Apendiks

Mga Ideya nga Nagkalain-lain

Mga Ideya nga Nagkalain-lain

Kini nga kapanguhaan naglakip og lainlaing paagi sa pagtabang sa mga estudyante nga aktibong moapil sa mga leksiyon. Bisan ang makapadani nga mga teknik, kon masubrahan og gamit, mahimong dili epektibo o makalaay. Bisan og dili ka kinahanglan nga mamili og mga pamaagi aron lang magkalainlain, ikonsiderar kon unsaon pag-usab-usab ang mga pamaagi sa imong pagtudlo panahon sa kada leksiyon. Ang paggamit og lainlaing pamaagi sa pagtudlo makatabang aron matandog ang daghang mga estudyante. Ania ang pipila ka pangutana nga ikonsiderar kon magpili ka og mga kalihokan nga ilakip sa usa ka kasinatian sa pagkat-on:

• Ang kalihokan ba nagpasiugda og kasinatian nga nakasentro kang Kristo, nakabase sa kasulatan, ug nakapunting sa mga tigkat-on? Tan-awa sa Pagsagop ug Pagpahiangay sa Kurikulum sa Seminary alang sa dugang nga impormasyon bahin niini.

• Ang kalihokan ba nagdapit sa Espiritu Santo sa pagtudlo ug pagpamatuod? Hunahunaa kon sa unsang paagi ang kalihokan makaapekto sa balaanong palibot nga gikinahanglan aron mahimo sa Espiritu Santo ang Iyang tahas.

• Sa unsang paagi nga ang pamaagi nagrepresentar sa sagradong pulong sa Dios? Ang mga kasulatan ug mga pulong sa mga propeta kinahanglang ipresentar sa dungganon ug balaang paagi. Ang pamaagi kinahanglang dili makapakunhod sa mensahe sa mga kasulatan.

• Gitratar ba ang kada estudyante uban ang dignidad? Tinguhaa kanunay nga mapasiugda ang mga pagbati sa panaghiusa ug gugma. Likayi ang mga kalihokan nga posibleng makapahimo sa estudyante nga mobati nga dili komportable, mawad-an og kadasig, o mobati nga nag-inusara.

• Ang kalihokan ba angayan sa oras sa klase nga igahin alang niini? Ang panahon nga imong gigahin sa pagpundok uban sa mga estudyante sa seminary bililhon nga higayon. Mahimong epektibo ang mga kalihokan bisan og dili kaayo mogahin og taas nga panahon.

• Pila ka oras ug pila ka kapanguhaan ang gikinahanglan aron maandam ang kalihokan? Importante nga magamit nimo pag-ayo ang bililhong panahon ug mga kapanguhaan.

Mahimo nimong gamiton kining mga ideya sa daghang bahin sa tibuok leksiyon. Sa daghang higayon, ang paghatag og modelo kon unsay ipahimo sa mga estudyante makatabang nila nga mahimong mas malamposon. Seguroa nga nasabtan nimo pag-ayo ang kalihokan ug makahatag ka og klaro nga mga instruksiyon ug usa ka sampol, kon makatabang, sa dili pa sugdan sa mga estudyante ang kalihokan. Kini nga mga kalihokan giorganisar sa mosunod nga mga seksiyon:

1. Tun-i ang kasulatan aron masabtan ang dagan sa istorya ug ilha ang mga baroganan o doktrina

2. Palawomi ang pagsabot gamit ang mga gikutlo ug mga kasulatan

3. Ipakigbahin ang ilang nakat-onan

4. Paghimo og representasyon sa ilang nakat-onan

Aron mohatag og feedback o mosugyot og dugang nga mga ideya, palihog pag-email sa [e-mail]. Apila diha sa hilisgotan ang “Mga Ideya nga Nagkalain-lain.”

1. Tun-i ang kasulatan aron masabtan ang dagan sa istorya ug ilha ang mga baroganan o doktrina

Ang mga leksiyon kasagaran naglakip og mga kalihokan diin tun-an sa mga estudyante ang sunod-sunod sa mga bersikulo aron masabtan ang mahinungdanong konteksto ug dagan sa istorya sa usa ka hugpong nga igong mailhan ang mga baroganan o doktrina. Ang mosunod nga mga kalihokan mao ang pipila ka paagi nga matabangan nimo ang mga estudyante sa paghimo niini.

Interpretasyon sa art

Gamita ang art sa ebanghelyo aron sa paghisgot og usa ka istorya. Pagpakita og imahe gikan sa Media Library sa Simbahan ug dapita ang mga estudyante sa pagtuon sa mga bersikulo nga gipakita diha sa imahe. Ipangutana sa mga estudyante ang mosunod:

• Unsa ang gilakip sa tagsulat gikan sa mga bersikulo sa kasulatan?

• Unsa ang artistikong interpretasyon (dili makita diha sa teksto)?

• Unsa ang inyong usbon base sa unsay inyong nabasa?

Laing ideya: Imbes ipakita ang tibuok litrato sa sinugdanan sa klase aron sugdan ang diskusyon, bahina ang litrato ngadto sa mga piraso. Anam-anama og pakita ang mga piraso ug ipatag-an sa mga estudyante kon unsay nahitabo diha sa tibuok litrato. Hangyoa sila nga ihulagway ang ilang nakita ug tagnaon ang wala nila makita.

Laing ideya: Pagpili og pipila ka imahe sa Manluluwas ug ibutang kini diha sa pisara. Dapita ang mga estudyante nga hinay nga tan-awon ang kolor, gipunting, ug ang layout sa mga imahe ug ilhon kon unsay gitudlo sa matag usa bahin kon kinsa si Jesukristo. Human maila ang baroganan gikan sa mga kasulatan o sa usa ka pamahayag gikan sa mga lider sa Simbahan, mahimo kang mangutana sama sa mosunod:

• Hain sa mga litrato ni Kristo nga para ninyo nagrepresentar sa baroganan nga inyong nakaplagan ug ngano?

• Hain niini nga mga litrato ni Jesus ang makatabang ninyo nga mabati ang kaimportante niini nga kamatuoran?

• Unsay gusto ninyong mahibaloan sa usa ka higala bahin kang Jesukristo kon maghunahuna niini nga kamatuoran?

Dugangi og dayalogo ang usa ka ilustrasyon

Kopyaha ang mga litrato gikan sa Mga Istorya sa Kasulatan alang sa mga Bata ug i-paste kini diha sa usa ka handout para sa mga estudyante. Pagdugang og mga word bubble diin pwedeng isulat sa mga estudyante kon unsay isulti sa mga karakter base sa mga kasulatan.

Laing Ideya: Paglakip og mga litrato nga gikan sa Mga Istorya sa Kasulatan alang sa mga Bata ug dapita ang mga estudyante sa paggamit sa mga kasulatan sa pag-summarize sa unsay nahitabo diha sa mga litrato. Pananglitan tan-awa sa “Leksiyon 68: Ruth” ug “Leksiyon 151: Jonas.”

Mga Komentetor

Pangutan-a ang mga estudyante kon unsay gibuhat sa mga komentetor atol sa mga kalihokan sa isport. Isulat sa pisara ang mga tubag sa mga estudyante. Pipila ka sampol nga ang mga komentetor:

• Motabang sa uban nga makasabot sa unsay nahitabo.

• Mangutana mahitungod sa mga sitwasyon (pananglitan, “Naghunahuna ko kon nganong …”).

• Ipakigbahin ang ilang mga opinyon sa mga desisyon.

• Ipasabot kon dunay butang nga wala masabti ug nganong importante kana.

• Ipasabot kon ang butang maayo ug nganong importante kana.

• Isaulog sa mga kalamposan ug mosimpatiya sa mga kapakyasan.

Dapita ang mga estudyante nga mahimong mga komentetor sa usa ka istorya diha sa mga kasulatan. Mahimo silang mobasa og pipila ka bersikulo, dayon isip usa ka klase o sa gagmayng mga grupo, pwede nilang ipakigbahin ang bisan unsang mga punto diha sa pisara. Dasiga sila sa paghimo sa istorya sa kasulatan nga klaro ug makapadani.

Istorya nga balita o book report

Hatagi ang kada estudyante og seksiyon sa kasulatan nga ilang tun-an. Dayon hatagi sila og mga kinahanglanon sa istorya nga balita o book report (sa papel man o diha sa pisara). Pwedeng apil niini ang pangunang mga karakter, dagan sa istorya, usa o duha ka leksiyon nga nakat-onan (nagkutlo sa mga bersikulo kon diin kini gikan), ug ang paggamit para sa usa ka tin-edyer. Hatagi og panahon ang mga estudyante sa pagpakigbahin ngadto sa laing estudyante sa unsay ilang giandam.

Laing ideya: Sa gamayng grupo, pwedeng kuhaon sa kada estudyante ang usa ka bahin sa istorya o book report: pangunang mga karakter, dagan sa istorya, mga leksiyon, o kon unsaon paggamit.

