Hageo 1–2; Zacarias 1–4; 10–14: Leksiyon 155

Hageo

“Palandonga Ang Inyong Mga Dalan”

Sa atong busy nga mga kinabuhi, unsaon nato paggahin og panahon para sa Ginoo ug sa mga butang nga Iyang gipahimo kanato? Makabenepisyo kita sa pagsunod sa pagdapit sa Ginoo ngadto sa mga Judeo nga “palandonga ang [atong] mga dalan” (Hageo 1:5) bahin sa kon unsaon nato paggahin og panahon para Niya. Kini nga leksiyon makatabang sa mga estudyante nga unahon ang Dios diha sa ilang kinabuhi.

Pagpangandam sa estudyante: Dapita ang mga estudyante sa paghimo og listahan sa mga butang nga sagad nilang gihimo sa usa ka adlaw. Pwedeng butangan og label sa mga estudyante ang mga butang nga para nila labing importante ug pamalandongan kon nganong importante ang maong mga butang para nila. Pwede nilang dalhon sa klase ang ilang mga listahan.

Posibleng mga Kalihokan sa Pagkat-on

Pag-una sa Ginoo

Ang mosunod nga leksiyon nga gigamitan og butang anaa sa artikulo nga “Maayong Paggamit sa Inyong Panahon” (New Era, Hulyo 2020, 34–35).

Sa dili pa magsugod ang klase, sudli ang usa ka garapon og gagmayng bato, dayon bubui og balas ang ibabaw, uyoga kini og diyutay aron mopailawom ang balas. Himoon kini aron maseguro nga aduna kay igong balas nga masulod sa garapon. Dayon, laina ang balas ug ang gagmayng bato pag-usab. Dalha sa klase ang garapon, balas, ug gagmayng bato. Sa pagsugod sa klase, ipakita ang mga item ngadto sa mga estudyante, nga ipasabot nga ang garapon nagrepresentar sa atong panahon, ang gagmayng bato mao ang atong mga prayoridad, ug ang balas mao ang atong mga buluhaton sa kada adlaw.

• Unsang mga butanga ang imong gigahinan sa imong panahon matag adlaw?

• Unsang mga butanga ang gihangyo sa Ginoo nga himoong prayoridad sa matag usa kanato?

  Tubagon tingali sa mga estudyante ang ikaduhang pangutana og sama sa pagtuon sa kasulatan, pag-ampo, panahon uban ang pamilya, pagserbisyo, ug uban pa. Ikonsiderar ang pagsulat sa mga tubag sa mga estudyante diha sa gagmayng bato.

  Aron tabangan ang mga estudyante nga makita ang kaimportante sa paghimog prayoridad, sudli una og balas ang garapon. Dayon, sulayi og sulod ang gagmayng bato, nga dili na maigo. Hisgoti kon unsaon pagsulod sa duha. Habwaa ang sulod sa garapon ug sulayi pag-usab. Isulod og una ang gagmayng bato, dayon ang balas, nga uyogon ang garapon aron masudlan ang mga kal-ang.

• Unsa ang atong makat-onan gikan niini na leksiyon nga gigamitan og butang?

• Nganong lisod ang paggahin og panahon matag adlaw para sa Ginoo ug sa mga butang nga Iyang gipahimo kanato?

Samtang imong tun-an ang Hageo, pangita og inspirasyon gikan sa Espiritu Santo bahin kon sa unsang paagi panalanginan sa Ginoo ang imong kinabuhi samtang mogahin kag panahon para Kaniya.

Pagtukod pag-usab sa Templo

Aron tabangan ang imong mga estudyante nga masabtan ang konteksto sa Hageo, ikonsiderar ang pagpakigbahin sa mosunod nga summarize.

Human makabalik sa Jerusalem ang mga Judeo gikan sa pagkabihag sa Babilonia, naningkamot sila pag-ayo nga tukoron pag-usab ang ilang templo, siyudad, mga balay ug mga kinabuhi (tan-awa ang Esdras 1:1–6). Pero human milabay ang mga 15 ka tuig, wala malipay ang Ginoo nga wala nila hatagi og mas dakong prayoridad ang pagtukod pag-usab sa templo (tan-awa ang Esdras 4:24; Hageo 1:3–4). Iyang gipadala ang Iyang propeta nga si Hageo nga kombinsihon ang katawhan nga himoong prayoridad ang pagtukod sa balay sa Ginoo.

Basaha ang Hageo 1:2–4, nga pangitaon ang mga pulong o hugpong sa mga pulong nga nagpakita nga wala nakapunting ang mga Judeo sa pagtukod pag-usab sa templo.

