Ang Akong Bag-ong, Karaan nga Pamilya
Ang tagsulat nagpuyo karon sa Utah, USA.
Kon imo kining tugutan, walay butang nga dili mausab sa ebanghelyo.
Paghulagway pinaagi ni Lobo
Ang mga misyonaryo naghupot og usa ka litrato. “Unsay imong nakita?” nangutana sila.
“Usa ka malipayon nga pamilya,” mitubag ko.
“Ang tanan ba nga pamilya malipayon?”
Milingo-lingo ko sa akong ulo. “Nakita ninyo ang akong pamilya,” mipasabut ko.
Nag-edad ko og 16 anyos nga nagpuyo sa Brazil, diin ako nagpuyo sa tibuok nakong kinabuhi. Ang mga misyonaryo nagtudlo kanako sa pipila ka semana, apan walay usa sa akong pamilya ang gustong maminaw. Nianang panahona, ang mga misyonaryo kasagaran makita ang akong pamilya nga mag-away ug maglalis. Ang akong pamilya ug sa mapahiyumon nga pamilya diha sa litrato walay komon.
Usa sa mga elder miingon, “Nan, basin ang bag-o nimong pamilya dili ingon niini. Apan mahimo ka nga magsugod og imong pamilya sa umaabot nga lahi.”
Dihang nahuman na ang among panag-istorya, mihangyo sila pag-usab nako sa pag-ampo mahitungod sa unsay among gitun-an. Sama sa naandan, wala gayud ko mosaad sa pagbuhat sa ingon. Nahimuot ko sa akong gibati sa dihang mibisita ang mga misyonaryo, ug ang ebanghelyo dunay kahulugan nako. Apan nahadlok ko sa tubag nga lagmit akong madawat. Kon ang ebanghelyo tinuod, kinahanglan ko nga mohimo og daghang kausaban.
Usa ka Bag-ong Pagpili
Sa pagbiya sa mga elder, dili ko makapugong nga maghunahuna mahitungod sa malipayon nga mga pamilya. Ang amoa layo ra kaayo. Ang akong papa wala diha sa akong kinabuhi. Ang akong relasyon sa akong mama dili nindot. Si lola ang nag-atiman kanamo, apan walay usa kanamo nga nagtinil og batasan sama sa usa ka pamilya sa paagi nga gitudlo sa mga misyonaryo. Walay usa namo ang mipadayag og gugma sa usag usa o gani migahin og dakong panahon nga magkauban.
Sa tibuok nakong kinabuhi misaad ko nga mamahimo kong usa ka maayong amahan ugma damlag. Mahimo kong ginikanan nga wala gayud nako maangkon. Apan samtang ang mga misyonaryo nagtudlo kanako, misugod ko sa pagkaamgo nga nagbuhat ko sa samang butang nga gibuhat sa akong mga ginikanan sa akong edad. Nagdugay ko sa gawas, gibuhat unsay akong gusto, ug nagpakabuhi nga sama sa usa ka rebelde. Bisan wala gituyo, akong gisubli ang samang istorya.
Oras na para mangutana sa Dios.
Sa dihang sa katapusan nag-ampo ko, nadawat nako ang tubag nga dugay na nakong gilauman. Ang Simbahan tinuod! Karon oras na para mohimo og pagpili.
Usa ka Bag-ong Ako
Ang akong lola kinahanglan mohatag og pagtugot sa dili pa ko mabunyagan. Supak siya niini, apan namugos ko.
“Lola, hain nga Leonardo nga imong gusto?” Nangutana ko. “Ang usa kinsa mag-inom ug manigarilyo ug gabii na kaayong mouli sa balay? O gusto ba nimo kon si kinsa ako karon? Kini nga mga kausaban tungod sa ebanghelyo.”
Sa katapusan miuyon si lola, ug ako nabunyagan ug nakumpirmahan. Gikan nianang higayuna, usa ka butang nga makapainteresado ang nahitabo sa akong pamilya—usa ka butang nga wala nako hingpit nga maamguhi hangtud sa pipila ka mga tuig ang milabay.
Usa ka Bag-ong Pamilya
Sa wala pa ko mobiya alang sa akong misyon ngadto sa habagatang Brazil, si Lola mitambong og komperensya sa stake uban nako. Pagkahuman nagpahigayon kami og usa ka gamay nga panagtigum sa pagpamatuod uban sa pamilya ug mga higala. Sa akong katingala, si Lola gustong mosulti.
“Sukad nga si Leonardo mipasakop sa inyong simbahan, ang akong pamilya nagsugod nga mahimong tinuod nga pamilya,” miingon siya. Siya milista dayon sa mga paagi nga ang among tibuok pamilya nagkasuod: Kami karon magkauban na. Gisugdan namo ang pag-ingon og “Gimahal ko kamo” sa usag usa, nga wala mahimo sukad. Ang pag-away ug panaglalis nahunong. Tinuod nga panaghigalaay milambo diha kanamong tanan. Aduna na kami mas daghang makaon ug napanalanginan sa kaabunda sa ubang mga bahin.
Nakamatikud usab ako niining mga kausaban, apan wala ko nakaamgo nga ang panahon masumpay ngadto sa dihang gibunyagan ko.
“Dili man ko sakop sa inyong simbahan,” miingon siya, “apan ako usa ka higala sa inyong simbahan. Ug ako nasayud nga ang among pamilya napanalanginan tungod sa pagpili ni Leonardo.”
Usa ka Bag-ong Pagsabut
Hapit dili ako makatuo niini! Ug bisan pa niana, si Lola misulti sa unsang paagi ang among pamilya nagkasuod, sa kalit nahinumdom ako sa mga litrato nga gipakita kanako sa mga misyonaryo kaniadto. Sa una, nagtuo ko nga ang bugtong paagi nga makabaton og usa ka malipayon nga pamilya mao ang akong pamilya sa umaabut.
Apan sayop ako. Ang akong kasamtangan nga pamilya malipayon! Kami nakakat-on sa paghigugma sa usag usa.
Tingali walay usa sa akong mga sakop sa pamilya ang moapil sa Simbahan niining kinabuhia. Apan bisan kon sila dili, ako nasayud nga ang Dios mipanalangin na kanamo sa daghan kaayong paagi. Ang ebanghelyo ni Jesukristo nagpakita kanato kon unsaon sa pagpalambo ang atong mga pamilya, dili igsapayan unsay hitsura sa atong sitwasyon sa pamilya.