Aduna Ka bay mga Pangutana mahitungod sa Ebanghelyo? Aniay Lima Ka Pamaagi sa Pagpangita og mga Tubag

Hulyo 2020

Sa Digital Lamang

Aduna Ka bay mga Pangutana mahitungod sa Ebanghelyo? Aniay Lima Ka Pamaagi sa Pagpangita og mga Tubag

Ni Chakell Wardleigh

Mga Magasin sa Simbahan

Ako usab adunay mga pangutana. Ug walay angay kahadlokan.

“Duna ba ninyo ang naay mga pangutana?”

Nakadungog na ba kamo niini sa katapusan sa leksyon ug naghunahuna, “Oo, ako adunay usa ka milyon” o “Oo, ako hingpit nga wala makasabut,” apan ikaw nagpabilin nga hilum?

Ako mibati. Ug usahay ako sa gihapon mahadlok nga adunay mga pangutana.

Ako mahadlok nga dili igo ang akong kahibalo, kon unsay gihunahuna sa uban, ug makakaplag og impormasyon nga makahatag kanako og dugang nga mga pangutana.

Dili igsapayan, kinahanglan nga walay kahadlok o kaulaw sa pagbaton og usa ka pangutana ug gustong makasabut pa og dugang, ilabi na kon kini bahin sa ebanghelyo. Ang Langitnong Amahan gusto nga kita magtinguha og dugang nga kahibalo! Bisan si Elder Dieter F. Uchtdorf miingon, “Ang pagpangutana dili timailhan sa kahuyang; kini ang mag-una sa paglambo.”¹

Ang tanan adunay daghan pa nga makat-onan. Ug ang mga pangutana mag-abli sa pultahan sa kahibalo ug mas hugot nga pagtuo—kutob nga ikaw nangita sa mga tubag diha sa eksakto nga mga paagi! Aniay lima ka mga pamaagi aron dili kaayo makapalibug ang inyong mga pangutana.

1. Susiha ang Inyong mga Tinubdan

Adunay daghang mga maayong tinubdan nga masaligan nga makahatag kaninyo og dugang nga mga panabut sama sa mga kasulatan ug mga materyal sa Simbahan. Apan adunay daghan usab nga mga sayop nga impormasyon ug dili kasaligan nga mga tinubdan nga nagpahipi dinhi sa kalibutan. Swerte lang nga kamo makaila sa kamatuoran gikan sa pagpanglingla!

Si Anthony Sweat, kaabag nga propesor sa kasaysayan ug doktrina sa Simbahan diha sa Brigham Young University, naghatag og lima ka pangutana nga ipangutana aron sa pagtino kon ang tinubdan masaligan ba:

Kini ba usa ka nag-unang tinubdan? (Gisulat o hinimo sa usa ka tawo kinsa naapil o nakaobserbar sa panghitabo.)
Kini ba usa ka asoy sa samang panahon? (Gisulat diha o duol sa pagkahitabo.)
Aduna ba kini usa ka patas nga panglantaw? (Kutob sa mahimo, ang tagsulat nagtinguha nga mahimo nga walay pinalabi, balanse, walay gidapigan, ug makiangayon.)
Unsa man ang iyang relasyon sa ubang mga tinubdan? (Ang mga petsa, kamatuoran, pag-angkon, ug uban pa nahisubay sa ubang mga kapanguhaan nga may samang panghitabo.)
Ang iyang mga pangangkon gisuportahan ba og ebidensya? (Ang mga pamahayag gibase diha sa lig-on nga ebidensya ug gipaluyohan og datos.)²

Si Elder Jeffrey R. Holland sa Korum sa Napulog Duha Ka mga Apostoles mitudlo, “Kon kalabut sa pagtuo ug konbiksyon, makatabang sa pagtumong sa inyong pangutana ngadto niadtong aduna mismoy pagtuo ug kombiksyon!”³ Ang iyang mga pulong ug ang mga pangutana sa ibabaw makahatag ninyo og pagsalig sa pagpangita og kasaligan nga impormasyon.

2. Salig sa mga Pulong sa mga Propeta

Ang mga propeta ug mga apostoles naghatag og mga doktrina ug kamatuoran (ug busa motubag alang kaninyo!) pinaagi sa pagpadayag. Ako nahupay sa dili na maihap nga mga higayon sa pagbasa o pagpaminaw sa pakigpulong sa kinatibuk-ang komperensya kon ako maglibog o maguol.

Bisan kon wala ninyo masabti ang tanan mahitungod sa mga mensahe sa pipila ka mga lider sa Simbahan, hinumdumi nga ang ilang mga pulong gikan sa Langitnong Amahan—sila gikan sa tinubdan sa gugma ug kamatuoran. Kon kamo mahinumdom ug mosalig sa mga pulong ni Elder Ulisses Soares: “Ang pagkaadunay mga propeta usa ka timaan sa gugma sa Dios alang sa Iyang mga anak,”⁴ makahatag kamo og paglaum ngadto sa inyong kinabuhi, bisan unsa nga kahibalo nga imong gipangita.