Kinahanglan tingali nimong ipasabot nga ang “anindot” posibleng nagtumong sa mga balay nga nindot og mga bungbong ug naay kisame. Nagpakita tingali kini nga wala nila humana ang templo, pero nagtukod silag komportable ug kompletong kasangkapan nga mga balay para sa ilang kaugalingon.

• Unsay koneksiyon niini sa leksiyon nga gigamitan og butang?

Basaha ang Hageo 1:5–11, nga pangitaon kon unsang mga sangpotanan ang giatubang sa mga Judeo kay ilang giuna ang ubang butang imbes ang pagtukod pag-usab sa templo.

• Unsa ang pipila sa mga sangpotanan nga atong atubangon kon dili nato himoong prayoridad sa atong kinabuhi ang Ginoo?

  Pwede nimong dapiton ang mga estudyante nga ipasabot o markahan ang hugpong sa mga pulong diha sa bersikulo 5 ug 7.

• Sa imong hunahuna, unsa kaha ang ipasabot sa Ginoo dihang Iyang gidapit ang katawhan nga “palandonga ang [ilang] mga dalan”? (Hageo 1:5, 7)

“Gikan karon panalanginan ko kamo”

Ikonsiderar ang pagbasa o pag-summarize sa mosunod nga parapo aron tabangan ang mga estudyante nga masabtan ang nahibiling bahin sa asoy.

Gisunod sa mga Judeo ug sa ilang mga lider ang tingog sa Ginoo. Gidumala ni Zerubabel (ang gobernador) ug ni Josue (ang pangulong pari) ang pagtukod pag-usab sa templo (tan-awa ang Hageo 1:12–14). Mitabang usab si propetang Hageo (tan-awa ang Esdras 5:1–2). Samtang nagtrabaho sila, mihatag ang Ginoo og mga makapadasig nga mga pulong.

Isulat sa pisara ang mosunod nga dili kompletong kamatuoran: Kon unahon nato ang Dios diha sa atong kinabuhi …

Ikonsiderar ang pagbahin sa klase sa tulo ka seksiyon, diin basahon sa matag seksiyon ang usa sa mosunod nga mga tudling.

Basaha ang usa o kapin pa sa mosunod nga mga tudling, nga pangitaon ang pagdasig gikan sa Ginoo nga mokompleto sa kapahayag diha sa pisara:

Hageo 2:4–5

Hageo 2:6–9

Hageo 2:18–19

Pwedeng moduol sa pisara ang mga estudyante ug isulat kon unsaon nila pagkompleto ang pahayag. Ang mosunod mao ang mga ehemplo kon unsay pwede nilang isulat:

… mag-uban Siya nato.

… hatagan kita Niyag kalinaw.

… panalanginan kita Niya sa espirituwal ug sa temporal.

Aron makita ang dugang mga panalangin nga atong madawat tungod sa pag-una sa Dios, pwedeng basahon sa mga estudyante ang Mosiah 2:41 ug 3 Nephi 13:31–33. Dayon pwede nimong idugang sa pisara kon unsay ilang makaplagan.

• Hain sa mga panalangin sa Ginoo gikan niini nga mga bersikulo nga gusto kaayo nimo? Ngano man?

Tabangi ang mga estudyatne nga mailhan ang mga paagi diin ilang mauna ang Dios aron madapit ang Iyang mga panalangin. Kon wala nimo gipasalida ang bidyo nga “Ang Sinserong Tinguha sa Kalag” (3:28) dihang imong gitudlo ang Leksiyon 93: “Nehemias,” ikonsiderar ang pagpasalida niini dinhi gikan sa time code 0:00 hangtod 2:01. Kini nga bidyo anaa sa ChurchofJesusChrist.org. Pwede nimong dapiton ang mga estudyante nga mangita og mga paagi kon unsaon nila pagtubag ang mga pangutana sa ubos.

Ingon nga alternatibo, pwede nimong ipakigbahin ang mosunod nga senaryo. Dayon, pwedeng tubagon sa mga estudyante ang mosunod nga mga pangutana ingon nga managpares, gagmayng grupo, o ingon nga usa ka klase.

Handurawa nga anaa kay amiga nga ginganlan og Alex nga mibating wala siyay panahon nga himoong prayoridad sa iyang kinabuhi ang Dios. Matag adlaw siyang busy sa mga asaynment sa eskwelahan, mga higala, ug mga kalingawan, mao nga kapoy na kaayo siya ug wala nay gana para sa espirituwal nga mga butang. Nakita niya ang panginahanglan sa pagbag-o pero wala siya mahibalo kon unsay himoon.

• Unsa nga tambag ang imong ihatag kang Alex aron matabangan siyang unahon ang Dios?

• Sa unsang paagi siya panalanginan sa Dios tungod sa pag-una Kaniya?