Pag-ila sa mga pangutana

Human mabasa sa mga estudyante ang hugpong sa kasulatan, dapita sila sa paglista og mga pangutana nga makatabang ang mga bersikulo sa pagtubag. Hagita ang mga estudyante nga magsulat og makahuloganon, may kalabotan nga mga pangutana para sa usa ka tin-edyer, kay sa yano nga makapasiksik nga mga pangutana. Pananglitan, imbes mangutana: “Unsay giingon ni Alma bahin sa hugot nga pagtuo? Unsay iyang giingon nga dili usa ka hugot nga pagtuo?” pwedeng mangutana ang mga estudyante nga “Unsa ang kinahanglan nakong buhaton aron makahibalo sa akong kaugalingon nga ang usa ka butang nga gitudlo sa Manluluwas tinuod?” Kon dunay mas daghang hugpong sa kasulatan kay sa usa nga kinahanglang tun-an sa mga estudyante, pwede nilang ilista ang ilang mga pangutana ug ipakigbahin kini sa usa ka estudyante nga nagtuon og laing hugpon. Pwedeng pangitaon ug hunahunaon sa mga estudyante ang mga tubag sa mga pangutana sa ilang mga klasmeyt.

Interbyoha ang tagsulat

Hangyoa ang mga estudyante sa paghunahuna nga sila ang tagsulat sa usa ka asoy sa kasulatan ug dunay usa ka tawo nga mag-interbiyo nila bahin sa ilang gisulat. Pwedeng basahon sa mga estudyante ang asoy sa kasulatan ug magpulihanay sa mga tahas isip tig-interbiyo ug tagsulat. Pipila sa mga pangutana nga pwedeng ipangutana sa tig-interbiyo mao ang:

• Unsa ang pipila ka aspeto niini nga mga bersikulo nga dili nimo gustong malaktawan sa mga magbabasa?

• Unsa ang imong isulti nga pangunang punto o usa sa imong mga pangunang punto?

• Sa unsang paagi nimo gilaoman nga gamiton kini sa mga magbabasa sa ilang kinabuhi?

Dapita ang mga estudyante sa pagpakigbahin sa unsay ilang nakat-onan gikan sa kasinatian. Gamita ang ilang mga komento aron isulti ang gipabaga [bolded] nga kamatuoran.

Pagparespares

Paghatag og pipila ka pakisayran sa kasulatan sa usa ka kolum ug ipares ang mga kamatuoran sa laing kolum nga wala mahan-ay. Pwedeng magtuon ug magparespares ang mga estudyante.

Importante nga mga Kamatuoran para sa Atong Kinabuhi

Kon ang mga estudyante magtuon og kapitulo sa kasulatan nga naglakip og daghang kamatuoran nga ilang mailhan, pwede nimo silang pasugdon pinaagi sa pagtuon nga silasila ra. Ang matag usa ka estudyante makahukom kon unsa ang ilang gituohan nga tulo o upat ka labing importanteng mga kamatuoran o mga ideya sa hugpong ug isulat kini. Dayon pwedeng nimong i-organisar ang mga estudyante ngadto sa duha ka grupo ug itandi ang mga kamatuoran nga ilang nailhan. Ang matag pares sa mga estudyante motino kon unsay para nila ang duha ka labing importanteng kamatuoran alang sa ilang kinabuhi ug irekord kini. Pahinumdom: Ang mga ideya mahimong lahi gikan sa ilang orihinal nga upat. Dayon ang matag pares mag-uban sa laing paresan aron makaporma og upat sa matag grupo; magdungan, ang upat ka estudyante nga ipakigbahin ug itandi ang ilang mga ideya ug magtinabangay aron matino ang usa ka labing importanteng kamatuoran diha sa teksto alang nila.

Litrato sa sunod-sunod nga panghitabo

Ipakita ang pipila ka mga hulagway nga nagrepresentar sa istorya sa kasulatan nga tun-an sa mga estudyante. Ipakita ang mga bersikulo nga basahon sa mga estudyante. Dapita ang mga estudyante nga ibutang ang mga hulagway sa husto nga pagkahan-ay.

Pag-diagram sa panghitabo sa istorya

Tabangi ang mga estudyante nga ilhon ang doktrina o mga baroganan nga gitudlo sa mga asoy sa kasulatan gamit ang dayagram sa panghitabo sa istorya. Tinoa ang lain-laing elemento sa panghitabo sa istorya, lakip ang mosunod:

1. Ang sinugdanan nga sitwasyon: Kini mahimong maglakip kon kinsa ang nalambigit, ang sinugdanan sa mga kahimtang, ingon man kon diin ug kanus-a kini nahitabo.

2. Nagtubo nga panagbangi o aksiyon: Ilha ang mga kausaban nga nakaapekto sa kinabuhi sa mga tawo diha sa asoy.

3. Labing mahinungdanong gutlo: Kini ang labing importanteng punto sa istorya. Sagad naay dakong kausaban, sama sa nabuntog sa usa ka tawo ang usa ka babag o dunay usa ka higayon sa pagdiskobre.

4. Pagkunhod sa aksiyon: Kini ang mga sangputanan sa labing mahinungdanong gutlo dihang mikunhod na ang mga aksiyon.

5. Resolusyon: Kini naghulagway sa bag-ong pagsabot nga naangkon sa mga tawo tungod sa ilang kasinatian.

Isulat sa pisara ang mga pakisayran sa kasulatan alang sa matag elemento sa panghitabo. Dapita ang mga estudyante nga basahon ang mga bersikulo para sa kada elemento sa panghitabo sa istorya ug pagdrowing og litrato sa unsay ilang gibasa o kaha paghimo og lista sa mahinungdanong mga hitabo. Kon mahuman na ang mga estudyante sa kataposang lakang, dapita sila nga tan-awon ang katibuk-ang asoy ug magsulat og pahayag sa kamatuoran nga ilang nakat-onan.

Puzzle

Paghimo og simpleng puzzle gikan sa hulagway nga nagrepresentar sa hugpong sa kasulatan. Isulat ang mga pakisayran sa kasulatan sa likod sa kada piraso. Mahimo nimong grupohon ang mga estudyante ug hatagan ang kada usa og usa ka piraso sa puzzle. Tun-an sa mga estudyante ang mga pakisayran ug mangandam sa pag-summarize sa ilang mga bersikulo. Samtang ipakigbahin sa mga grupo ang ilang summary ngadto sa klase, pwede nilang ipapilit sa pisara ang mga piraso aron maporma ang kompleto ang hulagway.

Teyatro sa Mambabasa

Para sa mga istorya nga dunay daghang dayalogo, himoang script ang mga bersikulo sa kasulatan aron dali rang makita sa matag usa ang ilang bahin. Paggamit og narrator nga maoy mobasa sa dili pang-istoryahanay nga mga bersikulo. Pwede nimong kopyahon ang mga bersikulo sa kasulatan ug markahan ang matag bahin gamit ang lainlaing kolor sa highlighter. Pahinumdom: Hinumdomi nga ang mga sakop sa Dios nga Kapangulohan kinahanglan kanunay nga irepresentar uban ang labing taas nga ang-ang sa balaanong pagtahod. Kon ang usa ka sakop sa Dios nga Kapangulohan, lakip ni Jesukristo, girepresentahan diha sa asoy sa kasulatan diin gusto nimong himoon kini nga kalihokan, ipabasa sa tigsaysay ang Iyang mga pulong.

Pagbasa sa kasulatan

Dunay daghang paagi sa pagbasa sa mga kasulatan diha sa klase. Ang kada usa naay lainlaing katuyoan. Ikonsiderar ang mga panginahanglan sa imong klase kon magpili og mga pamaagi sa pagbasa.

• Hilom nga pagbasa: Ang mga estudyante makabasa sa hilom sa ilang kaugalingon. Magtugot kini og panahon sa mga estudyante sa pagpamalandong sa mga kasulatan ug sa pagbasa sa kaugalingon nilang gipaspason.

• Parespares o grupo nga pagbasa: Nagtugot kini og daghang estudyante nga moapil ug mobati nga dili kaayo makulbaan bahin sa pagbasa og kusog.

• Magtutudlo o nakarekord nga audio: Pwedeng basahon sa magtutudlo ang teksto o i-play ang audio niini ug dapiton ang mga estudyante sa pagsunod.

• Pagbasa og kusog: Pwedeng dapiton ang tibuok klase nga dungan nga basahon ang mga bersikulo. Pwedeng moboluntaryo ang daghang estudyante sa pagbasa og kusog ngadto sa klase o pwedeng dapiton daan ug hatagan og panahon nga mangandam sa pagbasa. Pasaligi ang mga estudyante nga pwede silang “mobalibad” kon dili sila komportableng mobasa.

Mangita diha sa kasulatan

Pag-andam og pipila ka mga pangutana bahin sa sunod-sunod nga mga bersikulo sa mga kasulatan diha sa laing mga piraso sa papel. Bahina ang mga estudyante ngadto sa gagmay nga mga grupo. Ang matag grupo magpadala og usa ka estudyante sa atubangan sa klase diin hatagan nimo sila sa unang pangutana. Dayon pabalika ang mga estudyante sa ilang mga grupo, aron magtinabangay sila sa pagpangita sa tubag. Sa higayon nga makita na nila ang tubag, mopadala sila og laing estudyante nga modawat sa sunod nga pangutana nga tubagon. Kon gamay ang klase, ang mga estudyante mahimong mohimo niini nga kalihokan nga tagsa-tagsa.

