamësinë dhe gjykimin tonë nuk është i mjaftueshëm.

E mësova këtë gjë si pilot i linjës ajrore në ditët kur më duhej të fluturoja përmes mjegullës ose reve të dendura dhe mund të shihja vetëm pak metra larg. Më duhej të mbështetesha te mjetet që më tregonin se ku isha dhe për ku po drejtohesha. Më duhej të dëgjoja zërin e kontrolluesit të qarkullimit ajror. Më duhej të ndiqja udhërrëfimin e dikujt me informacion më të saktë se ai që kisha unë. Dikë që nuk mund ta shihja, por të cilin kisha mësuar ta mirëbesoja. Dikë që mund të shihte atë që nuk mund ta shihja unë. Më duhej të mirëbesoja dhe të veproja sipas atij informacioni që të arrija i sigurt në vendmbërritjen time.” (“Kati i Katërt, Dera e Fundit”, Liahona, nëntor 2016, f. 17)

Si mund të më ndihmojë një këndvështrim i përjetshëm të bëj zgjedhje?

Presidenti Rasëll M. Nelson shpjegoi:

“Kur bëni zgjedhje, ju ftoj të shihni në një këndvështrim për të ardhmen, një këndvështrim të përjetshëm. Vëreni Jezu Krishtin të parin, sepse jeta juaj e përjetshme varet nga besimi juaj tek Ai dhe te Shlyerja e Tij. Ajo varet edhe nga bindja juaj ndaj ligjeve të Tij. Bindja shtron udhën për një jetë të gëzueshme për ju sot dhe për një shpërblim të madhërishëm, të përjetshëm nesër.

Kur të përballeni me një mëdyshje, mendoni çelestialisht! Kur t’ju vërë në provë tundimi, mendoni çelestialisht! Kur jeta ose njerëz të dashur t’ju lënë në baltë, mendoni çelestialisht! Kur dikush të vdesë para kohe, mendoni çelestialisht. Kur dikush lëngon gjatë nga një sëmundje shkatërrimtare, mendoni çelestialisht. Kur trysnitë e jetës të mblidhen mbi ju, mendoni çelestialisht!” (“Mendoni Çelestialisht!” Liahona, nëntor 2023, f. 118)

Veprimtari Plotësuese të të Mësuarit

Konteksti historik

Në paragrafin 9 të materialit Dokumenti Bazë i Zotërimit Doktrinor, nxënësit do të lexojnë rreth rëndësisë së “marr[jes] parasysh [të] kulturë[s] dhe standarde[ve të] sjelljes së periudhës kohore në vend që të japim këndvështrime dhe qëndrime bashkëkohore”. Ju mund t’i ndihmoni nxënësit ta kuptojnë më mirë këtë duke bërë një pyetje si:

• Cilat janë disa standarde të kulturës së kohëve të Dhiatës së Vjetër që do të dukeshin të çuditshme nëse do të zbatoheshin sot?

Përgjigjet e mundshme mund të përfshijnë:

Sakrificat

Trashëgimia e të parëlindurit

Martesa levirate

• Cilat janë disa standarde të kulturës së sotme që do të dukeshin të çuditshme nëse do të bëheshin në kohët e Dhiatës së Vjetër?

• Si mund të jetë i dobishëm ky këndvështrim kur shqyrtoni ngjarje historike?

Plani i shpëtimit

Mund t’i ndihmoni nxënësit të ushtrohen për t’i parë konceptet brenda kontekstit të planit të shpëtimit duke e kopjuar grafikun vijues në tabelë. Kolona 1 është plotësuar tashmë. Ftoni nxënës të vijnë në tabelë dhe të shkruajnë në kolonën 2 temat ose shqetësimet që do të ishin të dobishme të shihen nga një këndvështrim i përjetshëm. Për shembull, ata mund të shkruajnë dëlirësia, fjala e urtësisë, vdekja, vlera e shpirtrave, martesa, etj.

1. Plani i Shpëtimit	2. Tema ose Shqetësime
1. Plani i Shpëtimit Jeta para lindjes Jeta në vdekshmëri Jeta pas vdekjes Shlyerja e Jezu Krishtit

Pasi nxënësit ta kenë mbushur kolonën e dytë, vendosini ata në grupe të vogla dhe ftojini ta diskutojnë pyetjen vijuese duke zgjedhur fjalë ose fraza nga secila kolonë për të plotësuar hapësirat përkatëse bosh. Ata mund t’i përgjigjen pyetjes shumë herë, duke zgjedhur mënyra të ndryshme për të plotësuar hapësirat bosh çdo herë.

Çfarë kuptoni rreth (zgjidhni një temë nga kolona 1) që mund ta ndihmojë dikë ta shohë (zgjidhni diçka nga kolona 2) me një këndvështrim të përjetshëm?

Një shembull i mënyrës se si mund të plotësohet pyetja është:

Çfarë kuptoni rreth jetës pas vdekjes që mund ta ndihmojë dikë ta shohë martesën me një këndvështrim të përjetshëm?

Riformulimi i pyetjeve

Pasi të shihni materialin filmik “Shqyrtimi i Pyetjeve me një Këndvështrim të Përjetshëm”, ju mund t’i jepni çdo nxënësi fletushkën “Riformulimi i Pyetjeve”. Ftojini nxënësit të bëjnë sa vijon:

1. Zgjidhni një pyetje ose problem shoqëror. Shkruajeni atë në qendër të secilës kornizë.

2. Mendoni rreth hamendësimeve të ndryshme që ju ose dikush me një këndvështrim sipas botës mund të ketë mbi temën. Shkruajini këto rreth kornizës “Këndvështrim i kufizuar”.

3. Shiheni të njëjtën pyetje ose problem shoqëror me një këndvështrim të përjetshëm. Përsiatni pyetje të tilla si: “Çfarë di unë tashmë rreth Atit Qiellor, planit të Tij dhe mënyrës se si Ai vepron me fëmijët e Tij?” dhe “Cilat mësime të ungjillit e qartësojnë ose lidhen me këtë koncept apo çështje?” Shkruajini mendimet tuaja rreth kornizës “Këndvështrim i përjetshëm”.

   

Përballimi i sprovave me një këndvështrim të përjetshëm

Në vend që të shihni materialin filmik “Shqyrtimi i Pyetjeve me një Këndvështrim të Përjetshëm”, ju mund të shihni një material filmik të një personi që përjeton një sprovë. Ftojini nxënësit të kërkojnë mënyrën se si personi në materialin filmik u përball me sprovën e tij ose të saj me një këndvështrim të përjetshëm. Një alternativë e mundshme mund të jetë:

“Tiparet e Lumturisë” nga kodi kohor 8:11 deri në 9:12. Plaku Geri B. Sebin, i Të Shtatëdhjetëve, tregoi mënyrën se si vajza e tij adoleshente iu qas operacionit të saj për transplantin e mushkërive me një këndvështrim të përjetshëm.