  Human ang igong panahon, pwede nimong ipasalida ang nahibiling bahin sa “Ang Sinserong Tinguha sa Kalag” gikan sa time code 2:02 hangtod 3:28, nga dapiton ang mga estudyante nga pangitaon kon unsay gihimo ni Alex aron mabag-o.

• Unsang laing tambag ang imong ikahatag sa usa ka tawo nga mibati nga dili nila mauna ang Dios sa ilang kinabuhi tungod sa uban pang rason?

• Sa unsang paagi ka gipanalanginan sa Dios o ang imong kaila tungod sa pag-una Kaniya?

Paghimo og plano

Kini nga seksiyon makatabang sa mga estudyante nga magamit ang ilang nakat-onan. Ikonsiderar ang pagpakita sa mosunod nga pamahayag.

Personal nga pamalandongi ang mosunod nga pagdapit gikan kang Elder David A. Bednar sa Korum sa Napulog Duha ka Apostoles:

Akong sublion ang pahimangno sa Ginoo ngadto sa Iyang katawhan nga giluwas pinaagi sa Daang Tugon nga propeta nga si Hageo: “Busa karon mao kini ang giingon sa Ginoo sa mga panon: Palandonga ang inyong kahimtang” [Hageo 1:5].

Ang matag usa kanato kinahanglang motimbang-timbang sa atong temporal ug espirituhanon nga mga prayoridad sa sinsero ug mainampoon nga paagi aron sa pagtino sa mga butang sa atong mga kinabuhi nga mahimong mobabag sa buhong nga mga panalangin nga andam nga itugyan kanato sa Langitnong Amahan ug sa Manluluwas. Ang Espiritu Santo seguradong motabang kanato nga makakita sa atong mga kaugalingon kon kinsa gayod kita. (“Isul-ob ang Imong Kusog, O Zion,” Liahona, Nob. 2022, 94)

Lihok uyon sa pagdapit sa Ginoo nga “palandonga ang inyong mga dalan” (Hageo 1:5, 7) pinaagi sa pagpamalandong sa kaugalingon nimong mga prayoridad. Pamalandongi kon adunay mga butang nga kinahanglan nimo himoong prayoridad o tangtangon sa imong kinabuhi aron dapiton ang mga panalangin nga andam ihatag kanimo sa Langitnong Amahan ug ni Jesukristo.

Diha sa imong journal, idrowing ang usa ka garapon nga naay gagmayng bato, ug butangig label ang mga bato sa imong mga panaad aron himoong prayoridad ang Dios. Pagdrowing og balas sa gawas sa garapon, ug butangi kinig label sa mga butang nga gusto nimong tangtangon. Pagpili og usa o duha ka bato ug pagplano kon unsa, kanus-a, ug sa unsang paagi nimo tumanon ang maong mga pasalig.

Ionsiderar ang pagpakigbahin sa imong pamatuod o mga hunahuna bahin sa mga panalangin sa Langitnong Amahan ug ni Jesukristo samtang unahon nato Sila sa atong kinabuhi.

Dugang nga mga Kapanguhaan

Nganong kinahanglan nakong unahon ang Ginoo sa akong kinabuhi?

Si Presidente Russell M. Nelson mitambag:

Ang kalibotanon nga mga impluwensiya ug mga pag-aghat miasdang ug daghan kaayo. Apan daghan kaayo sa mga impluwensiya ang malinglahon, matintalon, ug makapalayo kanato sa dalan sa pakigsaad. Aron malikayan ang dili kapugngan nga kasakit nga mosunod, ako mohangyo kaninyo karon nga suklan ang kalibotanong pagtintal pinaagi sa paggahin og panahon alang sa Ginoo diha sa inyong kinabuhi—matag adlaw.

… Ako mohangyo kaninyo sa paggahin og panahon alang sa Ginoo! Himoang lig-on ang inyong kaugalingong espirituwal nga pundasyon ug makasugakod sa pagsulay sa taas nga panahon pinaagi sa pagbuhat niadtong mga butang nga magtugot sa Espiritu Santo nga magauban kaninyo kanunay. (“Paggahin og Panahon alang sa Ginoo,” Liahona, Nob. 2021, 120)

Unsaon nako paggahin og panahon sa espirituwal nga mga butang kon daghan pa kaayo kog buhatonon sa akong adlaw?