Pagsundog sa usa ka sitwasyon

Ihan-ay ang klasrom sa paagi nga nagsundog sa sitwasyon sa istorya nga basahon diha sa mga kasulatan sa maong adlaw. Pananglitan, kon magbasa sa Ruth, laing mga karatola diha sa atubangan sa lawak nga mahimong magpasabot sa yuta sa Moab ug sa yuta sa Judah. Mahimong magsugod ang mga estudyante sa yuta sa Moab ug magbutang usab og mga name tag nga magpaila nila ni Naomi, Ruth, Orpah, Elimelech, ug ubang mga tawo diha sa istorya. Dayon mahimo nilang ipakita kon hain sa mga tawo ang mibalhin ngadto sa Judah, ug pwedeng tun-an sa mga estudyante kon ngano.

Signal sa paghunong

Ihatag ang gipabaga [bolded] nga kamatuoran ngadto sa mga estudyante. Hinayhinaya og basa ang pipila ka bersikulo ngadto kanila ug hangyoa sila nga ipataas ang ilang kamot o moingon og “Hunong” dihang mailhan nila ang usa ka butang diha sa bersikulo nga makatabang sa pagtudlo niana nga kamatuoran. Dayon dapita ang mga estudyante sa pagpakigbahin sa ilang nabantayan.

Summary sa estudyante

Sa dili pa ang klase, hatagi ang usa o daghang estudyante og konteksto o sulod bahin sa mga kasulatan nga gusto nimo nga ilang i-summarize para sa klase. Pwede nimong iprinta ug iapod-apod kini sa adlaw sa dili pa ang klase o ihatag kini ngadto sa mga estudyante inig sulod nila sa klase. Dapita sila nga mangandam sa pagpakigbahin sa summary dihang tawagon sa haom nga panahon sa klase.

Hubara ang usa ka bersikulo

Human mabasa sa mga estudyante ang hugpong sa kasulatan nga tingali maglisod sila sa pagsabot, pwede nimo silang papilion og bersikulo nga “hubaron” o isulat ang kada linya gamit ang kaugalingon nilang mga pulong. Kon kinahanglan, tabangi sila nga magpraktis sa pagpangita og mga kahulogan o sa paggamit sa ubang mga kasulatan ug mga himan sa pagtuon sa kasulatan aron masabtan ang lisod nga mga pulong o hugpong sa mga pulong.

Husto o sayop

Pagsulat og lainlaing husto o sayop nga mga pahayag bahin sa importanteng mga detalye sa usa ka hugpong sa kasulatan. Dapita ang mga estudyante nga ipahayag kon sa sinugdan uyon o supak ba sila sa mga pahayag. Dapita sila sa pagpangita og pruwebao batok sa mga pahayag samtang nagtuon sa hugpong sa kasulatan. Dayon, usbon og sulat sa mga estudyante ang sayop nga mga pahayag aron ihusto ni samtang nagbasa silag tudling sa kasulatan.

Laing Ideya: Magsulat og pipila ka pamahayag mahitungod sa hilisgotan sa leksiyon nga importante alang sa mga estudyante nga masabtan. Ilakip usab ang pipila ka sayop nga mga pamahayag. Dayon dapita ang mga estudyante sa pagtag-an kon kini husto ba o sayop. Mahimong pangitaon dayon sa mga estudyante ang mga kasulatan bahin sa leksiyon aron madiskobrehan kon kini sakto. Human sa kalihokan, dapita ang mga estudyante sa pagpakigbahin sa unsay ilang nakit-an. Seguroa nga klaro kini sa mga estudyante human sa kalihokan kon hain sa mga pahayag ang husto ug hain sa mga pahayag ang sayop.

Paggamit og litrato

Dapita ang mga estudyante nga mamili og litrato nga importante para nila. Pwedeng naa kini sa ilang selpon, o pwede silang magdala og usa gikan sa balay. Dapita sila nga mangandam sa pagpakigbahin sa mosunod:

• Ang background, naghulagway kon unsay nahitabo nga misangpot sa pagkuha sa litrato

• Ang pangunang punto o katuyoan sa litrato

• Pipila ka detalye nga importante para nila

Human sa pagpakigbahin sa mga estudyante, pwede nilang basahon ang hugpong sa kasulatan para sa leksiyon ug andamon ang samang tulo ka butang nga may kalabotan sa hugpong sa kasulatan.

Paghanduraw

Dapita ang mga estudyante sa paghanduraw og istorya sa kasulatan o ang bahin sa teksto nga gitun-an. Pwedeng magpiyong ang mga estudyante ug magpunting sa paghanduraw sa mga imahe nga gihulagway sa magtutudlo. Pananglitan, pwede nimong dapiton ang mga estudyante sa paghunahuna nga kauban sila sa mga anak sa Israel dihang natanggong sila tali sa Pulang Dagat ug sa kasundalohan sa Paraon nga nagsingabot aron atakihon sila. Unsay ilang bation? Unsay hitsura sa “panganod nga daw haligi” nga mibabag sa kasundalohan sa mga Ehiptohanon gikan sa kampo sa Israel? (tan-awa sa Exodo 14:19–20). Unsa kahay nahitabo dihang “gipasibog sa Ginoo ang dagat pinaagi sa kusog nga hangin gikan sa silangan nga mihuros sa tibuok gabii”? (Exodo 14:21). Tingali makaingon ka nga, “Hunahunaa nga naglakaw ka ‘sa taliwala sa dagat sa yutang mamala, ug nangahimo ang mga tubig nga ingon sa paril … sa [imong] too ug sa [imong] wala’ (Exodo 14:22). Unsa kahay reaksiyon sa mga tawo sa imong palibot? Unsa kaha ang ilang gisulti, o naglakaw kaha sila sa hilom? Unsay inyong hisgotan nianang gabhiona diha sa inyong kampo?” Padayona ang pagpangutana nga makatabang sa mga estudyante nga hunahunaon ang sitwasyon.

Word cloud

Dapita ang mga estudyante sa pag-ila sa mga pulong o hugpong sa mga pulong nga para nila importante sa usa ka tudling sa kasulatan. Paghimo og word cloud gamit ang labing komon o importanteng mga pulong ug hugpong sa mga pulong nga ilang nailhan. Ang gidak-on sa mga pulong pwedeng magpaila sa lebel sa kaimportante niini.

2. Palawmi ang pagsabot gamit ang mga kinutlo ug mga kasulatan

Kasagaran sa mga leksiyon maglakip og daghang tudling sa kasulatan gikan sa sumbanan nga mga buhat aron tabangan ang mga estudyante nga palawman ang ilang pagsabot sa mga baroganan o doktrina nga ilang gitun-an. Aduna usab mga leksiyon nga naglakip og daghang kinutlo gikan sa mga lider sa Simbahan. Ang mosunod nga mga kalihokan mao ang pipila ka paagi nga matabangan nimo ang mga estudyante sa pagtuon sa lainlaing kasulatan o mga kinutlo ug hatagi sila og kahigayonan nga makaplagan ang kamatuoran para sa ilang kaugalingon.

Paghimo og mga istasyon sa pagtuon

Pag-istablisar og mga istasyon sa pagtuon sa tibuok klasrom. Ang kada istasyon mahimong maglakip og naka-post nga mga instruksiyon diha sa mga bongbong o sa mga lamesa. Kini nga mga instruksiyon mahimong maglakip og mga kasulatan o mga kinutlo nga basahon ug mga pangutana o uban pang kalihokan nga kompletohon. Pwedeng molibot ang mga estudyante diha sa gagmayng grupo, nga hisgotan kon unsay ilang nakat-onan sa kada istasyon. Pwede usab nila kining tagsa-tagsaon og himo ug moirog base sa gipaspason nga gusto nila. Pwede kang magbutang og dakong piraso sa papel sa kada istasyon diin pwedeng irekord sa kada grupo o estudyante ang ilang mga tubag. Pwede nimong basahon ug pamalandongan ang gisulat sa uban.

Paghimo og kaugalingon nimong mga footnote

Dapita ang mga estudyante nga magdugang og mga footnote sa mga kasulatanan nga ilang gitun-an. Pwede kining idugang pinaagi sa paghimo og mga link tali sa mga tudling nga gitun-an ug sa uban pang kasulatan ug mga pahayag gikan sa mga lider sa Simbahan. Mahimong isulat sa mga estudyante ang mga cross-reference diha sa ilang mga margin o gamiton ang feature sa pag-link diha sa Librarya sa Ebanghelyo nga app. Pwede nilang ipakigbahin ang daghang dugang nga mgapakisayran kutob sa mahimo nga naghatag og daghang panabot bahin sa hilisgotan. Laing ideya: Pwedeng gamiton sa mga estudyante ang mga tag diha sa Librarya sa Ebanghelyo aron ikonektar ang lainlaing mga kasulatan ug mga kinutlo gikan sa usa ka leksiyon.

