Home Evening Object Lesson
Maayong Paggamit sa Inyong Panahon
Kon inyong unahon ang Ginoo, adunay lawak alang sa uban.
Mga paghulagway pinaagi ni David Habben
Pila ka lain-laing mga kalihokan ang nagkinahanglan sa inyong pagtagad matag adlaw? Kitang tanan adunay samang 24 ka oras nga igahin, apan ang paagi nga kita mopili sa paggamit niana nga panahon mao ang makahimo sa dakong kalainan!
Si Presidente Dallin H. Oaks, Unang Magtatambag sa Unang Kapangulohan, miingon: “Ang gidaghanon sa maayong mga butang nga atong mahimo misobra kaayo sa panahon nga magamit sa pagbuhat niini. Pipila sa mga butang mas maayo kay sa maayo, ug kini mao ang mga butang nga nagkinahanglan nga unang hatagan og pagtagad sa atong kinabuhi. … Kinahanglan atong ipalabay ang ubang maayo nga mga butang aron sa pagpili sa uban nga mas maayo o labing maayo.”1
Niini nga kalihokan, inyong ipakita unsay mahitabo kon himoon nato nga unang prayoridad ang buhat sa Ginoo.
1. Pagpuno sa Panahon
Adunay daghang maayo nga mga kalihokan nga matinguha gamit ang atong panahon. Hangyoa ang inyong pamilya sa pagpaambit sa pipila ka mga butang nga gigahinan nila sa ilang panahon sa pagbuhat matag adlaw.
Ipasabut nga ang garapon nagrepresentar sa panahon. Ang mga bato ug balas nagrepresentar sa lain-laing mga butang nga atong mahimo sa atong panahon: ang mas dagko nga mga bato nagrepresentar sa mga butang nga gisugo sa Ginoo nga unahon nato, sama sa pagtuon sa kasulatan, pagserbisyo, buhat sa templo ug family history, ug pagtambong sa simbahan, samtang ang balas nagsimbolo sa ubang maayo nga mga kalihokan, sama sa paghimo og homework ug paggahin og panahon uban sa mga higala.
2. Dili Han-ay ang Paghatag og Prayoridad
Ibu-bu og una ang tanan nga balas sulod sa garapon, dayon ibutang ang dagko nga mga bato sa ibabaw. Kon inyong ibutang ang balas og una, wala nay igong espasyo alang sa tanang mas dagko nga mga bato—sama lang sa unsang paagi gihatagan nato og prayoridad ang ubang mga kalihokan kay sa mga butang nga gisugo sa Langitnong Amahan nga buhaton nato, basin og wala na kitay igong panahon alang sa labing importante nga mga butang.
3. Pagsabut sa Importansya sa usa ka Buluhaton
Si Jesukristo misugo, “Ayaw pangita sa mga butang niini nga kalibutan apan paninguha kamo sa pagtukod og una sa gingharian sa Dios, ug sa pagpatunhay sa iyang pagkamatarung,” (Ang Hubad ni Joseph Smith, Mateo 6:38 [sa ang Giya ngadto sa mga Kasulatan]). Hisguti kon unsaon ninyo paghan-ay sa inyong panahon pinaagi sa pagtinguha og una sa gingharian sa Dios.
Iyabo ang inyong garapon ug pagsugod og balik uban sa samang mga butang. Basin gusto motabang ang mga manghud. Ipabutang nila og una ang dagko nga mga bato ngadto sa garapon. Samtang inyong idugang ang balas pagkahuman, tan-awa kon sa unsang paagi kini mopuno sa sobra nga espasyo palibut sa dagko nga mga bato hangtud nga ang tanang balas masulod.
Pangutan-a ang inyong pamilya kon unsa ang ilang hunahuna sa gipasabut niini nga saad gikan ni Presidente Russell M. Nelson: “Samtang kamo kanunay nga mohatag sa Ginoo og dako nga bahin sa inyong panahon, Siya mopilo-pilo sa nahibilin.”2
Pag-una sa Ginoo
Kon magtinguha kita sa pagbuhat og una sa kabubut-on sa Dios, tabangan kita Niya nga makabaton og igong panahon alang sa ubang gikinahanglan ug makapabayaw nga mga butang. Busa kon naglisud kamo sa pagpangita og igong panahon sa paghuman sa homework, pagpalambo sa inyong mga talento, o pagkuha sa katulog nga inyong gikinahanglan, pangutana sa Ginoo kon unsay inyong mahimo aron sa paghan-ay sa inyong panahon sumala sa Iyang plano. Mag-uban sa paghimo og mga tumong isip usa ka pamilya sa pag-una sa buhat sa Ginoo—ug sa inyong relasyon uban Kaniya—matag adlaw.