Si Presidente Ezra Taft Benson (1899–1994) mipasabot:

Kon atong unahon ang Dios, ang tanang ubang butang mapahimutang sa tukma nilang dapit o mawala kini sa atong kinabuhi. Ang atong gugma sa Ginoo modumala sa mga tinguha sa atong pagbati, sa mga gipangayo sa atong panahon, sa mga interes nga atong gitinguha, ug sa han-ay sa atong mga prayoridad. (“The Great Commandment—Love the Lord,” Ensign, May 1988, 4)

Si Elder Terence M. Vinson sa Seventy mitudlo:

Mobati kita og malungtarong kalipay kon ang atong Manluluwas ug ang Iyang ebanghelyo mahimong labing importante nga mga butang diin atong matukod ang atong kinabuhi. Hinoon, sayon ra kaayo alang nianang butanga nga mahimong mga butang niining kalibutana, diin ang ebanghelyo mahimo lamang nga opsyonal o sama ra kayano sa pagtambong sa simbahan og duha ka oras ma-Dominggo. Kon mao kini ang mahitabo, susama ra kini nga gibutang ang atong mga suhol ngadto sa “puntil nga may mga buslot.”

Gisultihan kita ni Haggeo nga magmapasaligon. …

Walay bahandi, ni bisan unsa nga kalingawan, estado, social media, mga video game, isport, pakig-uban sa usa ka inila, ni bisan unsa dinhi sa yuta nga mas bililhon pa kay sa kinabuhing dayon. Mao nga ang tambag sa Ginoo sa matag tawo mao ang “palandunga ang inyong mga dalan.” (“Tinuod nga mga Disipulo sa Manluluwas,” Liahona, Nob. 2019, 9, 11)

Dugang nga mga Kalihokan sa Pagkat-on

Diha sa templo, hatagan kita sa Ginoo og kalinaw

Kon makabenepisyo ang imong mga estudyante gikan sa mas lawom nga panaghisgot bahin sa templo, ikonsiderar ang pagdapit nila nga basahon ang Hageo 2:6–9, nga pangitaon ang mga panalangin nga gisaad sa Ginoo ngadto sa mga Judeo tungod sa templo. Dapita ang mga estudyante sa pagpakigbahin sa ilang nakaplagan. Tabangi silang mailhan ang kamatuoran nga sama sa mosunod: Dihang naa kita sa balay sa Ginoo, mahatagan kita Niyag kalinaw. Dayon pwede nimo silang dapiton sa pagtubag sa mosunod nga pangutana:

• Kanus-a nimo gibati nga gihatagan ka og kalinaw sa Ginoo pinaagi sa mga kasinatian sa templo?

Pagtukod pag-usab sa atong kinabuhi

Kon gusto kang mas makatutok kon sa unsang paagi may kalabotan ang atong personal nga mga kinabuhi sa pagtukod pag-usab sa templo, ikonsiderar ang pagpakigbahin sa istorya sa Provo City Center Temple. Kini nga templo gitukod pag-usab human masunog ang minahal nga tabernakulo (tan-awa ang “Pagkahuman sa Provo City Center Temple” gikan sa time code 0:05 hangtod 2:16).

Dayon dapita ang imong mga estudyante nga basahon ang Hageo 2:1–9, nga pamalandongan ang mga butang sa ilang kinabuhi nga nahisama sa pagtukod pag-usab sa templo nga naguba.

• Giunsa kita pagtukod pag-usab sa Ginoo human sa trahedya o kalisdanan?

Pagtandi sa Templo sa Kirtland

Makatabang tingali sa mga estudyante nga itandi ang pagtukod pag-usab sa templo sa Jerusalem sa pagtukod sa Templo sa Kirtland sa 1833. Pwedeng itandi sa mga estudyante ang mga Israelinhon sa unang Mga Santos sa Ulahing mga Adlaw pinaagi sa pagbasa sa Doktrina ug mga Pakigsaad 95:1–3, nga pangitaon kon nganong wala malipay ang Ginoo kanila.

Human ipasabot nga gipili sa mga Israelinhon nga sundon ang Ginoo, pwede dayon nimong ipasabot nga gisunod pod sa unang Mga Santos sa Ulahing mga Adlaw ang Ginoo ug gisugdan dayon ang pagtukod sa Templo sa Kirtland. Ang duha ka templo nagkinahanglan og dakong sakripisyo ug paningkamot aron matukod (tan-awa ang Kasaysayan sa mga Santos sa Ulahing mga Adlaw: 1815–1846 Materyal sa Magtutudlo [2018], Leksiyon 13: “Ang Templo sa Kirtland”).

Bidyo bahin sa pagbalanse sa mga prayoridad

Kon para nimo makabenepisyo ang mga estudyante gikan sa video bahin sa pagbalanse sa mga prayoridad, ikonsiderar ang pagpasalida sa bidyo nga “Kaalam ug Organisasyon” (3:19). Pwede nimong pangutan-on ang mga estudyante kon unsay ilang nakat-onan sa bidyo nga konektado sa asoy ni Hageo.