Kahulogan

Dapita ang mga estudyante nga ilhon ang usa ka pulong o konsepto nga lisod sabton. Ipapangita nila ang mga kapanguhaan lakip ang mga kasulatan ug mga himan sa pagtuon sa kasulatan (Giya ngadto sa mga Kasulatan, Mga Hilisgotan ug mga Pangutana) aron tabangan sila nga makakat-on og dugang bahin sa termino. Pahatagi nila og kahulogan ang termino o hugpong sa mga pulong sa kaugalingon nilang mga pulong.

Mga doodle note

Samtang nagtuon ang mga estudyante, hatagi sila og papel nga naay mga thought bubble o mga seksiyon diin pwede nilang isulat ang ilang nadiskobrehan.

Mga eksperto

Bahina ang mga estudyante ngadto sa gagmayng grupo ug i-asayn ang kada grupo og usa ka hilisgotan nga tun-an. Hatagi og panahon ang mga grupo nga tun-an ang mga hilisgotan aron ang matag sa kop sa grupo mahimong eksperto sa hilisgotan sa ilang grupo. Mahimo silang mogamit og mga pakisayran sa kasulatan, mga pahayag gikan sa mga lider sa Simbahan, sa Giya ngadto sa mga Kasulatan, o ubang kapanguhaan nga imong ihatag. Human ang igong panahon, bahina ang mga estudyante ngadto sa bag-ong mga grupo aron ang kada grupo naay “eksperto” sa laing hilisgotan. Dayon ipakigbahin sa mga estudyante ang unsay ilang nakat-onan bahin sa ilang mga hilisgotan.

Mga koneksiyon sa Alang sa Kalig-on sa mga Kabatan-onan

Human makatuon ang mga estudyante og tudling sa kasulatan o usa ka pahayag ug mailhan ang kamatuoran sa ebanghelyo, dapita sila sa pagpangita og mga pahayag gikan sa seksiyon o mga seksiyon sa Alang sa Kalig-on sa mga Kabatan-onan: Usa ka Giya sa Paghimo og mga Pagpili nga booklet nga mopalig-on sa kamatuoran nga ilang nadiskobrehan gikan sa hugpong sa kasulatan.

Pagtulun-an human sa usa ka pagtulun-an

Ipasulat pag-usab sa mga estudyante ang kada linya o kapahayag sa usa ka kasulatan diha sa ilang journal sa pagtuon. Kinahanglan silang magbutang og espasyo tali sa kada linya o kapahayag. Ang mga estudyante pwedeng magtuon pag-ayo ug mamalandong sa kada pulong sa maong linya o kapahayag. Pwede usab nilang pangitaon ang mga cross reference o uban pang impormasyon sa Librarya sa Ebanghelyo bahin sa maong linya. Dayon himoa na usab kini sa sunod nga linya sa tudling. Ang usa ka ehemplo niini makita sa “Ayaw Kahadlok,” Alang sa Kalig-on sa mga Kabatan-onan, Peb. 2021, 32.

Mapa sa hunahuna

Dapita ang mga estudyante sa pagbuhat og mapa sa hunahuna diha sa ilang journal sa pagtuon sama nianang naa sa ibabaw. Pwede nilang isulat ang baroganan o doktrina nga ilang nailhan diha sa tunga nga kahon. Dayon ipapangita nila ang dugang nga mga kasulatan o mga kinutlo nga magdugang sa ilang pagsabot. Pwede nilang idugang ang ilang mga panabot bahin sa hilisgotan diha sa gawas sa mga kahon. Dapita ang mga estudyante nga palapdan ang ilang mapa sa hunahuna pinaagi sa padayong pagdugang og mga kahon ug pagkonektar niini sa mga butang nga ilang gitun-an.

Nagsapaway nga mga ideya

Dapita ang mga estudyante nga mopili og duha o daghang mga hilisgotan gikan sa leksiyon nga parehas sa pipila ka paagi ug managlahi sa uban pang paagi. Paghimo og diagram nga parehas sa imahe sa ibabaw diin ang mga estudyante mohan-ay kon unsa ang komon niini nga mga butang ug kon unsay kalainan sa duha ka hilisgotan. Pwede kining himoon sa duha ka indibidwal nga naa sa usa ka asoy (pananglitan, si Jacob ug Esau) o duha ka hilisgotan (pananglitan, Pagsaylo ug ang sakramento).

Pakigbahin og mga panabot

Hatagi ang mga estudyante og kopya sa pahina sa usa ka hugpong sa kasulatan ug ipasulat nila ang ilang ngalan sa ibabaw niini. Hatagi sila og usa hangtod duha ka minuto nga basahon ang hugpon ug isulat ang panabot nga ilang nakat-onan gikan sa ilang pagtuon.

Pananglitan, mahimong markahan sa mga estudyante ang mga footnote, mopakigbahin og mga kinutlo nga gikan sa mga propeta, badlisan ang importanteng mga hugpong sa mga pulong, linginan ang espesyal nga mga pulong, isulat ang mga baroganan ug ipakigbahin ang ilang mga pagpamatuod ug uban pang panabot diha sa mga margin.

Human sa gihatag nga panahon, ipapasa ang ilang mga papel ngadto sa bag-ong estudyante aron masulat ang lainlaing panabot. Human sa pipila ka pagpasa, ipabalik nila ang ilang papel ngadto sa orihinal nga estudyante. Laing ideya: Imbes ang hugpong sa kasulatan, ang kada papel mahimong dunay lahi nga pangutana sa paggamit nga may kalabotan sa hugpong. Mahimong tubagon sa daghang estudyante ang mga pangutana gamit ang mga kasulatan ug mga pulong sa mga propeta ug ipakigbahin ang ilang mga pagpamatuod sa hilisgotan.

Sulagma nga pagpili og kinutlo

Pagbutang og daghang kinutlo nga nagtudlo og usa ka kamatuoran gikan sa leksiyon diha sa usa ka kalo o bag. Dapita ang mga boluntaryo nga mobunot og usa ka kinutlo gikan sa kalo ug ipakigbahin kon sa unsang paagi may kalabotan kini sa kamatuoran nga ilang nakat-onan ug kon unsay kahulogan niini ngadto kanila. Seguroa nga mahatagan sila og panahon sa pagbasa ug pagpangandam sa pagpakigbahin. Laing ideya: Dihang nakapakigbahin na ang mga estudyante, magbaylo sila og mga kinutlo ug mangita og bag-ong mga kapares diin nila ipakigbahin ang ilang bag-ong kinutlo.

Bracket sa kasulatan

Pagpili og 16 ka pakisayran sa kasulatan ug isulat ang kada pakisayran diha sa 16 ka linya sa gawas nga mga kolum sa bracket. Dapita ang mga estudyante nga magkapares o sa gagmayng grupo nga basahon ang mga kasulatan nga gipares sa kada bracket ug ilhon kon hain nga pakisayran ang labing makahuloganon para sa usa ka tin-edyer karon. (Mahimong makatabang ang paghatag og gibug-aton nga ang tanang kasulatan importante. Ang mga estudyante dili magdesisyon kon hain sa mga bersikulo ang mas maayo, kon unsa lang ang para nila nga labing makahuloganon kanila karon.) Ang tudling nga ilang gipili moadto sa sunod nga bracket. Padayong hisgotan sa mga estudyante ang kada pares sa kasulatan hangtod nga mailhan nila ang usa ka kasulatan nga para nila labing makahuloganon ug hisgotan kon ngano. Pwedeng ipakigbahin sa mga estudyante kini nga mga kasulatan diha sa klase. Alang sa ehemplo niini nga idea tan-awa sa dugang nga mga kalihokan sa pagkat-on sa “Leksiyon 109: Pasiuna sa Mga Proverbio.”

Mga kalihokan sa pagtuon nga gipili sa estudyante

Paghimo og listahan sa unom ka kalihokan sa pagtuon. Human maila sa mga estudyante ang kamatuoran gikan sa usa ka hugpong sa kasulatan, paggamit og sulagma nga paagi nga makapili ang mga estudyante kon hain nga kalihokan ang kompletohon (dice, bunotbunot, pagkuha og piraso sa papel, sulagma nga mohatag og numero).

Ang mga ehemplo mahimong maglakip sa mosunod:

1. Pagpakigbahin og usa ka istorya gikan sa kinabuhi ni Jesus diin Iyang gitudlo o gipakita ang kamatuoran.

2. Pangita og tudling sa doktrinal nga kahanas o uban pang tudling sa kasulatan bahin sa kamatuoran.

3. Pangita og ehemplo sa istorya sa kasulatan sa usa ka tawo nga nagkinabuhi subay sa kamatuoran.

4. Pangita og usa ka pahayag gikan sa lider sa Simbahan nga nagtudlo sa kamatuoran.

5. Pagpakigbahin og personal nga kasinatian sa usa ka tawo nga napanalanginan tungod sa kamatuoran.

6. Ipakigbahin ang usa ka ideya kon unsaon nato pagkinabuhi ang kamatuoran. Pangita og usa ka tudling sa kasulatan nga nagtudlo sa ehemplo nga imong ipakigbahin.