3. Pagtuon sa mga Kasulatan … Pagtuon Gayud

Unsay hitsura sa inyong pagtuon sa ebanghelyo? Ang ako mahimong mas maayo! Apan kon ako tinud-anay nga mamalandong unsay akong nabasa, akong namatikdan ang kalainan sa akong kaugalingon. Akong gibati ang dugang nga kalinaw ug paglaum. Sa pag-abli sa inyong hunahuna ngadto sa pagdasig diha sa mga kasulatan, sulayi kini nga mga sugyot:

Sugdi ug tapusa ang inyong pagtuon sa pag-ampo. Samtang kamo nagdapit sa Espiritu aron sa pagtabang kaninyo nga makasabut, makaila kamo og mas dakong panabut ug mga pag-aghat.
Isulat ang mga impresyon nga inyong madawat. Ang pagbasa unya niining mga impresyon makatabang kaninyo sa paghimo og mga koneksyon sa inyong kinabuhi ug sa pag-ila sa mga tubag sa paglabay sa panahon.
Paggahin og higayon nga maghunong. Paglingkod sa hilom ug pagbantay sa magbalik-balik nga mga panghuna-huna ug pagbati human kamo magbasa ug magtuon. Hinumdumi, ang Espiritu mamulong sa ligdong nga hinagawhaw nga tingog.

4. Pagkat-on Unsaon sa Pagdawat og Pagpadayag

Niining panahona sa kinabuhi, akong gikinahanglan ang Langitnong Amahan labaw sa tanan aron sa paggiya kanako ug sa pagtabang kanako sa paglig-on sa akong pagtuo. Ug masagmuyo ako usahay kon akong gibuhat ang tanan aron sa pagdapit sa Espiritu ug sa gihapon wala ako makadawat og bisan unsang tubag gikan sa langit. Salamat na lang, nakakat-on ko gikan ni Sister Sheri Dew, kanhi Ikaduhang Magtatambag sa Kinatibuk-ang Kapangulohan sa Relief Society, nga aron sa pag-abli sa linya sa komunikasyon sa Langitnong Amahan, pangutan-a ang inyong kaugalingon niini nga mga pangutana:

Ang inyong mga pangutana gipangutana ba nga adunay pangagpas nga naay mga tubag?
Andam ba kamo sa pagsalig sa Ginoo ug motuo sa labing maayo mahitungod Kaniya?

Ug dayon mohangyo sa Langitnong Amahan:

Nga motudlo kaninyo kon unsaon Niya sa pagpakigsulti kaninyo sa tagsa-tagsa.
Unsay Iyang gibati bahin kaninyo.

“Dayon tan-awa kon sa unsang paagi Siya motudlo kaninyo,” miingon siya [si Sheri]. “lakip sa mga kasulatan nga ganahan ninyo, ang mga gipahimug-atan nga mga mensahe sa kinatibuk-ang komperensya nga wala ninyo mabantayi sa unang higayon, ug uban pa.… Paglabay sa panahon, Siya mosulti kaninyo, ug samtang Iya kining buhaton, makakat-on kamo og dugang mahitungod sa pag-ila sa pagpadayag pinaagi sa Espiritu.”⁵

Kining duha ka mahinungdanon nga mga pangutana nakahimo og dakong kalainan sa akong abilidad sa pag-ila ug pagdawat og pagpadayag.

5. Padayon sa Pagbuhat Unsay Imong Nahibaloan

Usahay ang mga tubag dili moabut diha-diha dayon. Ang imong tubag karon mahimong ang yanong pagsalig sa Langitnong Amahan ug sa pagbaton og pailub. Hinumdumi ang tambag ni Elder Uchtdorf nga “duhaduhai una ang inyong pagduhaduha sa dili pa mo magduhaduha sa inyong pagtuo.”⁶

Kon kamo nawad-an og kadasig, hunahunaa ang mga kamatuoran nga inyong gihuptan diha sa inyong kasingkasing. Kon ako nanglimbasug, akong hinumduman kadtong mga higayon sa dihang ako nasayud nga may kasiguroan nga ako minahal nga anak nga babaye sa Langitnong mga Ginikanan, nga ang Dios adunay plano alang kanako, ug nga si Jesukristo mao ang akong Manluluwas.

Kon aduna kamoy mga pangutana, mahimong sayon ang magpunting sa unsay wala nimo masabti imbis sa unsay imong buhaton. Apan kon andam kamo sa pagpahumok sa inyong kasingkasing, pagbaton og mahangturong panglantaw, ug mapainubsanong ipahiangay ang inyong kabubut-on sa Langitnong Amahan, kanunay Siyang mogiya kaninyo ngadto sa kamatuoran ug mohatag kaninyo og paglaum hangtud moabut ang dugang nga kahibalo. Ug usa ka adlaw, kamo makadawat sa mga tubag sa inyong tanan nga mga pangutana (tan-awa sa Doktrina ug mga Pakigsaad 101: 32–36).