Sumpay-sumpay nga pagtuon

Sa kada lamesa o lingkoranan, pagbutang og kard nga naay instruksiyon nga sama sa “Pagbasa og usa ka tudling sa kasulatan o kinutlo,” o “Tubaga ang usa ka pangutana gikan sa leksiyon.” Pwedeng liboton sa mga estudyante ang mga lingkoranan ug sundon ang mga instruksiyon sa maong card.

Web sa hilisgotan

Dapita ang mga estudyante nga maghimo og diagram nga sama niini nga nagsugod sa gipabaga nga kamatuoran o hilisgotan diha sa tunga. Dayon pwedeng magdrowing og mga linya ang mga estudyante ngadto sa gawas sa mga lingin ug butangan kini og label sa konektadong mga kasulatan, mga kamatuoran, o mga elemento sa pangunang hilisgotan. Pananglitan, mahimong irekord sa mga estudyante ang pagdapit sa Salmista nga “Pasalamati ang Ginoo” diha sa tunga nga lingin uban ang pakisayran nga “Mga Salmo 136.” Pwede nilang ilista sa gawas sa mga lingin ang mga rason gikan sa Mga Salmo sa pagpasalamat sa Ginoo.

Paghunong og kadyot sa bidyo

Paggamit og bidyo nga hinimo sa Simbahan nga nagpakita o nagtudlo bahin sa baroganan sa ebanghelyo. Ihunong kadyot sa lainlaing gutlo aron maintriga o tabangan ang mga estudyante nga analisahon ang ilang gitan-aw. Pwede kang mangutana sa mga estudyante sama sa mosunod:

• “Unsa kaha ang inyong gihunahuna o gibati, o unsa kaha ang inyong mga pangutana kon kamo ang naa niini nga sitwasyon?”

• “Unsa nga mga kasulatan ang imong gitun-an karon nga tingali makatabang?”

• “Unsay imong gilaoman nga masabtan niini nga tawo bahin sa kamatuoran nga atong gitun-an karon?”

• “Asa nimo makita ang imong kaugalingon niini nga istorya karon?”

3. Ipakigbahin ang unsay ilang nakat-onan

Sa tibuok leksiyon, gidapit nimo ang mga estudyante nga ipakigbahin ang ilang mga hunahuna ug mga panabot. Samtang ang mga estudyante nagpasabot, nakigbahin, ug nagpamatuod, ngadto sa kapares, sa gagmayng grupo, o sa klase, kasagaran sila gigiyahan sa Espiritu Santo ngadto sa usa ka mas lawom nga pagpamatuod sa mga butang gayod nga ilang gipahayag. Pinaagi sa gahom sa Espiritu Santo, ang ilang mga pulong ug mga ekspresyon mahimo usab nga adunay dakong epekto diha sa kasingkasing ug hunahuna niadtong naminaw. Ingon ka importante niini, ang pagpakigbahin mahimong lisod buhaton para sa mga estudyante tungod sa pipila ka rason. Hinumdomi nga pwede ra nga “mobalibad” ang mga estudyante kon dili sila komportable nga mopakigbahin. Ang mosunod nga mga ideya makatabang sa mga estudyante nga ipakigbahin ang unsay ilang nakat-onan.

Pag-analisar sa usa ka tudling

Isulat ang bersikulo sa kasulatan diha sa tunga sa dakong papel (sa laing paagi, pwede nimo kining ipakita diha sa pisara). Seguroa nga igo ang gidak-on niini aron makita sa kada estudyante. Pwedeng mogahin og pipila ka minuto ang mga estudyante sa pagpangutana og daghan bahin sa bersikulo sa kasulatan kutob sa ilang mahimo. Dayon hatagi sila og pipila ka minuto sa pagpangita sa mga kasulatan o sa Librarya sa Ebanghelyo sa pagtubag sa mga pangutana. Sa laing paagi, pwedeng iprinta ang kasulatan diha sa papel ug pwedeng himoon sa mga estudyante ang samang kalihokan nga mag-inusara.

Pisara sa ideya

Mahimong isulat sa mga estudyante diha sa pisara, o mogamit og mga sticky note o gagmayng piraso sa papel aron ipapilit diha sa pisara, sa pagpakigbahin sa ilang mga ideya mahitungod sa mga paagi nga magamit ang kamatuoran sa ebanghelyo. Ang pisara sa ideya pwedeng naay dako nga imahe sa usa ka butang nga may kalabotan sa hilisgotan. Pananglitan, kon magtuon sa Nehemias, pwede kang magdrowing og dako nga bongbong nga sama sa usa nga gitukod ni Nehemias. Mahimong maglista og usa o daghang mga butang ang mga estudyante nga para nila gusto sa Ginoo nga ilang buhaton aron matuman ang iyang buhat ug dili mabalda o mahadlok, sama ni Nehemias samtang iyang gitukod ang bongbong palibot sa templo.

Ilha ang imong tigpaminaw

Papilia ang mga estudyante og piho nga grupo sa mga tawo ug ipakigbahin ang unsay ilang nakat-onan sa paagi nga masabtan sa maong mamiminaw. Kini nga kalihokan pwedeng himoon sa mga estudyante uban ang usa ka kapares o grupo. Epektibo tingali ang paghatag sa mga estudyante og daghang opsiyon ug papilion sila kon hain nga mamiminaw ang gusto nilang tudloan. Ania ang pipila nga ilang kapilian:

• Usa ka higala nga lahi og tinuohan diha sa imong misyon

• Mga bata diha sa klase sa Primary

• Usa ka higala sa eskwelahan

• Usa ka sakop sa imong pamilya

Ipadayon ang panag-istoryahanay

Sa dili pa maghisgot isip usa ka klase, makatabang ang pagdasig sa mga estudyante nga maminaw pag-ayo sa usag usa. Ang mosunod nga mga ideya pwedeng ihatag sa mga estudyante sa dili pa ang panaghisgot. Makatabang tingali kini nga maminaw sila pag-ayo sa usag usa ug makahimo og makapalig-on nga panaghisgotan nga maglakip og daghang estudyante sa panaghisgotan. Pwede nimo kining ipakita o hatagan ang mga estudyante og usa ka handout niini nga mga ideya.

Idugang niini—Ipakigbahin ang ganahan ninyo nga pahayag sa usa ka klasmeyt ug dayon idugang ang kaugalingon ninyong hunahuna, sama sa:

• “Kana nagpahinumdom nako sa …”

• “Uyon ko, kay …”

• “Bitaw. Ang laing pananglitan mao ang dihang …”

• “Nindot na nga punto …”

Isumada kini—Isulti sa laing paagi ang giingon sa imong klasmeyt ug dayon pagkomento niini.

• “Nadunggan ka nako nga miingon nga …”

• “Unya, kon sakto akong pagsabot nimo …”

• “Ganahan ko sa imong pagkasulti sa …”

Pangutana—Pangutan-a ang laing estudyante bahin sa unsay ilang gisulti.

• “Pwede ko nimong sultihan og dugang pa bahin niana?”

• “Morag wala ko kasabot … ?”

• “Nakasabot ko nimo, pero unsa man ang bahin sa … ?”

• “Nahunahunaan ba nimo ang bahin sa … ?”

Ipasa ang papel

Gamita kini nga handout sa paghimo og sunod-sunod nga mga instruksiyon nga pwedeng maglakip sa mga kasulatan o mga kinutlo nga basahon ug mga pangutana nga tubagon. Seguroa nga dunay igong luna nga kasulatan sa mga estudyante sa ilang mga tubag. Hatagi og kopya ang kada estudyante ug dapita sila nga isulat ang ilang ngalan sa ibabaw. Ang mga estudyante motubag sa unang pangutana ug dayon pil-on ang papel aron tabonan ang ilang tubag. Ilang ipasa ang papel sa laing estudyante, nga maoy motubag sa sunod nga pangutana o pag-aghat. Pil-on sa kada estudyante ang papel aron tabonan ang ilang tubag ug ipasa kini sa laing estudyante. Sa kataposan sa pagtuyok, ibalik ang mga papel sa orihinal nga estudyante, nga maoy mobasa sa unsay gisulat sa ilang mga klasmeyt.

Pangandam sa pagpakigbahin

Ipakigbahin ang usa ka importanteng pangutana nga gusto nimong tubagon sa mga estudyante. Seguroa nga ipakigbahin kini sa pipila ka minuto sa dili pa sila dapiton nga tubagon ang pangutana. Pananglitan, pwede kang moingon nga, “Pipila ka minuto gikan ron, ganahan kong ipakigbahin sa pipila ninyo ang inyong mga hunahuna bahin sa . Palihog hunahunaa kon unsay gusto ninyong ipakigbahin samtang atong tun-an ang mosunod nga tudling.” Pwede nimong dapiton ang mga estudyante nga ipakigbahin una sa usa ka kapares o sa grupo.

Paghimo og survey sa klase

Paghimo og survey sa imong mga estudyante pinaagi sa paghatag nila og gamayng piraso sa papel. Pwedeng motubag ang mga estudyante nga dili magpaila ug dayon ibutang ang ilang mga papel diha sa usa ka sudlanan, sama sa kahon o kalo. Pwede nimong kolektahon ang ilang mga hunahuna bahin sa usa ka baroganan, pangutana, o desisyon nga himoon tingali sa usa ka tawo diha sa usa ka senaryo. Sa laing paagi, kon naay smartphone ang mga estudyante, pwede kang mogamit og polling app nga libre ug daling gamiton. Hatagi og asaynment nga tun-an ang mga estudyante ug ang link sa survey sa usa ka pangutana ug patubaga sila gamit ang ilang mga selpon. Pwede dayon nimong ipakita ang mga tubag diha sa klase.

Gamhanang mga pulong

Paggamit og gamhanang hugpong sa mga pulong aron bansayon ang imong mga estudyante sa pagpakigbahin ug pagpasiugda sa usa ka panaghisgot diha sa klase.

Makatabang kini nga himan para sa hilom nga mga klase o dili segurado kon unsaon o unsa ang ipakigbahin. Ipakita ang listahan sa hugpong sa mga pulong sa ubos nga makatabang sa mga estudyante nga mahan-ay kon unsay ilang ipakigbahin. Patun-i nila ang hugpong sa kasulatan ug paandama sila sa pagpakigbahin gamit ang usa o daghang gamhanang mga hugpong sa mga pulong. Idumala ang panaghisgotan, o ipadumala kini sa usa ka estudyante.

• Ang bersikulo nga ganahan nako mao ang …

• Ang hugpong sa mga pulong nga makahuloganon kanako mao ang …

• Ang leksiyon nga akong makuha gikan niini mao ang …

• Ang baroganan nga akong nakaplagan mao ang …

• Ang pulong nga akong nakit-an nga makapainteres o makapalibog mao ang…

• Ang usa ka butang nga kinahanglang mahibaloan sa usa ka tin-edyer gikan niini mao ang …

• Ang usa ka butang nga akong nahibaloan nga tinuod gikan niini mao ang …

• Ang usa ka butang nga dili ko segurado bahin niini mao ang…

• Ang usa ka butang nga para nako nga kinahanglan nakong himoon niini karon mao ang …

• Ang usa ka butang nga akong nakat-onan bahin sa Manluluwas niini mao ang…

Mga kard sa pag-apil

Ipanghatag ang mga kard nga pwedeng iisa sa mga estudyante para sa makita nga mga tubag para sa imong mga pangutana. Pwedeng gamiton sa mga estudyante ang mga kard aron ipakita ang ilang tubag o dihang andam na silang ipakigbahin o hisgotan ang ilang mga hunahuna. Ang mosunod mao ang mga ehemplo sa matang sa mga kard sa pag-apil:

• Ang mga kard nga green para sa tinuod, pula para sa sayop.

• Isulat “Naghunahuna Pa” sa usa ka bahin ug “Andam nga Mopakigbahin” sa pikas bahin.

• Ang kard nga naay mga numero o mga letra nga nagrepresentar sa lainlaing opsiyon nga nakalista sa pisara. Ang tanang estudyante mopakita og usa ka numero o letra para sa ilang mga tubag aron imong makita ang ilang mga tubag ug pilion ang mga estudyante nga imong patubagon.

• Pagsulat og kard nga naay daghang tubag sa lainlaing mga bahin (tan-awa ang sampol sa ubos). Dihang dapiton ang estudyante nga motubag, ang tunga sa ibabaw nga bahin ang ilang posisyon. Dayon pwede ka o ang usa ka estudyante nga motawag sa mga estudyante base sa unsa nga posisyon nga ilang gipakita.

Tigsugod og senaryo

Hatagi ang mga estudyante og dili kompleto nga senaryo ug dapita sila nga dugangan ang mga detalye aron mahimo kining mas mahinungdanon ug mas masabtan. Pananglitan, pwede kang moingon og sama sa “Maghimo kita og senaryo bahin sa usa ka tawo nga kaedad ninyo, ginganlan og Julia, nga nag-atubang og mga hagit sa kinabuhi. Unsa kaha ang pipila niini?” Samtang makigbahin ang mga estudyante, tabangi sila nga mosugyot og mga detalye nga makapahimo kang Julia, o uban pang ngalan nga imong pilion, nga morag tinuod nga tawo. Pwede usab kang modugang og mahinungdanong mga detalye nga makaimpluwensiya sa panaghisgot, sama sa nag-unang pangutana ni Julia. Samtang mopakigbahin ang mga estudyante og mga ideya, makatabang tingali ang pagpangutana og “Kini ba nga senaryo mabati nga tinuod ug may kalabotan ninyo? Unsay atong himoon aron mas mabati nga may kalabotan ang senaryo alang nato?” Dayon ang mga estudyante mahimong mangita og mga kamatuoran pinaagi sa leksiyon nga mahimong makatabang sa tawo nga naa sa senaryo.

Laing Ideya: Pwede nimong isulat ang hilisgotan o kamatuoran diha sa pisara. Dapita ang mga estudyante nga maghimo sa ilang kaugalingon nga mga senaryo ug isulat kini diha sa papel. Pwede nimong ibaylo kini nga mga senaryo ug patubagon ang mga estudyante gamit ang ilang nakat-onan.

Laing Ideya: Dapita ang mga estudyante sa pagpakigbahin og lainlaing mga panglantaw nga tingali aduna ang mga tawo bahin sa kamatuoran diha sa leksiyon. Pananglitan, “Ang ubang tawo tingali maghunahuna nga mas maayo ang kinabuhi kon dili nila tumanon ang pagbalaan sa adlawng Igpapahulay.” O “Ang ubang tawo tingali maghunahuna nga mga templo nindot kaayo, apan wala kaayo silay tinguha sa pagbuhat sa mga ordinansa didto sa sulod.” Pangutan-a ang mga estudyante kon nganong ang usa ka tawo mahimong maghunahuna o mobati niini nga paagi. Dayon ang mga estudyante mahimong mopakigbahin kon sa unsang paagi ang mga kasulatan o mga pahayag gikan sa mga lider sa Simbahan nga ilang natun-an diha sa leksiyon makatabang sa usa ka tawo nga mibati niini nga paagi.

Senaryo sa text thread

Paghimo og senaryo nga magsugod sa usa ka text message, pero ayaw og isulti sa mga estudyante ang mga kahimtang nga misangpot sa maong text message. Pwede nimong hatagan ang kada estudyante og blangko nga template sa text, sama sa mosunod, ug dapita sila nga maghimo og dayalogo para sa text thread.

Paspas nga pagbaton og higala

Ang pagtabang sa mga estudyante nga mobati nga komportable sa pagpakigbahin sa usag usa pinaagi sa pagtabang nila nga mailhan ang ilang mga klasmeyt. Kini nga kalihokan makatabang sa mga estudyante nga mailhan ang usag usa ingon man usab sa pagpakigbahin og usa ka butang bahin sa mga kasulatan. Bahina ang mga estudyante nga magpares pinaagi sa pag-organisar og duha ka laray nga nag-atubangay nga mga lingkoranan. Dayon dapita ang mga estudyante nga markahan ang gihatag nga tudling sa kasulatan ug tubagon ang usa ka pangutana nga imong giandam bahin sa maong tudling. Dapita ang kada pares nga nag-atubangay nga tubagon ang pangutana sa pagpakighigala nga imong giandam nga makatabang nila nga mas mailhan ang usag usa ug dayon ipakigbahin ang ilang giandam nga tubag nga may kalabotan sa tudling sa kasulatan. Dapita ang mga estudyante nga magbaylo og mga pares ug usbon ang proseso gamit sa daghang higayon gamit ang lainlaing pangutana ug mga tudling sa kasulatan. Aron magtinabangay ang mga estudyante sa kada paresan, ang estudyante nga naglingkod sa usa sa mga bangko sa tumoy dili moapil og libot.

Sticky board

Ibutang sa pisara ang pipila ka pangutana nga tubagon sa mga estudyante o mga bersikulo nga pwede nilang ipakigbahin ang ilang mga panabot. Isulat sa kada estudyante ang ilang ngalan diha sa sticky note ug ibutang kini tupad sa mga pangutana o mga bersikulo nga gusto nilang tubagon o komentaryohan.

Laing Ideya: Ang mga kolor mahimong nagpasabot kon unsay gustong ipakigbahin sa mga estudyante sama sa usa ka panabot, pangutana, cross-reference, ug uban pa.

Mokuha og litrato

Dapita ang mga estudyante nga mopili og usa ka butang diha sa klasrom o usa ka litrato diha sa ilang selpon nga magamit sa pagtabang sa pagtudlo sa usa ka baroganan o doktrina. Dapita sila sa pagpakigbahin kon unsaon nila pagtudlo ang usa ka tawo bahin sa ilang nakat-onan gamit ang butang o litrato. Kini nga kalihokan tingali labing maayo kon magtudlo og mga baroganan o doktrina nga sayon rang representaran gamit ang mga butang o mga litrato nga dali rang magamit.

Isulat sa dili pa nimo ipakigbahin

Hatagi og panahon ang mga estudyante sa pagrekord sa ilang mga tubag sa importanteng mga pangutana diha sa ilang mga journal sa pagtuon sa dili pa sila dapiton nga motubag og kusog.

4. Paghimo og representasyon sa unsay ilang nakat-onan

Ang mga leksiyon kasagaran modapit sa mga estudyante sa paghimo og usa ka butang aron ipakita ang unsay ilang gitun-an. Mahimong maglakip kini sa paggamit og mamugnaon nga mga kahanas. Ang mosunod nga mga kalihokan mao ang pipila ka paagi nga matabangan ang mga estudyante sa paghimo niini.

Acrostic nga balak

Gamita ang mga letra sa ngalan, lokasyon, o doktrina ug ipahimo sa mga estudyante ang usa ka acrostic nga balak gamit ang unsay ilang nakat-onan sa klase. Pananglitan, isulat tingali sa usa ka estudyante ang usa ka acrostic nga balak gamit ang pulong nga pagtuo sama sa mosunod:

P – Pagsunod sa ehemplo ni Jesukristo

A – Aghat gikan sa Espiritu Santo sunda

G – Gahinan og panahon sa pag-ampo bahin sa imong mga pangutana o kabalaka

T – Tan-awa ang mga propeta sa Dios U – Uyon sa mga propeta sa Dios

O - Oh, Dios, naglaom ko sa Imong gisaad nga mga panalangin

Paghimo og App

Ang mga estudyante magdesinyo sa kaugalingon nilang app diha sa usa ka piraso sa papel. Pwedeng i-feature sa app ang usa ka kamatuoran nga gitudlo diha sa gitun-an nga mga kasulatan ug naglakip og mga kalihokan, mga litrato, mga kasulatan, o mga kinutlo nga makatabang sa usa ka tawo nga gamiton kini sa ilang kinabuhi.

Chiasmus

Ang chiasmus maoy usa ka figure of speech diin ang ikaduhang katunga sa kapahayag, parapo, o sinulat maoy pabali nga katumbas ug nagsubli sa han-ay sa unang katunga. Ang nag-unang mensahe makita sa tungatunga (tan-awa sa Genesis 9:12–17 o Alma 36 isip mga ehemplo). Dapita ang mga estudyante sa paghimo og usa ka chiasmus gikan sa ilang gitun-an. Ang mga estudyante mobutang sa gipabaga nga kamatuoran diha sa tunga ug magdugang og mga linya sa ibabaw ug ubos niini uban ang nagsuporta nga mga kasulatan o propetikanhong mga pamahayag. Mahimong kini susama sa mosunod:

A – kon unsay gibati sa mga estudyante bahin sa kamatuoran o sa ilang mga kasinatian niini

B – kon unsay nasabtan sa mga estudyante bahin sa kamatuoran

C – kamatuoran o baroganan sa ebanghelyo

C – kamatuoran o baroganan sa ebanghelyo

B – dugang nga pagsabot bahin sa kamatuoran

A – dugang nga mga kasinatian sa mga estudyante uban ang kamatuoran ug kon unsay ilang gibati bahin niini

Pagtuon gamit ang comic strip

Hatagi ang mga estudyante og blangko nga template sa comic book, o pahimoa sila og template diha sa piraso sa papel. Basahon sa mga estudyante ang hugpong sa kasulatan ug maghimo og usa ka comic nga naghulagway sa dagan sa istorya diha sa hugpong. Ipagamit nila ang kataposang kahon aron ipakigbahin ang para nila labing bililhon nga kamatuoran nga makat-onan gikan sa istorya. Pwede nilang ipakigbahin ang ilang mga comic diha sa klase. Sa laing paagi, mahimo nilang gamiton kini nga kalihokan sa paghulagway og usa ka modernong panahon nga paggamit sa kamatuoran o baroganan.

Paghimo og latid [outline] sa leksiyon

Paghimo og outline nga magamit sa mga estudyante aron mangandam para sa mubong leksiyon, pakigpulong, mensahe, o paagi sa pagpakigbahin sa usa ka tudling sa kasulatan. Pwede kang maghatag og blangko nga template sa outline diin pwedeng irekord sa mga estudyante ang ilang mga nakaplagan. Pwede nimong tudloan ang mga estudyante nga maglakip og lainlaing impormasyon sa kada kahon. Pananglitan, ang mga estudyante mahimong magsulat og ulohan diha sa unang kahon, summary sa mahinungdanong mga bersikulo sa sunod nga kahon, lista sa mga ehemplo o personal nga mga istorya sa tulo ka tag-as nga kahon, ug magsulat og usa ka pagpamatuod sa kataposang kahon.

Paghimo og pamphlet

Hatagi ang matag estudyante og usa ka piraso sa papel ug dapita sila nga pil-on kini ngadto sa katulo. Pwedeng maghimo ang mga estudyante og ulohan sa pahina nga maglangkob sa baroganan o doktrina nga ilang nailhan. Pwedeng maghimo ang mga estudyante og sunodsunod nga mga pahina nga naay mga subtitle ug mga detalye gikan sa ilang nakat-onan. Pwede nimo silang dapiton nga magbilin og luna sa likod sa pamphlet nga masulatan sa bisan unsang tumong o plano nga ilang himoon panahon sa leksiyon.

Mga kategorya sa pagkolor

Pagprinta og gikopya nga pahina sa hugpong sa kasulatan ug paghatag og dekolor nga mga lapis aron markahan ang mga kasulatan. Ilha ang mga kategoriya nga sama sa “Gisaad nga mga panalangin,” “Mga Buhat sa Hugot nga Pagtuo,” o “Mga Sugo.” Pwedeng asaynan og kolor ang matag kategoriya. Dapita ang mga estudyante sa pagtuon sa mga bersikulo ug markahan ang gikoloran nga mga kategoriya kon makit-an nila kini. Dapita ang mga estudyante sa pagpakigbahin sa ilang gimarkahan ug nakat-onan gikan sa kalihokan.

Susiha ang plano

Pwede kang mogamit og graphic organizer sa pagtabang sa mga estudyante sa pagsusi sa ilang mga plano. Tubagon sa mga estudyante ang mga pangutana sa kada seksiyon sa graphic. Mahimo nimong makita ang sampol niini nga ideya sa “Leksiyon 105: Mga Salmo 61–86.”

Flowchart

Pwedeng maghimo og graphic ang mga estudyante nga naghulagway sa relasyon tali sa lainlaing desisyon o konsepto sa leksiyon. Pananglitan, usa ka tsart nga sama sa mosunod pwedeng gamiton aron ipakita kon unsay padulngan sa hugot nga pagtuo o paglaom diha kang Jesukristo.

Praktikal nga paghimo

Hatagi og mga materyal ang mga estudyante nga ilang magamit sama sa mga bloke o modeling clay aron makahimo og usa ka butang nga nagrepresentar sa ilang natun-an. Pananglitan, ang mga estudyante pwedeng maghimo og 12 ka bato samtang magtuon sila sa Josue 4. Niini nga asoy, ang mga anak sa Israel magbutang og 12 ka bato sa Suba sa Jordan isip usa ka panumdoman nga hinumdoman nga ang Ginoo mihatag og dalan aron makatabok sila sa suba diha sa uga nga yuta. Mahimong markahan sa mga estudyante ang kada bato og butang nga gihimo sa Ginoo alang kanila nga para nila kinahanglan nilang hinumdoman.

Collage nga hulagway

Pwedeng mangitag mga litrato ang mga estudyante diha sa ilang mga selpon o sa Librarya sa Ebanghelyo nga may kalabotan sa kamatuoran. Pwede silang maghimo og digital collage ug ipakigbahin kini diha sa klase. Pwede usab nilang ipakigbahin kini sa social media nga dunay pagpasabot. Alang sa mga estudyante nga walay mga selpon pwede silang magkolekta og mga hulagway gikan sa mga magasin sa Simbahan sama sa Liahona, Alang sa Kalig-on sa mga Kabatan-onan, o sa Friend.

Hibaloi—hunahunaa—kat-oni

Bahinon og katulo sa mga estudyante ang usa ka papel. Sa unang kulom, ilang isulat ang ila nang nahibaloan bahin sa usa ka hilisgotan. Sa sunod, isulat nila ang unsay ilang gihunahuna o gustong mahibaloan. Ibutang sa ikatulong kolum ang nakat-onan sa mga estudyante panahon ug human sa leksiyon. Pwede nimo silang dapiton nga ilhon kon unsay, kon aduna man, nakatabang nila nga nakat-on o nakaapektar sa ilang pagbati panahon sa leksiyon.

Sulat para sa umaabot

Pwedeng sulatan sa mga estudyante ang ilang kaugalingon nga ablihan ug basahon sa usa ka piho nga panahon (diha sa usa ka misyon, dihang maminyo, pagkatawo sa unang anak). Ang laing opsiyon mao ang pagpahimo og sulat sa mga estudyante para sa mga sakop sa ilang pamilya sa umaabot. O pwede silang magsulat sa umaabot nga mga estudyante nga motambong sa seminary ug ipasabot ang unsay ilang nakat-onan ug kon unsay ilang gibati.

Paghimo og meme

Ilhon sa kada estudyante ang usa ka baroganan gikan sa ilang pagtuon ug maghimo og makadani nga hugpong sa mga pulong nga naghulagway sa baroganan. Hangyoa usab sila sa pagdrowing og usa ka litrato nga naghulagway sa baroganan. Seguroa nga ilakip nila ang pakisayran sa kasulatan. Ingna sila nga ipakigbahin ug ipasabot ang ilang meme. Pwede tingali kang magpakita og pipila ka sampol gikan sa bag-ohay lang nga magasin sa Alang sa Kalig-on sa mga Kabatan-onan.

Paghimo og plano nga “moadto ug mobuhat”

Pwedeng makaplano ang mga estudyante nga mohimo og epektibo, matarong nga aksiyon gikan sa mga butang nga ilang nakat-onan ug gibati panahon sa leksiyon. Aron himoon kini, pwede nimong ipaila nila ang gusto nilang buhaton ug sa paghimo og piho nga mga lakang kon unsaon pagtuman sa ilang mga plano. Kini tingali maglakip sa pag-ila sa mga babag nga mahimo nilang atubangon ug piho nga mga lakang aron mabuntog kini nga mga babag. Samtang ang mga estudyante naghimo sa ilang mga plano, awhaga sila nga bulagon kini sa mas gagmayng mga lakang. Ang paghimo og ginagmayng kausaban sa mga butang nga ilang gihimo kada adlaw makatabang nila nga mobati nga mas molampos pa.

Paghimo og plano nga “decision tree”

Pwedeng mogamit ang mga estudyante og decision tree sa paggamit sa baroganan sa ebanghelyo pinaagi sa paglista sa mga positibo ug mga negatibong bahin sa lainlaing desisyon. Mahimo silang magsugod sa usa ka pangutana bahin sa usa ka baroganan sa ebanghelyo ug, human malista ang mga positibo ug mga negatibong bahin, susiha ang ilang mga kapilian aron mahimo ang maong desisyon. Paghimo og lahi nga mga tree alang sa kada pangutana ug desisyon diha sa plano.

Pananglitan: Paghimog plano sa pagtuon sa mga kasulatan.

Mga Pangutana:

1. Kanus-a nako tun-an ang akong mga kasulatan? (Paghimo og usa ka decision tree.)

2. Asa ko magtuon sa akong mga kasulatan? (Paghimo og laing decision tree.)

3. Unsa ka dugay ang akong igahin sa pagtuon sa akong mga kasulatan? (Paghimo og ikatulong decision tree.)

Sa kataposan sa proseso, ang tulo ka desisyon maghiusa nga mahimong usa ka plano, o tumong, nga naay piho nga mga lakang sa pagtuman niini.

Bag-ong bersikulo sa himno

Pwedeng mopili og himno ang mga estudyante bahin sa kamatuoran nga ilang gitun-an diha sa leksiyon. Dapita sila sa paghimo og bag-ong bersikulo sa himno gikan sa unsay ilang gitun-an. Pwedeng mopili ang klase og pipila ka bag-ong mga bersikulo nga ipakita ug kantahon.

Pagkat-on nga nakabase sa proyekto

Pwedeng maghimo ang mga estudyante og proyekto alang sa daghang leksiyon diin magdugang sila og sulod sa sunod-sunod nga mga leksiyon ug mga semana. Kini pwedeng usa ka balak, himno, bidyo, proyekto sa art, o uban pang mamugnaong mga ekspresyon nga ilang himoon sa sunod-sunod nga mga leksiyon. Pananglitan, mahimong magbuhat og proyekto ang mga estudyante gamit ang balaanong abilidad sa Ginoo sa pagluwas samtang magtuon sila kon giunsa Niya pagluwas ang mga anak sa Israel diha sa basahon sa Exodo. O maghimo sila og usa ka proyekto base sa ilang mga pagbati sa pagdayeg ug pagsimba sa Ginoo samtang magtuon sila sa Mga Salmo.

Usba og sulat ang kataposan

Human sa pagtuon og asoy sa kasulatan dihang ang usa ka tawo mohimo og sayop o dili maayo nga desisyon, dapita ang mga estudyante nga isulat pag-usab ang kataposang bahin sa usa ka istorya sa kasulatan nga daw ang tawo mihimo og mas maayo o lahi nga mga desisyon. Pwede usab kining himoon sa mga estudyante gamit ang modernong panahon nga istorya o ehemplo.

Mga resipe

Pwedeng maghimo og mga risipi ang mga estudyante gamit ang ilang nakat-onan. Pwede kang magsugod pinaagi sa pagpakita og ehemplo sa usa ka risipi nga naay mga sagol, mga sukod, ug mga instruksiyon. Dayon tabangi ang mga estudyante sa pagsunod sa sumbanan aron organisahon ang ilang nakat-onan. Pwede nilang hatagan og ulohan ang resipe og “Unsaon nga mahimong epektibo nga misyonaryo,” “Unsaon pagsunod sa propeta,” o “Mga paagi sa pagbaton og mas epektibong pagtuon sa kasulatan.” Dayon ilakip sa mga estudyante ang ilang gibati nga importanteng mga elemento gamit ang mga kasulatan ug mga kinutlo. Pananglitan, kon magtuon sa 2 Cronicas 14–16, ang estudyante mahimong maglista og usa ka resipe sa pagtinguha ug pagpangita sa Ginoo. Awhaga sila nga mahimong mamugnaon sa ilang mga resipe. Pwede silang magdrowing og litrato nga nagrepresentar sa kataposang produkto sa risipi.

Pagdrama-drama [role-play]

Ipadrama ang mga estudyante og usa ka dili tinuod nga sitwasyon o usa ka posible nga senaryo sa tinuod nga kinabuhi. Naay daghang paagi sa paghimo niini. Pwede ang mga boluntaryo moadto sa atubangan sa klasrom aron dramahon ang senaryo. Pwedeng magdrama-drama ang mga estudyante nga magkapares o gamayng grupo. O pwedeng ikaw ang modrama sa bahin sa usa ka tawo nga naay mga pangutana ug ipatubag sa tibuok klase ang imong mga pangutana o gikabalak-an.

Mubo nga bidyo

Dapita ang mga estudyante sa pagplano og mubo nga bidyo. Pwede silang maghimo og script ug magdesisyon kon unsaon pagpakita ang usa ka butang nga ilang nakat-onan gikan sa leksiyon. Kon posible ug kon itugot sa panahon, pwedeng maghimo og bidyo ang mga estudyante ug ipakigbahin kini diha sa klase.

Laing Ideya: Ang mga estudyante mahimong magplano og bidyo sa pagpasabot og doktrina o impertanteng aspeto sa ebanghelyo sulod sa 60 segundos.

Post sa social media

Dapita ang mga estudyante nga maghimo og post sa social media aron ipakigbahin ang ilang personal nga gituohan o mga kasinatian nga may kalabotan sa mga baroganan nga gihisgotan diha sa klase. Pwede kining usa ka butang nga ilang i-post sa online o usa ka butang nga ilang gihimo diha sa ilang mga journal sa pagtuon. O pwede nilang hunahunaon nga naay usa ka tawo ang nag-post og pangutana nga may kalabotan sa gitun-an sa klase ug paghimo og tubag gamit ang kahibalo nga ilang nakat-onan. O pwedeng tun-an sa mga estudyante ang bag-ohay lang nga post sa social media sa lider sa Simbahan ug pagsulat og tubag o makapadasig nga mubo nga sulat diha sa post. Alang sa usa ka artikulo nga makatabang sa mga estudyante sa paghimo og makahuloganong mga post sa social media, tan-awa sa “Social Media: Gahom sa Pag-usab sa mga Kinabuhi,” Alang sa Kalig-on sa mga Kabatan-onan, Abril 2022, 8–9.

Biswal nga ipakita

Grupoha ang mga estudyante sa paggamit sa mga kasulatan, mga kinutlo, ug uban pang kapanguhaan sa pagtuon aron mohimo og mga poster o display sa bongbong para sa klasrom. Pwedeng ilakip sa ilang mga poster o mga display ang mahinungdanong mga bersikulo, mga pangutana nga matubag sa asoy sa kasulatan, mahangtorong mga kamatuoran, mga litrato, ug uban pa. Pwedeng molibot ang mga estudyante ug tan-awon ang gihimo sa ubang grupo.

Pagsulat og artikulo para sa magasin sa Simbahan

Pwedeng hunahunaon sa mga estudyante nga nagsulat sila og mubo nga artikulo sa Alang sa Kalig-on sa mga Kabatan-onan, Higala, o Liahona nga mga magasin nga ipakigbahin ang unsay ilang gitun-an ug sa unsang paagi kini makatabang sa kabatan-onan sa kalibotan. Pwede kang magpakita og usa ka artikulo isip ehemplo. Awhaga ang mga estudyante nga magdugang og mga ilustrasyon, tsart, ug infographics.